پنجاب کے دریاؤں میں سیلاب کی پیشگوئی، پی ڈی ایم اے کا الرٹ

لائیو کوریج

1. 2 ستمبر 2022روزانہ ایک لاکھ سیلاب متاثرین کے لیے مفت کھانا, بلال احمد

   مدہبی تنظیم دعوت اسلامی کی جانب سےسیلاب سے متاثرہ ایک لاکھ افراد میں روزانہ کی بنیاد پر پکے ہوئے کھانے کی فراہمی کی جا رہی ہے۔

   دعوت اسلامی کے فلاحی ادارے ایف جی آر ایف کےکارکن ملک بھر کے متاثرہ علاقوں میں مفت کھانا فراہم کر رہے ہیں۔

   ترجمان ایف جی آر ایف کے مطابق 70 سے زائد راشن سے بھرے امدادی ٹرک پاک فضائیہ کے تعاون سے تقسیم کیے جا چکےہیں۔

   700 کیمپ لگ چکے جبکہ اگلے ہفتے مزید 3 ہزار کیمپ لگائے جائیں گے۔ اس کے ساتھ ساتھ ایف جی آر ایف کے تحت ڈاکٹروں اور ویٹرنری ڈاکٹروں کی ٹیمیں روانہ کر دی گئی ہیں، ماہر ڈاکٹر ریلیف کیمپوں میں مفت علاج معالجہ کی سہولیات فراہم کررہےہیں۔

   بتایا گیا ہے کہ دعوتِ اسلامی کے شعبہ ایگری کلچر اینڈ لائیو سٹاک کے تحت جانوروں کے ریلیف کیمپ قائم کیے گئے۔ جہاں پر ماہر ویٹرنری ڈاکٹروں کی زیر نگرانی جانوروں کا بھی مفت علاج کیا جا رہا ہے اور ادویات بھی فراہم کی جا رہی ہیں۔

2. 2 ستمبر 2022پاکستان میں سیلاب سے مزید 19 ہلاک، مجموعی ہلاکتوں کی تعداد 1208 ہو گئی

   پاکستان میں قدرتی آفات سے نمٹنے والے ادارے این ڈی ایم اے کے مطابق گذشتہ 24 گھنٹوں میں سیلاب سے مزید 19 اموات ہوئی ہیں۔ مرنے والوں میں تین مرد، سات خواتین اور نو بچے شامل ہیں۔

   اب تک سیلاب کی وجہ سے مرنے والوں کی کل تعداد 1208 ہو گئی ہے۔

   یکم ستمبر کو جاری کردہ این ڈی ایم اے کے ڈیٹا کے مطابق گذشتہ 24 گھنٹوں میں ایک دن میں زخمی ہونے والوں کی تعداد 1256 ہے۔

   زخمی ہونے والوں میں 598 مرد، 395 خواتین اور 263 بچے شامل ہیں۔

   جبکہ اب تک کل زخمی ہونے والے افراد کی مجموعی تعداد 6082 ہو گئی ہے۔

3. 2 ستمبر 2022کیا جنوبی پنجاب ایک ماہ میں تیسری بار ڈوب سکتا ہے؟

4. 2 ستمبر 2022سیلاب ڈائری: ’جمع پونجی سیلاب لے گیا، جو بچ گیا وہ لٹیرے لے گئے‘

5. 1 ستمبر 2022ازبکستان سے انسانی امداد کی پہلی پرواز اسلام آباد پہنچ گئی

   ازبکستان سے انسانی امداد کی پہلی پرواز ابھی اسلام آباد پہنچی ہے۔

   اسلام آباد کے بین الاقوامی ہوائی اڈے پر وزیر برائے بجلی و توانائی جناب خرم دستگیر نے وزارت خارجہ اور نیشنل ڈیزاسٹر مینجمنٹ اتھارٹی کے افسران کے ہمراہ اس کا استقبال کیا۔

   پاکستانی حکام نے ازبکستان کی جانب سے امداد کا شکریہ ادا کیا۔

6. 1 ستمبر 2022پاکستان میں اب سیلابی صورتحال کے بارے میں کیا الرٹ جاری کیا گیا ہے؟

   پاکستان میں سیلابی صورتحال سے متعلق جاری خطرے کے بارے میں قدرتی آفات سے نمنٹے والے ادارے این ڈی ایم اے نے کہا ہے کہ تونسہ کے مقام پر دریائے سندھ میں، گڈو اور سکھر بیراج میں اونچے درجے کا سیلاب ہے جبکہ کوٹری کے مقام پر دریائے سندھ اور نوشہرہ کے مقام پر دریائے کابل میں درمیانے درجے کا سیلاب ہے۔

   چشمہ کے مقام پر دریائے سندھ میں نچلے درجے کا سیلاب ہے۔

   موسم کی پیش گوئی

   اگلے 24 گھنٹوں میں ملک کے زیادہ تر حصوں میں موسم خشک رہنے کا امکان ہے جبکہ کہیں کہیں گرج چمک کے ساتھ تمام بڑے دریاؤں کے بالائی حصوں میں بارش کا بھی امکان ہے۔

7. 1 ستمبر 2022گذشتہ ایک دن میں سیلاب سے 66 ہزار سے زائد گھر تباہ جبکہ 1670 مویشی مر گئے

   این ڈی ایم اے کے مطابق پاکستان میں گذشتہ 24 گھنٹوں میں 66190 جزوی یا مکمل طور پر تباہ ہوئے ہیں۔ ان میں جزوی طور پر تباہ ہونے والے گھروں کی تعداد 2706 بنتی ہے جبکہ مکمل تباہ ہونے والے گھر 63484 ہیں۔

   سیلاب کی وجہ سے 1670 مویشی بھی مر گئے۔

   اب تک پاکستان میں سیلاب سے کل 1172549 گھر تباہ ہوئے ہیں جبکہ 733488 مویشی ہلاک ہوئے ہیں۔ واضح رہے کہ حالیہ سیلاب میں اب تک 5063 سڑکیں، 243 پل اور 173 دکانیں بھی تباہ ہوئی ہیں۔

8. 1 ستمبر 2022گذشتہ 24 گھنٹوں میں سیلاب سے مزید 19 اموات، 1256 زخمی ہوئے

   پاکستان میں قدرتی آفات سے نمٹنے کے قومی ادارے این ڈی ایم اے کے مطابق گذشتہ 24 گھنٹوں میں سیلاب سے مزید 19 اموات ہوئی ہیں۔ مرنے والوں میں تین مرد، سات خواتین اور نو بچے شامل ہیں۔

   اب تک سیلاب کی وجہ سے مرنے والوں کی کل تعداد 1186 بنتی ہے۔

   یکم ستمبر کو جاری کردہ این ڈی ایم اے کے ڈیٹا کے مطابق گذشتہ 24 گھنٹوں میں ایک دن میں زخمی ہونے والوں کی تعداد 1256 بنتی ہے بجکہ جبکہ اب تک کل زخمی ہونے والے افراد کی تعداد 4896 ہو گئی ہے۔

   زخمی ہونے والوں میں 526 مرد، 244 خواتین اور 416 بچے شامل ہیں۔

9. 1 ستمبر 2022پاکستان میں سیلاب کی تازہ ترین صورتحال: خصوصی بلیٹن

   پاکستان میں سیلاب کی صورتحال کے بارے میں بی بی سی اردو کی خصوصی نشریات، جس میں پاکستان کے مختلف علاقوں میں سیلاب کی کوریج کرنے والے بی بی سی کے نمائندے شامل ہیں۔

10. 1 ستمبر 2022سیلاب سے نمٹنے کے لیے وسائل چاہییں: وزیراعظم شہباز شریف

    وزیراعظم شہباز شریف نے کہا سیلاب سے نمٹنے کے لیے وسائل درکار ہیں۔ ان کے مطابق دوست ممالک اور کئی برادر ممالک نے انھیں فون کیے ہیں کہ ہم آپ کے ساتھ ہیں۔

    شہباز شریف نے کہا یہ سب ہو رہا ہے۔ انھوں نے کہا وزیرخارجہ بلاول بھٹو نے بھی سفارتکاروں کو سیلاب کی صورتحال دکھائی۔

    وزیراعظم نے کہا کہ معاشی صورتحال ایسی ہے کہ اب چھینک بھی مارنی ہو تو آئی ایم ایف سے پوچھنا پڑے گا۔ ان کے مطابق قومیں اس طرح آگے نہیں بڑھ سکتی ہیں۔

    انھوں نے کہا اگر بطور قوم زندہ رہنا ہے تو یہ آئی ایم ایف کا پروگرام آخری پروگرام ہونا چاہیے۔

11. 1 ستمبر 2022’کراچی میں بارش سے وہی افراتفری پھیل جاتی ہے جو ہڑتال کی کال پر ہوتی تھی‘

12. 1 ستمبر 2022بلوچستان کے سرحدی علاقے میں سیلاب سے تباہی، خوراک اور بچوں کے خشک دودھ کی قلت, سحربلوچ، بی بی سی اردو

    بی بی سی سے پاکستان کے صوبے بلوچستان کے سرحدی علاقے سے شہریوں نے سیلاب سے ہونے والی تباہی کے مناظر شیئر کیے ہیں۔

    شہریوں کے مطابق بلوچستان کے دارالحکومت کوئٹہ سے تقریباً 150 کلومیٹر کے فاصلے پر شمال جنوب کی جانب افغانستان بارڈر سے متصل علاقے ضلع پشین کے تحصیل برشور توبہ کاکڑی یونین کونسل ابراہیم خان، یونین غیژ اور یونین کونسل انجنٸی میں خوراک کی قلت ہو گئی ہے۔

    ان کے مطابق حالیہ طوفانی بارشوں نے بلوچستان کے دیگر اضلاع کی طرح ضلع پشین کو بھی شدید متاثر کیا ہے۔ ہمارے علاقے میں اس وقت خوراک کی شدید قلت پیدا ہو گئی ہے۔ بچوں کے لیے خشک دودھ ختم ہوگیا ہے۔

    خواتین بچے اور بوڑھے کھلے آسمان تلے بھوکے بیٹھے ہیں۔

    نہ کوئی حکومتی امداد اب تک پہنچی ہے نہ کوئی غیر سرکاری تنظیموں نے اس علاقے کا دورہ کیا ہے۔

    علاقہ مکین مبین خان کا کہنا ہے کہ مون سون کی حالیہ غیر معمولی بارشوں سے تحصیل برشور توبہ کاکڑی میں کئی کچے مکانات منہدم ہو گئے ہیں اور سینکڑوں ایکڑ پر محیط زرعی اراضی کو شدید نقصان پہنچا ہے۔

    میٹھے سیب کے باغات اور انگور اس علاقے کی پہچان ہیں۔

    بلوچستان کا یہ دور دراز کا علاقہ آج بھی زندگی گزارنے کے لیے درکار بنیادی سہولیات سے محروم ہے۔ یہاں نہ گیس ہے، نہ موبائل سگنل مکمل طور پر بحال ہیں اور نہ بجلی کنکشن کا خاص انتظام ہے۔

13. 1 ستمبر 2022برطانیہ کا پاکستان کے لیے مزید 15 ملین پاؤنڈ کی مدد کا اعلان

    برطانیہ میں سیلاب متاثری کی مدد کے لیے پاکستان کو مزید 15 ملین پاؤنڈز دینے کا اعلان کیا ہے۔ اسلام آباد میں برطانیہ کے سفیر کے مطابق برطانیہ کی طرف سے دی جانے والی یہ مدد اقوام متحدہ کی طرف سے دی جانے والی مدد کے دس فیصد سے زائد ہے۔

14. 1 ستمبر 2022سیلاب متاثرین تک امداد پہنچانے کے لیے این جی اوز سے اشتراک کو مؤثر بنائیں: احسن اقبال, تنویر ملک ، صحافی

    وفاقی وزیر منصوبہ بندی و ترقی اور وفاقی فلڈ ریلیف کمیٹی کے چیئرمین احسن اقبال کی زیر صدارت سیلابی صورتحال کا جائزہ لینے کے لیے ایک اجلاس ہوا۔

    پلاننگ کمیشن آف پاکستان کے اعلامیے کے مطابق احسن اقبال نے کہا چاروں صوبائی پی ایم ڈی ایز ریسکیو آپریشن کی تازہ معلومات پہنچانے کے لیے ویب پورٹل پر ڈیش بوڑڈ تشکیل دیں۔

    انھوں نے کہا متاثرین تک امداد پہنچانے کے لیے این جی اوز سے اشتراک کو مؤثر بنایا جائے۔

    احسن اقبال نے کہا ادارے باہمی ربط کو مؤثر بنائیں تاکہ وسائل کا ضیاع نہ ہو سکے۔ انھوں نے سڑکوں اور بجلی کی ترسیل کو بحال کرنے کی کوششوں پر اطمینان کا اظہار کیا۔

    انھوں نے موبائل فون کمپنیوں کو تاکید کی تمام متاثرہ ٹاورز فوری بحال کیے جائیں اور سیلاب سے ہونے والی ہلاکتوں کے محرکات کا تعین کیا جائے تاکہ آئیندہ نقصان بچا جا سکے۔

15. 1 ستمبر 2022قطر سے سیلاب متاثرین کی مدد کے لیے آنے والی پروازیں اب کل پاکستان پہنچیں گی: ترجمان دفتر خارجہ

    ترجمان دفتر خارجہ نے کہا ہے کہ پاکستان میں سیلاب متاثرین کی مدد کے لیے آنے والی پروازوں کا شیڈول تبدیل کر دیا گیا ہے اور اب یہ پروازیں کل تک معطل کر دی گئی ہیں۔

    یہ پروازیں کراچی کے بین الاقوامی ہوائی اڈے پر اتریں گی۔

    ترجمان کے مطابق اس انسانی ہمددری کے جذبے کے تحت شروع کیے جانے والے آپریشن کی مزید تفصیلات بھی شیئر کی جائیں گی۔

16. 1 ستمبر 2022سیلاب کے باوجود گھر چھوڑنے سے انکاری متاثرین

17. 1 ستمبر 2022بحرین میں بازار دریا بن گیا

    سوات کے علاقے بحرین میں دریا کا پانی بازار کے عین درمیان سے گزر رہا ہے اور پانی کی سطح اتنی بلند ہے کہ عمارتوں کی دوسری منزلیں زیرِ آب ہیں۔

18. 1 ستمبر 2022صدر عارف علوی کی مستقبل میں پانی بچانے کے لیے آبی ذخائر، ڈیم بنانے کی ہدایت

    ریڈیو پاکستان کے مطابق صدر ڈاکٹر عارف علوی نے مستقبل میں پانی محفوظ بنانے کے لیے آبی ذخائر اور ڈیم بنانے کی ہدایت کی ہے۔

    صدر کو ڈیرہ غازی خان میں سیلاب متاثرین کے لیے بچاؤ اور امداد کے انتظامات کے بارے میں بریفنگ دی جا رہی ہے۔

    اس سے پہلے ڈاکٹر عارف علوی سیلاب سے متاثرہ علاقوں میں بچاؤ اور امداد کی کارروائیوں کا جائزہ لینے کے لیے ڈیرہ غازی خان پہنچے۔

    صدر عارف علوی آج جنوبی پنجاب، سندھ اور بلوچستان کے سیلاب سے متاثرہ علاقوں کا بھی دورہ کریں گے۔

    وہ متاثرہ علاقوں کا فضائی جائزہ بھی لیں گے، صدر سیلاب متاثرین سے ملاقات بھی کریں گے اور ان میں امدادی سامان تقسیم کریں گے۔

19. 1 ستمبر 2022ڈیرہ غازی خان میں سیلاب سے تباہی

    4 اپریل 2022

    30 اگست 2022

20. 1 ستمبر 2022سکھر میں سیلاب سے تباہی کی سیٹلائٹ تصاویر

    3 اپریل 2022

    31 اگست 2022