မြဝတီ အာရှလမ်းသစ် တိုက်ပွဲကြောင့် နှစ်ဖက် ကားတန်း ရာချီ စောင့်ဆိုင်းနေရ

တိုက်ရိုက် ထုတ်လွှင့်ချက်

1. ၁၅ မတ် ၂၀၂၂မန္တလေးမှာ ဆိုင်ကယ်ပေါက်ကွဲသေဆုံးခဲ့တဲ့လူငယ်နှစ်ဦးအလောင်းကို ဒီ‌နေ့လည်အထိ ကောက်ယူလို့မရသေး

   

   ဓာတ်ပုံ ရင်းမြစ်, CJ

   မန္တလေးတိုင်း၊ ချမ်းမြသာစည်မြို့နယ်၊ ၇၈ လမ်းအနီးမှာ မနေ့ မတ်လ ၁၄ရက်ညနေ ၆နာရီခွဲခန့်မှာ လူငယ် ၂ ဦးစီးလာတဲ့ဆိုင်ကယ်တစ်စီး ပေါက်ကွဲမီးလောင်မှုဖြစ်ပွားခဲ့ပါတယ်။

   ဒီပေါက်ကွဲမှုကြောင့် လူငယ်တဦးဟာ အဲဒီနေရာမှာတင်သေဆုံးခဲ့ပြီး နောက်တဦးဟာ မီးလောင်တာနဲ့ အနည်းငယ်အကွာမှာ မှောက်လျက်အနေအထားနဲ့ပြင်းထန်ဒဏ်ရာရခဲ့တယ်လို့ မျက်မြင်တွေကပြောပါတယ်။

   အဲ့ဒီဖြစ်စဉ်ဖြစ်ပြီးပြီးချင်းမှာပဲ မီးသတ်တွေသာမက လူမူကူညီရေးကားတွေရော စစ်ကောင်စီတပ်ဖွဲ့ဝင်တွေပါ ရောက်ရှိလာခဲ့ပေမဲ့ ကူညီရေးအဖွဲ့တွေရော မီးသတ်တွေပါ ကူညီခွင့် မရခဲ့ဘူးလို့ သိရပါတယ်။

   “စစ်တပ်ကအကြီးပိုင်းတွေပါရောက်လာကြတယ်။ အဲ့ဒါကနေ သူတို့ထပ်ကြီးတဲ့သူ နန်းတွင်းထဲကို G 1 ဆိုလား သူ့ကိုဖုန်းထပ်ဆက်တယ်။ အဲ့လူကဖုန်းထဲကလူအမိန့်ပေးလိုက်တာက ဒီလူနှစ်ယောက် သေတယ်ဆိုလည်း ဒီတိုင်းပဲ ထားထားလိုက်၊ မသေမရှင်ဖြစ်နေတယ်ဆိုလည်း ဒီတိုင်းပဲထားထားလိုက်။ ဒီနေ့မနက် ၁၀ နာရီအထိ လုံးဝအလောင်းမကောက်ရဘဲ ထားထားမယ်ဆိုပြီးပြောခဲ့တာ။ အဲ့မှာဖြစ်စဉ်နေရာကို အတားအဆီး တွေထားပြီး နယ်မြေခံရဲကို မကြာခဏကြည့်ဖို့၊ ဘယ်သူမှအလောင်းမကောက်ဖို့ အမိန့်ထုတ်ခဲ့တာပါ”လို့ မျက်မြင်ပြည်သူတဦးက ဘီဘီစီကို ပြောပါတယ်။

   

   ဓာတ်ပုံ ရင်းမြစ်, CJ

   ဘီဘီစီကဆက်သွယ်မေးမြန်းတဲ့ နေ့လည် (၁၂)နာရီခွဲကျော်အထိ ရုပ်အလောင်းတွေကိုမကောက်ရသေးဘူး လို့ သိရပါတယ်။

   ပေါက်ကွဲဖြစ်ပွားပြီး ရုပ်အလောင်းတွေရှိနေဆဲနေရာဟာ လူသွားလူလာများတဲ့ သိပ္ပံလမ်းမကြီးပေါ်မှာဖြစ်ခဲ့တာဖြစ်ပြီး ၇၃ လမ်းကနေ ၇၈ လမ်းအထိကို စစ်ကောင်စီဘက်ကနေ လမ်းတဖက်ပိတ်ထားတာ တွေ ဒီကနေ့မနက်အထိ လုပ်ဆောင်ထားဆဲလို့ ပြောပါတယ်။

2. ၁၅ မတ် ၂၀၂၂မြန်မာ့အရေး ကုလအထူးကိုယ်စားလှယ်နဲ့တွေ့ဆုံထားတယ်လို့ ကန်နိုင်ငံခြားရေးဌာန မူဝါဒအကြံပေး ပြော

   မြန်မာစစ်တပ်ကို ဖိအားပေးပြီး လူထုကို ကူညီနိုင်ဖို့အရေးကို ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံ ဆိုင်ရာအထူးကိုယ်စားလှယ်နဲ့ တွေ့ဆုံဆွေးနွေးထားတယ်ဆိုပြီး အမေရိကန်နိုင်ငံခြားရေးဌာန မူဝါဒပိုင်းဆိုင်ရာ အကြံပေး ကောင်ဆယ်လာ ဒဲရက်ရှလက်က ပြောလာပါတယ်။

   ကုလအထူးကိုယ်စားလှယ် နိုလင်းဟေဇာနဲ့ စကားပြောဆိုခဲ့တဲ့အကြောင်းကို ကောင်ဆယ်လာ ဒဲရက်ရှလက်က ဒီနေ့ မတ်လ ၁၅ ရက်မှာ လူမှုကွန်ယက်ကနေ ထုတ်ပြန်ပြောဆိုလာတာဖြစ်ပါတယ်။

   Skip X post

   X ၏အကြောင်းအရာများကို ပြခွင့်ပြုမှာလား။

   ယခုဆောင်းပါးတွင် X မှ အကြာင်းအရာများပါဝင်ပါသည်။ ယင်းဆိုက်မှ ကွတ်ကီးနှင့်အခြားနည်းပညာများသုံးနိုင်သဖြင့် စာမျက်နှာကို မဖွင့်ခင် သင့်ခွင့်ပြုချက်ကိုတောင်းခံပါသည်။ သင်မဆုံးဖြတ်ခင် X ကွတ်ကီးမူဝါဒ နှင့် ကိုယ်ရေးအချက်အလက်လုံခြုံမှု မူဝါဒ တို့ကို ဖတ်ရှုနိုင်ပါသည်။ သဘောတူလျင် 'လက်ခံပြီးဆက်သွားပါမည်' ဆိုသည်ကို ရွေးချယ်ပေးပါ။

   သဘောတူပြီးရှေ့ဆက်ကြည့်ရန်

   သတိပေးချက်- ပြင်ပဝက်ဆိုက်များတွင်ပါဝင်သောအကြောင်းအရာများအတွက် ဘီဘီစီကတာဝန်မယူပါ။

   End of X post

   အကြမ်းဖက်မှုရပ်တန့်ဖို့ မြန်မာအာဏာသိမ်းစစ်ခေါင်းဆောင်တွေကို ဖိအားပေးပြီး မြန်မာပြည်သူတွေအတွက် လူသားချင်းစာနာထောက်ထားမှု အကူအညီပေးပေးနိုင်ရေး ဘယ်လိုလုပ်ဆောင်နိုင်မလဲဆိုတာတွေကို ဆွေးနွေးခဲ့တယ်လို့ ဆိုပါတယ်။

   ဒဲရက်ရှလက်ဟာ နိုင်ငံခြားရေး ဝန်ကြီးကို ကမ္ဘာ့ နိုင်ငံရေး အဓိက ပြဿနာတွေနဲ့ စပ်လျှဉ်းပြီး အမေရိကန် အနေနဲ့ မူဝါဒ ဘယ်လို ချမှတ် လုပ်ဆောင်သင့်လဲ ဆိုတာကို အကြံပေးရသူ ဖြစ်ပါတယ်။

   သူဟာ မြန်မာနိုင်ငံ စစ်အာဏာတကျော့ပြန် သိမ်းခံရပြီးတဲ့နောက် ၂၀၂၀ ရွေးကောက်ပွဲ ရလဒ်ကနေ တဆင့် တရားဝင်မှုကို ဆက်ခံကြောင်း ကြေညာ ဖွဲ့စည်းထားတဲ့ CRPH/NUG အဖွဲ့က တာဝန်ရှိသူတွေနဲ့ ထိတွေ့ ဆက်ဆံ ဆွေးနွေးနေတဲ့ အမေရိကန် ထိပ်တန်း အရာရှိ တစ်ယောက်လည်း ဖြစ်ပါတယ်။

   စစ်အာဏာသိမ်းမှုကို ဆန့်ကျင်ပြီး NUG နဲ့ လက်တွဲနေသူ ကုလသမဂ္ဂ ဆိုင်ရာ မြန်မာ သံအမတ်ကြီး ဦးကျော်မိုးထွန်းနဲ့ ပြီးခဲ့တဲ့ စက်တင်ဘာလထဲကပဲ ကောင်ဆယ်လာ ဒဲရက်ရှိုလေး နယူးယောက် မြို့တော်မှာ တွေ့ဆုံ ဆွေးနွေး ခဲ့ပါတယ်။

3. ၁၅ မတ် ၂၀၂၂ကော့ကရိတ်အာရှလမ်းမကြီးပေါ် ဒီမနက်လည်းတိုက်ပွဲဆက်ဖြစ်နေတာကြောင့် ခရီးသွားကားတွေပိတ်မိနေ

   ဒီကနေ့ မတ်လ (၁၅)ရက် မနက်ပိုင်းမှာ ကရင်ပြည်နယ်၊ ကော့ကရိတ်က အာရှလမ်းသစ်ဘက်မှာ စစ်ကောင်စီနဲ့ KNLA ပူးပေါင်းအဖွဲ့တွေအကြား တိုက်ပွဲဆက်ဖြစ်နေတာကြောင့် ခရီးသွားကားတွေပိတ်မိနေတယ်လို့ သိရပါတယ်။ ကော့ကရိတ်မြို့တွင်းမှာ မနေ့မတ်လ (၁၄)ရက်ညပိုင်းက စစ်ကောင်စီတပ်ရင်း (၉၇)အမြှောက်ပစ်နေရာနဲ့ မြို့တော်ဦးဘုန်းကြီးကျောင်းအနီး စစ်ကတုတ်၊ အာရှလမ်း တောနော်ကွေ့နေရာတွေကို KNU တပ်မဟာ (၆)ရဲ့ KNLA ပူးပေါင်းအဖွဲ့တွေက ဝင်ရောက်တိုက်ခိုက်ခဲ့ပါတယ်။ အဲ့ဒီနောက် ဒီမနက်ပိုင်းမှာ နှစ်ဖက်တိုက်ပွဲတွေ ဆက်ရှိလာတာပါ။

   "ညကတော့ ကော့ကရိတ် ၉၇ တပ် အနောက်ဘက် ဂေါက်ကွင်း ဘက်ကနေ အမြှောက် ပစ် နေရာဘက်မှာ တိုက်ပွဲ ဖြစ်တယ်၊ မြို့တော်ဦး ဘုန်းကြီးကျောင်းဘက်မှာ ဖြစ်တယ်။ မြိုထဲ တင် ဖြစ် တာ ပေါ့ နော်၊ ကရင်အဖွဲ့ တွေ မြို့က စစ်ကောင်စီတပ်ရှိတဲ့ နေရာတွေ ဝင်ပစ်ပြီး ပြန်ဆုတ် သွား တဲ့ သဘောပေါ့၊ ညက ၈နာရီကျော် မှာ စဖြစ်ပြီး ၁၀ နာရီ လောက်မှာ ရပ်သွား တယ်" လို့ ကော့ကရိတ် KNLA ပူးပေါင်း တပ် ဖွဲ့ ဝင် က ပြောဆိုပါတယ်။ အဲဒီလိုပစ်ခတ်အပြီးမှာပဲ အာရှလမ်း တံတားပြင်နေတဲ့ နေရာအပေါ်ဘက် မှာ တိုက်ပွဲ ဆက်ဖြစ်တာ ကို လက်နက်ကြီး လှမ်း ပစ်သံ တွေ တော့ ဆက်ကြား နေရတယ်လို့ ဒေသခံတွေထံကသိရပါတယ်။

   "ဒီမနက်တော့ အာရှ လမ်းဘက်မှာ တော့ တိုက်ပွဲ ဖြစ်နေတယ်။ ကား တွေ အစီးရေး အများကြီး လမ်း မှာ ပိတ်မိ နေတယ်၊ ကျနော့်တို့ဘက်ကတော့ တပ်က ပစ်လာမယ့် အခြေအနေကို စောင့် ကြည့် နေတယ်" လို့ သူကဆက်ပြောပါတယ်။

   တပ်မဟာ ၆ ဧရိယာ အတွင်းကနေ စစ်ကောင်စီ တပ်တွေ ပြန်ဆုတ်ဖို့မတ်လ (၇)ရက်နေ့က စာထုတ် ပြီးတဲ့နောက်ပိုင်း ဒီရက်ပိုင်းအတွင်း စစ်ကောင်စီ တပ်နဲ့ကရင်နယ်ခြား စောင့်တပ် BGF တပ်တွေဟာ အင်အားတိုးချဲ့ နယ်မြေရှင်းလင်း တိုက်ခိုက်မှု့ များဆက်လက် လုပ်ဆောင်လာခဲ့ပါတယ်။ အဲ့ဒီလိုစစ်ရေးတိုးချဲ့လာတာကြောင့်လေးကေကော် ၊ ကြာအင်းဆိပ်ကြီး၊တောင်ကြာအင်း၊ အာရှလမ်း၊ ကော့ကရိတ် မြို့ အနီးဝန်းကျင်က စစ်ကောင်စီ စစ်ကြောင်းတွေနဲ့ KNLA ပူးပေါင်းတပ်တွေအကြား နေ့စဉ် တိုက်ပွဲတွေ ဖြစ်ပွားလာခဲ့တာပါ။

   ဒါကြောင့် ဘားအံ -ကော့ကရိတ်- မြဝတီ- ကြာအင်းဆိပ်ကြီး လမ်းပိုင်း တွေမှာ သွားလာရေး ပြတ်တောက် နေပြီး ဒေသခံ ပြည်သူတွေ‌လည်း စစ်ဘေးရှောင် နေကြရပါတယ်။

   "မနေ့က မတ် လ ၁၄ ရက် ပေါ့ ၊တောင်ကြာအင်း မှာ က ပစ်ခတ်မှု ၂ကြိမ် ဖြစ်တယ်၊ BGF ၂ယောက်သေတယ်၊ညနေကြတော့ မိုင်တဲ ဖုန်းတိုင် မိုင်းခွဲ ခံရတယ်။စစ်တပ် နဲ့ တိုက်ပွဲ ဖြစ်တယ် ဆို တော့ဘုန်းကြိးကျောင်း ဘဲ ပြေး စု နေကြရတာပေါ့။ ကော့ကရိတ်ဘက် လည်း သွားမရဘူး တပ်နဲ့ တွေ ရင်ပစ်သတ် ကားမီးရှို့ တယ်ဆိုတော့ တော် တော် လေးကို ဘဲ ကြောက်နေကြပြီ။"ဟု တောင်ကြာအင်း ကျေးရွာဒေသ ခံ က ပြောပါတယ်။

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

4. ၁၅ မတ် ၂၀၂၂ထားဝယ်မှာ တက်ကြွလှုပ်ရှားသူ ညီအစ်ကို နှစ်ဦး ထောင်ဒဏ် ၁၂ နှစ်စီ ချမှတ်ခံရ

   

   ဓာတ်ပုံ ရင်းမြစ်, DPPN

   တနင်္သာရီတိုင်း၊ ထားဝယ်မြို့က စစ်အာဏာသိမ်းဆန့်ကျင်တဲ့နိုင်ငံရေးတက်ကြွလှုပ်ရှားသူ ညီအစ်ကို ၂ ဦးကို ထားဝယ်ထောင်တွင်းတရားရုံးကနေ မတ်လ ၁၄ ရက်မှာ အလုပ်နဲ့ ထောင်ဒဏ် ၁၂ နှစ်စီချမှတ်လိုက်တယ်လို့ သိရပါတယ်။

   အမိန့်ချမှတ်ခံရသူတွေဟာ ထားဝယ်မြို့ပေါ်က ကျောက်မှော်ကြီးရပ်ကွက်မှာနေထိုင်တဲ့ အသက် ၁၉ နှစ်အရွယ် ကိုပိုင်ခန့်ဇော်နဲ့ အသက် ၂၄ နှစ်အရွယ် ကိုဆက်မိုင်စိုးတို့ ညီအစ်ကို ၂ ဦးဖြစ်တယ်လို့ ထားဝယ်နိုင်ငံရေးအကျဉ်းသားများကွန်ယက်က သတင်းထုတ်ပြန်ပါတယ်။

   သူတို့ ၂ ဦးဟာ ၂၀၂၁ ခုနှစ်၊ မေလမှာ စစ်ကောင်စီတပ်တွေရဲ့ဖမ်းဆီးတာခံရပြီး ကြည်းရေလေတပ်ဖွဲ့ဝင်တစ်ဦးဦးကို ပုန်ကန်အောင်၊ တာဝန်ပျက်ကွက်အောင်လှုံ့ဆော်မှု ၅၀၅(က)၊ လူမျိုးအချင်းချင်းဖြစ်စေ လူမျိုး တမျိုးနဲ့ တမျိုးဖြစ်စေ တစ်ဖက်နဲ့တစ်ဖက် ပြစ်မှုကျူးလွန်အောင် လှုံ့ဆော်ရာရောက်ရင်စွဲဆိုတဲ့ ပုဒ်မ ၅၀၅ (ဂ)၊ ဥပဒေနဲ့ဆန့်ကျင်တဲ့အစုအဝေးမှာပါဝင်မှု ပုဒ်မ ၁၄၅၊ ပေါက်ကွဲပုဒ်မ ၃/၅ တို့နဲ့ တရားစွဲခံဆိုခံခဲ့ရတာဖြစ်ပါတယ်။

   သူတို့ ၂ ဦးဟာ ထောင်ဒဏ် ၂၈ နှစ်ချမှတ်ခံထားရတဲ့ ကိုဟိန်းမင်းကိုကိုနဲ့အမှုတွဲဖြစ်ပြီး မတ်လ ၁၄ ရက်မှာ အပြီးသတ်အမိန့်ချမှတ်ခံလိုက်ရတာဖြစ်ပါတယ်။

5. ၁၅ မတ် ၂၀၂၂ပြည်တွင်းမှာ ကိုဗစ်ကာကွယ်ဆေးထုတ်လုပ်နိုင်ပြီလို့ စစ်ကောင်စီပြော Myancopharm လို့ အမည်ပေးထား

   စစ်ကောင်စီလက်အောက် စက်မှုဝန်ကြီးဌာန၊ ဆေးဝါးထုတ်လုပ်ရေးကနေ ကိုဗစ် -၁၉ ရောဂါ ကာကွယ်ဆေးကိုထုတ်လုပ်နိုင်ပြီလို့ မနေ့ မတ်လ ၁၄ ရက်ထုတ် စစ်ကောင်စီသတင်းစာမှာဖော်ပြလာပါတယ်။ ကိုဗစ်ကာကွယ်ဆေးကို ပြည်တွင်းမှာထုတ်လုပ်နိုင်ဖို့ ၂၀၂၁ ခုနှစ်၊ ဇူလိုင်လကတည်းက ဆောင်ရွက်ခဲ့တာဖြစ်ပြီး ကာကွယ်ဆေးထုတ်လုပ်မှု နည်းပညာဆိုင်ရာ လျှို့ဝှက်ချက်ထိန်းသိမ်းမှုသဘောတူစာချုပ်(Non Disclosure Agreement) ရေးထိုး လုပ်ဆောင်ခဲ့ကြတယ်လို့ ဆိုပါတယ်။

   ဒီကိုဗစ်ကာကွယ်ဆေးထုတ်လုပ်ရာမှာအဆင့် (၁၃)ဆင့်ရှိပြီး အရင်ဆုံး ဆေးဝါးထုတ်လုပ်မှုလိုင်းမှာ ပိုးမွှားကင်းစင်မှုရှိ၊မရှိစမ်းသပ်ဆောင်ရွက်တဲ့အဆင့်( Media Fill Simulation)ကို မဖြစ်မနေဆောင်ရွက်ခဲ့တယ်လို့ ဆိုပါတယ်။ အဲ့ဒီ Media Fill Simulation ဆိုတာကတော့ ကိုဗစ်ရောဂါကာကွယ်ဆေးအစား Media(ပိုးပေါက်လွယ်တဲ့ အရည်)ကို အသုံးပြုပြီး ကာကွယ်ဆေးထုတ်လုပ်တဲ့ပုံစံအတိုင်းဆောင်ရွက်တာပါ။ ဒီ Media Fill Simulation ကို တရုတ်နိုင်ငံက ပညာရှင်တွေက အနီးကပ်ကြီးကြပ်ပေးခဲ့တာလို့ ဖော်ပြထားပါတယ်။

   အဲ့ဒီကတဆင့် ကာကွယ်ဆေးစမ်းသပ်ထုတ်လုပ်မှုကို ထပ်မံဆောင်ရွက်ခဲ့ပြီး အဲ့ဒီလိုကာကွယ်ဆေးစမ်းသပ်ထုတ်လုပ်မှု အပတ်စဉ် သုံးခုထွက်ရှိပြီးတဲ့အခါမှသာ အဲ့ဒီဆေးတွေအနေနဲ့ သတ်မှတ်စံချိန်စံနှုန်းနဲ့ ကိုက်ညီတယ်ဆိုမှ ကာကွယ်ဆေးထုတ်လုပ်တာ အောင်မြင်တာဖြစ်ပါတယ်။

   နောက်ထပ် ပုလင်းသွင်းဖြည့်တင်းဖို့အဆ်အတွက် ကာကွယ်ဆေး (RTF Bulk) ဝယ်ယူပြီး ပုလင်းသွင်းဖြည့်တင်းတဲ့ (Fill/ Finish) ပုံစံနဲ့ ဆောင်ရွက်တာလို့ဆိုပါတယ်။ အဲ့ဒီ Ready To Fill Bulk (RTF Bulk) ဆိုတာဟာ ပြည်ပကနေ အဆင်သင့် အမြောက်အမြားထုတ်လုပ်ပြီး ကာကွယ်‌ဆေးတွေကို ပြည်တွင်းမှာ ပုလင်းတွေထဲပြန်လည် ဖြည့်တင်း ထုတ်ပိုးတဲ့ Refill ပုံစံထုတ်လုပ်တာလို့ ကျန်းမာရေးအသိုင်းအဝိုင်းကပြောပါတယ်။

   စက်မှုဝန်ကြီးဌာန၊ မြန်မာ့ဆေးဝါးလုပ်ငန်းက ဒီကိုဗစ်ကာကွယ်ဆေးကို"Myancopharm” အမည်နဲ့ ထုတ်လုပ်သွားမှာဖြစ်ပြီး ကာကွယ်ဆေး တပုလင်းကို လူငါးဦးထိုးနှံနိုင်မယ်လို့ ဆိုပါတယ်။

   “ဆေးက ထွက်တော့မထွက်သေးဘူးခင်ဗျ၊ သတင်းစာထဲမှာဖော်ပြတဲ့အတိုင်း Quality Test တွေလုပ်နေတုန်းပါပဲ။ သူဖြတ်သန်းရမယ့်အဆင့်တွေဖြတ်ပြီရင်တော့ ပြည်တွင်းမှာပဲ ဝယ်ယူသုံးစွဲနိုင်မယ့်အနေအထားပေါ့။ ဘယ်အချိန်ရမလဲဆိုတာကတော့ သူတို့စက်မှုအပေါ်ပဲမူတည်တာပေါ့။”လို့ ဒီပြည်တွင်းထုတ် ကာကွယ်ဆေးတွေ ဘယ်တော့စတင်ထိုးနှံမလဲဆိုတာနဲ့ပတ်သက်ပြီး ကျန်းမာရေးဝန်ကြီးဌာန ပြောရေးဆိုခွင့်ရ ဒေါက်တာသန်းနိုင်စိုးက ဘီဘီစီကို ပြောပါတယ်။

   ပြည်တွင်းမှာ အခုလိုကိုဗစ်ကာကွယ်ဆေးထုတ်လုပ်နိုင်ဖို့ BPI ဆေးဝါးစက်ရုံမှူးဟောင်းဖြစ်တဲ့ ဒေါက်တာအောင်ဇော်က ဦးဆောင်ခဲ့တာလို့သိရပါတယ်။ ဒေါက်တာအောင်ဇော်ဟာ အရပ်သားအစိုးရလက်ထက်မှာ အဂတိလိုက်စားတယ်လို့ ဆိုကာဖမ်းဆီးအကျဉ်းချခံရတာဖြစ်ပြီး မနှစ် မတ်လ ၁၃ ရက်မှာ တရားစွဲသူကအမှုကို အပြီးအသတ်ပိတ်သိမ်းလိုက်တာကြောင့် ပြန်လည်လွတ်မြောက်လာသူဖြစ်ပါတယ်။

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, Global New Light of Myanmar

6. ၁၅ မတ် ၂၀၂၂သာသနာရေးဝန်ကြီးဟောင်း သူရဦးအောင်ကို အလုပ်နဲ့ထောင်ဒဏ် ၁၂ နှစ်ချမှတ်ခံရ

   

   ဓာတ်ပုံ ရင်းမြစ်, screengrab

   အဂတိလိုက်စားတယ်လို့ထင်ရှားတာကြောင့် သာသနာရေးနဲ့ယဉ်ကျေးမှုဝန်ကြီးဟောင်း သူရဦးအောင်ကို ရန်ကုန်တိုင်းတရားလွှတ်တော်က အလုပ်နဲ့ထောင်ဒဏ် ၁၂ နှစ်ချမှတ်လိုက်တယ်ဆိုပြီး စစ်ကောင်စီက မတ်လ ၁၄ ရက်မှာ သတင်းထုတ်ပြန်ပါတယ်။

   သူရဦးအောင်ကိုဟာ တာဝန်ထမ်းဆောင်ချိန်တုန်းက နိုင်ငံတော်က လူပုဂ္ဂိုလ်တွေကို ပေးတဲ့ သာသနာနုဂ္ဂဟဘွဲ့တွေ ချီးမြှင့်မှုနဲ့ပတ်သက်ပြီး ငွေကျပ်သိန်းရာချီလက်ခံရယူခဲ့တာ၊ လုပ်ငန်းရှင်တစ်ဦးဆီကနေ ကားတစ်စီးနဲ့ရွှေတချို့ လက်ခံရယူခဲ့တာ စစ်ဆေးတွေ့ရှိခဲ့တယ်ဆိုပြီး စစ်ကောင်စီလက်အောက် အဂတိလိုက်စားမှုတိုက်ဖျက်ရေးကော်မရှင်က အစောပိုင်းကတည်းက သတင်းထုတ်ပြန်ခဲ့တာပါ။

   အခုတော့ သူရဦးအောင်ကိုကို ၂၀၂၁ ခုနှစ်၊ မတ်လမှာ ရန်ကုန်တိုင်းတရားလွှတ်တော်မှာ တရားစွဲဆိုခဲ့တဲ့ အဂတိအမှု ၄ ခုအတွက် တစ်မှုကို အလုပ်နဲ့ ထောင် ၃ နှစ်စီ၊ စုစုပေါင်းအလုပ်နဲ့ ထောင် ၁၂ နှစ်ကို တိုင်းတရားလွှတ်တော်က ချမှတ်လိုက်တာလို့ သတင်းထုတ်ပြန်လိုက်တာပါ။

   သူရဦးအောင်ကိုဟာ စစ်တပ်က အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီလကတည်းက သမ္မတဦးဝင်းမြင့်အစိုးရအဖွဲ့ဝင် ပြည်ထောင်စုဝန်ကြီးတွေ၊ ပြည်နယ်ဝန်ကြီးချုပ်တွေနဲ့ ဝန်ကြီးတွေအများစုနည်းတူ ဖမ်းဆီးထိန်းသိမ်းခံရပြီး အခုအမှုတွေကိုလည်း အင်းစိန်ထောင်တွင်းကနေ ရင်ဆိုင်ခဲ့ရတာဖြစ်ပါတယ်။

7. ၁၄ မတ် ၂၀၂၂မောင်တောမြောက်ပိုင်းမှာ နယ်ခြားစောင့်ပစ်လို့ အရပ်သားတစ်ဦးသေဆုံး

   ရခိုင်ပြည်နယ် မောင်တောမြို့နယ် မြောက်ပိုင်းက မီးတိုက်ကျေးရွာသားတစ်ဦးကို နယ်ခြားစောင့်ရဲတပ်ဖွဲ့က ပစ်ခတ်လိုက်တဲ့အတွက် ကျည်ထိဒဏ်ရာနဲ့ သေဆုံးသွားခဲ့တယ်လို့ မီးတိုက်ကျေးရွာအုပ်ချုပ်ရေးမှူး ဦးမောင်သာထွန်းက ပြောပါတယ်။ မတ်လ ၁၃ ရက်နေ့ညနေပိုင်း ၆ နာရီကျော်လောက်က ကျေးရွာအနောက်ဘက် တောစပ်အနီးမှာပစ်ခတ်ခံလိုက်ရတာဖြစ်ပြီး မောင်တောဆေးရုံသို့အရောက်မှာ သေဆုံးသွားခဲ့တယ်လို့ ကျေးရွာသားတွေနဲ့ အုပ်ချုပ်ရေးမှူးတို့က အတည်ပြုပြောဆိုပါတယ်။

   သေဆုံးမှာ အသက် ၃၈ နှစ်အရွယ် ဒိုင်းနက်အမျိုးသား ဦးကျော်မောင်သာဖြစ်ပြီး ညနေပိုင်းသူ့ရဲ့နွားတွေအိမ်မရောက်လာတဲ့အတွက် လိုက်ရှာနေစဉ်မှာ ကင်းပုန်းဝပ်နေတဲ့ နယ်ခြားစောင့်ရဲက ပစ်ခတ်လိုက်တာလို့သိရပါတယ်။

   “ပစ်သံကတော့ လေးချက်ကြားလိုက်ရတယ်။ ထိတာက ဒူးအောက်ဘက်မှာတစ်ချက်ထိတယ်။ သူ့မှာနွားသုံးလေးကောင်ရှိတယ်။ နွားတွေကိုလိုက်ရှာနေရင်းက အပစ်ခံလိုက်ရတာ။ ဘာကြောင့်ပစ်တယ်ဆိုတာ ရဲကတော့ ဘာမှမပြောဘူး”လို့ ကျေးရွာအုပ်ချုပ်ရေးမှူး ဦးမောင်သာထွန်းက ပြောပါတယ်။

   သူ့ကိုပစ်ခတ်တဲ့နေရာဟာ ကျေးရွာနဲ့သိပ်မဝေးတဲ့နေရာဖြစ်သလို နခခ (၂) တပ်စခန်းဟာလည်း ကျေးရွာဘုန်းတော်ကြီး ကျောင်းအနီးမှာ တည်ရှိပြီး စခန်းနဲ့လည်းအနီးမဝေးနေရာဖြစ်တယ်လို့ မီးတိုက်ကျေးရွာသားတစ်ဦးက ပြောပါတယ်။ ပစ်ခတ်သံလေးချက်ကြားလိုက်ရပြီး တစ်နာရီခွဲလောက်အကြာမှာ နယ်ခြားစောင့်တပ်စခန်းက ကျေးရွာရာအိမ်မှူးဆီကို ဖုန်းနဲ့အဆက်အသွယ်လုပ်ပြီးတော့ ကားတစ်စီးစီစဉ်ပေးဖို့ပြောဆိုပြီး ဒဏ်ရာရနေတဲ့ ရွာသားကိုမောင်တောဆေးရုံသို့ အမြန်ပို့ဆောင်ဖို့ ပြောခဲ့တယ်လို့ သိရပါတယ်။

   ဆေးရုံကို ည ၉ နာရီကျော်လောက်ရောက်သွားပြီး ည ၁၀ နာရီလောက်မှာသေဆုံးသွားခဲ့တာဖြစ်ပြီး ဦးကျော်မောင်သာမှာ ဒဏ်ရာပြင်းထန်ပြီး သွေးထွက်လွန်လို့သေဆုံးခဲ့ရတာဖြစ်တယ်လို့ နောက်ထပ်ကျေးရွာသားတစ်ဦးက ပြောပါတယ်။ မီးတိုက်ကျေးရွာဟာ တောင်ပြိုလက်ဝဲမြို့ နယ်မြေအတွင်းကကျေးရွာတစ်ရွာဖြစ်ပြီး သွားရေးလာရေးခက်ခဲသလို အဲ့ဒီအနီးဝန်းကျင်မှာ ARSA တွေမကြာခဏလှုပ်ရှားမှုတွေရှိတဲ့နေရာတစ်ခုလည်းဖြစ်ပါတယ်။

   လတ်တလောကာလမှာတော့ မီးတိုက်ကျေးရွာနဲ့အနီးဝန်းကျင်မှာ ထူးထူးခြားခြားဖြစ်စဉ်တွေဖြစ်ပွားတာမရှိဘဲ နယ်ခြားစောင့်ရဲတပ်ဖွဲ့က ကျေးရွာအနီးမှာ ဘာကြောင့်ကင်းပုန်းဝပ်နေလဲဆိုတာကိုတော့ မသိရှိကြောင်း အုပ်ချုပ်ရေးမှူး ဦးမောင်သာထွန်းက ပြောပါတယ်။

   

   ဓာတ်ပုံ ရင်းမြစ်, ML

8. ၁၄ မတ် ၂၀၂၂လှိုင်သာယာမှာ သွေးစွန်းခဲ့တဲ့နေ့

   ၂၀၂၁ ခုနှစ်၊ မတ်လ ၁၄ ရက်နေ့၊ လှိုင်သာယာမြို့နယ်က စစ်အာဏာသိမ်းဆန့်ကျင်တဲ့ ဆန္ဒပြပွဲမှာ စစ်တပ်က ပစ်ခတ်နှိမ်နင်းလို့ လူဆယ်ချီသေဆုံးခဲ့တာ တစ်နှစ်ပြည့်ခဲ့ပါပြီ။

   တစ်ချိန်တည်းမှာပဲ ဒီနေ့ဟာ လှိုင်သာယာအပါအဝင် ရန်ကုန်မြို့နယ် ၆ ခုကို စစ်ကောင်စီက စစ်အုပ်ချုပ်ရေးအမိန့်ကြေညာခဲ့တာ တနှစ်ပြည့်ပြီဖြစ်ပါတယ်။

   လှိုင်သာယာက မနှစ် မတ်လ ၁၄ ရက်အခြေအနေတွေကို မျက်မြင်ကြုံတွေခဲ့ရသူ လူငယ်တစ်ဦးနဲ့ သေဆုံးခဲ့သူတွေထဲက မိသားစုဝင်တစ်ဦးရဲ့ ပြန်ပြောင်းပြောပြချက်တွေကို ဒီရုပ်သံမှာ ကြည့်ရှုနိုင်ပါပြီ။

   

   ဓာတ်ပုံ ရင်းမြစ်, MPA

9. ၁၄ မတ် ၂၀၂၂ထိုင်းက မြန်မာအပါအဝင် အိမ်နီးချင်းနိုင်ငံတွေကအလုပ်သမားတွေကို ခေါ်ယူဖို့ ရှိနေ

   

   ဓာတ်ပုံ ရင်းမြစ်, ပေးပို့

   ထိုင်းနိုင်ငံဟာ မြန်မာနယ်စပ်အပါဝင် အိမ်နီးချင်း နိုင်ငံ‌တွေရဲ့ နယ်စပ်ဒေသတွေက အလုပ်သမားတွေကို မတ်လ ၁၅ ရက်နေ့က စတင်ခေါ်ဖို့ ပြင်ဆင်နေတယ်လို့ ထိုင်းကလာတဲ့သတင်းတွေမှာဖော်ပြပါတယ်။

   နယ်စပ်အိမ်နီးချင်းဒေသတွေက လုပ်သားတွေခေါ်ယူမယ့် အခုအစီအစဉ်ကို ကမ္ဘောဒီးယားနယ်စပ်ကနေ စတင်မှာဖြစ်ပြီး ထိုင်းအလုပ်သမားဝန်ကြီးဌာနရဲ့အဆိုပြုချက်အရ အခုလိုဆောင်ရွက်မှာလို့လည်း သိရပါတယ်။

   ထိုင်း-မြန်မာနယ်စပ်မှာဆိုရင် မြဝတီ၊ မဲ့ဆောက် တတ်ပ်ခရိုင်နယ်စပ်၊ ကန်ချနဘူရီခရိုင်၊ ရနောင်းခရိုင်နဲ့ ချင်းရိုင်ခရိုင်နယ်စပ်ဒေသတွေမှာခေါ်ယူသွားမယ်လို့လည်း ဆိုပါတယ်။

   ထိုင်းနယ်စပ်ဒေသတွေမှာ သွားရောက်အလုပ်လုပ်ကိုင်ဖို့ နိုင်ငံကူးလက်မှတ်မလိုဘဲ သက်တမ်းတိုးနိုင်တဲ့ နယ်စပ်ဖြတ်ကျော်လက်မှတ်ကိုသုံးပြီး ထိုင်းနိုင်ငံနယ်စပ်မှာ ၃ လအထိ နေထိုင်အလုပ်လုပ်ကိုင်ခွင့်ရမယ်လို့လည်း သိရပါတယ်။

   ထိုင်းနယ်စပ်က စိုက်ပျိုးရေးလုပ်ငန်းခွင်တွေမှာ လုပ်သားလိုအပ်ချက်ရှိနေချိန်မှာ ထိုင်းဘက်က အခုလိုအစီအစဉ်ထွက်ပေါ်လာတာလို့ ထိုင်းရောက် မြန်မာလုပ်သားတွေအရေး ဆောင်ရွက်ပေးသူတွေက ပြောပါတယ်။

   တချိန်တည်းမှာပဲ ထိုင်းနိုင်ငံထဲမှာ အလုပ်ရဖို့ နယ်စပ်ကနေ တရားမဝင်ဝင်ရောက်ဖို့ ကြိုးပမ်းတဲ့ မြန်မာတွေကို ထိုင်းရဲတပ်ဖွဲ့က ထိုင်း-မြန်မာနယ်စပ်တစ်လျှောက်မှာ နေ့စဉ် ဖမ်းဆီးမှုတွေရှိနေပြီး လူ ၅၀ နီးပါး နေ့စဉ်ဖမ်းဆီးခံနေရပါတယ်။

10. ၁၄ မတ် ၂၀၂၂လက်နက်ခဲယမ်းဝယ်ယူထုတ်လုပ်ဖို့ ဒေါ်လာ ၂၅ သန်းခွဲနီးပါးကိုသုံးခဲ့ပြီးပြီလို့ NUG ကာကွယ်ရေးပြော

    

    ဓာတ်ပုံ ရင်းမြစ်, MDY PDF

    ပြည်တွင်းပြည်ပ ပြည်သူတွေက လှူဒါန်းတဲ့ ရန်ပုံငွေတွေထဲက အမေရိကန် ဒေါ်လာ ၂၅ သန်းခွဲနီးပါးကို လက်နက်ခဲယမ်းဝယ်ယူတာနဲ့ ထုတ်လုပ်တာအတွက် သုံးစွဲထားတယ်လို့ အမျိုးသားညီညွတ်ရေးအစိုးရ(NUG)ရဲ့ ကာကွယ်ရေးဝန်ကြီးဌာနက ဒီနေ့ မတ်လ ၁၄ ရက်မှာ ပြောပါတယ်။

    လှူဒါန်းငွေ ဒေါ်လာသန်း ၃၀ ထဲက ၈၅ ရာခိုင်နှုန်းကို အခုလို သုံးစွဲတာဖြစ်ပြီး ၇ ရာခိုင်နှုန်းကိုတော့ မဟာမိတ်တွေရဲ့ခဲယမ်းမီးကျောက် ဖြည့်တင်းဖို့နဲ့ တခြားလိုအပ်တဲ့အသုံးစရိတ်တွေအတွက် အသုံးပြုထားတယ်ဆိုပြီး ပြည်သူ့ခုခံတွန်းလှန်စစ် ၆ လပြည့်အစီရင်ခံစာထဲမှာ ထည့်သွင်းဖော်ပြလာတာပါ။

    လက်ရှိမှာ ပြည်ပနိုင်ငံတွေက ရုပ်ဝတ္ထုပစ္စည်း အကူအညီပေးတာတွေမရှိသေးပေမဲ့ မဟာမိတ်တွေရဲ့အကူအညီနဲ့ လက်နက်ခဲယမ်းမီးကျောက် ပမာဏတခုကို လက်လှမ်းမီထားပြီလို့လည်း NUG ကာကွယ်ရေးဝန်ကြီး ဦးရည်မွန်က ပြောပါတယ်။

    တစ်ဖက်မှာလည်း ရုပ်ဝတ္ထုအင်အားအရ သာလွန်နေပေမဲ့ မြေပြင်မှာ ပြည်သူ့ကာကွယ်ရေးတပ်ဖွဲ့ဝင်တွေ(PDF)နဲ့ မဟာမိတ်တွေကြောင့် အဖက်ဖက်က အထိနာလာတဲ့စစ်ကောင်စီဟာ လေကြောင်းနဲ့လက်နက်ကြီးကို တွင်တွင်ကျယ်ကျယ်အသုံးပြုလာတာ၊ PDF တွေကိုသာမက အရပ်သားပြည်သူတွေ၊ ကျေးရွာတွေကိုပါ လေကြောင်းအသုံးပြု တိုက်ခိုက်တာ၊ ရုတ်တရက် လေကြောင်းကနေ ဝင်ရောက်စီးနင်းတာလုပ်နေတယ်လို့လည်း သူက ပြောပါတယ်။

    ဒါ့ကြောင့် PDF တွေအနေနဲ့ အရပ်သားပြည်သူရော၊ ကိုယ့်အင်အားကိုပါ ထိခိုက်ဆုံးရှုံးမှုအနည်းဆုံးဖြစ်ဖို့ ဉာဏ်ပညာကို သုံးပြီး လှုပ်ရှားကြဖို့ကိုလည်း NUG ဝန်ကြီးက တိုက်တွန်းထားတာတွေ့ရပါတယ်။

11. ၁၄ မတ် ၂၀၂၂မတူပီ၊ ထယ်ဘွေ့စခန်းကို အင်အားဖြည့်တဲ့စစ်ကောင်စီတပ်ဖွဲ့ဝင်တွေ တိုက်ခိုက်ခံရ, စစ်ကောင်စီတပ်ဖွဲ့ဝင် ၇ ဦးသေဆုံးတယ်လို့ CDF ပလက်ဝပြော

    

    ဓာတ်ပုံ ရင်းမြစ်, CDF ပလက်၀

    ချင်းပြည်နယ်၊ မတူပီမြို့နယ်ထဲက လိုင်လိုင်းပီမြို့ကနေ ထယ်ဘွေ့စခန်းကို အင်အားဖြည့်ဖို့လာတဲ့ စစ်ကောင်စီတပ်ဖွဲ့ဝင်တွေကို ချင်းဒေသကာကွယ်ရေးတပ်တွေ(CDF)က ပြီးခဲ့တဲ့ ၂ ရက်အတွင်းတိုက်ခိုက်မှုမှာ စစ်ကောင်စီဖွဲ့ဝင် ၈ ဦး သေဆုံးတယ်လို့ ပလက်၀ CDF က သတင်းထုတ်ပြန်လာပါတယ်။

    အင်အားဖြည့်ပို့လာတဲ့ စစ်ကောင်စီတပ်ဖွဲ့ဝင် ၁၅၀ ခန့်ကို မတ်လ ၁၂ ရက်မှာ မိုင်းဆွဲတိုက်ခိုက်ခဲ့ပြီး အဲဒီနောက် မတ်လ ၁၃ ရက်မှာ နှစ်ကြိမ်ထပ်မံတိုက်ခိုက်ချိန် စစ်ကောင်စီဘက်က အခုလိုသေဆုံးခဲ့တာလို့ ဆိုပါတယ်။

    အဲဒီတိုက်ပွဲတွေမှာ ချင်းဒေသကာကွယ်ရေးတပ်ဖွဲ့ဝင် ၁ ဦးသေဆုံးခဲ့ပြီး တစ်ဦး ဒဏ်ရာရခဲ့တယ်လို့လည်း ထုတ်ပြန်ချက်က ဆိုပါတယ်။

    လက်ရှိမှာ စစ်ကောင်စီတပ်ဟာ ထယ်ဘွေ့စခန်းအဝင်လမ်းကြောင်းတစ်လျှောက်ကို ပိတ်ဆို့ထားပြီး လက်နက်ကြီးတွေနဲ့ ပစ်ခတ်မှုကြောင့် တွီဆော့ကုန်းကျေးရွာက လူနေအိမ်၊ စာသင်ကျောင်းနဲ့ ခရစ်ယာန်ဘုရားရှိခိုးကျောင်းတွေ ထိခိုက်ပျက်စီးခဲ့တယ်လို့လည်း ဆိုပါတယ်။

    အဲဒီဒေသက လူထုကိုတော့ လုံခြုံတဲ့နေရာကို ထိခိုက်မှုမရှိဘဲ ရွှေ့ပေးနိုင်ခဲ့တယ်လို့လည်း CDF ပလက်ဝက ပြောထားပါတယ်။

12. ၁၄ မတ် ၂၀၂၂မိုင်းနုမ်ဟန်မိသားစုရဲ့ ဈာပနကို လူထောင်ချီ တက်ရောက်

    

    ဓာတ်ပုံ ရင်းမြစ်, ရွှေဖီးမြေ

    ၂၀၂၂ ခုနှစ်၊ ဇန်နဝါရီလ ၁၀ ရက်က ရှမ်းပြည်တောင်ပိုင်း၊ မိုင်းကိုင်မြို့နယ် တုံလောကျေးရွာအထွက်မှာ ဖမ်းဆီးခံရပြီး တောတွင်းရှိ ကျင်းကြီးတစ်ခုထဲ ပစ်သတ်ခံထားရတဲ့ မိုင်းနုမ်ဟန်မိသားစု ရုပ်အလောင်းကို မနေ့ မတ်လ ၁၃ရက်က သင်္ဂြိုဟ်ခဲ့ပါတယ်။

    သေဆုံးခဲ့တဲ့မိသားစု ၃ ဦးဟာ မိုင်းနုမ်ဟန်(၃၉ နှစ်)၊ ဇနီးဖြစ်သူ လွေးအေးခ(၂၆ နှစ်)၊ သမီးဖြစ်သူ လွေးစိန်ပ္လါင်(၇ လ)တို့ပဲ ဖြစ်ပါတယ်။

    တအန်းအမျိုးသားပါတီ TNP ရဲ့ မိုင်းကိုင်မြို့နယ်ဥက္ကဋ္ဌဖြစ်တဲ့ မိုင်းနုမ်ဟန်နဲ့ သူ့မိသားစုဟာ ၂လကျော်ကြာပျောက်ဆုံးနေခဲ့တာဖြစ်ပြီး သူတို့ရဲ့ရုပ်အလောင်းကို မတ်လ ၃ရက်မှာပြန်လည်တွေ့ရှိခဲ့တာပါ။

    သတ်ဖြတ်ခံထားရတဲ့နေရာကနေ ခက်ခက်ခဲခဲ သယ်ဆောင်လာခဲ့ကြပြီး ပန်ပွဲရွာအနီးရှိ တောင်ယာတစ်ခုမှာမီးရှို့သင်္ဂြိုဟ်ခဲ့တာပါ။

    အဲဒီဈာပနကို လူထောင်ချီ လိုက်ပါပို့ဆောင်ခဲ့ပြီး တအာင်းအဖွဲ့အစည်းတွေနဲ့ အနယ်နယ်အရပ်ရပ်က လူထုတွေ တက်ရောက်ခဲ့ပါတယ်။

    မိုင်းနုမ်ဟန်ကို တောင်ပိုင်းရှိ တအာင်းတို့ရဲ့ အာဇာနည်သူရဲကောင်းအဖြစ် ဝိုင်းဝန်းသတ်မှတ်ခဲ့ကြပြီး အာဇာနည်ဗိမ္မာန်လည်း ပြုလုပ်သွားမယ်လို့ ဒေသခံတွေက‌ပြောပါတယ်။

    မိုင်းနုမ်ဟန်ဟာ ဘုန်းကြီးဝတ်စဉ်ကတည်းက တအာင်းလူမျိုးတို့ရဲ့ တိုးတက်ရေးနဲ့ ပရဟိတလုပ်ငန်းတွေကို အားကြိုးမာန်တက် လုပ်ဆောင်ခဲ့သလို လူထွက်ပြီးနောက်ပိုင်းမှာလည်း တအာင်းလူထုအရေးနဲ့ တအာင်းအမျိုးသားပါတီအရေးကို တက်တက်ကြွကြွ လုပ်ဆောင်ခဲ့သူဖြစ်ပါတယ်။

    မိုင်းနုမ်ဟန် မိသားစုတို့ရဲ့ အာဇာနည်ဗိမာန် ကိုသူ့ရဲ့ဇာတိရွာဖြစ်တဲ့ မတ်ချိနုကျေးရွာအနီးမှာ ပြုလုပ်သွားမှာ ဖြစ်တယ်လို့သိရပါတယ်။

    မိုင်းနုမ်ဟန်မိသားစု အသတ်ခံရမှုနဲ့ပတ်သက်လို့ရှမ်းပြည်ပြန်လည်ထူထောင်‌ရေးကောင်စီ RCSS ရဲ့ ဖမ်းဆီးခြင်းခံရတာလို့ တအန်းအမျိုးသားပါတီTNP ဘက်က ပြောဆိုထားပါတယ်။

    RCSS ဘက်ကတော့ ဒါနဲ့ပတ်သက်လို့ တိကျတဲ့ ပြောဆိုထုတ်ပြန်တာမျိုးကိုမတွေ့ရသေးပါဘူး။

13. ၁၄ မတ် ၂၀၂၂ရန်ကုန်မြို့နယ် ၆ ခုကို စစ်အုပ်ချုပ်ရေးကြေညာတာ ၁ နှစ်ပြည့်ပြီ

    

    ဓာတ်ပုံ ရင်းမြစ်, Getty Images

    ရန်ကုန်တိုင်းထဲက မြို့နယ် ၅ ခုကို စစ်ကောင်စီက စစ်အုပ်ချုပ်ရေးအမိန့် (Martial Law) ကြေညာခဲ့တာ ဒီနေ့ မတ်လ ၁၄ ရက်မှာ တစ်နှစ်ပြည့်ပြီဖြစ်ပါတယ်။

    စစ်ကောင်စီက ရန်ကုန်တိုင်းထဲက လှိုင်သာယာမြို့နယ်၊ ရွှေပြည်သာမြို့နယ်၊ ဒဂုံမြို့သစ်(တောင်ပိုင်းမြို့နယ်)၊ ဒဂုံမြို့သစ်(မြောက်ပိုင်းမြို့နယ်)၊ ဒဂုံမြို့သစ်(ဆိပ်ကမ်းမြို့နယ်)နဲ့ မြောက်ဥက္ကလာပမြို့နယ်တို့ကို စစ်အုပ်ချုပ်ရေးမြို့နယ်တွေအဖြစ် ၂၀၂၁ ခုနှစ်၊ မတ်လ ၁၄ ရက်ကတည်းက ကြေညာခဲ့တာပါ။

    အဲဒီမြို့နယ်တွေမှာ ပြစ်မှုအမျိုးအစား ၂၃ မျိုးကို ကျူးလွန်ရင် စစ်ခုံရုံးတင်ပြီး အကျဉ်းရုံးစစ်ဆေးကာ သေဒဏ်၊ နှစ်အကန့်အသတ် မရှိအလုပ်နဲ့ထောင်ဒဏ်၊ သက်ဆိုင်ရာ ပြစ်မှုအလိုက် သတ်မှတ်ထားတဲ့ အမြင့်ဆုံး ပြစ်ဒဏ် တွေကိုချမှတ်နိုင်တယ်လို့ စစ်ကောင်စီကကြေညာခဲ့ပါတယ်။

    ပြီးခဲ့တဲ့နှစ် မတ်လ ၁၄ ရက်မှာ လှိုင်သာယာ၊ ရွှေပြည်သာနဲ့ ဒဂုံမြို့သစ်မြို့နယ်တွေမှာ စစ်အာဏာသိမ်းဆန့်ကျင်တဲ့ဆန္ဒပြလူစုလူဝေးတွေကို စစ်ကောင်စီရဲ့လုံခြုံရေးတပ်တွေက လူသေဆုံးတဲ့အထိ ပစ်ခတ်ဖြိုခွင်းမှုပြုလုပ်ခဲ့တဲ့နေ့လည်းဖြစ်ပါတယ်။

    စစ်အုပ်ချုပ်ရေး‌ကြေညာထားတဲ့မြို့နယ်တွေမှာတော့ စစ်တပ်ကတပ်စွဲပြီး စစ်အင်အားအလုံးအရင်းနဲ့ တင်းတင်းကျပ်ကျပ် ကိုင်တွယ်တာ၊ အမြဲကင်းလှည့်ပတ်စစ်ဆေးတာနဲ့ဆိုင်ကယ်စီးနင်းမှုမှာကန့်သတ်တာအပါအဝင် တခြားပုဂ္ဂလိကဆိုင်ရာလွတ်လပ်ခွင့်တွေအပေါ်မှာ စွက်ဖက်တင်းကျပ်တာတွေလုပ်တယ်လို့ ဒေသခံတွေကပြောကြပါတယ်။

    ဒါ့ပြင် ပြစ်မှုကျူးလွန်တယ်လို့ စွပ်စွဲခံရသူတွေကိုလည်း စစ်ခုံရုံးက အကျဉ်းရုံးစစ်ဆေးပြီး သေဒဏ်ထိ မြင့်တဲ့ပြစ်ဒဏ်ချမှတ်တဲ့ဖြစ်စဉ်တွေလည်းရှိနေပါတယ်။

    လူ့အခွင့်အရေး စောင့်ကြည့်ရေးအဖွဲ့ HRW ကတော့ မြန်မာနိုင်ငံထဲ လူ့အခွင့်အရေးချိုးဖောက်မှုတွေကို တိတိကျကျ မှတ်တမ်းတင်နိုင်ရေး စိန်ခေါ်မှုတစ်ရပ်ဖြစ်နေသေးတယ်လို့ ပြောပါတယ်။

    တစ်ချိန်တည်းမှာပဲ စစ်အာဏာသိမ်းပြီးကတည်းကဆိုရင် လုံခြုံရေးတပ်ဖွဲ့ဝင်တွေကြောင့် ဆန္ဒပြသူအပါအဝင် လူပေါင်း ၁၆၀၀ ကျော် သတ်ဖြတ်ခံခဲ့ရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့(AAPP)ရဲ့မှတ်တမ်းတွေအရ သိရပါတယ်။

    စစ်ကောင်စီဘက်ကတော့ လုံခြုံရေးတပ်ဖွဲ့ဝင်တွေရဲ့ပစ်ခတ်မှုကြောင့် သေဆုံးမှုရှိတာကို ပြောဆိုပေမဲ့ သေဆုံးသူပမာဏဟာ အငြင်းပွားစရာဖြစ်တယ်လို့ အာဏာသိမ်းအစောပိုင်းလတွေကတည်းက ပြောဆိုထားပါတယ

14. ၁၄ မတ် ၂၀၂၂အာရှလမ်းမှာ ကုန်ကားသွားလာခွင့် ၃ ရက်ပိတ်မယ်

    ကရင်ပြည်နယ်ထဲက မြဝတီ-ကော့ကရိတ်၊ အာရှလမ်းတိုက်ပွဲကြောင့် ပျက်စီးသွားတဲ့ တောနော်ချောင်းတံတားကို ပြင်ဆင်ဖို့ အာရှလမ်းမှာ ကုန်ကားသွားလာခွင့်ကို ၃ ရက်ကြာပိတ်ထားမယ်လို့ သိရပါတယ်။

    မတ်လ ၁၁ ရက်တိုက်ပွဲအတွင်း မိုင်းခွဲကိုက်ခံလိုက်ရတာကြောင့် တောနော်ချောင်းတံတားရဲ့ အောက်ခြေတိုင် ၂ တိုင်ပျက်စီးခဲ့တာဖြစ်ပြီး အဲဒီအစား ဘေလီတံတားထိုးဖို့ ယာဉ်သွားလာခွင့် ရက်ကန့်သတ်လိုက်တာဖြစ်ပါတယ်။

    အပြည့်အစုံကို ဒီလင့်ခ် ကနေ ဝင်ရောက်ဖတ်ရှုနိုင်ပါတယ်။

    

    ဓာတ်ပုံ ရင်းမြစ်, CJ

15. ၁၃ မတ် ၂၀၂၂ကိုဗစ်ကြောင့်ပိတ်ထားတဲ မြန်မာ တရုတ်နယ်စပ်ဂိတ် အချို့ပြန်ဖွင့်

16. ၁၃ မတ် ၂၀၂၂ဆီစျေးတွေ အဆမတန်တက်လာလို့ ရခိုင်ကယာဉ်လိုင်းတွေ ရပ်ရမယ့် အခြေအနေဖြစ်နေ

17. ၁၃ မတ် ၂၀၂၂ဗိုလ်တထောင်မြို့နယ်၊ (၄၅)လမ်းနေ တက္ကသိုလ်ကျောင်းသား‌လေးဦးဖမ်းဆီးခံရ

    ရန်ကုန်တိုင်း၊ ဗိုလ်တထောင်မြို့နယ်၊ ၄၅ လမ်း အပေါ်ဘလောက်က တိုက်ခန်းတခန်းမှာ နေထိုင်နေတဲ့ လူငယ် (၄)ဦးဟာ မနေ့ မတ်လ ၁၂ ရက်၊ ည ၁၀ နာရီကျော်မှာ စစ်ကောင်စီတပ်ဖွဲ့ဝင်တွေရဲ့ ဝင်ရောက်ဖမ်းဆီးတာခံခဲ့ရပါတယ်။

    မနေ့ည ၁၀ နာရီဝန်းကျင်မှာ ၄၅ လမ်းနဲ့ ဗိုလ်ချုပ်လမ်းထောင့်မှာ အသံဗုံးပေါက်ကွဲသံကြားပြီးတာနဲ့တပြိုင်နက် လမ်းထဲကို အရပ်ဝတ်စစ်ကောင်စီတပ်ဖွဲ့ဝင်တွေက အင်အားအလုံးအရင်းဝင်ရောက်လာခဲ့တာဖြစ်ပါတယ်။ ဒါ့ပြင် ဒီကနေ့မနက် ၉ နာရီဝန်းကျင်မှာလည်း ဖမ်းဆီးခံလိုက်ရတဲ့ တိုက်ခန်းရဲ့အနောက်ဘက်၊ ၄၆ လမ်းထဲကို စစ်ကောင်စီတပ်ဖွဲ့ဝင်တွေက ထပ်မံလာရောက်ပြီး ရှာဖွေတာတွေလုပ်ခဲ့တယ်လို့လည်း သိရပါတယ်။ အဲ့ဒီလူငယ်လေးဦးဟာ (၄၅)လမ်းထဲ ပြောင်းရွှေ့နေထိုင်တာ သိပ်မကြာသေးဘဲ ပစ္စည်းပို့ဆောင်တဲ့အလုပ်လုပ်သူတွေလို့ လမ်းနေပြည်သူတွေကပြောပါတယ်။

    ဖမ်းဆီးခံရတဲ့သူတွေဟာ ရန်ကုန်စီးပွားရေးတက္ကသိုလ်ကျောင်းသား ကိုကျော်ထက်အောင်၊ ကိုသက်အောင်မိုး၊ မုံရွာစီးပွားရေးတက္ကသိုလ်ကျောင်းသူဟောင်း မမိုးမဥ္ဇူနဲ့ ရန်ကုန်အနောက်ပိုင်းတက္ကသိုလ် ရူပဗေဒ၊နောက်ဆုံးနှစ်ကျောင်းသား ကိုမင်းခန့်ကျော်တို့ဖြစ်တယ်လို့ သိရပါတယ်။

    "သူတို့လေးယောက်ကအရင်ကနယ်ကကျောင်းလာတက်တဲ့တက္ကသိုလ်ကျောင်းသားတွေပါ။ အခုလိုတွေဖြစ်တေ့ ကျောင်းတွေမတက်ကျတော့ဘဲ အခန်းငှားနေပြီး ဒယ်လီဗာရီပို့တာ၊ ‌နယ်ကနေအစား‌အသောက်တွေမှာတယ် ပြီးတော့ပြန်ရောင်းလိုက်ပို့တယ် အဲ့လိုစီးပွားရေးလုပ်ကြတယ်။ အဲ့လိုရတဲ့ငွေကို တော်လှန်ရေးကိုပြန်ကူညီတာ မျိုးတွေလုပ်တာပေါ့။ သပိတ်တွေမှာပါသူတွေမဟုတ်သလို၊ လက်နက်ကိုင်လှုပ်ရှားကြသူတွေလည်းမဟုတ်ပါဘူး။ မိန်းကလေးတယောက်ထဲကလည်းပါတာဆိုတော့ အခုလည်း စစ်ကြောရေးပို့လိုက်တယ်ဆိုတဲ့ သတင်းပဲရနေသေးတော့ သူတို့အတွက် စိုးရိမ်ပါတယ်။"လို့ ရန်ကုန်စီးပွားရေးတက္ကသိုလ်(ရွာသာကြီးနယ်မြေ) ကျောင်းသားသမဂ္ဂကနေ အတည်ပြုပါတယ်။

    အဲဒီလူငယ်တွေဟာ ဖမ်းဆီးခံရချိန်တုန်းက အရပ်ဝတ်တွေရဲ့ရိုက်နှက်စစ်ဆေးတာခံခဲ့ရတာဟာလည်း စိုးရိမ်ရတဲ့အခြေအနေဖြစ်တယ်လို့ ဒေသခံတွေက ပြောပါတယ်။ ဒါ့အပြင် သူတို့နေထိုင်တဲ့တိုက်ခန်းအတွင်းက အိမ်သုံးပစ္စည်းတွေကအစ အကုန်လုံးကို စစ်ကောင်စီတပ်ဖွဲ့ဝင်တွေက သိမ်းဆည်းသွားတယ်လို့ဆိုပါတယ်။

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ

18. ၁၃ မတ် ၂၀၂၂ပုလဲနယ်၊ တုန်ကန်ရွာမှာ မီးရှို့ခံရတဲ့ ရုပ်အလောင်း ၂ လောင်းကိုတွေ့ရှိ, အိမ်ခြေ ၈၀ နီးပါး မီးရှို့ခံခဲ့ရတယ်လို့ ဒေသခံတွေပြော

    

    ဓာတ်ပုံ ရင်းမြစ်, CJ

    စစ်ကောင်စီတပ်ဖွဲ့ဝင်တွေ ဝင်ရောက်ခဲ့တဲ့ စစ်ကိုင်းတိုင်း၊ ပုလဲမြို့နယ်ထဲက တုန်ကန်ရွာမှာ မီးရှို့ခံထားရတဲ့ရုပ်အလောင်း ၂ လောင်းကို ဒီနေ့ မတ်လ ၁၃ ရက်မှာ တွေ့ခဲ့ရတယ်လို့ တုန်ကန်ရွာခံတွေက ဘီဘီစီကိုပြောပါတယ်။

    စစ်ကောင်စီတပ်တွေဟာ မနေ့ မတ်လ ၁၂ ရက် မနက်ပိုင်းမှာ တုန်ကန်ရွာထဲကို ဝင်ရောက်လာတာဖြစ်ပြီး မနေ့ည ၁၂ နာရီဝန်းကျင်မှာ ရွာထဲကို မီးရှို့ခဲ့တာကြောင့် အိမ်အလုံးရေ ၈၀ နီးပါး မီးရှို့ခံခဲ့ရတယ်လို့ တုန်ကန်ရွာခံတွေက ပြောပါတယ်။

    ‘‘မနေ့ မနက်ပိုင်း ၈ နာရီလောက် သူတို့ ရွာထိပ်ရောက်တာနဲ့ သေနတ်တွေ ပစ်ဖောက်တော့တာပါပဲ။ အဲဒီအချိန်မှာ သူတို့လာနေတယ်ဆိုတာ ဘေးနားက ရွာတွေက လှမ်းပြောလို့ အကုန်လုံး ထွက်ပြေးကြကုန်ပြီ။ ညနေ ၃ နာရီလောက်မှာ ပစ်ခတ်သံတွေ ထပ်ကြားရတယ်။ မီးရှို့ခံထားရတဲ့ အလောင်း ၂ လောင်းထဲက တစ်လောင်းက ရွာထဲက ခြောက်ဆယ်ကျော်အမျိုးသားတစ်ဦး။ သူက ပိုင်ရှင်ပေါ်လို့ ဘယ်သူဆိုတာသိရပြီ။ နောက်အမျိုးသားတစ်ယောက်အလောင်းကိုကျတော့ ပိုင်ရှင်ဘယ်သူမှန်းမသိသေးဘူး။ ပြေးကြ၊ လွှားကြဆိုတော့ ဘယ်သူဆိုတာ မဖော်နိုင်သေးဘူး’’လို့ တုန်ကန်ရွာခံတစ်ဦးက ဘီဘီစီကို ပြောပါတယ်။

    စစ်ကောင်စီဘက်ကသတင်းတွေကို ဖော်ပြနေတဲ့ တယ်လီဂရမ်ချန်နယ်တွေမှာတော့ စစ်ကောင်စီတပ်က နယ်မြေရှင်းလင်းချိန် တုန်ကန်ရွာထဲမှာ PDF ၂ ဦးကို အသေဖမ်းမိပြီး လက်နက်ခဲယမ်းတချို့ကိုလည်း သိမ်းမိတယ်လို့ ဖော်ပြထားတာတွေ့ရပါတယ်။

    တုန်ကန်ရွာဟာ ရွာလုံးကျွတ်နီးပါး မီးရှို့ခံရတဲ့ သပြေအေးရွာနဲ့ မိုင်အနည်းငယ်အကွာမှာပဲ ရှိတာဖြစ်ပြီး စစ်ကောင်စီတပ်တွေဟာ ရွာစဉ်လှည့်ဝင်မဟုတ်ဘဲ လယ်ခင်း၊ ယာခင်းတွေကို ဖြတ်ကာ တုံကန်ရွာထဲကို ဝင်လာခဲ့ကြတာလို့ ဒေသခံတွေက ပြောပါတယ်။

    အခုတော့ ရွာထဲကနေ စစ်ကောင်စီတပ်တွေ ပြန်ထွက်သွားပြီဖြစ်ပေမဲ့ လုံခြုံရေးစိုးရိမ်ပြီး ရွာထဲမဝင်နိုင်ကြသေးတာ ကြောင့် ပျက်စီးဆုံးရှုံးမှု အတိုင်းအဆကို ပြောဖို့ ခက်နေတယ်လို့ ဒေသခံတွေက ပြောထားပါတယ်။

19. ၁၃ မတ် ၂၀၂၂စစ်ရှောင်တွေနေရပ်ပြန်နိုင်ရေးကို မစ္စတာ ဆာဆာကာဝါနဲ့ဆွေးနွေးခဲ့တယ်လို့ KNU ပြော

    

    ဓာတ်ပုံ ရင်းမြစ်, MPA

    စစ်ရှောင်တွေ နေရပ်ပြန်နိုင်ရေးလို လူသားချင်းစာနာထောက်ထားမှုအကူအညီတွေကို ဘယ်လိုနည်းလမ်းနဲ့ ကူညီနိုင်မလဲဆိုတာ နီပွန်ဖောင်ဒေးရှင်းဥက္ကဋ္ဌ ဆာဆာကာဝါနဲ့တွေ့ဆုံချိန်ဆွေးနွေးထားတယ်လို့ ကရင်အမျိုးသား အစည်းအရုံး(KNU)က ဘက်က ပြောလာပါတယ်။

    မြန်မာ့ငြိမ်းချမ်းရေးဆိုင်ရာ ဂျပန်အစိုးရကိုယ်စားလှယ်လည်းဖြစ်တဲ့ မစ္စတာဆာဆာကာဝါနဲ့ ထိုင်းနိုင်ငံ၊ ချင်းမိုင်မြို့မှာ မနေ့ မတ်လ ၁၀ ရက်မှာ တွေ့ဆုံဆွေးနွေးခဲ့တာဆိုပြီး KNU နိုင်ငံခြားရေးတာဝန်ခံ ပဒိုစောတောနီးက ပြောလိုက်တာပါ။

    ပြည်သူတွေ နေရပ်ပြန်နိုင်ဖို့ စစ်ကောင်စီတပ်တွေ တပ်ဆုတ်ခွါပေးရေး ပြောခဲ့တာလည်းရှိတယ်လို့ သူက ပြောပါတယ်။

    ‘‘လူသားချင်းစာနာမှုအကူအညီပေးနိုင်မယ့်နည်းလမ်းတွေကို ဆွေးနွေးခဲ့တယ်။ သူ ကူညီတည်ဆောက်ခဲ့တဲ့မြို့ကြီး(လေးကေ့ကော်)ဆိုရင်လည်း အခုဆိုမြို့ပျက်ဖြစ်နေပြီ။ လေးကေ့ကော်မြို့သစ်က သူကိုယ်တိုင် ကမကထလုပ်၊ အကုန်အကျအများကြီးခံပြီး လုပ်ခဲ့တာမှန်တယ်။ သို့သော်လည်း ဒီလိုတိုက်ပွဲဖြစ်နေမယ်ဆိုရင် မြို့ကို ဘယ်လိုပြင်မလဲ။ ပြန်သွားလို့လည်းမရဘူးလေ။ ပြန်သွားဖို့ ပြောတာတောင် ထိုးစစ်ဆင်နေတော့ ဘယ်လိုလုပ်မလဲ’’ လို့ ပဒိုစောတောနီးက ပြောပါတယ်။

    ဒါပေမဲ့ ပြည်သူတွေ နေရပ်ပြန်နိုင်ရေးလုပ်ရမယ့် အစား စစ်ကောင်စီတပ်တွေက ပိုပြီး စစ်အင်အားတိုးကာ ထိုးစစ်ဆင် ဝင်ရောက်တိုက်ခိုက်လာနေတယ်လို့ သူက ဆက်ပြောပါတယ်။

    ‘‘ ၃ လလောက် အိုးအိမ်စွန့်ခွါနေရသူတွေက ကိုယ့်အိမ်ကိုယ်ပြန်ချင်ပြီလေ။ ကျွန်တော်တို့ ပြောတာက တပ်တွေ ထွက်သွားပါ။ ထွက်သွားပါဆိုတာက လူထုကိုယ့်အိမ်ကိုယ့်ယာပြန်နေနိုင်ဖို့ပြောနေတာပါ။ အဲဒါကို တပ်တွေ ထပ်ပို့လာတဲ့အခါကျတော့ တိုက်ပွဲဖြစ်နေတဲ့အခါ လူထုက ဘယ်လိုလုပ်ပြီးပြန်နိုင်တော့မလဲ။ ခဏတာ ထွက်ပြေးတာမဟုတ်ဘူး။ ခဏတာဆို ကူပါ၊ လှူကြပါဆိုပြီးလုပ်နိုင်မယ်။ အခုက ၃ လကျော်နေပြီ။ နောက် ဘယ်လောက်ကြာဦးမှာလဲ။ နှစ်ချီပြီးတော့ ကြာဦးမှာလည်း ကျွန်တော်တို့လည်း မပြောတတ်ဘူး’’လို့လည်း သူကပြောပါတယ်။

    အခုဆို စစ်ကောင်စီတပ်တွေနဲ့ ကေအဲန်ယူတပ်ဖွဲ့ဝင်တွေကြား တိုက်ပွဲတွေကြောင့် KNU နယ်မြေထဲမှာ စစ်ဘေးရှောင်က ၂ သိန်းနီးပါးအထိရှိနေတယ်။ တချိန်တည်းမှာပဲ ကရင်ပြည်နယ်ထဲက ကော့ကရိတ်မြို့နယ်ထဲမှာလည်း တစ်ကြိမ်ထက်မနည်းတဲ့ တိုက်ပွဲတွေ ဆက်ဖြစ်နေပါတယ်။

20. ၁၃ မတ် ၂၀၂၂ကိုဖုန်းမော်၊ကိုစိုးနိုင်ကျဆုံးမှု ၃၄ နှစ်ပြည့် အထိမ်းအမှတ်ဆန္ဒပြပွဲတွေပြုလုပ်

    

    ဓာတ်ပုံ ရင်းမြစ်, ဒီမိုကရေစီလှုပ်ရှားမှုသပိတ်ကော်မတီ-ထားဝယ်

    ရန်ကုန်စက်မှုတက္ကသိုလ်ကျောင်းသားကိုဖုန်းမော်နဲ့ ကိုစိုးနိုင်တို့ကျဆုံးမှု ၃၄ နှစ်ပြည့်အထိမ်းအမှတ်အနေနဲ့ ဒီနေ့ မတ်လ ၁၃ ရက်မှာ တက္ကသိုလ်ကျောင်းသူကျောင်းသားတွေဦးဆောင်တဲ့ စစ်အာဏာသိမ်းဆန့်ကျင်ဆန္ဒပြပွဲတွေရှိနေပါတယ်။

    ကိုဖုန်းမော်နဲ့ ကိုစိုးနိုင်တို့ဟာ အာဏာသိမ်းစစ်ခေါင်းဆောင် ဗိုလ်ချုပ်နေဝင်းလက်ထက် ၁၉၈၈ ခုနှစ်၊ မတ်လ ၁၃ ရက်မှာ စစ်သားတွေရဲ့ပစ်ခတ်မှုကြောင့် သေဆုံးခဲ့ကြရတဲ့တက္ကသိုလ်ကျောင်းသားတွေဖြစ်ပါတယ်။

    ဒီနေ့မှာတော့ သူတို့နှစ်ဦးကျဆုံးမှု ၃၄ နှစ်ပြည့်အနေနဲ့ ရန်ကုန်၊ မန္တလေးနဲ့ ထားဝယ်တို့မှာ ကျောင်းသူကျောင်းသားတွေက လွမ်းသူ့ပန်းချတာ၊ စာတန်းချိတ်ဆွဲလှုပ်ရှားတာတွေပြုလုပ်သွားကြတာဖြစ်ပါတယ်။

    ကိုဖုန်းမော်နဲ့ ကိုစိုးနိုင်တို့ဟာ တစ်ပါတီအာဏာရှင်စနစ်ကို ဆန့်ကျင်ရင်း အသက်ပေးခဲ့ကြရသူတွေထဲ အရေးကြီးတဲ့အခန်းကဏ္ဍမှာပါဝင်ခဲ့ကြသူတွေဖြစ်ပြီး ဒီနေ့ကာလအထိ ဆက်ကြိုးပမ်းနေရတဲ့ဒီမိုကရေစီအရေး ကြိုးပမ်းမှုတစ်လျှောက်လုံးမှာ လူသိထင်ရှားရော၊ မထင်မရှားရော အသက်ပေးခဲ့ကြရသူတွေကို အောက်မေ့သတိရတဲ့အပြင် ဂုဏ်ပြုတယ်လို့ အမျိုးသားဒီမိုကရေစီအဖွဲ့ချုပ်(NLD)ပါတီက သဝဏ်လွှာပေးပို့ထားပါတယ်။