خلیلزاد: افغان دولت او طالبان دې ژر یوې سیاسې هوکړې ته ورسېږي
د عکس سرچینه، Reuters
د افغانستان د سولې پروسې لپاره د امریکا د بهرنیو چارو وزارت ځانګړی استازی زلمی خلیلزاد وايي د افغانستان "اسلامي جمهوریت او طالبان باید د خپلو خلکو د غوښتنو درناوی وکړي او هر څومره ژر چې شونی وي، یوه سیاسي توافق ته ورسیږي".
خلیلزاد غزني کې په یوه چاودنه کې د ۱۵ ماشومانو وژنه او د ۲۰ نورو ټپي کېدو ته په اشارې پر خپل ټویټر کې لیکلي چې "د ملکيانو په ګډون، د افغانانو وژنه او مړینه ډېره عامه شوې ده" او دوی د تاتریخوالي روانه "لوړه کچه" او د دغه تاوتریخوالي عاملین غندي.
خلیلزاد زیاته کړې "په ډیرو افغانانو کې چې سولې او امنیت ته اړتیا او هیله لري، بین الافغاني جګړې او وژنو مشروعیت بایللی دی".
د امریکا ځانګړي استازي د افغانستان د جګړې پر ټولو ښکیلو خواو غږ کړی چې "اور کم کړي او په چټکۍ اوربند وکړي".
د افغانستان د سولې بین الافغاني مذاکرات شاوخوا څلور میاشتې مخکې دوحه کې پيل شول.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د افغانستان د دولت او طالبانو مرکچي پلاوو د اوږدو خبرو او ناستو پایله کې د بین الافغاني مذاکراتو پر کړنلاره او کاري اصولو تر هوکړې او د خبرو د اېجنډا د لیستونو تر تبادلې وروسته د مرغومې/جدي تر ۱۶مې دمه اخیستې ده.
دواړو خواو ویلي دا دمه مشرانو سره د هغو موضوعاتو په اړه د سلا مشورو لپاره شوې چې اجنډا کې یې د شاملېدو غوښتنه شوې ده.
د افغانستان د دولت پلاوی تر دې دمې وروسته کابل ته راستون شوی او د طالبانو د قطر دفتر د مشر ملاعبدالغني برادر په مشرۍ یو پلاوی پاکستان ته تللی دی.
ویل کېږي د طالبانو پلاوی اسلام اباد کې د پاکستان له لومړي وزیر عمران خان او نورو چارواکو سره د افغانستان د سولې په پروسه او نورو موضوعاتو غږېدلی او د دولت پلاوي تېره ورځ ارګ کې له ولسمشر محمد اشرف غني او د مصالحې عالي شورا له رییس عبدالله عبدالله سره ولیدل.
ښاغلي غني د دولت د پلاوي غړو ته په دې ناسته کې سپارښتنه وکړه چې د مذاکراتو د لومړي پړاو مالومات له خلکو سره شریک او د راتلونکي پړاو په اړه ورسره مشوره وکړي.
