انڈیا: وزیر اعظم مودی کی جانب سے 20 لاکھ کروڑ روپے کے معاشی پیکج کا اعلان

کورونا وائرس کی وجہ سے دنیا بھر میں اب تک 41 لاکھ سے زیادہ افراد متاثر اور دو لاکھ 86 ہزار سے زائد افراد ہلاک ہو چکے ہیں۔ انڈیا کے وزیر اعظم نریندر مودی نے 20 لاکھ کروڑ روپے کے معاشی پیکج کا اعلان کیا ہے۔

لائیو کوریج

11 مئ 2020جنوبی کوریا: متاثرین کی ایک ماہ میں سب سے بڑی تعداد سامنے آ گئی
،تصویر کا ذریعہEPA
جنوبی کوریا کے حکام نے بتایا ہے کہ پیر کو ملک میں کورونا وائرس متاثرین کی ایک ماہ کی سب سے بڑی تعداد سامنے آئی ہے۔
پیر کی صبح تک حکام نے 35 نئے متاثرین کی اطلاع دی تھی جس کے بعد یہاں متاثرین کی کُل تعداد 10 ہزار 909 ہوگئی تھی، لیکن پیر کی دوپہر تک کُل 86 متاثرین کا تعلق نائٹ کلبز سے پھیلنے والی وبا کی لہر سے پایا جا چکا تھا۔
جنوبی کوریا کو کورونا وائرس سے نمٹنے کے لیے عالمی ماڈل کے طور پر پیش کیا جاتا رہا ہے لیکن اچانک کورونا وائرس متاثرین کی نئی لہر سامنے آنے کے بعد دارالحکومت سیئول اور قریبی شہر انچیون میں تمام کلبز اور شراب خانوں کی بندش کے احکامات جاری کر دیے گئے ہیں۔
یاد رہے کہ جنوبی کوریا کے دارالحکومت سیئول کے ہم جنس پرست افراد میں مقبول علاقے ایتیوون کے چند کلبز سے منسلک 80 متاثرین سامنے آئے ہیں۔ یہ کلبز حال ہی میں وبا کی ایک نئی لہر کا مرکز بنے ہیں اور یہاں جانے والے افراد اب اپنی شناخت محفوظ رکھتے ہوئے کورونا وائرس کے ٹیسٹ کروا سکیں گے۔
گذشتہ ہفتے ان کلبز جانے والے 3000 افراد کا اب بھی حکام سے ٹیسٹ کے لیے رابطہ کرنا باقی ہے۔
جنوبی کوریا میں ہم جنس پرستوں کے خلاف تعصب عام ہے۔
دوسری جانب دنیا کے کئی طبی ماہرین نے خبردار کیا ہے کہ جلدبازی میں لاک ڈاؤن ختم کرنے کی وجہ سے مرض پھیلنے کی شرح میں اضافہ ہوسکتا ہے۔
11 مئ 2020بریکنگ, سپین: اموات کی یومیہ تعداد سات ہفتوں کی کم ترین سطح پر
،تصویر کا ذریعہGetty Images
سپین کی وزارتِ صحت کے مطابق ملک میں کورونا وائرس سے روزانہ کی بنیاد پر ہونے والی اموات کی تعداد کم ہو کر 123 ہو گئی ہے۔
یہ سات ہفتوں میں اموات کی سب سے کم تعداد ہے۔
خبر رساں ادارے روئٹرز کے مطابق پیر کو سپین میں مجموعی طور پر اموات کی تعداد 26 ہزار 621 سے بڑھ کر 26 ہزار 744 ہوگئی۔
اتوار کے روز تصدیق شدہ متاثرین کی تعداد دو لاکھ 24 ہزار 390 سے بڑھ کر دو لاکھ 27 ہزار 436 ہوگئی ہے۔
11 مئ 2020بلوچستان: سرکاری اہلکاروں کو اجلاسوں میں براہ راست شرکت سے گریز کی ہدایت
،تصویر کا ذریعہ@dpr_gob
بلوچستان میں کورونا سے سرکاری اہلکاروں کی بڑی تعداد کے متاثر ہونے کے بعد وزیر اعلیٰ بلوچستان نے سرکاری اہلکاروں کو ہدایت کی ہے کہ وہ براہ راست اجلاسوں سے زیادہ سے زیادہ گریز کریں۔
وزیر اعلیٰ کے سیکریٹریٹ سے جاری ہونے والے ایک ہدایت نامے میں سرکاری اہلکاروں سے کہا گیا ہے کہ کورونا وائرس کو پھیلاﺅ سے روکنے کے لیے ویڈیو یا آن لائن کانفرنسز کو ترجیح دی جائے۔
اس سلسلے میں تمام انتظامی سیکریٹریز اور کمشنروں کو تمام ضروری اقدامات کرنے کا کہا گیا ہے۔
11 مئ 2020میئر صادق خان کی اپیل: ’گھر پر رہیں اور پبلک ٹرانسپورٹ سے گریز کریں‘
برطانوی حکومت کی جانب سے لاک ڈاؤن اقدامات میں تبدیلی کے اعلان کے بعد لندن کے میئر صادق خان نے لوگوں سے گھر پر ہی رہنے اور پبلک ٹرانسپورٹ کا استعمال نہ کرنے کی اپیل کی ہے۔
انھوں نے بی بی سی بریک فاسٹ پروگرام کو بتایا کہ پچھلے ہفتے کے اسی وقت کے مقابلے میں پیر کے روز لندن انڈر گراؤنڈ کے استعمال میں 10 فیصد اضافہ ہوا ہے۔
ان کا کہنا تھا کہ ’کل رات وزیر اعظم کے اہم پیغام کے بعد آج میں بھی یہی کہوں گا کہ پبلک ٹرانسپورٹ کا استعمال نہ کریں - پبلک ٹرانسپورٹ ضروری کارکنوں کے لیے ہے۔‘
11 مئ 2020برطانیہ: لازمی قرنطینے کا اطلاق زمینی اور بحری راستوں سے آنے والوں پر بھی ہوگا
،تصویر کا ذریعہGetty Images
برطانیہ نے اعلان کیا تھا کہ ملک میں داخل ہونے والے تمام غیر ملکی افراد کو 14 روزہ قرنطینہ لازماً اختیار کرنا ہوگا تاکہ بیرونِ ملک سے کووِڈ-19 کو ملک آنے سے روکا جا سکے۔
اس ضابطے میں شروعات میں جمہوریہ آئرلینڈ سے آنے والے لوگوں کو استثنیٰ دیا گیا تھا تاہم اب یہ بتایا گیا ہے کہ فرانس سے آنے والے لوگ بھی اس سے مستثنیٰ ہیں۔ اس کے علاوہ حکومت نے یہ بھی وضاحت کی ہے کہ اس کا اطلاق صرف ہوائی اڈوں پر نہیں بلکہ تمام راستوں سے آنے والوں پر ہوگا۔
وزیرِ اعظم بورس جانسن نے یہ تو نہیں بتایا کہ ان اقدامات کا نفاذ کب کیا جائے گا تاہم انھوں نے کہا کہ وہ 'نوٹس' دے رہے ہیں کہ قرنطینے کے اقدامات مستقبل قریب میں نافذ ہوں گے۔
11 مئ 2020کوئٹہ: ایس او پیز پر عملدرآمد کے بغیر کاروبار جاری
کوئٹہ شہر میں سمارٹ لاک ڈاؤن کے تیسرے روز ایس او پیز پر عملدرآمد کے بغیر کاروبار کا سلسلہ جاری ہے۔
کوئٹہ سے بی بی سی کے نامہ نگار خیر محمد کے مطابق بلوچستان حکومت کی جانب سے جاری کیے گئے ایس او پیز کے مطابق دکانداروں اور ان کے ملازمین کے لیے یہ لازم تھا کہ وہ ماسک پہنیں گے۔
اس کے علاوہ یہ بھی لازم تھا کہ دکاندار ایسے گاہکوں کو دکان میں داخل نہیں ہونے دیں گے جنھوں نے ماسک نہیں پہن رکھا ہو مگر عملی طور پر اس ہدایات پر عملدرآمد ہوتا ہوا نظر نہیں آ رہا ہے۔
11 مئ 2020کورونا وائرس: سندھ میں 537 نئے مریض، مزید 11 ہلاکتیں
،تصویر کا ذریعہGetty Images
وزیراعلیٰ سندھ سید مراد علی شاہ کا کہنا ہے کہ سندھ میں گذشتہ 24 گھنٹوں میں کورونا وائرس سے متاثرہ 537 نئے مریض سامنے آئے ہیں جبکہ 11 افراد ہلاک ہوئے ہیں۔
اس طرح سندھ میں مجموعی ہلاکتوں کی تعداد 200 ہو چکی ہے۔
ان کا کہنا تھا کہ گذشتہ روز سندھ میں 3730 ٹیسٹ کیے گئے۔ اس طرح اب تک کل 95053 ٹیسٹ کئے جا چکے ہیں جن میں سے سے 12017 میں وائرس کی تصدیق ہوئی ہے۔
وزیرِ اعلی کے مطابق مزید 68 مریض صحتیاب ہوکر گھروں کو چلے گئے ہیں۔ اس طرح صحتیاب ہونے والوں کی مجموعی تعداد 2149 ہو گئی ہے۔
وزیراعلیٰ سندھ کے مطابق 537 نئے مریضوں میں سے 432 کا تعلق کراچی سے ہے۔
وزیراعلیٰ کا کہنا تھا کہ آج سے ایس او پیز کے تحت دیے گئے وقت کے مطابق کاروبا ر کھلیں گے اور تمام کاروباری دوستوں کو بتائی گئی ایس او پی کے تحت کام کرنا ہے۔
ان کا مزید کہنا تھا کہ ’میں خود بھی شہر کا دورہ کر کے جائزہ لوں گا۔ انتظامیہ کسی کو ہراساں نہیں کرے گی لیکن ایس او پی پر عمل کو یقینی بنائیں۔‘
11 مئ 2020ویاگرا کی کہانی میں کورونا کی دوا کے لیے کیا سبق ہے
11 مئ 2020منموہن سنگھ: سینے میں درد کی شکایت کے بعد سابق وزیرِاعظم ہسپتال داخل
،تصویر کا ذریعہPTI
انڈیا کے سابق وزیراعظم اور کانگریس کے رہنما منموہن سنگھ کو سینے میں درد کی شکایت کے بعد دہلی کے ایمز ہسپتال میں داخل کرایا گیا ہے۔
نیوز ایجنسی اے این آئی کے مطابق، منموہن سنگھ کو سینے میں درد کی شکایت کے بعد ہسپتال داخل کرایا گیا۔
کانگریس کے ترجمان جےویر شیرگل نے بھی اس خبر کی تصدیق کردی ہے۔
شیرگل کے علاوہ کانگریس پارٹی کے آفیشل ٹویٹر ہینڈل سے بھی سابق وزیر اعظم کی جلد صحتیابی کا پیغام پوسٹ کیا گیا ہے۔
X پوسٹ نظرانداز کریں, 1
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام, 1
X پوسٹ نظرانداز کریں, 2
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام, 2
11 مئ 2020بلوچستان: ڈاکٹر اور طبی عملہ گھروں میں آئیسولیشن پر مجبور
،تصویر کا ذریعہGetty Images
ینگ ڈاکٹرز ایسوسی ایشن بلوچستان کا کہنا ہے کہ کورونا سے متاثرہ ڈاکٹروں اور طبی عملے کے لیے آئیسولیشن کے مناسب انتظامات نہ ہونے کی وجہ سے وہ زیادہ تر اپنے گھروں میں آئیسولیشن اختیار کرنے پر مجبور ہیں جس کی وجہ سے ان کے خاندان کے افراد خطرے سے دوچار ہیں۔
ینگ ڈاکٹرز ایسوسی ایشن بلوچستان کے ترجمان ڈاکٹر رحیم بابر کے مطابق گھروں میں آئیسو لیشن کے لیے مناسب جگہ نہ ہونے کی وجہ سے متاثرہ ڈاکٹروں اور طبی عملے کے خاندانوں کے دیگر افراد کورونا سے متاثر ہورہے ہیں۔
ینگ ڈاکٹرز کی جانب سے یہ مطالبہ کیا جارہا ہے کورونا سے متاثرہ ڈاکٹروں کے آئیسو لیشن کے لیے مناسب انتظامات کیے جائیں تاکہ ان کے خاندان کے دیگر افراد اس سے محفوظ رہیں۔
خیال رہے بلوچستان میں کورونا سے متاثرہ طبی عملے کی تعداد 100 سے زائد ہے جن میں سے زیادہ تر ڈاکٹر ہیں۔
محکمہ صحت کی رپورٹ کے مطابق بلوچستان میں مجموعی طور پر قرنطینہ میں لوگوں کی تعداد 700 سے زائد ہے۔
ان میں سے 421 افراد پشین میں، 231 افراد ایران سے متصل سرحدی شہر تفتان، 150 افراد بلوچستان کے گرم ترین علاقے سبی میں قرنطینہ میں رکھے گئے ہیں۔
اس کے علاوہ وزیر اعلیٰ بلوچستان کے آبائی ضلع لسبیلہ میں بھی 42 افراد قرنطینہ میں ہیں۔
11 مئ 2020کورونا وائرس کی وبا آخر کب ختم ہوگی؟
کورونا وائرس کی وجہ سے اب دنیا بھر میں اربوں لوگ لاک ڈاؤن کی وجہ سے اپنے اپنے گھروں میں بند ہیں۔ معیشتوں کو شدید نقصان پہنچا ہے اور کروڑوں افراد بے روزگار ہوئے ہیں۔مگر کیا یہ وبا کبھی ختم ہوگی اور اگر ہاں تو اس میں کتنا عرصہ لگ سکتا ہے، دیکھیے اس ڈیجیٹل ویڈیو میں۔
11 مئ 2020کراچی میں بیشتر کاروباری سرگرمیاں بحال ہوگئیں, ریاض سہیل، بی بی سی اردو ڈاٹ کام، کراچی
،تصویر کا ذریعہGetty Images
پاکستان کے سب سے بڑے شہر کراچی میں بیشتر کاروباری سرگرمیاں بحال ہوگئی ہیں۔
وزیر اعظم عمران خان کے فیصلے کی تائید کرتے ہوئے حکومت سندھ نے پیر سے تعمیراتی صنعت سے وابستہ تمام کاروبار، چھوٹے دکانیں، موبائل مارکیٹیں، جامع کلاتھ مارکیٹ، طارق روڈ، حیدری، گل پلازہ سمیت کئی چھوٹی مارکیٹیں کھولنے کا اعلان کیا تھا۔
وزیر اعلیٰ سندھ سید مراد علی شاھ نے صبح پانچ بجے سے شام پانچ بجے تک کاروبار کھولنے کا اعلان کیا تاہم وزارت داخلہ کے لیٹر میں کاروبار کھولنے کی اجازت کا دورانیہ صبح آٹھ بجے سے لے کر شام پانچ بجے تک مقرر کیا گیا ہے۔
جامع کلاتھ، صدر، موبائل مارکیٹ، ہارڈویئر کی مارکیٹ میں پیر کو لیے گئے جائزہ کے مطابق بیشتر دکانیں پرانے رجحان یعنی 10 اور 11 بجے کے بعد ہی کھلی ہیں۔
واضح رہے کہ ماہ رمضان کے پہلے عشرے میں کاروبار تاخیر سے کھلتا اور جلد بند ہوتا ہے جبکہ باقی دو عشروں میں ساری رات کاروبار کھلا رہتا ہے خاص طور پر جوتوں اور کپڑے کی مارکیٹوں میں فجر تک کاروباری سرگرمیاں جاری رہتی ہیں اور لوگ افطاری سے لے کر سحری تک خریداری کرتے ہیں۔
حکومت سندھ نے دکانداروں کو ایس او پیز پر عملدرآمد کا پابند کیا تھا، لیکن بیشتر کاروباری مراکز میں دکانداروں اور خریداروں کے پاس ماسک دستیاب نہیں تھے نہ ہی سینٹائیزر کا بندوست کیا گیا تھا۔
دوسری جانب کمشنر کراچی نے کاروبارکے لیے ایس او پیز کی تفصیلات جاری کردی ہیں جس کے تحت:
- دکان پر کام کرنے والوں کی فہرست آویزاں کی جائیں
- نمایاں جگہ پر ایس او پیز تحریری طور پر موجود ہوں
- سٹاف اور خریداروں کے درمیان چھ فٹ کا فاصلہ رکھیں
- ایک وقت میں ایک گاہک کو خدمات فراہم کی جائیں
- ایس او پیز کے تحت دکاندار اور سٹاف ماسک اور ہینڈ سینیٹائیزر کا استعمال کریں
- دکان میں ہر تین سے چار گھنٹے بعد سپرے کرکے ڈس انفیکٹ کیا جائے
- داخلی دروازے پر ٹمپریچر گن کا استمال کریں
کمشنر نے متنبہ کیا ہے کہ ان اصولوں پر عمل نہ کرنے کی صورت میں دکان یا مارکیٹ سیل ہوسکتی ہے۔
11 مئ 2020نیوزی لینڈ کورونا وائرس کے خاتمے کے قریب
،تصویر کا ذریعہGetty Images
نیوزی لینڈ میں جمعرات سے بہت سے کاروبار کھل رہے ہیں جن میں ریستوران، دکانیں اور سینما گھر شامل ہیں۔ تاہم شراب خانے 21 مئی تک بند رہیں گے۔
وزیر اعظم جاسنڈا آرڈرن کا کہنا ہے کہ ملک میں کووڈ 19 کے صرف 90 متاثرین باقی ہیں اور ان کا ملک وائرس کے خاتمے کے قریب ہے۔
پڑوسی ملک آسٹریلیا کے برعکس، نیوزی لینڈ ابھی تک اپنے شہریوں کے لیے کوئی کووڈ ٹریسنگ ایپ نہیں لایا ہے۔ یاد رہے کہ وائرس سے متعلق ردعمل کے حوالے سے آسٹریلیا کی تعریف کی گئی ہے۔
کووڈ ٹریسنگ ایپ کے بجائے نیوزی لینڈ اپنے شہریوں پر انحصار کر رہا ہے کہ وہ اپنے سماجی حلقوں کو چھوٹا رکھیں اور جب باہر جائیں تو فاصلہ برقرار رکھیں۔
نیوزی لینڈ نے صرف دو ہفتے بعد ہی مکمل لاک ڈاؤن ختم کر دیا تھا۔
11 مئ 2020کیا پریمیئر لیگ کا دوبارہ آغاز ممکن ہو سکے گا؟
،تصویر کا ذریعہGetty Images
پریمیئر لیگ آئندہ چند دنوں میں حتمی فیصلہ کرنے والی ہے کہ آیا موجودہ سیزن کو دوبارہ شروع کرنا ممکن ہے یا نہیں۔
اس سلسلے میں کلبز کے عہدیداران پیر کو مل کر تبادلہ خیال کریں گے۔
اس کے علاوہ:
- پریمیئر لیگ کی ٹیم برائٹن ہاس کے تیسرے کھلاڑی میں کورونا وائرس کی تصدیق ہو گئی ہے۔ اس سے پہلے دو کھلاڑیوں کا ٹیسٹ مثبت آیا تھا۔
- فارمولا ون کے مالکان برطانیہ کی حکومت کے ساتھ بات چیت کر رہے ہیں کہ آیا کورونا وائرس پر قابو پانے کے نئے اقدامات اس سیزن کے آغاز کے منصوبوں کو متاثر کر سکتے ہیں یا نہیں۔
- فرانس میں جہاں دوسرے کھیل معطل ہیں وہیں پیر سے بند دروازوں کے پیچھے گھڑ دوڑ کا آغاز ہو رہا ہے۔
11 مئ 2020معید یوسف: عید سے پہلے جتنے زیادہ پاکستانی ممکن ہو وطن واپس لائیں گے
،تصویر کا ذریعہPTV
وزیرِ اعظم کے معاونِ خصوصی برائے قومی سلامتی معید یوسف نے کہا ہے کہ حکومت کی ترجیح ہے کہ عید سے پہلے جتنے زیادہ پاکستانی ممکن ہو وطن واپس لائے جائیں۔
اسلام آباد میں ایک پریس بریفنگ سے خطاب کرتے ہوئے انھوں نے کہا کہ حکومت چاہتی ہے کہ ہر ہفتے 10 سے 11 ہزار پاکستانیوں کو واپس لایا جائے۔
انھوں نے کہا کہ اس سے ہماری لیبارٹریوں پر بوجھ آئے گا اور اسی لیے صوبوں کو ہدایت کی گئی ہے کہ بیرونِ ملک سے آنے والے تمام لوگوں کا ٹیسٹ 24 گھنٹوں کے اندر ہو اور نتیجہ آئے۔
لیکن معید یوسف نے بھی کہا کہ اس حوالے سے کوئی یقین دہانی نہیں کروائی جا سکتی کہ 24 گھنٹے ہی لگیں گے، صورتحال کے باعث اس میں زیادہ وقت بھی لگ سکتا ہے۔
انھوں نے کہا کہ جن مسافروں کا ٹیسٹ منفی آئے گا، وہ 14 دن کے لیے گھر پر خود کو قرنطینہ کریں گے، لیکن جن لوگوں کا ٹیسٹ مثبت آئے گا، ان کے بارے میں بھی اگر ماہرین کی رائے یہ ہوئی کہ انھیں گھر پر رکھا جا سکتا ہے، تو انھیں گھر بھیجا جائے گا۔
انھوں نے کہا کہ کس مریض کو گھر بھیجا جا سکتا ہے اور کس کو نہیں، یہ فیصلہ طبی ماہرین کریں گے۔
’خلیجی ممالک میں پھنسے لوگ ترجیح‘
کینیڈا سے پی آئی اے کی خالی پروازیں آنے کا مقصد بتاتے ہوئے وزیرِ اعظم کے معاونِ خصوصی کا کہنا تھا کہ اگر وہاں پھنسے ہوئے پاکستانیوں کو پہلے واپس لے آتے تو ٹیسٹنگ کی صلاحیت محدود ہونے کے باعث خلیجی ممالک میں پھنسے ہوئے مزدور طبقے کو واپس نہ لا سکتے جو حکومت کی ترجیح ہے، کیونکہ ایسے سب سے زیادہ لوگ خلیج میں ہیں۔
انھوں نے بتایا کہ 21 مئی تک دنیا کے 22 ممالک سے 10 ہزار 710 لوگ واپس آئیں گے جن میں سب سے زیادہ خلیجی ممالک سے ہوں گے۔
معید یوسف نے مزید کہا کہ حکومت سیالکوٹ ایئرپورٹ کو اسی ہفتے فعال کرنے کی کوشش کر رہی ہے جبکہ اس کے بعد کوئٹہ ایئرپورٹ کی کوشش کی جائے گی تاکہ زیادہ سے زیادہ لوگ واپس آ سکیں۔
انھوں نے کہا کہ یہ طے پایا گیا ہے کہ جن ممالک سے آنے والی پروازوں میں کورونا مثبت لوگوں کی زیادہ شرح پائی گئی ہے، ان لوگوں کے ٹیسٹ وہیں کیے جائیں گے، ان کا جہاز میں بھی سماجی دوری کا خیال رکھا جائے گا، اور یہاں آنے کے بعد دوبارہ ٹیسٹ ہوگا۔
انھوں نے کہا کہ صوبائی حکومتوں کو اختیار ہے کہ جن لوگوں میں علامات نہیں، انھیں گھروں پر تنہائی میں رکھیں،
11 مئ 2020کوورنا وائرس: ایشیا کی تازہ ترین صورتحال
،تصویر کا ذریعہGetty Images
- بنگلہ دیش میں پیر کے روز سب سے زیادہ تعداد میں کووڈ 19 متاثرین سامنے آئے ہیں جن کی تعداد 884 بتائی جا رہی ہے جبکہ 14 اموات کی بھی اطلاع ہے۔ ملک میں متاثرین کی تعداد 14000 سے تجاوز کر گئی ہے۔
- پاکستان میں پلازما تھراپی کے ذریعے کووڈ 19 کے مریضوں کا علاج شروع کیا جا رہا بے۔ اس طریقہِ علاج میں کورونا وائرس سے صحتیاب ہونے والے مریضوں کے خون سے متاثرہ مریض میں پلازما منتقل کیا جاتا ہے۔ پاکستان میں اب تک کورونا وائرس سے متاثرین کی تعداد 30 ہزار سے بڑھ گئی ہے جبکہ 668 اموات ہو چکی ہیں۔
- سری لنکا میں پیر سے لاک ڈاؤن میں نرمی کی جا رہی ہے۔ سرکاری اور نجی کاروبار محدود تعداد میں عملے کے ساتھ دوبارہ کھولے جا سکیں گے۔ سری لنکا میں کووڈ 19 کے 800 سے زیادہ مریض موجودہ ہیں۔
- پیر کو نیپال میں کووڈ 19 کے 10 نئے مریضوں کا اضافہ ہوا جس کے بعد وہاں متاثرین کی تعداد 120 ہو گئی ہے۔
11 مئ 2020سعودی کفایت شعاری مہم، ٹیکس میں اضافہ اور الاؤنس ختم
11 مئ 2020کورونا وائرس: سائنسدان اب بھی کورونا کے بارے میں کیا نہیں جانتے؟
کووڈ 19 نے پوری دنیا میں اپنے پنجے گاڑے ہوئے ہیں اور دنیا بھر میں لاکھوں افراد اس سے متاثر ہیں۔ سائنسدان اس وائرس کی ویکسین بنانے کے لیے کوشاں ہیں لیکن وہ اس وائرس کے متعلق کیا اور کتنا جانتے ہیں، جاننے کے لیے دیکھیے یہ ڈیجیٹل ویڈیو۔
11 مئ 2020کورونا وائرس: دنیا میں اب تک کیا ہوا؟
،تصویر کا ذریعہGetty Images
،تصویر کا کیپشنشنگھائی کا مشہور ڈزنی لینڈ کھل گیا
- چین میں کورونا وائرس پر قابو پانے کے بعد تفریحی مقامات آہستہ آہستہ کھلتے جارہے ہیں۔ اسی سلسلے میں چین کے سب سے بڑے شہر شنگھائی میں ڈزنی لینڈ کو دوبارہ کھول دیا گیا ہے۔
- انڈیا میں منگل سے جزوی طور پر ریلوے سروس بحال کی جا رہی ہے۔ اس کے علاوہ انڈین حکومت نے بیرونِ ملک پھنسے ہوئے تقریباً دو لاکھ شہریوں کو وطن واپس لانے کا عمل شروع کر دیا ہے اور اس سلسلے میں انڈین بحریہ کا پہلا بحری جہاز مالدیپ سے 700 انڈین شہریوں کو وطن واپس لے آیا ہے۔
- چین کے شہر سوہلان میں کورونا وائرس کے نئے متاثرین کی تعداد میں اضافہ ہوا ہے جس کے بعد شہر کو لاک ڈاؤن کر دیا گیا ہے۔
- سعودی عرب کی سرکاری خبر رساں ایجنسی کے مطابق سعودی عرب جولائی سے ویلیو ایڈڈ ٹیکس کو 5 سے 15 فیصد تک بڑھا رہا ہے۔
،تصویر کا ذریعہGetty Images
،تصویر کا کیپشنجنوبی ریاست کیرالہ پہنچنے والے دو مسافروں کو علامات ظاہر کرنے کے بعد ہسپتال لے جایا گیا ہے
،تصویر کا ذریعہGetty Images
،تصویر کا کیپشنسعودی حکومت جون کے بعد سے ریاست کے ملازمین کو ملنے والے رہائشی الاؤنس کو بھی معطل کردے گی
11 مئ 2020بریکنگ, پاکستان کے زیرِ انتظام کشمیر میں کورونا وائرس سے پہلی ہلاکت, ایم اے جرال، صحافی
،تصویر کا ذریعہGetty Images
پاکستان کے زیر انتظام کشمیر میں آج کورونا وائرس کے سبب پہلی ہلاکت ہوئی ہے۔ ضلع مظفرآباد کے ہیلتھ افسر ڈاکٹر سعید کے مطابق 85 سالہ شخص جن میں آٹھ مئی کو کورونا وائرس کی تشخیص ہونے کے بعد آئیسولیشن ہسپتال مظفرآباد میں داخل کیا گیا تھا، آج پیر کے روز انتقال کر گئے ہیں۔
ڈاکٹر سعید نے بتایا کہ یہ اس خطے میں پہلے مریض ہیں جن کی کورونا وائرس کے سبب موت واقع ہوئی ہے۔
ہلاک ہونے والے شخص نے گوجرانوالہ سے مظفرآباد کا سفر کیا تھا۔
ان کے مطابق ہلاک شدہ شخص کو بلند فشارِ خون کا عارضہ بھی لاحق تھا اور آئسولیشن ہسپتال لائے جانے کے بعد ان کو سانس لینے میں دشواری کے سبب وینٹی لیٹر پر منتقل کر دیا گیا تھا، مگر وہ پھر بھی جانبر نہ ہوسکے۔
ڈاکٹر سعید نے بتایا کہ ضلعی انتظامیہ ان کی تدفین مقامی قبرستان میں مکمل احتیاطی تدابیر کے ساتھ کرے گی.