بریکنگ, سندھ میں مزید 12 نئے مریض، پاکستان میں تعداد 1435 ہو گئی, 12 ہلاکتیں، 25 صحت یاب
،تصویر کا ذریعہGetty Images
پاکستان میں سنیچر کو مزید 60 افراد میں کورونا وائرس کی موجودگی کی تصدیق کے بعد ملک میں اس کے متاثرین کی مجموعی تعداد 1435 ہوگئی ہے۔
سرکاری اعدادوشمار کے مطابق اب تک اس وبا میں 11 افراد کی ہلاکت ہوئی ہے جبکہ 25 مریض صحت یاب بھی ہوئے ہیں۔
ہلاک شدگان میں سے پانچ کا تعلق پنجاب، چار کا خیبر پختونخوا جبکہ ایک ایک کا بلوچستان، گلگت بلتستان اور سندھ سے ہے۔
12ویں ہلاکت کی تصدیق خیبر پختونخوا کے وزیراعلی کے مشیر برائے اطلاعات اجمل وزیر نے کی اور بتایا کہ خاتون کا تعلق لوئر دیر سے تھا جو سعودی عرب سے عمرے کی ادائیگی کے بعد واپس آئی تھیں اور ان کی وفات کے بعد پورے گاؤں کو قرنطینہ کر دیا گیا ہے۔
سنیچر کی دوپہر تک سب سے زیادہ مریض سندھ میں سامنے آئے جن کی تعداد 29 ہے جس کے بعد صوبے میں متاثرین کی تعداد 469 تک پہنچ گئی ہے۔
ان متاثرین میں سے 265 سکھر کے قرنطینہ اور 189 کراچی میں ہیں جبکہ اس کے علاوہ لاڑکانہ اور حیدرآباد میں سات، سات جبکہ دادو میں ایک متاثرہ شخص موجود ہے۔
،تصویر کا ذریعہGetty Images
سندھ میں کورونا کی روک تھام کے لیے بنائی گئی ٹاسک فورس کے اجلاس میں بتایا گیا ہے کہ سنیچر کو کراچی میں 25 اور حیدرآباد میں تین نئے مریض سامنے آئے ہیں۔
کراچی ملک میں وائرس کی مقامی منتقلی کا سب سے بڑا مرکز بنا ہوا ہے جہاں 189 مریضوں میں سے 130 سے زیادہ کو یہ مرض مقامی طور پر لگا ہے۔
اس وقت پنجاب کورونا سے سب سے زیادہ متاثرہ صوبہ ہے اور یہاں سنیچر کو سات مزید متاثرین سامنے آنے کے بعد کل تعداد 497 ہے۔
پنجاب کے دارالحکومت لاہور میں بھی مریضوں کی تعداد تیزی سے بڑھ رہی ہے اور سنیچر کو مزید ایک مریض کی تصدیق کے بعد یہاں کل تعداد 116 ہو چکی ہے۔
سنیچر کو اسلام آباد میں بھی مصدقہ مریضوں کی تعداد میں 12 کا اضافہ ہوا ہے اور اب وفاقی دارالحکومت میں 39 مریض ہیں جبکہ شہر کے تین علاقے سیل کیے جا چکے ہیں۔
اس کے علاوہ خیبر پختونخوا میں 180، بلوچستان میں 133، گلگت بلتستان میں 107 جبکہ پاکستان کے زیر انتظام کشمیر کے دو افراد میں کووڈ 19 کی تشخیص ہوئی ہے۔
