ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
මෙරටට බලපෑ ආපදා හේතුවෙන් ජීවිතක්ෂයට පත්වූ පුද්ගලයින් සංඛ්යාව 639ක් දක්වා ඉහළ ගොස් ඇති අතර අතුරුදන් පුද්ගලයින් සංඛ්යාව 203ක් බව ආපදා කළමනාකරණ මධ්යස්ථානය පැවසුවා.
2024/2025 තක්සේරු වර්ෂය සඳහා අදායම් වාර්තා ගොනු කළ යුතු අවසාන දිනය නොවැම්බර් 30 වන දා වුවත් ඒ සඳහා තවත් දින 8ක් ලබා දීමට දේශීය ආදායම් දෙපාර්තමේන්තුව නිවේදනය කරනවා.
ඒ අනුව, එම වාර්තා ගොනු කිරීමට දෙසැම්බර් 8 වන දක්වා අවස්ථාව ලබා දී තිබෙනවා.
ඉදිරි පැය 24ක කාලය තුළ කැලණි ගංගා නිම්නයේ පහත් බිම් ප්රදේශවලට මෑත ඉතිහාසයේ ඇති නොවුණු මට්ටමේ අධිඅවදානම් ගං වතුර තත්ත්වයක් ඇති විය හැකි බවට වාරිමාර්ග දෙපාර්තමේන්තුව අනතුරු අඟවනවා.
මෙම තත්ත්වයෙන් ජීවිත ආරක්ෂා කර ගැනීම සඳහා දැඩි සැලකිල්ලෙන් යුතුව කටයුතු කරන ලෙසත් හැකි උපරිම ආරක්ෂිත ස්ථානයක් කරා හැකි ඉක්මනින් ළඟා වන ලෙසටත් එම දෙපාර්තමේන්තුව මහ ජනතාවගෙන් ඉල්ලා සිටිනවා.
දිවයින පුරා පවතින අධික වැසි සහිත කාලගුණ තත්ත්වය නිසා දිවයිනේ බොහෝ ප්රදේශවල විදුලි සැපයුම ඇනහිට තිබෙනවා.
බලශක්ති අමාත්ය කුමාර ජයකොඩි පවසන්නේ, අද උදෑසන විට විට විදුලි සැපයුම බිඳ වැටීම් 65000ක් වාර්තා වී ඇති බවයි.
“විශේෂයෙන්ම මේ තත්ත්වයට හේතු වී ඇත්තේ ගස් කඩා වැටීම්, කනු කඩා වැටීම්. ඒ වගේ අනතුරු ගොඩක් සිදුවෙමින් පවතිනවා.අද උදෑසන විට විදුලි බිඳ වැටීම් 65,000කට අධික ප්රමාණයක් වාර්තා වෙලා තියෙනවා.ඒකෙන් දැන් 26,000කට ආසන්න ප්රමාණයක් මේ වන විට යථා තත්ත්වයට පත් කරලා තියෙනවා.”
“විශේෂයෙන්ම සියලුම බලාගාර ආශ්රිත ජලාශ බහුතරයක් වාන් දමමින් පවතිනවා . අපි ඒවා හැම දෙයක්ම පාලනය කරගන්න අවශ්ය කටයුතු කරගෙන යනවා.”
“වැඩි වැඩියෙන් අවශ්ය කාර්ය මණ්ඩලය යොදවමින් කාර්යක්ෂමව මේ සියලු බිඳ වැටීම් යථා තත්ත්වයට පත් කිරීමට අවශ්ය කටයුතු, ලංකා විදුලි මණ්ඩලයේ පාලනාධිකාරිය වගේම සියලුම සේවකයන්ගේ මැදිහත් වීම් මත සිදුවීම් පවතිනවා.”
“කෙසේ වෙතත්, මේ බිඳ වැටීම් යථා තත්ත්වයට පත් කිරීමටත් මේ කාලගුණ තත්ත්වයම බලපෑම් එල්ල කරමින් තිබෙනවා.දැඩි සුළඟ සහ වර්ෂාව නිසා ගස් ඉවත් කර ගැනීමට අවශ්ය කටයුතු ද යම් මට්ටමකට ප්රමාද වෙමින් පැවතියත් අපගේ උපරිම සේවාව ජනතාව වෙත ලබාදීමට කටයුතු කරමින් පවතිනවා.” යැයි බලශක්ති අමාත්ය කුමාර ජයකොඩි සඳහන් කළා.
"පාන්දර එකට එකහමාරට වගේ තමයි අප්පච්චි කතා කරලා කිව්වේ. මිනිස්සු නිදාගෙන ඉන්න අතරේ තමයි නාය ගිහින් තියෙන්නේ. දැන් පවුල් කීපයක මිනිස්සු අපේ ගෙදර තමයි එකතු වෙලා ඉන්නේ.
නාය ගිහින් තියන්නේ දැනට මාස කීපයකට කලින් සීටීබී බස් එකක් පෙරළුණු කන්ද. එතනින් පහළට ගියා ම තමයි රම්බොඩ ගම තියෙන්නේ. ඒ කන්ද තමයි ගම යට කරගෙන නාය ගිහින් තියෙන්නේ.
නුවරඑළිය පාරත් එක්ක ම නාය ගිහි තියෙනවා කියලා තමයි පණිවිඩය ආවේ. දැන් ටිකකට කලින් ගෑනු කෙනෙක්ගේ මළ සිරුරක් හම්බෙලා තිබුණා.
දැනට ඒ පැත්තේ අය කියන්නේ 10ක් 15ක්වත් ජීවිත හානි සිදු වෙලා ඇති කියලා තමයි කියන්නේ.
සමහර ගෙවල් තිබුණු තැනක්වත් හොයාගන්න බෑ.
නාය ගිය එක ගෙදරක ගෑනු ළමයි දෙන්නෙක් හිරවෙලා තියෙනවා. එයාලාව බේරාගන්නවත් කිසි දෙයක් කරන්න විදිහක් නෑ. මොකද වුණේ කියලවත් දැනගන්න විදිහක් නෑ.
ගෙදර තුන් දෙනෙක් බේරිලා ඇවිලා තිබුණා, මාස දෙක තුනක පොඩි බබෙක් ඉඳලා තිබුණා. ඒ බබා මැරිලා කියලා තමයි දැනගන්න ලැබිලා තියෙන්නේ. රෝහලකටවත් අරන් යන්න විදිහක් නෑ කියලා ගෙදරින් කිව්වා. පාරවල් ඔක්කොම නාය ගිහින් කිසිම පැත්තකට යන්න විදිහක් නෑ, අපේ ගෙදර තමයි ඔක්කොම හිරවෙලා ඉන්නේ. බේරගන්න එන අයවත් කවුරුත් තාම ඒ පැත්තට ඇවිල්ලා නෑ.
දූපතක් වගේ තැනක පවුල් දෙකක් හිරවෙලා ඉන්නවලු ඒ අයටත් කොයි පැත්තටවත් යන්න විදිහක් නෑ. එයාලව බේරගන්න යන්න විදිහක් නෑ කියලා තමයි දැනට ගෙදරින් දැනගන්න ලැබුණේ."
- යොහාන් මාලක - රම්බොඩ පදිංචි, කොළඹ පෞද්ගලික රැකියාවක නිරත වන තරුණයෙක්
ආපදා තත්ත්වය සම්බන්ධයෙන් ආරක්ෂක අමාත්යංශයේ අද පැවැත්වූ මාධ්ය හමුවේදී අතිරේක ආරක්ෂක ලේකම්වරයෙකු පහත කරුණු ඉදිරිපත් කළා.
"ආපදා කාලපරිච්ඡේදය ආරම්භ වෙන්නේ මේ මාසයේ 21 සිට මේ විශේෂ ආපදා කාලපරිච්ඡේදය සටහන් තබනවා. දිස්ත්රික්ක 25ක, ප්රාදේශීය ලේකම් කොට්ඨාස 285ක පවුල් 44,191ක පුද්ගලයින් 148,603ක් බලපෑමට ලක්ව තිබෙනවා. සුරක්ෂිත මධ්යස්ථාන 195කට පවුල් 5,024ක් ළඟා වෙලා තියෙනවා. පැමිණි සංඛ්යාව 14,766යි.
සුරක්ෂිත මධ්යස්ථාන වෙත පැමිණි ජනතාවට අපි ආහාර වේල් තුනක් ලබා දීමට කටයුතු කරනවා. ගැබිණි මව්වරුන්ට, කිරිදෙන මව්වරුන්ට සහ ළදරුවන්ට අපි කිරි වේල් දෙකක් ලබා දෙනවා. අනෙකුත් වැඩිහිටියන්ට අපි තේ වේල් දෙකක් ලබා දෙනවා.
මේ සුරක්ෂිත මධ්යස්ථානවලට එන්න බැරි, කොටු වෙලා ඉන්න අයටත් අපේ චක්රලේඛ අනුව කන්න දෙන්න පුළුවන්. ඕනෙ ම කෙනෙක්ට තමන්ගේ ජීවනෝපාය කරගන්න බැරිවුණා ම මේ චක්රලේඛවලින් අපි උපදෙස් දීලා තියෙනවා පිසූ ආහාර ලබා දෙන්න, පිසූ ආහාර දෙන්න බැරි තැන්වල අපි වියළි ආහාර ලබා දෙන්න කියලා.
සෞඛ්යසම්පන්නව කටයුතු කිරීමට එක් පුද්ගලයෙක් වෙනුවෙන් රු. 100ක් දැනට වෙන් කරලා තියෙනවා. අපට ජනාධිපතිතුමා උපදෙස් දුන්නා අවශ්යතාවය පරිදි, මේ මුදල් නොසලකා වැඩි ප්රමාණයක් වුණත් දිස්ත්රික් සම්බන්ධීකරණ කමිටුවේ තීරණයක් අරගෙන, ඕනෑ ම චක්රලේඛයකට එහා යන වියදමක් වුණත් කරන්න කියලා.
විනාශයට පත්වෙන එක නිවසක් වෙනුවෙන් රු. ලක්ෂ 25ක් වෙන් කරනවා. පූර්ණ වශයෙන් හානි වූ නිවාස 42ට ලක්ෂ 25 බැගින් දෙනවා. අර්ධ වශයෙන් හානි වූ නිවාසවලට ඒ හානි ප්රතිපූර්ණය කරනවා. "
මේ වන විට ශ්රී ලංකාවට ළඟාවී ඇති ඉන්දීය නාවික හමුදාවට අයත් යුද නෞකාවේ ඇති ගුවන් යානා, ආපදා තත්ත්වයට මුහුණ දී ඇති ජනතාව ගලවා ගැනීම සඳහා යොදා ගැනීමට ඇති හැකියාව පිළිබඳව ශ්රී ලංකාවේ ඉන්දීය මහ කොමසරිස්වරයා සමග සාකච්ඡා කරමින් තිබෙන බව ආරක්ෂක ලේකම් විශ්රාමික එයාර් වයිස් මාර්ෂල් සම්පත් තුයියකොන්තා පවසනවා.
ඔහු මේ බව පැවසුවේ අද දිනයේ මෙම විශේෂ ආපදා තත්ත්වය සම්බන්ධයෙන් ආරක්ෂක අමාත්යංශයේ පැවති මාධ්ය හමුවක අදහස් දක්වමින්.
ආරක්ෂක ලේකම්වරයා කියා සිටියේ පවතින අයහපත් කාලගුණ තත්ත්වය හේතුවෙන් ඉන්දීය යුද නෞකාවේ ඇති ගුවන් යානාවල ගුවන් නියමුවන් ද කොළඹ සිට එම ගුවන් යානා ගුවන්ගත කිරීමේ අපහසුතාවයකට මුහුණ දී ඇති බවයි.
අද සවස මෙරට සිටින සියලුම විදෙස් තානාපතිවරු සහ මහ කොමසාරිස්වරුන් සමග විශේෂ සාකච්ඡාවක් පැවැත්වීමට නියමිත බව ආරක්ෂක ලේකම්වරයා කියා සිටියා.
2016 වසරේ ඇතිවූ ගං වතුර තත්ත්වයට වඩා වැඩි ගං වතුර තත්ත්වයක් හෙට (නොවැ. 29) රාත්රියේ කොළඹට ඇතිවිය හැකි බව වාරිමාර්ග දෙපාර්තමේන්තුවේ අධ්යක්ෂ ජනරාල් අජිත් ගුණසේකර පවසනවා.
ඔහු මේ බව සඳහන් කළේ, රට තුළ පවතින ආපදා තත්ත්වය පිළිබඳව දැනුවත් කිරීම සඳහා අද පැවති විශේෂ මාධ්ය හමුවකදී ය.
"කැලණි ගඟ ගත්තොත්, අවිස්සාවේල්ලේ තියෙන ජල මාපකයේ ප්රමාණය අනුව 2016 ගං වතුරට වඩා වැඩි ප්රමාණයක ගංවතුරක් කොළඹට හෙට රාත්රියේ හෝ ඒ ආසන්න කාලයේදී ඇති වේවි කියලා බලාපොරොත්තු වෙනවා. කොළඹ පදිංචි අයගේ අධ්යාපන සහතික, වාහන ඒ වගේ අයින් කර ගන්න පුළුවන් දේවල්වත් ඉවත් කර ගන්න එක හොඳයි."
අනුරාධපුර, අවුකන ප්රදේශයේ පොල් ගසක් මත රැඳී සිටි පුද්ගලයෙකු සහ මනම්පිටිය පාලමේ සිරවී සිටි පුද්ගලයින් හය දෙනෙක් ගුවන් මගින් සාර්ථකව ගුවන් මගින් ඊයේ සවස මුදා ගනු ලැබූහ.
ඒ, හිඟුරක්ගොඩ ශ්රී ලංකා ගුවන් හමුදා කඳවුරේ බෙල් 212 හෙලිකොප්ටර් යානයක් යොදා ගනිමිනි.
මා පාසල් මිතුරියක වට්ස්ඇප් සමුහයක මෙසේ ලියා තිබුණි.
"අපේ ගෙදර නාය ගිහින්. අම්මයි අප්පච්චි විතරයි ගෙදර හිටියේ. එයාලාට කරදරයක් නෑ. ඊට පස්සේ එයාලා අපේ ලොකු අම්මලාගේ ගෙදර ගිහින්. එහෙත් පාන්දර වතුරට යට වෙලා. දැන් එතන කන්දේ ගෙදරකට ගියා කිව්වා. මොනවා උනාද දන්නේ නෑ. Contact කරගන්න විදිහක් නෑ... ගමම වතුරෙන් යට වෙලා..."
"අපේ කර උඩින් යන්න වතුර, කොහේටවත් යන්න බැරුව කොටු වෙලා ඉන්නේ, අපිව බේරගන්න කවුරුහරි, ගම්පොළ ප්රදේශයේ ප්රදේශවාසියෙකු විසින් එලෙස තමන් ජලයෙන් යටවෙමින් සිටින මොහොතක සමාජ මාධ්ය වෙත වීඩියෝවක් නිකුත් කොට තිබුණි.
බේරාගැනීම සඳහා වන අසීමිත ඉල්ලිම් වලින් සහ දුරකථන සහ විදුලි බිඳ වැට්ම් හමුවේ තම සමීපතමයින් හා කිසිදු අයුරකින් සම්බන්ධ වීමට නොහැකි වීමෙන් ඔවුන් සහ සම්බන්ධ වීමට සහාය පතමින් පළ කරන ලද දහසක් සමාජ මාධ්ය පොස්ටු හා වට්සැප් පණිවිඩ වලින් රාත්රීය ගෙවා දැමීමට අප සියල්ලන්ටම සිදුවිය.
අඳුර සමඟ වු නොනවතින තද සුළං සහිත වැසි තත්ත්වය රාත්රිය පුරා බිඳකඳු අඩු නොවුණු අතර, ආපදා කලාපයක් ලෙස නම් කර ඇති මහනුවර වෙසෙන මාගේ පවුලේ ඥාතීන්, පාසල් මිතුරන්, විශ්වවිද්යාල සඟයින් සහ මා ජිවිත කාලයෙන් හතරෙන් පංගුවක් ඇසුරු කළ බොහෝ දෙනෙකු පවතින ආපදා තත්ත්වයේ ගොදුරක් විය හැකි බව දැනීමෙන් හටගත් හැඟීම හමුවේ ඇමතිය යුත්තේ කාටද කොහෙටද කොහොමද යන්න පවා දුෂ්කර කටයුත්තක් විය.
සිය ආදරණියන් පිළිබඳ තොරතුරක් නැතුව සොවින් තැවෙන නිමක් නොවෙන හිතාදරයින්ගේ දුරකථන ඇමතුම් මැද ඒ සියල්ල දරා ගැනිමට මට මිනිත්තුවක් ගත විය. ඒ අතර ම රාත්රීය පුරා අප බීබීසී සිංහල කණ්ඩායම නිදිවර්ජිතව අපගේ ප්රාදේශීය වාර්තාකරුවන්, බලධාරීන්, වෛද්ය කණ්ඩායම් වල සහය පතමින් අප වෙත ලැබෙන දහසකුත් තොරතුරු තහවුරු කරගනිමින් එක පිට එක ලැබෙන අතිසංවේදී දර්ශන හමුවේ කම්පනයට පත් වී සිටි බව ඉඳුරාම ප්රත්යක්ෂ වෙමින් තිබිණි. අනතුරු ඇඟවීමේ නිවේදන අධි අවදානම් ත්ත්වයට යාවත්කාලීන වෙමින් තිබු අතර, එය අප කණ්ඩායමට විවේක ගැනීමට කිසිදු ඉඩක් තැබුවේ නැත.
මහජනතාවට ඉවත්වීමෙ නිවේදන දිගින් දිගට ම ලබා දෙමින් තිබුණි.
පැය කිහිපයක තාවකාලික විවේකයක් ගැනීම සඳහා අප විසින් යෝජනා කොට ගත්ත ද අප සියලුදෙනාගේ වට්ස්ඇප් සමුහ පිරි ඉතිරි යන මොහොතක ඒ ගැන නොසිතා සිටිමට නොහැකිවිය. ඒ අතර මුළු රාත්රිය පුරා සිදු වූ බිඳ වැටීම් හේතුවෙන් විදුලිය නොමැතිව රැය පහන් කිරීමට අප බොහෝ දෙනෙකුට සිදුවිය.
රාත්රීය පුරා අපිට ලැබුණු වීඩියෝ දර්ශන, සමාජ මාධ්ය දර්ශන, දකින්නට සහ ඇසුණු දහසකුත් සිදුවිම්, ජනතා ඉල්ලීම් සහ ආපදා තත්ත්වයන් සැළකු විට නිල වශයෙන් වාර්තා විය හැකි ප්රමාණය ඉක්මවා කිසි සේත්ම ළගා විය නොහැකි ආපදා ස්ථාන සහ වාර්තා නොවිය හැකි ආපදා තත්ත්වයන් තිබිය හැකි බව අප නිගමනයයි.
මේ වනවිට වාර්තාකරුවන්ට බොහෝ ස්ථාන වෙත ළඟා වීමට හෝ තොරතුරු තහවුරු කර ගැනීමට නොහැකිව තිබේ. නැත්නම් ඔවුන්ට ඒවා වෙත ළඟා වීම ආරක්ෂිත තත්වයක නොපවතියි.
මුදා ගැනීමේ මෙහෙයුම් ඇතැම් තැන් වල අපහසු කටයුත්තක් ව තිබේ. මා කාර්යාලයට පැමිණි මොහොතේ වෙනදාට සුබ උදෑසනක් යනුවෙන් මුව පිරි සිනහවකින් පිළිගන්නා අප පිළිගැනීමේ නිලධාරිනිය අද මා බඳා වැළඳ ගත්තේ කදුළු පිරි දෙනෙතිනි. "අමමයි අප්පච්චිගෙනුයි කිසිම තොරතුරක් නෑ ඊයේ හවස ඉඳන්, ඒ දෙන්නා ඉන්නේ තනියම, මට හරි බයයි, ඒ පැත්තේම වතර දාලා, ඔයක් තියෙනවා ළඟ" මේ මොහොතේ බොහෝ දෙනෙකු පසුවන්නේ එවන් දෙගිඩියාවකිනි.
පොළොන්නරුව දිස්ත්රික්කයට බලපා තිබෙන අධික වැසි තත්ත්වය හමුවේ පොළොන්නරුව කදුරුවෙල ගම්මානයක් මේ වන විටත් ජලයෙන් යට වී පවතිනවා. ප්රදේශවාසීන් ප්රකාශ කළේ, දහසක් පමණ ඉන් බලපෑමට ලක්ව සිටින බවයි.
ඔවුන් චෝදනා කරන්නේ මේ වන විටවත් ඔවුන්ගේ "සැපදුක්" සොයා බැලීමට කිසිදු රජයේ නිලධාරියෙකු ඊයේ දින සිට නොපැමිණි බවයි. ප්රදේශවාසීන් අතර උණුසුම් වචන හුවමාරුවක් ද ඒ මොහොතේ ඇති වුණා.
"ඉස්සර නම් බෝට්ටු එනවා, හමුදා කට්ටිය එනවා, දැන් අද කවුරුවත් නැහැ. පොලිසියත් නැහැ. අද ග්රාමසේවක මහත්තයා විතරයි. බලන්නකෝ දුක් විඳින හැටි," එක් ප්රදේශවැසියෙක් පැවසුවා.
තවත් ප්රදේශවාසියෙක් ඊට විරුද්ධ වෙමින් සඳහන් කළේ, "පට්ට බොරුවක්," යනුවෙනි. "මෙතන අපි ජේ.වී.පී. වත් මොන පක්ෂයක්වත් නෙවෙයි. ජනාධිපතිතුමා ඊයේ හොඳට ම පැහැදිලි කරලා කියලා තියෙන්නේ, ලංකාව වටේ ම වතුරෙන් යට වෙලා තියෙන තැන්වලට සල්ලි පාස් කරනවා කියලා. ඒ වෙලාවේ ම ඇවිල්ලා සල්ලි දෙන්න බැහැනේ," තවත් ප්රදේශවාසියෙක් පැවසුවා.
ඊට විරුද්ධ අදහසක් පළ කරමින් තවත් ප්රදේශවාසියෙක් ප්රකාශ කළේ, "ඊයේ ඉඳලා මිනිස්සු අනාථ වෙලා ඉන්නවා. අද තමයි පාන් භාගයක් දීලා තියෙන්නේ. මෙතුමා කවුද කියන්න! අර සභාපති මහත්තයයි, පල්ලියේ සභාපතියි, ග්රාමසේවක මහත්තයි තුන් දෙනා හැර කවුරුවත් නැහැ," යනුවෙනි.
මල්වතු ඔය පිටාර ගැලීම හේතුවෙන් මේ වන විට අනුරාධපුර බන්ධනාගාරය ජලයෙන් යට වී ඇති හෙයින්, එම රැඳවියන් ආරක්ෂිත ස්ථාන කරා යොමු කිරීමට බන්ධනාගාර අධිකාරිය මේ වන විට පියවර ගනිමින් සිටී.
දක්ෂිණ අධිවේගී මාර්ගයේ ගැලනිගම සහ කහතුඩුව පිවිසුම් අතර ගමනාගමනය එක් මංතීරුවකට පමණක් සීමා කර කරයි.
බීබීසී සිංහල කළ විමසීමකදී මාර්ග සංවර්ධන අධිකාරිය මේ බව සඳහන් කළා.
අනුරාධපුර - පුත්තලම මාර්ගයේ කලා ඔය පාලම මත මගී බස් රථයක් සිරවී ඇති අතර එහි සිටින මගීන් මුදා ගැනීම සඳහා මේ වන විට මෙහෙයුම් ක්රියාත්මක කර තිබෙනවා.
එම බස් රථයේ පුද්ගලයින් 60 දෙනෙකු පමණ සිටින අතර මේ වන විට නාවික හමුදාව, ගුවන් හමුදාව සහ පොලිසිය එක්ව එම ගලවා ගැනීමේ මෙහෙයුම් ක්රියාත්මක කර ඇති බව සඳහන්. පවතින කාලගුණ තත්ත්වය මත මුදා ගැනීමේ මෙහෙයුම දැඩි අසීරුතා මධ්යයේ ක්රියාත්මක බව වාර්තා වෙනවා.
මේ අතර, එම බස් රථයේ සිරවී සිටින ජනතාව මුදා ගැනීමට ගුවන් හමුදා හෙලිකොප්ටරයක් යෙදවීමට අවසර ඉල්ලා ඇති බවත් ඊට අවශ්ය අනුමැතිය මෙතෙක් නොලැබී නැති නිසා ඒ ගැන වහා ම ක්රියාත්මක වී පියවර ගන්නා ලෙස සමගි ජන බලවේගයේ මන්ත්රී අජිත් පී.පෙරේරා පාර්ලිමේන්තුවේදී කියා සිටියා.
ඊට පිළිතුරු දෙමින් අධිකරණ අමාත්ය හර්ෂණ නානායක්කාර කියා සිටියේ අජිත් පී. පෙරේරා මන්ත්රීවරයාට ලැබී ඇති තොරතුරු නිවැරදි බවත් අදාළ බස් රථයට ගමන් නොකරන ලෙස පොලිසිය දැනුම් දී තිබියදී එය නොසලකා බස් රථය ඉදිරියට ධාවනය කර ඇති බවයි.
බස් රථයේ මගීන් 60 දෙනෙක් පමණ සිටින බවත් ගලවා ගැනීමේ මෙහෙයුම් සඳහා හමුදා ඛණ්ඩ දෙකක් ද යොමු කර ඇති බව අමාත්ය හර්ෂණ නානායක්කාර පාර්ලිමේන්තුවේදී කියා සිටියා.
"මේ වෙනකොට අපේ ගෙදර යට වෙන්න පටන් අරන් තියෙන්නේ. ඊයේ රෑ වතුර දාන්න පටන් ගත්තා. අපේ වී ගබඩාව යට වෙන්න තරම් කවදාවත් වතුර ඇවිල්ලා නෑ. නමුත් මේ සැරේ ගබඩාවටත් වතුර දාලා තියෙන්නේ. රෑ අපට යන්න තැනකුත් නෑ. අම්මලා ගෙවල් දාලා යන්න බෑ කියනවා. නමුත් අපි උදේ ආරක්ෂිත ස්ථානයකට ගියා."
- ඩිලානි පලිහක්කාර - කොනිත්ත, ඇඳගල, ගල්නෑව