وروستی, د غزې شمال کې بمباري 'په دومره کچه ده چې مخکې مو نه ده لیدلې', رشدي ابوالعوف-غزې له خان یونس راپور راکوي
د عکس سرچینه، Getty Images
د غزې د تړانګې په شمال کې دومره لویه بمباري وه چې مخکې مو نه وه لیدلې.
لویې لمبې او لوګي اسمان ته پورته کېدل - داسې برېښي چې دوی بېلابېل ډوله بمونه غوروي.
دلته په روغتون کې د امبولانس چلوونکو راته وویل چې دوی نشي کولی له هېچا سره اړیکه ونیسي، نو دوی یوازې د چاودنو په لور روان وو.
هر ځای وېره ده، حتی دلته په خان یونس کې، چېرې چې بمبارۍ لږې وې، ځکه چې خلک هڅه کوي چې نورو سیمو ته د کورنۍ غړو ته ورشي ترڅو وګوري چې دوی خوندي دي، مګر تیلیفونونه قطع شوي دي.
دا په بشپړه توګه ګډوډي ده.
د اسرائیلو هوايي ځواک ویلي چې تېره شپه یې پر غزه بمبارۍ کې ۱۰۰ جنګي الوتکو برخه اخیستې ده.
دوی وايي ظاهرا یې د حماس له منځه وړل هدف دي.
