آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا بھر میں کورونا وائرس سے متاثر ہونے والوں کی تعداد 62 لاکھ سے زائد ہے جبکہ ساڑھے تین لاکھ سے زیادہ افراد اس بیماری کے نتیجے میں ہلاک ہوئے ہیں۔ سندھ کے صوبائی وزیر کچی آبادی مرتضیٰ بلوچ کورونا وائرس میں مبتلا رہنے کے بعد انتقال کر گئے ہیں۔
جیسے جیسے لاک ڈاؤن میں نرمی ہو رہی ہے، دنیا بھر میں پہلے سے زیادہ لوگ اپنی حکومت کے مشوروں کے تحت ماسک پہن رہے ہیں۔
عالمی ادارہ صحت نے متنبہ کیا ہے کہ ماسک صرف اس صورت میں مؤثر ثابت ہوتے ہیں جب مناسب طریقے سے پہننے کے ساتھ بار بار ہاتھوں کی صفائی اور سماجی فاصلے کا خیال رکھا جائے۔
سپین میں تین ماہ میں پہلی بار ایک دن میں کورونا کے سب سے کم کیس ریکارڈ کیے گئے ہیں۔
اتوار کے روز سپین میں کورونا کے 96 نئے کیس اور دو اموات ریکارڈ کی گئی ہیں۔
دوسری جانب برطانیہ میں آج 1936 نئے کیس جبکہ 113 اموات ریکارڈ کی گئی ہیں۔ ادھر اٹلی میں کورونا کے 355 نئے کیس جبکہ مزید 75 اموات سامنے آئی ہیں۔
واضح رہے کہ اپریل کے مہینے میں سپین میں ہر روز تقریباً 950 تک اموات جبکہ ہزاروں نئے کیس سامنے آ رہے تھے۔
اب جبکہ دنیا کے کچھ حصوں میں لاک ڈاؤن میں نرمی کی جا رہی ہے، کچھ لوگ اِن بیتے ہوئے دنوں کی جانب دیکھ رہے ہیں کہ ان کے روز و شب اس لاک ڈاؤن کے دوران حیران کن حد تک کتنی تیزی سے گزر رہے تھے۔
جب ہمیں شروع شروع میں لاک ڈاؤن کی ہفتوں بھر گھروں میں محدود، سست اور بور کرنے والی زندگی کے بارے میں بتایا گیا تھا تو ہم اس طرح کے تیزی سے گزرنے والے دنوں کی توقع نہیں کر رہے تھے۔
فی الحال یہ قبل از وقت ہے کہ اس موضوع پر کوئی منظم تحقیق ہو، لیکن عمومی طور پر کافی سارے لوگوں کے لیے یہ ایک معمہ ہے کہ ان کے روز و شب حیران کن حد تک کتنی تیزی سے گزر گئے۔ اس بات پر یقین کرنا بہت مشکل لگ رہا ہے کہ ہم اب مئی کے آخری دن تک پہنچ گئے ہیں، یعنی لاک ڈاؤن کے آغاز کو دو ماہ ہو گئے ہیں۔
اس حوالے سے مزید یہاں پڑھیے۔
پاکستان میں سرکاری اعداد و شمار اس بات کا ثبوت پیش کرتے ہیں کہ کورونا وائرس کے مریضوں میں مسلسل اضافہ ہو رہا ہے لیکن اب اس کی وجہ سے ہسپتالوں میں مریضوں کے لیے جگہ اور وسائل کم پڑنے لگے ہیں۔
ملک کے بعض ہسپتالوں میں حکام اس بات کا اعتراف کر چکے ہیں کہ ان کے پاس کووڈ 19 کے مزید مریضوں کا علاج کرنے کے لیے گنجائش ختم ہو چکی ہے یا انھیں اس حوالے سے خدشات ہیں۔
اس طرح نئے آنے والے مریضوں کو شہر کے کسی دوسرے ہسپتال بھیجا جا رہا ہے۔
انڈیا کے وزیرِ اعظم نریندر موی نے ملک کو خبردار کیا ہے کہ لاک ڈاؤن میں نرمی کے بعد بھی احتیاط رکھی جائے۔
قوم سے ایک ٹی وی خطاب میں انھوں نے کہا: ‘کورونا وائرس کے خلاف جنگ سخت ہے، ہم اس میں غیر محتاط نہیں ہو سکتے۔’
‘ماسک اور دستانے پہننا، اور سماجی دوری کے ضوابط کا خیال رکھنا ضروری ہے کیونکہ بہت جلد لوگ اپنے گھروں سے نکلنا شروع ہوجائیں گے۔’
انڈیا میں یوں تو کورونا وائرس کے یومیہ متاثرین کی تعداد میں اضافہ ہو رہا ہے لیکن انڈیا دو ماہ کے سخت لاک ڈاؤن کے بعد معیشت کو بتدریج کھولنے کی منصوبہ بندی کر رہا ہے۔
لیکن انڈیا کے زیرِ انتظام کشمیر میں لاک ڈاؤن کو 30 جون تک بڑھا دیا گیا ہے۔
مولانا قاضی عبدالرشید کی زیر صدارت وفاق المدارس العربیہ کا جامعہ اشرفیہ میں مشاورتی اجلاس ہوا، جس میں 2 جون سے مدارس میں داخلے اور 12جون سے تعلیمی کلاسوں کے آغاز کا اعلان کیا گیا۔
اجلاس میں نجی سکولز کے ساتھ مل کر حکومت پر دباؤ بڑھانے جبکہ تبلیغی مراکز کھلوانے اور تبلیغی جماعت کی سرگرمیاں شروع کرانے میں معاونت کی یقین دہانی اور مشاورت کا فیصلہ بھی کیا گیا۔
مولانا قاضی عبدالرشید نے پریس کانفرنس کرتے ہوئے کہا کہ اس حوالے سے حتمی فیصلہ وفاق المدارس العربیہ اور اتحاد تنظیمات مدارس کی قیادت کرے گی، مدارس دینیہ کو مزید بند رکھنے کے متحمل نہیں ہوسکتے، مذہبی طبقے کو دیوار سے لگایا جا رہا ہے۔
مولانا قاضی عبدالرشید کا کہنا تھا کہ صدر مملکت کے ساتھ تیار کردہ 20 نکاتی ایس او پیز پر کسی شعبے نے عمل نہیں کیا، صرف مساجد میں ان پر عمل کیا گیا۔ شاپنگ مالز، ٹرانسپورٹ، بازار، سبزی منڈیاں، نادرا کے دفاتر کھل سکتے اور جلوس نکل سکتے ہیں تو مدارس کیوں نہیں کھولے جا سکتے ہیں؟
برطانیہ کہ محکمہ صحت اور سماجی تحفظ نے اعلان کیا ہے کہ کورونا وائرس کے شکار ہونے والے مزید 113 افراد ہلاک ہوگئے ہیں، جس کے بعد یہاں ہلاک ہونے والوں کی تعداد 38 ہزار 489 ہوگئی ہے۔
ہلاکتوں کی یہ تعداد سنیچر شام پانچ بجے تک ریکارڈ کی گئی ہیں۔
حکومت نے یہ بھی بتایا کہ ایک لاکھ 15 ہزار 725 ٹیسٹ کیے گئے یا ٹیسٹنگ کٹس لوگوں کو بھیجی گئی ہیں جن میں 1936 افراد میں کورونا وائرس کی تصدیق ہوئی ہے۔
ایک مرتبہ پھر حکومت یہ واضح طور پر بتانے میں ناکام رہی کہ کتنے لوگوں کے ٹیسٹ کیے گئے ہیں۔
وزیر تعلیم پنجاب مراد راس نے کہا ہے کہ صوبائی حکومت کی اجازت کے بغیر صوبے میں کوئی سکول نہیں کھل سکتا۔
انھوں نے ٹوئٹر پر اپنے پیغام میں لکھا ’کل کھلنے والے کسی بھی نجی سکول کے خلاف سخت کارروائی کی جائے گی۔ پنجاب حکومت کی اجازت اور نوٹیفیکیشن کے بغیر صوبے میں کوئی سکول نہیں کھل سکتا۔ ہم کسی کو بھی اپنے بچوں، اساتذہ اور خاندانوں کی زندگیاں خطرے میں نہیں ڈالنے دیں گے۔‘
برطانوی حکومت کی کورونا وائرس سے متعلق یومیہ بریفنگ شروع ہو چکی ہے اور وزیرِ ہاؤسنگ روبرٹ جینرک بریفنگ دے رہے ہیں۔
انھوں نے بتایا کہ سنیچر کے روز 1936 نئے متاثرین سامنے آئے ہیں۔
یہ ایک طویل عرصے میں پہلی مرتبہ ہے کہ یومیہ متاثرین کی تعداد 2000 سے کم رہی ہے۔ تاہم دو باتیں جن پر غور کرنا ضروری ہے وہ یہ کہ اعداد و شمار ہفتہ وار تعطیل پر ہمیشہ کم رہتے ہیں اور ان میں صرف وہ افراد شامل ہوتے ہیں جن کا کورونا ٹیسٹ مثبت آیا ہوتا ہے۔
برطانیہ کے محکمہ شماریات کے مطابق مرض پھیلنے کی یومیہ شرح آٹھ ہزار تک پہنچ گئی ہے۔
پوپ فرانسس نے اتوار کو کہا کہ معیشت سے زیادہ ‘صحتیابی’ اہم ہے۔
ان کی بیان ایسے وقت میں سامنے آیا ہے جب دنیا کے مختلف ممالک میں لاک ڈاؤن میں نرمی کی جا رہی ہے۔
پوپ نے تین ماہ میں ویٹیکن کے سینٹ پیٹرز سکوائر سے پہلی مرتبہ اپنی کھڑکی سے خطاب کیا۔ ویٹیکن سٹی سکوائر کو گذشتہ پیر کے دن عوام کے لیے کھولا گیا تھا۔
انھوں نے کہا: ‘لوگوں کی تکلیف دور کرنا، نہ کہ پیسے بچانا، زیادہ اہم ہے۔ لوگ معیشت سے زیادہ اہم ہیں۔’
انھوں نے کہا: ‘معیشت نہیں بلکہ ہم انسان مقدس روح کے گھر ہیں ۔’
انگلینڈ میں نیشنل ہیلتھ سروس نے کووِڈ 19 سے متاثر ہونے والے مزید 85 افراد کی ہلاکت کی تصدیق کی ہے جس کے بعد یہاں ہلاکتوں کی کُل تعداد 26 ہزار 614 ہوگئی ہے۔
ان میں سے 15 ہلاکتیں سنیچر، 31 جمعے، اور سات جمعرات کو ہوئیں۔ دیگر اموات اس سے پہلے ہوئی تھیں مگر انھیں اب کورونا کے سبب ہونے والی ہلاکت قرار دیا گیا ہے۔
پبلک ہیلتھ ویلز نے بتایا ہے کہ ویلز میں کورونا سے مزید 11 افراد ہلاک ہوئے ہیں جس کے بعد یہاں ہلاکتوں کی کُل تعداد 1342 ہوچکی ہے۔
سکاٹ لینڈ میں گذشتہ 24 گھنٹوں کے دوران نو مزید اموات ریکارڈ کی گئی ہیں۔ سکاٹ لینڈ میں اب تک 2362 افراد اس مرض کے باعث ہلاک ہو چکے ہیں۔
ویلز اور سکاٹ لینڈ سے ہلاکتوں کی تعداد میں زیادہ تر وہ لوگ شامل ہیں جو ہسپتالوں میں ہلاک ہوئے لیکن دیگر جگہوں پر ہلاک ہونے والے افراد بھی ان میں شامل ہیں۔
شمالی آئرلینڈ اور برطانیہ کے یومیہ مجموعی اعداد و شمار محکمہ صحت کی جانب سے کچھ دیر بعد جاری کیے جائیں گے۔
سنیچر کو برازیل میں کورونا وائرس سے ہلاکتوں کی تعداد سپین سے تجاوز کر گئی تھی اور آج اتوار کو یہاں ہلاکتوں کی تعداد فرانس سے بھی زیادہ ہوگئی ہے۔
جانز ہاپکنز یونیورسٹی کے مطابق برازیل میں اب تک 28 ہزار 834 ہلاکتیں ہوچکی ہیں۔ یہاں اب متاثرین کی تعداد دنیا میں دوسرے نمبر پر سب سے زیادہ ہے۔
یہ اس بات کی علامت ہے کہ یورپ اور ایشیا سے متعدد خطرناک علامتوں کے باوجود ملک وائرس پر قابو پانے میں کیسے ناکام رہا۔
لیکن یہ یاد دہانی ضروری ہے کہ برازیل کی آبادی 20 کروڑ سے زیادہ ہے اور یہاں مغربی یورپ کے کئی ممالک سے زیادہ لوگ بستے ہیں۔
لیکن برازیل میں خراب ہوتی صورتحال کے باوجود انتہائی دائیں بازو سے تعلق رکھنے والے صدر جائر بوسونارو نے وبا کی شدت پر سنجیدگی کا اظہار نہیں کیا ہے اور ریاستی اور شہری حکومتوں کی جانب سے لاک ڈاؤن اقدامات کی مخالفت کی ہے۔
سپین کے وزیرِ اعظم پیڈرو سانچیز نے ملک میں ہنگامی صورتحال کے نفاذ میں ‘آخری مرتبہ توسیع’ کی درخواست کی ہے تاکہ ‘وبا کو ایک ہی مرتبہ ہمیشہ کے لیے ختم کردیا جائے۔‘
یہ اقدام لاک ڈاؤن میں نرمی کی باوجود لوگوں کی نقل و حرکت کو محدود رکھیں گے۔
اس توسیع کی منظوری بدھ کو پارلیمنٹ کو دینی ہوگی جس کا مطلب ہوگا کہ 14 مارچ کو اعلان کی گئی ہنگامی صورتحال 21 جون تک جاری رہے گی۔
سپین اس وبا سے دنیا کے سب سے زیادہ متاثرہ ممالک میں سے ہے۔ اب تک تقریباً 28 ہزار افراد اس سے ہلاک ہوچکے ہیں اور دو لاکھ 33 ہزار افراد میں اس مرض کی تشخیص ہوچکی ہے۔
مگر حالیہ ہفتوں میں نئے متاثرین کی تعداد میں کمی ہوئی ہے۔ سنیچر کو صرف 271 نئے متاثرین سامنے آئے اور چار نئی ہلاکتیں سامنے آئیں۔
محکمہ صحت گلگت بلتستان کے مطابق گلگت بلتستان میں 24 گھنٹے کے دوران مزید 33 افراد میں کورونا وائرس کی تصدیق ہوئی ہے، جس کے بعد علاقے میں وائرس سے متاثرہ افراد کی مجموعی تعداد 711 ہو گئی ہے۔
گلگت بلتستان میں مزید چھ مریض صحت بھی ہوئے ہیں، جس کے بعد صحت مند افراد کی تعداد 496 ہوگئی ہے جبکہ علاقے میں ہلاکتوں کی تعداد 11 ہے۔
کورونا پازیٹو مریضوں کی تعداد بڑھنے کے بعد گلگت کی مقامی حکومت نے دوسرے شہروں سے لوگوں کے گلگت شہر میں داخلے پر پابندی عائد کر رکھی ہے۔
ایڈ منسٹریٹر میونسپل کارپوریشن گلگت کیپٹن (ر) اسامہ مجید چیمہ نے کہا ہے کہ ضلعی انتظامیہ نے کورونا وائرس کیسوں کے اضافے کے باعث شہر میں بغیر این او سی داخلے پر پابندی عائد کر دی ہے۔
انھوں نے بتایا کورونا وائرس کے پھیلاو کے خدشے کے پیش نظر پہلے ہی بین الاضلاعی آمدورفت پر پابندی عائد ہے اور کوئی بھی شخص ضلعی انتظامیہ کی اجازت کے بغیر گلگت ضلع میں داخل نہیں ہو سکتا۔
انھوں نے کہا کہ ایمرجنسی کیسز کے علاوہ کسی بھی شہری کو میونسپل حدود میں داخلے کی اجازت نہیں دی جائے گئی۔
ڈسڑکٹ ہیلتھ آفسیر گلگت ڈاکٹر مبین نے صحافی محمد زبیر خان کو بتایا کہ گلگت بلستان میں اتنے مریضوں کی توقع نہیں تھی کیونکہ گلگت بلستان قدرتی طور پر دور دراز علاقہ ہے۔
’رقبہ زیادہ اور آبادی کم ہے مگر اب کیسز میں اضافہ حقیقی معنوں میں خطرے کی گھنٹی ہے۔‘
فرانس میں لاک ڈاؤن میں نرمی کے بعد پیرس میں سنیچر کو کئی ہفتوں کے بعد پارک اور میدان کھول دیے گئے ہیں۔
کئی لوگ سورج کی روشنی سے لطف اندوز ہونے اور گرمیوں کی پہلی پکنک منانے کے لیے گھروں سے باہر نکل آئے۔
مگر کچھ ضوابط اب بھی اپنی جگہ موجود ہیں۔
لوگوں کو سماجی دوری کا خیال رکھنا ہوگا اور عوامی اجتماعات 10 لوگوں سے زیادہ پر مشتمل نہیں ہو سکتے۔ چہروں پر ماسک پہننا اہم قرار دیا گیا ہے۔
منگل سے فرانس میں کیفے اور ریستوران کھول دیے جائیں گے مگر پیرس میں انھیں صرف بیرونی ٹیرس پر ہی لوگوں کو بٹھانے کی اجازت ہوگی۔ خوش قسمتی سے پیرس میں ایسے بہت سے کیفے ہیں۔
پاکستان کے صوبہ بلوچستان میں کورونا سے متاثرہ ڈاکٹروں اور دیگر طبی عملے کی تعداد 239 ہو گئی ہے جبکہ اس کے علاوہ چار ڈاکٹر ہلاک ہو چکے ہیں۔
ینگ ڈاکٹرز ایسوسی ایشن بلوچستان کے ترجمان ڈاکٹر رحیم بابر کے مطابق اتوارکو کورونا سے زندگی کی بازی ہارنے والے ایک سینئر ڈاکٹر مستونگ میں چائلڈ سپیشلسٹ کے طور پر فرائض سرانجام دے رہے تھے۔
ڈاکٹر رحیم بابر کا کہنا ہے کہ کورونا سے متاثرہ ڈاکٹروں اور پیرا میڈیکس کی تعداد 239 ہو گئی ہے جس میں ڈاکٹروں کی تعداد 175 جبکہ 60 پیرامیڈیکل اور 4 نرسنگ سٹاف بھی کورونا سے متاثر ہو چکے ہیں۔
ڈاکٹر رحیم کا کہنا ہے کہ بلوچستان میں ڈاکٹروں کی شدید قلت کے باوجود نئے ڈاکٹروں کی تعیناتیوں کیلیے تاحال کسی قسم کے عملی اقدامات نہیں کیے گئے ہیں۔
اگر آپ ابھی ابھی ہمارے لائیو پیج پر آئے ہیں تو دنیا کے مختلف ممالک سے خبروں کا خلاصہ پیش ہے۔
پاکستان کے صوبہ خیبرپختونخوا میں کورونا وائرس کے 487 نئے کیس آنے کے بعد متاثرہ افراد کی تعداد 10027 ہو گئی ہے جبکہ 20 مزید اموات کے بعد وائرس سے ہونے والی ہلاکتوں کی تعداد 473 ہو گئی ہے۔
صوبے میں اب تک 2912 افراد کورونا وائرس سے صحت یاب بھی ہو چکے ہیں۔
انڈیا کی اس وائرل ویڈیو میں ممبئی کے ایک سرکاری ہسپتال میں ایمرجنسی وارڈ کے مناظر دیکھے جاسکتے ہیں۔
یہاں کورونا وائرس کے مریضوں کی بھیڑ جمع ہونے کی وجہ سے اکثر بیڈز پر دو مریض لیٹے ہوئے ہیں۔