အင်းစိန်ထောင်တွင်းက အကျဥ်းသားတချို့ဆီက အရပ်ဝတ်တွေ သိမ်းဆည်းခံရ၊ ကန့်ကွက်ပြီးနောက် ပြန်ထုတ်ပေး
အင်းစိန်ထောင်တွင်းမှာ နိုင်ငံရေး ပုဒ်မတွေနဲ့ ဖမ်းဆီးပြီး ပြစ်ဒဏ် ချမှတ်ခံထားရသူတွေကို ပြီးခဲ့တဲ့ ရက်ပိုင်းက နယ်မြို့အကျဉ်းထောင်တွေဆီ ရွှေ့ပြောင်း တာတွေ လုပ်ခဲ့ပြီးနောက် အင်းစိန်ထောင် ၅ တိုက်မှာ အကျဉ်းကျနေသူတွေ အရပ်ဝတ်တွေကို သိမ်းဆည်းခဲ့တယ်လို့ တရားရုံးနဲ့ နီးစပ်တဲ့ အသိုင်းအဝိုင်းက ပြောပါတယ်။
ဘာကြောင့် ဒီလို လုပ်တယ် ဆိုတာ တော့ မသိရပါဘူး။
ဒါပေမဲ့ ကန့်ကွက်မှုပြုလုပ်ပြီးနောက် အရပ်ဝတ်တွေ ပြန်ရခဲ့တယ်လို့ သိရပါတယ်။
ဒါ့အပြင် အဲဒီ ၅ တိုက်မှာ အကျဉ်းကျနေတဲ့ သံလျင်မြို့နယ် NLD ပါတီ လူငယ် တာဝန်ခံ ကိုသန်းတိုးအောင်ကို ဧပြီလ ၂၅ ရက်နေ့က ခြေကျင်းနဲ့ ထိပ်တုံးခတ်ပြီး ထောင်ဝင်စာ ပါဆယ် ပိတ်တဲ့ အတွက် သူက အစာငတ်ခံ ဆန္ဒပြခဲ့ရာမှာ ဧပြီလ ၂၇ ရက်နေ့က သက်ဆိုင်ရာ ထောင်အာဏာပိုင်တွေက သူ အစာငတ်ခံ ဆန္ဒပြရတဲ့အကြောင်း ခေါ်ယူ မေးမြန်းခဲ့တယ်လို့ သိရပါတယ်။
အကျဉ်းကျသူတွေကို ထောင်ဝတ်စုံ အပြာပဲ ဝတ်ရမယ်လို့ သတ်မှတ်ထားပေမဲ့ တခြားအဝတ်တွေ ဝတ်တာကို ခွင့်ပြုထားတာကြောင့် ကျန်တဲ့ တိုက်တွေမှာ မသိမ်းဘဲ ၅ တိုက် တစ်ခုတည်းမှာ သိမ်းတာကို လက်မခံနိုင်ဘူး၊ သူ့ကို ထိပ်တုံးခတ်တာဟာလည်း လူ့အခွင့်အရေး ချိုးဖောက်တာ ဖြစ်တယ်၊ သူ့တစ်ယောက်တည်းကိုပဲ ထောင်ဝင်စာ ပါဆယ် ပိတ်တာကိုလည်း ပြန်ခွင့်ပြုရမယ် စသဖြင့် ကိုသန်းတိုးအောင်က တင်ပြတာတွေကို ထောင်အာဏာပိုင်တွေက ပြန်လည် ခွင့်ပြုလိုက်တယ် ဆိုပြီး ကြာသပတေးနေ့က သူ့ကို ရုံးထုတ်ချိန်မှာ ပြန်ပြောပြခဲ့တယ်လို့ တရားရုံးနဲ့ နီးစပ်တဲ့ အသိုင်းအဝိုင်းက ဘီဘီစီကို ပြောပါတယ်။
ကိုသန်းတိုးအောင်က ပုဒ်မ ၅၀၅- က အရ ပြစ်ဒဏ် ၃ နှစ် ချခံထားရသူပါ။ အဲဒီ ပြစ်ဒဏ် ချခံရပြီးမှ ကိုစည်သူကျော်၊ ကိုဟိန်းမင်းထက် ဆိုတဲ့ လူငယ် နှစ်ယောက်နဲ့အတူ ပေါက်ကွဲစေတတ်သောဝတ္တု ပစ္စည်းများဆိုင်ရာ ဥပဒေ ၃ ပုဒ်မ နဲ့ ထပ်မံ တရားစွဲခံထားရပါတယ်။ ဆက်လက်ကြားနာ စစ်ဆေးနေဆဲ အဲဒီ အမှု အတွက် ဧပြီလ ၂၈ ရက်နေ့က အင်းစိန်ထောင်တွင်း အထူးတရားရုံးမှာ ရုံးထုတ်ခဲ့တာ ဖြစ်ပါတယ်။
ထောင် အရွှေ့အပြောင်းတွေ လုပ်တဲ့ ကိစ္စနဲ့ သူ့ကို ကန့်သတ်ချက်တွေ ပြုလုပ်တဲ့ ကိစ္စနဲ့ ဆက်စပ် ပတ်သက်မှု ရှိမရှိ ဆိုတာတော့ မသိရပါဘူး။
ထောင်အာဏာပိုင်တွေက အကျဉ်းသားတွေကို နယ်မြို့တွေက ထောင်တွေဆီ ပြောင်းရွှေ့ရာမှာ ကြိုတင် အသိပေးတာ၊ မိသားစုဝင်တွေကို အသိပေးတာလည်း မရှိပါဘူး။
သတင်းကြားလို့ လိုက်စုံစမ်းတော့မှ သူတို့ မိသားစုဝင် အကျဉ်းသားတွေကို ထောင်ရွှေ့လိုက်ပြီလို့ သိကြရတဲ့အကြာင်း မိသားစုဝင်တွေနဲ့ တရားရုံး အသိုင်းအဝိုင်းက ဘီဘီစီကို ပြောပါတယ်။
ကျိုက်မရောထောင်ကို ပြောင်းရွှေ့ခံလိုက်ရသူ တစ်ယောက်ရဲ့ မိသားစုဝင်က အင်းစိန်ထောင်ကို သွား စုံစမ်းတော့ ဘယ်သူတွေ ဘယ်ထောင် ပြောင်းရတယ် ဆိုတာA4 စာရွက်မှာ ရေး ကပ်ထားတယ်လို့ ထောင်တာဝန်ခံ က ပြောတဲ့ အတွက် အဲဒီ စာရင်းထဲမှာ သူ့မိသားစုဝင်ရဲ့ နာမည်ကို တွေ့ခဲ့ရတယ်လို့ ပြောပါတယ်။
လောလောဆယ် သိရသလောက် ဒိုက်ဦးထောင်၊ သာယာဝတီထောင်နဲ့ ကျိုက်မရော ထောင်တွေကို ပြောင်းရွှေ့လိုက်တယ်ဆိုတာ မိသားစု တွေက ပြောပါတယ်။
အကျဉ်းသား တွေကို ဘာကြောင့် ထောင်ပြောင်းတယ်၊ ဘယ်ထောင်တွေကို ဘယ်နှယောက် ပို့တယ် ဆိုတာ တိတိကျကျတော့ မသိရပါဘူး။
ထောင်ပြောင်းခံရသူတွေထဲမှာ တက္ကသိုလ် ကျောင်းအသီးသီးက သမဂ္ဂ ခေါင်းဆောင်တွေ၊ နိုင်ငံရေး အကျဉ်းသားတွေနဲ့ အင်းစိန်ထောင်တွင်း လူငယ်ဆောင်က အကျဉ်းသား လူငယ်တွေ ဖြစ်တယ် ဆိုတာ ဘီဘီစီက ရရှိတဲ့ စာရင်းတွေ အရ သိရပါတယ်။
