Agha Ukraine: Onye enyemaka Zelensky na-ekwu na ihe ruru mmadụ 13,000 anwụọla

Mkpuchi Na Eme Ozugbo

1. 4 Nọvemba 2022Ọ bụghị eziokwu na a tụọla Hushpuppi mkpọrọ afọ 11

   Akụkọ na-efegharị na soshal midia taa bụ Fraịde, Nọvemba 4, na-ekwu na ụlọikpe mba Amerịka atụọla nwaamadi Naijiria aha ya bụ Ramon Abbas, onye e ji Hushpuppi mara, mkpọrọ afọ iri na otu.

   Mana ya bụ akụkọ abụghị eziokwu.

   BBC Pidgin kpọtụụrụ ọnụ na-ekwuru ụlọọrụ Ọkaiwu kachasị na steeti California nke mba Amerịka bụ Mrozek Thom, o wee kwuo ụlọikpe atụbeghị Hushpuppi mkpọrọ.

   Mrozek kwuru sị: "Akụkọ ahụ abụghị eziokwu. Ekpebibeghi afọ ole ọ ga-anọ na mkpọrọ, mana e tinyela ụbọchị a ga-ekpebi ihe gbasara ya. Ọ ga-abụ n'ụbọchị Mọnde na-abịanụ."

   Ụbọchị Mọnde ahụ ga-abụ abalị asaa nke ọnwa Nọvemba, 2022.

   Mana ebee ka akụkọ a na atụọla Hushpuppi mkpọrọ afọ 11 si malite?

   Akụkọ a malitere ifesa oge onye ntaakụkọ aha ya bụ Kemi Olunloyo wepụtara ya n'akara Twitter ya n'ụbọchị mbụ nke ọnwa Nọvemba.

   Ọ bụ ebe ahụ ka ya bụ akụkọ si malite ifesa, n'agbanyeghi na BBC edeela akụkọ ma kọwaa na ụlọikpe ekwubeghị kpọmkwem afọ ole Hushpuppi ga-anọ na mkpọrọ.

   Onye bụ Huspuppi?

   Ramon Abbas maọbụ Hushpuppi bụ onye a ma ama na soshal midia, ọ kachasị n'Instagram n'ihi etu o si egosi akụnụba ya.

   N'oge ahụ ndị mmadụ che na ọ bụ onye ojiegoachụego, mana ọ bụ mgbe ndị uweojii mba United Arab Emirates jichiri ya, ka o doro ndị mmadụ anya na ọ bụ ohi ịntaneetị ka nwa amadị ahụ na-ezu.

   E jidere Hushpuppi n'ọnwa June afọ 2020 ma bo ya ebubo na o zuru nde kwuru nde dọla ndị mmadụ na mba Amerịka.

   Na Julaị 2020, gọọmentị mba UAE kpụgara ya mba Amerịka ka e kpee ya ikpe.

   Hushpuppi kwetara n'ezie na ya zuru ohi oge a kpụtara ya n'ụlọikpe, mana ụlọikpe yigharịrị ụbọchị a ga-atụ ya mkpọrọ.

2. 4 Nọvemba 2022Twitter achụọla ọtụtụ ndị ọrụ ha dịka Elon Musk malitere ọrụ ka onye nwe ụlọọrụ ahụ

   Ụlọọrụ Twitter achụọla ọtụtụ ndịọrụ ha n'ọrụ dịka ide ego bụ Elon Musk malitere ọrụ dịka onye nwe ya bụ ụlọọrụ sosha midia.

   Musk kwuru na ịchụ ụfọdụ ndịọrụ bụ mkpebi siri ike, mana o so n'ụzọ ka mma iji mee ka Twitter bụrụ ụlọọrụ kawanyere mma.

   N'akwụkwọ ozi nke Twitter sigaara ndị ọrụ ha niile, ha kwuru na "onye ọbụla gaa lee ozi dị n'ọbaozi email gị, ọ bụrụ na i nwetara ozi n'akara email twitter gị, mara na ị ka bụ onyeọrụ Twitter, mana ọ bụrụ na i nwetara ozi n'akara email nkịtị gị, mara na ọchụchụ n'ọrụ a metụtara gị".

   Otu onye aha ya bụ Simon Balmain kwuru na ya ka na-arụ ọrụ na kọmputa ya oge ọ chọpụtara na akpọchiela ọbaozi o ji arụrụ Twitter ọrụ, nke pụtara na a chụọla ya.

   Ka ọ dị ugbua, ụfọdụ ndịọrụ Twitter a chụrụ achụ, ejikọọla ọnụ ma kpụpụ ụlọọrụ ụlọikpe n'ihi etu e si chụọ ha n'ọrụ.

   Ha kwuru na usoro e ji chụọ ha adabaghị n'iwu nke steeti Carlifonia nakwa nke mba Amerịka.

   Iwu kwuru na tupu a chụọ ndị mmadụ n'ọrụ, e kwesịrị izitere ha ozi gbasara ya ihe ruru ụbọchị 60 tupu ụbọchị a ga-akwụsị ha ọrụ.

   Cheta na Elon Musk kwụrụ ijeri dọla 44 iji zụrụ Twitter n'izuụka gara aga.

   Ka o mechara nke a, ọ chụpụrụ ndị niile nọ n'isi oche ụlọọrụ ahụ a na-akpọ 'Board of Directors' na bekee, ma bụrụzie onyeisi naanị ya.

3. 4 Nọvemba 2022Anyị na-agba mbọ ka Emirates nweta ego ha - Mịnịstrị njem ụgbọelu

   Ministrị njem ụgbọelu nke Naịjirịa ekwuola na ha na-agba mbọ ịhụ na ụlọọrụ ụgbọelu Emirates nwereike ịsepụta ego ha tọrọ na Naịjirịa.

   Ọnụ na-ekwuru Ministrị ahụ bụ James Odaudu gwara BBC n'ekwentị na okwu ịsepụta ego agbasaghị Ministrị njem ụgbọelu mana n'agbanyeghi nke a, Minista Hadi Sirika na-agba mbọ ịhụ na ha nwereike mee nke a.

   Ọ sị "Minista na-agbagharị ebe niile, na-ahazị nzụkọ n'etiti ụlọakụ etiti nakwa ndị ọzọ okwu a metụtara".

   Ụlọorụ Emirates kwụsịrị njem ụgbọelu niile na Naịjirịa n'ihi ego ha ruru nde dọlla 85m tọrọ na Naịjirịa ha enweghi ike ịsepụta.

   Ha kọwara na ha emeela mkpesa n'aka gọọmentị etiti nakwa ụlọakụ etiti maka nsogbu a.

   Cheta na ha akwụsịbuola njem ha niile na Naịjirịa kpam kpam maka otu okwu nsepụta ego a.

4. 4 Nọvemba 2022Ndị ọkwọ ụgbọelu Kenya Airways ga-ebido abụbọ ọrụ n'ụbọchị Satọde

   Otu jịkọrọ ndị ọkwọ ụgbọelu nke mba Kenya bụ Kenya Airwways ekwuola na ha ga-agba abụbọ ọrụ n'ụbọchị satọde.

   Nke a mere izuụka abụọ ịdọ aka na ntị ha nyere gachara maka okwu na ndị ụlọọrụ ahụ kwụsịrị itinye maka ezumike ha.

   Otu Kenya Airline Pilots Association (Kalpa) ekwuola na ndị ọrụ ha agaghị abịa ọrụ n'ọdọ ụgbọelu Jomo Kenyatta International Airport nke na Nairobi site n'elekere isiinke ụtụtụ ụbọchị satọde.

   Na mbido izuụka a ka ndị ụlọọrụ a na-ekwu na ha enweghịzị ike ịkwụ ya bụ ego tutu ruo afọ 2023.

5. 4 Nọvemba 2022Onyeisiala mba Equatorial Guinea na-akwadọ ọchịchị agba nke isii

   Onyeisiala mba Equatorial Guinea bụ Teodoro Obiang Nguema Mbasogo, onye chịrịla mba ahụ afọ 43 ebidola atụmatụ ịchị agba nke isii ya n'ụbọchị Tọzde.

   Obiang onye dị afọ 80 bidoro ọchịchị n'afọ 1979.

   Ehiwere ụbọchị iri abụọ nke Nọvemba dịka ụnọchị a ga-ebido ntuliaka.

   Ụlọ ntaakụkọ AFP dere na Obiang kwuru sị, "Ndị otu m họpụtara m maka na m bụ njirimara udo na ọganihu nke na-achị n'Equatorial Guinea".

   AFP kwukwara na ọ bụ mmadụ 425,000 tinyere aka n'akwụkwọ maka ntuliaka ebe ọnụ ọgụgụ ndị mba Equatorial Guinea bụ ihe dịka mmadụ otu nde na ụma anọ.

6. 4 Nọvemba 2022Etu okwu 'Ha laghachi Afrịka' siri mee ka ụlọomeiwu mba Fransị kwụsị nzụkọ ha

   Ndị omeiwu mba Fransi kwụsịrị ọgbakọ ha dịka otu onye omeiwu bụ Gregoire de Fournas tiri mkpụ sị, " Ha laghachi Afrịka" dịka Carlos Marten Bilongo onye isiojii bụkwa onye omeiwu mba Fransi na-ekwu okwu maka njem mbiri.

   Fournas bụ onye otu patị National Rally mechara rịọ mgbahara ma sị na ihe okwuru abụghị gbasara Bolingo kama na ọ bụ maka ndị chọrọ isi oshimiri bata Yurop n'ụzọ ezịghị ezi.

   Kama Bolingo bụ onye amụrụ na mba Fransi katọrọ ya bụ okwu ma sị na ọ bụ ihe ihere.

   N'aka nke ọzọ ka Praịm mịnịsta mba Fransi bụ Elisabeth Borne kwuru na enweghị ohere ịkpa oke agbụrụ na mba Fransi.

7. 4 Nọvemba 2022Etu nwoke si gbu nwa ya nwaanyị maka imetụ ya aka na 'akpa school' ya

   Ndị uweojii anwụchiela otu nwoke dị afọ iri isii na isii maka igbu nwa ya nwaanyị dị afọ iri na abụọ n’Akwa Ibom steeti.

   Nwoke ahụ kwuru na iwe gbara ya mgbe nwa ya dọrọ ya aka n’utu dịka ha abụọ na-alụ ọgụ nke mere ka ọ kụọ ya osisi gburu ya.

   Akụkọ kwuru na mgbe ọ chọpụtara na nwa ya anwụọla, ụjọ jidere ya, nke mere ka o lie ya n'ebe emighi emi n'ime mbara ezinaụlọ ha.

8. 4 Nọvemba 2022Unu abọọla chi

   Daalụ dịka ị ga-anọnyere anyị taa maka akụkọ niile ga-amasị gị

9. 3 Nọvemba 2022Ebubo etu ndị n'arụ n'ụlọozu si bepụ akụkụ ahụ onye nwụrụanwụ

   Ezinaụlọ Rachael Osayintolu bụ onye nwụrụ anwụ na nsonso a, ekwupụtala etu ha si chọpụta na e bepụrụ ụfọdụ akụkụ ahụ nne ha n'ụlọozu ebe ha debere ya.

   Oludare Osanyintolu bụ nwa nwaanyị ahụ sị na ha chọpụtara nke a oge ha chọrọ iburu ozu nne ha site n'ụlọozu dị n'ụlọọgwụ ebe ọ nọrọ nwụọ n'Ibadan, Oyo Steeti, gafee n'ụlọozu ọzọ.

   Osanyintolu gwara BBC Yoruba na ahụ nne ya ka na-agba ọbara mgbe ha gara iburu ozu ya n'ụlọọgwụ.

   O kwuru na ha butere nne ya n'ụlọọgwụ dị n'Ososami n'Ibadan, ndị ụlọọgwụ wee kwụnyere ya 'oxygen' maka na ọ naghị ekutecha ume nke ọma; mana o mechara nwụọ n'abalị.

   "Mgbe ahụ ka anyị rịọanyị gwara ndị nọọsụ nọ ọrụ ka ha nyere anyị aka tịnye ozu ya n'ụlọozụ maka na chi ejiela. Mana oge anyị bịaziri iburu ya n'ụtụtụ, anyị chọpụtara na ebepụla egedege ihu ya."

   "Nke a mere ka anyị lezie ya anya nke ọma wee hụ na e bepụkwara mkpụrụaka nri ya."

   "Anyị jụrụ ndị nọ ebe ahụ, ha sị na ha amaghị. Nke gbagwojuru anyị anya bụ na ahụ ya ka na-agba ọbara dịka onye ka dị ndụ".

   Ka ọ dị ugbua, ndị uweojii Oyo steeti sị na ha ejichiela ndị nche nakwa ụfọdụ ndị ọrụ na-arụ n'ụlọozu ahụ maka ịgba ha ajụjụ ọnụ.

   Ya bụ nnyocha amalitela ugbua dịka ọnụ na-ekwuru ndị uweojii ahụ si kwuo.

10. 3 Nọvemba 2022Imran Khan: A gbaala onye bụbu Praịm minista Pakitsan egbe ma merụọ ya ahụ

    A gbaala onye bụbu Praịm minista Pakistan bụ Imran Khan egbe n’ụkwụ n’ọgbakọ ngagharịiwe a na-eme n’obodo Wazirabed nke mba ahụ.

    Otu onye ọchịchị mba ahụ welitere isi gwara ụlọntaakụkọ AFP na onye gbara egbe ahụ ‘zubere igbu ya’ mana ndị uweojii ka na-eme nnyocha ịchọpụta ma ọ bụ Khan ka e zibere ịgba ya bụ egbe n’ezie.

    Ụfọdụ ndị otu PTI kwuru na mmadụ anọ ndị otu ha merụrụ ahụ na mwakpo ahụ.

    Khan gbara afọ 70 bụ onye ndu otu nghagharị a na-eme n’isi obodo mba ahụ bụ Islamabad na-achọ ka emee ntuliaka ọzọ maka na a chụpụrụ ya n’ọkwa n’ọnwa Eprel.

    A hụrụ ebe a na-ebuga Khan otu ụlọọgwụ dị na Lahore. Otu ọnụ na-ekwuru pati ya kwuru na egbe ahụ tụrụ n’akụkụ ikpere.

    Yasmeen Rashid bụ otu onye ọzọ welitere isi na patị ahụ bụ minista ahụike ha kwuru na ọ nọghị n’ọnọdụ ọnwụ.

    Ụlọ ntaakụkọ Geo TV kwuru na a nwụchiri otu nwoke a na-enyo n’okwu ịgba egbe a.

    Ụfọdụ ihe onyonyo na-efegharị gosiri ka e kere Imran Khan akwa n’ụkwụ ebe a gbara ya egbe ahụ ma bupụ ya n’otu ụgbọala.

    Otu ihe onyonyo ọzọ ghara na soshal midia gosiri ebe otu onye otu patị PTI bu apa n’ihi dịka ọbara tesasịrị n’akwa ya. O rịọrọ ọha ka e kpere Khan ekpere.

    Shehbaz Sharif bụ Praịm minista mba a ugbua katọrọ mwakpo a ma nye iwu ka amalite nnyocha n’okwu a.

11. 3 Nọvemba 2022Ada onyeisiala Gana ekwuola na gọọmentị enyeghị ya ọrụ ngọ $25,000,000

    Otu n'ime ada Akufo-Addo bụ onyeisiala mba Gana agọọla na gọọmentị mba ahụ enyeghị ya nde dọla iri abụọ na ise maka ọrụ ngo iji ihe nka esere ses chọọ ụfọdụ mpaghara isi obodo Accra mma.

    Gyankroma Akufo-Addo kwuru sị, " ebubo a bụ asị ndị na-enweghị ihere na-efesa".

    O kwuru na ebe atọ ọ chọrọ mma bụ n'ike nke ya na ego ua ka o jiri mee ya.

    O kwukwara sị, " Atụmatụ a abụghị maka ịkpata ego, enweghị ikike ọrụ ngo ọbụla eji mee ya".

    Gyankroma Akufo-Addo kwuru na ọ ga-aga ụlọikpe maka ụlọ mgbasaozi na ndị na-ebusa akụkọ a.

12. 3 Nọvemba 2022Ndị uweojii Naijirịa ahụla ozu umunwoke 10 n'Edo Steeti

    Ndị uweojii Naijirịa ekwuola na ha achọpụtala ozu mmadụ 10 n'ụzọ dị n'Edo Steeti.

    Ọnụ na-ekwuchitere ndị uweojii steeti ahụ bụ Chidi Nwabuzor kwuru na enweghị ihe ọbụla gosiri mwakpo n'ahụ ozu ndị a ebe ndị obodo kwuru na ha amaghị ndị ha bụ.

    Ọ bụ ndị uweojii na ndị dịnta chọpụtara ya bụ ozu n'akụkụ ọhịa dị nso okporo ụzọ Lagos-Abuja n'ụbọchị Tuzde.

    Ndị uweojii kwuru na ozu ụmụ nwoke ndị a nọ n'ime afọ iri abụọ ha.

    Ha kwuru na ha ebidola nyocha ha marịọ ndị mmadụ ka ha hapụ ịtụ ụjọ.

13. 3 Nọvemba 2022North Korea agbaala ogbunigwe ọhụrụ

    Mba North Korea agbaala ogbunigwqe a na-eche na ha bụ n'obi ka ọ tụọ na mpaghara ụị̀a ndị ọzọ, dịka mba South Korea si gba n'ama.

    Nke a bụ nke asaa ya Nọt Koria na-ezipụ ogbunigwe a bkee kpọrọ '"intercontinental ballistic missile (ICBM)" bụ ogbunigwe nwere ike isi mba frute mba ọzọ ma ezipụ ya.

    Nke a na-abịa dịka a na-atụ uche na mba azụ na-achọ izipụ ngwa agha nuklia.

    Ogbunigwe dara otu ụbọchị ahụ Saụt Koria zigbara ogbunigwe dịka ọ dịka mba ahụ ahụ na-eke ngwụcha ọgụ.

    Dịka Nọt Koria na-ezipụ ogbunigwe ha, Mba Amerịka na Saụt Koria na-efegharị ụgbọelu agha nke nke Nọt Korea kpọrọ 'ịchọ ezigbo okwu."

14. 3 Nọvemba 2022Ndewoonu, Igbo ndị ọma!

    Ndewoonu, Igbo ndị ọma!

    Ndụ mmiri , ndụ azụ!

15. 2 Nọvemba 2022Ụdịrị anwụnta ọhụrụ tụsa tụsa anaghị egbu amalitela ifesa n’Afrịka – Ndị sayensị

    Ndị ọrụ ahụike sayensị na-ekwu na otu ụdị anwụnta na-ebu ọrịa ịba esila n’Asia efesa ma na-abata Afrịka, bụụ ebe ọ nna-akacha akpa ike ma na-anyụ ndị mmadụ ikpakwụ.

    N'Afrika, bụ ebe ọnụọgụgụ kacha ukwuu na ndị na-ebute ọrịa ịba nakwa ndị na-anwụ site n’ọrịa, e nwere ụdịrị anwụnta na-ebunye ndị mmadụ ọrịa a ọkachasị n’ime obodo dị icheiche.

    Mana ụdịrị anwụnta nke ‘Anopheles stephensi’ bụ nke a si n’ebe akụkụ mba India nakwa Iran abata gbasirike ma ghara ị na-anwụ ma a gbaa ha tụsa tụsa na-egbe ụdịrị ndị ọzọ.

    Ụdị anwụnta ahụ amalitelarị ifesa ma na-amụba n’akụkụ Djibouti na Etiopia, dịka ọ na-akpara ndị mmadụ nsogbu ọkachasị ka tụsa tụsa anaghị egbu ha.

    Nnyocha ọhụrụ na-ekwu na ọ bụrụ na ọ gbasaa n'akụkụ Afrika dị icheiche, ọ nwere ike itinye ihe ruru nde mmadụ 130 n'ọnọdụ ihe ize ndụ n’aka ọrịa ịba.

16. 2 Nọvemba 2022‘Ihe mere anyị jiri mechie akara Instagram Hushpuppi kpam kpam’ – Ulọọrụ Instagram

    Ụlọọrụ Instagram akọwarala BBC ihe mere ha jiri mechie akara Instagram nwaamadị a ma ama dịka Hushpuppi.

    Ozi ha kọwara na Hushpuppi onye ezigbo aha ya bụ Ramon Abbas dara iwu na-echekwa ndị ji ọba ozi ha agbasaozi.

    Ozi ha dere “Anyị achọghị ka onye ọbụla jiri ọba ozi anyị na-ezu ohi ịntanetị maọbụ na-anapụ ndị mmadụ ego n’ike n’ụzọ ezighi ezi, o doro ọha anya na nke a megidere iwu anyị” nke bụ ihe otu ọnụ na-ekwuru ụlọọrụ Meta bụ ndị nwe Instagram kwuru.

    Cheta na ndị uweojii mba ụwa nke 'Interpol' nwụchiri Hushpuppi (bụ onye na-ewu ewu n' Instagram maka igosi akụ; akwa, akpụkpọụkwụ, elekere aka na ihe ndị ọgalanya ndị ọzọ) na Dubai n'ọnwa Juun,afọ 2020.

    Ha kpụpụrụ ya ụlọikpe na mba Amerịka maka igwu ọtụtụ ndị ojiegoachụego chamdum nke nchịkọta ego ya ruru nde kwuru nde dọla site n’ịntanet.

    A na-enyo na o napụrụ ndị mmadụ ego dọla nde 24 dịka a na-atụ anya na ọ ga-aga nga ruo afọ 20.

    Dịka ụlọikpe mba Amerịka siri kwuo, a ga-ekpe ikpe ya n’ụbọchị asaa nke ọnwa Nọvemba a na mpaghara Los Angeles.

17. 2 Nọvemba 2022Mba Ethiopia na mpaghara Tigray ekwekọrịtala ịkwụsị ịkwa onwe ha mgbọ

    Ndị ndu mba Ethiopia na mpaghara Tigray ekwetala ịkwụsị ịlụ ọgụ, dịka ha kwakọrịtara mgbọ ihe ruru afọ abụọ.

    Ọ bụ n'ọgbakọ udo nke otu jikọrọ mba Afrịka a kpọrọ 'African Union' haziri na mba South Afrịka ka a nọ nwee nkwekọrịta a, taa bụ ụbọchị abụọ nke ọnwa Nọvemba.

    Agha a dị n'etiti ndị agha nke gọọmentị Ethiopia na ndị ọgụ nnupuisi nke mpaghara Ugwu Tigray ebutela nnukwu ihe isi ike na ihe nhịaahụ na mba ahụ.

    Dịka otu 'World Health Organisation si kwuo, ihe ruru pasentị 90 ndị bi na mpaghara Tigray chọrọ enyemaka ihe oriri.

    Otu n'ime atọ n'ụmụaka niile nọ na mpaghara ahụ na-arịa ọrịa oke agụụ maọbụ erighi nri dị mma, nke bekee na-akpọ 'malnutrition'.

    N'ọgbakọ a e nwere taa, ndị ndu Ethiopia na Tigray kwetara na ndị agha ha ga-akwụsị ọgụ, debe ngwaọgụ ha n'ala, ma nye ohere ka ndị ọrụ enyemaka bubata ihe oriri iji nyere ndị nọ na mkpa aka.

    Aka chịburu Naịjirịa bụ Olusegun Obasanjo bụ onyeisi ọgbakọ ebe a nọrọ kpee udo a.

    O kwuru na nke a ga-abụ mmalite udo nke ga-anọgide na mba Ethiopia.

18. 2 Nọvemba 2022Etu ndị uweojii siri chọta ozu ụmụnwoke 10 n’okporoụzọ

    Ndị uweojii ekwuola na ha hụrụ ọzụ ihe ruru ụmụnwoke 10 dịka ha tọgbọ n’akụkọ otu ọhịa na Edo steeti. A na-ekwu na o dobeghị anya etu ndị a siri nwụọ maọbụ etu ha siri nweta onwe ha n’akụkụ ụzọ ahụ.

    N’ozi si n’aka ndị uweojii Naịjirịa n’Edo steeti, , Chidi Nwabuzor bụ ọnụ na-ekwuru ha sị

    “anyị enyoola akụkụ ahụ ọzụ ndị a mana enweghị ihe ọbụla gosiri mmekpa ahụ maọbụ apa ọbụla nọ ha n’ahụ.”

    Ndị bi n’obodo nọ n’akụkụ ebe ihe a mere kọwara na ha amaghị ndị ụmụnwoke ahụ bụ.

    Ndị uweojii na ndị dịnta nọ nso ebe ahụ hụrụ ọzụ ndị n’akụkụ ụzọ si Lagos gawa Abuja n’akụkụ steeti ahụ mana a na-eche na e gburu ndị a egbu.

    Ndị uweojii kwukwara na e burula ozu ụmụnwoke ndị nọ agbata afọ ebe 20 gaa ụlọ ebe a na-edobe ozu maka nnyocha dịka ha rịọkwara Kọmịshọna ndị uweojii n’Edo stetei ka ehibe otu ga-eme nnyocha pụrụiche n’ọnwụ ndị a.

19. 2 Nọvemba 2022Kwụọ dọla asatọ ka anyị nye gị 'blue tick' - Elon Musk

    Ide ego a ma ama bụ Elon Musk ekwuola na onye ọbụla chọrọ ka e nye ya akara njirimara pụrụ iche na Twitter, nke a na-akpọ 'verification' na bekee, ga na-akwụ dọla asatọ kwa ọnwa.

    Ihe na-egosi njirimara a pụrụ iche bụ akara na-acha anụnụ anụnụ nke a a na-etinye n'akụkụ aha mmadụ na Twitter; a na-akpọ ya 'blue tick' na bekee.

    Elon Musk kwuru nke a dịka ọ kwụchara ijeri dọla iri anọ na anọ ($44bn) iji zụrụ Twitter.

    Akara 'blue tick' na-enye aka igbochi nkesa akụkọ ụgha, maka ọ na-enye aka igbochi ndị ekperima iji aha ndị a ma ama ekesa akụkọ adịgboroja.

    Ndị a na-enyekarị ya bụ ndị a ma ama, ndị e nwere ike iji aha ha ghọgbuo mmadụ maọbụ gbasaa ozi asị; ndị dịka ndị ntaakụkọ, ndị ndọrọndọrọ ọchịchị, ndị na-eme ejije, ndị otiegwu, wdg.

    Musk kwuru na onye ọbụla kwụrụ $8 iji nweta akara 'blue tick' ga-enwekwa ihe ndị ọzọ ọ ga-erite; dịka inwe ohere itinye onyonyo toro ogologo, na ụfọdụ ihe ndị ọzọ.

    Mana ụfọdụ akatọọla atụmatụ ịkwụ ụgwọ maka akara njirimara Twitter.

    Nu Wexler, onye bụbu ọnụ na-ekwuru ụlọọrụ Twitter, kwuru na "ọ bụrụ na a na-erezi akara njirimara ere, ọ ga-eme ka ọ sikarịa ike ịmata ndị bụ ndị."

    Musk na-atụkwa anya na ego ọ ga-enweta site n'ire 'blue tick' ga-enye aka ka ọmụrụnwa Twitter na-enweta gbalite.

20. 2 Nọvemba 2022Okwu ịnwụchi mmadụ abụọ maka nrụrụaka bụ akụkọ ụgha - Soludo

    Aka na-achị Anambra steeti bụ Chukwuma Soludo esila n'ọnụ onye na-ekwuchitere ya bụ Christian Aburime kwuo okwu gbasara akụkọ na-efegharị na ọ sị ka anwụchie mmadụ abụo maka nrụrụaka.

    Nke a pụtara ihe dịka akụko malitere ifesa gbasara ndị abụọ a ma ama n'Anambra steeti na Soludo enyela iwu ka anwụchie ha abụọ ịzara ọnụ ha maka ebubo izupu ego gọọmentị steeti ahụ.

    N'ozi o ziputara, Soludo sị "ọ bụ akụkọ ụgha nke mmadụ chepụtara n'ime onwe ya, ọ bụ akụkọ enweghi ebe ọ kwụ akwụ"

    Ọ gwara ndị steeti ahụ sị ha "gara mkpa ha ma chefuo ihe niile dị n'ime akụkọ ụgha ahụ na-efegharị".