صدر بائیڈن نے اس معاہدے کو توڑا جو امریکی انتظامیہ نے طالبان کے ساتھ کیا تھا: مائیک پینس

لائیو کوریج

1. 13 اگست 2021'افغانستان خانہ جنگی کی طرف بڑھ رہا ہے‘

   

   ،تصویر کا ذریعہGetty Images

   برطانیہ کے سیکرٹری دفاع بین والیس کا کہنا ہے کہ 'افغانستان خانہ جنگی کی طرف بڑھ رہا ہے۔'

   انھوں نے بی بی سی کے پروگرام بی بی سی بریکفاسٹ میں بات کرتے ہوئے کہا کہ ملک میں دہشت گردی اور غربت میں اضافہ ہو سکتا ہے۔

   انھوں نے کہا کہ 'میرے خیال میں ہم (افغانستان میں) خانہ جنگی کی طرف بڑھ رہے ہیں، صوبے ناکام ہو رہے ہیں اور ملک میں غربت اور دہشت گردی بڑھ رہی ہے۔‘

   تاہم ان کا کہنا تھا کہ اگر افغانستان کی سرزمین سے برطانیہ کے خلاف کوئی دہشت گردی کا منصوبہ بنایا گیا تو برطانیہ وہاں مداخلت کرنے کا حق رکھتا ہے۔

   ان کا کہنا تھا کہ 'اگر افغانستان نے دوبارہ دہشت گردوں کو پناہ دینی شروع کی جو ایک بین الاقوامی خطرہ ہے، جیسا کہ انھوں نے ماضی میں اسامہ بن لادن اور ان کی تنظیم القاعدہ کو محفوظ پناہ گاہیں دے کر کیا تھا تو برطانوی فورسز اپنے شہریوں کا دفاع کرنے کی صلاحیت رکھتی ہیں۔'

   انھوں نے مزید کہا کہ اگر دیگر اقوام نے ان کے خلاف کوئی اقدام نہ اٹھایا تو بین الاقوامی قوانین کے تحت ہمارے (برطانیہ) پاس یہ حق ہے کہ ہم ممکنہ خطرے کے پیش نظر اپنا دفاع کریں۔'

2. 13 اگست 2021بی بی سی اردو کی لائیو کوریج میں خوش آمدید

   بی بی سی اردو کی اس لائیو کوریج میں ہم آپ کو افغانستان میں تیزی سے بدلتی ہوئی صورتحال اور طالبان کی پیش قدمی سے متعلق آگاہ کریں گے۔