یونیسف وايي، شپږ سوه زره افغان ماشومانو ته سيمه ييز ټولګي جوړوي
د عکس سرچینه، Getty Images
ملګرو ملتونو د ماشومانو ملاتړ اداره یا یونیسف وايي، په ۲۰۲۳ کال کې به د افغانستان شپږ سوه زره ماشومانو ته د زدکړو ۲۰ زره نوي سیمه ایز ټولګي جوړ کړي چې پر بنسټ به یې هیواد کې د زدکړو د بهیر له چټکوالي سره مرسته وشي.
یونیسف پر ټوېټر لیکلي، دغه اداره په دې لټه کې ده چې لا ډېر نوي ښوونیز ټولګي جوړ او د افغان ماشومانو زدکړو ته هرځای په اسانۍ لار جوړه شي.
یونیسف ویلي، د افغان ماشومانو د زدکړو د ملاتړ لپاره ډنمارک ورسره تازه د پنځو میلیونو ډالرو مرسته اعلان کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د ملګرو ملتونو د ماشومانو ملاتړ صندوق له کلونو راهسې هغو سیمو کې له ښونځيو د پاتې ماشومانو د زدکړو لپاره کار کوي چې لرې پرتې او ډېرو اسانتياو ته لاس رسی نه لري.
د پوهنیزو چارو کارپوهان دا وړ هڅې له دې امله مهمې ګڼي چې دا مهال افغانستان کې د زدکړو اډانه له بل هر وخت ډېره مرستو ته اړه ده.
د هېواد لر و بر کې له تېر یوه نیم کال راهیسې سلګونه زره افغانې نجونې له ښونځیو په کور شوي، که څه هم د یونیسف په نویو ټولګیو کې روښانه شوې نه ده چې پر کاله ناستو نجونو ته به هم دغه ټولګي جوړ شي او که نه.
هم مهاله د طالبانو د بهرنیو چارو مرستیال وزیر شیر محمد عباس ستانکزي یو وار بیا د خپل حکومت مشران ننګولي چې د زدکړو انډولیزو حقونو ته دې پام وشي.
د ښاغلي ستانکزي له څرګندونو وړاندې د طالبانو د لوړو زده کړو وزیر ندا محمد ندیم ویلي چ ې د تیر جمهوري نظام ټول قوانین د علمي رتبو او نورو اکاډمیکو چارو په ګډون نوي کوي.
هغه همدارنګه په یوه بله وینا کې ویلي پوهنتونونو کې د ګډوله فکرونو مخنیوی کوي.
د افغانستان د ښوونیزې اډانې لپاره تېرې لسیزې د جګړو له امله ناوړه بلل کېدې، خو په اوس کې د طالبانو په تګلارو له دې امله نیوکې کېږي چې پر نجونو زدکوونکو یې محدودیتونه ډېر کړي او ورسره د ښونځیو او پوهنتونو لپاره روښانه پالیسۍ نه لري.
