کورونا وائرس: دنیا بھر میں ہلاکتیں پانچ لاکھ سے تجاوز کر گئیں

لائیو کوریج

1. 26 جون 2020مظفرآباد میں لاک ڈاؤن میں نرمی، ایک ہفتے کے لیے سمارٹ لاک ڈاؤن نافذ, ایم اے جرال، صحافی

   

   ،تصویر کا ذریعہM.A Jarral

   پاکستان کے زیر انتظام کشمیر کے ضلع مظفرآباد میں اس خطے کی حکومت نے مکمل لاک ڈاؤن میں نرمی کرتے ہوئے ضلع بھر میں ایک ہفتے کے لیے سمارٹ لاک ڈاؤن نافذ کر دیا ہے۔

   ضلعی انتظامیہ کی جانب سے جاری ہونے والے مراسلے کے مطابق تمام کاروباری مراکز سمیت ٹرانسپورٹ کو ایک ہفتے کے لیے مخصوص دنوں میں محکمہ صحت کے بتائے گئے ضابطہ اخلاق کے تحت کھولنے کی اجازت ہے۔

   جاری کردہ نوٹیفیکیشن کے مطابق اشیائے خوردونوش کی دکانیں، میڈیکل اسٹورز، بیکریز پورا ہفتہ کھلی رہیں گی جبکہ کریانہ اور ایل پی جی دکانیں سوموار کے علاوہ چھ دن کھولنے کی اجازت ہوگی۔

   مقامی انتظامیہ کی جانب سے جاری ہونے والے نوٹیفیکیشن کے مطابق مچھلی کی دکانیں ہفتے میں تین ایام جمعرات، جمعہ اور ہفتہ کھولی جائیں گی جبکہ جوتے، ہوزری، کپڑے اور درزی کی دکانیں ہفتے میں تین ایام اتوار، پیر اور منگل کو کھلیں گی۔

   نوٹیفیکیشن کے مطابق گارمنٹس، کراکری، جیولری، الیکٹرانکس، موبائل شاپس، کمپیوٹر اور کتابوں کی دکانیں بدھ، جمعرات اور جمعہ کو کھلنے کی اجازت ہے جبکہ جملہ ورکشاپس، ٹائر، حجام اور بیوٹی پارلر جمعہ، ہفتہ اور اتوار کو کھولنے کی اجازت ہوگی۔

   سرکاری ہدایت نامے کے مطابق دارالحکومت مظفرآباد سمیت دیگر علاقوں کے لیے طے شدہ ضابطہ اخلاق کے تحت گاڑیاں چلانے کی اجازت ہوگی۔

   یاد رہے کہ اس خطے کی حکومت نے ضلع مظفرآباد سمیت ضلع بھمبر میں دو ہفتے کے لیے مکمل لاک ڈاؤن نافذ کیا تھا جس کے بعد ضلع مظفرآباد میں نرمی کر کے سمارٹ لاک ڈاؤن نافذ کیا گیا ہے، البتہ ضلع بھمبر میں مکمل لاک ڈاؤن نافذ ہے۔

2. 26 جون 2020برتھ ڈے پارٹی: امریکی ریاست ٹیکساس میں ایک ہی خاندان کے 18 افراد مرض کے شکار

   

   ،تصویر کا ذریعہAFP

   امریکہ کی ریاست ٹیکساس کے کیرولٹن علاقے میں ایک ہی خاندان کے 18 افراد میں کووڈ۔19 کا ٹیسٹ اس وقت مثبت آ گیا جب ایک سرپرائز برتھ ڈے پارٹی میں ایک رشتہ دار نے انجانے میں سب کو مرض سے متاثر کر دیا۔

   کینز5 نیوز کے مطابق متاثرہ شخص ایک نوجوان تھا جو سمجھ رہا تھا کہ اس کی کھانسی اس کے تعمیرات کے کام کی وجہ سے ہے۔ اس کا پارٹی میں سات افراد سے رابطہ تھا۔

   ان سات افراد نے باقی 10 مزید افراد میں یہ بیماری پھیلا دی، جن میں دو چھوٹے بچے بھی شامل ہیں۔ اس وقت وائرس کی وجہ سے خاندان کے تین افراد ہسپتال میں ہیں، جن میں دو دادا دادی ہیں جبکہ ایک خاتون ہیں جنھیں چھاتیوں کا سرطان ہے۔

   ران باربوسا، جن کے بھتیجے پہلے متاثرہ فرد تھے، نے کہا کہ انھوں نے اور ان کی بیوی نے کورونا وائرس کے خطرے کی وجہ سے پارٹی میں شرکت نہیں کی تھی۔

   انھوں نے کینز5 کو بتایا کہ ’ہمیں پتہ تھا کہ یہ ہونا ہی ہے۔ جس وقت یہ سب ہو رہا تھا، ہم اس دوران خوفزدہ تھے۔‘

   ٹیکساس کی پابندیاں نرم کرنے کی نئی ہدایات کے مطابق اس خاندان کو پارٹی کی اجازت تھی۔ ریاست میں گذشتہ دو دن لگاتار 5 ہزار سے زائد کووڈ۔19 کے متاثرین کے بعد جمعرات کو گورنر نے دوبارہ کھولنے کے منصوبے کو ایک مرتبہ پھر روک دیا ہے۔

3. 26 جون 2020کورونا وائرس: پاکستان کے تازہ ترین اعداد و شمار کیا ہیں؟

   

   بی بی سی اردو کی کورونا وائرس سے متعلق خصوصی لائیو کوریج میں خوش آمدید۔ پاکستان میں اب تک کے اعداد و شمار کے مطابق ایک لاکھ 95 ہزار 58 افراد میں کورونا وائرس کی تصدیق ہو چکی ہے اور متاثرین کی سب سے بڑی تعداد کا تعلق صوبہ سندھ سے ہے جہاں 75 ہزار سے زائد افراد میں کورونا وائرس پایا گیا ہے۔

   سرکاری اعداد و شمار کے مطابق متاثرین کی تعداد کے اعتبار سے پنجاب دوسرے نمبر پر سب سے زیادہ متاثرہ صوبہ ہے، تاہم اگر ہلاکتوں کی بات کی جائے تو یہاں اب تک پاکستان میں سب سے زیادہ 1629 اموات ہوئی ہیں۔

   پاکستان میں ہلاکتوں کی مجموعی تعداد 3952 ہے۔

   اب تک ملک بھر میں 83 ہزار 402 افراد اس وائرس سے متاثر ہونے کے بعد صحتیاب ہو چکے ہیں۔

4. 26 جون 2020بی بی سی اردو کی لائیو کوریج جاری ہے

   بی بی سی اردو کے تازہ لائیو پیج میں خوش آمدید!

   یہاں آپ کو کورونا وائرس اور اس سے جڑی پاکستان سمیت دنیا بھر سے اہم خبریں ملیں گی۔

   گذشتہ چند دنوں کی صورتحال پر نظر ڈالنے کے لیے یہاں کلک کیجیے۔