سندھ کے وزیر برائے کچی آبادی غلام مرتضیٰ بلوچ کورونا وائرس کے باعث انتقال کر گئے

دنیا بھر میں کورونا وائرس سے متاثر ہونے والوں کی تعداد 62 لاکھ سے زائد ہے جبکہ ساڑھے تین لاکھ سے زیادہ افراد اس بیماری کے نتیجے میں ہلاک ہوئے ہیں۔ سندھ کے صوبائی وزیر کچی آبادی مرتضیٰ بلوچ کورونا وائرس میں مبتلا رہنے کے بعد انتقال کر گئے ہیں۔

لائیو کوریج

31 مئ 2020ایران میں متاثرین کی تعداد ڈیڑھ لاکھ سے تجاوز کر گئی
،تصویر کا ذریعہAFP
ایران میں حکام نے گذشتہ 24 گھنٹوں کے دوران 2516 نئے متاثرین کی اطلاع دی ہے جس کے بعد یہاں متاثرین کی مجموعی تعداد ایک لاکھ 51 ہزار 466 ہوگئی ہے۔
گذشتہ 24 گھنٹوں میں کورونا وائرس کے 63 متاثرین ہلاک ہوئے ہیں جس کی وجہ سے اموات کی کُل تعداد سات ہزار 797 ہوگئی ہے۔
سرکاری نیوز چینل پر نشر کی گئی ایک نیوز کانفرنس میں وزارتِ صحت کے ترجمان کیانوش جہانپور نے کہا کہ صحتیاب ہونے والوں کی تعداد ایک لاکھ 18 ہزار 848 ہے مگر ابھی بھی ملک بھر میں 2527 افراد تشویشناک حالت میں ہیں۔
گذشتہ ہفتے ایران نے شیعہ مسلمانوں کے لیے مقدس مزارات کو سماجی دوری کے ضوابط کے ساتھ کھولنے کی اجازت دے دی تھی۔
31 مئ 2020انگلینڈ: خطرے کی زد میں موجود لوگ گھر سے باہر جا سکیں گے
،تصویر کا ذریعہGetty Images
انگلینڈ کی حکومت نے ان لوگوں کو پیر کے روز سے گھر سے باہر نکلنے کی اجازت دے دی ہے جو کورونا کے خطرے کی زد میں ہونے کی وجہ سے اپنے گھروں تک محدود ہیں۔
خاندان رکھنے والے افراد کو دن میں ایک مرتبہ اپنے گھر کے افراد کے ساتھ باہر جانے کی اجازت ہوگی جبکہ اکیلے رہنے والے لوگ کسی ایک اور فرد کے ساتھ سماجی دوری کے ضوابط کا خیال رکھتے ہوئے مل سکیں گے۔
حکومت کی جانب سے آج اس بارے میں باضابطہ اعلان متوقع ہے۔
ویلز کی حکومت نے بھی اعلان کیا ہے کہ ایسے لوگ اگر سماجی دوری کے ضوابط کی پاسداری کریں تو وہ دوسرے لوگوں سے مل سکتے ہیں اور باہر لامحدود ورزش کر سکتے ہیں۔
دس ہفتوں سے اس ‘شیلڈڈ’ یعنی محفوظ رکھے گئے لوگوں کے زمرے میں شامل افراد سے گھروں پر رہنے کے لیے اور کسی بھی وجہ سے باہر نہ نککلنے کے لیے کہا گیا ہے۔
انھیں کسی شخص سے دوبدو رابطے سے بھی منع کیا گیا ہے۔
حکومت کا کہنا ہے کہ خطرے کی زد میں موجود لوگوں کو ہنگامی امداد مثلاً اشیائے ضروریہ کی فراہمی وغیرہ جاری رہے گی۔
31 مئ 2020افغانستان کی وزارتِ صحت نے ممکنہ ہنگامی صورتحال سے خبردار کر دیا
،تصویر کا ذریعہReuters
افغانستان کی وزارتِ عوامی صحت نے ملک میں کورونا وائرس متاثرین کی تعداد 15 ہزار سے تجاوز کرنے پر ممکنہ ہنگامی صورتحال سے خبردار کیا ہے۔
وزارتِ کے مطابق گذشتہ 24 گھنٹوں میں کیے گئے کووِڈ 19 کے نصف سے زائد ٹیسٹ مثبت آئے ہیں۔
ان میں سے بھی نصف دارالحکومت کابل میں ہیں جو ملک کا سب سے زیادہ متاثر علاقہ ہے۔
نائب وزیرِ صحت واحد مجروح نے سخت لاک ڈاؤن واپس نافذ کرنے کا مطالبہ کیا ہے۔
افغانستان نے سخت لاک ڈاؤن نافذ کیا تھا تاہم ایک ہفتہ قبل عید کے موقع پر ان ضوابط میں نرمی کر دی گئی تھی۔
نائب وزیر کا کہنا ہے کہ وائرس اس لیے تیزی سے پھیل رہا ہے کیونکہ لوگ سماجی دوری کے قوانین کی کھلے عام خلاف ورزی کر رہے ہیں۔
31 مئ 2020کیا پاکستان میں وبا پر قابو پانے کے لیے اجتماعی مدافعت کی تکنیک کارگر ثابت ہو سکتی ہے؟
ہرڈ امیونٹی (اجتماعی مدافعت) سے مراد آبادی کے ایک بڑے حصے کو متعدی بیماری کی ویکسین یا اسی بیماری میں مبتلا کر کے ان کے جسم میں اس بیماری کے خلاف قوت مدافعت پیدا کرنا ہے تاکہ وبا کے پهیلاؤ کا سلسلہ روکا جا سکے۔
پاکستان میں گذشتہ چند دنوں سے اجتماعی مدافعت کا ذکر سننے کو مل رہا ہے اور اس کا تعلق لاک ڈاؤن میں مرحلہ وار خاتمے کے فیصلے سے بهی جوڑا جا رہا ہے۔
کیا یہ طریقہ کارگر ثابت ہو سکتا ہے؟ مزید پڑھنے کے لیے یہاں کلک کریں۔
،تصویر کا ذریعہGetty Images
31 مئ 2020جرمنی سے چین جانے والے مسافروں میں سے ایک میں کورونا کی تشخیص
،تصویر کا ذریعہAFP
ہم نے کل رپورٹ کیا تھا کہ دو چارٹر طیارے 400 جرمن شہریوں اور ان کے خاندانوں کو چین لے کر جائیں گے۔ پہلی پرواز نے جمعے کو فرینکفرٹ سے اپنے سفر کا آغاز کیا اور کل تیانجن میں لینڈ کیا۔
اب تیانجن کے حکام کا کہنا ہے کہ پرواز پر موجود ایک شخص کا کورونا ٹیسٹ مثبت آیا ہے۔
34 سالہ انجینیئر کا درجہ حرارت نارمل تھا اور ان میں کوئی علامات ظاہر نہیں ہو رہی تھی۔ اب انھیں مزید معائنے کے لیے ایک مقامی ہسپتال لے جایا گیا ہے۔
تمام مسافروں کے لیے لازم ہے کہ وہ خود کو دو ہفتوں کے لیے قرنطینے میں رکھیں اور کورونا ٹیسٹ کروائیں۔
دوسرا چارٹر طیارہ بدھ کو فرینکفرٹ سے شنگھائی کے لیے اڑان بھرے گا۔
31 مئ 2020ہانگ کانگ: 17 دن بعد مقامی طور پر وائرس کی منتقلی کا پہلا کیس رپورٹ
،تصویر کا ذریعہAFP
ہانگ کانگ میں 14 مئی (17 دن بعد) کے بعد مقامی طور پر وائرس کی منتقلی کا پہلا کیس سامنے آیا ہے۔
ساؤتھ چائنا مارننگ پوسٹ کے مطابق شا ٹن کے پرنس آف ویلز ہسپتال کے انتہائی نگہداشت یونٹ میں ایک 34 سالہ خاتون کو وینٹیلیٹر پر رکھا گیا ہے۔
اخبار کا کہنا ہے کہ حکام اس بات کا جائزہ لے رہے ہیں کہ آیا جس کھانے کے گودام میں وہ کام کرتی ہیں وہاں کسی درآمد شدہ مال سے وہ وائرس سے متاثر ہوئیں یا نہیں۔
مبینہ طور پر خاتون کے 56 سالہ شوہر کو سنیچر کے روز بخار ہوگیا تھا اور انھیں ہسپتال بھیج دیا گیا جہاں ان میں کووڈ 19 کی تصدیق ہوئی۔
ہانگ کانگ میں 14 مئی سے متعدد ایسے انفیکشن رپورٹ ہوئے ہیں جن کا تعلق بیرونِ ملک سے آنے والوں سے ہے۔
ان میں زیادہ تر باشندے پاکستان سے ہانگ کانگ پہنچے ہیں۔ لیکن اس جوڑے نے حال ہی میں کہیں کا سفر نہیں کیا۔
جان ہاپکنز یونیورسٹی کے مطابق ہانگ کانگ میں اب تک مجموعی طور پر 1082 متاثرین اور چار اموات کی تصدیق کی گئی ہے۔
31 مئ 2020بریکنگ, سندھ: کورونا وائرس کے 885 نئے مریض، مزید 16 اموات
،تصویر کا ذریعہGetty Images
پاکستان کے صوبہ سندھ میں مزید 885 افراد میں کورونا وائرس کی تصدیق ہوئی ہے جس کے بعد صوبے میں متاثرین کی کل تعداد 28245 ہو گئی ہے جبکہ 16 مزید اموات کی بھی تصدیق کی گئی ہے۔
وزیراعلیٰ سندھ سید مراد علی شاہ کے مطابق صوبے میں اموات کی مجموعی تعداد 481 ہوگئی ہے۔
ان کا کہنا تھا کہ اس وقت کوورنا وائرس کے 1073 مریض صوبے کے مختلف ہسپتالوں میں زیر علاج ہیں اور 334 مریضوں کی حالت تشویشناک ہے۔
سندھ میں مزید 553 مریض صحت یاب ہوئے ہیں جس کے بعد صحتیاب ہونے والے مریضوں کی کل تعداد 13810 ہو گئی ہے۔
وزیراعلیٰ سندھ کے مطابق صوبے میں کورونا وائرس سے صحتیابی کی شرح 49 فیصد ہے۔
سندھ میں اس وقت 13954 مریض زیر علاج ہیں جن میں سے 12773 مریض گھروں میں آئسولیشن میں ہیں جبکہ 108 مریض آئسولیشن سینٹرز میں ہیں۔
وزیراعلیٰ سندھ کے مطابق صوبے کے 885 متاثرین میں 617 کراچی سے سامنے آئے ہیں۔
31 مئ 2020کیا آپ صحت یابی کے بعد دوبارہ کووڈ-19 کا شکار ہو سکتے ہیں؟
،تصویر کا ذریعہGetty Images
کیا آپ کو صحت یاب ہونے کے بعد دوبارہ بھی کورونا وائرس نشانہ بنا سکتا ہے؟ کچھ مریض دوسروں کے مقابلے میں زیادہ بیمار کیوں ہیں؟ کیا یہ مرض ہر سردی میں واپس آئے گا؟ کیا ویکسین کارگر ثابت ہو گی؟ کیا امیونٹی پاسپورٹ کی مدد سے ہم میں سے کچھ لوگ کام پر واپس جا سکتے ہیں؟ اس وائرس سے نمٹنے کے لیے کن طویل المدتی اقدامات کی ضرورت ہے؟
دنیا میں کووڈ-19 کا شکار ہونے والے افراد کی تعداد جہاں روز بروز بڑھ رہی ہے وہیں یہ سوالات بھی تواتر سے پوچھے جانے لگے ہیں۔
ان تمام سوالات میں جو ایک چیز مشترک ہے وہ ہے امیون سسٹم یا مدافعتی نظام اور ہم اس بارے میں بہت کم جانتے ہیں۔
آپ کورونا وائرس کے خلاف جسم میں مدافعت کیسے پیدا کر سکتے ہیں؟
31 مئ 2020بریکنگ, روانڈا میں کورونا وائرس سے پہلی ہلاکت
،تصویر کا ذریعہReuters
،تصویر کا کیپشنکیاگلی، روانڈا میں پولیس لاک ڈاؤن کے نفاذ کے لیے ایک رہائشی محلے میں میگا فون سے لیس ڈرون اڑانے کی تیاری کر رہی ہے۔ (فائل فوٹو)
روانڈا میں کورونا وائرس سے متاثرہ ایک 65 سالہ ڈرائیور ہلاک ہو گئے ہیں۔ یہ ملک میں وائرس سے ہونے والی پہلی سرکاری ہلاکت ہے۔
روانڈا کی وزارت صحت نے ایک بیان میں کہا ہے کہ متاثرہ ڈرائیور شدید بیمار ہونے کے بعد ہمسایہ ملک سے روانڈا واپس آئے تھے۔
بیان میں مزید کہا گیا ہے کہ کورونا مریضوں کے لیے بنائی گئی خصوصی سہولت میں ان کا علاج جاری تھا جہاں سانس لینے میں دشواری کے باعث وہ فوت ہوگئے۔
مشرقی افریقہ کے اس ملک میں کورونا وائرس کے 359 تصدیق شدہ مریض موجود ہیں۔
31 مئ 2020لاہور کا فیشن فوٹو گرافر جو لاک ڈاؤن کے دنوں میں بالکونی سے تصاویر لے رہا ہے
،ویڈیو کیپشنلاک ڈاؤن کے دنوں میں بالکونی پر فوٹوگرافی
کورونا وائرس اور لاک ڈاون کی وجہ سے پوری دنیا میں جہاں لوگوں کی زندگیاں متاثر ہو رہی ہیں وہی بہت سارے لوگ ان حالات کا منفرد طریقے سے استعمال کرنا سیکھ رہے ہیں۔
عریش زبیر عام دنوں میں فیشن اور کارپوریٹ فوٹوگرافی کرتے ہیں مگر ان دنوں وہ 'دور سے پورٹریٹ' لے رہے ہیں جہاں وہ لوگوں سے دور سے ہی ملتے ہیں اور سڑک سے ہی ان کی تصویریں لیتے ہیں۔
دیکھیے ہمارے ساتھی موسیٰ یاوری کی اس ویڈیو میں کہ وہ یہ سب کس طرح کر رہے ہیں۔۔۔
31 مئ 2020سنگاپور: کورونا وائرس کے 518 نئے مریض، اکثریت تارکین وطن مزدور
،تصویر کا ذریعہGetty Images
سنگاپور کی وزارت صحت نے کورونا وائرس کے 518 نئے مریضوں کی تصدیق کی ہے جس کے بعد کل تعداد 34،884 ہوگئی ہے۔
گذشتہ ہفتے (یومیہ 548 مریضوں) کے مقابلے میں یہ تعداد معمولی سی کم ہے۔
وزارت کے مطابق ان نئے متاثرین کی اکثریت ہاسٹلوں میں رہنے والے تارکین وطن مزدور ہیں۔
گذشتہ مہینے وزیر افرادی قوت جوزفین تیو نے کہا تھا کہ صرف 43 بلاکس میں تقریباً دو لاکھ تارکین وطن مزدور رہ رہے ہیں۔ ہاسٹل کے ایک کمرے میں 10 سے 20 تک افراد رہتے ہیں۔
سنگاپور کچھ لاک ڈاؤن پابندیوں کو نرم کرنے کے لیے تیاری کر رہا ہے۔
اس ہفتے سے کچھ ملازمین اپنے دفتروں میں واپس جا سکیں گے اور والدین اور دادا دادی سے ملاقات کی اجازت ہو گی۔
لیکن بیرون ملک سے آنے والوں پر پابندی ابھی بھی برقرار ہے۔
31 مئ 2020ارجنٹائن میں لاک ڈاؤن کے خلاف سینکڑوں افراد کا احتجاج
،تصویر کا ذریعہReuters
ارجنٹائن میں سینکڑوں افراد نے ملک میں لگائے گئے سخت لاک ڈاؤن کے خلاف مظاہرے کیے ہیں۔
مظاہرین نے حکام سے مطالبہ کیا ہے کہ وہ ان پابندیوں کو ختم کریں جن کا نفاذ دو ماہ سے زیادہ عرصہ پہلے کیا گیا تھا۔
بیونس آئرس اور متعدد دیگر شہروں میں مظاہرین نے صدر البرٹو فرنانڈیز پر آمر کی طرح برتاؤ کا الزام عائد کیا اور کاروباری اداروں کو دوبارہ کھولنے کا مطالبہ کیا۔
چند مظاہرین نے کچھ ایسے پلے کارڈ بھی اٹھا رکھے تھے جن پر ویکسین اور فائیو جی نیٹ ورکس سے متعلق افواہیں اور سازشی نظریات درج تھے۔
ارجنٹائن میں کورونا وائرس سے تقریباً 500 افراد ہلاک ہو چکے ہیں جبکہ تصدیق شدہ متاثرین کی تعداد 16000 ہے۔
31 مئ 2020لاس اینجلس: احتجاج کے باعث کووڈ 19 ٹیسٹنگ مراکز بند کردیے گئے
،تصویر کا ذریعہGetty Images
امریکہ میں ایک نہتے سیاہ فام شخص کی پولیس افسر کے ہاتھوں ہلاکت کے بعد مختلف شہروں میں مظاہرے جاری ہیں۔
لاس اینجلس کے حکام نے شہر میں کووڈ 19 ٹیسٹ کے مراکز بند کردیے ہیں۔ لاس اینجلس کے میئر ایرک گارسٹی نے صحافیوں کو بتایا کہ یہ حفاظتی اقدام ہے۔ انھوں نے مزید کہا ’اب گھر جانے کا وقت آگیا ہے۔ گھر واپس آئیں، جب امن ہو اس وقت پُر امن طور پر احتجاج کریں۔‘
مظاہروں پر قابو پانے کی کوشش میں امریکہ کے کئی شہروں میں کرفیو نافذ کردیا گیا ہے اور منیسوٹا کے گورنر ٹم والز نے مظاہرین سے حفاظتی ماسک پہننے اور معاشرتی طور پر فاصلہ رکھنے کو کہا ہے۔
31 مئ 2020معیشت کے مزید شعبوں کو دوبارہ کھولنے کے لیے صوبوں سے سفارشات طلب
،تصویر کا ذریعہRadio Pakistan
نیشنل کمانڈ اینڈ آپریشن سینٹر نے کورونا وائرس کی وبا کے باعث بند کیے گئے معیشت کے مزید شعبوں کو دوبارہ کھولنے کے لیے صوبوں سے سفارشات طلب کی ہیں۔
منصوبہ بندی اور ترقی کے وزیر اسد عمر کی زیر صدارت اسلام آباد میں ایک اجلاس میں کورونا وائرس کی وبا کی روک تھام سے متعلق طویل اور قلیل مدتی حکمت عملی کا جائزہ لیا گیا۔
نیشنل کمانڈ اینڈ آپریشن سینٹر نے تجویز دی کہ تعلیمی ادارے اگست تک بند رکھے جائیں اور شادی ہالوں کو مہمانوں کی محدود تعداد ون ڈش اور مقررہ ضابطہ کار پر سختی سے عملدرآمد کی صورت میں دوبارہ کھولنے کی مشروط اجازت دی جائے۔
اجلاس میں کورونا وائرس کی وبا سے بچاؤ کے لیے معلوماتی اور آگاہی مہم کو مزید موثر بنانے کی ضرورت پر بھی زوردیا گیا۔
31 مئ 2020برطانیہ میں شادی سے متعلق اب نئے اصول کیا ہیں؟
،تصویر کا ذریعہGetty Images
اگر آپ کی شادی کی تقریب نہیں ہو سکتی یا آپ کو لگتا ہے کہ وہ اس سے بہت مختلف ہو گی جیسا آپ نے سوچا تھا تو بہتر یہ ہے کہ آپ اسے منسوخ کرنے کے بجائے ملتوی کر دیں۔
تفصیلات ہماری ساتھی آلینور لاری کی اس تحریر میں پڑھیے۔
31 مئ 2020مسجدِ نبوی اور مسجد اقصیٰ نمازیوں کے لیے کھول دی گئیں
،تصویر کا ذریعہMASJID-E-NABVI
سعودی عرب میں اتوار سے عوام کے لیے مسجد نبوی کو دوبارہ کھول دیا گیا ہے۔
سعودی شہریوں نے کورونا وائرس سے بچاؤ کے حفاظتی اقدامات پر عملدرآمد کرتے ہوئے اتوار کی صبح مسجد نبوی میں نماز ادا کی۔
احتیاطی اقدامات کے تحت مسجد نبوی میں ایک وقت میں لوگوں کی تعداد کو مسجد کی گنجائش کے مقابلے میں چالیس فیصد تک محدود رکھا گیا ہے۔
سعودی عرب کے دیگر شہروں میں بھی تمام مساجد نماز کی ادائیگی کے لیے کھول دی گئی ہیں۔
دوسری جانب مقبوضہ بیت المقدس میں تقریباً دو ماہ بعد مسجد اقصیٰ بھی دوبارہ کھول دی گئی ہے۔
اے ایف پی کے مطابق فجر کی نماز کی ادائیگی کے لیے آنے والے نمازیوں کو احاطے میں داخل ہونے کی اجازت دی گئی۔
کوورنا وائرس کے پھیلاؤ کو محدود کرنے لیے مارچ میں مسجد اقصیٰ کو بند کر دیا گیا تھا۔
،تصویر کا ذریعہMASJID-E-NABVI
،تصویر کا کیپشنسعودی عرب کے دیگر شہروں میں بھی تمام مساجد نماز کی ادائیگی کے لیے کھول دی گئی ہیں
،تصویر کا ذریعہReuters
،تصویر کا کیپشنمسجد اقصیٰ بھی دوبارہ کھول دی گئی ہے
،تصویر کا ذریعہReuters
،تصویر کا ذریعہReuters
31 مئ 2020ماسک پہنتے ہوئے کن چیزوں کا خیال رکھنا چاہیے؟
جیسے جیسے لاک ڈاؤن میں نرمی ہو رہی ہے، دنیا بھر میں پہلے سے زیادہ لوگ اپنی حکومت کے مشوروں کے تحت ماسک پہن رہے ہیں۔
عالمی ادارہ صحت نے متنبہ کیا ہے کہ ماسک صرف اس صورت میں موثر ثابت ہوتے ہیں جب مناسب طریقے سے پہننے کے ساتھ بار بار ہاتھوں کی صفائی اور سماجی فاصلے کا خیال رکھا جائے۔
ماسک پہنتے ہوئے کن چیزوں کا خیال رکھنا چاہیئے؟ یہ جاننے کے لیے دیکھیں یہ ویڈیو
31 مئ 2020اسلام آباد: ماسک نہ پہننے کی صورت میں تین ہزار تک جرمانہ، جیل بھی بھیجا جا سکتا ہے
،تصویر کا ذریعہGetty Images
وفاقی دارالحکومت اسلام آباد میں تمام عوامی جگہوں پر ماسک پہننا یا منہ ڈھانپنا اب لازم قرار دیدیا گیا ہے۔
اسلام آباد کے ڈپٹی کمشنر حمزہ شفقات کے مطابق مارکیٹوں، عوامی مقامات، مساجد، پبلک ٹرانسپورٹ، لاری اڈوں، گلیوں، سڑکوں، دفاتر میں چیکنگ ہو گی اور خلاف ورزی کی صورت میں تین ہزار تک جرمانے اور دفعہ 188 تعزیرات پاکستان کے تحت جیل بھی بھیجا جا سکتا ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
31 مئ 2020گلگت بلتستان: کورونا وائرس سے متاثرہ افراد کی تعداد 678 ہوگئی
،تصویر کا ذریعہGetty Images
گلگت بلتستان میں گذشتہ 24 گھنٹوں کے دوران کورونا وائرس سے متاثرہ مزید 18مریضوں اور دو اموات کی تصدیق کی گئی ہے۔
پاکستان میں کورونا وائرس سے متعلق حکومتی اعداد و شمار کی ویب سائٹ کووڈ 19 کے مطابق گلگت بلتستان میں متاثرین کی کل تعداد 678 ہوگئی ہے۔
گذشتہ روز ہونے والی دو اموات کے بعد کورونا سے ہونے والی اموات کی کل تعداد 11 ہوگئی ہے جبکہ صحتیاب ہونے والوں کی تعداد 490 ہے۔
،تصویر کا ذریعہcovid.gov.pk
31 مئ 2020بریکنگ, این ڈی ایم اے ملک میں 100 نئے وینٹیلیٹر تقسیم کرے گا
،تصویر کا ذریعہGetty Images
قدرتی آفات سے نمٹنے کے ادارے این ڈی ایم اے کے ترجمان کا کہنا ہے کہ ملک میں کورونا مریضوں کی بڑھتی تعداد کے پیشِ نظر صوبوں میں 100 وینٹیلیٹرز تقیسم کیے جا رہے ہیں۔
ترجمان کا کہنا ہے کہ اس کے علاوہ چاروں صوبوں کو دس دس بائی پیپ پورٹ ایبل وینٹیلیٹرز بھی دیے جا رہے ہیں۔
این ڈی ایم اے نے وینٹیلیٹرز کے استمعال کے لیے طبی عملے کی تربیت کا بھی بندوبست کیا ہے۔