ဝေါ်လေဘက်ကိုစစ်ကြောင်းထိုးနေတဲ့ စစ်ကောင်စီတပ်ဖွဲ့တွေနဲ့ KNLAပူးပေါင်းအဖွဲ့တွေအကြား တိုက်ပွဲပြင်းထန်နေဆဲ, နှစ်ဖက်စစ်ရေးတင်းမာလာတာကြောင့် စစ်ရှောင်သောင်းနဲ့ချီထပ်တိုး
ဓာတ်ပုံ ရင်းမြစ်, CJ
KNU တပ်မဟာ (၆)နယ်မြေတွေဖြစ်တဲ့ လေးကေ့ကော်-ဖလူး-ဝေါ်လေလမ်းပိုင်းကို စစ်အင်အားတိုးချဲ့လာနေတဲ့ စစ်ကောင်စီတပ်ဖွဲ့ဝင် (၂၀၀) ကျော်ပါတဲ့ စစ်ကြောင်းနဲ့ နယ်မြေခံKNLA ပူးပေါင်းအဖွဲ့တွေဟာ ဒီကနေ့အထိတိုက်ခိုက်မှုတွေဆက်ရှိနေဆဲလို့ ဒေသခံသတင်းရင်းမြစ်ကပြောပါတယ်။
ဖလူးကျေးရွာအနီးမှာ မတ်လ (၂၃)ရက်၊ ညနေပိုင်းကစပြီး တိုက်ပွဲပြင်းထန်နေခဲ့တာဖြစ်ပြီး မနေ့မတ်(၂၅)ရက် တရက်လုံး စစ်ကောင်စီ ကလက်နက်ကြီးအလုံးဩများစွာပစ်ကူတိုက်ခိုက်ပေးနေပေမဲ့ KNLA ပူးပေါင်းအဖွဲ့တွေရဲ့ တိုက်ခိုက်မှုကို ကျော်လွန်ဖောက်မထွက်နိုင်ဘူးလို့ဆိုပါတယ်။
"စစ်ကူအင်အားပို့တဲ့ စစ်ကောင်စီတပ်တွေမနေ့ကတနေ့လုံး ညအထိကိုလက်နက်ကြီးအလုံးရာချီပစ်ပြီးကိုမှ တက်လာဖို့လုပ်တယ်။ ကျွန်တော်တို့ဘက် ကလည်း တက်မလာနိုင်အောင်ကြိုတင်ပြင်ဆင်မှုတွေလုပ်ပြီးတိုက်နေတယ်။ ညကတော့လက်နက်ကြီးအပစ်များတော့ စစ်ရှောင်စခန်းကလူတွေထိုင်း ဘက်နဲ့ သောင်းရင်းမြစ်ဘေးဆင်းအိပ်ကြရတယ်။ ဒါကဖလူးဘက်ပေါ့။ဟိုးအပေါ်ဘက် မော်ခီး၊ ထီးငဲဘလယ်ဘက်မှာလည်း စစ်ကောင်စီစခန်းနောက်တခုကို ကရင်အဖွဲ့တွေတက်သိမ်းရင်းတိုက်ပွဲဖြစ်တယ်၊ လေယာဉ်တစီး လာပစ်တော့ ပြန်ဆုတ်ပေးလိုက်တယ်။ "လို့ KNLA သတင်းအရင်းအမြစ်က ဘီဘီစီကိုပြောပါတယ်။
ဓာတ်ပုံ ရင်းမြစ်, CJ
လေးကေ့ကော်-ဖလူး-ဝေါ်လေလမ်းပိုင်းမှာတော့ ဒေသတွင်းကရင့်လက်နက်ကိုင်တပ် KNLA၊ KNDO ပူးပေါင်းတပ်ဖွဲ့တွေနဲ့ တဖက်စစ်ကောင်စီရဲ့ ကင်းစခန်းတွေဖြစ်တဲ့ သေ့ဘောဘိုး၊ ဝေါ်လေ၊ ကနဲလေး၊ လေးကေ့ကော်အမြောက်ကုန်း၊ ဖလူးဘုရားကုန်း၊ သောင်းရင်းမြစ်ဘေး၊ DKBA စခန်းဟောင်းနေရာ တွေမှာ နှစ်ဖက်စစ်ရေးတင်းမာနေတဲ့အခြေအနေပါ။ ဒါကြောင့် ကျေးရွာ(၃၀)လောက်ကနေ စစ်ရှောင်ဒေသခံ တသောင်းငါးထောင်ဝန်းကျင်အထိ မြင့်တက်လာနိုင်တယ်လို့ နယ်စပ်စစ်ဘေးရှောင်အရေးကူညီပေးနေသူတွေက ဆိုပါတယ်။
"မနေ့ကတော့ တော်တော်သည်းသည်းမဲမဲပစ်ကြတာပေါ့။ အလုံးကြီးတွေပြိုင်တူပစ်ချ၊ ကရင်အဖွဲ့တွေကလက်နက်ကြီးဒဏ်မခံနိုင်လို့ ဆုတ်မယ်ဆို သူတို့တက်လာမယ်ပေါ့။ ညကအထိပစ်ကျတာမရသေးဘူးကြားတယ်။ လက်နက်ကြီးကျတာက စစ်ရှောင်စခန်းတွေနဲ့နီးလာတော့ မြစ်ဘေးဆင်းရှောင်ကြ၊ ထိုင်းဘက်နွားခြံဘက်ကူးအိပ်ကြပေါ့။ အပေါ်ဘက် ဝေါ်လေ၊ သေ့ဘောဘိုး၊ မော်ခီး၊ ထီးသဲဘလယ်ဘက်ကလည်း ထိုင်းတောင်ယာကုန်းတွေဘက် ရှောင်နေကြရပြီ။ အခုရက်ကတော့ ဒီတိုင်းဖြစ်နေရင် ဒေသခံတွေကထိုင်းဘက်ရှောင်နေမှရမယ့်အခြေအနေပဲ"လို့ သေ့ဘောဘိုးကျေးရွာအစုအဖွဲ့ စစ်ရှောင်ကူညီနေသူတဦးက ပြောပါတယ်။
အခုလက်ရှိKNU တပ်မဟာ (၆)နယ်မြေထဲကို စစ်ကောင်စီတပ်တွေအင်အားတိုးချဲ့နယ်မြေရှင်းလင်းရေးလုပ်ဖို့ တပ်မ (၂၂)လက်အောက်ခံတပ်ရင်းတွေ၊ တပ်မ (၄၄)လက်အောက်ခံတပ်ရင်းတွေနဲ့ ကမ်းရိုးတန်းတိုင်းစစ်ဌာနချုပ်လက်အောက်ခံတပ်ရင်းတွေကနေ ကရင်ပြည်နယ်အခြေစိုက် ကရင်နယ်ခြား စောင့်တပ် BGF တပ်နယ်(၃)၊ တပ်နယ်(၄) လက်အောက်ခံတပ်ဖွဲ့ဝင်တွေ ပူးပေါင်းထားတယ်လို့သိရပါတယ်။
အဲ့ဒီစစ်ကောင်စီရဲ့ ပူးပေါင်းအဖွဲ့တွေဟာ ကော့ကရိတ်၊ ကြာအင်းဆိပ်ကြီးနဲ့ လေးကေ့ကော်ဒေသတို့ကို အခုနှစ်မတ်လ (၇)ရက်နောက်ပိုင်း အင်အားအလုံးအရင်းနဲ့ တိုက်ခိုက်နယ်မြေကျော်လွန်လာတဲ့ အတွက် နှစ်ဖက်တိုက်ပွဲတွေ နေရာစုံဖြစ်ပွားနေတာဖြစ်ပါတယ်။
KNU ဒူးပလယာခရိုင်ကတော့ တပ်မဟာ (၆)နယ်မြေတဝိုက်မှာ စစ်ရေးတင်းမာမှုဆက်ရှိလာနိုင်တာကြောင့် ကော့ကရိတ်-မြဝတီလမ်းမကြီးနဲ့ မြဝတီ - ဝေါ်လေလမ်းမကြီးတို့ကို မနက်ဖြန်မတ်လ (၂၇)ရက်ကစပြီးမသွားလာကျဖို့ တရားဝင်စာထုတ်ပြန်ထားပါတယ်။ စစ်ကောင်စီဘက်ကလည်း မတ်လ (၂၇)ရက်၊ တပ်မတော်နေ့တဝိုက်မှာ လူအင်အားနည်းတဲ့ကင်းစခန်းတွေဝင်ရောက်တိုက်ခိုက်ခံရနိုင်တာကြောင့် အထူးဂရုစိုက်ဖို့ဆိုတဲ့စာထုတ်ပြန်တဲ့ အကြောင်း ပြီးခဲ့တဲ့ရက်သတ္တပတ်အတွင်း လူမှုကွန်ယက်စာမျက်နှာပေါ်မှာ ကျယ်ကျယ်ပြန့်ပြန့်ထွက်ပေါ်လာခဲ့ပါသေးတယ်။
ဓာတ်ပုံ ရင်းမြစ်, CJ
