Ndị Ebubeagu anọghị n'Oba Anambra Steeti - Onye ndu Oba

Mkpuchi Na Eme Ozugbo

1. 4 Ọgọọst 2022Chaịna atụọla ogbunigwe n’akụkụ mba Taiwan dịka Pelosi si ebe ahụ pụọ

   Dịka onyeisi ụlọomeiwu mba Amerịka bụ Nancy Pelosi si Taiwan pụọ n’ụbọchị Wenezde, Chaịna atụọla ogbunigwe n’akụkụ mba ahụ nke so n’usoro ọzụzụ ndị agha ha malitere n’ebe ahụ mgbe ozi ọbịbịa Pelosi dapụtara.

   Mba Taiwan kwuru na Chaịna tụnyere ogbunigwe 11 n’ime oke osimiri nọ na mpaghara Ugwu nakwa mpaghara ndịda mba ha.

   Mba Japan kwukwara na ise n’ime ndị ogbunigwe a tụrụ danyere n’oke osimiri nọ na mba ha ma kpọọ oku ka ya bụ ọzụzụ ndị agha Chaịna na-eme kwụsị ngwa ngwa.

   Cheta na Chaịna anabataghị ọbịbịa Pelosi na Taiwan dịka ha kwuru na ọ ga-etinye nsogbu n’okwu ha na ọchịchị Taiwan.

   Chaịna na-ahụ Taiwan ka mba si na mba ha kwewapụ nke ha nwere olileanya na ha ga-eweghara ọchịchị ya bụ mba.

   Dịka Taiwan na-ahụ onwe ya dịka mba nwererela onwe ha n’aka Chaịna kemgbe afọ 1950, Amerịka anaghị ahụ ha etu a mana ha na mba Amerịka nwere ọtụtụ mmekọrịta nke gụnyere iresi Taiwan ngwa agha ha ji echekwa onwe ha.

2. 4 Ọgọọst 2022Ọ bụ maka ọdịmma Naijirịa ka eji nye mba Nijee N1.4B - Zainab Ahmed

   Zainab Ahmed bụ Mịnịsta na-ahụ maka akụnụba Naijirịa ekwuola na ọ bụ eziokwu na ha nyere iwu ka azụtara mba Nijee repụblic ụgbọala ego ha ruru otu ijeri naira na ụma anọ maka nchekwa.

   Ọ kọwara na onyeisiala Muhammadu Buhari nwere ikike inye iwu dịka etu o siri tulee okwu ọbụla dịka onyeisiala Naijirịa.

   Ahmed kwukwara na ọbụghị ihe ọhụrụ Naijirịa ịkwado mba Nijee.

   Ọ kọwara na ọ bụ maka ọdịmma Naijirịa maka nchekwa ka ejiri nye ha ya bụ ego.

3. 4 Ọgọọst 2022Unu abọọla chi

   Daalụ dịka ị ga-esonye anyị taa maka akụkọ niile ga-amasị gị

4. 3 Ọgọọst 2022EFCC akpọpụtala aha ‘Mompha’ dịka onye a na-achọ achọ

   Ụlọọrụ na-egbuso nrụrụaka na mpụ agha na Naịjirịa bụ Ecomomic and Financia Crimes Commission (EFCC) ezịpụtala ozi ma kesaa foto nwoke aha ya bụ Ismaila Mustapha nke ọtụtụ ma dịka ‘Mompha’ ma kwuo na ha na-achọsị ya achọ n’ike n’ike.

   Mompha onye gbara afọ 38 si Oyo steeti dịka ha kwuru na ebe ikpeazụ ahụrụ ya bụ n’akụkụ Surulere Legọs steeti.

   A ma ya ama nke ukwuu na soshal midia dịka ọ na-egosi onwe ya dịka onye ọgaranya.

   EFCC anwụchịbuola ya na mbụ ma meecha tọhapụ ya.

   Ebubo nrụrụaka, ezufu ego n’ụzọ ezighi ezi nakwa mpụ nọ n’isi ya dịka EFCC siri kwuo.

   Wilson Uwujaren bụ ọnụ na-ekwuru EFCC rịọrọ ọha ka ha gbaa n’anwụ ma gwaa ndị uweojii nọ ha nso ihe ọbụla ha ma gbasara nwoke a maọbụ etu a ga-esi nwụchie ya

5. 3 Ọgọọst 2022Gọọmentị Naịjirịa adaala Trust TV nha naịra nde ise maka ihe onyonyo gosiri ndị omekome ‘Bandits’

   Ụlọọrụ na-ahụ maka usoro mgbasaozi na Naịjriịa bụ National Broadcasting Commission (NBC) adaala ụlọọrụ Trust TV nha ego nde naịra ise maka izipụta ozi ihe onyonyo nke ngalaba BBC Africa Eye mere maka ọrụ ndị omekome na Zamfara steeti.

   Ozi NBC nke onyeisi ha bụ Balarabe Shehu Illela binyere aka kwuru na nke a bụ n’ihi Trust TV dara iwu ụlọọrụ ha site n’ikesa ihe onyonyo ahụ.

   N’ozi isi ụlọọrụ a bụ Media Trust Group zipụtara, he kwuru “Dịka anyị ka na-enyocha mpụtara ihe NBC mere, anyị kwenyere na dịka ụlọọrụ ntaakụkọ na anyị ga-aga n’ihu na-agba n’ọha ihe ndị dị mkpa ka ha mata nke gụnyere ọrụ ndị omekome na-emetụta nde kwuru nde ndị mmadụ na Naịjirịa”

   Ha gara n’ihu kwuo: “Ihe onyonyo ahụ gbadoro ụkwụ n’ọgbaghara nọ n’etiti ndị bi ebe ahụ nke ibu ngwa ọgụ mụnyere ọkụ na ya ugbua. Ihe onyonyo a gbara n’anwụ etu enweghị ikpe ziri ezi, ịkpa oke agbụrụ na ọchịchị ọjọọ si akwalite tigbuo zọgbuo. Atụmatụ ihe onyonyo ahụ bụ ikpalite mmụọ ndị mmadụ ka a chọọ ụzọ gwọọ ihe na-eme be nke metụtara minista mgbasaosi bụ Alhaji Lai Mohammed na Sịnetọ Saidu Mohammed Dansadau ndị si na Zamfara Steeti”

   Ozi ha kwukwara na ya bụ ihe onyonyo natara ozi n’aka ndị ọkacha mara n’ihe gbasara nchekwa gụnyere Abubakar Saddique nke mahadum Ahmadu Bello University, Zaria na Murtala Ahmed Rufai nke mahadum Usmanu Danfodio University, Sokoto.

   Cheta na Lai Mohammed kwuru n’izu gara aga na a ga-enye BBC na Trust TV nataramahụahụ maka ya bụ ihe onyonyo.

6. 3 Ọgọọst 2022Somali ahọpụtala onye bụbu osote onyeisi otu al-Shabab dịka minista okpukperechi

   Mukhtar Robow bụbu osote onyeisi nakwa ọnụ na-ekwuru otu ndịagha nnupụisi na Somali bụ al-Shabab abụrụla minista na-ahụ maka okpukperechi na mba ahụ dịka ahọpụara ndị ọchịchị ọhụrụ.

   E jibidoburu Robow n’ime ụlọ ya ruo afọ anọ n’ọchịchị onyeisiala pụrụ apụ n’ihi okwu na ọ nọ n’isi otu ndị agha nnupụisi ahụ. Ọtụtụ eboola ya ebubo na ọ hapụbeghị ndụ ahụ.

   Ihe ruru mmadụ 20 nwụrụ dịka ọgbaghara dapụtara mgbe anwụchịrị ya.

   Robow si n’otu ahụ pụọ na 2015 ma mepee otu nke ya dịka o kwuru na echeche okpukperechi ya na otu al-Shabab anọghịzị na-adakọ.

   Cheta na n’oge gara aga, mba Amerịka depụtara aha ya dịka onye a na-achọ achọ n’okwu ịkpa nkata iyi ndụ egwu.

   Amerịka kwere nkwa inye onye ọbụla ga-agba ama maka nwụchị ya ego ruru nde dọla ise n’oge ahụ mana e mechara chịza okwu ịchọ ya n’afọ 2017.

   Otu al-Shabab na-eboso mba ahụ agha awakpoola ọtụtụ akụkụ mba ahụ nakwa mba ndị nọ ha nso ugboro ugboro.

7. 3 Ọgọọst 2022Nancy Pelosi nke mba Amerịka esila Taiwan pụọ

   Onyeisi ụlọ omeiwu mba Amerịka bụ Nancy Pelosi esila Taiwan pụọ dịka ọ gara njem nleta ebe ahụ nke na-akpata okwu na mpaghara Asia ọkachasị na Chaịna.

   Pelosi egeghị ịdọ aka na ntị Chaịna nyere maka njem a ntị dịka Chaịna kwuru na Taiwan bụ agbataobi ha ma nọrọ onwe ha kwesịrị isonye na mpaghara mba ha.

   Pelosi bụ onye ọchịchị mba Amerịka nwere agba na-aga mba ahụ n’ihe ruru afọ 25.

   Ya ndị isi ọchịchị mba ahụ zụkọrọ n’isi obodo ha bụ Taipei.

   Iji saa ọbịbịa Pelosi, ndị agha mba Chaịna malitere ọzụzụ n’osimiri dị nso ebe ahụ ruo maịlị 10 n’akụkụ Taiwan. Ha kwuru na ọzụzụ a dị mkpa ma zie ezi ọkachasị n’oge a.

   Naanị mba ole na ole na-ahụ Taiwan dịka mba kwụrụ onwe ya. Ọtụtụ na-akwụnyere ọchịchị Chaịna. Agbanyeghị na mba Amerịka enweghị njikọ gọọmentị ya na nke Taiwan mana ọ nwere iwu chọrọ ka ha nye mba ahụ ụzọ iji chebe onwe ya.

8. 3 Ọgọọst 2022Ọ bụghị n'ụlọụka Omega Power Ministry ka ọkụ gbara

   Onye ntaakụkọ BBC Igbo chọpụtara na ọ bụghị ụlọụka Omega Power Ministry dị na Pọtakọt ka ọkụ gbara kama na ọ bụ ụgbọala bu mmanụ agbidi adịgboroja.

   Akụkọ pụtara na Tuzde 02 Ọgọọstụ 2022 na-ekwu na ọkụ na-agba n'ụlọụka ahụ mana ọ bụghị eziokwu, ihe mere bụ na ọkụ ahụ gbara n'okporoụzọ a kpọrọ OPM Street.

   Anya hụrụ ka ihe si mee sị na ọkụ malitere ịgba n'okpuru ụgbọala ahụ nke mere o jiri nwuru ọkụ ma gbaa ka ogbunigwe.

   Ọkụ si n'ụgbọala ahụ banyere n'ụgbọala ọzọ a na-eji ekpofu atịtị.

   N'ime ihe niile a onweghi onye merụrụ ahụ mana ụgbọala ndị ahụ gbara ọkụ.

   Ndị uweojii wuchiri ebe ahụ ji weta nchekwa n'ogbe ahụ nakwa ibupu ụgbọala ndị a gbara ọkụ.

9. 3 Ọgọọst 2022Ụlọikpe sharia akagbuola alụmdinanwunye nwoke na nwanwa ya

   Ụlọikpe Sharịa dị na Zamfara steeti akagbuola alụmdịnanwunye otu nwoke aha ya bụ Musa Tsafena na nwanwa ya nwaanyị.

   Ọkaikpe Bashir Mahe kụsara alụmdịnanwunye a nọrọla afọ iri abụọ na atọ ma mụta ụmụ asatọ n'ihi na iwu Koran akwadoghị ya.

   Okpuruọchịchị nzụkọ Shura na Emirate mpghara ahụ gwara mmadụ abụọ a ka ha gbasaa mgbe ha chọpụtara na iwu alakụịba akwadoghị ya.

   Kama ha ekweghị nke mere ka ewepụ ya ụlọikpe sharia.

10. 3 Ọgọọst 2022A nwụchiela mmadụ isii hiwere websait nwoke maọbụ nwaanyị na-edina ibe ha

    Ndị uweojii Nassarawa anwụchiela mmadụ isii a na-eny maka ebubo imepe ọbaozi maka ndị chọ®ọ nwoke na nwoke na nwaanyị na nwanyị na-edina onwe ha.

    Ndị uweojii kwuru na ihe ha bu n’obi bụ ilata ndị mmadụ zuo ha ohi.

    Nnwuchi ahụ na-eso mkpesa nke onye ha latara chọọ ịgba ihe onyonyo ya n’anwụ ma ọ bụrụ na onyeghị ha ego.

    Ya bụ ihe mere na Masaka, n’Okpuru Ọchịchị Karu dịnso Abuja.

    Ọnụ na-ekwuru ndị uweojii steeti ahụ bụ Ramhan Nansel gwara BBC na ndị ahụ a na-enyo enyo; nwoke anọ na nwaanyị abụọ- zipụtara ozi ndị na-achọ nwoke na nwokema kpoo oku onye chọrọ ya wetara ha ozi

    Onye ma n’ọnya ha, ha egwo onye ahụ wayo nakọrọ ha ihe ha ma jiri photo ha mechie ha ọnụ.”

    Iwu Naijiria megidere nwoke na nwoke imeko maọbụ nwaanyị na nwaanyị imek dịka onye a gmara ikpe maka ebubo na-aga nga afọ 14.

11. 3 Ọgọọst 2022Ndewonụ, Igbo ndị ọma!

    Nke onye chiri, ya zere!

    Ndụ mmiri, ndụ azụ!

    Soro anyị ebe a maka akụkọ ndị ndị mkpa n'ụwa taa

12. 2 Ọgọọst 2022Asọmpị Commonwealth efunarịala ndị ọgbaọsọ mba Gambia maka okwu Visa

    Egwuregwu Commonwealth efunarịala ọgbaọsọ isii si mba Gambia dịka ha tọrọ atọ na mba Fransị maka okwu Visa.

    Ahaziela ya bụ ọkwụ Visa ahụ ugbua mana agbachaala ọsọ nke ha kwesiri isonye na ya.

    Ụmụ nwoke ọgbọsọ ndị o metụtara gụnyere Ebrima Camara, Adama Jammeh, Alieu Joof na Sengan Jobe.

    Gịna Bass nakwa Abdou Rahman Ceesay bụ ndị egwuregwu ọzọ okwu a metụtara.

    Minista egwuregwu mba Gambia bụ Bakary Badjie kwuru na ọ bụ n'abalị ụbọchị Monde ka akwụkwọ njem ahụ bụ Visa pụtara.

    Mmadụ isii ahụ nọ na Paris kemgbe otu afọ na-enwe ọzụzụ ha mana o dobeghi anya ihe mere ejighi wepụta akwụkwọ ha rue ụbọchị Monde.

13. 2 Ọgọọst 2022Ndị ojiegbe agbagbuola onyeuweojii ochie dị afọ 82 n'Imo steeti

    Ndị ojiegbe amaghị ndị ha bụ agbagbuola otu nwoke bụ bu onye ụweojii aha ya bụ Francis Onuchukwu n'Imo steeti.

    Nke a ebutela ọgbaghara dịka ndị mmadụ gbapụrụ na be ha na mpaghara Ubaha Okporo dị n'okpuruọchịchị Orlu bụ ebe ihe ahụ mere na steeti ahụ.

    Nwa ya nwoke bụ Hamilton Onuchukwu gwara BBC Igbo na ọ bụ mmadụ abụọ ji egbe nọ n'elu ọgbatumtum mere nke a.

    Ọ sị na ha gbara egbe n'obi ya nakwa ebe ọzọ n'ihe ahụ mere na mgbede ụbọchị Fraịde.

    "A hụrụ m nna m n'anya nke ukwu, ị ma na enwenwela m nsogbu mkpụrụobi kemgbe ọ nwụrụ?" bụ ihe nwa ya nwoke Hamilton bụ onye ntaakụkọ kwuru.

    O kwukwara na o kpesala ogbugbu nna ya n'aka ndị uweojii na steeti ahụ mana mgbọ niile BBC Igbo na-agba inụ n'ọnụ ndị uweojii maka okwu amitaghị mkpụrụ dịka Michael Abattam bụ ọnụ na-ekwuru ha azaghi ekwentị ya.

14. 2 Ọgọọst 2022Etu ndị ntọrị si tụba ndị ha tọọrọ n’ime olulu mmiri

    Ndị uweojii Anambra Steeti ekwuola na ndị ntọrị tọọrọ mmadụ abụọ ma tụba ha n’ọwammiri nke osimmiri Obiaja.

    Ọnụ na-ekwuru ha bụ Tochukwu Ikenga sị na a tọọrọ ndị a n’ụbọchị ụka n’okporoụzọ obodo Alor nke Idemil South dị n’Anambra Steeti.

    Ọ sị na otu n’ime ndị a tụbara n’ime ọwammiri ahụ nwụrụ anwụ ebe onye nke ọzọ merụrụ ebe ọ dị ukwuu.

    Nwoke a sị na ha bu ụgboala na-eme njem mgbe ndị ntọrị ahụ wakporo ha ma tọrọ ha n’ụzọ.

    O kwuru na ndị a bu pụta n’ụzọ n’elu akwammiri ma tụba ha n’ime mmiri ahụ.

    Ọ sị na ha dara n’elu okwute akpụrụ akpụ mana ọ nwụghị ebe onye nwoke nke ọzọ nwụrụ.

15. 2 Ọgọọst 2022Ndị ntorọbịa emeela ngagharịiwe maka Ebubeagụ n'ọwụwa anyanwụ

    Ndị ntọrọbịa na ụfọdụ ndị okenye agbakọọla n'Aba dị n'Abia steeti mee ngagharịiwe n'ụbọchị Tuusde.

    Iwe ha bụ oke ogbugbu ndị otu Ebubeagu na-egbu ndị ntọrọbịa na mpaghara ọwụwa anyanwụ.

    Ha bụ ngagharịiwe a gafee Umule, Faulk, okporoụzọ Aba-Owerre, nakwa ụzọ ndị ọzọ a ma ama n'obodo ahụ nke butere kpachi kpachi ụgbọala n'okporoụzọ ndị ahụ.

    Díka ndị mere ngagharịiwe ahụ si kwuo, oge eruola mgbe ndị Gọvanọ steeti ọwụwa anyanwụ ga-amachi ọrụ otu Ebubeagu n'ihi akụkọ oke ogbugbu na-arị ibe ya elu n'ala Igbo nke ha kwuru na aka ebubeagu dị na ya.

    Ihe ọzọ butekwara iwe ebe ha nọ bụ na ndị ha kwuru bụ ọchịehi na-atọrọ ndị mmadụ n'akụkụ Abia steeti ma na-anapụ ha nnukwu ego.

16. 2 Ọgọọst 2022PVC: 'North-West' kachasị, 'South-East' pekasịrị n'ime nde 12 debanyere aha

    Dịka ụlọọrụ na-ahazi ntuliaka bụ Inec n'ịchafụ kwụsịrị ndebanye aha maka akwụkwọ ikike ịtụ vootu, ha kwuru na ọnụọgụgụ ndị debanyere aha ha ọhụrụ dị nde iri na abụọ na ụma (12,298,944).

    Dịka ozi dị n'ọbaozi intanet Inec si kwuo, ọnụọgụgụ ndị debanyere aha ha ọhụrụ n'Ọwụwa Anyanwụ kachasị pee mpe(1,441,156), ebe Ọdịda Anyanwụ Ugwu (2,514,273).

    Saụt-saụt ji 2,458,095 eso ya, ebe Etiti Ugwu ji 2,314,368 eso ha. Ọdịọ̄a Anyanwụ( Southwest) nwere 2,039,982, ebe Ọwụwa Anyanwụ Ugwu (Northeast)1,531,070.

    E lewe ndị denyere aha na steeti na steeti, Lagọs na Kano bụ steeti kachasị denye aha.

    Legọs nwetara 585,620, Kano nwetara 569,103, ebe Delta steeti ji mmadụ 523,517.

    Steeti ndị debanyere aha ọhụrụ pekachasịrị mpe bụ Yobe nke nwetara mmadụ 152,414, na Ekiti nke nwetara 124, 844 .

    Inec mechiri ndebanye aha n'abalị 31 nke ọnwa Julai afọ 2022 ma sị na ọ bụ na-emecha ntuliaka 2023 ka ha ga-amalirte idenye aha ọzọ.

    Mana ọtụtụ ụmụ Naijiria nka na-akpọ oku ka a gbatịa ohere idenye aha maka ntuliaka.

    Cheta na Inec nọrọ nn'abalị 28 nke ọnwa Juun malitegharịa ohere idebanye aha n'ịntanet , ebe nke ana ebe ihu na ihu n'ụlọọrụ ha malitere n' abalị 26 nke ọnwa Julai afọ 2021 dịka e mechara ntuliaka 2019.

17. 2 Ọgọọst 2022Amerịka egbuola onye ya na Osama Bin Laden so kpaa nkata mwakpo 9/11

    Mba Amerịka egbuola onyeisi otu ndị agha nnupụisi nke al-Qaeda, bụ Ayman al-Zawahiri dịka ogbunigwe ụgbọelu ha tugburu ya n’Afghanistan

    E gburu ya n’isiobodo mba ahụ bụ Kabul n’ụbọchị ụka dịka otu nchekwa mba Amerịka nke CIA nọ n’ọrụ nchekwa ebe ahụ.

    Al-Zawahiri gbara afọ 71 nọchịtereanya Osama Bin Laden n’otu al-Qaeda dịka ha abụọ kpakọrọ nkata mwakpo mba Amerịka na afọ 2011.

    N’ozi onyeisiala mba Amerịka bụ Joe Biden, o kwuru:

    “Zawahari ji ogbugbu na tigbuo zogbuo nke ndị nkiki mba Amerịka meere onwe ya aha”

    “Ugbua ikpe ziri ezi abịarala ya dịka e meminala ya”

    E kwuru na Zawahiri bụ onye mba Amerịka depụtara dịka onye a na-achọsịike kemgbe nọ ezi be ya zoro ezo mgbe ogbunigwe ha tụrụ ya.

    Agbanyeghị na ya na ezinaụlọ ya nọ, enweghị onye ọzọ ya bụ ogbunigwe tụtara na abụghị ya.

    Biden kwuru na ọ bụ ya nyere ndị ọrụ nchekwa ikike ịtụ ya bụ ogbunigwe dịka otelaa ha na-akpa nkata iwakpo ya.

    O kwuru na ogbugbu ya ga-adaju obi ịnụ ọkụ dị n’ebe ndị mwakpo mba Amerịka nke afọ 2011 metụtara nọ.

18. 1 Ọgọọst 2022Ka chi fo!

    Igbo na-ekwu na-asị na "ọ bịara ije nwe ụla"

    Njem anyị na unu abịla na njedeba taa mana echezona isonye anyị echi.

    Ka chi fo!

19. 1 Ọgọọst 2022Ebugharịla asọmpị itozu nke AFCON rue 2023

    Ebugharịala asọmpị itozu maka iko mba Afrịka akwadoburu na Septemba iji nye mba ndị tozuru ịkọ mba ụwa si Afrịka ohere ịnwe ọzụzụ.

    Dịka ngalaba bọọlụ n'Afrịka bụ CAF si kọwa, a ga-agbazi asọmpị ntozu ndị ahụ n'ọnwa Maachi, Juun nakwa Sepụtemba n'afọ 2023.

    Mba Gana, Senegal, Tunisia, Moroka nakwa Cameroon ga-aga asọmpị ikombaụwa afọ 2022 na mba Qatar

20. 1 Ọgọọst 2022Ndị uweojii na Legọs agwaala ndị ọrụ ha kee nkwụcha

    Ben Hundeyin bụ ọnụ na-ekwuru ndị uweojii ekwuola na Kọmịshọna steeti ahụ agwaala ndị ọrụ ha niile kee nkwụcha.

    Ọ sị na Kọmịshọna steeti ahụ bụ Abiodun Alabi kwuru nke a dịka ya na ndị isi otu dị icheiche n'ime ndị uweojii nwere nzụkọ ahụ na Legọs n'ụbọchị Monde.

    "Ihe kachasị dị anyị mkpa ugbua bụ nchekwa ndị niile bi na Legos" ka o depụtara n'akara Twitter ya.

    Ọ dọkwara ndị bi ebe ahụ aka na ntị ha kpesara ndị uweojii ma o nwee ihe ọbụla ha hụrụ edochaghị ha anya.