အာဆီယံဘုံသဘောတူညီချက် ငါးချက်ကို အကောင်းဆုံး
အကောင်အထည်ဖော်ရွက်နိုင်ဖို့အတွက် အာဆီယံအဖွဲ့ဝင် နိုင်ငံခြားရေးဝန်ကြီးတွေအားလုံး
ပါဝင်တဲ့ အလွတ်သဘော တွေ့ဆုံမှုတခုကို မေလ ၁၁ ရက်နေ့ ဗုဒ္ဓဟူးနေ့မှာ ကျင်းပသွားဖို့
ရှိတယ်လို့ မလေးရှားနိုင်ငံခြားရေးဝန်ကြီးက ပြောပါတယ်။
လာမယ့်ကြာသပတေးနေ့
ဝါရှင်တန်ဒီစီမြို့တော်မှာ ကျင်းပမယ့် အမေရိကန် အာဆီယံ ထိပ်သီးညီလာခံမတိုင်ခင် အဖွဲ့ဝင်နိုင်ငံခြားရေးဝန်ကြီးတွေအားလုံး
တွေ့ဆုံသွားမှာဖြစ်ပြီး မြန်မာ့နိုင်ငံရေး အကျပ်အတည်းနဲ့. ပတ်သက်လို့ အမြင်သဘောထားတွေကို
ဆွေးနွေးသွားကြမှာ ဖြစ်တယ်လို့လည်း ဆိုပါတယ်။
ဒါပေမဲ့ ဒီအစည်းအဝေးကို ဘယ်လိုကျင်းပသွားမလဲဆိုတာနဲ့
အမေရိကန် အာဆီယံ ထိပ်သီးညီလာခံကို ဖိတ်ကြားခြင်းမခံရတဲ့ မြန်မာနိုင်ငံခြားရေးဝန်ကြီးကော
ပါဝင်ဆွေးနွေးခွင့်ရမလားဆိုတာ တိတိကျကျ မသိရသေးပါဘူး။
မြန်မာအာဏာသိမ်းစစ်တပ်ဟာ
အာဆီယံဘုံသဘောတူညီချက် ငါးချက်ကို အကောင်အထည်ဖော်ဆောင်ရွက်ရာမှာ ပူးပေါင်းတာ
မရှိတဲ့အတွက်ကြောင့်မလို့ သိသာတဲ့ တိုးတက်ပြောင်းလဲမှုတွေ မတွေ့ရပြီးနောက်ပိုင်း အခုလို
အလွတ်သဘောတွေ့ဆုံဖို့ စီစဥ်ရတာ ဖြစ်တယ်လို့ မလေးရှားနိုင်ငံခြားရေးဝန်ကြီး Datuk Seri Saifuddin Abdullah က ပြောပါတယ်။
တဆက်တည်းမှာပဲ ကုလသမဂ္ဂ အတွင်းရေးမှူးချုပ်ရဲ့
မြန်မာနိုင်ငံဆိုင်ရာ အထူးကိုယ်စားလှယ် နိုလင်းဟေဇာကို အသိအမှတ်မပြုတဲ့ မြန်မာ စစ်ကောင်စီရဲ့
လုပ်ရပ်ကို စိတ်ပျက်မိတယ်လို့ မလေးရှားက ထုတ်ဖော်ပြောဆိုပါတယ်။
စစ်ကောင်စီရဲ့ ဒီလုပ်ဆောင်မှုကြောင့် ကမ္ဘောဒီးယားနိုင်ငံ
ဖနွမ်းပင်မြို့မှာ မေလ ၆ ရက် သောကြာနေ့က ကျင်းပခဲ့တဲ့ မြန်မာနိုင်ငံအတွက်
လူသားချင်းစာနာထောက်ထားရေး အကူအညီတွေ ပေးအပ်ဖို့ အာဆီယံအစည်းအဝေးမှာ
အထူးကိုယ်စားလှယ် မစ္စ နိုလင်းဟေဇာ ဖိတ်ကြားခြင်း မခံခဲ့ရဘူးလို့ မလေးရှား နိုင်ငံခြားရေးဝန်ကြီးက
ပြောပါတယ်။
အာဆီယံ ဘုံသဘောတူညီချက် ၅ ချက်ကို အကောင်အထည်ဖော်ဆောင်ရွက်နေမှုကို
မြန်မာဘက်က ဆက်လက် တားဆီးနေတဲ့အတွက် စိုးရိမ်မကင်းဖြစ်မိတယ်လို့လည်း ဆိုပါတယ်။
မြန်မာနိုင်ငံဆိုင်ရာ အာဆီယံ
အထူးကိုယ်စားလှယ် အနေနဲ့လည်း အမျိုးသားညီညွတ်ရေးအစိုးရ (NUG)၊
အမျိုးသားညီညွတ်ရေး အတိုင်ပင်ခံကောင်စီ NUCC
အပါအဝင် ပါဝင်သင့်ပါဝင်ထိုက်သူတွေအားလုံးနဲ့ ထိတွေ့ဆက်ဆံသွားဖို့
ဝန်ကြီး Datuk Seri Saifuddin Abdullah က ထပ်လောင်းပြောဆိုပါတယ်။
ဒါဟာ အာဆီယံဘုံသဘောတူညီချက် ၅
ချက်နဲ့အညီ လုပ်ဆောင်တာ ဖြစ်ပြီး လက်ရှိအခြေအနေအရ မြန်မာနိုင်ငံကို ပိုမို
ထောက်ခံအားပေးဖို့နဲ့ စည်းလုံးညီညွတ်ကြောင်း ပြသဖို့အတွက် ပါဝင်သူအားလုံးနဲ့ တွေ့ဆုံဆွေးနွေးဖို့
လိုအပ်တယ်လို့လည်း ဆိုပါတယ်။
“ဒါပေမဲ့ မလေးရှားနိုင်ငံအနေနဲ့ တဖက်ဖက်ကို
ရွေးချယ်ရပ်တည်တာ မဟုတ်ဘူး။ အာဆီယံအဖွဲ့နဲ့ စစ်ကောင်စီ ထိတွေ့ဆက်ဆံတာတွေကိုလည်း
ရပ်တန့်သွားမှာ မဟုတ်ဘူး။ ဒါပေမဲ့ NUG
အစိုးရဟာ ရွေးကောက်ပွဲကနေတဆင့် ပေါ်ပေါက်လာတဲ့ အစိုးရဖြစ်တယ်။ NUCC ကလည်း
အဖွဲ့အစည်းတွေ ပေါင်းစုံ၊ လွှတ်တော်ကိုယ်စားလှယ်တွေ၊ အရပ်ဖက်အဖွဲ့အစည်းတွေ၊
တိုင်းရင်းသားအဖွဲ့တွေနဲ့ ဒေသခံအဖွဲ့အစည်းတွေနဲ့ ဖွဲ့စည်းထားတာ
ဖြစ်တယ်ဆိုတဲ့အချက်ကို ထည့်သွင်းစဥ်းစားဖို့လိုတယ်” လို့လည်း မလေးရှားနိုင်ငံခြားရေးဝန်ကြီးက
ထောက်ပြပါတယ်။
မေလ ၆ ရက်နေ့မှာ ကျင်းပခဲ့တဲ့ အာဆီယံ
အစည်းအဝေးမှာလည်း မြန်မာနိုင်ငံဆိုင်ရာ အာဆီယံအထူးကိုယ်စားလှယ် ဖြစ်တဲ့
ကမ္ဘောဒီးယားနိုင်ငံခြားရေးဝန်ကြီး Park
Sokhonn က မြန်မာနိုင်ငံတွင်းကို လူသားချင်းစာနာထောက်ထားရေး
အကူအညီတွေပေးအပ်ဖို့ အခက်အခဲများစွာ ရှိနေပေမယ့် တိုးတက်ပြောင်းလဲမှုတွေ
ရှိလာခဲ့ပြီလို့ ပြောပါတယ်။
လက်ရှိအာဆီယံ အလှည့်ကျ ဥက္ကဌ
ကမ္ဘောဒီးယားဝန်ကြီးချုပ် ဟွန်ဆန်ကလည်း အာဆီယံအထူးကိုယ်စားလှယ်ကို
ဒေါ်အောင်ဆန်းစုကြည်နဲ့ တွေ့ခွင့်ပြုဖို့ မြန်မာအာဏာသိမ်းစစ်ခေါင်းဆောင်ကို
တရားဝင် တောင်းဆိုထားခဲ့ပေမဲ့ စစ်ကောင်စီကတော့ တွေ့ခွင့်မပြုသေးဘူးလို့ ပြန်လည်ပြောဆိုထားပါတယ်။
ဓာတ်ပုံ ရင်းမြစ်, Getty Images
