BBC News, Pidgin
Waka go wetin de inside

You’re viewing a text-only version of this website that uses less data. View the main version of the website including all images and videos.

Take me to the main website

Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

  1. Coronavirus: Nigeria go test 2 million pipo within three months - NCDC

    Nigerian goment for di daily briefing of di Presidential Task Force on COVID-19 on Tuesday say dem dey target to test up to 2 million pipo for COVID-19 disease for di kontri in di next three months.

    Di Director-general of di Nigeria Centre for Disease Control (NCDC), Chikwe Ihekweazu tok am for di kontri capital, Abuja say dis na part of di aggressive plans to take contain di spread of di virus,

    He tok say dis go mean say dem go test up to 50,000 pipo per state within dis period.

    Im assure say goment dey committed to expand di testing laboratories wey dey di kontri.

    17 total number of testing laboratories na im presently dey di kontri.

    Di kontri don confam 1337 cases of di virus out of about 10,000 pipo wey dem don test for di virus.

  2. Court still say make 'No lockdown' dey Malawi

    Malawi High Court again don stop goment make dem no do lockdown for di kontri as one way to carry check di spread of coronavirus.

    Human Rights Defenders Coalition na dem carry di mata go court say if goment lockdown di kontri, na poor pipo go suffer pass as goment no get plan to dash dem food.

    Di court now done rule say make goment wait make Supreme Court shook eye for di mata.

    Malawi don record 36 cases of coronavirus wey include three deaths.

  3. Coronavirus: New York doctor kill herself

    One top New York City doctor wey dey for di frontline for di fight against coronavirus for America don kill her sef.

    Dr Lorna Breen, wey be di medical director for di emergency department for New York-Presbyterian Allen Hospital in Manhattan, die afta she wunjure herself for Sunday, police tok.

    Di papa of di 49 year old woman, Dr Philip Breen, tell New York Times: say “she dey try do her job but e kill am.”

    Di papa say im daughter no get any mental case. She die for Charlottesville, Virginia, where she dey stay wit her family.

    He say Lorna bin catch coronavirus wen she dey work and she return back go work one and a half week afta she don well.

    Di papa say di last time im follow her tok, she complain of how Covid- 19 patients dey die before dem even carry dem comot for ambulance. Many of di patients die for bed for di Manhattan New York hospital.

    For inside statement wey di Charlottesville Police Department release to confam her death, d police say afta dem receive call for help, dem rush Dr Breen to one local hospital and na for there she die of injuries wey she give herself.

    New York alone get almost one third of confamed Covid- 19 cases for America wey don reach almost one million.

    Di state Govnor, Andrew Cuomo say 24.7% of di pipo wey dey di state don catch di virus.

  4. Buhari and Trump tok for phone- call sake of Covid-19 palava

    America President, Donald Trump for phone conversation with Nigeria President Muhammadu Buhari on Tuesday don pledge support to helep di kontri fight against di coronavirus pandemic.

    According to one tweet from the new media aid to Nigeria president, Bashir Ahmad, di two leaders bin discuss Nigeria s effort to defeat di virus.

    As at Monday, Nigeria COVID-19 confam cases don climb to 1337, and 255 don recover from di virus while 40 pipo don die from am.

    As some parts of di kontri dey on five weeks lockdown, di kontri National Centre for Disease Control say dem don test about 10,000 pipo and plans dey to intensify their efforts to test more pipo in the coming weeks.

  5. Coronavirus briefing: Wey di interpreter? - Deaf campaigners sue UK goment

      • Author, Olaronke Alo
      • Role, Broadcast Journalist, BBC Pidgin

    Deaf campaigners don sue UK goment say sign language interpreter no dey di daily coronavirus briefings wey dem dey do.

    British Sign Language (BSL) users say dem discriminate against them because them no dey get di critical message wey goment dey pass.

    Beth Rose, from BBC Ouch, bin write say di class action legal case bin start from one Twitter campaign wey dem use di hashtag #WhereIsTheInterpreter.

  6. Fear dey say political rallies fit spread coronavirus for Burundi

      • Author, Annette Arotiba
      • Role, Broadcast Journalist, BBC Pidgin

    Cases of coronavirus fit increase for Burundi afta foto of how pipo gada during political rallies wey dem do on Monday don dey cause kasala.

    One specialist for infectious diseases, Olivier Manzi tok say di large number of pipo wey gada fit spread di virus.

    Official for di World Health Organization bin advise social distancing for dis pandemic period as way to control di spread of Covid- 19.

    Burundi electoral commission bin provide buckets and soap for di ruling party rally for Gitega and also for di opposition rally for Ngozi province.

    But one participant wey follow BBC tok for Tuesday, di second day of di rally for Kirundo province say di number of pipo too plenty pass wetin di electoral commission provide.

    Burundi goment don close dia borders as dem dey try to stop di spread of di virus, only lorries wey dey carry load fit enta.

    For inside di kontri, dem only advice say make pipo dey wash dia hands regularly and no shake anybody, apart from that, life dey go on normal.

    Di kontri get 14 cases of Covid- 19, and one death.

    Burundi goment tanda say elections must hold for May 20 even as coronavirus pandemic dey.

  7. Girl wey survive Covid-19 dey advice Nigerians ahead of 4 May plan to reduce lockdown measures

    "Take am from pesin wey don taste am. You no want experience Covid-19"Survivor Oluwaseun Osowobi give dis advice as coronavirus lockdown go reduce from 4th May for Nigeria.

  8. America Airline wan make face mask compulsory for passengers

      • Author, Yemisi Lanre-Idowu
      • Role, BBC Pidgin, Lagos

    One Airline for America, JetBlue Airways don become di first US airline wey go compulsory face mask for passengers.

    Starting from 4 May, passengers go need wear face mask wey go cover dia mouth and nose from di time dey enta di plane until di time dey comot. Only small children wey no go fit use face mask dey free from dis rule.

    President of JetBlue Joanna Geraghty say di face mask wey you wear no be because of you but to protect pipo wey dey around you.

    Dem go remind di customers by email to provide dia own facemask.

    Di news dey come as other US airlines dey try meet di new safety standards.

    American Airlines na di biggest airline for di world and dem announce on 27 April Monday say from early next month, dem go provide mask and hand sanitizers for some planes.

  9. How Nigeria plan to fight coronavirus without lockdown

  10. Incase you just dey join us...

    Dis na di our live coverage ontop coronavirus and how e dey affect di world.

    See di latest.

    • UK hold one minute silence to remember key workers wey don die.
    • France and Spain dey prepare to unveil dia plans to reduce lockdown for dia kontri wey don dey for several weeks now.
    • Nigeria don get two new coronavirus testing laboratories for Lagos and Ogun state.
    • Scientists for Ghana develop rapid diagnostic kit for Covid-19 mass testing.
    • 'No flights in or out of Argentina till September 1st'
    • Some informate wey comot show say one third of all di virus death for England and Wales dey happun for care homes.
    • Coronavirus cases don pass 3 million for di world and more dan 200,000 pipo don die, according to John Hopkins University.

  11. Kano mysterious deaths: Doctors deny tori say dem run comot di state

  12. UN warn against use of ‘too much force’ to control movement

    Di United Nations Human Rights Office don warn kontries against di use of too much force during di Covid-19 pandemic.

    Di agency tell goments make dem “know say di threat na virus, no be pipo”.

    South Africa, Kenya, Uganda and Rwanda dey among kontries wey security forces don use brutal method to force pipo to stay for house.

    For Nigeria, viral videos for internet don show some cases wia security forces dey beat pipo wey dem catch for road.

    Di UN Human Rights Commissioner Michelle Bachelet say kontries no suppose dey use emergency powers as weapon to control movement.

    She say to shoot, arrest and abuse pipo wey break curfew because dem dey find food to chop no dey okay and e dey against di law.

    Di UN body wey she dey head say more dan 17,000 South Africans don chop arrest sake of Covid-19 restrictions.

    For Kenya, 27 human rights organisations don write open letter to goment dey demand say make dem stop to dey force pipo go quarantine centres as punishment for pipo wey no obey curfew.

    52 African countries don report about 32,100 coronavirus cases, wit 1,428 deaths and 9,741 pipo wey don recover.

  13. Cameroon confirm 84 new cases of Covid-19

      • Author, Bongben Jisi
      • Role, BBC Pidgin, Cameroon

    Health Minister Malachie Manaouda say Cameroon don confirm 84 new cases for di kontri.

    Dis one bring di total to 1705 cases for Covid-19 for di kontri.

    Out of 84, Douala, Economic capital get 61 and Yaoundé 22 cases and one for Bertoua.

    Since March 6, weh Cameroon announce e first case, de kontri don confirm 1705 cases, 805 pipo don well, 58 pipo don die, 118 dey for hospital, 12 inside ICU or oxygen.

    Just now, 42 health workers don contract Covid-19, 15 for Littoral region, 6 for Centre region, 21 for West region, 2 for southwest and 3 of dem die.

    De average age for pipo weh deh don catch de virus na 36 years and 3 months baby na the youngest pesin for get de sick.

    Authorities announce new material, tins for helep pipo breath laik 70 oxygen extractors, 34 respirators, 27,000 extraction kits, 100,000 masks, 43,000 treatments and 3000 thermo-flashes.

    Health officials continue for di advice population make deh wear masks before deh komot, use hand sanitisers, wash hands wit soap and running wata, cough or sneeze for inside elbow.

    If deh get signs laik, cough, fever, running nose, no di fit breath well make deh call 1510 or deh numbers weh goment give for different regions.

    �� ��%��V��

  14. 'No flights in or out of Argentina till September 1st'

    Argentina don stop all internal and international flights for di kontri till 1st September sake of di deadly coronavirus epidemic.

    Di authorities say make airlines no sell tickets for flights wey suppose happun for di next four months.

    Dis na as sabi pipo for aviation for di kontri don dey attack di idea say e go lead to ova three hundred job losses for di kontri.

    Di kontri don get about 4,000 confam coronavirus cases and 192 deaths, according to John Hopkins University.

    Argentina bin don close dia border to non residents for March, even as dem impose tough quarantine measures.

  15. Scientists for Ghana develop rapid diagnostic kit for Covid-19 mass testing

      • Author, Favour Nunoo
      • Role, BBC Pidgin

    Ghana scientists for Kwame Nkrumah University of Science and Technology (KNUST) den Incas Diagnostics for Kumasi develop Covid-19 Rapid Diagnostic Test (RDT) kit.

    Dis rapid test kit dey like glucose or home pregnancy test kit, after you prick finger for blood, lines go appear on de kit to show if you test negative or positive for Covid-19.

    Maximum waiting time for results be between 15 to 20 minutes, dis according to de producers go help speed up testing for Ghana.

    People no dey need any technical training in order to use to de device.

    De main use of de rapid test kit be say e go help Ghana do mass testing of people for Covid-19 den enhance contact tracing efforts.

    De scientists behind de innovation currently dey engage Food and Drugs Authority den Ghana Standards Authority who go give green-light so say dem fit use de test kit on Ghanaians.

  16. 255 pipo don recover from coronavirus for Nigeria but di total confam cases rise to 1337

    Authorities for Nigeria say 255 pipo don recover from coronavirus but di total confam cases for di Kontri rise to 1337.

    As of 27 April, Nigeria Center for Disease control confam 64 new cases of Covid-19.

    34 for Lagos, 15 for FCT, 11 for Borno, two for Taraba and two for Gombe.

    NCDC say dem don test 11,426 pipo as di virus don kill 40 pipo.

  17. Funny memes Nigerians use react to Buhari lockdown speech

  18. Una goodmorning!

    See our Tuesday proverb of di day.

  19. See di main tins President Buhari tok for im April 27 speech to Nigerians

  20. Na here we go march break

    Na so awa Monday 27 April, 2020 coverage of di Coronavirus alais Covid-19 as e dey hot across di world, take waka.

    We go stop here for now until tomorrow Tuesday 28 April. You fit still scroll down read all di tori we don torchlight today.

    Make we live una wit di 8PM broadcast of President Muhammadu Buhari to Nigeria, earlier dis evening.

    From Damilola, Moseph, Annette, Ronke and Daniel una good night!