Россия Хитойнинг энг йирик нефть таъминотчисига айланди

Жонли ёритиш

1. 28 апрел 2022Россия нафақат газ, балки бутун савдони қурол деб билади – Украина президенти

   Ўзининг анъанавий тунги нутқида Украина президенти Володимир Зеленский Россия Европани шантаж қилишда газдан фойдаланаётганини айтди.

   Унинг айтишича, чоршанба куни Россиянинг Полша ва Болгарияга газ таъминотини узиб қўйиши “Европада ҳеч ким Россия билан нормал иқтисодий ҳамкорлик”ни олиб бора олмаслигини намоён қилди.

   “Россия нафақат газ, балки ҳар қандай савдони қурол деб ҳисоблайди. У савдонинг у ё бу турини ишлатиш учун қулай вақтни кутиб турибди”, деди у.

   Зеленскийнинг айтишича, Россия “Европани битта нишон деб кўради”, ва бу қитъада ҳамма Россия билан савдога таяниб бўлмаслигини қанча тез тушуниб етса, барқарорлик шунча тез юз беради.

   Унинг қўшимча қилишича, Россия жаҳон бозори, айниқса озиқ-овқат бозорида тартибсизликни келтириб чиқаришни истайди. Украина президенти Европа Иттифоқининг Украина экспортларига қўйилган квота ва бож тўловларини тўхтатиб туриш қарори учун миннатдорчилик билдирди.

2. 27 апрел 2022Польша бошқа мамлакатлардан газ олишни бошлади

   Польшадаги газ оператори Gaz-System хабар қилишича, ҳозирги пайтда мамлакатнинг табиий газга бўлган барча эҳтиёжини тўла қондирадиган ҳажмда газ қабул қилмоқда.

   "Газ ўтказиш тармоғи бошқа йўналишлардан мунтазам таъминланмоқда", деган баёнот тарқатди Gaz-System.

   Reuters ахборот агентлигининг Польша компаниясига таяниб хабар қилишича, газни Германия ва Чехия Республикасидан олаяпти.

   Россиянинг Польша ва Болгарияга газ таъминотини тўхтатганини қатор Ғарб сиёсатчилари қоралаб чиқдилар.

   Европа Иттифоқи Комиссияси Президенти Урсула вон дер Лейен ушбу қадамни "шантаж" деб атади.

   Россиянинг Украинага босқини учун жорий этилган санкциялардан кейин Россия "нодўстона мамлакатлар"дан Россия рублида газ учун тўлашни талаб қилди.

   Урсула вон дер Лейен, ўзаро шартномада қайси валюта кўзда тутилган бўлса, ўшанда тўланади, рублда тўлаш амалда санкцияни четлаб ўтишни англатади, деди.

   Австрия ўз тўловини еврода амалга оширишини айтди.

   Венгрия Россия рублида тўлашга розилигини билдирди.

   Би-би-си мухбири Жонни Ҳилл ёзишича, Путиннинг газ таъминотини узишдан кўзлаган мақсади - Европа мамлакатлари ўртасида бўлинишни келтириб чиқариш, деб ёзди.

3. 27 апрел 2022Украина уруши: Донбассдаги уруш жабҳасида

   Украина шарқидаги Донбасс 2014 йили Россия дастаклаган бўлгинчилар билан урушдан кейин иккига бўлиниб қолган, Украина ҳарбийлари ўз назорати остидаги ҳудудларни окоплар қазиб ҳимоя қилишга ўтганди.

   Охирги кунларда Россия қўшинлари Донецк ва Луганскнинг бошқа ҳудудларини ҳам босиб олиш мақсадида ҳужумлар бошлаган.

   Саккиз йил давомида яккам-дуккам жанглар кузатилган жойлар бугун тўлақонли уруш майдонига айланган.

   "Ҳозир озроқ мураккаб бўлиб қолди. Ҳозир бизни ҳар куни, ҳар соат, ҳар доим бомба ҳужумларига, ракета ҳужумларига тутишаяпти", дейди лейтенант Денис Гордеев.

   Бу ҳақда батафсил

4. 27 апрел 2022Видео. Украина: Россия ўч олишга ўтдими – газини кесди, Сўнгги тафсилотлар

   Польша ва Болгария буткул газсиз қолди.

   Россия ҳақни рублда тўлаш шарти билан Украинани дастаклаган бу икки давлатга газини буткул кесди.

   Россия яна ғарблик маслаҳатчилар бўлса, бўлмайдими, Украинадаги исталган жойни нишонга олиш, зарба беришга ҳақли эканини баён қилди.

   Россия янада кескин кетмоқда. Буёғи нима бўлади?

5. 27 апрел 2022Приднестровьеда "нотинчлик"ми?

   Молдованинг россияпараст Приднестровьеси расмийлари охирги кунларда ҳужумлар ҳақида хабар тарқатмоқдалар, Молдова ва Украина раҳбарияти эса Россия хавфсизлик кучларининг провокациялари ҳақида гапирмоқдалар.

   27 апрель тонгида Колбасна қишлоғи Украина тарафидан ҳужумга тутилгани ва дронлар кузатилгани ҳақида хабар қилинди.

   25 апрелдан буён Приднестровьеда қатор портлашлар рўй берди, ҳарбий қисм ўққа тутилди.

   Бу ҳодисалар учун ҳеч ким масъулиятни ўз зиммасига олгани йўқ.

   Молдова Президенти Майя Санду хавфсизлик кенгашининг мажлисини чақирди, Днестр бўйидаги ҳодисаларни у ердаги россияпараст кучларнинг ўзлари уюштираяптилар, шу йўл билан Россия-Украина урушига Молдовани ҳам тортмоқчилар, деб айтди.

   Украина Президенти Володимир Зеленский Приднестровьедаги ҳодисаларни Россия махсус хизматлари уюштираяпти, деб айтди.

   Ўзини Молдовадан мустақил деб эълон қилган Приднестровьеда зўравонликлар ҳақидаги хабарлар Россия генерали Рустам Миннекаевнинг 22 апрелдаги баёноти ортидан кўпайгани кузатилмоқда.

   Генерал Миннекаев, Россиянинг Украинадаги махсус ҳарбий операцияси иккинчи фазасининг мақсади - нафақат Донбасс устидан тўла назоратни қўлга киритиш, балки бутун Украина жанубини босиб олиш, деб айтдию

   "Бу русийзабон аҳоли таҳқирланаётган яна бир ҳудуд Приднестровьега чиқиш йўли", деб айтди рус генерали.

   На Кремль, на Россия Мудофаа вазирлиги генерал Миннекаев баёноти юзасидан изоҳ бергани йўқ.

6. 27 апрел 2022Украина учун иккинчи фронт - Россия уруш жиноятлари қилганми?

   Украина нафақат жанг майдонида, балки ҳуқуқий майдонда ҳам Россия тажовузига қарши курашмоқда.

   Бу вайрон бўлган мамлакатда ўқ овози тингандан кейингина эришиш мумкин бўлган мақсад - адолат қарор топиши учун гувоҳлик ва далиллар тўпланмоқда.

   Бу ишга Украина Бош Прокурори Ирина Венедиктова етакчилик қилмоқда.

   Бу ҳафта у Буча шаҳридаги олтин гумбазли черков остидаги яна бир оммавий қабрни очиш ишларини назорат қилди, у ерда энг оғир жиноятлар яширин эди - бу сафар 10 нафар қурбон, баъзилари бутунлай ёниб кетган. Уларнинг қолдиқлари жасад қопларига солинган ва шахсини аниқлаш учун олиб чиқилган.

   Чуқурнинг четида туриб уруш жиноятлари бўйича 6000 дан ортиқ иш очилганини айтди Бош Прокурор Ирина Венедиктова.

   Тўлиқ мақола билан танишинг

7. 27 апрел 202227 апрелнинг энг сўнгги муҳим ўзгаришлари, Можаронинг 63-куни

   Россиянинг давлат назоратидаги "Газпром" компанияси фойдаланган гази учун ҳақни Россия рублида тўлашдан бош тортганлари учун Болгария ва Польшага газ узатишни тўхтатган.

   Украина Россиянинг ушбу амалини Украинага иттифоқчи бўлганлари учун қилинаётган «газ шантажи» деб атади.

   Польша ушбу вазиятдан чиқиб кета оламиз демоқда, бошқа манбалардан газ топиш йўлларини қидираётганини айтди.

   Германиянинг Рамштейн шаҳрида НАТО ва Европа Иттифоқига аъзо давлатлар мудофаа вазирларининг учрашувидан кейин Германия Украинага 50та GepardFlakpanzer аксил-учоқ танкларини юборишини эълон қилди.

   АҚШ, бошқа иттифоқчи мамлакатлар ҳам Украинага кўпроқ қурол-яроғ ваъда қилдилар.

   Россиянинг Украина чегарасидан 40 километр узоқликдаги Белгород шаҳри расмийлари хабар тарқатишича, бир неча портлашлар рўй берган.

   Россия ҳарбийлари Украинанинг бутун Херсон вилояти ҳудудини ўз назоратига олганини даъво қилмоқда

   Украина Молдованинг россияпараст Приднестровье ҳудудида Россия махсус хизматлари провокациялар уюштириб, можарога Молдова бошини ҳам қўшишни режалаётганликда айблаб чиқди.

8. 27 апрел 2022БМТ Бош котиби Гутерриш ва Россия Президенти Путиннинг учрашуви

   28 апрель куни БМТ Бош котиби Антониу Гутерриш Россия Президенти Владимир Путин билан Украина масаласини муҳокама қилди.

   Президент Путин ва БМТ Бош котиби Гутерришнинг суҳбати ҳозирга келиб машҳурлашган Путиннинг узун оқ столи атрофида бўлиб ўтган.

   БМТ бош котиби Россиянинг Украинага босқиниБирлашган Миллатлар ташкилотининг низомига зид эканини айтди.

   Жаноб Гутерриш Украинадаги жанглар кечаётган ҳудудлар, шу жумладан, Мариуполдаги "Азовсталь" заводи остида қолаётган инсонлар учун инсонпарварлик йўлакларини ташкил этиш учун қўшма гуруҳ ташкил этиш таклифини илгари сурган.

   Россия Президенти Путин эса “ҳамма йўлаклар очиқ”, “Мариуполдаги "Азовсталь" заводида жанглар бормаяпти”, деб айтди.

   Бир неча кун олдин Россия Мудофаа вазири Сергей Шойгу билан учрашувда Президент Путин "Азовсталь"га ҳужумни тўхтатиш, пўлат корхонаси ҳудудини қамалга олишга буйруқ берган эди.

   Лекин Украина расмийларига кўра, "Азовсталь" бомбардимонлари ҳали ҳам тўхтагани йўқ.

   Президент Путин сўзларига кўра, Украина билан сулҳ музокаралари онлайн кўринишда давом этаяпти, можарони дипломатия йўли билан ҳал этиш ресурслари ҳали тугагани йўқ.

   БМТ бош котиби ва Россия президенти музокараларидан сўнг Антониу Гутерриш матбуот котиби Стефан Дюжаррик баёнот тарқатди.

   Ушбу баёнотда айтилишича, Мариуполдаги "Азовсталь" заводи ҳудудида қолган тинч фуқароларни олиб чиқишда БМТ ва халқаро Қизил Хоч қўмитаси иштирок этишига Путин розилик берган.

   28 апрель куни БМТ Бош котиби Антониу Гуттериш Киевда Украина Президенти Володимир Зеленский билан учрашишни режалаган.

9. 26 апрел 2022Германия сиёсатини ўзгартирди - у Украинага 50та танк юборади, Можаронинг 62-куни

   НАТО ва Европа Иттифоқи аъзо давлатларининг мудофаа вазирлари Украинага кўпроқ ҳарбий ёрдам беришни муҳокама қилиш учун Германиянинг Рамштейн шаҳрида учрашдилар.

   Германия ҳукумати, аввал белгилаган сиёсатидан кескин фарқли тарзда, Украинага 50та Gepard Flakpanzer аксил-учоқ танкларини юборишини эълон қилди.

   Охирги 10 йил ичида омборда сақланган танклар Украинага юборилишидан олдин техник сайқалланади.

   Германиянинг узоқ вақтдан бери амалдаги сиёсатига кўра, можаро ҳудудларига оғир қуроллар юборилмайди, аммо расмий Берлин охирги вақтда Киевга етарлича ҳарбий ёрдам бермагани учун кўп босим остида қолганди.

   Ҳукумат қарорини эълон қилар экан, Германия Мудофаа вазири Кристин Ламбрехт Германия Украинани “озодлик ва тинчлик йўлидаги муҳим жангида қўллаб-қувватлаш учун барча чоралар”ни кўришини айтди.

10. 26 апрел 2022БМТ бош котиби Лавровга: Урушни тўхтатишимиз шарт, Можаронинг 62-куни

    Россия Ташқи ишлар вазири Сергей Лавров билан музокаралари бошида гапира туриб, БМТ бош котиби Антонио Гутерриш Украинадаги урушни тўхтатиш учун барча чоралар кўрилиши кераклигини урғулади.

    Бугун Президент Владимир Путин билан ҳам учрашиши кутилаётган жаноб Гутерриш мулоқот, оташкесим ва ниҳоят, тинчлик учун шароитларни яратишга ёрдам қилишни истаётганини айтди.

    “Зудлик билан отишма тўхтатилиши керак”, деди у.

    Унинг айтишича, энг устивор масала Украинадаги инсонлар кўраётган жабрни камайтиришдир.

    Музокаралар ҳозирда ёпиш эшиклар ортида олиб борилмоқда.

11. 26 апрел 2022Россия тунда 500 нафар Украина аскарларини ўлдирганини даъво қилмоқда, Можаронинг 62-куни

    Россия мудофаа вазирлиги душанбадан сешанбага ўтар кечаси Украинадаги 87 еттита ҳарбий нишонга ҳаводан ҳужум қилиб, 500 украин аскарларини ўлдирганини даъво этяпти.

    Нишонга олинган объектлар орасида Харкивдаги қурол омбори ҳам борлиги ишонилади.

    Вазирлик ўз сайтида чоп қилган видеода нишонга олингани иддао қилинган Украина қуролли кучларининг омбори ва таъмирлаш базаси кўрсатилган.

    Видеода ҳарбий танклар ва бошқа машиналарни кўриш мумкин.

    Би-би-си бу даъволарни мустақил манбалардан тасдиқлай олмади.

12. 26 апрел 2022НАТО ва Европа Иттифоқи мудофаа вазирлари Украинага дастакни муҳокама қилмоқда, Можаронинг 62-куни

    НАТО ва Европа Иттифоқи аъзо давлатларининг мудофаа вазирлари Украинага кўпроқ ҳарбий ёрдам беришни муҳокама қилиш учун Германияда учрашишмоқда.

    Учрашув Рамштейндаги АҚШ ҳаво базасида бўлиб ўтяпти.

    Учрашувга раислик қилаётган АҚШ мудофаа вазири Лойд Остин душанба куни Вашингтон Россияни бошқа бу каби босқинчиликни қила олмайдиган даражада ожизлашишини кўришни истаётганини айтган.

    Йиғилишдан аввал тарқалган хабарларга кўра, Германия Украинага аксил-учоқ тизимларини етказиб беришни ваъда қилган. Suddeutsche Zeitung газетаси хабар қилишича, Германия мудофаа вазири бугунги учрашувда шу таклиф билан чиқиши кутилади.

    Бир неча ойдирки Украина президенти Володимир Зеленский Ғарбдаги иттифоқчиларидан кўпроқ қурол ва ҳарбий техникаларни сўрамоқда. Унинг айтишича, кўпроқ қурол билан Украина армияси уруш йўналишини ўзгартира олади.

    НАТО аъзолари мудофаа техникаси билан ёрдам беришни ваъда қилишган, аммо Ғарб давлатлари Россияга қарши урушга янада чуқурроқ жалб этилишни истамайдилар.

13. 26 апрел 2022Украинада душанбадан сешанбага ўтар кечаси нималар бўлди? Бу маълумотларни Украина президенти идораси йиғади ва ҳар тонгда чоп этади., Можаронинг 62-куни

    Украинада душанбадан сешанбага ўтар кечаси нималар бўлди? Бу маълумотларни Украина президенти идораси йиғади ва ҳар тонгда чоп этади.

    ·Запорожье вилоятидаги ҳужумнинг аниқ тафсилотлари ҳануз йўқ. Хабар қилинишича, ракеталар Запорожье атом станцияси устидан учиб ўтган ва унга шикаст етказмаган.

    ·Харкивда отишмаларнинг кўлами камайган. Изюм туманида жанглар давом этяпти.

    ·Луханск вилояти тунда 17 марта ўққа тутилган, бир нечта турар жойлар вайрон бўлган.

    ·Донецк вилоятида уч киши жароҳат олгани ҳақида маълумотлар олинган. Украина қўшинлари Мариуполдаги «Азовсталь» корхонасида қамалда қолишмоқда.

    ·Бир неча кунки жанглар давом этаётган Херсон вилоятидаги вазият «гуманитар фожиа» дея тасвирланмоқда.

    Уруш шароитларида Би-би-си расмий маълумотларни тезкор равишда ҳар доим ҳам иккинчи манбадан тасдиқлай олмайди.

14. 25 апрел 2022Видео. Россия-Украина урушининг Ўзбекистон иқтисодига 3 таъсири - иқтисодчи фикри, Таҳлил

    Жаҳон Банки бир ҳафтанинг ўзида устма-уст хавотирли баёнот билан чиқди.

    Банк дунёни Украина урушининг кескин иқтисодий оқибатларидан огоҳлантирди.

    Уруш Шарқий Европа ва Марказий Осиёнинг айрим қисмларига глобал коронавирус пандемиясидан кўпроқ зиён етказишини айтди.

    Ўзбекистоннинг хавотирланиши учун қанчалик асос бор?

15. 25 апрел 2022Фоторепортаж: Россия нишонини ўзгартирмоқда, Можаронинг 61-куни

    Уруш ўзининг учинчи ойига кириб бораркан, Россия нишонини ўзгартирмоқда.

    Энди ўзининг эътиборини Украинанинг темир йўллари ва темир йўл станцияларига қаратмоқда.

    Украиналик мулозимларга кўра, бугун, душанба куни Россия мамлакат маркази ва ғарбидаги бешта темир йўл станциясига ҳужум қилган.

    Темир йўллар Украина учун четдан таъминот олиш ва ўз аҳолисини четга эвакуация қилиш учун ниҳоятда муҳим аҳамият касб этади.

    Суратлар ғарбий Львовдаги Россия ҳужумига учраган темир йўл яқинида олинган:

16. 25 апрел 2022Россия: Путин янги баёнот билан чиқди

    Владимир Путиннинг айтишича, Украинадан бир миллионга яқин одам Россияга ўтган.

    Россия президент ҳисоб-китобида ўзини ўзи Украинадан мустақил республика, деб эълон қилган Донецк ва луганскликларни ҳам назарда тутган.

    Путиннинг айтишича, қочқинларнинг юз мингга яқини болалардир.

    Бу БМТ Қочқинлар ишлари бўйича агентлигининг рақамларидан қарийб икки баробар кўп.

    Ташкилотнинг расмий веб сайтида айтилишича, 24 февраль-24 апрель оралиғида Украинани 5.2 миллионга яқин одам ташлаб чиққан.

    Улардан 605.8 мингга яқини Россияга ўтган.

    БМТ идорасининг аниқлик киритишича, 18-23 февраль кунлари оралиғида Донецк ва Луганскдан яна 105 минг украиналик Россияга кирган.

    18 февраль куни бу икки минтақа етакчилари «Украинадан ҳужум хавфи» туфайли аҳолининг Россияга оммавий эвакуация қилинишини эълон қилишганди.

    Украина аҳолисининг умумий сони 43 миллиондан сал ортиши айтилади.

17. 25 апрел 2022Видео. Путин Украинани нега иккинчи Сурияга айлантирмоқда?

    Путин Украинани Сурияга айлантирмоқда.

    Россия нега Украина шаҳарларини ҳам худди Сурия ва Чеченистон каби вайрон этмоқда?

    Россия уруш усуллари қандай?

18. 25 апрел 2022Зеленский: "Мислсиз" қўлловингиз учун раҳмат

    Володимир Зеленский Украинага кўрсатаётган “мислсиз” қўллови учун Америка Қўшма Штатларига раҳмат айтди.

    Бу ҳақда Украина президентининг расмий веб сайти ёзди.

    Хабарда айтилишича, миннатдорчилик сўзлари президентнинг АҚШ Давлат котиби ва Мудофаа вазири билан якшанба куни пойтахт Киевда кечган мулоқоти чоғида янграган.

    Володимир Зеленский “АҚШ Украинага бераётган “мислсиз” ёрдамни қадрлашлари”ни таъкидлаган.

    “Украинани қўллаб-қувватлашдаги етакчилиги ва аниқ шахсий мавқеи учун президент Байденга бутун Украина халқи номидан шахсан миннатдорчилик билдириш истагида” эканлигини баён қилган.

    Бутун Америка халқи, яна бир ёқадан бош чиқариб қўллаётгани учун АҚШ Конгрессига ҳам ўз ташаккурларини изҳор этган.

    “Буни кўраётганликлари, ҳис этаётганликлари”ни билдирган.

    Расмий хабарга кўра, томонлар бундан ташқари қўшимча ҳарбий, молиявий қўллов, хавфсизлик кафолатлари ва Россияга қарши санкцияларни янада кучайтириш масаласида ҳам гаплашиб олишган.

    АҚШ Давлат котиби Энтони Блинкен ва Мудофаа вазири Ллойд Остин Владимир Зеленский билан музокарадан сўнг Россиянинг ҳарбий салоҳиятини камайтириш мақсадида эканликларини баён қилишган.

    Пентагон раҳбари эса, матбуот анжумани чоғида лозим дастак билан Украина Россияга бас келиши, урушда енгиб чиқиши мумкинлигини айтган.

19. 25 апрел 2022Россия сулҳга рози бўлди

    Россия Мудофаа вазирлиги янги баёнот билан чиқди.

    Азовсталь пўлат қуйиш корхонасида қамалиб қолганларнинг эвакуациясига рухсат беришини айтди.

    Жанубий Мариуполь шаҳарчасида жойлашган корхона Украинадаги энг йириги бўлади.

    Мариуполнинг ҳалича Россия назорати остига ўтмаган ягона ҳудуди саналади.

    Шаҳарчанинг ўзи эса, Россиянинг қамали ва тўхтовсиз ҳужуми остида.

    Вазирликка кўра, Россия бўлинмалари у ердагиларнинг чиқиб кетиши учун британ вақти билан соат 12:00 дан бошлаб хавфсиз жойга ўтиб туришади.

    Корхонада, ҳафталарки, украиналик ҳарбийлар баробарида оддий одамлар ҳам қамалиб қолишган, ўша ерда жон сақлаб туришибди.

    Аммо бунгача Россиянинг бу ерда муваққат сулҳга оид берган ваъдалари қуруқ ваъдалигича қолган.

20. 25 апрел 2022Украина боис Россия энди Ўзбекистон шарбатини ичадими?

    Ғарб санкциялари остида қолган Россия энди Ўзбекистонга янада яқинлашишга мажбур бўлмоқдами?

    Янги эҳтимол ва имкониятлар юзага чиқмоқда.

    Батафсил танишиш учун илова қилаётган линкимизни босинг.