کابل کې د افغان لیکوال کورنۍ غړو وژنې ته غبرګونونه
د عکس سرچینه، Social Media
د افغان لیکوال او شاعر اسدالله ولوالجي د کورنۍ څلورو غړو وژل کېدو ته افغانستان کې له خواشینۍ او غوسې ډک غبرګونونه څرګند شوي دي.
د افغانستان ولسمشرۍ ماڼۍ له لوري په یوه خپره شوې اعلامیه کې د ولسمشر محمد اشرف غني له قوله دغه وژنه 'له اسلامي او بشري ارزښتونو سره جنایت ' بلل شوی او له امنیتي ځواکونو غوښتل شوي، چې د پېښې ارزونه وکړي او معلومات راټول کړي.
پرون مازدیګر د ښاغلي ولوالجي د کورنۍ څلور غړي د یوه مقناطیسي ماین چاودنې له کبله د کابل په پغمان ولسوالۍ کې ووژل شول.
په وژل شویو کې د ښاغلي ولوالجي مېرمن، لور، وراره او مېرمن یې شامل دي.
د عکس سرچینه، Alamy
له بي بي سي سره خبرو کې ښاغلي ولوالجي وویل، پېښه کې یې د کورنۍ یو شمېر نور غړي ټپیان شوي دي. کابل پولیس وايي، ماین په ګاډي کې ځای پر ځای شوی و. تر اوسه د دغې چاودنې انګېزه معلومه نه ده.
د افغانستان کورنیو چارو وزارت چارواکي وايي، د پېښې معلوماتو لپاره کار کوي. تر اوسه کومې وسله والې ډلې د پېښې مسوولیت نه دی منلی.
ښاغلي ولوالجي زیاته کړه، هیڅ شخصي دښمني نه لري او نه پوهېږي ولې یې کورنۍ په نښه شوې ده.
د پېښې قربانیانو مړي د تخار ولایت رستاق ولسوالۍ په پلرنۍ هدیره کې خاورو ته سپارل شوي دي.
د عکس سرچینه، 1tv
بل لور ته په خواله رسنیو کې هم د دغې پېښې په هکله له غم او غوسې ډګ غبرګونونه څرګند شوي دي.
پغمان د کابل ولایت له هغو سیمو یوه ده، چې معمولاً د پلازمېنې اوسېدونکي له کورنیو سره د تفریح لپاره ورځي، خو له دې ولسوالۍ مخکې هم د امنیتي پېښو رپوټونه ورکړل شوي دي.
د تېرې اپریل میاشتې په لومړیو کې د افغانستان ولسمشرۍ ماڼۍ ساتندویانو څانګې یو کارکوونکی قیام الدین مقصودي هم په همدې سیمه کې وژل شوی و.
