Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

1 May 2020Trump get ‘high confidence’ say coronavirus come from one 'lab for Wuhan', But US intelligence say di virus no be man made
US President Donald Trump don lash out again, dey accuse both China and di World Health Organization ontop di pandemic.
Im say im get “high degree” of confidence say di virus come from one Chinese lab – adding say im no dey allowed to tok whether China “make mistake” or do “sometin on purpose”.
US intelligence officials bin tok before say Covid-19 “no be virus wey man manufacture or genetically modify”.
Trump bin don suggest say China no warn di US because dem wan dabaru im re-election bid.
Im also blast WHO say “shame suppose dey catch dem” as dem “be like mouthpiece for China”.
1 May 2020One million pipo don recover from Covid-19 worldwide
Figures wey dey comot from today headline show say at least one million pipo don recover from coronavirus out of three million cases around di world.
Covid-19 get low death rate wey mean say almost all di three million cases go later recover, even though for some cases, e fit take long time.
But how many go really recover?
Dat one depend on how many pipo wey catch di virus go die - something wey we still no know.
Medical journal The Lancet dey suggest say di death rate high pass influenza own (0.1%) and e low pass Sars (9.5%).
But because say testing dey different from kontri to kontri, na only di ratio of deaths to confam infections we fit see.
Wen dem dey test only pipo wey dia symptoms dey strong well- well, di death rate go normally high pass 1%.
For reality, e dey likely say many pipo go catch di virus and dem no go even record am – meaning say di death rate dey lower dan wetin “official” ratios fit dey suggest.
1 May 2020Sports round-up: Premier League players dey 'fear'
- Manchester City striker Sergio Aguero say players dey 'fear' say dem go need to return to action in di middle of di coronavirus palava. Dem suspend Premier League since 13 March - but clubs say dem remain committed to play di season 92 remaining fixtures
- Paris St Germain don collect di award of di Liguw 1 title afta dem announce say di season no go resume.
- Rugby league for England go collect £16m in government loans to help dem recover from di impact of di pandemic
1 May 2020South Africa dey relax some lockdown restrictions
South Africa dey relax some of im lockdown restrictions today.
Some businesses go dey allowed to reopen, restaurants go fit deliver food, and families go dey allowed to leave dia house go exercise.
But in some areas, South Africa five-week lockdown go remain just as strict as e dey before.
Di sale of alcohol go still dey banned. Dis restriction don help keep di kontri hospital wards empty.
Goment go also deploy more troops for di streets and impose overnight curfew.
Security forces don face tok say dem dey do anyhow. Now, dem fit deploy tens of thousands of extra troops to patrol di streets.
Goment – wey so far don collect accolade say dem move fast to fight di virus – go now need to balance di need to keep di infection rate down with di risk of growing frustration and hunger inside kontri wey already dey face issue of inequality and get economic struggles.
1 May 2020NCDC report 204 new Covid-19 cases in a day
Di Nigeria Centre for Disease Control report 204 new cases of Covid 19 for di kontri, to make di total confam cases 1932.
According to di NCDC, 71 percent of all di cases na from three states, wit di highest number from Kano state wey get 80 new cases, Lagos wey get 45 new cases and Gombe wey just record 12 cases.
So far, 319 pipo wey bin get di virus for Nigeria don recover and 58 don die.
1 May 2020Una good morning!
Welcome to our every day live coverage ontop coronavirus and how e dey affect di world.
Make dis proverb ginger you today.
30 April 2020Una na Good Night!
Na here we go march break ontop Thursday 30 April, 2020 coverage of coronavirus. Friday 1 May, 2020 na anoday day.
Make we leave una wit dis Twitter post from NCDC & remember to wash your hands always.
From Moseph, Annette, Ronke, Yemisi and Daniel, una bye-bye.
30 April 2020Coronavirus: Kenya surprise widow wey cook stones for her children
Kenyans don rally round one widow wey dey cook stones for her eight children to make dem believe say she dey cook food for dem.
Peninah Bahati Kitsao wey dey live for Mombasa hope say, sleep go catch dem as dem dey wait for dia food.
Na one of her neigbhour wey di mata shock, call tori pipo to come see wetin her eyes dey see.
Madam Kitsao dey always wash cloth for pipo, but di lockdown and social distancing sake of coronavirus no gree her fit get work again.
Afta Kenya NTV interview her, di widow don receive money through fone and for bank account wey Ms Momanyi helep her open as she no sabi read and write.
Di widow dey live wit her eight children inside two-bedroom house wey no get water or electricity.
She say di generosity wey she receive na "miracle".
30 April 2020"Many pipo for Lagos wey test positive to Covid-19 no fall sick" - Lagos Deputy Govnor
Lagos goment don tel pipo for di state make dem follow guidelines wey dem release to stay safe as dem dey try relax di lockdown.
Deputy govnor, Babajide Hamzat naim tok dis one wen BBC Pidgin do tok tok wit am on Thursday to hia update ontop Covid19 mata for di state.
E say di number wey dey increase now for people wey test positive na sake of say dia health workers dey do plenti testing, and dey cover plenti areas.
Ontop face mask mata, E tell Lagos pipo say if pesin get enough face mask, make dem share give others as di one wey goment go share no go fit reach every body.
E add say "many pipo for Lagos wey test positive to Covid-19 no fall sick".
Oga Hamzat say goment go share safety equipment give market pipo so dem go dey protected to sale dia good.
Work go resume for the state on Monday May 4, To read guidelines wey goments release to ease di lock down, click on dis link. https://bbc.com.im/pidgin/tori-52466018%3C/a%3E%3C/p%3E%3C/div%3E%3Cdiv dir="ltr" class="css-1k9op6x e17x9cvu0">
So far di state get over 900 confirmed cases, 20 deaths and 199 discharged persons. Lagos,Ogun and Abuja dey lockdown for over three weeks now.
30 April 2020Coronavirus: Russian PM Mishustin test positive for virus
Russian Prime Minister Mikhail Mishustin say im don test positive wit coronavirus.
Di positive test come di same day Russia record 7,099 cases, wey make di total number of infections above 100,000.
Oga Mishustin bin collect di position of prime minister for January and im don dey very active wit di way Russia take dey handle di epidemic.
Russian TV show as im take tell President Vladimir Putin of im result.
"I just hear say di coronavirus test wey I do dey positive,” di prime minister tok for di video call.
Oga Mishustin suggest say make di First Deputy Prime Minister Andrei Belousov take over im position and Oga Putin agree.
Di Prime Minister don go self-isolate himself.
30 April 2020Breaking, Cameroon relax rules even as Coronavirus cases hit ceiling
Article Information
- Author, Leocadia Bongben
  Role, BBC Pidgin, Yaounde
Cameroon goment don relax rules, say bars fit open afta 6:00pm, taxi fit take normal load, three for back and one for front wit driver, though all man must wear mask.
For March 17 goment bin put de rules say make bars lock for 6:00pm, make taxi carri only three pipo, two for back and one wit driver for keep distance for fight Covid-19.
Just now, Cameroon na de second kontri for Sub-saharan Africa wit 1832 cases for Covid-19 and 61 pipo don die.
But goment di bank na only for de 943 pipo weh deh don well and say pipo no di over die wen deh compare wit infected cases.
For e 19 ‘relaxing’ measures goment say bar fit open afta 6:00pm but some konkri pipo di wanda how pipo go drink for bar wit mask weh e di cover dia nose and face.
Also, goment increase family allowance from FCFA2800 to FCFA 4500. Deh go pay dis allowance for companies weh deh sack staff or no fit pay staff for transport, and restaurant sector.
Hotels and restaurants no go pay tourist tax for de rest of de year, and land owners get till September dis year for pay land tax.
Business pipo go get taim of grace for pay some taxes, and taxi and bikes no go pay parking fees.
Though goment relax rules for bars and transport sector, border and schoolsgo remain close for anoda two weeks.
30 April 2020Coronavirus: Los Angeles offer free virus testing for all dia residents
Los Angeles dey offer free coronavirus tests to all residents, e no mata weda dem dey show symptoms or not.
Mayor Eric Garcetti do di announcement few hours afta Los Angeles County report di highest number of Covid-19 cases wey dem do for one day.
Before now, na only essential workers and those wey dey show symptoms fit do di test because of scarcity of kits.
Los Angeles County get almost half of di confamed coronavirus cases for California. Di state don record over 48,000 cases and more than 1,900 deaths.
For Thursday, Oga Garcetti encourage everybody wey dey live for Los Angeles to go do test afta e tweet say “LA don become di first major city wey go offer free Covid- 19 testing”.
Meanwhile, California Govnor Gavin Newsom dey expected to sign executive order wey go make dem close all di beaches and parks for di state afta plenty pipo gada for there for weekend.
Although some beaches for California don dey closed for some weeks now, but some odas dey open as social distancing rules dey guide dem.
Oga Newsom bin recently tok say im wan lift some of di restrictions but di recent foto wey show plenty pipo gada for beach for di most populous state for US, make di govnor tok say Californians behavior go make am change im mind.
30 April 2020Dead bodi fit carry covid-19?
30 April 2020Nigeria election office no go resume for 4th May
Article Information
- Author, Annette Arotiba
  Role, Broadcast Journalist, BBC Pidgin
Nigeria election office(INEC) no go follow oda goment offices for di kontri resume work for Monday 4th May, 2020 even as federal goment don relax di lockdown wey dey parts of di west African nation and say workers fit resume go work.
Di independent National Electoral Commission National Commissioner and Chairman, Voters Education Committee, Festus Okoye tok say, di commission go hold meeting for Thursday 7th May and na for there dem go decide wen dia offices fit resume.
Oga Okoye say di electoral body don note di advice and protocols di Presidential Taskforce Committee on COVID- 19 give but dem wan review di situation of dia offices wey dey across di kontri and adopt clear road map and guidelines before dem fit resume for work.
Dem go inform dia staff, stakeholders and di public di exact date wey normal activities go start for di commission afta di meeting.
Di commission say dem understand di reason why dem gats resume early, because of di elections wey dey dia front. Di governorship elections for Edo and Ondo states, the bye elections for Bayelsa, Imo and Plateau states.
Di electoral body say dem dey do everytin to make sure say dem observe critical protocols to make sure say di process dey smooth and everytin dey normal.
30 April 2020"We get for know weti di make pipo well afta deh take Archbishop COVID-19 concoction"
30 April 2020DR Congo confam cases of COVID- 19 for Prison
Article Information
- Author, Annette Arotiba
  Role, Broadcast Journalist, BBC Pidgin
Di Democratic Republic of Congo don confam dia first case of COVID-19 for inside prison.
At least four inmates test positive and many more dey quarantine for Ndolo prison wey dey di capital city, Kinshasa.
Di overcrowded prison dey carry inmates wey pass im power four times.
Human rights organisations dey worry say di virus fit spread among prisoners and even to di families wey go visit dem.
Rights groups dey ask make dem release prisoners wey dem accuse of small crimes to take decongest di prison.
Health officials don send one team go di prison to torchlight how di outbreak take happun.
DR Congo don confam cases of di new coronavirus inside at least seven provinces, but di majority of cases na for Kinshasa wey be di epic centre of di virus for di kontri.
Di eastern part of di country, wey no get any active case for now don open dia border make pipo fit dey travel for di cities wey dey those provinces.
30 April 2020Di rare picture of minister wey back him baby during Zoom meeting
Article Information
- Author, Olaronke Alo
  Role, Broadcast Journalist, BBC Pidgin
At first e look like one cute Twitter picture to make pipo happy for dis uncertain times.
But as di man share di image of im 10-month-old daughter wey im tie for back during one online meeting and im be Sierra Leone Education Minister, di conversation turn to gender roles.
David Moinina Sengeh say im wan set example for other men.
Im tell BBC say e dey rare to see a child for Im papa back for Im kontri.
Of course, picture of woman wit baby for her back no go make pipo blink eye, dis na wetin di 33 year old minister agree.
"Many women dey do am daily, but e dey so normal, we no dey tok about am at all, if na my wife do am e no go become viral tweet,” he tell BBC Newsday programme from Sierra Leone capital, Freetown, wia partial lockdown dey to prevent di spread of coronavirus.
Di Education Minister dey kitchen for im home dey feed Peynina wen he start to take part for one Zoom meeting.
He notice say she wan sleep so he tie am for back make he fit continue di meeting.
30 April 2020COVID-19 Latest updates
30 April 2020Papa wey reject son become COVID-19 Ambassador
Article Information
- Author, Olaronke Alo
  Role, Broadcast Journalist, BBC Pidgin
Govnor Kayode Fayemi of Ekiti State south west Nigeria don appoint Adeoye as Covid-19 Respond ambassador for di state.
Dis dey come barely after 24 hours wen viral video of one man forEkiti state, South West Nigeria ask im son wey just travel come from Lagos, anoda state for di region wey be di epicenter of Coronavirus for Nigeria to isolate himself for 14 days.
For di video, Oga Adeoye bin report im son to local authorities for dem to isolate di boy or he no go allow am follow him go house.
According to di govnor, Oga Adeoye go helep di enforce di message as active member of di Covid-19 Taskforce for di state.
Di goment and di good pipo of Ekiti State dey very proud of dis ogbonge act of courage and principle wey be di hallmarks of di Ekiti pesin. Di governor tok for statement.
Di state don record eightcases of coronavirus.
30 April 2020Coronavirus treatment: I don approve make dem use chloroquine take treat COVID-19 – Bauchi Governor
Govnor of Bauchi State, Bala Mohammed don give order for di use of Chloroquine as melecine to take treat COVID- 19.
Oga Mohammed wey be di index case of COVID- 19 for di state, say na “Chloroquine and Zithromax” dey take treat am wen im catch di virus.
Di govnor wey tok dis one wen e dey do Coronavirus update for di state say im go take any kasala wey burst on top say im approve di melecine.
“Our medical team use dia brain, na why dem dey use chloroquine and Zithromax take treat patients, even though e dey against protocol for some places.”
As e dey follow health officials tok, e tell dem say im don give dem directive say dem must use di drugs wey im use, wey make am well, just as dem dey use am for oda cases wey don well.
“E tok say make we know follow oyinbo pipo wey tok say di melecine no good.”
“We dey used to dey take chloroquine for Nigeria. We go use am. We don take responsibility and I don take responsibility.
“Zithromax and chloroquine no go wunjure our body, our physiological system don adapt to am. If fever dey worry you, use chloroquine.”
E say dis drugs na di reason why Bauchi neva record any death.
“Nobody get any serious symptoms for Bauchi, even though di number of cases for di state be 23.”
Oga Mohammed statement on top chloroquine don join di debate wey dey happun for di world if make dem recommend am.
While di drug don dey effective in some cases to treat COVID-19, di World Health Organisation and other experts warn say e neva go through essential clinical trials wey go fit make dem recommend am to dey use treat di disease, and e fit get bad effect.