ရခိုင်ပြည်နယ်ဝန်ကြီးချုပ် ဉီးညီပုကို အွန်လိုင်းကနေ ဒုတိယအကြိမ် ရုံးထုတ်, တရားရုံးကိုလွတ်လပ်စွာလာရောက်အမှုရင်ဆိုင်ခွင့်တောင်းဆို
ရခိုင်ပြည်နယ် ဝန်ကြီးချုပ် ဦးညီပုကို မတ်လ ၄ ရက် မနက်ပိုင်းက စစ်တွေမြို့နယ်တရားရုံးမှာ အွန်လိုင်းဗီဒီယိုကနေ တစ်ဆင့် ရုံးထုတ်တာတွေပြုလုပ်ခဲ့တယ်လို့ အမှုလိုက်ပါဆောင်ရွက်နေတဲ့ တရားလွှတ်တော်ရှေ့နေ ဦးမျိုးမြတ်ဟိန်း(ခ) ဦးငြိမ်းချမ်းက ပြောပါတယ်။
ဒီကနေ့ရုံးထုတ်မှာတော့ အမှုနဲ့ပတ်သက်လို့ CMP လို့ခေါ်တဲ့ မှုခင်းစီမံခန့်ခွဲမှုကိစ္စတွေကို ပြုလုပ်ခဲ့တာဖြစ်ပြီး ဦးညီပုနဲ့ ရှေ့နေတို့စကားပြောဆိုခွင့်တွေရရှိခဲ့ရာမှာတော့ ဦးညီပုက သူ့ကိုအခုလိုမျိုး အွန်လိုင်းဗီဒီယိုကနေတစ်ဆင့် ရုံးထုတ်တာမျိုး မဟုတ်ဘဲ လွတ်လပ်စွာနဲ့ တရားရုံးကိုလာရောက်ပြီး အမှုရင်ဆိုင်ခွင့်တယ်ရချင်တယ်လို့ တရားရုံးကိုတင်ပြတောင်းဆိုခဲ့ တယ်လို့ သိရပါတယ်။
ဝန်ကြီးချုပ်ဦးညီပုဟာ စစ်အာဏာသိမ်းခံရပြီး ဂွမြို့ကသူ့ရဲ့နေအိမ်မှာ အကျယ်ချုပ်နဲ့နေထိုင်နေခဲ့ရာကနေ ဖေဖော်ဝါရီ ၁၀ ရက်နေ့ည ၁၀ နာရီခွဲဝန်းကျင်မှာ ပြန်လည်ဖမ်းဆီးခြင်းခံလိုက်ရတာဖြစ်ပြီး ရာဇသတ်ကြီးဥပဒေပုဒ်မ ၅၀၅ (ခ) နဲ့ စစ်တွေမြို့နယ်တရားရုံးမှာ တရားစွဲဆိုခံနေရတာလည်းဖြစ်ပါတယ်။
အမျိုးသားဒီမိုကရေစီအဖွဲ့ချုပ် NLD ပါတီကနေ ထုတ်ပြန်ထားတဲ့ ထုတ်ပြန် ချက်တစ်စောင်နဲ့ပတ်သက်လို့ ၅၀၅ (ခ)နဲ့ အမှုဖွင့်ခံထားရတာဖြစ်ပြီး ပြီးခဲ့တဲ့ ဖေဖော်ဝါရီ ၂၂ ရက်နေ့က အွန်လိုင်းဗီဒီယိုနဲ့ ပထမအကြိမ်ရုံးထုတ်ခဲ့ပါတယ်။
နောက်တကြိမ် ရုံးချိန်းကို လာမယ့် မတ်လ ၁၇ ရက်နေ့ကို ထပ်မံချိန်းဆိုလိုက် တယ်လို့ သိရပါတယ်။ ပထမအကြိမ်ရုံးချိန်းတုန်းက ဦးညီပုကို စစ်တွေအကျဉ်းထောင်မှာထားရှိတယ်လို့ ချုပ်ရက်ရမန်ယူတဲ့စာအရသိခဲ့ရပေမယ့် လက်ရှိမှာတော့ ဒေသကွပ်ကဲရေးဌာနချုပ်-စစ်တွေ (ဒကစ)တပ်မထဲမှာထားရှိတာကိုသိခဲ့ရတယ်လို့ ရှေ့နေ ဦးငြိမ်းချမ်းက ပြောပါတယ်။
အခုလို အွန်လိုင်းဗီဒီယိုကနေတစ်ဆင့် ရုံးထုတ်တာတွေလုပ်နေတဲ့အတွက် အမှုသည်နဲ့ရှေ့နေအကြားထိတွေ့ခွင့်မရရှိသလို အမှုကိစ္စတွေဆောင်ရွက်ရာမှာ နှစ်ဦးနှစ်ဖက် ပွင့်ပွင့်လင်းလင်းပြောဆိုရမယ့် ကိစ္စတွေကိုလည်း ပြောဆိုလို့မရတဲ့အတွက် ရသင့်တဲ့အခွင့်အရေးတွေကို ရချင်တယ်လို့ ရှေ့နေဘက်က ပြောပါတယ်။
ဓာတ်ပုံ ရင်းမြစ်, CJ
