پاکستان: بیرون ملک جانے والی پروازیں آج رات سے، اندرون ملک پروازوں میں اضافے کا فیصلہ

دنیا بھر میں کورونا وائرس کے متاثرین کی تعداد 59 لاکھ کے قریب ہے جبکہ اموات کی مجموعی تعداد ساڑھے تین لاکھ سے زیادہ ہو چکی ہے۔ سمندر پار پاکستانیوں کے لیے وزیر اعظم کے معاون خصوصی زلفی بخاری نے ایک ٹویٹ میں بتایا ہے کہ فلائٹ آپریشن صرف بیرون ملک جانے والی پروازوں کے لیے بحال ہو رہا ہے۔

لائیو کوریج

29 مئ 2020بریکنگ, اسلام آباد میں کورونا کے متاثرین 2100 ، ہلاکتیں 23
ڈپٹی کمشنر اسلام آباد کے مطابق پاکستان کے دارالحکومت کورونا وائرس کا شکار افراد کی کل تعداد 2100 تک پہنچ گئی ہے جبکہ اب تک 23 افراد اس کے باعث لقمہ اجل بن چکے ہیں۔
انھوں نے بتایا کہ اگرچہ ہسپتالوں میں گنجائش موجود ہے تاہم مریضوں کی تعداد میں روز بروز اضافہ ہو رہا ہے۔
انھوں نے بتایا کہ اس وقت 109 مریض زیر علاج ہیں جبکہ ان میں سے 63 کا تعلق اسلام آباد سے نہیں ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
29 مئ 2020انگلینڈ، ویلز اور شمالی آئرلینڈ میں روزانہ کی اموات میں اضافہ
انگلینڈ میں صحت عامہ کے دفتر سے جاری ہونے والے نئے اعداد وشمار کے مطابق انگلینڈ کے ہسپتالوں میں کورونا وائرس سے مزید 149 افراد ہلاک ہوئے ہیں۔ جس کے بعد انگلینڈ میں ہلاکتوں کی تعداد 26383 ہو گئی ہے۔
ویلز میں مزید 10 لوگ ہلاک ہوئے ہیں جس کے بعد وہاں ہلاکتوں کی تعداد 1317 ہو گئی ہے۔
جبکہ شمالی آئرلینڈ میں تین افراد ہلاک ہوئے ہیں اور وہاں اب تک 521 اموات ہو چکی ہیں۔
اس سے پہلے سکاٹ لینڈ میں ہسپتالوں میں مزید 15 ہلاکتوں کی تصدیق کی گئی تھی۔ اس طرح وہاں اموات کی تعداد 2331 ہو گئی ہے۔
برطانیہ بھر سے متعلق اعداد و شمار کچھ دیر میں متوقع ہیں۔
29 مئ 2020روس میں ایک دن میں سب سے زیادہ ہلاکتیں
،تصویر کا ذریعہEPA
روس میں کورونا وائرس سے گزشتہ 24 گھنٹوں میں 232 لوگ ہلاک ہوئے ہیں۔ یہ روس میں ایک دن میں اب تک کی سب سے زیادہ ہلاکتیں ہیں جن کے بعد اب وہاں مرنے والوں کی تعداد 4374 ہو گئی ہے۔
حکام کا کہنا ہے کہ جمعے کو 8572 نئے مریضوں کی تصدیق ہوئی ہے جس کے بعد ملک میں کورونا وائرس سے متاثر ہونے والوں کی تعداد 387623 ہو گئی ہے۔ یہ تعداد امریکہ اور برازیل کے بعد دنیا میں تیسرے نمبر پر ہے۔
29 مئ 2020بلوچستان: سرکاری ہسپتالوں میں سمارٹ او پی ڈی کے آغاز کا فیصلہ, نجی ہسپتالوں اور رجسٹرڈ کلینکس میں ایس او پیز پر پابندی لازم قرار
،تصویر کا ذریعہBaluchistan Govt
بلوچستان میں وزیر اعلیٰ کی جام کمام خان کی زیر صدارت اجلاس میں سمارٹ لاک ڈاون کے دوران عوام کے عدم تعاون اور احتیاطی تدابیر پر عملدرآمد نہ کرنے کے باعث وائرس کے پھیلاو میں اضافہ پر تشویش کا اظہار کیا گیا۔
اجلاس میں فیصلہ کیا گیا کہ نجی ہسپتالوں اور رجسٹرڈ کلینکس میں او پی ڈی اور علاج معالجہ پر پابندی نہیں تاہم حفاظتی تدابیر کی ایس او پی پر عملدرآمد لازم ہو گا۔
اجلاس میں سرکاری ہسپتالوں میں سمارٹ او پی ڈی کے آغاز کا فیصلہ کیا گیا۔
اجلاس میں بتایا گیا کہ اب تک ہونے والے ٹیسٹوں کے نتائج کے مطابق صوبے میں کورونا وائرس متاثرہ افراد کی تعداد 3928 ہے۔
فاطمہ جناح ہسپتال میں کورونا وائرس کے ٹیسٹ کی صلاحیت 800 سے 1200، تفتان میں 44 بولان، میڈیکل ہسپتال میں 44 اور شیخ زید ہسپتال میں 100 ٹیسٹ روزانہ ہے۔ صوبے میں محکمہ صحت نے 200 ملین روپے کی لاگت سے طبی آلات کی خریداری مکمل کی مزید 233 ملین روپے سے خریداری کا عمل جاری ہے۔
اجلاس میں فیصلہ کیا گیا کہ کورونا وائرس سے صحتیاب ہونے والے افراد سے رضا کارانہ طور پر بلڈ پلازمہ حاصل کیا جائے گا۔
اس موقعے پر وزیراعلیٰ نے ہدایت کی کوئٹہ سمیت صوبے بھر میں ملیریا کنٹرول پروگرام پر موثر عملدرآمد کو یقینی بنایا جائے کمشنر اور ڈپٹی کمشنر ملیریا کنٹرول سپرے کا آغاز کروائیں۔
29 مئ 2020اٹلی میں کشیدگی، سیاستدان نشانے پر
،تصویر کا ذریعہGetty Images
اٹلی میں سخت لاک ڈاؤن میں نرمی تو کی جا رہی ہے لیکن سیاستدانوں کے خلاف جنسی تعصب اور دھمکیوں کی وجہ سے کشیدگی پیدا ہوئی ہے۔
وزیرِ تعلیم لوسیا ایزولینا کو پولیس کا تحفظ فراہم کیا گیا ہے۔ ان کو تنقید کا نشانہ بنانے والے دائیں بازو کے سیاستدان سینیٹر گواسپی مولز نے انھیں خبردار کرتے ہوئے کہا کہ سیاسی ساکھ کنوارے پن کی طرح ہوتی ہے جو آسانی سے ختم ہو سکتی ہے۔
ایک نائب وزیرِ صحت اور علاقائی گورنر کی حفاظت کے لیے بھی پولیس تعینات کی گئی ہے۔ نائب وزیر کو کورونا وائرس کے لیے دی جانے والی امداد سے متعلق دھمکیاں ملی ہیں۔
اٹلی میں کورونا وائرس سے منسلک 33 ہزار سے زیادہ اموات ریکارڈ کی جا چکی ہیں۔ لیکن اب دو مہینے سے زیادہ عرصے کے لاک ڈاؤن کے بعد نائیوں کی دکانوں سمیت زیادہ تر کاروبار کھولے جا رہے ہیں۔
29 مئ 2020بریکنگ, بلوچستان: کورونا کے علاج سے منسلک طبی اور سکیورٹی عملے کے لیے مراعات کا اعلان
بلوچستان حکومت نے کورنا وائرس سے متعلق فرائض کی ادائیگی کے دوران وفات پانے والے سرکاری ملازمین کو شہدا کی کیٹیگری میں شامل کرنے اور لواحقین کو شہدا پیکیج دینے کا فیصلہ کیا ہے۔
یہ فیصلہ وزیراعلیٰ بلوچستان جام کمال خان کی زیر صدارت کورونا وائرس اور ٹڈی دل کی روک تھام سے متعلق امور کے اعلیٰ سطحی جائزہ اجلاس میں کیا گیا۔
اجلاس میں شیخ زید اور فاطمہ جناح اسپتال کے ڈاکٹروں، پیرا میڈکس، لیبارٹری ٹیکنیشنز اور بلاواسطہ ڈیوٹی دینے والے عملے اور سکیورٹی اہلکاروں کے لیے مالی مراعات کا اعلان کیا گیا۔
ڈیوٹی کی نوعیت کے مطابق ڈاکٹروں پیرا میڈکس دیگر اسٹاف اور سکیورٹی اہلکاروں کو ماہانہ ایک تا تین بنیادی تنخواہیں دی جائیں گی اضافی بنیادی تنخواہوں کی ادائیگی یکم مارچ 2020 سے لاگو ہو گی۔
محکمہ صحت ڈاکٹروں اور دیگر اسٹاف کی ڈیوٹی کی نوعیت سے متعلق تفصیلات محکمہ خزانہ کو فراہم کرے گا۔
29 مئ 2020خیبر پختونخوا میں اقلیتی برادری کو عبادات ادا کرنے کی اجازت
پاکستان کے صوبے خیبر پختونخوا میں حکومت نے اقلیتی برادری کو عبادات ادا کرنے کی اجازت دے دی ہے۔
محکمہ ریلیف بحالی و آبادکاری کے مطابق اقلیتی برادری صوبائی حکومت کی جانب سے جاری کردہ ایس او پیز کے تحت عبادات کریں گے۔
عبادات کے وقت فرش پر کارپٹ وغیرہ نہیں بچھایا جائے گا اور بزرگ اور چھوٹے بچے گھروں میں اپنی عبادات کا اہتمام کریں گے۔
فرش کو عبادات سے پہلے اور بعد میں ڈس انفیکٹ کیا جائے گا۔
ترجمان محکمہ ریلیف خیبر پختونخوا کے مطابق عبادات کے لیے آنے والے ہاتھ ملانے اور گلے لگنے سے پرہیز کریں گے۔
29 مئ 2020سپین کی لالیگا 11 جون سے دوبارہ شروع ہوگی
،تصویر کا ذریعہGetty Images
سپین کی لا لیگا 11 جون سے دوبارہ شروع کر دی جائے گی۔ لا لیگا کے صدر ہاویئر تیبس کے مطابق لیگ کا اگلا سیزن 12 ستمبر سے شروع ہو جائے گا۔
پیر کو تیبس کا کہنا تھا کہ ریال بیتس اور سیویا کے درمیان میچ سے لیگ کا دوبارہ آغاز ہو سکتا ہے۔
ہسپانوی اخبار مارکا سے بات کرتے ہوئے ان کا کہنا تھا کہ ’ہم تیار ہیں اور جس دن ہم لیگ کا اختتام کریں گے وہ اہم ہوگا۔‘
تیبس کا کہنا تھا کہ آیو وژوئل ٹیٹ کیے جا رہے ہیں تاکہ گھر پر مداحوں کو میچ دیکھنے کا بہترین تجربہ فراہم کیا جا سکے۔
29 مئ 2020گلگت میں شہریوں کے لیے ماسک پہننا لازم, صحافی محمد زبیر خان
،تصویر کا ذریعہMazhar Ali Mughal
گلگت کے ایڈ منسٹریٹربلدیہ عظمیٰ کیپٹن (ر) اسامہ مجید چیمہ نے کہا کہ عوام بغیر ماسک گھر سے نہ نکلیں اور لاک ڈان کے دوران خلاف ورزی پر سخت کاروائی کریں گے۔
ان کا مزید کہنا تھا کہ کورونا وائرس کے ٹرانسمیشن کیسز میں اضافہ تشویش ناک ہے اس لیے عوام احساس زمہ داری کا مظاہرہ کریں، اور کورونا وائرس جنگ میں انتظامیہ کے ساتھ تعاون کریں۔
انھوں نے بتایا کہ جمعہ کے روز گگلت شہر میں لاک ڈاون کی خلاف ورزی پر بیس دوکانوں کے خلاف کاروائی کی گئی اور انہیں سیل کردیا گیا ہے۔
کیپٹن (ر) اسامہ مجید چیمہ نے کہا کہ ماسک کے بغیرگاڑی اور موٹر سائیکل چلانے پر پابندی ہے جس کی خلاف ورزی پر کاروائی ہوگئی۔
،تصویر کا ذریعہMazhar Ali Mughal
ان کا کہنا تھا کہ گلگت میں ایس او پیز اور لاک ڈاون کا شیڈول گلگت بلستان کے دیگر علاقوں سے تھوڑا سخت اور مختلف ہے۔ جس میں صرف ہسپتالوں کے قریب واقع میڈیکل سٹوروں کو ہفتے کے سات دن کھلنے کی اجازت ہے۔
اس کے علاوہ باقی شہر میں واقع میڈیکل سٹور اور دکانیں جن میں اشیاء خوردونوش بھی شامل ہیں سوموار سے جمعرات تک ہی کھلی رہیں۔ جبکہ موبائل شاپس، کپڑوں، جوتوں، آٹو وروکشاپ اور پارٹس وغیرہ کی دوکانیں جمعہ سے لے کر اتوار تک کھلی رہ سکتی ہیںگ
تمام دکانوں کے کھلے رہنے کا وقت صبح چھ بجے سے شام چار بجے تک ہے۔
29 مئ 2020’مریض اسی رفتار سے آتے رہے تو ہسپتال میں جگہ ختم ہوسکتی ہے‘
29 مئ 2020خیبر ٹیچنگ ہسپتال کی پبلک ہیلتھ لیبارٹری میں کورونا ٹیسٹ کا آغاز
خیبر ٹیچنگ ہسپتال میں بائیو سیفٹی لیول 2 خیبر ٹیچنگ ہسپتال پبلک ہیلتھ لیبارٹری قائم کر دی گئی ہے جہاں اب کورونا کے ٹیسٹ بھی ممکن ہو سکیں گے۔
ڈبلیو ایچ او نے ڈائریکٹوریٹ جنرل ہیلتھ سروسز کے ذریعے ٹیسٹ کی مشین بطور عطیہ فراہم کی۔ پاکٹ سنٹرل نامی یہ مشین رواں اوقات اور ایک ہی مرحلہ میں مکمل خودکار طریقے سے کام کرنے والی مشینیں ہیں جو کہ جدید ماڈل اور طرز کی مشینیں ہیں۔ ان میں ہر مشین ایک ٹائم میں 8 ٹیسٹ دو گھنٹے میں کرنے کی صلاحیت رکھتی ہے ۔
کورونا کے ٹیسٹ کے ساتھ ساتھ ان مشینوں میں دیگر ڈی این اے اور آر این اے وائرس کے ٹیسٹ بھی کیے جا سکتے ہیں۔
ابتدائی مراحل میں یومیہ 50 سے 80ٹیسٹ کیے جا سکیں گے ، جبکہ عنقریب مزید طاقتورمشینوں کی دستیابی پر یہ تعداد دوگنی ہو جائے گی۔
29 مئ 2020بریکنگ, کورونا وائرس سے ہلاک ہونے والوں سے متعلق ایک نیا ہدایت نامہ
حکومت پاکستان نے کورونا وائرس کی وجہ سے ہلاک ہونے والوں کی تدفین سے متعلق ایک نیا ہدایت نامہ جاری کیا گیا ہے۔
وزیر اعظم کے معاون خصوصی برائے صحت ڈاکٹر ظفر مرزا چونکہ اب تک اس بات ثبوت نہیں ملے کہ لاش سے زندہ انسانوں میں وائرس منتقل ہوسکتا ہے اس لیے کووڈ 19 سے مرنے والوں کی تدفین کے ہدایت نامے میں تبدیلیاں کی گئی ہیں۔
- میت کو ہینڈل کرنے میں ذاتی تحفظ کا خیال رکھیں، جس میں ماسک، گاؤن اور دستانے پہنیں۔
- میت کو زیادہ چھوئیں مت۔
- میت کو غسل دینے میں کوئی ممانعت نہیں۔ اس کے لیے ذاتی تحفظ کا خیال رکھا جائے۔
- پانی کے چھینٹوں سے بچنے کے لیے چشمے استعمال کریں۔
- میت کو کفن پہنانے کی بھی کوئی ممانعت نہیں۔
- میت کو قبرستان لے جانے کے لیے احتیاط کریں، جو لوگ قبر میں میت اتاریں وہ ماسک اور حفاظتی کٹس لازمی پہنیں۔
- جنازہ پڑھنے کے دوران سماجی دور کا خیال رکھیں۔ مختصر جنازے رکھیں۔ گھر کے قریبی خاندان کے افراد کو جنازے میں جانے کی ممانعت نہیں۔
ڈاکٹر ظفر مرزا کا کہنا تھا کہ بعض مقامات پر انتظامیہ نے لاش تحویل میں لے لی اور خاندان والوں کو بھی ہاتھ نہیں لگانے دیا۔ اگرچہ حکومت کی جانب سے ایسا پہلے بھی نہیں کہا گیا اگر کہیں ہوا ہے تو غلط تھا۔
29 مئ 2020جاپان ایئر فورس کا طبی عملے کو خراجِ تحسین
،تصویر کا ذریعہAFP
جاپان ایئر سیلف ڈیفینس فورس کی بلیو امپلس ایروبیٹکس ٹیم نے ٹوکیو کی فضاؤں میں اڑ کر کورونا وائرس سے لڑنے والے طبی عملے کو خراجِ تحسین پیش کیا ہے۔
جان ہوپکنز یونیورسٹی کے مطابق جاپان میں کورونا وائرس کے کل تصدیق شدہ مریض 16 ہزار 636 ہیں جبکہ اس وائرس سے اب تک 884 افراد ہلاک ہو چکے ہیں۔
ٹوکیو کے ایبورا ہسپتال کے ترجمان شوچی میکامی نے کہا کہ ’ہم گذشتہ چار ماہ سے بہت دباؤ میں کام کر رہے ہیں۔ میں نے سنا ہے کہ وہ (طبی عملہ) کہہ رہے ہیں کہ مظاہرے نے ان کا جوش بڑھایا ہے۔‘
،تصویر کا ذریعہReuters
29 مئ 2020بریکنگ, کورونا: پاکستان میں 24 گھنٹوں میں 57 ہلاکتیں، 157 مریض وینٹیلیٹر پر
پاکستان کے وزیر اعظم کے معاون خصوصی برائے صحت نے بتایا ہے کہ اب تک پاکستان میں64000 کنفرم میں سے 35 فیصد صحت یاب ہوئے ہیں۔
گذشتہ 24 گھنٹوں میں57 ہلاکتیں ہوئی ہیں جو پاکستان میں ایک دن میں ہونے والی اب تک سب سے زیادہ ہلاکتیں پیں۔
ڈاکٹر ظفر مرزا نے بتایا کہ اس وقت ملک بھر میں 157 لوگ وینٹی لیٹرز پہ ہیں۔ جو اب تک سب سے زیادہ تعداد ہے۔
انھوں نے واضح کیا ہے ابھی پاکستان میں کیسز اور اموات میں اضافہ ہوگا اس میں تعجب نہیں ہونا چاہیے تاہم ہمارے ہسپتالوں کی تیاری اہم ہے۔ اس بارے میں تفصیلات کل بتائی جائیں گی۔
29 مئ 2020ماسک پہن کر گھر سے نکلیں، خیبر پختونخوا حکومت کا شہریوں کو پیغام
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
29 مئ 2020مظفر آباد: کورونا سے ایک اور ہلاکت، کشمیر میں سیاحوں کی سرگرمیاں معطل
،تصویر کا ذریعہMA JARRAL
پاکستان کے زیر انتظام کشمیر میں ضلع مظفرآباد کے ہیلتھ آفیسر ڈاکٹر سعید کے مطابق دارلحکومت مظفرآباد کے آئیسولیشن ہسپتال میں زیرعلاج کورونا کے ایک معمرمریض انتقال کر گئے جس کے بعد اس خطے میں کورونا وائرس سے ہلاک ہونے والے افراد کی تعداد 6 ہو گی ہے۔
دوسری جانب اس خطے کی حکومت نے کورونا وائرس کے پھیلاؤ کے سبب ریاست بھر کے تمام سرکاری و نجی تعلیمی اداروں میں 15 جولائی تک تعطیلات میں توسیع کردی ہے۔
صحافی ایم اے جرال کے مطابق اس خطے کی حکومت نے مقامی انتظامیہ کے ذریعے اس خطے کے مختلف بلند و بالا سیاحتی مقامات پر مقامی سطح پر جاری کرکٹ ٹورنامنٹ سمیت لوگوں کو ہجوم کی صورت میں سیاحتی مقامات کی جانب جانے اور وہاں قیام کرنے سے روک دیا ہے۔
مقامی انتظامیہ نے ہیلتھ ایمرجنسی کے تحت وادی کوٹلہ میں کوہ مکڑا کے سیاحتی مقام جبسر اور سری کوٹ کے مقام پر سیاحوں کی جانب سے لگائے جانے والے کیمپ سمیت جاری کرکٹ ٹورنامنٹ کے خلاف کارروائی کرتے ہوئے انہیں ختم کر دیا۔
29 مئ 2020فارمولا ون: برطانوی اور آسٹریلوی موٹو جی پی ریسز منسوخ
،تصویر کا ذریعہAFP
جمعے کے روز منتظمین نے اعلان کیا ہے کہ برطانوی اور آسٹریلوی موٹو جی پی ریسز کو اس سال کورونا وائرس کی وبا کی وجہ سے منسوخ کر دیا گیا ہے۔
برٹش گرانڈ پری سلورسٹون کے میدان میں 30 اگست کو ہونا تھی جبکہ آسٹریلیا میں فلپ آئی لینڈ پر ریس 25 اکتوبر کو ہونی تھی۔
یاد رہے کہ اس سال کا ریسزنگ سیزن اھبی شروع ہونا تھا۔ سیزن کی پہلی ریش قطر گرینڈ پری مارچ میں منسوخ کر دی گئی تھی۔
جرمنی، فن لینڈ اور ہالینڈ میں جو ریسز جون اور جولائی کے مہینوں میں ہونا تھیں انھیں بھی مختلف کیلینڈر پر منتقل کیا جائے گا۔
29 مئ 2020ڈومنک کمنگز کا ’عہدہ چھوڑنے کا کوئی ارادہ نہیں‘
،تصویر کا ذریعہReuters
بی بی سی کی معلومات کے مطابق برطانوی وزیراعظم کے اہم مشیر ڈومنک کمنگز نے آج صبح وزیراعظم آفس کے اہلکاروں کو بتایا ہے کہ ان کا اپنا عہدہ چھوڑنے کا کوئی ارادہ نہیں ہے۔
ان کا کہنا ہے کہ موجودہ صورتحال ابھی برقرار رہے گی اور وہ یہ فیصلہ اس آپریشن کے بعد کریں گے جو کہ مارچ میں ملتوی کیا گیا تھا۔
یاد رہے کہ ڈومنک کمنگز کو لاک ڈاؤن کی خلاف ورزی کرنے پر شدید تنقید کا سامنا ہے۔
29 مئ 2020بریکنگ, سندھ: ایک دن میں سب سے زیادہ اموات، ڈیڑھ ہزار سے زیادہ افراد صحتیاب
وزیراعلیٰ سندھ سید مراد علی شاہ کے مطابق صوبے میں گذشتہ 24 گھنٹوں کے دوران 31 اموات ہوئی ہیں جو کہ اب تک ایک دن میں سامنے آنے والی سب سے بڑی تعداد ہے۔
جمعہ کو جاری ہونے والے ایک بیان کے مطابق وزیر اعلی نے بتایا کہ گذشتہ 24 گھنٹوں میں صوبے میں کورونا کے 804 نئے مریضوں کی تصدیق ہوئی ہے جبکہ 1563 افراد صحتیاب ہو کر اپنے گھروں کو جا چکے ہیں۔
مراد علی شاہ کا کہنا تھا کہ 308 مریضوں کی حالت تشویشناک ہے جبکہ 52 وینٹیلیٹر پر ہیں۔
صوبے کے مختلف علاقوں میں مریضوں کی تفصیلات دیتے ہوئے انھوں نے بتایا کہ کراچی میں 804 مزید کیسز سامنے آئے ہیں جبکہ حیدرآباد میں 37، گھوٹکی 24، لاڑکانہ 23، جیکب آباد اور جامشورو میں دس، دس، شکارپور اور بدین میں سات، سات، دادو 4، عمرکوٹ 3، سانگھڑ 2 اور کشمور، خیرپور، مٹیاری، نوابشاہ اور ٹنڈواللہ یار میں ایک، ایک کیس سامنے آیا ہے۔
29 مئ 2020کئیوو: ایمرجنسی ہسپتال میں کورونا وائرس پھوٹ پڑا
،تصویر کا ذریعہAFP
یوکرین کے ایک نجی چینل کے مطابق ملک کے دارالحکومت کئیوو میں ایمرجنسی کیئر کے ایک ہسپتال میں کورونا وائرس پھوٹ پڑا ہے۔
ہسپتال کے حکام کا کہنا ہے کہ ان کے چار اہلکاروں بشمول ایک ماہرِ امراضِ قلب اور ایک نرس کو دیگر ہسپتالوں میں زیرِ علاج رکھا گیا ہے اور دو ملازمین کو ان کے گھروں کے قریب بھیجا گیا ہے۔ اس کے علاوہ 16 افراد کو ائیسولیشن میں منتقل کر دیا گیا ہے۔
ان افراد میں سے کچھ میں کورونا وائرس کی پہلے ہی تشخیص ہو چکی ہے تاہم ان میں سے کسی میں بھی علامات نہیں ظاہر ہوئیں۔
مذکورہ ہسپتال کورونا وائرس کے لیے ایمرجنسی سنٹر نہیں تھا اس لیے یہ جانچنے کی کوشش کی جا رہی ہے کہ یہ انفیکشن ہسپتال میں کہاں سے آیا ہے۔