ဒေါငံခါးကျေးရွာမှာ တပတ်အတွင်း နေအိမ် (၄၀)ကျော် မီးရှို့ဖျက်ဆီးခံရ, ဒီးမော့ဆိုစစ်ရှောင်တွေ အခက်အခဲပိုကြုံလာ
ကယား (ကရင်နီ)ပြည်နယ်၊ ဒီးမော့ဆိုမြို့နယ်၊ ဒေါငံခါးကျေးရွာမှာ စစ်ကောင်စီတပ်တွေဝင်ရောက်တပ်စွဲ ပြီးနောက် မတ်လ (၂၀)ရက်အထိ တပတ်တာအတွင်း နေအိမ် (၄၀)ကျော်မီးရှို့ဖျက်ဆီးခံရတယ်လို့ ပြည်သူ့ကာကွယ်ရေးတပ် - ဒီးမော့ဆိုကနေ ထုတ်ပြန်လာပါတယ်။
ဒေါငံခါးကျေးရွာ အပါအဝင် အဲဒီကျေးရွာအုပ်စုအတွင်းက ပြည်သူပိုင်ပစ္စည်းတွေကို ဖောက်ထွင်းခိုးယူပြီး ပြည်သူပိုင်နေအိမ်တွေကိုလည်း တောက်လျှောက်မီးရှို့ဖျက်ဆီးခဲ့တယ်လို့ ဖော်ပြထားပါတယ်။ ဒါကြောင့် စစ်ကောင်စီရဲ့လုပ်ရပ်ကို ပြင်းထန်စွာရှုတ်ချပြီးစစ်ရေးအရ တုန့်ပြန်သွားမယ်လို့ ဆိုပါတယ်။
စစ်ကောင်စီဘက်ကတော့ ဒီးမော့ဆို၊ ဒေါ့ငံခါးအခြေအနေတွေနဲ့ပတ်သက်လို့ သတင်းထုတ်ပြန်တာမရှိသေးပါဘူး။
ဒီးမော့ဆိုမြို့နယ်ရဲ့ အထင်ကရနေရာဖြစ်တဲ့ ငွေတောင်ဆည်နားမှာရှိတဲ့ ဒေါငံခါးကျေးရွာဟာ သွားလာရေး အတွက် အချက်အချာကျတဲ့နေရာဖြစ်ပြီး စစ်ကောင်စီတပ်တွေနေရာယူလိုက်တာကြောင့် စစ်ရှောင်တွေမှာ ပိုပြီးအခက်အခဲတွေကြုံတွေ့လာရတယ်လို့ ဒီးမော့ဆိုစစ်ရှောင်တွေကပြောပါတယ်။
“သူတို့နေရာယူလိုက်တာနဲ့ ကျွန်မတို့က ပိုဝေးတဲ့နေရာကိုထပ်ပြောင်းပြီးစစ်ရှောင်ကျရတယ်။ ဒေါ့ငံခါးကို ကွေ့ပတ်ပြီးမှ သွားလာနေရတော့လမ်းပန်းဆက်သွယ်ရေးအကုန်ခက်ပြီး စားဝတ်နေရေး၊ ဆေးဝါး အစစအရာရာပိုခက်ခဲလာပြီ။ အခုဆိုစစ်ရှောင်စခန်းတခုလုံးဖျားနေကြတာ၊ ကိုဗစ်စစ်ပေးတာလည်းမရှိတော့ ရာသီတုပ်ကွေးလို့ပဲ မှတ်ယူလိုက်ရတယ်။ လေယာဉ်ကလည်း ကျွန်မတို့ ခေါင်းပေါ်ပဲဝဲနေတော့ စိုးရိမ်နေရတယ်။”လို့ ဒီးမော့ဆိုစစ်ရှောင်သူတဦးက ဘီဘီစီကိုပြောပါတယ်။
ဒေသကာကွယ်ရေးအဖွဲ့တွေ နေရာယူထားတဲ့ ဒေါငံခါးကျေးရွာကို စစ်ကောင်စီဘက်က လက်နက်ကြီး သာလွန်အင်အားသုံးတာကြောင့် မတ်လ (၁၃)ရက်မှာ ကာကွယ်ရေးအဖွဲ့တွေဆုတ်ခွာလိုက်ရပါတယ်။ အဲ့ဒီနောက် တိုက်ပွဲတွေဆက်တိုက်ဖြစ်ပွားနေပြီး စစ်ကောင်စီကနေ လေကြောင်းနဲ့ပါ ဗုံးကြဲခဲ့ပြီး စစ်ရှောင်စခန်းတချို့ပါ ထိခိုက်ခဲ့တယ်လို့ ဒေသခံတွေကပြောထားပါတယ်။
ဒီကနေ့ မတ်လ (၂၀)ရက်အထိတော့ နှစ်ဖက်ပြင်းထန်တိုက်ပွဲမရှိသေးပေမယ့် စစ်ကောင်စီဘက်ကနေ လက်နက်ကြီးပစ်သံတွေကို စစ်ရှောင်နေတဲ့ နေရာတွေကပါ ကြားနေရတယ်လို့ ဒေသခံတဦးက ပြောပါတယ်။
ဓာတ်ပုံ ရင်းမြစ်, ပြည်သူ့ကာကွယ်ရေးတပ် (ဒီးမော့ဆို)
