စစ်ကောင်စီနဲ့ စစ်ရေးတင်းမာနေတဲ့ ကယား (ကရင်နီ)ဒေသမှာတော့ ဧပြီလပထမအပတ်အတွင်း ဒီးမော့ဆိုနဲ့ ဖရူဆိုကားလမ်းမတလျှောက် တိုက်ပွဲတွေ ဆက်တိုက်ရှိခဲ့တယ်လို့ ကရင်နီအမျိုးသားများကာကွယ်ရေးတပ် KNDF ကထုတ်ပြန်ပါတယ်။
အဲ့ဒီဒီးမော့ဆို - ဖရူဆိုကားလမ်းမကြီးကို အသုံးပြုကာ စစ်ကောင်စီဘက်ကနေ ဖရူဆိုနဲ့ ဘောလခဲမြို့နယ်တွေဘက်ကို တပ်အင်အားနဲ့ရိက္ခာတွေပို့ဆောင်နေတာကြောင့် အဲ့ဒီလမ်းမကြီးဘေးကကျေးရွာတွေအနီး ထိတွေ့တိုက်ပွဲတွေဖြစ်ခဲ့တယ်လို့ ဆိုပါတယ်။
ဒါ့အပြင် လွိုင်ကော်၊ ဒီးမော့ဆိုနဲ့ ဖရူဆိုမြို့နယ်တွေဘက်ကို စစ်ကောင်စီကနေတာဝေးပစ်လက်နက်ကြီးတွေနဲ့ တိုက်ခိုက်တာကြောင့် ဒီဧပြီလပထမအပတ် အတွင်း အရပ်သားပြည်သူ (၇)ဦးထိခိုက်ဒဏ်ရာရပြီး (၂)ဦးသေဆုံးခဲ့တယ်လို့လည်းထုတ်ပြန်ချက်ကဖော်ပြပါတယ်။
ဒီးမော့ဆိုနဲ့ ဖရူဆိုမြို့နယ်တွင်း ကျေးရွာတွေကနေအိမ် (၃၅)လုံး မီးရှို့ခံရသလို (၉)လုံးကလက်နက်ကြီးကျည်ထိမှန်ပျက်စီးခဲ့တယ်လို့ ဆိုပါတယ်။
တပတ်တာကာလအတွင်း KNDF နဲ့ပူးပေါင်းတပ်ဖွဲ့တွေဘက်က ဧပြီ(၂)ရက်၊မနက်အစောပိုင်းမှာလွိုင်ကော်မြို့နယ်၊လောပိတရေအားလျှပ်စစ်စက်ရုံအမှတ် (၁)မှာရှိတဲ့ စစ်ကောင်စီကင်းစခန်းကိုတိုက်ခိုက်ခဲ့သလို အဲ့ဒီနေ့ညနေမှာပဲ ဒီးမော့ဆိုမြို့နယ်၊ကုန်းသာကျေးရွာ စာသင်ကျောင်းမှာ တပ်စွဲထားတဲ့ တပ်ဖွဲ့တွေကိုလည်း တိုက်ခိုက်ခဲ့တယ်လို့ဆိုပါတယ်။
ဧပြီလပထမအပတ်တိုက်ပွဲတွေအတွင်း စစ်ကောင်စီတပ်ဖွဲ့ဝင် ဆယ်ဦးထက်မနည်း သေဆုံးခဲ့ရသလို KNDF ဘက်ကလည်း တစ်ဦးထိခိုက်သေဆုံးခဲ့တယ်လို့ ထုတ်ပြန်ထားပါတယ်။
ဒီတိုက်ပွဲတွေနဲ့ တပ်ဖွဲ့ဝင်တွေသေဆုံးမှုနဲ့ပတ်သက်ပြီး ဒီကနေ့ ဧပြီ (၉)ရက်မနက်ပိုင်းအထိစစ်ကောင်စီဘက်ကတစုံတရာထုတ်ပြန်ကြေညာတာမရှိသေးသလို ဘီဘီစီအနေနဲ့ စစ်ကောင်စီတပ်ဖွဲ့ဝင် တွေသေဆုံးမှုနဲ့ပတ်သက်လို့သီးခြားအတည်ပြုနိုင်တာမရှိသေးပါဘူး။
လက်ရှိကရင်နီဒေသမှာတော့ အရပ်သားပြည်သူသိန်းနဲ့ချီစစ်ဘေးရှောင်နေကြရပြီး ကားလမ်းမကြီးတွေသွားလာရခက်ခဲတာကြောင့် အစားအသောက်၊ ဆေးဝါးရရှိဖို့ ခက်ခဲနေသလို တချို့စစ်ရှောင်စခန်းတွေမှာ ရေရှားပါးတဲ့ပြဿနာကိုပါရင်ဆိုင်နေရပြီလို့ စစ်ရှောင်ကူညီသူတွေက ဘီဘီစီကိုပြောပါတယ်။
ဓာတ်ပုံ ရင်းမြစ်, KNDF
