BBC News, O'zbek
Саҳифага ўтиш

You’re viewing a text-only version of this website that uses less data. View the main version of the website including all images and videos.

Take me to the main website

Россия Хитойнинг энг йирик нефть таъминотчисига айланди

Россия Хитойга нефть етказиб бераётган энг йирик таъминотчига айланди. Украинага Европа Иттифоқига номзод мамлакат мақоми бериладиган шу ҳафтада Россия ўзининг душманона ҳаракатларини янада кучайтириши мумкин. Мамлакат шарқида жанг давом этаяпти.

Жонли ёритиш

  1. "Азовсталь" заводи ҳудудида тинч фуқаролар кўп, Можаронинг 56-куни

    Қуршовдаги "Азовсталь" заводи ичида қамалиб қолган тинч фуқаролар кўп, деб айтди Мариуполь шаҳри ҳокимининг ўринбосари.

    Россия томони Москва вақти билан 20 апрель соат 14 гача Мариуполни ҳимоя қилаётган Украина ҳарбийларига қуролларини ташлаб таслим бўлиш ультиматумини қўйди.

    Бироқ шаҳар ҳимоячилари порт шаҳарни мудофаа қилишда давом этишларини айтишган.

    Россия Мариуполнинг аксар қисмини ўз назоратига олган, Россия дастаклаётган жангчилар улкан пўлат ишлаб чиқариш заводи ҳудудини қўлга киритишга жон-жаҳди билан ҳаракат қилмоқда.

    "Мен у ерда жуда кўп тинч фуқаролар борлиги тасдиқлайман", деди Би-би-си билан суҳбатда Мариуполь ҳокими ўринбосари Сергей Орлов.

    "Улар, асосан, ён-атрофдаги уйлари вайрон бўлган фуқаролар ва пўлат заводининг кўп сонли ишчилари. Улар завод остида яхши бомбапаноҳ борлигини билишади ва ўша ерда сув ва озиқ-овқат жамғаришган. Шунинг учун ҳам улар оилалари билан бомбапаноҳда яшашга қарор қилишган", деди Сергей Орлов.

    Завод ҳудудида қолаётганларга бирор бир ёрдам беришнинг имкони йўқ, деб айтди у.

    "Уларда ҳеч нарса қолмаган. Сув, егулик, дори-дармон ва ёрдам. Россия ҳамма нарсанинг, инсонпарварлик ёрдамларини етказишнинг ҳам, одамларни эвакуация қилишнинг ҳам йўлини тўсаяпти.

    "У ердан чиқиб кетиш, Мариуполни ёки "Азовстал"ни тарк этиш имконияти берилгани ҳақидаги ҳамма хабарлар фейк", деб айтди Сергей Орлов.

    "Азовсталь" ҳудудида қолаётган Украина денгиз пиёдалари бригадаси раҳбари Сергей Волина дунё раҳбарларига мурожаат этиб, ўзлари ва у ердаги тинч фуқароларни қутқаришда ёрдам беришни сўради.

    Волина видео мурожаатини Фейсбукда эълон қилган, 500 та ярадор, юзлаб тинч фуқаролар борлигини айтган.

  2. Шарқий Украина, Донбасс: Жанг жабҳасида кучлар нисбати қандай?, Можаронинг 55-куни

    Россия кучлари

    Россия Донбассга ҳужум қилиш учун бир неча ҳафтадан буён қўшин тўплайди. Янги бўлинмалари баробарида Украина шимоли-шарқидан эскилари - аллақачон жангга кириб бўлганларини ҳам келтирган. Бунга Уруш тадқиқотлари институтининг маълумотлари далолат қилади.

    АҚШ томонига кўра, Россия ҳозир Украина шарқида 76 та жанговар бўлинмасига эга. Сўнгги кунларда уларга 11 та янгиси келиб қўшилган.

    Ҳар бир жанговар бўлинмаси эса, одатда, ҳарбий техника билан қуролланган 700-900 нафар аскардан иборат бўлади.

    Агар бир ерга жамланса, бу ҳозир Донбассда 70000 га яқин Россия ҳарбийсининг борлигини англатади.

    Россиялик хавфсизлик масалалари бўйича эксперт Аглая Снеткованинг айтишича, Украинанинг урушлар ичидаги жанубий Мариуполь шаҳрида ҳам Россиянинг 22 та жанговар бўлинмаси бўлиши мумкин.

    Унга кўра, агар Мариуполь таслим бўлса, Россия у ердаги бўлинмаларини ҳам Донбассга ташлаши эҳтимоли бор.

    Украина кучлари

    Русларнинг ҳарбий салоҳияти ҳақидаги маълумотларни Ғарб агентликлари, Украина ва ҳатто Россиянинг ўзидан ҳам олиш мумкин.

    Аммо Украинанинг кучлари ва талафотлари сони бўйича кўп нарса маълум эмас, дейди Снеткова.

    Унинг айтишича, бу қисман Украинанинг ўз истаги билан боғлиқ.

    Яъни, экспертга кўра, душманларига қўл келмаслиги учун Украина буни ошкор қилишни унча истамайди, хушламайди.

    Украинага қараб, Ғарб ҳам жимгина худди шундай қилишни маъқул кўрмоқда, дейди эксперт.

    Уруш ибтидосида мамлакат шарқида Украинанинг 10 та ҳарбий бўлинмаси бўлган.

    Уларнинг Украинадаги энг яхши қўролланган ва чиниққанлари экани ишонилади.

    Ҳарбий техника

    Украина мамлакат шарқида етарлича ҳарбийсига эга бўлиши мумкин. Аммо қурол-яроғи кам. Россия эса, бунинг тескариси, дейди Снеткова.

    Унинг айтишича, Украина шарқидаги жанглар пойтахт Киев атрофидагисидан фарқ қилиши мумкин.

    Яъни, экспертга кўра, Донбассдаги жанглар худди Иккинчи Жаҳон уруши пайтидагидек ҳандақларда кечиши ва танклар ишга солиниши мумкин.

    Уруш тадқиқотлари институтининг чамасига кўра, Россия катта сондаги оғир техникаси ҳисобига олдинга силжиши мумкин, аммо драматик тарзда ғалаба қозона олмайди.

  3. Россия АҚШ ва Ғарбни “ҳарбий амалиётни чўзиш”да айблади, Можаронинг 55-куни

    Россия Мудофаа вазири янги иддао билан чиқди.

    Сергей Шойгу АҚШ ва Ғарб давлатларини “Россиянинг Украинадаги ҳарбий амалиётларини чўзиш учун ҳамма ишни қилаётганлик”да айблади.

    Вазирга кўра, Украинага кучайиб бораётган қурол-яроғ таъминоти уларнинг “Киевни сўнгги қадар жанг қилишга гижгижлаш мақсадида эканликлари”га далолат қилади.

    Унинг қўшимча қилишича, Россия кучлари “Донецк ва Луганск Халқ Республикаларини озод қилиш”га қаратилган режани изчиллик билан амалга оширишмоқда.

    Бу икки шарқий вилоят ўзларини ўзлари Украинадан мустақил, деб эълон қилишган.

    66 ёшли Сергей Шойгунинг чиқиши Россия 24 телевизион канали орқали олиб узатилган.

    Унинг Россия Мудофаа вазирлиги коллегияси йиғинидаги чиқиши олдиндан ёзиб олинганми-йўқлиги маълум эмас.

    Агар, йиғин тўғридан-тўғри олиб узатилган бўлса, бу Шойгунинг узоқ кунлик танаффус ортидан жамоатчиликка илк бор кўриниш бериши бўлади.

    Орада унинг хаста эканига оид хабарлар ҳам бўй кўрсатганди.

  4. Донбасс: Украина Россияни енга оладими?, Можаронинг 55-куни

    Украина Президенти Володимир Зеленскийнинг маслаҳатчиси умидбахш.

    Ихор Жовкванинг айтишича, бунинг учун оғир қуроллари бўлса, бўлди, Россиянинг Украина шарқидаги янги ҳужумини даф эта олишади.

    У Украина президенти маъмурияти бошлиғининг муовини бўлади.

    Жовкванинг маълум қилишича, Россия кеча, душанба куни Украина шарқини артиллериясидан қақшатқич ўққа тутган.

    Худди шу билан Украина шарқида ўзи режалаб келаётган “аниқ йўналтирилган” ҳужумларини бошлаган.

    Ихор Жовква BBC Radio 4 га гапирган.

    Суҳбати чоғида Украина кучларининг ҳам оғир қуроллари бўлиши муҳимлигини таъкидлаган.

    Улар сирасида артиллерия тизимлари, танклар ва зирхли уловларни тилга олган.

    Агар худди шу қуроллари бўлса, Украина Россиянинг ҳужумига бас кела олиши ва мамлакат шарқида ғалаба қозонишини айтган.

    Унинг маълум қилишича, Ғарб яхшироқ қурол-яроғ етказиб беришни бошлаган.

    Америка Қўшма Штатларининг $800 миллион долларлик сўнгги ҳарбий кўмаги айнан “ўзларига ўта керак бўлган нарсалар”ни ўз ичига олган.

    Украина президенти маслаҳатчисининг айтишича, Донбасс Россия учун рамзий жиҳатдан ўта муҳим.

    Унга кўра, Россия Украинага 2014 йилги босқинини ҳам худди шу ердан бошлаган.

    Ўшанда Донбасснинг айрим жойларини босиб олиб, у ерда, ўз таъбирича, “республикалар” барпо этган.

    Шу йилнинг 24 февраль куни, Донбассда ўзининг навбатдаги "махсус ҳарбий амалиёти"ни бошлаши арафасида бу икки "республика" мустақиллигини ҳам расман тан олган.

  5. Агар назардан қочирган бўлсангиз:, Можаронинг 55-куни

    • Украина президенти Россия Донбассда ҳужумга ўтганини маълум қилди. Уларни кутилаётган ва кенг қамровли, деб атади.
    • Украинанинг маълум қилишича, Россия Донбассдаги бутун – 480 километрлик жанг жабҳаси бўйлаб ўз мавқеъларига ҳужум қилмоқда.
    • Россиянинг даъво қилишича, ўтган тунда Донбассга мингдан ортиқ зарба берган.
    • Украинанинг эътироф этишича, Россия Луганскдаги Кременная шаҳри назоратини қўлга киритган.
    • Луганск губернатори маҳаллий аҳолини зудлик билан минтақани тарк этишга чақирган. Серхий Ҳайдайнинг айтишича, Россия ҳамма томондан ҳужум қилаётир.
    • Мариуполдан олинаётган хабарларга кўра, Россия томонидан дастакланаётган жангчилар шаҳардаги йирик саноат мажмуасини забт этиш ҳаракатида. Бу ерда украиналик сўнгги ҳимоячилар билан бирга оддий одамлар ҳам яширингани айтилади.
    • Бирлашган Миллатлар Ташкилотининг маълум қилишича, Россия ишғоли ортидан беш миллионга яқин украналик дарбадарликка юз тутган. Бу Европада Иккинчи Жаҳон урушидан кейинги энг ёмон қочқинлар инқирози экани айтилади. Халқаро ташкилотга кўра, қочқинларнинг аксарияти хотин-қиз ва болалардир. 18 ёшдан 60 ёшгача бўлган эркаклар эса, ҳарбий хизматга яроқли, деб кўрилишади. Улар Украинани тарк этишга имконли бўлишмаган.
    • Россия Ташқи ишлар вазирига кўра, мамлакати Украинада ядровий қурол ишлатмайди.

  6. Шарқий Украинада жанг: Россия Кременнаяни олди, Можаронинг 55-куни

    Украина Россиянинг ютуғини тасдиқлади.

    Кременная Украинанинг шарқий Луганск вилоятида жойлашган.

    Шу соатларда шаҳар кўчаларида жанглар кетаётганига оид хабарлар олинмоқда.

    Маҳаллий маъмурларга кўра, жанглар тўрт тинч фуқаронинг умрига зомин бўлган.

    Серхий Ҳайдай одамларни яшириниб олган жойларидан чиқмай туришга чақирган.

    У Украина телевидениеси орқали гапирган.

    Маъмурга кўра, оғир қуроллардан берилган зарбалар етти турар-жой биносини ўт ичида қолдирган.

    Яна Украина миллий Олимпия терма жамоаси шуғулланувчи спорт мажмуаси ҳам нишонга олинган.

    Унинг айтишича, Россия ўз йўлидаги биноларни вайрон қилишда давом этмоқда.

    Қайта уюшиб, яна жангга киришиш учун эса, ўзлари ортга чекинишган.

  7. Украина: Ўлим ва вайронагарчиликлар, Қисқа фоторепортаж

    Россия шарқий Донбасс минтақасини тўлиқ босиб олиш учун қарши ҳужумга ўтди.

    Бугун эрталаб бу ҳақда Украина Президенти Володимир Зеленский расман маълум қилди.

    Кенг қамровли ҳужумлари арафасида эса, Россия Украина шарқини бомбалади.

    У ердаги қатор ҳудудларга ракета ва артиллериясидан зарба берди.

    Россиянинг ҳужумлари тинч аҳоли орасида талафотларга сабаб бўлгани айтилди.

    Биргина Луганкс ва Донецк ҳудудида жойлашган Кременнаяда камида ўн тинч фуқаронинг қурбон бўлганига оид хабарлар олинди.

    Россия кеча, душанба куни Украина шарқи баробарида ғарбини ҳам ҳужумга тутди, Львов шаҳрига тўрт марта зарба берди.

    Бу ерда етти кишининг ўлгани ва яна ўндан ошиғининг яраланганига оид хабарлар бор.

    Суратларнинг барчаси 18 апрель куни олинган.

  8. Украина: Донбасс Путинга нега керак?, Таҳлил

    Пойтахт Киевни забт этолмаган Россия бор эътиборини энди Донбассга қаратди. Украинанинг бу бўлгинчи минтақасига қарши кенг қамровли ҳужумга ўтди. Америка Қўшма Штатлари аллақачон жиддий хавотирда. Расмий Вашингтонга кўра, бу Украина можаросининг давомий тус олишига далолат қилиши мумкин. Донбасс Путинга нега керак?

    ББС таҳлили билан батафсил танишиш учун иловамизни босинг.

  9. Украина уруши: Марказий Осиёдаги “иқтисодий пасайиш” глобал ўсишга таъсир қилдими?, Можаронинг 55-куни

    Украина уруши фонида Жаҳон Банки глобал иқтисодий ўсиш борасидаги пронозларини пасайтирди.

    Бу ҳақда банк президенти Дэвид Малпасс душанба куни бўлиб ўтган матбуот анжумани чоғида маълум қилди.

    Унинг айтишича, Россиянинг ишғоли боис, жорий йилдаги башоратларини 4.1 фоиздан 3.2% га туширишган.

    Бунга Европа ва Марказий Осиёдаги иқтисодий ўсиш суръатларининг пасайиши сабаб экани айтилган.

    Шу ой бошида Жаҳон Банки уруш сабаб Украина иқтисоди кечаётган йилда қарийб тенг ярмига қисқариб кетишини ҳам айтганди.

    Банкнинг башорат қилишича, Россиянинг ишғоли Шарқий Европа ва Осиёнинг айрим қисмларига коронавирус пандемиясидан кўра кўпроқ иқтисодий зиён етказиши мумкин.

    Жаҳон Банкига кўра, қуролли можаро Украинадаги корхоналар ярмининг ёпилиши ва мамлакат экспорт ҳажмининг камайиб кетишига олиб келган.

    Банк шу пайтгача Украинага қарийб 1 миллиард долларлик ёрдам кўрсатган. Келаси ойларда яна 2 миллиард доллар миқдорида кўмак қилишни ваъда берган.

  10. Шу соатга қадар бўлган энг муҳим воқеалар:, Можаронинг 55-куни

    • Россия шарқий Донбасс минтақасида ҳужумга ўтди. Бу ҳақда бугун, сешанба куни тонгда Украина президенти маълум қилди. Володимир Зеленский уларнинг кенг кўламли эканини айтмоқда.
    • Россиянинг бомбардимонлари ортидан у ердаги собиқ туристик шаҳарчалар энди унинг ҳужумига ҳозирлик кўришмоқда.
    • Украина ҳарбийларига кўра, Россия асосий эътиборини Луганск ва Донецкдаги ҳимоя чизиқларини ёриб ўтишга қаратаётир.
    • Россиянинг Белгород вилояти губернаторининг айтишича, Украина кучлари чегара яқинидаги қишлоқларига ҳужум қилишган. Бир тинч фуқарони яралашган. Украина томони ҳозирча бу хусусда жим.
    • Пентагон матбуот котиби Жон Кирбининг баён қилишича, Россия Украина шарқини “шакллантириш”ни бошлаган. Янада йирик ва тажовузкор ҳужумлари учун шарт-шароит яратишга киришган.
    • Львовлик мулозимларга кўра, Россиянинг душанба кунги ҳужуми камида етти тинч фуқарони ўлдирган ва ўндан ортиғини яралаган.
    • Европа Иттифоқининг тақиқи сабаб, Греция ва Испания чиқариб юборган дипломатларини олиб қайтиш учун Россиянинг самолёти 150000 километр йўл босган. Бу ҳақда Flightradar24 маълум қилган.
    • Украина уруши 55 кунига кириб бораркан, Жаҳон Банки анчайин умидсиз башорат билан чиққан. Глобал ўсиш прогнозини 4.1 фоиздан 3.2%га туширган. Банк буни Европа ва Марказий Осиёдаги ўсиш суръатининг пасайиши билан боғлаган.

  11. Бучалик аёл: Дунё Россия қотил эканлигини билсин

    Россиянинг Украинада олиб бораётган уруш услубига халқаро миқёсдаги энг катта норозилик Киев яқинидаги Буча шаҳрида пайдо бўлган далиллар атрофида жамланди. Би-би-си мухбири Йогита Лимаe у ерда бўлиб россиялик ҳарбийлар қолдириб кетган манзаранинг гувоҳи бўлди. Огоҳлантирамиз, лавҳадаги тасвирлар кўнглингизни хира қилиши мумкин.

  12. Британия: Россия Мариупол осон енгилмаётганидан “хавотирда”

    Британия Мудофаа вазирлиги украиналикларнинг Мариуполда узоқ вақтдан бери қаттиқ қаршилик кўрсатиши Россияни “хавотир”га солишини айтган.

    Вазирлик ҳарбий ҳаракатлар давомида Мариуполдаги тинч аҳоли орасида катта йўқотиш борлигини билдирган.

    Британия Мудофаа вазирлиги Россияни тинч аҳоли биноларини қасддан нишонга олиш орқали Украинада Чеченистон ва Сурияда олиб борган уруш услубини қайтараётганини таъкидлаган. Россия бундай уруш услуби олиб бораётганини рад қилади.

    Олдинроқ Украина Ташқи ишлар вазири Россияни стратегик муҳим шаҳар Мариуполни ер билан яксон қилишга ҳаракат қилишда айблаганди.

    Мариуполдаги украиналик аскарлар Россиянинг таслим бўлиш ҳақидаги талабини рад қилган.

  13. Путин: Ғарбнинг тезкор иқтисодий уруши иш бермади, бироқ инфляция юқори

    Россия президенти ҳукуматнинг иқтисодий масалалар бўйича йиғилишида Ғарбнинг Россияга қарши тезкор иқтисодий уруши чиппакка чиққанини айтди.

    “Улар мамлакатимиздаги молиявий-иқтисодий вазиятни қисқа муддатда чайқатиб ташлашни мўлжал қилишганди. Бозорда ваҳима кўтариб, банк тизимини алғов-далғов қилиб, дўконларда товарлар танқислигини юзага келтиришмоқчи эди”, деган Путин.

    Бироқ Путин шу билан бирга 17.5% лик инфляция катта рақамлигини айтган. Шу муносабат билан у ҳукуматни россияликлар ва ички талабни қўллаб қувватлашга чақирган.

    Россия қўшинлари Украинага бостириб кирганидан сўнг Ғарб Россияга қарши мисли кўрилмаган санкциялар жорий қилди. Санкцияларга йирик давлат ташкилотлари ва банклар ҳам тушди. Украина Ғарбдан Россиядан нефт ва газ олишни тўлиқ тўхтатишни сўраб келмоқда.

  14. Мариупол таслим бўлишдан бош тортди

    Мариупол мэри маслаҳатчиси Пётр Андрюшенконинг айтишича, Россия Мариупол шаҳрида қолган фуқароларга ҳаракатланиш учун махсус рухсатнома бермоқда.

    Айни дамда Мариуполдан ташқарида бўлиб турган Андрюшенкога кўра, ушбу рухсатномани олиш учун юзлаб одам навбатда турибди. Кейинги ҳафтадан бошлаб эса рухсатномаси бўлмаганлар нафақат туманлараро ўтиши, балки кўчага чиқиши ҳам тақиқланади.

    Расмийнинг тахмин қилишича, Россия ҳарбийлари шу йўл билан шаҳарда қолган аҳоли ҳақида маълумот тўпламоқда.

    Россия Мариуполнинг катта қисмини назорат қилаётганини таъкидламоқда, шаҳарнинг украиналик ҳимоячилари эса "Азовсталь" заводи ҳудудига жойлашиб олган.

    Улар якшанба куни Россиянинг таслим бўлиш ҳақидаги талабига рад жавобини беришди.

  15. Лвов ракетадан ҳужумга тутилди

    Лвов шаҳрига ракеталар билан ҳужум натижасида 6 киши ҳалок бўлди. Лвов вилояти ҳарбий маъмурияти раҳбари Максим Козицскийнинг айтишича, 4 та ракета ҳужуми уюштирилган. Уларнинг учтаси ҳарбий иншоотларни нишонга олган бўлса, биттаси машина балонларини ямайдиган устахонага келиб урилган.

    Маҳаллий вақт билан эрталабки соат 10 қадар 6 кишининг ҳалок бўлгани ва саккиз киши жароҳат олгани маълум қилинган. Уларнинг орасида бир нафар бола ҳам бор.

    Унинг айтишича, зарба берилган объектлар жиддий зарар кўрган.

    Лвовдан Би-би-си мухбири Дэн Жонсоннинг айтишича, бомбардимондан сўнг шаҳарда вазият ўзгарди. Бунгача одамлар бу ерда ўзларини хавфсизроқ ҳис қилишаётганди. Чунки уруш бошланганидан бери шаҳар четига бир ракета келиб тушган.

    Россия эътиборини Донбасс минтақасига қаратишини айтаётган бўлса-да, Киев дохил Украина ғарбидаги шаҳарларга ҳаводан ҳужумини кўпайтирган.

  16. Россия босқини: Зеленский Украина ғалаба қилишига ишонади – дунё, янгиликлар

    Россия босқини: Зеленский Украина ғалаба қилишига ишонади.

    Украина президенти Би-би-сига эксклюзив интервью берди.

    Володимир Зеленский яна нималар деди?

  17. Диққат: Украина - Жонли. Путин Украинани кунпаякун қилмоқдами? Ўзбекистондан назар, Можаронинг 52-куни

    Россия ҳужумларининг қандай ваҳшатлари аён бўлди?

  18. Россия Мариуполга узоқ-масофали ракета отувчи тизимлардан ҳужум қиляпти – Украина, Можаронинг 51-куни

    Босқин юз берганидан бери илк марта Россия армияси қамал остидаги Мариупол шаҳрига узоқ-масофали ракета отувчи тизимлардан ҳужум қилди дейди Украина мудофаа вазирлиги.

    Вазирлик матбуот котиби Олександр Мотузнякнинг айтишича, Россия Украина жанубидаги Рубижне, Попасная ва Мариупол шаҳарларини эгаллашга энг кўп кучини ташлаяпти.

    Шу ҳафта Россия ҳарбийлари Мариуполни тўла босиб олганларини айтишганди, аммо украина кучларига кўра, Мариупол ҳали қулагани йўқ ва жанглар давом этяпти.

    Воизнинг айтишича, жанглар шаҳарнинг Ильич металлургия комбинати ва порт атрофида кечмоқда.

  19. Киев яқинидаги корхонага қарши Россия зарбасининг тафсилотлари чиқмоқда, Можаронинг 51-куни

    Россия Украина пойтахтида снаряд ишлаб чиқарадиган корхонага зарба бериши ортидан Киевдаги портлашнинг янги тафсилотлари чиқяпти.

    AFPнинг портлаш жойини бориб кўрган мухбири Украина ҳарбий корхонаси қисман вайрон бўлганини хабар қилди.

    Киевнинг Жуляни халқаро аэропорти яқинида жойлашган Визар заводининг корхонаси ва маъмурий биноси қаттиқ шикаст еган, дейди журналист.

    Заводнинг ёғоч корхонасига эгалик қилувчи 47 яшар Андрей Сизов портлаш тунда содир бўлганини айтган.

    “Соат 1:30да қўриқчим менга телефон қилиб, ҳаводан ҳужум бўлганини айтди. Бешта зарба бўлган. Бир ишчим офисда бўлган, портлашнинг кучи уни жойидан улоқтириб юборган”, дейди Сизов.

    Унинг ишонишича, Россия “Москва” ҳарбий кемасининг чўктирилиши учун қасос олмоқда. Пайшанба куни Украина уни Нептун ракеталари ёрдамида уриб чўктирганини даъво қилганди.

  20. "Москва"нинг чўкиши Россия ҳарбий ғурурига зарба берди, Женни Ҳилл, Би-би-си мухбири, Москва

    “Москва” кемасининг чўктирилиши “махсус ҳарбий амалиёт” режадагидек кетаётганини таъкидлаб келаётган Президент Путин учун муҳим ва шармандали йўқотиш бўляпти.

    Россия давлат телевидениеси Қора Денгиздаги флотнинг фахри бўлган бу кема нега чўкканига тўхталмаётганларидан ҳайрон қолмасак ҳам бўлади.

    Тонгги хабарларда ҳукумат баёноти қисқа ўқиб эшиттирилди. Бу баёнотда кема ўз бортидаги портлаш ва ёнғиндан кейин денгиздаги тўфон туфайли чўккани айтилади.

    Газеталарнинг баъзи шарҳловчилари бу қарашни қўллаб чиқишди ва 40 ёшли ҳарбий кеманинг ўт ўчириш тизими эскирган бўлганини ёзишди.

    Қандай бўлмасин, бир вақтлар Россия қудрати ва амбициясининг рамзи деб кўрилган “Москва” энди денгиз тубида ётибди. Кемани Украина чўктиргани борасида гапирилмаса-да, телевизон ток шоуда қатнашган россиялик режиссёр ва собиқ депутат Владимир Бортко “Москва” кемасининг қисмати урушга асос эканини айтди.