ආපදා මරණ ගණන 639ක් දක්වා ඉහළට

සජීවී වාර්තාකරණය

1. 28 නොවැම්බර් 2025අත්‍යවශ්‍ය දුම්රිය ගමන් වාර කිහිපයක් හැර සෙසු දුම්රිය ගමන්වාර සියල්ල අවලංගු කරයි

   අද පෙරවරු 6:00 සිට ක්‍රියාත්මක වන පරිදි අත්‍යවශ්‍ය දුම්රිය ගමන් වාර කිහිපයක් හැර සෙසු දුම්රිය ගමන්වාර සියල්ල අවලංගු කළ බව දුම්රිය දෙපාර්තමේන්තුව නිවේදනය කරනවා.

   මගී ජනතාවගේ ආරක්ෂාව වෙනුවෙන් මෙම පියවර ගත් බව දුම්රිය දෙපාර්තමේන්තුවේ මාධ්‍ය ප්‍රකාශක හසංග සමරසිංහ බීබීසී සිංහල වෙත තහවුරු කළා.

   කෙසේ වෙතත් ගාල්ල, අලුත්ගම, මීරිගම සහ හලාවත සිට කොළඹ කොටුව දක්වා දුම්රිය ගමන් වාර කිහිපයක් පමණක් ක්‍රියාත්මක වනා බව ඔහු වැඩිදුරටත් සඳහන් කළා.

2. 28 නොවැම්බර් 2025කෑගල්ල - මීපිටිය ප්‍රදේශයේ නාය යාමේ අවදානමක්: මාර්ගය තාවකාලිකව වැසේ

   කෑගල්ල - මීපිටිය ප්‍රදේශයේ නාය යාමේ අවදානමක් හේතුවෙන් එම ප්‍රදේශය තාවකාලිකව වසා දැමීමට පියවර ගත් බව ආපදා කළමනාකරණ මධ්‍යස්ථානය පවසනවා.

   "කොළඹ නුවර මාර්ගයේ 88 සහ 89 කිලෝමීටර් කණුව අසල කෑගල්ල - මීපිටිය ප්‍රදේශයේ නාය යාමේ අවදානමක් පවතිනවා. එබැවින් කොළඹ නුවර මාර්ගයේ එම ප්‍රදේශය තාවකාලිකව වසා දැමීමට පියවර ගන්නා බව දිස්ත්‍රික් සම්බන්ධීකරණ කමිටුව දන්වා සිටිනවා."

   එම මාර්ගයේ ගමන් ගන්නා පුද්ගලයින්ට විකල්ප මාර්ග භාවිත කිරීමට පියවර ගන්නා ලෙස එම මධ්‍යස්ථානය දැනුම් දෙයි.

3. 28 නොවැම්බර් 2025අද (නොවැ: 28) සිට ඉදිරි දින කිහිපයේ සුළඟ සහ වර්ෂාව ක්‍රියාත්මක වන හැටි

   මහාචාර්ය චරිත පට්ටිආරච්චි ඇතුළු කණ්ඩායම විසින් නිර්මාණය කරන ලද සුළඟ සහ වර්ෂාව පිළිබඳ අනාවැකි පළ කරන windy.com වෙබ් අඩවිය දක්වන ආකාරයට අද (නොවැ: 28) සිට දෙසැම්බර් 01 වන දා දක්වා සුළඟ සහ වර්ෂාව ක්‍රියාත්මක වන ආකාරය පහත රූපවලින් දැක්වේ.

4. 28 නොවැම්බර් 2025නුවරඑළියේ නාය යාමක සජීව දර්ශන

5. 28 නොවැම්බර් 2025කාලගුණ විද්‍යා දෙපාර්තමේන්තුවට අනුව වැඩි ම වර්ෂාපතනයක් වාර්තා වූ ප්‍රදේශ

   2025.11.27 උදෑසන 8.30 සිට 2025.11.28 උදෑසන 7.30 දක්වා කාලය තුළ වාර්තා වී ඇති වර්ෂාපතන අගයයන් අනුව දිවයිනේ ප්‍රදේශ දෙකකට මි.මී. 300 ඉක්මවා වැසි ඇද හැළී තිබේ.

   කාලගුණ විද්‍යා දෙපාර්තමේන්තුව පවසන්නේ, එම කාලය තුළ දිවයිනේ වැඩි ම වර්ෂාපතනය වවුනියාව දිස්ත්‍රික්කයේ චෙඩ්ඩිකුලම් ප්‍රදේශයෙන් වාර්තා වූ බව ය.

   එහි අගය මි.මී. 361කි.

   ඊට අමතරව, මුලතිව් දිස්ත්‍රික්කයේ අලපිල්ලි ප්‍රදේශයෙන් මි.මී. 313ක වර්ෂාපතනයක් වාර්තා වී තිබේ.

   මි.මී. 200කට වැඩි වර්ෂාපතනයක් වාර්තා වූ ප්‍රදේශ මෙසේ ය.

   චෙඩ්ඩිකුලම් (වවුනියාව) - මි.මී. 361

   අලපිල්ලි (මුලතිව්) - මි.මී. 313

   මාදම්පේ (රත්නපුර) - මි.මී. 283

   අනුරාධපුරය (අනුරාධපුරය) - මි.මී. 248.2

   මඩු (මන්නාරම) - මි.මී. 248

   ත්‍රිකුණාමලය (ත්‍රිකුණාමලය) - මි.මී. 246

   ඇහැළියගොඩ (රත්නපුර) - මි.මී. 226.5

   කටුගස්තොට (මහනුවර) - මි.මී. 225

   ලක්ෂපාන (නුවරඑළිය) - මි.මී. 222

   වවුනිකුලම් (මුලතිව්) - මි.මී. 216

   කුඩව (රත්නපුර) - මි.මී. 214

   ග්ලෙන්ටිල්ට් කර්. - මි.මී. 203

   මීට අමතරව, තවත් ප්‍රදේශ රැසකින් මි.මී. 175 ඉක්මවූ වර්ෂාපතනයක් වාර්තා වී තිබේ.

6. 28 නොවැම්බර් 2025ඉදිරි පැය 48 තුළ අත්තනගලු ඔය සහ උරුවල් ඔය නිම්නවල පහත් බිම් ප්‍රදේශවලට මහා ගං වතුර තත්ත්වයක්

   අත්තනගලු ඔය ද්‍රෝණියේ ධාරා ප්‍රදේශවල බොහෝ ස්ථානවලට මේ වන විට අධික වර්ශාපතනයක් ලැබෙමින් පවතින බව වාරිමාර්ග දෙපාර්තමේන්තුව පවසනවා.

   ඒ හේතුවෙන්, ඉදිරි පැය 48ක කාලය තුළ දිවුලපිටිය, මීරිගම, අත්තනගල්ල, මහර, ගම්පහ, මිනුවන්ගොඩ, ජා-ඇළ, කටාන සහ වත්තල ප්‍රාදේශීය ලේකම් කොට්ඨාසවලට අයත් අත්තනගලු ඔය සහ උරුවල් ඔය නිම්නවල පහත් බිම් ප්‍රදේශවලට මහා ගං වතුර තත්ත්වයක් ඇති විය හැකි බවට එම දෙපාර්තමේන්තුව අනතුරු අඟවනවා.

7. 28 නොවැම්බර් 2025ඉදිරි පැය 48 තුළ කැලණි ගංගා නිම්නයේ පහත් බිම්වලට මහා ගංවතුර තත්ත්වයක්

   කැලණි ගංගා ද්‍රෝණියේ ධාරා ප්‍රදේශවල බොහෝ ස්ථානවලට මේ වන විට අධික වර්ෂාපතනයක් ලැබෙමින් පවතින බව වාරිමාර්ග දෙපාර්තමේන්තුව පවසනවා.

   ඒ හේතුවෙන් ඉදිරි පැය 48ක කාලය තුළ ඇහැළියගොඩ, නෝර්වුඩ්, යටියන්තොට, ගලිගමුව, රුවන්වැල්ල, බුලත්කොහුපිටිය, දෙහිඕවිට, සීතාවක, දොම්පේ, පාදුක්ක, හෝමාගම, කඩුවෙල, බියගම, කොළොන්නාව, කැලණිය, වත්තල හා කොළඹ ප්‍රාදේශීය ලේකම් කොට්ඨාසවලට අයත් කැලණි ගංගා නිම්නයේ පහත් බිම්වලට මහා ගංවතුර තත්ත්වයක් ඇති විය හැකි බවට එම දෙපාර්තමේන්තුව අනතුරු අඟවනවා.

8. 28 නොවැම්බර් 2025අදත් පළාත් කිහිපයකට මි.මී. 200ට වැඩි ඉතා තද වැසි

   දිවයිනේ බොහෝ ප්‍රදේශවල අහස වලාකුළින් බරව පවතින අතර නිරන්තර වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව පවසනවා.

   උතුරු, උතුරු-මැද, මධ්‍යම, වයඹ, සබරගමුව සහ බස්නාහිර පළාත්වල ඇතැම් ස්ථානවලට මි.මී. 200ට වැඩි ඉතා තද වැසි, සහ ත්‍රිකුණාමලය, බදුල්ල, මඩකලපුව, ගාල්ල සහ මාතර දිස්ත්‍රික්කවල ඇතැම් ස්ථානවලට මි.මී. 150ට වැඩි ඉතා තද වැසි ඇති විය හැක.

   දිවයිනේ සෙසු ප්‍රදේශවල ඇතැම් ස්ථානවලට මි.මී. 75ට වැඩි තරමක තද වැසි ඇති විය හැක. දිවයිනේ බොහෝ ප්‍රදේශවල හමන පැ.කි.මී. (60-70) දක්වා වන ඉතා තද සුළං සමග විටින් විට හමන පැ.කි.මී. (80-90) දක්වා වන ප්‍රහාරාත්මක සුළං ඇතිවිය ඇති බව කාලගුණ විද්‍යා දෙපාර්තමේන්තුව පැවසුවා.

9. 28 නොවැම්බර් 2025දිට්වා මේ වන විට ස්ථානගත වී ඇත්තේ කොතැන ද? එහි ගමන් මග කුමක් ද?

   මඩකලපුව ප්‍රදේශය අශ්‍රිතව පැවති දිට්වා 'Ditwah' සුළිකුණාටුව ත්‍රිකුණාමලය සිට 50 kmක් දකුණු දෙසින්, අක්ෂාංශ 8.1°N සහ දේශාංශ 81.2°E ආසන්නයේ කේන්ද්‍රගතව වී ඇතැයි කාලගුණ විද්‍යා දෙපාර්තමේන්තුව පවසනවා.

   මෙම පද්ධතිය උතුරට බරව වයඹ දෙසට ගමන් කරනු ඇති අතර කාලගුණ විද්‍යා දෙපාර්තමේන්තුව මගින් මේ සම්බන්ධව නිකුත් කරන ඉදිරි නිවේදන පිළිබඳ අවධානය යොමුකරන ලෙස ඉල්ලා සිටිනවා.

   එම දෙපාර්තමේන්තුව සඳහන් කළේ, මෙම පද්ධතිය හේතුවෙන් දිවයිනේ පවතින තද වැසි සහ තද සුළං තත්ත්වය තවදුරටත් බලාපොරොත්තු වන බව යි.

10. 28 නොවැම්බර් 2025ගලවා ගැනීම් මෙහෙයුම් සඳහා යුද්ධ හමුදා භටයින් 20,500ක්

    දිවයිනේ බොහෝ ප්‍රදේශයන්වලට බලපා ඇති ආපදා තත්ත්වය හේතුවෙන් විපතට පත්ව ඇති ජනතාවට සහන සැලසීම, ගලවා ගැනීම් මෙහෙයුම් ක්‍රියාත්මක කිරීම සඳහා යුද්ධ හමුදාවේ 20,500කට ආසන්න භට පිරිසක් යොදවා ඇති බව යුද්ධ හමුදා මාධ්‍ය ප්‍රකාශක බ්‍රිගේඩියර් වරුණ ගමගේ පවසනවා.

    ඊයේ (නොවැ. 27) දිනයේදී මධ්‍යම කඳුකර ප්‍රදේශය ඇතුළු දිවයිනේ විවධ ස්ථානවලට බලපා තිබුණු ආපදා තත්ත්වයන්වලට කොටුවී සිටී පුද්ගලයින් 3740 දෙනකු ආරක්‍ෂිත ස්ථාන කරා යොමු කිරීමට යුද්ධ හමුදා භට පිරිස් කටයුතු කළ බව ඔහු පැවසුවා.

11. 28 නොවැම්බර් 2025පුද්ගල මරණ 56ක්: පුද්ගල අතුරුදන්වීම් 21ක්

    දිවයිනට බලපා ඇති කාලගුණ තත්ත්වය හේතුවෙන් මේ වන විට පවුල් 12,313ක පුද්ගලයින් 43,991ක් පීඩාවට පත්ව ඇති බව ආපදා කළමනාකරණ මධ්‍යස්ථානය පවසනවා.

    මේ දක්වා පුද්ගල මරණ 56ක්, පුද්ගල අතුරුදන්වීම් 21ක් සහ තුවාල ලැබූ 14 දෙනෙක් වර්තා වී තිබෙනවා.

    මේ අතර අද උදෑසන වන විට මහනුවර සහ මාතලේ දිස්ත්‍රික්කයේ ඇතැම් ස්ථානවලට මි.මී. 400 ඉක්මවා වැසි වාර්තා වී ඇති අතර ගම්මඩුව ප්‍රදේශයට වාර්තා වී ඇති වර්ෂාපතනය මි.මී. 578ක් ලෙස සටහන්ව තිබෙනවා.

    එහි කන්දේනුවර ප්‍රදේශයට මි.මී. 426ක වර්ෂාපතනයක් සහ හෙට්ටිපොළ ප්‍රදේශයට මි.මී. 248ක වර්ෂාපතනයක් ලැබී තිබෙනවා.

    මේ අතර, මහනුවර දිස්ත්‍රික්කයේ මාරස්සන ප්‍රදේශයට මි.මී. 412ක්, නිල්අඹේ මි.මීටර් 411ක්, දුන්හිඳ මි.මී. 287ක්, ගලහා මි.මී. 160ක්, හිඳගල මි.මී. 316ක්, කටුගස්තොට මි.මී. 244ක්, මැණික්දිවෙල මි.මී. 294ක වර්ෂාපතනයක් වාර්තා වී තිබෙන බව ආපදා කළමනාකරණ මධ්‍යස්ථානය පැවසුවා.

    දෝතළුව ප්‍රදේශයට මි.මී. 381ක්, කිතුල්ගලට මි.මී. 215ක් සහ කොටවැල්ල ප්‍රදේශයට මි.මී. 224ක වර්ෂාපතනයක් ලැබී තිබෙනවා.

12. 27 නොවැම්බර් 2025ගංඟා ද්‍රෝණි 6කට අධිඅවදානම් ගංවතුර අනතුරු ඇඟවීමක්

    මහවැලි ගඟ, දැදුරු ඔය, මහ ඔය, කලා ඔය, මැණික් ගඟ සහ මල්වතු ඔය යන ගංඟා ද්‍රෝණිවලට වාරිමාර්ග දෙපාර්තමේන්තුව අද (නොවැම්බර් 27) රාත්‍රියේ අධිඅවදානම් ගංවතුර අනතුරු ඇඟවීමක් නිකුත් කළා.

    අදාළ ගංඟාවන්හි ධාරා ප්‍රවේශවලට ලැවෙමින් පවතින අධික වර්ෂාපතනය හේතුවෙන් වාරිමාර්ග දෙපාර්තමේන්තුව මගින් නඩත්තු කරනු ලබන ජලමාපකවල අගයන් සලකා බැලීමේදී එම ගංඟා ද්‍රෝණි ආශ්‍රිත පහත් බිම් ප්‍රදේශවලට මහ ගංවතුර තත්ත්වයක් ඇතිවී තිබෙන අතර තවදුරටත් එම ජලමට්ටම් ඉහළ යමින් තිබෙනවා.

    එම නිසා එම ප්‍රදේශවල ගංඟාවන්ට ආසන්නව පදිංචි මහජනතාව ඒ සම්බන්ධයෙන් ඉතා දැඩි විමසිල්ලෙන් පසුවන ලෙසත් ඇතිවී ඇති අධිගංවතුර තත්ත්වයන් ගෙන් ආරක්ෂා වීමට කටයුතු කරන ලෙසත් වාරිමාර්ග දෙපාර්තමේන්තුව ඉල්ලා සිටිනවා.

    මෙම ගංඟා දෙපස පහත් බිම්වල සිටින ජනයා හැකි ඉක්මනින් ආරක්‍ෂිත ස්ථාන වෙත ඉවත්වීම වඩාත් සුදුසු බව ද වාරිමාර්ග දෙපාර්තමෙන්තුව සඳහන් කළා.

    අධිඅවදානම් ගංවතුර තර්ජනය සහිත ගංඟා ද්‍රෝණි

    1. මහවැලි ගඟ

    2. දැදුරු ඔය

    3. මහ ඔය

    4. කලා ඔය

    5. මැණික ගඟ

    6. මල්වතු ඔය

13. 27 නොවැම්බර් 2025තිස්සමහාරාම, කතරගම හා බුත්තල පහත් බිම්වල මහ ගංවතුර තත්ත්වය තවත් වැඩි විය හැකි බවට අනතුරු අඟවයි

    මැණික් ගං ද්‍රෝණියේ පිහිටි තිස්සමහාරාම, කතරගම හා බුත්තල යන ප්‍රාදේශීය ලේකම් කොට්ඨාසවලට අයත් ගං නිම්නයේ පහළ ප්‍රදේශවලට ඇති වී තිබෙන මහ ගංවතුර තත්ත්වය ඉදිරියේදී තවත් වැඩි විය හැකි බවට වාරිමාර්ග දෙපාර්තමේන්තුව අනතුරු අඟවනවා.

    එම දෙපාර්තමේන්තුව දැනුම් දෙන්නේ, මේ තත්ත්වය සම්බන්ධයෙන් දැඩි සැලකිල්ලෙන් කටයුතු කරන ලෙස ය.

14. 27 නොවැම්බර් 2025කොළඹ ඇතුළු ප්‍රදේශ 12ක පහත් බිම් ප්‍රදේශවලට සුළු ගංවතුර ඇති විය හැකි බවට අනතුරු ඇඟවීම්

    කැලණි ගඟ ද්‍රෝණියේ ඉහළ ධාරා ප්‍රදේශවලට සැලකිය යුතු වර්ෂාපතනයක් ලැබී ඇතැයි වාරිමාර්ග දෙපාර්තමේන්තුව පවසනවා.

    ඒ හේතුවෙන් ඉදිරි පැය 48ක කාලය තුළ නෝර්වුඩ්, යටියන්තොට, රුවන්වැල්ල, දැරණියගල, සීතාවක, දොම්පේ, හෝමාගම, කඩුවෙල, බියගම, කොළොන්නාව, කොළඹ සහ වත්තල යන ප්‍රාදේශීය ලේකම් කොට්ඨාසවලට අයත් කැලණි ගංගා නිම්නයේ පහත් බිම් ප්‍රදේශවලට සුළු ගංවතුර තත්වයක් ඇති විය හැකි බවට එම දෙපාර්තමේන්තුව අනතුරු අඟවනවා.

15. 27 නොවැම්බර් 2025මහවැලි ගඟ ද්‍රෝණිය ආශ්‍රිත පහත් බිම් ප්‍රදේශවලට මහ ගංවතුර තත්ත්වයක්

    මහවැලි ගඟෙහි ඉහළ ධාරා ප්‍රදේශවලට ලැබෙමින් පවතින අධික වර්ෂාපතනය සහ මහවැලි ගඟෙහි වාර්මාර්ග දෙපාර්තමේන්තුව මගින් නඩත්තු කරනු ලබන ජලමාපකවල අගයන් සලකා බැලීමේදී මහවැලි ගඟ ද්‍රෝණිය ආශ්‍රිත පහත් බිම් ප්‍රදේශවලට මහ ගංවතුර තත්ත්වයක් ඇතිවී ඇතැයි වාරිමාර්ග දෙපාර්තමේන්තුව පවසනවා.

    එම දෙපාර්තමේන්තුව සඳහන් කළේ, තවදුරටත් එම ජලමට්ටම් ඉහළ යනු ඇති බවයි.

    එම නිසා එම ප්‍රදේශවල මහවැලි ගඟට ආසන්නව පදිංචි මහජනතාව ඒ සම්බන්ධව ඉතා දැඩි විමසිල්ලෙන් පසුවන ලෙසත්, ඇතිවන මහ ගංවතුර තත්ත්වයකින් ආරක්ෂා වීමට කටයුතු කරන ලෙසත් ඉල්ලීමක් කර තිබෙනවා.

    ගංඟාව දෙපස පහත් බිම්වල වෙසෙන ජනයා හැකි ඉක්මනින් ඉන් ඉවත්වීම වඩාත් සුදුසු බව එම දෙපාර්තමේන්තුව සඳහන් කළා.

16. 27 නොවැම්බර් 2025දැදුරුඔය ජලාශයේ වාන් දොරටු 8ක් අඩි 18 බැගින් විවෘත කරයි

    දැදුරුඔය ජලාශයේ වාන් දොරටු 8ක් අඩි 18 බැගින් විවෘත කර තිබෙනවා.

    තත්පරයට ඝන අඩි 102,000 බැගින් දැදුරුඔයට ජලය නිකුත් කරන බව වාරියපොල ප්‍රාදේශීය වාරිමාර්ග ඉංජිනේරුවරයා නිවේදනය කළා.

17. 27 නොවැම්බර් 2025අත්‍යවශ්‍ය සේවා හැර අනෙකුත් සියලු ම රාජ්‍ය ආයතන හෙට නිවාඩු

    අත්‍යවශ්‍ය සේවා හැර අනෙකුත් සියලු ම රාජ්‍ය ආයතන සඳහා හෙට (නොවැ. 28) නිවාඩු දිනයක් ලෙස ප්‍රකාශයට පත් කිරීමට රජය තීරණය කර ඇති බව රාජ්‍ය පරිපාලන අමාත්‍ය මහාචාර්ය ඒ.එච්.එම්.එච්. අබයරත්න බීබීසී සිංහල වෙත පැවසුවා.

    පවතින තත්ත්වය මධ්‍යයේ මහජන ආරක්ෂාව සහතික කිරීම සහ බාධා අවම කිරීම මෙම පියවරේ අරමුණ බව අමාත්‍යවරයා වැඩිදුරටත් කියා සිටියා.

    කෙසේ වෙතත්, සෞඛ්‍ය, ආරක්ෂක සහ හදිසි ප්‍රතිචාර ඒකක ඇතුළු අත්‍යවශ්‍ය සේවා සපයන ආයතන සුපුරුදු පරිදි ක්‍රියාත්මක වන බව ඔහු පැවසුවා.

18. 27 නොවැම්බර් 2025විදුලි සැපයුම බිඳ වැටීම් 60,000ක්...බිඳ වැටීම් 30,000ක් යථා තත්ත්වයට

    රංටැඹේ සිට මහියංගනය දක්වා දිවෙන කිලෝවෝට් 132 අධි සම්ප්‍රේෂණ රැහැන් පද්ධතියේ බිඳ වැටීම හේතුවෙන් මහියංනය, අම්පාර සහ වව්නතිව් විදුලි උප පොළවල් ආශ්‍රිත විදුලි සැපයුම බිඳ වැටී ඇති බව ලංකා විදුලිබල මණ්ඩලය පවසනවා.

    ලංකා විදුලිබල මණ්ඩලයේ නියෝජ්‍ය සාමාන්‍යාධිකාරී නොයෙල් ප්‍රියන්ත බීබීසී සිංහල වෙත පැවසුවේ විදුලි සැපයුම් යථා තත්ත්වයට පත් කිරීම සඳහා කණ්ඩායම් කිහිපයක් යොදවා ඇති බවයි.

    කෙසේ වෙතත් මෙම අධි බලැති විදුලි සම්ප්‍රේෂණ රැහැන් පද්ධතිය වනාන්තර ඔස්සේ වැටී අති බැවින් විදුලි සැපයුම යථා තත්ත්වයට පත් කිරීම දුෂ්කර කටයුත්තක් වී ඇති බව ඔහු සඳහන් කළා.

    අධික වැසි සහිත කාලගුණ තත්ත්වය සමග ඇතිවූ ආපදා හේතුවෙන් විදුලි සැපයුම් බිඳ වැටීම 60,000ක් වාර්තා වී ඇති බවද ඔහු පැවසුවා.

    ඉන් බිඳ වැටීම් 30,000ක පමණ යථා තත්ත්වයට පත් කර අති බව විදුලිබල මණ්ඩලයේ නියෝජ්‍ය සාමාන්‍යාධිකාරී නොයෙල් ප්‍රියන්ත සඳහන් කළා.

19. 27 නොවැම්බර් 2025පීඩන අවපාතයක සිට සුළි කුණාටුවක් දක්වා වර්ධනය වන්නේ කෙසේ ද?

    "සුළි කුණාටු තත්ත්වයක් ඇතිවීම උදාහරණයක් ලෙස කුඩා දරුවෙකු වැඩිහිටියෙක් බවට පත්වනවාක් මෙන් අදියරෙන් අදියර සිදුවන ක්‍රියාවලියක්. සුළි කුණාටු තත්ත්වය එක පාර ම ඇතිවෙන්නේ නැහැ. ඒ තත්ත්වයට එන්නේ අදියරෙන් අදියරට. මුලින් ම කැළඹිලි සහගත තත්ත්වයක්, අඩුපීඩන කලාපයක් ඊට පස්සේ පීඩන අවපාතයකට එන්නේ. ඊට පස්සේ සුළි කුණාටුවට පස්සේ සුපිරි සුළි කුණාටුවක් දක්වා වර්ධනය වෙන්නේ. මෙතනදී වටේ තියෙන සුළගේ වේගය අනුව ක්‍රම ක්‍රමයෙන් ඒ තත්ත්වය වර්ධනය වෙනවා."

    අනූෂා වර්ණසූරිය - කාලගුණ විද්‍යා දෙපාර්තමේන්තුවේ අතිරේක අධ්‍යක්ෂ ජනරාල්

20. 27 නොවැම්බර් 2025පුද්ගල මරණ 40ක් සහ අතුරුදන්වීම් 21ක්

    පවතින අධික වැසි සහිත කාලගුණ තත්ත්වය හේතුවෙන් අද සවස වන විට පුද්ගල මරණ 40ක් සහ අතුරුදන්වීම් 21ක් වාර්තා වී ඇති බව ආපදා කළමනාකරණ මධ්‍යස්ථානයේ අධ්‍යක්ෂක ජනරාල්, මේජර් ජෙනරාල් (විශ්‍රාමික) සම්පත් කොටුවේගොඩ පවසනවා.

    බීබීසී සිංහල වෙත අදහස් දක්වමින් ඔහු වැඩිදුරටත් සඳහන් කර සිටියේ වැසි සහිත කාලගුණික තත්ත්වය හේතුවෙන් සිදුව ඇති මරණ සහ පුද්ගල අතුරුදන්වීම් සංඛ්‍යාවන් වෙනස්විය හැකි බවයි.

    මේ අතර, අධික වර්ෂාව සමග ඇති වූ ගංවතුර සහ නාය යාම් ඇතුළු හදිසි ආපදා තත්ත්වය හේතුවෙන් මිය ගිය එක් අයෙකු වෙනුවෙන් රුපියල් ලක්ෂ 10 බැගින් ලබා දීමට ජනාධිපති අනුර කුමාර දිසානායක ජනාධිපති අරමුදලට උපදෙස් ලබා දී තිබෙනවා.

    ඒ අනුව, මිය ගිය අයගේ ඥාතීන් වෙත මෙම මුදල් කඩිනමින් ලබා දීමට ජනාධිපති අරමුදල සැලසුම් කර තිබෙනවා.