လိုင်ဇာဘက်ကို စစ်တပ်က လက်နက်ကြီးနဲ့ ပစ်ခတ်ခဲ့
စစ်ကောင်စီတပ်တွေက ကေအိုင်အေ အခြေစိုက် လိုင်ဇာဘက်ကို မတ်လ ၂၂ ရက် မနက် ၃ နာရီလောက်က လက်နက်ကြီးနဲ့ လှမ်းပြီးပစ်ခတ်ခဲ့တာ တရုတ်ပြည်နယ်စပ်ဘက်ကိုပါ ကျရောက်ခဲ့တယ်လို့ ကေအိုင်အေ ဗဟို သတင်းနဲ့ပြန်ကြားရေးတာဝန်ခံ ဗိုလ်မှူးကြီးနော်ဘူက ပြောပါတယ်။
စစ်ကောင်စီစခန်းထိုင်တဲ့ ဘွမ်ရဲဘွမ်ဘက်ကနေ လိုင်ဇာဘက်ကို လက်နက်ကြီးနဲ့ ၄ ကြိမ်ခန့် ပစ်ပေမဲ့ တရုတ်နယ်စပ် ဘက်ကို လက်နက်ကြီးကျသလို ဘွမ်ရဲဘွမ်တောင်ခြေမှာလည်း ကျတာတွေရှိတယ်လို့ သိရပါတယ်။
“မနက် ၃နာရီကျော်လောက်မှာ ဘွမ်ရဲဘွမ်ဘက်ကနေ လိုင်ဇာဘက်ကို လှမ်းပစ်တာ ၄ ချက်လား မသိဘူး ပစ်တာရှိပါတယ်။ ဘယ်နေရာမှာ ကျတယ်ဆိုတာတော့ အတိအကျတော့ ကျွန်တော်ကတော့ မသိဘူး။ လက်နက်ကြီးတစ်လုံးကတော့ တရုတ်ပြည်နယ်စပ် တော်တော်နီးတဲ့ဘက်မှာ ကျတယ်ဆိုတဲ့ အသံတော့ ကြားပါတယ်။“
“အသံကြားတာကို ပြောမယ်ဆိုလို့ရှိရင် တရုတ်ပြည်နယ်စပ် တော်တော်နီးတဲ့ဘက်ကို ပေါက်ကွဲတဲ့အသံတွေကြားတယ်။ အဲဒါပဲရှိပါတယ်။ ကျန်တာကတော့ကျွန်တော်တို့ရဲ့ အလန်ဘွမ်ပေါ့နော် သူတို့ပစ်တဲ့ဘက် ဘွမ်ရဲဘွမ် တောင်ခြေမှာကျတယ်လို့ ကြားပါတယ်”လို့ ဗိုလ်မှူးကြီးနော်ဘူက ပြောပါတယ်။
ဒါ့အပြင် ကေအိုင်အေ လှုပ်ရှား တပ်မဌာနချုပ်အနီး ဂိဒေါင်ဘက်မှာ စစ်ကောင်စီတပ်တွေဘက်က ထောက်ပို့လမ်းအတွက် လမ်းဖောက်လို့ ထိတွေ့တိုက်ပွဲတွေ မတ်လ ၁၂ ရက်၊ ၁၃ ရက်၊ ၁၇ ရက် တို့မှာလည်း ဖြစ်ခဲ့ပြီး အဲဒီအနီးအနားက မဂါးယန်စစ်ရှောင်စခန်းအနီး လက်နက်ကြီးကျတာတွေ ရှိခဲ့ဖူးပါတယ်။
သူအနေနဲ့ လက်နက်သံတွေမကြားရပေမဲ့ တရုတ်ပြည်ဘက်ကို လက်နက်ကြီးကျတာကိုတော့ ကြားသိရတယ်လို့ ဒေသခံတစ်ယောက်က ပြောပါတယ်။
ဒါ့အပြင်အာဏာသိမ်းပြီး နောက်ပိုင်း ၂၀၂၁ နဲ့ ၂၀၂၂ အတွင်း စစ်ကောင်စီဘက်ကနေပြီး လိုင်ဇာဘက်ကို လက်နက်ကြီးနဲ့ပစ်ခတ်တာ ၄ ကြိမ်လောက်ရှိတယ်လို့ လည်း ဒေသခံတွေဆီက သိရပါတယ်။
ကချင်ပြည်နယ်ရဲ့ တချို့ မြို့နယ်တွေမှာ စစ်ကောင်စီဘက်ကနေပြီး ရိက္ခာ ပို့တာ စစ်လှုပ်ရှားတာတွေလည်း ရှိတယ်လို့ ပြောကြပါတယ်။
ဝိုင်းမော်မြို့နယ်၊ မိုးမောက်မြို့နယ်၊ ဖားကန့်မြို့နယ်နဲ့ မိုးညှင်းမြို့နယ်ဘက်ကို ရိက္ခာပို့ပြီး စစ်လှုပ်ရှားမှုတွေရှိတယ်လို့ ဒေသခံတွေက ပြောပါတယ်။
ဓာတ်ပုံ ရင်းမြစ်, Getty Images
