ပြည်သူ့ရဲတပ်ဖွဲ့ဥပဒေပြဋ္ဌာန်းတယ်လို့ CRPH သတင်းထုတ်ပြန်
ဓာတ်ပုံ ရင်းမြစ်, CJ
အမျိုးသားညီညွတ်ရေးအစိုးရ NUG၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနက ပေးပို့လာတဲ့ "ပြည်သူ့ရဲတပ်ဖွဲ့ ဥပဒေ"ကို ပြည်ထောင်စုလွှတ်တော် CRPH က အတည်ပြုပြဋ္ဌာန်းလိုက်တယ်လို့ မနေ့ မေလ (၃)ရက်မှာသတင်းထုတ်ပြန်လာပါတယ်။
အာဏာသိမ်းစစ်အုပ်စုကို ဥပဒေနဲ့အညီထိထိရောက်ရောက်အရေးယူနိုင်ရေး၊ စစ်ကောင်စီလက်အောက်ခံဝန်ထမ်းတွေကနေ ပြည်သူတွေအပေါ် လူမျိုးတုန်းသတ်ဖြတ်မှု၊ ဥပဒေမဲ့ညှဉ်းပန်းနှိပ်စက်သတ်ဖြတ်မှု၊ မုဒိမ်းကျင့်မှု၊ မီးရှို့ဖျက်ဆီးမှု၊ လုယက်မှုနဲ့ တည်ဆဲဥပဒေတစ်ရပ်ရပ်ကို ဖောက်ဖျက်ကျူးလွန်ခဲ့တာတွေ ကို ဖော်ထုတ်အရေးယူနိုင်ရေး၊ အာဏာသိမ်းထားတဲ့ကာလအတွင်း စစ်ကောင်စီနဲ့လက်အောက်ခံဝန်ထမ်းတွေက နိုင်ငံတော်ပိုင်မြေပေါ်၊ မြေအောက် သဘာဝသယံဇာတတွေကို ကိုယ်ကျိုးအတွက် လုပ်ပိုင်ခွင့်အာဏာကိုအသုံးပြုပြီးအလွဲသုံးစားပြုလုပ်ထားရှိမှုတွေကိုဖော်ထုတ်ပြီး ဥပဒေနဲ့အညီ အရေးယူဆောင်ရွက်နိုင်ရေးတို့အပြင် ပြည်သူအချင်းချင်းကြား ဒုစရိုက်မှုတွေနဲ့ တရားမဲ့ပြုကျင့်မှုတွေကို ပြည်သူ့အုပ်ချုပ်ရေးအဖွဲ့၊ လူထုနဲ့ပူးပေါင်းပြီး တားဆီးနိုင်ရေး၊ တိုင်းရင်းသားပြည်သူတစ်ရပ်လုံးယုံကြည်အားကိုးလက်ခံတဲ့ ရဲတပ်ဖွဲ့အဖြစ် စတင်ပြီးအခြေခံပြုပုံဖော်ကာပြည်သူတွေအပေါ် ဥပဒေနဲ့အညီ ဝန်ဆောင်မှုပေးတဲ့ ပြည်သူလေးစားတန်ဖိုးထားတဲ့ ရဲတပ်ဖွဲ့ပေါ်ပေါက်လာစေဖို့ ရည်ရွယ်တယ်လို့ အချက် (၅)ချက်နဲ့ ဒီရဲတပ်ဖွဲ့ဥပဒေမှာ ဖော်ပြ ပါတယ်။
ဒီပြည်သူ့ရဲတပ်ဖွဲ့မှာ အကြမ်းမဖက်အာဏာဖီဆန်ရေးလှုပ်ရှားမှု (CDM)ပါဝင်တဲ့ရဲတပ်ဖွဲ့ဝင်တွေ၊ အာဏာသိမ်းမှုမတိုင်ခင်ကအကြောင်းအမျိုးမျိုးနဲ့ ပင်စင်၊ နှုတ်ထွက်၊ ထုတ်ပယ်ခံရတဲ့ ရဲတပ်ဖွဲ့ဝင်ဟောင်းတွေ၊ ရဲတပ်ဖွဲ့မှာဝင်ရောက်အမှုထမ်းလိုတဲ့ ပြည်သူ့လုံခြုံရေးအဖွဲ့နဲ့ ရပ်ရွာအတွင်း အကျင့်စာရိတ္တကောင်း မွန်တဲ့ ပြည်ထောင်စုသားတွေနဲ့ ဖွဲ့စည်းရမယ်လို့ ဥပဒေမှာဖော်ပြထားပါတယ်။
ဒါပေမဲ့ ထုတ်ပယ်ခံရတဲ့ ရဲတပ်ဖွဲ့ဝင်ဟောင်းတွေလို့ဆိုရာမှာ အကျင့်စာရိတ္တဖောက်ဖျက်မှုကြောင့် အရေးယူခံထားရသူတွေမပါဝင်စေရဘူးလို့ ဆိုပါတယ်။
NUG အစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနရဲ့ ပြီးခဲ့တဲ့ ဧပြီ (၂၅)ရက်ထုတ်ပြန်ချက်အရ အဲ့ဒီနေ့အထိ CDM ရဲတပ်ဖွဲ့ဝင်အင်အား (၂၉၃၇) ဦးရှိပြီဖြစ်သလို ဝန်ကြီးဌာနရဲ့ CDM ပြည်သူ့ရဲတပ်ဖွဲ့ယာယီအုပ်ချုပ်ရေးကော်မတီနဲ့ ချိတ်ဆက်ပြီး ကျရာတာဝန်ထမ်းရွက်လုပ်ကိုင်နေတယ်လို့ ပြောပါတယ်။
ဒါ့အပြင် စစ်ကောင်စီဆီ ပူးပေါင်းတာဝန်ထမ်းဆောင်ဟန်ဆောင်ပြီး ပြည်သူ့ဘက်ရပ်တည်နေတဲ့ Pre - CDM ရဲတပ်ဖွဲ့ဝင် အင်အား (၃၄)ဦးထိရှိပြီလို့ သိရပါတယ်။
