کورونا: امریکہ میں کیلیفورنیا کے بعد فلوریڈا سب سے زیادہ متاثرہ ریاست بن گئی

کورونا وائرس سے دنیا بھر میں متاثرہ افراد کی تعداد ایک کروڑ 60 لاکھ سے تجاوز کر گئی ہے. فلوریڈا میں مزید 9300 متاثرین کی تصدیق ہوئی ہے۔ کیلیفورنیا کے بعد یہ امریکہ کی سب سے زیادہ متاثرہ ریاست بن گئی ہے۔

لائیو کوریج

23 جولائی 2020دنیا کے غریب ترین افراد کو عارضی آمدنی کی فراہمی کورونا کا پھیلاؤ کم کر سکتی ہے، اقوامِ متحدہ
،تصویر کا ذریعہReuters
اقوامِ متحدہ کے ترقیاتی پروگرام (یو این ڈی پی) نے کہا ہے کہ دنیا کے 132 ممالک میں موجود 2.7 ارب غریب ترین لوگوں کے لیے عارضی طور پر ایک بنیادی رقم کی فراہم کورونا وائرس کا پھیلاؤ سست کر سکتی ہے کیونکہ اس سے انھیں گھر سے باہر نکلنے کی ضرورت کم محسوس ہوگی۔
خبر رساں ادارے روئٹرز کے مطابق جمعرات کو جاری کی گئی اس رپورٹ میں تین آپشن دیے گئے ہیں: یا تو موجودہ اوسط آمدنی میں اضافہ، ملک بھر میں معیارِ زندگی کے فرق کو مدِنظر رکھتے ہوئے یکمشت مگر مختلف رقوم کی ادائیگی، یا ملک بھر میں ہر جگہ یکساں رقم کی یکمشت ادائیگی۔
یو این ڈی پی کے ایڈمنسٹریٹر آخیم سٹائنر نے کہا 'غیر معمولی سماجی اور اقتصادی اقدامات غیر معمولی حالات کا تقاضہ ہیں۔ دنیا کے غریب ترین لوگوں کے لیے عارضی طور پر بنیادی آمدنی کی فراہمی ایک آپشن ہے۔ بیل آؤٹ اور بحالی کے منصوبے صرف بڑے کاروبار اور منڈیوں پر مرتکز نہیں رہ سکتے۔‘
جانز ہاپکنز یونیورسٹی کے اعداد و شمار کے مطابق کورونا وائرس سے دنیا بھر میں ایک کروڑ 52 لاکھ سے زیادہ افراد متاثر ہو چکے ہیں جبکہ چھ لاکھ 23 ہزار سے زیادہ اموات ہو چکی ہیں۔
اقوامِ متحدہ نے خبردار کیا ہے کہ وبا اور اس سے منسلک عالمی کساد بازاری سے 1990 کے بعد سے پہلی مرتبہ عالمی طور پر غربت میں اضافہ ہو سکتا ہے جبکہ 26 کروڑ 50 لاکھ لوگوں پر فاقوں کی نوبت آ سکتی ہے۔
دنیا کی 20 بڑی معیشتوں نے اپریل میں اعلان کیا تھا کہ دنیا کے غریب ترین ممالک سے قرضوں کی وصولی رواں سال کے اختتام تک کے لیے مؤخر کی جائے گی تاہم اقوامِ متحدہ کے سیکریٹری جنرل انتونیو گتیریس نے مطالبہ کیا ہے کہ تمام ترقی پذیر اور اوسط آمدن والے ممالک کو قرضوں میں ریلیف فراہم کیا جائے۔
جی 20 ممالک کی جانب سے کیے گئے اس فیصلے پر عملدرآمد مشکل ہے کیونکہ اب تک اس کے لیے اہل 73 میں سے صرف 42 ممالک نے آمادگی ظاہر کی ہے جس سے 12 ارب ڈالر کی بچت کے وعدے کے بجائے صرف 5.3 ارب ڈالر ہی بچ سکے ہیں۔
23 جولائی 2020سمارٹ لاک ڈاؤن: حکومت کیسے پتا چلاتی ہے کس علاقے کو بند کرنا ہے؟
23 جولائی 2020چین لاطینی امریکی ممالک کو کورونا ویکسین کے لیے ایک ارب ڈالر قرضہ دے گا
،تصویر کا ذریعہReuters
میکسیکو کی وزارت خارجہ نے اعلان کیا ہے کہ چین نے لاطینی امریکہ اور کیریبیئن خطے کے ممالک کو کورونا وائرس کی ویکسین کی دستیابی یقینی بنانے کے لیے ایک ارب ڈالر قرضہ فراہم کرے گا۔
اپنے ایک بیان میں وزارت کا کہنا تھا کہ چین نے لاطینی امریکہ اور کیریبیئن کے چند ممالک کے وزرا کے ساتھ ایک آن لائن بیٹھک کے دوران اس امداد کا وعدہ کیا ہے۔
اعلامیے کے مطابق اس میٹنگ میں ارجنٹینا، بارباڈوس، چلی، کولمبیا، کوسٹا ریکا، کیوبا، ڈومینیکن ریپبلک، ایکواڈور، پاناما، پیرو، ٹرینیڈاڈ اینڈ ٹوباگو، اور یوراگوئے نے شرکت کی۔
اس ملاقات کی سربراہی میکسیکو کے وزیر خارجہ مارسیلو ایبرارڈ اور چین کے وزیر خارجہ وینگ یی نے کی جہاں وزیروں نے وائرس سے نمٹنے کے لیے بہتر تعاون پر گفتگو کی۔
تاہم چینی وزیر خارجہ نے اس حوالے سے کوئی تفصیلات نہیں دیں کہ یہ ویکسین کب دستیاب ہوگی یا تقسیم کی جائے گی۔
23 جولائی 2020پاکستان میں کورونا متاثرین کی مجموعی تعداد دو لاکھ 69 ہزار سے زیادہ, گذشتہ 24 گھنٹوں میں 32 اموات
،تصویر کا ذریعہGetty Images
بی بی سی اردو کی کورونا وائرس سے متعلق لائیو کوریج جاری ہے۔ پاکستان میں اب تک کے اعداد و شمار کے مطابق دو لاکھ 69 ہزار 191 افراد کورونا وائرس سے متاثر ہو چکے ہیں جبکہ اموات کی تعداد پانچ ہزار 709 ہے۔
گذشتہ 24 گھنٹوں میں ملک بھر میں 32 افراد اس مرض کے باعث ہلاک ہوئے ہیں۔
تاہم حکام کے مطابق دو لاکھ 13 ہزار 175 افراد اس مرض سے صحتیاب بھی ہوئے ہیں جو کہ 79 فیصد کے قریب ہے۔
23 جولائی 2020بریکنگ, پاکستان: صوبہ پنجاب میں کورونا کے 313 نئے کیس، مزید 5 اموات
پاکستان کے صوبہ پنجاب میں کورونا کے 313 نئے کیس سامنے آئے ہیں جس کے بعد صوبے میں متاثرین کی تعداد 91129 ہو گئی ہے۔
گذشتہ 24 گھنٹوں کے دوران مزید 5 اموات کے ساتھ صوبے میں وائرس سے ہونے والی اموات کی تعداد 2100 ہو گئی ہے۔
اب تک پنجاب میں کورونا کے 66802 افراد کورونا وائرس سے صحت یاب بھی ہو چکے ہیں۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
22 جولائی 2020پاکستان کے زیر انتظام کشمیر: کورونا وائرس 24 نئے مریض, ایم اے جرال ، صحافی
،تصویر کا ذریعہM A JARRAL
پاکستان کے زیر انتظام کشمیر میں گذشتہ چوبیس گھنٹوں کے دوران 467 افردا کے ٹیسٹ کیے گے جن میں 8 خواتین سمیت 24 افراد میں کورونا وائرس کی تصدیق ہوئی ہے جبکہ مظفرآباد میں ایک مریض چل بسا۔
اب اس خطے میں کورونا وائرس سے ہلاک ہونے والے مریضوں کی تعداد 48 ہوگی ہے۔
محکمہ صحت کے فوکل پرسن برائے کووڈ 19 ڈاکٹر ندیم الرحمن کے مطابق اس خطے میں 1961 افراد میں کورونا وائرس سے متاثر ہوئے ہیں۔
ان کے مطابق کورونا وائرس سے متاثر ہونے والوں میں ایک پیرا میڈیکس سٹاف کا اہلکار بھی شامل ہے۔
ڈاکٹر ندیم الرحمن کے مطابق کورونا وائرس سے متاثر ہونے والی 3 خواتین سمیت 9 افراد کا تعلق مظفرآباد، 2 خواتین سمیت 5 کا تعلق راولاکوٹ، 2 خواتین سمیت 3 کا میرپور اور ایک خاتون سمیت 2 کا بھمبر سے ہے۔
ان کے مطابق 53 مریض صحتیاب ہوئے ہیں جس کے بعد اس خطے میں صحتیاب مریضوں کی تعداد 1328 ہوگی ہے۔ ڈاکٹر ندیم الرحمن کے مطابق اب تک اس خطے میں 23399 مشتبہ افراد کے ٹیسٹ کیے گے ہیں۔
22 جولائی 2020کوویڈ ۔19: کرناٹک ، تامل ناڈو اور کیرالہ کے لیے بدترین دن
،تصویر کا ذریعہGetty Images
انڈیا کی ریاستوں کرناٹک ، تمل ناڈو اور کیرالہ ، تینوں میں کورونا انفیکشن کے کیسز میں تیزی دیکھنے میں آئی ہے۔
تینوں ریاستوں کے محکمہ صحت نے بتایا ہے کہ بدھ کے روز ان کے دن میں سب سے زیادہ کورونا انفیکشن کے کیسز ریکارڈ کیے گئے۔
گذشتہ 24 گھنٹوں کے دوران ، کرناٹک میں کووڈ 19 کے 4،764 نئے کیس سامنے آئے ہیں۔ کرناٹک میں اب تک 75،800 سے زیادہ افراد میں کورونا انفیکشن کی تصدیق ہوچکی ہے اور کووڈ ۔19 کی وجہ سے 1،519 افراد لقمہ اجل بن چکے ہیں۔
تمل ناڈو میں کووڈ ۔19 کے 5،849 نئے کیس رپورٹ ہوئے ہیں۔ ابھی تک ایک لاکھ 86 ہزار سے زیادہ تصدیق شدہ کورونا انفیکشن ہو چکے ہیں اور کووڈ 19 سے اب تک 3144 افراد لقمہ اجل بن چکے ہیں۔
اسی دوران کیرالہ میں ایک ہی دن میں سب سے زیادہ انفیکشن کے کیسز ریکارڈ کیے گئے۔ ایک دن میں 1038 نئے واقعات رپورٹ ہوئے ہیں۔ ایک ساتھ مل کر متاثرہ افراد کی مجموعی تعداد 15 ہزار سے تجاوز کر چکی ہے۔
منگل کے روز کرناٹک کے وزیر اعلیٰ بی ایس یدیورپا نے کہا تھا کہ ریاست میں مزید کوئی لاک ڈاؤن نافذ نہیں کیا جائے گا کیونکہ لاک ڈاؤن کوئی حل نہیں ہے اور صرف ماسک پہننے اور ایک دوسرے سے فاصلہ رکھنے سے ہی انفیکشن سے بچا جاسکتا ہے۔
22 جولائی 2020بریکنگ, بلوچستان میں کورونا کے 48 نئے کیسز
بلوچستان میں کورونا کے 48 نئے کیسز کے اضافے کے بعد مجموعی کیسز کی تعداد11517ہوگئی ہے۔
مزید ایک مریض کی ہلاکت کے کورونا سے ہلاک ہونے والے افراد کی مصدقہ تعداد 136ہوگئی۔
محکمہ صحت حکومت بلوچستان کے ترجمان ڈاکٹر وسیم بیگ کے مطابق 22 جولائی 2020 کو کورونا کے صرف 231 ٹیسٹ کیے گئے جن میں سے 48 پازیٹو آئے۔
بلوچستان میں اب تک کورونا کے مجموعی طور پر 56139 ٹیسٹ کیے گئے ہیں جن میں سے44622 کے نتائج منفی آئے۔
بلوچستان میں مجموعی طوپر پر128685 افراد کی سکریننگ کی گئی ہے۔ کورونا وائرس سے اب تک 9585 افراد صحت یاب ہوئے ہیں۔
22 جولائی 2020بریکنگ, خیبر پختونخوا: مزید 5 ہلاکتیں اور کورونا وائرس کے 230 نئے مریض
پاکستان کے صوبہ خیبر پختونخوا میں کورونا وائرس میں مبتلا مریض پانچ مریضوں کی ہلاکت کے بعد صوبے میں اب تک ہلاک ہونے والے افراد کی تعداد 1158 ہو گئی ہے۔
حکام کی جانب سے جاری کردہ تحریری بیان میں بتایا گیا ہے کہ اس وقت صوبے میں فعال مریضوں کی تعداد 5882 ہے۔
رپورٹ کے مطابق بدھ کو مزید 230 مریض سامنے آئے جبکہ131 مرییضوں کے صحتیاب ہو گئے ہیں۔
،تصویر کا ذریعہKP GOV
22 جولائی 2020بریکنگ, 24 گھنٹوں میں سندھ میں مزید 1109 افراد کورونا سے متاثر، 19 ہلاکتیں
وزیراعلیٰ سندھ سید مراد علی شاہ نے کورونا وائرس کی صورتحال بیان کرتے ہوئے کہا کہ گذشتہ 24 گھنٹوں میں 10108 ٹیسٹ کیے گئے، جس کے نتیجے میں 1109 نئے کیسز سامنے آئے ہیں۔
انھوں نے کہا کہ اب تک 656593 نمونے ٹیسٹ کئے گئے ہیں اوراب تک کورونا وائرس کے 115213 کیسز صوبے بھر میں رپورٹ ہوئے ہیں۔
وزیراعلیٰ سندھ نے کہا کہ گذشتہ 24 گھنٹوں میں مزید 19 مریض ہلاک ہوئے،جس کے نتیجے میںہلاکتوں کی مجموعی تعداد 2060 ہوچکی ہے۔
انھوں نے کہا کہ اس وقت 16927 مریض زیر علاج ہیں۔ زیر علاج مریضوں میں 16165 مریض گھروں اور 61 آئسولیشن سینٹرز جبکہ 107 مریض مختلف ہسپتالوں میں ہیں۔
انہوں نے کہا کہ اس وقت 495 مریضوں کی حالت تشویشناک بتائی گئی ہے۔ 72 مریض وینٹی لیٹرز پر ہیں۔
گذشتہ 24 گھنٹوں میں 1929 مریض صحتیاب ہوکر معمول کی زندگی کی جانب لوٹ آئے ہیں اور صحت یاب ہونے والوں کی کُل تعداد اس وقت تک 96226 ہے۔
22 جولائی 2020نیپال میں چار ماہ بعد لاک ڈاؤن ختم
،تصویر کا ذریعہAFP
نیپال حکومت نے باضابطہ طور پر لاک ڈاؤن کے خاتمے کا اعلان کیا ہے، لیکن کہا جاتا ہے کہ اسکول اور تھیٹر تاحال بند رہیں گے۔
لاک ڈاؤن کا اعلان مارچ میں نیپال میں کورونا انفیکشن کے دو واقعات کے بعد کیا گیا تھا۔
نیپال میں اب تک تقریبا 18 ہزار افراد میں کورونا انفیکشن کی تصدیق ہوچکی ہے اور کوویڈ 19 کی وجہ سے 40 افراد کی ہلاکت ہوچکی ہے۔
بدھ کے روز ، نیپال حکومت نے کہا کہ لاک ڈاؤن کی تمام پابندیاں اب منسوخ کردی گئیں ہیں، لیکن سکولوں ، تھیٹرز اور ہجوم والے مقامات پر اب بھی پابندی رہے گی۔
یہ بھی کہا گیا ہے کہ بین الاقوامی اور قومی پروازیں بھی نیپال میں 17 اگست سے شروع ہوں گی۔
نیپال انتظامیہ نے کہا ہے کہ بین الاقوامی مسافر، جو نیپال پہنچیں گے یا وہاں سے کسی دوسرے ملک کا سفر کریں گے، انہیں سرٹیفکیٹ دینا ہوگا کہ وہ کورونا سے متاثر نہیں ہیں۔
22 جولائی 2020چمن میں مظاہرین کی جانب سے انسانی ہمدردی کے تحت مال بردار گاڑیوں کو جانے کی اجازت
افغانستان سے متصل سرحدی شہر چمن میں احتجاج کرنے والے مقامی تاجروں اور محنت کشوں نے ان مال بردار گاڑیوں کو جانے کی اجازت دی ہے جو کہ احتجاج کی وجہ سے پھنسی ہوئی تھیں۔ چمن میں مقامی تاجر اور محنت کش روزانہ کی بنیاد پر افغانستان آمدورفت پر پابندی کے خلاف ڈیڑھ ماہ سے زائد کے عرصے سے احتجاج پر ہیں۔
واضح رہے کہ کورونا کی وجہ سے پاک افغان سرحد کو دو مارچ کو بند کیا گیا تھا۔ اس پابندی سے قبل چمن سے تعلق رکھنے والے ہزاروں محنت کش اور تاجر روزانہ کی بنیاد پر افغانستان جاتے اور واپس آتے تھے۔
وفاقی حکومت کی جانب سے بعض سرحدی پابندیوں کو نرم کیا گیا لیکن محنت کشوں اور تاجروں کو روزانہ کی بنیاد پر افغانستان جانے اور واپس آنے پر پابندی کو نہیں ہٹایا گیا۔ جس کے خلاف پہلے مرحلے میں تاجروں اور محنت کشوں نے احتجاج کا سلسلہ شروع کیا۔ دوسرے مرحلے میں انہوں نے چمن میں پاکستان اور افغانستان کے درمیان شاہراہ کو بند کیا جس کے باعث دو طرفہ تجارت اور افغان ٹرانزٹ ٹریڈ کے مال بردار گاڑیوں کے علاوہ نیٹو فورسزکے لیے رسد کی گاڑیوں کی آمدورفت معطل ہوگئی۔
تاہم ڈھائی ہفتے کے بعد بدھ کو مظاہرین نے پھنسی ہوئی گاڑیوں کو جانے کی اجازت دیدی۔
مقامی تاجر رہنما صادق اچکزئی نے بتایا کہ مظاہرین نے پھنسی ہوئی گاڑیوں کو وفاقی یا صوبائی حکومت کے ساتھ کسی مذاکرات کے نتیجے میں نہیں بلکہ عید قریب ہونے کی وجہ سے فقط انسانی ہمدردی کی بنیاد پرچھوڑ دیا۔
انھوں نے بتایا کہ جب تک دو مارچ سے قبل والی صورتحال کو بحال کرکے تاجروں اور محنت کشوں کو روزانہ کی بنیاد پر آمدورفت کی اجازت نہیں دی جاتی اس وقت تک احتجاج کا سلسلہ جاری رہے گا۔
انھوں نے کہا کہ اگر تاجروں اور محنت کشوں کے مطالبات کو تسلیم نہیں کیا گیا تو عید کے احتجاج کو کوئٹہ اور اسلام آباد تک وسعت دی جائے گی۔
22 جولائی 2020تیز بخار کورونا وائرس کی علامات میں سے ایک ہے، کیا آپ کو بخار چیک کرنا آتا ہے؟
22 جولائی 2020کورونا کے باعث کروڑوں بچے ابتدائی تعلیم سے محروم
،تصویر کا ذریعہGetty Images
اقوام متحدہ میں بچوں کے فلاحی ادارے یونیسیف کی ایک حالیہ رپورٹ کے مطابق جنوبی ایشیائی ممالک کے لگ بھگ 125 ملین بچے کورونا وائرس کی وبا کی وجہ سے اپنی ابتدائی تعلیم سے محروم ہوجائیں گے۔
ابتدائی تعلیم کی عمر تقریبا ساڑھے تین سے پانچ سال تک کی ہے جب بچے نرسری اور اس سے قبل کی کلاسوں میں کچھ بنیادی چیزیں سیکھتے ہیں۔
کورونا وائرس کے وبا کے دوران اس عمر گروپ کے بچوں کے خصوصی احتیاط کا مشورہ دیا گیا ہے ، اور بہت سے والدین کا کہنا ہے کہ وہ وبا مکمل طور پر خاتمے کے بعد ہی بچوں کو پری سکول کی کلاسوں میں بھیجنا چاہیں گے۔
یونیسف کے سربراہ ہینریٹا فورے کا کہنا ہے کہ ’لاک ڈاؤن کی وجہ سے بہت سے والدین کو بچوں کی دیکھ بھال کے لیے جدوجہد کرنا پڑی ہے۔‘
غریب ممالک میں ، چھوٹے بچوں والے خاندانوں کا گذارا مشکل ہوگیا ہے۔ نیز، کورونا کی وبا نے بچوں کو تعلیم حاصل کرنے سے روک دیا ہے۔
22 جولائی 2020بریکنگ, امریکہ کا چین پر کورونا وائرس سے متعلق تحقیق چوری کرنے کا الزام
،تصویر کا ذریعہGetty Images
امریکہ کی وزارت قانون نے چین پر الزام لگایا ہے کہ وہ کووڈ 19 کے لیے ویکسین تیار کرنے والی لیبارٹریز کو نشانہ بنانے کے لیے ہیکرز کی مالی معاونت کررہا ہے۔
استغاثہ کا کہنا ہے کہ جنوری میں میساچوسٹس میں ایک بائیوٹیک فرم کی جاسوسی کی گئی تھی جہاں کوویڈ ۔19 کی ممکنہ ویکسین بنانے کی کوشش کی جارہی تھی اس کے ایک ہفتے بعد ہی ہیکرز نے کوویڈ ۔19 پر تحقیق کی تیاری میں میری لینڈ کی ایک کمپنی کو ہیک کیا گیا۔
امریکی عہدے داروں کا کہنا ہے کہ یہ کچھ نجی ہیکر ہیں جن کو چینی انٹلیجنس ایجنسیوں اور چین کی وزارت خارجہ سیکیورٹی کے عہدیداروں سے وقتا فوقتا مدد ملتی ہے۔
گذشتہ ہفتے برطانیہ ، امریکہ اور کینیڈا نے روس پر کوڈ 19 سے متعلق تحقیقی مواد چوری کرنے کا الزام عائد کیا تھا۔
22 جولائی 2020سماجی دوری کیوں ضروری ہے؟
کورورنا وائرس کے پھیلاؤ کو روکنے کے لیے سماجی دوری پر عمل کرنے کی ہدایت کی جاتی ہے۔ یعنی لوگ ایک دوسرے سے جتنا کم ملیں گے اور فاصلہ قائم رکھیں گے تو وائرس کے پھیلاؤ کا خطرہ کم ہو جاتا ہے۔
جانیے کے سماجی دوری قائم رکھنے اور نہ رکھنے کے اثرات کیسے ہوتے ہیں؟
22 جولائی 2020کورونا: دنیا بھر سے تازہ صورتحال
،تصویر کا ذریعہGetty Images
- امریکی صدر ڈونلڈ ٹرمپ نے لوگوں کو متنبہ کیا ہے کہ آنے والے دنوں میں کورونا کی وبا مزید شدید ہو سکتی ہے۔ انھوں نے لوگوں سے کہا کہ چہرے پر ماسک پہننیں۔ اسی دوران ، ایوان نمائندگان کی اسپیکر نینسی پلوسی نے صدر کو تنقید کا نشانہ بناتے ہوئے کورونا وائرس کو 'ٹرمپ وائرس' قرار دیا۔
- اس وبا کے آغاز کے بعد سے آسٹریلیا میں انفیکشن کے کیسوں کی تعداد کے لحاظ سے پچھلے 24 گھنٹوں میں بدترین رہا ہے۔ کوویڈ ۔19 انفیکشن کے 500 سے زیادہ نئے کیسز یہاں رپورٹ ہوئے ہیں۔
- بیلجیئم کے حکام نے خبردار کیا ہے کہ ملک میں کورونا وائرس کے انفیکشن کا دوسرا دور آگیا ہے۔ آئندہ اقدامات پر تبادلہ خیال کے لیے بیلجیم کی قومی سلامتی کونسل کا اجلاس جمعرات کو ہوگا۔
- انفیکشن کے واقعات کے پیش نظر تھائی لینڈ میں ہنگامی صورتحال کو اگست کے آخر تک بڑھا دیا گیا ہے۔ اس دوران وزیر اعظم اس طرح کی میڈیا کوریج کو بھی روک سکتے ہیں جس سے لوگوں میں خوف و ہراس میں اضافہ ہو۔
- برطانیہ کے ماہرین صحت کا کہنا ہے کہ کورونا وائرس 'دہائیوں' سے ہمارے درمیان موجود ہے۔
22 جولائی 2020انڈیا: گھروں میں قرنطینہ کی سہولت کی نگرانی
،تصویر کا ذریعہGetty Images
انڈیا کی ریاست اتر پردیش کے پرنسپل سکریٹری صحت اے ایم پرساد نے کہا ہے کہ ریپڈ رسپانس ٹیم کے ممبر ریاست میں گھر گھر جاکر یہ جائزہ لیں گے کہ وہاں گھروں میں تنہائی کے لیے موزوں ہیں یا نہیں۔
یہ ٹیم گھر سے الگ تھلگ رہنے والوں سے بھی 'انڈر ٹیکنگ' لے گی۔ گھر کی تنہائی میں رہنے والے کسی بھی قسم کے طبی مشورے کے لیے 1800-180-5146 پرفون کرسکتے ہیں۔
دوسری جانب ریاست مدھیہ پردیش کے وزیر صحت ناروتم مشرا نے کہا ہے کہ کورونا انفیکشن کے خطرے کے پیش نظر رواں سال یوم آزادی کے موقع پر روایتی پروگراموں کا انعقاد نہیں کیا جائے گا۔
ریاست مہاراشٹر میں لاک ڈاؤن کے آغاز کے بعد سے، ممنوعہ خلاف ورزیوں کے دو لاکھ سے زیادہ مقدمات درج کیے گئے ہیں۔
22 جولائی 2020بریکنگ, بلوچستان میں طلبہ بغیر امتحان کے پاس
بلوچستان بورڈ آف انٹیر میڈییٹ اینڈ سیکنڈری ایجوکیشن نے بلوچستان کے میٹرک اور انٹر کے طلبا کو امتحان کے بغیر پاس کرنے کا نوٹیفیکیشن جاری کر دیا ہے۔
بورڈ کے چیئرمین پروفیسر محمد یوسف بلوچ کے مطابق یہ قدم کورونا کے باعث تعلیمی اداروں کی طویل بندش کے باعث بلوچستان حکومت کی منظوری سے اٹھایا گیا ہے۔
نوٹیفیکیشن کے مطابق نویں جماعت کے طلبا دسویں جماعت کے لیے پروموٹ کیے جائیں گے جبکہ دسویں جماعت کے طلبا کو امتحان دیے بغیر پاس کیاجائے گا۔ نوٹیفیکیشن میں کہا گیا ہے کہ فرسٹ ایئر کے طلبا کو سیکنڈ ایئر کے لیے پروموٹ کیا جائے گا جبکہ سیکنڈ ایئر کے طلبا بھی امتحان دیے بغیر پاس کردیے جائیں گے۔
جو طلبا نویں سے دسویں جماعت اور فرسٹ ایئر سے سیکنڈ ایئر میں پروموٹ ہوں گے انہیں بعد میں کمپوزٹ امتحان نہیں دینا پڑے گا بلکہ صرف دسویں اور سیکنڈ ایئر کا امتحان دینا پڑے گا۔ نویں جماعت سے دسویں جماعت کے لیے پروموٹ ہونے والے طلبا کو نویں جماعت کے لیے اتنے نمبر دیے جائیں گے جو وہ دسویں جماعت کے امتحان میں حاصل کریں گے۔
جبکہ دسویں جماعت کے طلبا کو پاس کرکے انہیں دسویں جماعت کے لیے اتنے نمبر دیے جائیں گے جتنے انہوں نے نویں جماعت میں حاصل کیے تھے۔
نوٹیفیکیشن کے مطابق فرسٹ ایئر کے طلبا کو سیکنڈ ایئر میں پروموٹ کرتے ہوئے انہیں فرسٹ ایئر کے لیے اتنے نمبر دیئے جائیں گے جو وہ سیکنڈ ایئر کے امتحان میں حاصل کریں گے۔
سیکنڈ ایئر کے طلبا کو پاس کرتے ہوئے انہیں سیکنڈ ایئر کے لیے اتنے نمبر دیئے جائیں گے جتنے انہوں نے فرسٹ ایئر میں حاصل کیئے ہیں۔
میٹرک اور انٹر کے طلبا کو کورونا کے حوالے سے تین فیصد اضافی نمبر دیئے جائیں گے۔ جن طلبا کے نویں اور فرسٹ ایئر کے امتحانات میں تین پرچے کمپارٹ آئے ہیں ان کو فیل نہیں کیا جائے گا بلکہ ان کو ہر پرچے کے لیے صرف پاسنگ مارک دیا جائے گا جو 33 ہیں۔ تاہم کورونا کے حوالے سے صورتحال بہتر ہونے پر ان طلبا کے لیے خصوصی امتحانات کا انعقاد کیا جائے گا جو فرسٹ ایئر میں حاصل کیے جانے والے اپنے نمبروں سے مطمئن نہیں اور وہ ڈویژن امپروومنٹ کا امتحان دینا چاہتے ہیں یا جو فرسٹ ایئر اور سیکنڈ ایئر کا کمپوزٹ امتحان دینا چاہتے یا جو اضافی مضامین میں امتحان دینا چاہتے ہیں۔
،تصویر کا ذریعہBISE Balochistan
،تصویر کا ذریعہBISE Balochistan
22 جولائی 2020کورونا وائرس: بخار، کھانسی اور سانس میں دشواری، اس بیماری کی علامات کیا ہیں اور اس سے کیسے محفوظ رہا جائے؟
دنیا بھر میں کورونا وائرس کا پھیلاؤ جاری ہے اور اب تک مصدقہ متاثرین کی تعداد ایک کروڑ 44 لاکھ اور ہلاکتوں کی تعداد چھ لاکھ سے زیادہ ہے۔ پاکستان پر نظر ڈالیں تو وہاں کورونا سے متاثر ہونے والے افراد کی تعداد دو لاکھ 64 ہزار سے زیادہ ہے جبکہ ساڑھے پانچ ہزار سے زیادہ افراد اس وبا کے نتیجے میں ہلاک ہو چکے ہیں۔
محققین کے مطابق دنیا میں کورونا سے متاثر ہونے والے 80 فیصد افراد میں اس کی معمولی علامات ہی دکھائی دی ہیں اور ایسے لوگ جن میں یہ علامات شدت سے پائی گئیں اقلیت میں ہیں۔
اس بارے میں مزید جاننے کے لیے یہاں کلک کریں