انڈیا: وزیر اعظم مودی کی جانب سے 20 لاکھ کروڑ روپے کے معاشی پیکج کا اعلان

کورونا وائرس کی وجہ سے دنیا بھر میں اب تک 41 لاکھ سے زیادہ افراد متاثر اور دو لاکھ 86 ہزار سے زائد افراد ہلاک ہو چکے ہیں۔ انڈیا کے وزیر اعظم نریندر مودی نے 20 لاکھ کروڑ روپے کے معاشی پیکج کا اعلان کیا ہے۔

لائیو کوریج

12 مئ 2020ایلون مسک کی جانب سے احکامات کی خلاف ورزی، ٹیسلا فیکٹری کھول دی گئی
،تصویر کا ذریعہTwitter/@elonmusk
ٹیسلا نے امریکی ریاست کیلیفورنیا میں قائم اپنی واحد کار ساز فیکٹری کھول دی ہے۔ اس علاقے میں مقامی سطح پر کار کی صنعت بند رکھنے کے اقدامات جاری کیے گئے تھے۔
پیر کو ٹیسلا کے مالک ایلون مسک نے ایک ٹویٹ میں کہا کہ ان کی جانب سے کاروں کی پیداوار بحال کر دی گئی ہے اور وہ دیگر عملے کے ساتھ خود بھی وہاں کام کریں گے۔
کیلیفورنیا میں لاک ڈاؤن میں نرمی اور صنعت کھولنے کی اجازت دی گئی تھی لیکن اس میں موجود المیڈا کاؤنٹی نے ایسا نہیں کیا تھا۔ یہ علاقہ سان فرانسسکو سے ایک گھنٹے کی مسافت پر واقع ہے۔
سنیچر کو ایلون مسک نے کہا تھا کہ ٹیسلا نے کاؤنٹی کے خلاف مقدمے کی درخواست دائر کی جس میں کہا گیا کہ اسے کار کی صنعت کھولنے سے روکا جا رہا ہے۔
عدالتی حکم سے قبل ہی ایلون مسک نے پیر کو ٹوئٹر پر صنعت کھولنے کا اعلان کردیا ہے۔
12 مئ 2020انڈیا میں ٹرین سروس بحال مگر تمام ٹکٹیں فروخت
،تصویر کا ذریعہGetty Images
آج سے انڈیا میں بین الریاستی ٹرین سروس بحال کی جا رہی ہے۔ مسافروں نے آن لائن ٹکٹ خریدنے میں اتنی تیزی دکھائی کہ کچھ ہی منٹوں میں تمام ٹکٹیں فروخت ہوگئیں۔
ٹرین سروس تقریباً گذشتہ دو ماہ سے بند تھی۔ اس لیے اس میں کوئی حیرانی کی بات نہیں کہ ٹکٹیں اتنی جلدی کیسے فروخت ہوگئیں۔
اخبار ٹائمز آف انڈیا کے مطابق محض تین گھنٹوں میں لگ بھگ 30 ہزار ٹکٹیں فروخت ہوگئیں تھیں۔
منگل سے ٹرینیں دارالحکومت نئی دہلی سے 15 شہروں کی طرف روانہ ہوں گی۔ ان میں بنگلور، ممبئی اور چنائی شامل ہیں۔ مسافروں کے لیے ماسک پہننا لازم ہوگا اور یہ دیکھا جائے گا کہ کسی مسافر میں کورونا کی علامت تو نہیں۔
مسافروں کو سماجی فاصلہ اختیار کرنے کی ہدایت دی گئی ہے۔
رواں ماہ کے آغاز پر حکومت نے کسی دوسری ریاست میں پھنسے مزدوروں کی گھر واپسی کے لیے خصوصی ٹرینیں چلائی تھیں۔
حکام نے مقامی ذرائع ابلاغ کو بتایا تھا کہ ان 500 سے زیادہ ٹرینوں کی مدد سے اب تک چھ لاکھ مزدوروں کی گھر واپسی ممکن ہوئی ہے۔
12 مئ 2020برازیل کے صدر نے ’وزارت صحت سے مشاورت کیے بغیر‘ جِم اور سیلون کھول دیے
،تصویر کا ذریعہReuters
خبر رساں ادارے روئٹرز کے مطابق برازیل کے صدر جیر بولسنارو نے پیر کو ملک میں کورونا کے متاثرین اور اموات میں اضافے کے باوجود ضروری سروسز کے ساتھ جِم اور ہیئر سیلون کھولنے کا فیصلہ کیا ہے۔
پیر کو وزیر صحت نے تسلیم کیا کہ صدر نے ان کی وزارت سے اس بارے میں مشاورت نہیں کی کہ آیا یہ جم اور بیوٹی سیلون کھولنے کا مناسب وقت ہے۔
صدر کا کہنا ہے کہ ریاست اور بلدیاتی حکومتوں نے کورونا سے بچاؤ کے لیے سماجی فاصلے کے اقدامات میں ضرورت سے زیادہ سختی کی ہے جس سے ملکی معیشت متاثر ہو رہی ہے۔
برازیل میں تاحال کورونا کے کل متاثرین کی تعداد 168,331 ہے جبکہ 11 ہزار سے زیادہ اموات پیش آئی ہیں۔
12 مئ 2020کورونا کے بعد کا نیو ورلڈ آرڈر؟
12 مئ 2020جرمنی میں نئے متاثرین تقریباً ایک ہزار
،تصویر کا ذریعہGetty Images
جرمنی میں گذشتہ ایک روز میں مزید 933 افراد میں کورونا کی تشخیص ہوئی ہے۔ اس سے کل متاثرین کی تعداد 170,508 ہوگئی ہے۔
گذشتہ روز کے اعداد و شمار میں نمایاں اضافہ دیکھا گیا ہے۔ پیر کو نئے متاثرین کی تعداد محض 357 بتائی گئی تھی۔
جرمنی نے لاک ڈاؤن کے تحت کیے گئے اقدامات میں نرمی کا فیصلہ کیا ہے اور یہاں اس عالمی وبا کی دوسری ممکنہ لہر کے بارے میں خدشات ظاہر کیے جا رہے ہیں۔
لیکن اس اضافے کی اس طرح بھی وضاحت کی جاسکتی ہے کہ ممکن ہے کہ ہفتے کے آخر میں اعداد و شمار ریکارڈ کرنے میں تاخیر ہوئی ہوگی۔ اس لیے پیر کے مقابلے منگل کو متاثرین میں واضح اضافہ دیکھا گیا۔
سرکاری اعداد و شمار کے مطابق گذشتہ ایک روز میں 116 اموات پیش آئی ہیں اور کل اموات 7533 ہوگئی ہیں۔
12 مئ 2020ٹائمز سکوائر میں ’ٹرمپ ڈیتھ کلاک‘ کیا ہے؟
،تصویر کا ذریعہEPA
امریکہ کے شہر نیو یارک کے مشہور علاقے ٹائمز سکوائر میں ایک نیا بل بورڈ لگایا گیا ہے جو کورونا وائرس سے ہونے والی اموات کے اعداد و شمار بتاتا ہے۔
اسے لگانے والے شخص کا کہنا ہے کہ صدر ڈونلڈ ٹرمپ اگر وقت پر اقدامات کرتے تو اس میں دکھائے جانے والے اتنے لوگوں کی جانیں بچائی جاسکتی تھیں۔ اس لیے اس کا نام ’ٹرمپ ڈیتھ کلاک‘ رکھا گیا ہے۔
یہ فلم ساز یوجین جیریکی نے بنایا ہے اور اسے ایک عمارت کی چھت پر لگایا گیا ہے۔ یہ عمارت کورونا وائرس کی وجہ سے تاحال کھالی ہے۔
پیر کو اس میں 48 ہزار سے زیادہ اموات دکھائی گئیں جبکہ ملک بھر میں 80 ہزار سے زیادہ اموات ہوئی ہیں۔
،تصویر کا ذریعہGetty Images
اس گھڑی میں کل اموات کا 60 فیصد حصہ دیکھایا جاتا ہے جس سے یہ تاثر دیا جاتا ہے کہ اتنے لوگوں کو مرنے سے بچایا جاسکتا تھا اگر ٹرمپ انتظامیہ سماجی فاصلے اور لاک ڈاؤن کے اقدامات پر صحیح طرح عمل درآمد کرواتی۔
یوجین جیریکی نے اس کی وضاحت ایک تحریر میں کی ہے۔
نیو یارک سے تعلق رکھنے والے اس فلم ساز کے مطابق یہ محتاط اندازے پر مبنی ہے جسے امریکہ میں صف اول کے ماہرِ وبائی امراض ڈاکٹر اینتھونی فاؤچی کے بیان سے منسوب کیا گیا ہے۔
ڈاکٹر فاؤچی امریکہ میں کورونا سے نمٹنے کے لیے ایک بااعتماد چہرہ بن کر سامنے آئے ہیں۔ انھوں نے کہا تھا کہ ’جلد اقدامات سے جانیں بچائی جاسکتی تھیں۔‘
12 مئ 2020بریکنگ, گذشتہ 24 گھنٹوں میں پاکستان میں 1140 نئے متاثرین کی شناخت، 38 اموات
پاکستان کے نیشنل کمانڈ اینڈ آپریشن سینٹر کی جانب سے صبح کی تازہ ترین معلومات کے مطابق 11 مئی کو پاکستان میں 1140 متاثرین کی شناخت ہوئی ہے جبکہ ہلاک ہونے والوں کی تعداد 38 تھی۔
12 مئ 2020بریکنگ, انڈیا: ایک روز میں سب سے زیادہ نئے متاثرین کا اضافہ
،تصویر کا ذریعہEPA
انڈیا میں وزارت صحت کے مطابق گذشتہ ایک روز کے دوران اب تک کورونا کے سب سے زیادہ نئے متاثرین کا اضافہ ہوا ہے۔
ملک میں اب کووڈ 19 کے تقریباً 70 ہزار کل متاثرین ہیں۔ اس میں 20 ہزار سے زیادہ ایسے افراد شامل ہیں جو صحتیاب ہوچکے ہیں یا ڈسچارج کیے جاچکے پیں۔ جبکہ کل 2206 اموات پیش آئی ہیں۔
گذشتہ دنوں روز نئے متاثرین میں اضافہ دیکھا جا رہا ہے۔ پچھلے دو روز میں تقریباً آٹھ ہزار نئے متاثرین سامنے آئے ہیں۔
انڈیا لاک ڈاؤن کے تیسرے مرحلے میں آدھے سے زیادہ وقت گزار چکا ہے۔ حالیہ اقدامات 17 مئی کو ختم ہو جائیں گے جس کے بعد لاک ڈاؤن میں سختی یا نرمی کا فیصلہ کیا جائے گا۔
وزیر اعظم نریندر مودی نے پیر کو وزرا اعلی کے ساتھ چھ گھنٹے لمبی ملاقات کی تھی۔ اس میں کئی شرکا نے مزید نرمیوں کی خواہش ظاہرکی تھی جبکہ کچھ نے کہا تھا کہ مکمل لاک ڈاؤن ختم نہیں کرنا چاہیے۔
12 مئ 2020میکسیکو میں 100 مزید اموات
،تصویر کا ذریعہAFP
میکسیکو کی وزارت صحت نے پیر کو کہا ہے کہ ملک میں گذشتہ ایک روز میں کورونا سے مزید 1305 متاثرین سامنے آئے ہیں جبکہ 108 اموات پیش آئی ہیں۔
اس سے ملک میں سرکاری اعداد و شمار کے مطابق کووڈ 19 کے کل متاثرین 36,327 ہوگئے ہیں جبکہ 3573 اموات پیش آئی ہیں۔
جمعرات سے روزانہ کی اموات میں کمی واقع ہوئی ہے۔ ملک میں وبا کے پھیلاؤ کے دوران ایک روز میں سب سے زیادہ 257 اموات بھی ریکارڈ کی گئی تھیں۔
12 مئ 2020یونیسیف کا بچوں کی امداد کے لیے 1.6 ارب ڈالر کا مطالبہ
،تصویر کا ذریعہReuters
اقوامِ متحدہ کے چلڈرن فنڈ یونیسیف نے پیر کو اپنی ابتدائی اپیل کے مقابلے دو گنا رقم کا مطالبہ کر دیا ہے۔
یونیسیف نے بحران اور عالمی وبا سے متاثرہ بچوں کی امداد کے لیے 1.6 ارب ڈالر کا مطالبہ کیا ہے۔
ادارے نے ایک بیان میں کہا ہے کہ: ’ہم نے دیکھا ہے کہ عالمی وبا سے ان ممالک میں کیا ہو رہا ہے جہاں صحت کا نظام بہتر ہے اور ہمیں خدشات ہیں کہ اس سے کمزور نظام اور کم وسائل والے ممالک میں کیا ہوگا۔‘
مارچ کے اواخر تک یونیسیف نے 21.5 کروڑ ڈالر وصول کیے تھے۔
اقوام متحدہ نے گذشتہ ہفتے کہا تھا کہ کئی ممالک میں کورونا کی وجہ سے عدم استحکام پیدا ہوسکتا ہے۔ اس نے افریقہ اور جنوبی امریکہ کے 63 ممالک کی امداد کے لیے 6.7 ارب ڈالر مانگے تھے۔
12 مئ 2020امریکہ میں کل 80 ہزار اموات
،تصویر کا ذریعہEPA
جانز ہاپکنز یونیورسٹی کے اعداد و شمار کے مطابق امریکہ میں گذشتہ 24 گھنٹوں کے دوران 830 اموات کورونا کی وجہ سے پیش آئی ہیں۔ اس سے ملک میں کل ہلاکتیں 80 ہزار سے زیادہ ہوگئی ہیں۔
اتوار کو کورونا سے 776 اموات ہوئی تھیں اور یہ مارچ سے اب تک اس وبا سے ایک دن میں ہونے والی سب سے کم اموات تھیں۔
کچھ ریاستوں میں لاک ڈاؤن میں نرمی اور اموات میں بتدریج اضافے کے پیش نظر خدشات ظاہر کیے جا رہے ہیں۔
امریکہ اس عالمی وبا سے سب سے زیادہ متاثرہ ملک ہے۔ یہاں 13 لاکھ سے زیادہ متاثرین ہیں۔
12 مئ 2020کورونا وائرس: عالمی معیشت کی بحالی میں کتنا وقت لگے گا؟
12 مئ 2020ٹوئٹر اب ’متنازع‘ معلومات کے ساتھ تنبیہی لیبل لگایا کرے گا
،تصویر کا ذریعہTwitter
ٹوئٹر نے اعلان کیا ہے کہ کووڈ 19 سے متعلق ’متنازع یا غیر مصدیقہ‘ اطلاعات‘ والے پیغامات کی اب وہ نشاندہی کریں گے۔
کمپنی نے ایک بیان میں کہا ہے کہ اس حوالے سے نئے لیبل اور تنبیہی پیغامات ایسی ٹوئٹس کے ساتھ سیاق و سباق فراہم کریں گے۔
بیان کے مطابق یہ ایسے پیغامات میں استعمال کیے جائیں گے جہاں پر خطرہ اس قدر زیادہ نہیں ہے کہ ٹوئیٹ کو حذف کرنے کا جواز بنتا ہو۔
ساتھ ہی ساھت کمپنی کا یہ بھی کہنا تھا کہ وہ براہِ راست ٹوئیٹس کی فیکٹ چیکنگ نہیں کریں گے یا تنبیہی پیغامات والی ٹوئیٹس کو چھوٹج قرار نہیں دیں گے کیونکہ ان کے صارفین نہیں چاہتے کہ کمپنی سچ اور جھوٹ کا فیصلہ کرے۔
12 مئ 2020کورونا وائرس: رہائی پانے والے قیدی جو گھروں کو نہیں جا سکتے
12 مئ 2020کیا امریکہ کافی ٹیسٹ کر رہا ہے؟
صدر ٹرمپ کا کہنا ہے کہ امریکہ میں روزانہ کی بنیاد پر تین لاکھ ٹیسٹ کیے جا رہے ہیں اور اس ہفتے کے ملک میں کل ٹیسٹ کی تعداد ایک کروڑ تک پہنچ جائے گی۔
کووڈ ٹریکنگ پروجیکٹ نامی فلاحی تنظیم کے مطابق مئی کے پہلے ہفتے میں امریکہ میں دو لاکھ اڑتالیس ہزار ٹیسٹ روزانہ کیے گئے۔
تاہم صحت عامہ کے معروف محققین کا کہنا ہے کہ امریکہ کو لاک ڈاؤن میں نرمی سے پہلے کم از کم نو لاکھ ٹیسٹ روزانہ تک پہنچنا چاہیے۔
اس ہفتے تک امریکہ نے اپنی 33 کروڑ آبادی میں صرف 2.75 فیصد لوگوں کو ٹیسٹ کیا تھا اور کسی بھی ریاست میں دس فیصد سے زیادہ لوگوں کو ٹیسٹ نہیں کیا گیا ہے۔
ایک درجن سے زیادہ ریاستوں جن میں لاک ڈاؤن میں نرمی کی جا رہی ہے، جن میں ٹیکساس، جنوبی کیرولائینا اور ایریزونا شامل ہیں، ان ریاستوں میں دو فیصد سے بھی کم شہریوں کو ٹیسٹ کیا گیا ہے۔
12 مئ 2020ٹیسٹنگ میں ہم کامیاب ہوگئے ہیں: صدر ٹرمپ
،تصویر کا ذریعہReuters
امریکہ صدر ٹرمپ نے اپنی پریس کانفرنس میں کہا تھا کہ امریکہ کامیاب ہوگیا ہے۔ جب ان سے پوچھا گیا کہ اس کی وضاحت کریں تو ان کا کہنا تھا کہ وہ صرف ٹیسٹنگ کے حوالے سے بات کر رہے تھے۔
ان کا کہنا تھا کہ ’جتنی اموات ہو رہی ہیں، ان کے ساتھ تو آپ کامیاب نہیں ہیں۔ ہم نے ٹیسٹنگ کے حوالے سے زبردست کام کیا ہے جو کہ ایک اہم کام ہے۔ ہم اس پر غالب آ گئے ہیں۔ ہمارے پاس دنیا کا بہترین سامان ہے۔‘
12 مئ 2020کورونا: بیرون ملک مقیم افراد کو گھر پیسے بھیجنے میں کن مشکلات کا سامنا ہے؟
12 مئ 2020بریکنگ, ’وائٹ ہاؤس میں ماسک پہنیں یا کوشش کریں صدر کے دفتر میں جائیں ہی نہیں‘
امریکہ میں وائٹ ہاؤس میں سٹاف کو ایک میمو بھیجا گیا ہے جس میں انھیں ہدایت کی گئی ہے کہ جب وہ عمارت کے اندر صدر کے دفتر یعنی ویسٹ ونگ میں جائیں تو ماسک پہنیں یا کوشش کریں کہ صدر کے دفتر سے دور ہی رہیں۔
یہ میمو امریکی میڈیا کو اس وقت ملا جب صدر ٹرمپ چند ہی لمحوں میں وائٹ ہاؤس سے کورونا وائرس کی ٹیسٹنگ کے بارے میں پریس کانفرنس کرنے والے تھے۔
یاد رہے کہ وائٹ ہاؤس کی کورونا وائرس سے متعلق ٹاسک فورس کے تین اعلیٰ سطحی اہلکار بمشول ملک کے اہم ترین ماہرِ وبائی امراض ڈاکٹر اینتھونی فائوچی اس وقت وائٹ ہاؤس سٹاف کے دو اراکین کے پازیٹیو ٹیسٹ آنے کے بعد سیلف آئسولیشن میں ہیں۔
صدر ٹرمپ نے اس بحران کے دوران ماسک پہننے سے انکار کیا ہے اور امریکی میڈیا میں متعدد بار ان پر اس حوالے سے تنقید ہو چکی ہے۔
12 مئ 2020کورونا وائرس: سعودی فرمانروا شاہ سلمان کی جانب سے 16 کروڑ روپے کا امدادی سامان پنجاب کے دس اضلاع میں تقسیم
،تصویر کا ذریعہSaudi Embassy in Pakistan
،تصویر کا ذریعہSaudi Embassy in Pakistan
،تصویر کا ذریعہSaudi Embassy in Pakistan
،تصویر کا ذریعہSaudi Embassy in Pakistan
،تصویر کا ذریعہSaudi Embassy in Pakistan
سعودی فرمانروا شاہ سلمان کے فلاحی امدادی ادارے کی طرف سے پاکستان میں کورونا وائرس سے متاثرہ افراد کے لیے پیر کے روز امدادی سامان تقسیم کیا گیا۔ پاکستان میں سعودی سفیر نواف بن سعید المالکی نے سامان گورنر پنجاب چوہدری محمد سرور کے سپرد کیا تھا۔ کھانے پینے کی اشیاء پر مشتمل امدادی سامان صوبائی حکومت کے تعاون سے پنجاب کے 10 پسماندہ اضلاع میں تقسیم کیا جا رہا ہے۔ امدادی پیکیج 16 کروڑ 61 لاکھ روپے مالیت کا ہے۔
11 مئ 2020بریکنگ, پنجاب: گذشتہ 24 گھنٹوں میں 14 اموات، 301 نئے متاثرین, ملک میں مصدقہ متاثرین 32 ہزار سے زائد
صوبہ پنجاب میں گذشتہ 24 گھنٹوں کے دوران مزید 301 افراد میں کورونا وائرس کی تشخیص ہوئی ہے جس کے بعد صوبے میں متاثرہ افراد کی مجموعی تعداد 11869 ہو گئی ہے۔
قدرتی آفات سے نمٹنے والے صوبائی ادارے پی ڈی ایم اے کے مطابق سوموار کو مزید 14 افراد کورونا کے باعث ہلاک ہوئے ہیں اور اب صوبے میں اموات کی مجموعی تعداد 211 ہو چکی ہے۔
پنجاب میں گذشتہ 24 گھنٹوں کے دوران 4568 کورونا ٹیسٹ ہوئے ہیں۔
پنجاب میں نئے متاثرین اور ہلاکتوں کے بعد اب پاکستان میں کورونا کے مصدقہ متاثرین کی کُل تعداد 32045 ہو گئی ہے جبکہ ہلاکتوں کی تعداد 706 ہو گئی ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام