برطانیہ: ’وبا کا عروج گزر چکا‘، ملک میں کل اموات 26700 سے زیادہ

لائیو کوریج

1. 30 اپريل 2020’لندن میں سیاہ فام افراد کی اموات کی شرح غیر معمولی طور پر زیادہ ہے‘

   

   کیا کورونا وائرس سایہ فام، ایشیائی یا دیگر اقلیتی گروہوں کو زیادہ متاثر کرتا ہے؟ اس حوالے سے کافی بحث ہو چکی ہے۔

   اگرچہ اس سوال پر تحقیق جاری ہے تاہم بی بی سی کو حاصل ہونے والے نیشنل ہیلتھ سروس کے اعدادوشمار کے مطابق لندن میں سیاہ فام افراد آبادی کا 13 فیصد ہیں لیکن اموات میں ان کی شرح 16 فیصد ہے۔

   اعداد و شمار میں 3929 کیسز کا جائزہ لیا گیا اور معلوم ہوا کہ اس میں سے ایک بڑی تعداد سیاہ فام افراد کی ہے۔

   ڈاکٹر شِکتہ داس کے مطابق اس کی ایک وجہ یہ ہو سکتی ہے کہ اقلیتی گروہوں سے تعلق رکھنے والے افراد کلیدی نوکریاں کرتے ہیں اور ان کا گھر سے باہر نکلنا زیادہ ہوتا ہیں۔

2. 30 اپريل 2020برطانوی ہیرو ٹام مور کی ’سنچری‘ پر فلائی پاسٹ

   

   ،تصویر کا ذریعہAFP

   برطانیہ کے قصبے مارسٹون میں آج کرنل ٹام مور کی 100ویں سالگرہ کے سلسلے میں جشن منایا جا رہا ہے۔

   اس سلسلے میں رائل ایئر فورس کے دوسری عالمی جنگ کے زمانے کے طیاروں نے کرنل مور کے اعزاز میں ان کے گھر کے اوپر سے فلائی پاسٹ کیا اور فضائی کرتب دکھائے۔

   یاد رہے کہ اپنے گارڈن میں چکر لگا لگا کر برطانیہ میں این ایچ ایس کے لیے 29 ملین پاؤنڈ عطیہ جمع کرنے والے کیپٹن ٹام مؤر کو ان کی 100ویں سالگرہ کے موقعے پر کرنل بنا دیا گیا ہے۔

   

   ،تصویر کا ذریعہPA Images

   

   ،تصویر کا ذریعہReuters

   

   ،تصویر کا ذریعہReuters

3. 30 اپريل 2020برازیل میں اموات کی تعداد 5000، صدر پوچھتے ہیں ’تو کیا ہوا؟‘

   

   ،تصویر کا ذریعہEPA

   بدھ کے روز برازیل میں کورونا وائرس کے 6276 نئے کیسز سامنے آئے ہیں۔ برازیل میں پہلے ہی لاطینی امریکہ میں انفیکشنز کی تعداد سب سے زیادہ ہے اور ملک میں 79685 تصدیق شدہ کیسز ہیں جبکہ 5500 ہلاکتیں ہوچکی ہیں۔

   صدر بولسونارو نے ملک میں صورتحال کی شدت کو کم خطرناک بتانے کی کوشش کی ہے۔ جب ہلاکتوں کی تعداد 5000 تک پہنچی تو ایک صحافی کے سوال پر صدر نے کہا کہ ”تو کیا ہو گیا۔ میں معافی چاہتا ہوں۔ آپ کیا چاہیے ہیں کہ میں کیا کروں؟‘‘

   ملک میں سب سے زیادہ متاثرہ علاقوں میں سے ایک مانائس شہر ہے جہاں کے میئر کا کہنا ہے کہ وہ مئی میں 4000 جنازوں کی تیاری کر رہے ہیں جو کہ عام تعداد سے چار گنا زیادہ ہے۔

4. 30 اپريل 2020کورونا وائرس: گھر بیٹھے دلچسپ سائنسی تجربات مفت سیکھیے

5. 30 اپريل 2020یہ وقت نہیں ہے کہ الیکشن جیتنے کے لیے سیاسی کھیل کھیلا جائے: چینی نائب وزیرِ خارجہ

   

   ،تصویر کا ذریعہGetty Images

   چین کے نائب وزیرِ خارجہ لی یوچینگ نے چین اور امریکہ کو اپنے اختلافات سے بالاتر ہو کر کورونا وائرس کی وبا سے مقابلے کے لیے تعاون کا مشورہ دیا ہے۔

   انھوں نے یہ بیان امریکہ چینل این بی سی کو ایک انٹرویو میں دیا ہے۔ ان کا کہنا تھا کہ `اس اہم اور مشکل موڑ پر چین اور امریکہ کو اپنے اختلافات کو نظر انداز کرتے ہوئے اس مشترکہ دشمن یعنی وائرس کا مقابلہ کرنا چاہیے۔‘

   اس وائرس کے حوالے سے بہت سے سوالات کے جواب دیتے ہوئے انھوں نے اس بات کی طرف اشارہ دیا کہ بہت سے سیاستدانوں نے اس عالمی صحتِ عامہ کے بحران کو سیاسی رنگ دے دیا ہے۔ انھوں نے کہا کہ یہ وقت نہیں ہے الزام تراشی اور سیاسی کھیل کا۔

   انھوں نے کہا کہ امریکہ اور چین کے تعلقات کو قلیل مدتی یا غیر دمہ دارانہ تناظر میں نہیں دیکھا جانا چاہیے تاکہ کوئی الیکشن جیت سکے یا کسی اور کو قصوروار بنا سکے۔

   ”ہمارے دونوں ممالک کو تعاون کرنا چاہیے، اور مستقبل میں دونوں ممالک کے لوگوں کی مشترکہ ترقی بہت اہم ہے۔”

6. 30 اپريل 2020کورونا وائرس کی روک تھام کے لیے کوشاں چین کے امیر ترین شخص کو کس سے خطرہ ہے؟

   

   ،تصویر کا ذریعہGetty Images

   علی بابا گروپ کے بانی جیک ما کی کوششوں کے نتیجے میں اس وقت دنیا کے ڈیڑھ سو سے زیادہ ممالک کو ادویات اور طبی سامان بھیجا جا رہا ہے جس میں چہرے کے ماسک اور وینٹیلیٹرز بھی شامل ہیں۔

   تاہم جیک ما کے متعدد حامی اور بہت سے مخالفین بھی سر کھجا رہے ہیں کہ انھوں نے خود کو کس مشکل میں مبتلا کر لیا ہے۔

   کئی لوگوں کو خدشہ ہے کہ وہ اپنی ان سرگرمیوں کی وجہ سے چین کی کمیونسٹ پارٹی کے نئے اور ہمدرد چہرے کے طور پر سامنے آنا چاہتے ہیں یا انھیں پارٹی اپنے پروپیگینڈا کے لیے استعمال کر رہی ہے۔

   جن ممالک کی جیک ما مدد کر رہے ہیں انھیں دیکھ کر لگتا ہے کہ وہ چین کے سفارتی تعلقات کو دھیان میں رکھتے ہوئے قدم اٹھا رہے ہیں۔

   لیکن ان کے اقدام سے اپنے ملک سمیت دنیا بھر میں ان کی بڑھتی شہرت سے پیدا ہونے والا حسد چین کے قدآور سیاستدانوں کو ان کے خلاف بھی کر سکتا ہے۔

   تو جیک ما کو آخر کس سے خطرہ ہے؟ جاننے کے لیے کلک کیجیے

7. 30 اپريل 2020بریکنگ, امریکی ریاست کیلیفورنیا میں تمام تفریحی ساحلی مقامات بند کر دیے جائیں گے

   

   ،تصویر کا ذریعہReuters

   خبر رساں ادارے روئٹرز کو موصول ہونے والے ایک میمو کے مطابق امریکی ریاست کیلیفورنیا کے گورنر گیون نیوسم جمعرات کے روز اعلان کریں گے کہ ریاست میں تمام بیچز یعنی تفریحی ساحلی مقامات اور پارکس کو بند کر دیا جائے۔

   یاد رہے کہ گذشتہ ہفتے ریاست کے متعدد بیچز پر لوگوں کی ایک بڑی تعداد جمع ہوگئی تھی اور میڈیا پر اس ہجوم کو کافی کوریج دی گئی تھی۔

   اس میمو کے مطابق اس پابندی کا اطلاق یکم مئی سے ہوگا۔

   ڈیموکرٹک پارٹی سے تعلق رکھنے والے گورنر گیون نیوسم نے اس سے پہلے کہا تھا کہ جیسے ہی کانٹیکٹ ٹریسنگ اور ٹیسٹنگ میں بہتری آئے گی، ان کی ریاست میں چھوٹے پیمانے پر ریٹیل اشیا بنانے والے اور کم خطرے والے دفاتر کو کھولنے کی اجازت چند ہی ہفتوں میں دے دی جائے گی۔

8. 30 اپريل 2020عالمی سطح پر توانائی کی مانگ میں ریکارڈ کمی متوقع

   

   ،تصویر کا ذریعہGetty Images

   جنگلی حیات سے لے کر فضائی آلودگی تک، اس عالمی وبا کے ماحول پر اثرات کے بارے میں کافی کچھ کہا جا چکا ہے۔

   اور اب ایسا معلوم ہو رہا ہے کہ دنیا بھر میں لاک ڈاؤن ہونے کے باعث توانائی کی عالمی مانگ میں ریکارڈ حد تک کمی ہوگی۔

   انٹرنیشنل انرجی ایجنسی کے اندازوں کے مطابق اس سال تونائی کی مانگ میں 6 فیصد کمی ہوگی جو کہ گذشتہ 70 سالوں میں سب سے زیادہ کمی ہے اور مجموعی طور پر ایک ریکارڈ ہے۔

   انٹرنیشنل انرجی ایجنسی کا کہنا ہے کہ اس کی وجہ سے عالمی سطح پر کاربن ڈائی آکسائڈ کے اخراج میں 8 فیصد کمی ہوگی جو کہ 2009 میں عالمی مالیاتی بحران کے بعد سے سب سے زیادہ کمی ہے۔

9. 30 اپريل 2020افغانستان: گذشتہ 24 گھنٹوں میں کورونا کے مریضوں کی تعداد میں ایک دم اضافہ

   

   ،تصویر کا ذریعہEPA

   افغانستان میں گذشتہ 24 گھنٹوں کے دوران کورونا وائرس کے 230 سے زیادہ نئے کیس سامنے آئے ہیں جو ملک میں اب تک ایک دن میں سامنے آنے والی سب سے بڑی تعداد ہے۔

   جمعرات کو ایک پریس کانفرنس کے دوران افغانستان کی وزارتِ صحت نے بتایا کہ گذشتہ روز 232 مریضوں میں وائرس کی تشخیص کے بعد ملک میں متاثرین کی کُل تعداد 2171 ہوگئی ہے۔

   نائب وزیر صحت واحد مجروح نے کہا کہ نئے مریضوں میں سے زیادہ تر کا تعلق قندہار، بلخ، ہرات اور کابل سے ہے۔

10. 30 اپريل 2020بریکنگ, روس: گذشتہ 24 گھنٹوں میں دو لاکھ ٹیسٹ، 7000 نئے متاثرین, سارہ رینزفورڈ، بی بی سی نامہ نگار ماسکو

    

    ،تصویر کا ذریعہAFP

    روس میں کورونا وائرس کے تصدیق شدہ کیسز کی تعداد ایک لاکھ سے زیادہ ہے اور ملک میں اس کی وجہ سے ایک ہزار ہلاکتیں ہو چکی ہیں۔

    سرکاری اعداد و شمار کے مطابق گذشتہ 24 گھنٹوں میں 7099 نئے کیسز سامنے آئے ہیں جو کہ ایک دن میں سب سے زیادہ کیسز ہیں۔ تقریباً سات فیصد کا یہ اضافہ گذشتہ ہفتے کے جیسا ہی ہے۔

    ہلاک ہونے والوں میں سے 65 کا تعلق ماسکو سے تھا۔

    اس ہفتے صدر پوتن نے کہا تھا کہ لاک ڈاؤن میں 12 مئی تک توسیع کی جائے گی چونکہ کورونا وائرس کا خطرہ ابھی ٹلا نہیں ہے اورانفیکشن ابھی اپنے عروج پر نہیں پہنچا۔

    روس بڑے پیمانے پر ٹیسٹنگ کر رہا ہے۔ کسی میں بھی اگر سانس میں دشواری کی علامت ہو یا کوئی کورونا کے مریض کے ساتھ رہتا ہو یا کسی کو نمونیہ ہو یا کوئی فرنٹ لائن طبعی عملے سے ہو، سب کے ٹیسٹ کیے جا رہے ہیں۔

    حکام کا دعویٰ ہے کہ گذشتہ 24 گھنٹوں میں دو لاکھ ٹیسٹ کیے گئے ہیں۔

11. 30 اپريل 2020کیا کورونا وائرس مردہ جسم سے زندہ شخص میں منتقل ہو سکتا ہے؟

    

    ،تصویر کا ذریعہReuters

    دنیا بھر میں کورونا وائرس سے ہلاک ہونے والے افراد کی تدفین کے بہت دلخراش مناظر سامنے آئے ہیں، خاص طور پر ان میتوں کے جن کا ایک بھی پیارا ان کی آخری رسومات میں شامل نہ ہو سکا ہو۔

    تو کیا کورونا وائرس سے متاثرہ افراد کی لاشوں سے کووڈ 19 وائرس دوسروں میں منتقل ہو سکتا ہے؟

    عالمی ادارہ صحت کے ایک ترجمان کا رواں ماہ ایک پریس کانفرنس میں کا کہنا تھا کہ ’آج کی تاریخ تک متاثرہ افراد کی لاشوں سے وائرس منتقل ہونے کے کوئی شواہد نہیں ملے ہیں۔‘

    کیا ان کی جنازے ادا کرنا محفوظ ہے اور کیا ان کی آخری رسومات باعزت طریقے سے انجام دی جا سکتی ہیں؟

    عالمی ادارہ صحت کا کہنا ہے کہ کورونا سے ہلاک ہونے والے فرد کے دوست اور اہلخانہ جنازے کے دوران تمام حفاظتی اقدامات کو ملحوظ خاطر رکھتے ہوئے لاش کو دیکھ سکتے ہیں۔

    ان حفاظتی اقدامات کے تحت وہ لاش کو چھوئے اور چومے مت، دوران جنازہ سماجی فاصلے کو برقرار رکھیں، فاصلے سے لاش کو دیکھیں اور اپنے ہاتھ اچھی طرح پانی اور صابن سے دھوئیں۔

    جنازوں میں جانے سے پہلے آپ کو کیا کیا حفاظتی تدابیر اختیار کرنا ہوں گی؟ جاننے کے لیے کلک کیجیے۔

12. 30 اپريل 2020100ویں سالگرہ پر کیپٹن ٹام مور کو اعزازی کرنل بنا دیا گیا

    اپنے گارڈن میں چکر لگا لگا کر برطانیہ میں این ایچ ایس کے لیے 29 ملین پاؤنڈ عطیہ جمع کرنے والے کیپٹن ٹام مؤر کو ان کی 100ویں برسی کے موقعے پر کرنل بنا دیا گیا ہے۔

    دوسری جنگِ عظیم میں لڑنے والے کپٹن ٹام مؤر کو سالگرہ پر ہزاروں کارڈ موصول ہوئے جن میں ملکہِ برطانیہ کی جانب سے بھی مبارکباد تھی۔ برطانیہ میں روایت ہے کہ 100 سال کی عمر کو پہنچنے والوں کو ملکہ خود کارڈ بھیجتی ہیں۔

    اس موقعے پر ان کا کہنا تھا کہ 100 سال کی عمر کو پہنچنا ایک انتہائی شاندار چیز ہے خاص طور پر اتنے خیر خواہوں کے ساتھ۔ وہ آج اپنی سالگرہ اپنی بیٹی کے گھر پر گزاریں گے اور ان کا کہنا ہے کہ وہ دیگر فیملی ممبران سے انٹرنیٹ کے ذریعے بات کریں گے۔

13. 30 اپريل 2020گریٹا تھنبرگ کا انعامی رقم یونیسیف کو عطیہ کرنے کا فیصلہ

    

    ،تصویر کا ذریعہEPA

    سویڈن سے تعلق رکھنے والی نوجوان ماحولیاتی کارکن گریٹا تھنبرگ نے ایک لاکھ ڈالر انعامی رقم اقوامِ متحدہ کے بچوں کے ادارے کو عطیہ کر دی ہے۔

    گریٹا کو یہ رقم ڈنمارک کے ایک فاؤنڈیشن نے انعام کے طور پر دی تھی لیکن انھوں نے یہ پیسے یونیسیف کو کورونا وائرس کے خلاف لڑائی میں استعمال کرنے کے لیے دے دیے۔

    ان کے مطابق موسمیاتی تبدیلی کی طرح کورونا کی وبا کے باعث بھی بچوں کے حقوق کا بحران پیدا ہوا ہے اور اس کے دنیا بھر میں بچوں پر دور رس اثرات ہوں گے۔

    ’میں ہر کسی سے اپیل کرتی ہوں کہ ہر کوئی آگے بڑھے اور یونیسیف کی مدد کرنے میں میرا ساتھ دے تاکہ وہ بچوں کی زندگی، صحت اور تعلیم کو بہتر بنانے کے لیے اپنا کام جاری رکھ سکیں۔‘

    ڈنمارک میں غربت کے خلاف کام کرنے والے فاؤنڈیشن ہیومن ایکٹ نے، جس نے گریٹا کو انعام دیا، ان کی دیکھا دیکھی یونیسیف کے لیے مزید ایک لاکھ ڈالر کا اعلان کر دیا ہے۔

14. 30 اپريل 2020`لاک ڈاؤن اٹھایا گیا تو لندن کا پبلک ٹرانسپورٹ نظام بوجھ برداش نہیں کر سکے گا‘

    

    ،تصویر کا ذریعہEPA

    ہنگامی صورتحال سے نمٹنے کے لیے حکام کو شی گئی ایک بریفنگ میں ماہرین کا کہنا ہے کہ اگر لاک ڈاؤن میں نرمی کی گئی تو لندن شہر کا پبلک ٹرانسپورٹ نظام اس کی مانگ میں اضافہ کے باعث درہم برہم ہو سکتا ہے۔

    بی بی سی کو حاصل کردہ اس بریفنگ سے منسلک رپورٹ میں لکھا ہے کہ اگر لندن میں شہریوں نے سماجی دوری کو برقرار رکھتے ہوئے لندن کے پبلک ٹرانسپورٹ نظام کو استعمال کرنے کی کوشش کی تو وہ مانگ پوری نہیں کر سکے گا۔

    اس میں مزید کہا گیا ہے کہ اس سے پولیس پر اضافی دباؤ بڑھے گا کیونکہ انھیں ہجوم کی مینجمنٹ اور پابندیوں پر عمل درآمد کے لیے بولایا جائے گا۔

    لندن کے سٹراٹیجک کورڈینیشن گروپ کا کہنا ہے کہ اس دستاویز کو اس تناظر میں نہیں دیکھا جانا چاہیے کہ ایسا ہی ہوگا۔

    گروپ کے ترجمان کا کہنا تھا کہ اس میں تو منصوبہ سازی کے سلسلے میں متعدد ممکنہ صورتحالوں کا جائزہ لیا گیا ہے۔

15. 30 اپريل 2020ویتنام: 14 دن میں مقامی منتقلی کا کوئی نیا مریض نہیں

    

    ،تصویر کا ذریعہReuters

    جمعرات کی صبح تک ویتنام میں کورونا وائرس کے کوئی نئے کیسز نہیں سامنے آئے۔ یہ مسلسل چھٹا دن ہے کہ ملک میں وائرس کے مریضوں کی تعداد میں کوئی اضافہ نہیں ہوا ہے اور مقامی منتقلی کا کیس سامنے آئے دو ہفتے گزر چکے ہیں۔

    تاہم بدھ کی شب دو مریضوں کو دوبارہ وائرس لاحق ہو گیا۔ ملک میں اس وقت 270 مصدقہ مریض ہیں جبکہ باقیوں کو ہسپتالوں سے گھر بھیجا جا چکا ہے۔

16. 30 اپريل 2020ہلاکتوں میں برطانیہ دنیا میں تیسرے نمبر پر، چین دسویں نمبر تک گر گیا

    

    ،تصویر کا ذریعہGetty Images

    یاد رہے کہ کورونا وائرس کا مرکز پہلے چین سے منتقل ہو کر جنوبی یورپ پہنچا اور اب امریکہ اس وبا سے سب سے زیادہ متاثر ہونے والا ملک بن گیا ہے۔

    تاہم اس وائرس سے ہلاکتیں سب سے زیادہ کہاں ہوئی ہیں؟ یہ ایک پیچیدہ سوال ہے کیونکہ مختلف ممالک ہلاکتوں کا شمار مختلف انداز میں کرتے ہیں۔

    مثال کے طور پر بلجیئم کو لے لیں۔ یہاں نصف سے زیادہ ہلاکتیں بری عمر کے لوگوں کے کیئر ہومز میں ہوئی ہیں اور مشتبہ طور پر کورونا کی وجہ سے ہوئی ہیں۔ اس طرح بلجیئم کا ڈیٹا ان ممالک کے مقابلے میں بہت زیادہ سنگین معلوم ہوتا ہے جو کہ مشتبہ طور پر کورونا سے ہلاک ہونے والوں کو کورونا کی وجہ سے ہلاکتوں میں نہیں گنتے۔

    تاہم ان مسائل کے باوجود اگر ہم امریکہ کی جانز ہاپکنز یونیورسٹی کے جمع کردہ اعداد و شمار کا جائزہ لیں تو ایک دلچسپ تصویر سامنے آتی ہے۔

    • امریکہ تقریباً 61000 ہلاکتیں
    • اٹلی 27682 ہلاکتیں
    • برطانیہ 26166 ہلاکتیں (برطانوی حکومت کے مطابق اب تک ملک میں 26097 ہلاکتیں ہوئی ہیں)
    • سپین 24275 ہلاکتیں
    • فرانس 24121 ہلاکتیں
    • بلجیئم 7501 ہلاکتیں
    • جرمنی 6467 ہلاکتیں
    • ایران 5957 ہلاکتیں
    • ہالینڈ 4727 ہلاکتیں
    • چین 4637 ہلاکتیں

17. 30 اپريل 2020جاپان: ہنگامی صورتحال میں ایک ماہ کی توسیع کرنے پر غور

    

    ،تصویر کا ذریعہEPA

    جاپانی حکومت میں ملک میں لاگو ہنگامی صورتحال میں ایک ماہ کی توسیع پر غور کر رہی ہے۔

    جاپانی نیوز ایجنسی کیوڈو کے مطابق حکومتی ذرائع ملک میں ہنگامی صورتحال کو 9 مئی تک لاگو رکھنا چاہتے ہیں۔

    اس کے علاوہ وزیراعظم شنزو آبے اس ہفتے ماہرین کے ایک پینل سے ملک میں کورونا وآیرس کی وبا کے روک تھام کے سلسلے میں ان کے پاس موجود آپشنز کا بھی جائزہ لیں گے۔

    وزیراعظم آبے نے 7 اپریل کو ایک ماہ کے لیے ٹوکیو، اوساکا اور دیگر پانچ اضلاع میں ہنگامی صورتحال کا اعلان کیا تھا۔ تاہم 16 اپریل کو اسے ملک کے تمام 47 اضلاع پر لاگو کر دیا گیا تھا۔

    توقع کی جا رہی ہے کہ وزیراعظم آخر کار یہی فیصلہ کریں گے کہ ہنگامی صورتحال کو مئی کے آخر تک بڑھا دیں۔

18. 30 اپريل 2020گھروں میں وقت گزارنے پر مجبور بچے بنے ننھے مصور!

19. 30 اپريل 2020انڈیا میں سماجی دوری برقرار رکھنے والی موٹر سائیکل تیار

    

    ،تصویر کا ذریعہAFP

    انڈیا کی ریاست تریپورہ میں ایک 39 سالہ شئص نے اپنے بیٹی کو سکول لے جانے کے لیے ایک خصوصی موٹر سائیکل تیار کی ہے جس پر بیٹھنے والوں کے درمیان ایک میٹر کا فاصلہ رہتا ہے۔

    پراتھا ساہا نے ایک کباڑیے سے پرانے موٹر سائیکل کے پرزے خرید کر اس میں ایک میٹر سے لمبے راڈ نصب کر کے اس کے پہہیوں کو ایک دوسرے سے دور کر دیا ہے۔

    ساہا کے مطابق اب وہ اپنی بیٹی کے ساتھ موٹر سائیکل پر نکل سکتے ہیں۔ انھیں یے کام کرنے کا خیال اس وقت آیا جب ان کی بیٹی کو سکول جانے کے لیے بس میں درجنوں بچوں کے ساتھ بیٹھنا پڑا۔

    یہ موٹر سائیکل بیٹری پر چلتی ہے اور اس کی حد رفتار 40 کلومیٹر فی گھنٹہ ہے۔ تین گھنٹے چارج ہونے کے بعد بائیک 80 کلومیٹر کا فاصلہ طے کر سکتی ہے۔

20. 30 اپريل 2020’چین کا ڈیووس‘ بھی منسوخ

    

    ،تصویر کا ذریعہGetty Images

    چین نے 2020 کا بواؤ فورم فار ایشیا، جسے خطے کا ڈیووس ورلڈ اکنامک فورم سمجھا جاتا ہے، کورونا وائرس کی وبا کے باعث منسوخ کر دیا ہے۔

    فورم کی ویب سائٹ پر جاری ہونے والے ایک بیان کے مطابق اسے منسوخ کرنے کا فیصلہ آسان نہیں تھا۔

    بیان میں چینی حکومت اور دیگر منتظمین کی جانب سے فورم کی مسلسل حمایت پر شکریہ ادا کیا گیا۔

    اس سالانہ کانفرنس کا انعقاد مارچ کی 24 سے 27 تاریخ کو ہونا تھا تاہم پہلے اسے ملتوی کیا گیا اور اب باضابطہ طور پر منسوخ کر دیا گیا ہے۔