آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان کے صوبے پنجاب کے تین دریاؤں میں سیلاب کے ممکنہ خطرے کے پیش نظر مخصوص علاقوں سے لوگوں کو محفوظ مقام پر منتقل کرنے کا کہا گیا ہے۔ تحریک انصاف رہنما فواد چوہدری نے کہا ہے کہ ان کی جماعت سیلاب زدگان کے لیے جمع کردہ فنڈز کے استعمال کے لیے ایک مشترکہ منصوبہ بندی کی خواہش مند تھی۔
این ڈی ایم اے کے مطابق پاکستان میں سیلاب کی تباہ کاریوں کی تفصیل:
پاکستان کے زیر انتظام کشمیر: 41 ہلاکت 21 زخمی
بلوچستان: 253 ہلاک ، 164 زخمی
گلگت بلتستان: 22 ہلاک، 5 زخمی
خیبر پختونخوا: 264 ہلاک ، 327 زخمی
پنجاب: 188 ہلاک ، 2023 زخمی
سندھ: 422 ہلاک ، 1101 زخمی
بیرون ملک مقیم پاکستانی سیلاب کے متاثرین کی مدد کے لیے کیا کر سکتے ہیں، اس کے علاوہ آج ملک بھر میں سیلاب سے پیدا ہونے والی صورتحال جانیے بی بی سی اردو کے فیس بک لائیو میں۔
پاکستان نیشنل ڈیزاسٹر مینجمنٹ کے مطابق گذشتہ 24 گھنٹوں کےدوران ملک بھر میں مزید 27 افراد سیلاب کے باعث ہلاک ہو گئے ہیں۔
سو سے زیادہ ہلاکتیں صوبہ سندھ میں ہوئیں جہاں 15 افراد ہلاک ہوئے مرنے والوں میں آٹھ بچے شامل ہیں جن میں سے 7 کشمور میں ہلاک ہوئے۔
سیلاب سے گذشتہ 24 گھنٹوں میں مزید 87 افراد زخمی ہوئے ہیں۔
اب تک 14 جون کے بعد سے ملک بھر میں سیلابی ریلوں اور اس سے ہونے والے نقصانات کے باعث مجموعی ہلاکتوں کی تعداد 1191 ہو چکی ہے جبکہ ملک بھر میں 3641 افراد زخمی ہوئے ہیں۔
مرنے والوں میں 399 اور زخمیوں میں 553 بچے شامل ہیں۔ این ڈی ایم سے کے مطابق سیلاب سے اب تک 11 لاکھ چھ ہزار سے زائد مکانات جزوی یا مکمل تباہ ہو چکے ہیں۔
243 پل سیلابی ریلوں کی نذر ہو چکے ہیں جبکہ 5063 کلو میٹر سڑکیں تباہ ہوئی ہیں۔
این ڈی ایم اے کے مطابق ملک بھر میں سیلاب سے سات لاکھ 31 ہزار آٹھ سو سے زائد مویشی مارے گئے ہیں۔
پاکستانی فوج کے شعبہِ تعلقات عامہ کا کہنا ہے کہ سیلاب زدگان سے اظہار یکجہتی کے لیے چھ ستمبر کو جی ایچ کیو میں ہونے والی یوم دفاع کی مرکزی تقریب کو ملتوی کر دیا گیا ہے۔
آئی ایس پی آر کے مطابق پاکستانی فوج کے اہلکار سیلاب سے متاثرہ بھائی بہنوں کی خدمت میں مصروف رہیں گے۔
پاکستان میں سیلابی صورتحال اور اس سے ہونے والی نقصانات پر بی بی سی کی لائیو کوریج میں خوش آمدید۔
پاکستان میں 2022 کا مون سون غیر معمولی حد تک طویل اور تباہ کن رہا ہے جس نے ملک کے طول و عرض میں سیلابی کیفیت پیدا کی ہے۔ ملک کے شمال میں گلگت بلتستان سے لے کر جنوب میں کراچی تک ہلاکتوں اور تباہی کا سلسلہ اب تک نہیں رکا ہے اور حکومت کو اس سے ہونے والے مالی نقصان کا مکمل تخمینہ لگانے میں مشکلات ہیں۔