အင်အားသုံးဖြိုခွင်းဖမ်းဆီးမှုတွေ၊ လူမစုနိုင်အောင် ပစ်ခတ်နှိမ်နင်းမှုတွေ ရှိနေပေမယ့် မတ်လ ၃ ရက် မနက်အစောပိုင်းတည်းက ရန်ကုန်မှာ စမ်းချောင်း၊ အင်းစိန် အပါအဝင် မြို့နယ်တချို့မှာ စစ်အာဏာသိမ်းဆန့်ကျင်ဆန္ဒပြပွဲတွေ ဆက်ရှိနေပါတယ်။
ရန်ကုန်အင်းစိန်လမ်းမကြီးပေါ် လုံခြုံရေးတင်းကြပ်ထားပြီး ပစ်ခတ်မှုအချို့ရှိနေတာပါ။ ဒါပေမဲ့ ကန်လမ်းနဲ့ ဘူတာရုံလမ်းထဲမှာတော့ ဆန္ဒပြနေကြပါတယ်။
"လမ်းမကြီးပေါ်တော့ တက်မရဘူး။ ဒီအခုလမ်းတွေထဲတော့ ပစ်ခတ်ဖြိုခွဲတာတော့မရှိသေးဘူး" လို့ ဒေသခံတစ်ဦးက ဘီဘီစီကိုပြောပါတယ်။
မနေ့ည အင်တာနက်ဖြတ်တောက်ချိန်ကစပြီး ရန်ကုန်အင်းစိန်လမ်းမပေါ်မှာ အရပ်ဝတ်၊ အိမ်စီးကားတွေနဲ့ လုံခြုံရေးလှည့်လည်တာ၊ လမ်းမှာတားထားတဲ့ စည်းတွေကို ဖြိုဖျက်တာတွေအပြင် တိုက်ပေါ်နေအိမ်တွေကို လက်နှိပ်ဓာတ်မီးတွေနဲ့ လိုက်လံထိုးကြည့်တာတွေရှိခဲ့ပါတယ်။
အင်းစိန်ဈေးရှေ့နဲ့ထောင်ပတ်ဝန်းကျင်မှာ ထိုင်သပိတ်လုပ်ပြီး ဆန္ဒပြနေတဲ့ အင်းစိန်မီးရထား CDM ဝန်ထမ်းတွေကို ရဲတပ်ဖွဲ့ကဖြိုခွဲမှုတွေလုပ်နေပါတယ်။
အဲဒါကြောင့်အင်းစိန်ပေါက်တောဝ အောင်ဇေယျတံတားထိပ်ကရပ်ကွက်နေပြည်သူတွေက ရဲတပ်ဖွဲ့ဝင်မလာနိုင်အောင်အကာအရံတွေတားဆီးထားပြီးမွန်းလွဲပိုင်းအထိ ထိပ်တိုက်တွေ့မယ့်အခြေအနေရှိနေဆဲပါ။
စမ်းချောင်းမှာ ဆန္ဒပြသူတွေကို ရဲနဲ့ စစ်တပ်က ရပ်ကွက်တွေလမ်းကြားတွေထဲအထိ ဝင်ရောက်ဖမ်းဆီးနေပြီး လမ်းကြားတွေထဲမှာတောင် ပစ်ခတ်တာတွေလုပ်နေတယ်လို့ အဲဒီလမ်းတွေထဲမှာ နေထိုင်သူတွေက ဘီဘီစီကို အတည်ပြုပါတယ်။
ချမ်းသာလမ်း၊ ဇဗ္ဗူရစ် လမ်းတွေထဲအထိ ဝင်ဖမ်းတာဖြစ်ပြီး လုံထိန်းတွေက အခုမှ ငိုမနေနဲ့ဆိုပြီး ပြောဆိုတာမျိုးလည်းကြားရတယ်လို့ မျက်မြင်တွေက ပြောပါတယ်။
ဆန္ဒပြလူငယ် လေးဦးထက်မနည်း ဖမ်းဆီးခံရတယ်လို့လည်း မျက်မြင်တွေ့ရှိသူတွေက ဘီဘီစီကိုပြောပါတယ်။
ကျွန်းတောလမ်းမှာလည်း သပိတ်နဲ့ လုံထိန်းတွေ မတ်လ ၃ ရက် နံနက်ပိုင်း မှာ ထိပ်တိုက်တွေ့နေတဲ့အခြေအနေဖြစ်ပြီး ရဲတပ်ဖွဲ့က အသံဗုံးနဲ့ မျက်ရည်ယိုဗုံးတွေ အသုံးပြုခဲ့ပေမယ့် လူစုကွဲမသွားဘဲ ဆန့်ကျင်ဆန္ဒပြနေဆဲဖြစ်ပါတယ်။
လတ်တလောမှာ အဖမ်းခံရတဲ့ဆန္ဒပြ လူငယ် ၂၀ ဝန်းကျင်ရှိပြီး ပန်းခြံလမ်းထိပ်မှာ စုစည်းထားရှိတယ်လို့ သိရပါတယ်။
ပဲခူးမြို့မှာလည်း လုံခြုံရေးယူနေတဲ့ အာဏာပိုင်တွေရှိနေပေမယ့် စစ်အာဏာရှင်ဆန့်ကျင်ရေးဆိုပြီး ဆက်လက်ဆန္ဒထုတ်ဖော်နေကြပါတယ်။ အင်အားသုံးဖြိုခွဲတာတွေမရှိခင်မှာပဲ ဆန္ဒပြလူထုရဲ့ လုံခြုံရေးအရ မြို့ပတ်ဆန္ဒပြပြီးတဲ့နောက် လူစုခွဲလိုက်တယ်လို့ ဆန္ဒပြပွဲဦးဆောင်သူတွေကပြောပါတယ်။
မန္တလေးမှာလည်း ဒီနေ့ မနက်ပိုင်း ၈၄ လမ်း လမ်း ၃၀ ဆန္ဒပြပွဲကို ရဲနဲ့စစ်တပ်က ဖြိုခွင်းတာတွေပြုလုပ်ခဲ့ပါတယ်။ဒါပေမဲ့ မန္တလေးမြို့မှာ စစ်အာဏာသိမ်း ဆန့်ကျင်ဆန္ဒပြပွဲကို အသွင်ပြောင်းပြုလုပ်လာကြတာတွေလည်းရှိနေပါတယ်။
ကျန်းမာရေးအဖွဲ့ ၊ ပညာရေးအဖွဲ့နဲ့ မြတောင်စစ်ကြောင်း အရပ်ဖက်အဖွဲ့စည်းတွေကသပိတ်စစ်ကြောင်းတွေထွက်လာတာပါ။
ဆိုင်ကယ်ယာဉ်တန်းအဖွဲ့လိုက်နဲ့ ပြုလုပ်သလို ထိုင်သပိတ်တွေနဲ့ လမ်းမပေါ် စတစ်ကာနင်းခြေ လှုပ်ရှားဆန့်ကျင်ဆန္ဒပြတာတွေ ပြုလုပ်ပါတယ်။
ကချင်ပြည်နယ်၊ မြစ်ကြီးနားမြို့မှာလည်း ဒီမနက်ပိုင်းက ဆန္ဒပြတဲ့သူတွေကို ရဲနဲ့ စစ်တပ်က သေနတ် ဆယ်ချက်ထက်မနည်း ပစ်ဖောက်ပြီး လူစုခွဲဖို့ ကြိုးစားခဲ့သလို လမ်းသွယ်လမ်းကြားတွေထဲထိ ဝင်ရောက်ရှာဖွေဖမ်းဆီးဖို့ ကြိုးစားခဲ့ပါတယ်။
ဖားကန့်မြို့၊မြို့မ ပန်းခြံရှေ့ လမ်းမပေါ်မှာ ဆန္ဒထုတ်ဖော်မယ့် အေးမြသာယာစုပေါင်စစ်ကြောင်းကို ရဲတပ်ဖွဲ့က မျက်ရည်ယိုဗုံး၊အသံဗုံးတွေနဲ့ဖြိုခွင်း ခဲ့တယ်လို့မျက်မြင်ကြုံတွေ့ရသူကဘီဘီစီကိုပြောပါတယ်။
တခါ လုံးခင်း ဆန္ဒပြစစ်ကြောင်းကိုလည်း မွန်းလွဲ ၁၂ နာရီခန့်မှာ ရဲနဲ့စစ်တပ်က ကျောဘက်ကနေပိတ်ပြီးဖြိုခွဲဖို့ ပြင်ဆင်နေတဲ့အခြေအနေမှာရှိနေတယ်လို့ ဒေသခံတွေက ပြောပါတယ်။
မနေ့က အင်အားသုံးဖြိုခွင်းခံရတဲ့ ကလေးမြို့မှာတော့ မြို့ခံလူထုက ဒီနေ့မှာလည်း ဆက်ပြီး ဆန္ဒပြခဲ့ကြပါတယ်။ မြို့ရဲ့ ပင်မ လမ်းမကြီးတွေပေါ်မတက်ဘဲ ရပ်ကွက်လမ်းတွေထဲ လှည့်လည် ဆန္ဒပြခဲ့ကြပြီး မနက် ၁၁ နာရီခန့်မှာ လူထုခွဲခဲ့ကြတယ်လို့ သိရပါတယ်။
မနေ့ဆန္ဒပြပွဲမှာ ရင်ဘဏ်ဒဏ်ရာရခဲ့သူ လူငယ်အမျိုးသားကို မန္တလေးကို ပို့ထားရတယ်လို့ သိရပါတယ်။
မြင်းခြံမြို့၊ မြို့လယ်ပိုင်းမှာ ဒီနေ့ မနက်ပိုင်းက စစ်အာဏာသိမ်းဆန့်ကျင်သပိတ်စစ်ကြောင်းကို မျက်ရည်ယိုဗုံး၊ အသံဗုံးတွေနဲ့သာမက ရာဘာကျည်တွေနဲ့ အကြမ်းဖက်ဖြိုခွဲခံခဲ့ရတယ်လို့ ဒေသခံတစ်ဦးက ဘီဘီစီကိုပြောပါတယ်။
ဒီလို အကြမ်းဖက်ဖြိုခွဲခံရတာကြောင့် ပြည်သူ အယောက် (၂၀) ထိခိုက်ဒဏ်ရာရရှိထားပြီး ယာယီပရဟိတ ဆေးခန်းမှာ ကုသပေးနေပါတယ်။
"အခု ၁၂ မထိုးခင်လေးမှာ အယောက် ၂၀ ရှိပြီ။ ခြေထောက်ကျိုး၊ လက်မောင်းကျည်မှန်၊ ဗိုက်ပေါက်တာတွေရှိတယ်။ ဒါကတော့ ရာဘာကျည်လို့ ထင်ရတယ်။
ဒါပေမဲ့ တနေရာမှာတော့ ကျည်အစစ်နဲ့ တစ်ယောက်ထိတယ်ကြားတယ်။ သေချာအောင်ထပ်မေးနေတယ်။ အခုလည်း ဒီပရဟိတဆေးခန်းကို စစ်သား ၁၀ ယောက်ကျော်က လာဝိုင်းလို့ ရပ်ကွက်နဲ့ ပြည်သူတွေနဲ့ အခြေအနေ တင်းမာနေတယ်" လို့ သူက ဘီဘီစီကိုပြောပါတယ်။
မနက် (၉) နာရီ ကျော်ကစကာ သပိတ်စစ်ကြောင်း အကြမ်းဖက်ဖြိုခွဲခံရတာဖြစ်ပြီး မွန်းတည့် (၁၂) နာရီဝန်းကျင်အထိ ပစ်ခတ်သံတွေကြားနေရဆဲဖြစ်တယ်လို့ ဆိုပါတယ်။
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
