ကိုဗစ်ကူးစက်မှုကြောင့် အာဆီယံ ဘောလုံး U23 ပြိုင်ပွဲက မြန်မာနုတ်ထွက်

တိုက်ရိုက် ထုတ်လွှင့်ချက်

1. ၁၃ ဇန်နဝါရီ ၂၀၂၂လွိုင်ကော်တိုက်ပွဲ မြို့အတွင်းဘက်ကို ရောက်လာ

   လွိုင်ကော်မြို့အတွင်း နေရာအချို့မှာ ဒီကနေ့ စစ်ကောင်စီတပ်တွေနဲ့ ဒေသကာကွယ်ရေးတပ်တွေ ဇန်နဝါရီလ ၁၃ ၇က်နေ့မှာတိုက်ပွဲတွေ ဆက်လက်ဖြစ်ပွားနေတယ်လို့ ဒေသခံတွေက တစ်ဆင့်သိရပါတယ်။

   လွိုင်ကော်မြို့ မိုင်းလုံးရပ်ကွက်အတွင်းမှာ လက်နက်ကြီးလက်နက်ငယ် အသံတွေဆူညံနေသလို မင်္ဂလာရပ်ကွက် တောင်ကွဲစေတီအနားမှာလည်းတိုက်ပွဲတွေဖြစ်နေတယ်လို့ ဒေသခံတွေကပြောပါတယ်။

   လွိုင်ကော်မြို့အတွင်းကို စစ်ကောင်စီက အပိုင်ထိန်းချုပ်နိုင်ဖို့ ကြိုးစားနေသလို ဒေသကာကွယ်ရေးတပ်တွေကလည်း ထိုးစစ်ဆင်တဲ့တိုက်ပွဲတွေက ရှိနေတဲ့အတွက် တိုက်ပွဲတွေ ပိုပြီးပြင်းထန်လာနိုင်တယ်လို့လည်းဆိုပါတယ်။

   ဇန်နဝါရီလ ၁၃ ရက်နေ့ နေ့လယ်ပိုင်းအထိ ပစ်ခတ်မှုတွေရှိနေပြီးတော့ ဒီဘက်ရပ်ကွက်ပစ်ရင် ဟိုဘက်ရပ်ကွက်ကို ပြောင်းပြီးနေရကြောင်းနဲ့ စစ်ကောင်စီက တွေ့သမျှ မြင်သမျှ ပစ်ခတ်မှုတွေရှိနေတဲ့ အတွက်စိုးရိမ်နေရကြောင်း လည်းသူတို့ကပြောပါတယ်။

   ဒါ့အပြင် လွိုင်ကော်ရှမ်းပိုင်းရွှေကျောင်းအနီး လက်နက်ကြီးကျည်တွေကျရောက်နေသလို ကျောင်းအတွင်းက စစ်ရှောင်နဲ ရဟန်းသံဃာတွေနေရာရွှေ့ပြောင်းဖို့ ကို အရေးပေါ် အကူအညီတောင်းနေရတယ်လို့လည်း ဆိုပါတယ်။

   အဲ့ဒီနားက အားကစားပစ္စည်းရောင်းတဲ့ဆိုင်အချို့လည်း လက်နက်ကြီးထိမှန်ထားပြီး လူထိခိုက်သေဆုံးမှုရှိ မရှိကိုတော့ မသိရ‌သေးဘူးလို့ဆိုပါတယ်။

   

   ဓာတ်ပုံ ရင်းမြစ်, CJ

2. ၁၃ ဇန်နဝါရီ ၂၀၂၂က​လေးမြို့ကနေ့ ချင်းပြည်နယ်ကို မလာကြဖို့ PDF-Zoland ​စာထုတ်

   အခုရက်ပိုင်း ချင်းပြည်နယ်ထဲမှာ တိုက်ပွဲတွေပြင်းထန်နေလို့ စစ်ကိုင်းတိုင်း ကလေးမြို့ကနေ ချင်းပြည်နယ်ကို ခရီးမသွားလာကြဖို့ မေတ္တာရပ်ခံကြောင်း ချင်းကာကွယ်ရေးတပ် PDF- Zoland က ဇန်နဝါရီလ ၁၂ ရက်နေ့က အသိပေးထုတ်ပြန်ထားတယ်လို့ စစ်ကိုင်းတိုင်းကလေးမြို့က လုပ်ငန်းရှင်တစ်ဦးက ဘီဘီစီကို ပြောပါတယ်။

   စစ်ကောင်စီတပ်တွေဟာ ခရီးသွားပြည်သူတွေကို လူသားဒိုင်းလို အသုံးပြုပြီး ချင်းတောင်ပေါ် ကို တက်လာမှာကို စိုးရိမ်တဲ့အတွက်ကြောင့်ဖြစ်တယ်လို့လည်း PDF-Zolandက ထုတ်ပြန်ထားတယ်လို့ဆိုပါတယ်။

   ပြီးခဲ့တဲ့ ဇန်နဝါရီ ၁၂ရက် ကတည်းက ကလေးမြိုကနေ ချင်းတောင်ကို တက်တဲ့ ၉ မိုင်ကားဂိတ်မှာ ခရီးသွားကားတွေနဲ့ ဆိုင်ကယ်တွေကို စစ်ကောင်စီစစ်ဆေးရေးဂိတ်က သွားလာခွင့်မပြုဘဲ ပိတ်ထားတယ်လို့လည်း သိရပါတယ်။

   ဇန်နဝါရီ ၁၂ ရက်မနက်ပိုင်းက စတင်ပြီးတော့ စစ်ကောင်စစ်စီတပ်တွေက ကလေးမြို့ကနေ ချင်းပြည်နယ်ကို စစ်ကားငါးစီးနဲ့ တက်လာဖို့ အဆင်သင့်ဖြစ်နေတယ်လို့ PDF- Zoland က ထုတ်ပြန်ထားပါတယ်။

   ဇန်နဝါရီလ ၁၂ ရက်နေ့ အစောပိုင်းကတည်းက စစ်ကောင်စီတပ်သားအချို့ ချင်းတောင်ပေါ်ကို ခြေလျင်တက်သွားကြတယ်လို့လည်း ဒေသသတင်းတွေက ပြောပါတယ်။

   ဇန်နဝါရီ ၆ ရက်ကတည်းက ကလေးမြို့နဲ့ ချင်းပြည်နယ် အစပ်မှာ တိုက်ပွဲပြင်းထန်ခဲ့ပြီးတော့ ကလေးမြို့ ဖလမ်းသွားရာလမ်းမှာ စစ်ကောင်စီတပ်တွေကို ဒေသခံကာကွယ်ရေးတပ်များက ဆီးကြို တိုက်ခိုက်မှုတွေရှိနေခဲ့ပါတယ်။

   

   ဓာတ်ပုံ ရင်းမြစ်, CJ

3. ၁၃ ဇန်နဝါရီ ၂၀၂၂ပုလဲ PDF ခေါင်းဆောင် ဗိုလ်နဂါး အမည်ကို မေးမြန်းပြီး ၂ ရက်တာ ရိုက်နှက်စစ်ကြောခံခဲ့ရတဲ့ ဦးနှောက်ရွာတစ်ရွာလုံး ထွက်ပြေးနေရ

   စစ်ကိုင်းတိုင်းဒေသကြီး၊ ပုလဲ မြို့နယ်အတွင်းက ဦးနှောက်ကျေးရွာကို ပြီးခဲ့တဲ့ ဇန်နဝါရီ ၁၀ ရက်နေ့ကနေစပြီး စစ်ကောင်စီတပ်တွေဝင်ရောက်ခဲ့ပြီး လေကြောင်းပစ်ခတ်မှုတွေလုပ်ခဲ့သလို ပုလဲ PDF ခေါင်းဆောင်အကြောင်းမေးမြန်းပြီး ရွာသားတွေကို ၂ရက်တာ ရိုက်နှက်စစ်ကြောရေးလုပ်ခဲ့တယ် လို့ဒေသခံတွေကပြောပါတယ်။

   မနေ့ဇန်နဝါရီ ၁၂ ရက်နေ့မှာတော့ စစ်ကောင်စီတပ်တွေ ရွာအတွင်းက ပြန်ထွက်ခွာသွားပေမယ့် ဒေသခံတွေဟာ ရွာအတွင်းဆက်လက်မနေတော့ဘဲ ရွာလုံးကျွတ် ထွက်ပြေးခဲ့ကြတယ်လို့ဒေသခံတွေက ပြောပါတယ်။

   “လေယာဉ်တွေဝိုင်းပြီး လေယာဉ်တွေပေါ်ကနေပစ်ချပြီးလက်နက်ကြီးတွေနဲ့ပစ်တာ၊ ရက်ရက်စက်စက် သေနတ်တွေနဲ့ လည်ပင်းတွေထောက် ကျွန်မတို့ လက်ထဲပါတဲ့ရွှေနဲ့ငွေပစ္စည်းအကုန်ယူတာ၊ ယောင်္ကျားတွေကိုလည်း လက်ပြန်ကြိုးတွေတုပ်ပြီးရိုက်တယ်။ နဂါးဘယ်မှာလဲ မေးတယ်၊ အစည်းအဝေးလုပ်သွားတယ် ဆိုပြီးမေးတာ။ လူငယ်လူရွယ်တွေကို (ခနာကိုယ်အစိတ်အပိုင်းကိုဆိုလို) ကတ်ကြေးတွေနဲ့ ဖြတ်၊ ရိုက်နှက်ပြီးတော့ စစ်တယ်။

   ကျွန်မတို့ကတော့ ဘဝတစ်သက်မဖြေနိုင်တဲ့ အဖြစ်ဆိုးတဲ့ကြုံလို့ စိတ်တွေနာတယ်။ သူတို့ကို “ လို့ ဦးနှောက်ကျေးရွာဒေသခံတစ်ဦးက ဘီဘီစီကိုပြောပါတယ်။ အခုလို ရွာသားတွေကို ညှဉ်းပန်းနှိပ်စက်တဲ့ဖြစ်စဉ်တွေနဲ့ပတ်သက်လို့ဘီဘီစီက စစ်ကောင်စီဘက်ကိုဆက်သွယ်မေးမြန်းဖို့ကြိုးစားနေပါတယ်။

   လက်ရှိမှာတော့ စစ်ကောင်စီက အလိုရှိနေတဲ့ ဗိုလ်နဂါးဆိုသူကို ဖမ်းဆီးရမိတယ်လို့သတင်းတွေ မကြားရသေးဘဲ ပုလဲနယ်ထဲက ဦးနှောက်ကျေးရွာဒေသခံတွေဟာလည်း ရွာလုံးကျွတ်နီးပါး ထွက်ပြေးတိမ်းရှောင်နေကြပါတယ်လို့ဒေသခံတွေကပြောပါတယ်။

   

   ဓာတ်ပုံ ရင်းမြစ်, Pale Entertainment

4. ၁၃ ဇန်နဝါရီ ၂၀၂၂မြိုင်မြို့နယ်၊ လက်ယက်မရွာမှာ စစ်ကောင်စီတပ်စွဲထားပြီး ဒေသခံတချို့ပိတ်မိနေ, ပြင်ပနဲ့ အဆက်အသွယ် ဖြတ်တောက်ခံထားရလို့ ရွာအတွင်းပိတ်မိနေသူတွေနဲ့ အဆက်အသွယ်ပြတ်တောက်နေတယ်လို့ဆို

   မကွေးတိုင်းဒေသကြီး၊ မြိုင်မြို့နယ် မြောက်ဘက်ပိုင်းမှာရှိတဲ့ လက်ယက်မကျေးရွာကို ဇန်နဝါရီ ၁၁ ရက်နေ့က စစ်ကောင်စီတပ်တွေဝင်ရောက်လာပြီးနောက်ပိုင်း ရွာသားတချို့ကို လူသားဒိုင်းအဖြစ် အသုံးချတာတွေရှိသလို ရွာဘုန်းကြီးကျောင်းမှာ တိမ်းရှောင်နေတဲ့ဒေသခံတွေလည်း ပိတ်မိနေတယ်လို့ဒေသခံတွေကပြောပါတယ်။

   စစ်ကောင်စီတပ်တွေဝင်ရောက်လာပြီးတဲ့နောက်မှာတော့ လက်ယက်မကျေးရွာက ဒေသခံအများစု ဟာဘေးလွတ်ရာထွက်ပြေးတိမ်းရှောင်ခဲ့ကြပြီး ဒေသခံတချို့ကတော့ ရွာထဲက ဘုန်းတော်ကြီးကျောင်းတွေ မှာ တိမ်းရှောင်နေခဲ့ကြတာဖြစ်ပြီး လက်ရှိရွာထဲကျန်နေခဲ့တဲ့ သူတွေနဲ့အဆက်အသွယ်ပြတ်တောက်နေတယ်လို့ ထွက်ပြေးလွတ်မြောက်လာတဲ့ လက်ယက်မရွာဒေသခံတွေက ပြောပါတယ်။

   “ ဖမ်းထားတဲ့လူလတ်ပိုင်းရွာသားတွေကိုတော့ စစ်ဝတ်စုံတွေဝတ်ပေးတယ်။ သူတို့ကင်းပုန်းဝပ်တဲ့နေရာတွေမှာခေါ်ထားတယ်။ ရွာသားအကုန်လုံးကတော့ တိမ်းရှောင်နေတယ်၊ ဘုန်းကြီးကျောင်းမှာ သွားရှောင်တဲ့ ဒေသခံတွေပဲ ပိတ်မိနေတာ။ အိမ်တွေဖောက်ခိုင်းတယ်လည်းကြားရတယ်။ ရွာထဲကကျန်တဲ့လူတွေဘာတွေဆက်လုပ်နေလဲ၊ ဘယ်လိုတွေ ပိတ်မိနေလဲ မသိရတော့ဘူး။ အားလုံးဖုန်းတွေသိမ်းထားတယ်။ အဆက်အသွယ်တွေပြတ်နေတယ်” လို့ ထွက်ပြေးလွတ်မြောက်လာတဲ့ လက်ယက်မရွာသားတစ်ဦးက ဘီဘီစီကိုပြောပါတယ်။

   လက်ရှိမှာတော့ လက်ယက်မကျေးရွာအတွင်းက ဘုန်းတော်ကြီးကျောင်းတွေမှာ ဒေသခံ ရာချီပိတ်မိနေဆဲဖြစ်ပြီး မနေ့ဇန်နဝါရီ ၁၂ ရက်နေ့မနက်ပိုင်းကစလို့ ရွာအတွင်းအခြေအနေတွေနဲ့ပတ်သက်ပြီး အဆက်အသွယ်မရဘူးလို့ ကျေးရွာပြင်ပရောက်နေတဲ့လက်ယက်မရွာသားတွေက ပြောပါတယ်။

   လက်ယက်မကျေးရွာအတွင်းမှာတော့ စစ်ကောင်စီတပ်တွေနဲ့ ပျုစောထီးအင်အား ၁၀၀ လောက်ရှိနေပြီး ဒီကနေ့ဇန်နဝါရီ ၁၃ မနက်ပိုင်းမှာလည်း အနီးနားက ရွာတွေမှာ ပစ်ခတ်သံတွေကြားနေရတယ်လို့ဒေသခံတွေကပြောပါတယ်။ ဒါ့အပြင် ရွာသားတွေကို လူသားဒိုင်းအဖြစ် စစ်ဝတ်စုံဝတ်ခိုင်းထားတဲ့အခြေအနေတွေနဲ့ ရွာသားတွေပိတ်မိနေတဲ့အခြေအနေတွေကြောင့် ဒေသကာကွယ်ရေးတပ်တွေဘက်ကလည်း ထိတွေ့တိုက်ပွဲတွေဖြစ်ဖို့ချင့်ချိန်နေရတဲ့အနေအထားဖြစ်တယ်လို့မြိုင်ဒေသကာကွယ်ရေးတပ်ဘက် ကပြောပါတယ်။

   လက်ယက်မကျေးရွာအတွင်းမှာပိတ်မိနေတယ်ဆိုတဲ့ ဒေသခံတွေနဲ ပတ်သက်လို့ ဘီဘီစီကဘက်ကလည်း ဆက်သွယ်လို့မရတာကြောင့် ရွာအတွင်းအခြေအနေတွေကို သီးခြားအတည်ပြုနိုင်ဖို့ ကြိုးစားနေသလို စစ်ကောင်စီဘက်ကိုလည်းဆက်သွယ်မေးမြန်းဖို့ကြိုးစားနေပါတယ်။

   

   ဓာတ်ပုံ ရင်းမြစ်, Social Media

5. ၁၃ ဇန်နဝါရီ ၂၀၂၂ပြည်တွင်းမှာ စက်သုံးဆီနဲ့ လူသုံးကုန်တွေစျေးတက်လာ

   မြန်မာနိုင်ငံက ရန်ကုန် မန္တလေး အပါအဝင်နယ်မြို့တွေမှာ စက်သုံးဆီအပါအဝင် နိုင်ငံတကာက တင်သွင်းရတဲ့ ကုန်ပစ္စည်းတွေ စျေးတွေတက်လာနေကြောင်း ရန်ကုန်နဲ့ မန္တလေးက ဒေသခံတွေက ပြောပါတယ်။

   ဇန်နဝါရီလ ၁၃ ရက်နေ့က စက်သုံးဆီ ၉၂ တစ်လီတာကို ၁၄၉၀ ကျပ်နဲ့ ၉၅ တစ်လီတာကို ကျပ် ၁၅၄၀ ရန်ကုန်မှာ စျေးပေါက်ပြီး မန္တလေးမှာတော့ ၉၂ တစ်လီတာကို ကျပ် ၁၅၀၀ ကျော်သွားပြီးလို့လည်း ဒေသခံတွေက ပြောပါတယ်။

   နယ်စပ်ကတင်သွင်းတဲ့ ဟင်းရွက်ဆီတွေလည်း တစ်ဘူးကို ငါးလီတာဝင် ၁၅၅၀၀ ကနေ ၁၇၀၀၀ ကျပ်အထိတက်သွားပြီး ဘိလပ်မြေ ကတော့ တစ်အိတ်ကို တစ်သောင်းအထိ တက်သွားတဲ့ အကြောင်း

   ရန်ကုန်မြို့ခံလုပ်ငန်းရှင်တစ်ဦးကပြောပါတယ်။

   ကုန်စျေးနူန်းတွေတက်လာရတဲ့ အကြောင်းကတော့ အမေရိကန် ဒေါ်လာစျေးတွေတက်လာလို့ ဖြစ်တယ်လို့လည်း ကုန်စုံဆိုင်လုပ်ငန်းရှင်တစ်ဦးက သူ့အမြင်ကို ပြောပါတယ်။

   ဗဟိုဘဏ်က ပြီးခဲ့တဲ့ ဇန်နဝါရီလ ၁၂ ရက်နေ့က အမေရိကန်ဒေါ်လာ ၁၅ သန်း တစ်ဒေါ်လာကို ၁၇၇၈ ကျပ်နဲ့ ထုတ်ရောင်းခဲ့ပါသေးတယ်။

   ရန်ကုန်မှာ အမေရိကန်ဒေါ်လာ အပြင်ပေါက်စျေးကတော့ ဇန်နဝါရီလ ၁၃ ရက်နေ့မှာ အမေရိကန်တစ်ဒေါ်လာကို ကျပ် ၁၉၆၀ ဝန်းကျင်နဲ့ ဝယ်ရောင်းလုပ်နေကြတယ်လို့ သိရပါတယ်။

   

   ဓာတ်ပုံ ရင်းမြစ်, CJ

6. ၁၃ ဇန်နဝါရီ ၂၀၂၂ယင်းမာပင်က ရင်ပေါင်တိုင်၊ ပုထိုးသာနဲ့ရသေ့ရွာတို့ကို စစ်ကောင်စီက ရဟတ်ယာဉ်နဲ့ ပစ်ခတ်, ဒေသခံထောင်ချီ ဘေးလွတ်ရာ တိမ်းရှောင်နေရ

   

   ဓာတ်ပုံ ရင်းမြစ်, CJ

   စစ်ကိုင်းတိုင်း၊ ယင်းမာပင်မြို့နယ်ထဲက ရင်ပေါင်တိုင်ရွာကြီးအပြင် ပုထိုးသာနဲ့ ရသေ့ရွာတို့ကို စစ်ကောင်စီဘက်က ဒီနေ့ ဇန်နဝါရီလ ၁၃ ရက် နေ့လည်မှာ ရဟတ်ယာဉ်နဲ့ လာရောက်ပစ်ခတ်သွားတယ်လို့ ဒေသခံတွေက ပြောပါတယ်။

   အဲဒီပစ်ခတ်မှုကြောင့် ထောင်နဲ့ချီတဲ့ဒေသခံတွေဟာ ဘေးလွတ်ရာ ထွက်ပြေးတိမ်းရှောင်နေကြရပြီလို့လည်း ဆိုပါတယ်။

   ''နေ့လည် ၁ နာရီလောက်မှာ ပစ်ခတ်သွားတာ။ အချက်ရေ ရာချီရှိပါတယ်။ အခုတော့ အားလုံး ရှိတာလေးတွေ သယ်ပြီး ထွက်ပြေးနေကြရပြီ။ အသက်လုပြေးနေတုန်းဆိုတော့ အထိအခိုက်အသေအပျောက်ကို မသိနိုင်သေးဘူး'' လို့ ဒေသခံတစ်ဦးက ဘီဘီစီကိုပြောပါတယ်။

   စစ်ကောင်စီက ဒီကျေးရွာတွေကို ရဟတ်ယာဉ်နဲ့ ဘာ့ကြောင့် လာပစ်တယ်ဆိုတာ မသိရသေးပေမဲ့ မြေပြင်စစ်ကြောင်းထွက်ချင်တဲ့အခါ လေကြောင်းကူပစ်တာမျိုးကို မြင်လာရတယ်လို့ ဒေသခံတွေက ယူဆပြောဆိုကြပါတယ်။

   ပြီးခဲ့တဲ့ မေလတုန်းကလည်း ယင်းမာပင်နယ်မှာ စစ်ကားတွေ ဖြတ်သန်းသွားလာချိန် မိုင်းဖောက်ခွဲခံရအပြီး စစ်တပ်က ရင်ပေါင်တိုင်ရွာထဲက မန်ကျည်းရုံ ဘုန်းကြီးကျောင်းမှာ တပ်စွဲခဲ့လို့ ဒေသခံတွေ ထွက်ပြေးတိမ်းရှောင်ရခဲ့ရပါတယ်။

7. ၁၃ ဇန်နဝါရီ ၂၀၂၂မြန်မာ့အရေးအတွက် ကုလအထူးကိုယ်စားလှယ်သစ်နဲ့ ကမ္ဘောဒီးယားဝန်ကြီးချုပ်တို့ ဆွေးနွေး

   

   ဓာတ်ပုံ ရင်းမြစ်, ကမ္ဘောဒီးယားဝန်ကြီးချုပ်ရုံး

   မြန်မာ့အရေးအတွက် အာဆီယံအလှည့်ကျဥက္ကဋ္ဌဖြစ်တဲ့ကမ္ဘောဒီးယားနိုင်ငံရဲ့ဝန်ကြီးချုပ်ဟွန်ဆန်နဲ့ ကုလသမဂ္ဂအထွေထွေအတွင်းရေးမှူးချုပ်ရဲ့မြန်မာနိုင်ငံဆိုင်ရာအထူးကိုယ်စားလှယ်သစ် ဒေါက်တာ နိုလင်းဟေဇာတို့ ဒီနေ့ ဇန်နဝါရီလ ၁၃ ရက်မှာ တွေ့ဆုံဆွေးနွေးထားတယ်ဆိုပြီး ကမ္ဘောဒီးယားဘက်က သတင်းထုတ်ပြန်လာပါတယ်။

   အထူးကိုယ်စားလှယ်နဲ့ ဝန်ကြီးချုပ် ဟွန်ဆန်တို့ဟာ ဗီဒီယိုကနေ တွေ့ဆုံခဲ့ကြတာဖြစ်ပါတယ်။

   အထူးကိုယ်စားလှယ်ကတော့ မြန်မာ့အရေးဖြေရှင်းမှုမှာ အာဆီယံအလှည့်ကျဥက္ကဋ္ဌဖြစ်တဲ့ ကမ္ဘောဒီးယားနိုင်ငံနဲ့ ပူးပေါင်းဆောင်ရွက်ဖို့ ဆန္ဒရှိတဲ့အကြောင်းပြောထားတာတွေ့ရပါတယ်။

   ဒါ့ပြင် မြန်မာ့အရေး အာဆီယံခေါင်းဆောင်တွေကြားရရှိတဲ့ဘုံသဘောတူညီချက် ၅ ရပ် အထမြောက်ရေး ဒေသတွင်း အားထုတ်မှု ခိုင်မာအောင် ကူညီဖို့ အသင့်ရှိတဲ့အကြောင်းလည်း အထူးကိုယ်စားလှယ်က ပြောထားပါတယ်။

   ဝန်ကြီးချုပ်ကတော့ မကြာသေးခင်က သူ့ရဲ့မြန်မာပြည်တွင်းခရီးစဉ်ဟာ အာဆီယံပဋိညာဉ်၊ ဘုံသဘောတူညီချက်တို့နဲ့ မသွေဖယ်ဖို့ အရေးကြီးတဲ့အကြောင်းပြော အထူးကိုယ်စားလှယ်ကို ပြောခဲ့သလို ၂၀၂၁ ခုနှစ်အတွင်း မြန်မာ့အရေး အာဆီယံအားထုတ်မှု မချောမွေ့ခဲ့တာအတွက် လက်ရှိ အလှည့်ကျဥက္ကဋ္ဌကမ္ဘောဒီးယားအနေနဲ့ တာဝန်ယူ အားထုတ်မယ်လို့ ပြောခဲ့တယ်လို့ သိရပါတယ်။

   ဝန်ကြီးချုပ်ဟွန်ဆန်ကတော့ သူ့ရဲ့မြန်မာပြည်ခရီးစဉ် ရည်ရွယ်ချက်ဟာ အကြမ်းဖက်မှုအဆုံးသတ်ပြီး မြန်မာပြည်သူတွေအတွက် လူသားချင်းစာနာမှုအကူအညီထောက်ပံ့နိုင်ရေးအတွက် အပစ်အခတ်ရပ်စဲရေးရရှိဖို့ ဖြစ်တယ်လို့ အထူးကိုယ်စားလှယ်ကို ပြောထားပါတယ်။

8. ၁၃ ဇန်နဝါရီ ၂၀၂၂စစ်ကောင်စီတပ်ကို ပူးပေါင်းကူညီပံ့ပိုးတာမလုပ်ဖို့ ကရင်နယ်ခြားစောင့်တပ်(BGF)ကို KNLA သတိပေး

   

   ဓာတ်ပုံ ရင်းမြစ်, Getty Images

   ကရင်နယ်ခြားစောင့်တပ် BGF တပ်ဖွဲ့ဝင်တွေအနေနဲ့ ကရင်လူထုနဲ့ တိုင်းရင်းသားပြည်သူ တရပ်လုံးအကျိုးကို ရှေးရှုပြီး အာဏာသိမ်းစစ်ကောင်စီတပ်ဖွဲ့ဝင်တွေကို ကူညီပံ့ပိုးတာမလုပ်ဖို့ ကရင်အမျိုးသားလွတ်မြောက်ရေးတပ်(KNLA)က ဇန်နဝါရီလ ၁၂ ရက်မှာ စာထုတ် သတိပေးလာပါတယ်။

   လက်ရှိမှာ KNLA တပ်ဖွဲ့ဝင်တွေက စစ်ကောင်စီတပ်ကို တိုက်ခိုက်ဟန့်တားမှုတွေကြောင့် စစ်ကောင်စီတပ်ဟာ တပ်လှုပ်ရှားမှုလုပ်နိုင်ဖို့နဲ့ လက်နက်ခဲယမ်းနဲ့ ရိက္ခာတွေ တပ်စခန်းအသီးသီးကို ရောက်နိုင်ဖို့ BGF ကို လမ်းလုံခြုံရေးနဲ့ သယ်ယူပို့ဆောင်ရေးတာဝန်တွေ ယူနေစေတာကို KNLA ဘက်က ထောက်ပြပါတယ်။

   ဒါ့ပြင် BGF ဘက်က ဇန်နဝါရီလ ၂ ရက်နေ့ညနေပိုင်းမှာ မထောကျေးနယ်မှာရှိတဲ့ ကျောင်းရွာကို လက်နက်ကြီးနဲ့ ပစ်ခတ်လို့ အဲဒီရွာက အသက် ၄၅ နှစ်အရွယ်အမျိုးသားတစ်ဦး လက်နက်ကြီးထိမှန်သေဆုံးခဲ့တာကိုလည်း KNLA ဘက်က ထောက်ပြပြောဆိုပါတယ်။

   ဒီအခြေအနေတွေကြောင့် BGF တပ်ဖွဲ့ဝင်တွေအနေနဲ့ စစ်ကောင်စီတပ်ကို မကူညီဘဲ ကိုယ့်တပ်ရင်း၊တပ်ခွဲ၊ တပ်စခန်းတွေမှာသာ သွားလာလှုပ်ရှားဖို့၊ ဇန်နဝါရီလ ၁၅ ရက်နောက်ပိုင်းမှာ စစ်ကောင်စီကို ဆက်လက်ပူးပေါင်းကူညီနေမယ်ဆိုရင် KNLA တပ်မဟာ ၅ အနေနဲ့ ကရင်လူမျိုးအချင်းချင်းဖြစ်တဲ့ ကရင် BGF တပ်တွေကို မတိုက်ခိုက်ချင်ပေမဲ့ စစ်ကောင်စီတပ်ဖွဲ့ဝင်တွေနဲ့ စာရင်းတစ်ခုတည်းထားပြီး နေရာမရွေးတိုက်ခိုက်တော့မယ်လို့ ဆိုပါတယ်။

   ကျေးရွာနေ ပြည်သူတွေအနေနဲ့ စစ်ကောင်စီတပ်ဖွဲ့တွေနဲ့ သူတို့ရဲ့လက်အောက်ခံ နယ်ခြားစောင့်တပ် BGF တပ်ဖွဲ့ ဝင်တွေ လုံး၀ ရောနှော နေထိုင်သွားလာတာမလုပ်ဖို့၊ စစ်ကောင်စီက ခန့်အပ်တဲ့ ဘယ်အုပ်ချုပ်ရေးကိုမဆို လုံး၀ တာဝန်ယူ လက်ခံတာမလုပ်ဖို့ KNLA တပ်မဟာ ၅ ဘက်က ထုတ်ပြန်ထားပါတယ်။

9. ၁၃ ဇန်နဝါရီ ၂၀၂၂ဒေါ်အောင်ဆန်းစုကြည်ကိုစွဲဆိုထားတဲ့ လျှို့ဝှက်အက်အမှုက သက်သေတွေကို စစ်ဆေး

   နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သူ့ရဲ့စီးပွားရေးအကြံပေး မစ္စတာရှောင်တာနယ်အပါအဝင် ဝန်ကြီးဟောင်း ၃ ဦးတို့ကို နိုင်ငံတော်လျှို့ဝှက်အက်ဥပဒေ ပုဒ်မ ၃-၁ (ဂ) နဲ့စွဲဆိုထားတဲ့အမှုကို ဒီနေ့ ဇန်နဝါရီ ၁၃ ရက်မှာ နေပြည်တော်ကအထူးတရားရုံးမှာ စစ်ဆေးခဲ့ပါတယ်။

   ဒီနေ့ရုံးချိန်းမှာ စစ်ကောင်စီဘက်ကတင်တဲ့ သက်သေ နှစ်ဦးကို စစ်ဆေးခဲ့ပြီး ရဲအရာရှိတစ်ဦးနဲ့ ရာအိမ်မှူးတစ်ဦးတို့ဖြစ်ကြောင်း တရားရုံးနဲ့နီးစပ်တဲ့အသိုင်းအဝိုင်းက သိရှိရပါတယ်။

   ဒါ့အပြင် မစ္စတာရှောင်တာနယ်တစ်ဦးတည်းကို စွဲဆိုထားတဲ့ လဝက (အက်) အမှုကိုလည်း ဒီနေ့ရုံးချိန်းမှာ စစ်ဆေးခဲ့ပြီး တရားလိုပြသက်တစ်ဦးကို စစ်ဆေးခဲ့တယ်လို့ သိရပါတယ်။

   

   ဓာတ်ပုံ ရင်းမြစ်, Social Media

   အမှုနှစ်ခုလုံး စစ်ဆေးချက်တွေနဲ့ပတ်သက်လို့ ရှေ့နေတွေကို အမှုအကြောင်း ဖြေဆိုခွင့်ပိတ်ပင်ထားတာကြောင့် အသေးစိတ်အခြေအနေကိုတော့ မသိရှိရပါဘူး။ တရားလိုပြသက်သေတွေကို စစ်ဆေးနေဆဲအဆင့်လို့တော့ နားလည်ရပါတယ်။

   နိုင်ငံတော်လျှို့ဝှက်အက်နဲ့ စွဲဆိုခံရသူတွေထဲက တစ်ဦးဖြစ်တဲ့ အသက် ၈၀ ကျော် အရွယ် စီမံဘဏ္ဍာဝန်ကြီးဟောင်း ဦးစိုးဝင်းကတော့ ပြီးခဲ့တဲ့ဒီဇင်ဘာလဆန်းပိုင်းတည်းက ကျန်းမာရေးမကောင်းလို့ ဆေးရုံတက်ကုသမှုခံယူနေရတာဖြစ်ပြီး ဒီနေ့ ရုံးချိန်းမတက်ရောက်နိုင်ခဲ့ပေမယ့် ရောဂါဝေဒနာ သက်သာလာပြီဖြစ်တယ်လို့ တရားရုံးနဲ့နီးစပ်တဲ့အသိုင်းအဝိုင်းက သိရပါတယ်။

   ဒေါ်အောင်ဆန်းစုကြည်ဟာ လက်ရှိမှာ ပုဒ်မ ၅၀၅ (ခ) ၊ ပုဒ်မ ၂၅ နှစ်မှု ၊ ဆက်သွယ်ရေးဥပဒေပုဒ်မ ၆၇၊ ပို့ကုန်သွင်းကုန်ပုဒ်မ ၈ တို့နဲ့ စုစုပေါင်းထောင်ဒဏ် ခြောက်နှစ် ချမှတ်ခံထားရပါတယ်။

   ဒါ့အပြင် ဒေါ်အောင်ဆန်းစုကြည်ဟာ အဂတိမှု ငါးမှုနဲ့ အခု လျှို့ဝှက်အက်အမှု စုစုပေါင်းခြောက်မှုကို တရားရင်ဆိုင်နေရပါတယ်။

   ဒါ့ပြင် ရဟတ်ယာဉ်ငှားရမ်းမှုနဲ့ပတ်သက်ပြီးတော့ စစ်ကောင်စီက ဒေါ်အောင်ဆန်းစုကြည်အပါအဝင် သမ္မတဦးဝင်းမြင့်၊ လူကယ်ပြန်ဝန်ကြီးဟောင်းဒေါက်တာဝင်းမြတ်အေးတို့ကို အဂတိမှု ၅ မှု တရားစွဲဆိုထားပြီး အဲဒီငါးမှုအတွက် ရှေ့နေပါဝါကို လာမယ့် သောကြာနေ့ (ဇန်နဝါီ ၁၄) ရက် ရုံးချိန်းမှာ တင်ဖို့ရှိတယ်လို့ သိရပါတယ်။

   ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ကို စစ်ကောင်စီက ရွေးကောက်ပွဲမသမာမှုနဲ့လည်း ထပ်မံစွဲဆိုထားပြီး ဒီအမှုတွေ တရားရုံးကို ရောက်လာမယ့်အချိန်ကိုတော့ မသိရှိရသေးပါဘူး။

10. ၁၃ ဇန်နဝါရီ ၂၀၂၂မြိတ်၊ တကူကျေးရွာက ဒေသခံရာချီ စစ်ဘေးရှောင်နေရ

    

    ဓာတ်ပုံ ရင်းမြစ်, The Tanintharyi Times

    တနင်္သာရီတိုင်း၊ မြိတ်မြို့နယ်ထဲက တကူကျေးရွာမှာ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့တွေကြား တိုက်ပွဲဖြစ်ခဲ့အပြီးမှာ ရာနဲ့ချီတဲ့ တကူဒေသခံတွေဟာ အနီးနားက ရွာတွေကို ထွက်ပြေးတိမ်းရှောင်နေရတယ်လို့ ဒေသခံတွေက ဘီဘီစီကိုပြောပါတယ်။

    ''ပစ်တာ၊ ခတ်တာတွေအပြီးမှာ ရွာသား ၅၀၀ လောက်က တနင်္သာရီမြစ်ကို ကူးပြီး မြရာချောင်းရွာဘက်၊ နောက် သံတိုက်၊ ပြည်အေးစတဲ့ရွာတွေဘက်ကို ထွက်ပြေးနေရတယ်။ တကူ အထက်တန်းမှာ တပ်စွဲနေတဲ့ စစ်ကောင်စီတပ်သားတွေက သူတို့ ထွက်စစ်ချင်တဲ့အခါ ထွက်စစ်နေတယ်။ ဆိုင်ကယ်တွေ ဖမ်းဆီးတာရှိတယ်။ ၁၀ စီးလောက်ရှိပြီ'' လို့ တကူဒေသခံက ပြောပါတယ်။

    တကူရွာအနီးမှာ စစ်ကောင်စီတပ်တွေနဲ့ ဒေသကာကွယ်ရေးတပ်တွေ ဇန်နဝါရီလ ၁၀ ရက် ညနေပိုင်းမှာ အပြန်အလှန် ပစ်ခတ်မှုဖြစ်ခဲ့ပြီးတဲ့နောက် ဒေသခံတွေလည်း ဘေးလွတ်ရာ တိမ်းရှောင်နေကြတာဖြစ်ပါတယ်။

    စစ်ကောင်စီတပ်တွေဟာ မနေ့ ဇန်နဝါရီလ ၁၂ ရက်မှာ စစ်ရှောင်တွေရှိနေတဲ့ မြရာချောင်းဘုန်းကြီးကျောင်းကိုရောက်လာပြီး တကူမှာပြန်နေဖို့ ပြောဆိုတာကြောင့် ဒေသခံတချို့ ရွာထဲ ပြန်သွားခဲ့တယ်လို့လည်း ဒေသခံတွေက ပြောပါတယ်။

11. ၁၃ ဇန်နဝါရီ ၂၀၂၂တရုတ်က စစ်ကောင်စီလက်အောက် ငြိမ်းချမ်းရေးအဖွဲ့၊ နယ်စပ်ရေးရာနဲ့လူကယ်ပြန်ဌာနတို့ကို ဒေါ်လာ သိန်းချီလှူ

    

    ဓာတ်ပုံ ရင်းမြစ်, တရုတ်သံရုံး

    တရုတ်နိုင်ငံက စစ်ကောင်စီလက်အောက်က ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ကော်မတီ(JMC-U)၊ နယ်စပ်ရေးရာဝန်ကြီးဌာနနဲ့ လူကယ်ပြန်ဝန်ကြီးဌာနတို့ကို ဒေါ်လာ ၅ သိန်းထက်မနည်းလှူဒါန်းလိုက်တဲ့အကြောင်း ရန်ကုန်မှာရှိတဲ့ တရုတ်သံရုံးက သတင်းထုတ်ပြန်လာပါတယ်။

    တနှစ်လှူဒါန်းငွေတွေကို တရုတ်သံအမတ်ကြီးက နေပြည်တော်မှာ ဇန်နဝါရီလ ၁၂ ရက်တုန်းက လွှဲပြောင်းပေးခဲ့တာလို့လည်း ဆိုပါတယ်။

    တရုတ်ဟာ မြန်မာ့ငြိမ်းချမ်းရေးနဲ့လုပ်ငန်းစဉ်နဲ့ သက်ဆိုင်တဲ့အဖွဲ့အစည်းတွေ့ကို ထောက်ပံ့ငွေပေးအပ်တာဟာ အခုတစ်ကြိမ်ဆို ၆ ကြိမ်အထိရှိလာပြီဖြစ်တယ်လို့လည်း သိရပါတယ်။

    တရုတ်ဘက်ကတော့ မြန်မာနိုင်ငံမြောက်ပိုင်းက နေရပ်စွန့်ခွါသူတွေ နေရာချပေးရာမှာ ကူညီရေးနဲ့ တရုတ်-မြန်မာ နှစ်နိုင်ငံနယ်စပ် တည်ငြိမ်အေးချမ်းမှုကို ဆက်ထိန်းသိမ်းလိုတဲ့အကြောင်းပြောထားတာတွေ့ရပါတယ်။

12. ၁၃ ဇန်နဝါရီ ၂၀၂၂ကသာမြို့၊ မိုးတားကြီးရွာကို စစ်ကောင်စီက လေယာဉ်နဲ့ဗုံးကြဲမှုအတွင်း ကလေး ၃ ဦး ဒဏ်ရာရ

    

    ဓာတ်ပုံ ရင်းမြစ်, social media

    စစ်ကိုင်းတိုင်း၊ ကသာမြို့အထက်ပိုင်းမှာရှိတဲ့ ဧရာဝတီမြစ်ဘေးက မိုးတားကြီးရွာကို စစ်ကောင်စီတပ်က မနေ့ ဇန်နဝါရီလ ၁၂ ရက်မှာ လေယာဉ်နဲ့ ဗုံးကြဲခဲ့တာကြောင့် ကလေးငယ် ၃ ဦးအပါအဝင်လူ ၅ ဦး ထိခိုက်ဒဏ်ရာ ရခဲ့တယ်လို့ သိရပါတယ်။

    စစ်ကောင်စီက မနေ့နေ့လည် ၁ နာရီဝန်းကျင်မှာ မိုးတားကြီးရွာနဲ့ အနီးဝင်းကျင်တစ်လျှောက်ကို ဗုံးကြဲခဲ့တာလို့ ဒေသခံတွေက ပြောပါတယ်။

    စစ်ကောင်စီတပ်ဟာ မိုးတားကြီးကျေးရွာအုပ်စုထဲက နေရာ ၃ နေရာကို ဗုံးကြဲခဲ့တာဖြစ်ပြီး နေအိမ်နဲ့အဆောက်အအုံ ၇ ခု မီးလောင်ပျက်စီးခဲ့တယ်လို့ သိရပါတယ်။

    စစ်ကောင်စီဟာ ပြီးခဲ့တဲ့မေလတုန်းကလည်း ကသာမြို့နယ်ထဲမှာ ပြည်သူ့ကာကွယ်ရေးတပ်ဖွဲ့(PDF)လှုပ်ရှားနေတဲ့ ကသာ-ဗန်းမော် အဝေးပြေးလမ်းမကြီးအနီးနားက မိုးတာကြီးကျေးရွာအုပ်စုကို တိုက်လေယာဉ်နဲ့ ဗုံးကြဲတိုက်ခိုက်မှုလုပ်ခဲ့ဖူးတယ်လို့ ဒေသခံတွေက ပြောပါတယ်။

13. ၁၃ ဇန်နဝါရီ ၂၀၂၂ဖာပွန်ခရိုင်ထဲ စစ်ကောင်စီလေကြောင်းတိုက်ခိုက်မှုကြောင့် အရပ်သား ၁ ဦးသေဆုံး

    

    ဓာတ်ပုံ ရင်းမြစ်, KNU

    ကရင်ပြည်နယ်မှာ စစ်ကောင်စီက အေကဲန်ယူ(ကရင်အမျိုးသားအစည်းအရုံး)ရဲ့ ဖာပွန်(မူတြော်)ခရိုင်အတွင်းကို ဒီနေ့ ဇန်နဝါရီလ ၁၃ ရက် မနက်အစောပိုင်းမှာ လေကြောင်းတိုက်ခိုက်မှုပြုလုပ်ခဲ့တာကြောင့် အရပ်သားတစ်ဦးသေဆုံးတယ်လို့ ကေအဲန်ယူဘက်က သတင်းထုတ်ပြန်လာပါတယ်။

    ဒီနေ့မနက် ၁ နာရီမှာ စစ်ကောင်စီက ဒွယ်လိုးမြို့နယ်၊ ဝေါ်မူကျေးရွာအုပ်စုထဲက ရွှေညောင်ပင်ကျေးရွာထဲကို လေယာဉ် ၂ စင်းနဲ့ လာရောက် ဗုံးကြဲခဲ့တာလို့လည်း ဆိုပါတယ်။

    ဗုံး ၄ လုံးကြဲချခဲ့တာကြောင့် အအောက်အအုံ ၅ လုံးထိမှန်ပျက်စီးခဲ့ပြီး နောက်ထပ် အရပ်သား ၃ ဦးလည်း ဒဏ်ရာရခဲ့တယ်လို့ ထုတ်ပြန်ချက်မှာ ဖော်ပြပါတယ်။

    မနေ့ ဇန်နဝါရီလ ၁၂ ရက်မနက်အစောပိုင်းတုန်းကလည်း စစ်ကောင်စီက မူတြော်ခရိုင်ထဲက လယ်ထူးဖိုးရွာအနီးနားကို လေယာဉ်နဲ့ ဗုံးကြဲခဲ့တာကြောင့် လူထူဖိုးဆေးပေးခန်းနဲ့ ဝါးခါဒဲ ဆေးပေးခန်းတွေ ထိမှန် ပျက်စီးခဲ့တယ်လို့ ကေအဲန်ယူဘက်က အစောပိုင်းမှာ သတင်းထုတ်ပြန်ထားပါတယ်။

    ဖာပွန်ခရိုင်ထဲ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်(KNLA)တပ်ဖွဲ့ဝင်တွေ အစောပိုင်းရက်မှာ မြေပြင်ထိတွေ့တိုက်ပွဲ ဖြစ်ခဲ့အပြီးမှာ စစ်ကောင်စီဘက်က လေကြောင်းတိုက်ခိုက်မှုတွေ ပြုလုပ်လာတာဖြစ်ပါတယ်။

14. ၁၃ ဇန်နဝါရီ ၂၀၂၂မြန်မာမှာ အိုမီခရွန်ဗိုင်းရပ်စ်မျိုးကွဲ ကူးစက်ခံရသူ ၃ ဦးထပ်တွေ့

    

    ဓာတ်ပုံ ရင်းမြစ်, Getty Images

    မြန်မာပြည်တွင်းမှာ ကိုဗစ်-၁၉ ရောဂါ(ကိုရိုနာဗိုင်းရပ်စ်)မျိုးဗီဇကွဲ အိုမီခရွန် ကူးစက်ခံရသူ ၃ ဦး ထပ်တွေ့ထားတယ်ဆိုပြီး စစ်ကောင်စီလက်အောက်က ကျန်းမာရေးဝန်ကြီးဌာနက ဇန်နဝါရီလ ၁၁ ရက်နေ့စွဲနဲ့ သတင်းထုတ်ပြန်လာပါတယ်။

    ပိုးတွေ့သူ ၃ ဦးဟာ မြန်မာနိုင်ငံသားတွေဖြစ်ပြီး ကယ်ဆယ်ရေးလေယာဉ်ခရီးစဉ်တွေနဲ့ အိန္ဒိယနိုင်ငံကနေတဆင့် ဝင်ရောက်လာသူတွေဖြစ်တယ်လို့ ဆိုပါတယ်။

    လက်ရှိမှာတော့ သူတို့ကို သတ်မှတ်ဆေးရုံတွေမှာ သီးသန့်ထားကုသပေးနေပြီး သူတို့နဲ့အတူ လေကြောင်းခရီးစဉ်မှာ အတူလိုက်လာသူတွေကိုလည်း အသွားအလာကန့်သတ်တာနဲ့ ဓာတ်ခွဲစမ်းသပ်စစ်ဆေးမှုတွေ ပြုလုပ်နေတယ်လို့လည်း ဆိုပါတယ်။

    အခုဆို မြန်မာပြည်တွင်းမှာ ပြည်ပကနေ ဝင်ရောက်လာတဲ့ နိုင်ငံသားနဲ့ နိုင်ငံခြားသားတွေမှာ အိုမီခရွန်ပိုးတွေ့မှု ၂၀ နီးပါးအထိရှိလာပြီဖြစ်ပြီး ဒီဇင်ဘာလ နှောင်းပိုင်းကစလို့ အိုမီခရွန်ကူးစက်ခံရသူတွေ့ရှိလာတာဖြစ်ပါတယ်။

15. ၁၂ ဇန်နဝါရီ ၂၀၂၂စစ်ကောင်စီ ဗဟိုဘဏ်က အမေရိကန်ဒေါ်လာ ၁၅ သန်း ထုတ်ရောင်း

    စစ်ကောင်စီရဲ့ ဗဟိုဘဏ်က နိုင်ငံခြားငွေစျေးပြိုင်လေလံနဲ့ အမေရိကန်ဒေါ်လာ ၁၅ သန်းကို ဒီကနေ့ ဇန်နဝါရီ ၁၂ ရက်မှာ ထပ်မံရောင်းချခဲ့ပါတယ်။

    လေလံအတွက် ပျှမ်းမျှငွေလဲလှယ်နှုန်းမှာ အမေရိကန် တစ်ဒေါ်လာကို ၁၇၇၈ ကျပ်ဖြစ်တယ်လို့လည်း သိရပါတယ်။

    ပြီးခဲ့တဲ့ ဒီဇင်ဘာလ ၂၉ ရက်နေ့ကလည်း စစ်ကောင်စီရဲ့ ဗဟိုဘဏ်က ဒေါ်လာ ၁၅ သန်း ထုတ်ရောင်းခဲ့ပြီးအဲ့ဒီအချိန်ကလည်း အမေရိကန် တစ်ဒေါ်လာကို ၁၇၇၈ ကျပ်ဖြစ်ပါတယ်။

    စစ်ကောင်စီက အခုလို ဒေါ်လာရောင်းချပေးပေမယ့် အပြင်စျေးကွက်ပေါက်စျေးက တစ်ဒေါ်လာကို ၁၉၉၅ ကျပ်နဲ့ ရောင်းရင် ပေါက်စျေးရှိပြီး၊ ဝယ်ရင် တစ်ဒေါ်လာကို၂၀၁၅ ကျပ်အထိပေးဝယ်နေရတယ်လို့ ရန်ကုန်စျေးကွက် သတင်းတွေအရ သိရပါတယ်။

    

16. ၁၂ ဇန်နဝါရီ ၂၀၂၂မြန်မာ့စီးပွားရေးသုံးသပ်ချက် အပိုင်း ၄ နိဂုံး

17. ၁၂ ဇန်နဝါရီ ၂၀၂၂တိမ်ညိုစစ်ဘေးရှောင်စခန်းမှာ အနွေးထည်တွေလိုအပ်နေပြီး သောက်သုံးရေပြတ်လတ်တော့မယ်လို့ တာဝန်ရှိသူတွေပြော

    ရခိုင်ပြည်နယ် မြောက်ဦးမြို့နယ် တိမ်ညိုကျေးရွာက စစ်ဘေးရှောင်ဒုက္ခသည်စခန်းမှာ ဆောင်းတွင်းကာလ အနွေးထည်တွေလိုအပ်ချက်ရှိနေတယ်လို့ စခန်းကော်မတီ ဦးစိုးနိုင်က ပြောပါတယ်။

    စစ်ဘေးဒုက္ခသည်တွေဟာ အလှူရှင်တွေကိုပဲ အားကိုမှီခိုနေကြရပြီး မိမိတို့ရဲ့လိုအပ်ချက်တွေကို ဝယ်ယူသုံးစွဲဖို့ ငွေကြေးအခက်အခဲရှိနေကြတာကြောင့် ဆောင်းတွင်းကာလ အအေးပိုလာချိန်မှာ ဝတ်စားဖို့အနွေးထည်တွေ မလုံလောက်နိုင်ဖြစ်နေတယ်လို့ ပြောပါတယ်။

    အပြည်ပြည်ဆိုင်ရာ ကြက်ခြေနီကော်မတီ ICRC ကနေ အိမ်ထောင်စုတစ်ခုကို စောင်တစ်ထည်စီထောက်ပံ့ပေးထားပေမယ့် တခြားလိုအပ်ချက်တွေတော့ ရှိနေတယ်လို့ သိရပါတယ်။

    တိမ်ညိုစစ်ဘေးရှောင်စခန်းဟာ လူဦးရေ သုံးထောင်နီးပါးခိုလှုံနေကြတဲ့ စခန်းတစ်ခုဖြစ်ပြီး မြောက်ဦးမြို့နယ်အတွင်း အကြီးဆုံးစခန်းတွေထဲက တစ်ခုလည်းဖြစ်ပါတယ်။

    အဲ့ဒီစခန်းမှာနေထိုင်သူတွေဟာ စခန်းအတွင်းမှာရှိတဲ့ ရေကန်ကရေကိုမှီခိုသောက်သုံးနေကြရပြီး လက်ရှိမှာ ရေကန်အတွင်း ရေနည်းပါးလာနေပြီဖြစ်ကာ ဖေဖော်ဝါရီလအတွင်းမှာ ရေခမ်းခြောက်သွားနိုင်တယ်လို့ ဦးစိုးနိုင်က ပြောပါတယ်။

    တိမ်ညိုကျေးရွာအတွင်းမှာ ကျေးရွာသားတွေအသုံးပြုတဲ့ ရေကန်ရှိနေပေမယ့် စခန်းမှာနေထိုင်သူများလွန်းတဲ့အတွက် ကျေးရွာအတွင်းက ကန်ရေကိုအသုံးပြုလို့ရှိရင် ကျေးရွာသားတွေရော ဒုက္ခသည်တွေပါ အခက်ခဲဖြစ်သွားနိုင်တယ်လို့ ဆိုပါတယ်။

    ဒါ့ကြောင့် ဒုက္ခသည်စန်းကအသုံးပြုနေတဲ့ ရေကန်မှာ ရေမခမ်းခြောက်ခင် ချောင်းရေကိုဖြည့်ပြီး အသုံးပြုနိုင်ဖို့အတွက် လိုအပ်တဲ့ပိုက်တွေနဲ့ ဒီဇယ်ဆီဖိုးတွေရရှိဖို့ ကော်မတီက ဆောင်ရွက်နေတယ်လို့သိရပါတယ်။

    မြောက်ဦးမြို့နယ်အတွင်းမှာရှိတဲ့ ချောင်းတွေဟာ ပင်လယ်ဒီရေအတက်အကျရှိတဲ့ ဆောင်းတွေဖြစ်တာကြောင့် ဆားငန်ရေတွေစီးဆင်းလျက်ရှိနေပြီး အခုလအတွင်းမှာ အဲဒီချောင်းတွေကရေကို စုပ်ယူသိုလှောင်ထားနိုင်မှ သောက်သုံးလို့ရနိုင်မှာဖြစ်ပြီး နောက်လတွေမှာဆိုရင် ဆားပါဝင်မှုမြင့်တက်လာတော့မှာဖြစ်တယ်လို့ ဦးစိုးနိုင်က ပြောပါတယ်။

    

    ဓာတ်ပုံ ရင်းမြစ်, CJ

18. ၁၂ ဇန်နဝါရီ ၂၀၂၂ထွက်ပြေးကြရတဲ့ လူသိန်းဂဏန်းဟာ စားစရာ၊ နေစရာ ဘာမှ မပြည့်စုံပဲ ဖြစ်သလို နေနေကြရတယ်လို့ အိုချာပြော

    

    ဓာတ်ပုံ ရင်းမြစ်, Getty Images

    ကုလသမဂ္ဂရဲ့ စာနာမှုဆိုင်ရာ အကူအညီပေးရေး အဖွဲ့ အိုချာရဲ့ ထုတ်ပြန်ချက် အရ အခု ဇန်နဝါရီနှစ်ဆန်း ပထမပတ်ထိ ရရှိထားတဲ့ စာရင်းတွေ အရ မြန်မာနိုင်ငံထဲ လက်နက်ကိုင် ပဋိပက္ခတွေကြောင့် ကရင်နဲ့ကယားက ဒေသတွေမှာ အိုးအိမ်တွေ စွန့်ခွာ ထွက်ပြေးရသူတွေ လက်ရှိ စုစုပေါင်း နှစ်သိန်းနီးပါး ထိ ရှိနေတယ်လို့ ဆိုပါတယ်။

    အိုချာရဲ့ ဇန်နဝါရီ ၁၀ ရက်အထိ အစီရင်ခံစာထဲမှာ ရေးထားတာ ဖြစ်တာကြောင့် ဒီနောက်ပိုင်း ရက်တွေမှာလည်း အဲဒီ ဒေသတွေမှာ စစ်ကောင်စီရဲ့ လေကြောင်းတိုက်ခိုက်မှု အပါအဝင် ထိုးစစ်တွေကြောင့် လူတွေ ထောင်သောင်းချီ ထွက်ပြေးရတာတွေ ဆက်ပြီး ပေါ်ပေါက်နေပါတယ်။

    အထူးသဖြင့် လွိုင်ကော်ကနေ ဆိုရင် မြို့လုံးကျွတ်နီးပါး ရှမ်းပြည်တောင်ပိုင်း မြို့ရွာတွေထဲထိ အခုရက်ပိုင်း အတွင်းမှာကို လူတွေ သောင်းနဲ့ချီ ဝင်ပြေးနေကြတဲ့ အတွက် ကားတန်းရှည်ကြီးတွေကို လွိုင်ကော်-ဆီဆိုင်-တောင်ကြီး နဲ့ လွိုင်ကော်-ဖယ်ခုံ-ပင်လောင်း တလျောက် ကားလမ်တွေပေါ် ပြည့်သိပ်နေအောင် တွေ့မြင် နေခဲ့ရပါတယ်။

    တခါ၊ ထိုင်းအစိုးရရဲ့ တရားဝင် ထုတ်ပြန်ချက်တွေ အရ ထိုင်းနယ်စပ် အနီး တိုက်ပွဲတွေကြောင့် မြစ်ကိုကူး ဝင်လာကြသူတွေ အနည်းဆုံး ငါးထောင်နီးပါးကို လက်ခံထားရတယ်လို့ ဆိုပါတယ်။

    စစ်ကိုင်း အထက်ပိုင်းနဲ့ ချင်းတောင်တန်းကို ကြည့်ရင်လည်း ခရစ်ယာန် ချာ့ချ်ဘုရားကျောင်းတွေ၊ စာသင်ကျောင်းတွေ အပါအဝင် လူနေအိမ်တွေ တစ်ထောင့်ခြောက်ရာ ဝန်းကျင် ဖျက်စီး မီးရှို့တာတွေ ခံရတယ်လို့လည်း အိုချာရဲ့ နောက်ဆုံး အစီရင်ခံစာထဲ ပြောထားပါတယ်။

    စစ်ကိုင်းမှာ ဆိုရင် လူပေါင်း တစ်သိန်းနဲ့ သုံးထောင်ကျော်၊ မကွေးထဲက ဒေသတွမှာ နှစ်သောင်းကျော်နဲ့ ချင်းမှာ အနည်းဆုံး သုံးသောင်းလေးထောင်နီးပါး အိုးပစ်အိမ်ပစ် ထွက်ပြေး ရှောင်တိမ်း နေကြရတယ်လို့ ဆိုပါတယ်။

    အဲဒီလို နိုင်ငံ တနံတလျား နယ်မြေ အများအပြားမှာ ရှိနေတဲ့ စစ်ဘေးဒုက္ခသည်တွေကို ကုလနဲ့ မိတ်ဖက် အဖွဲ့တွေက အရေးပေါ် အကူအညီတွေ ပေးနိုင်ဖို့ ကြိုစားနေပေမယ့် လူသိန်းချီတဲ့ အများစုကြီးဟာ အခြေခံ စားနပ်ရိက္ခာတွေ မပြည့်စုံတဲ့ အပြင် ဘေးကင်းရန်ကင်း နေထိုင်ဖို့ရာ နေရာထိုင်ခင်း၊ အနွေးထည်၊ စောင်နဲ့ ဆေးဝါးတို့လို အခြေခံ လိုအပ်ချက်တွေ ဘာတစ်ခုမှ မပြည့်မီပဲ ဖြစ်သလို နေထိုင်နေကြရတာ ဖြစ်တယ်လို့ အိုချာက ပြောပါတယ်။

    

    ဓာတ်ပုံ ရင်းမြစ်, CJ

19. ၁၂ ဇန်နဝါရီ ၂၀၂၂အများပြည်သူ အင်တာနက်သုံးနိုင်မှု ထိခိုက်လာ

    အာဏာသိမ်း စစ်တပ်က အင်တာနက် ဝန်ဆောင်မှုတွေ အပေါ် ကုန်သွယ်ခွန်တွေ တိုးကောက်တာဟာ အများပြည်သူ အင်တာနက် သုံးစွဲမှု အပေါ် လျှော့ချ ကန့်သတ်နိုင်ဖို့၊ သတင်းစီးဆင်းမှု ထိန်းချုပ်နိုင်ဖို့ လုပ်ဆောင်တာ ဖြစ်တယ်ဆိုတဲ့ ဝေဖန်မှုတွေ ရှိနေပါတယ်။

    ဆင်းမ်ကဒ်ရောင်းတာ၊ အက်တီဗိတ်လုပ် အသက်ဝင်စေတာ အတွက် တစ်ကတ်ကို နှစ်သောင်း ဆိုတာ အပါအဝင် အင်တာနက် ဝန်ဆောင်မှု လုပ်ငန်းတွေ အပေါ် ကုန်သွယ်ခွန်တွေ တိုးမြှင့်တာ ဖြစ်ပါတယ်။

    ဒေသတွင်း စီးပွားရေး သတင်းထောက် တစ်ယောက် ဖြစ်တဲ့ သွမ်ဆင်ချောင်ရဲ့ အဆိုအရ လက်ရှိ စျေးနှုန်း၊ အခွန်နှုန်း အပြောင်းအလဲတွေဟာ အများပြည်သူ အင်တာနက် သုံးစွဲဖို့ရာ ကုန်ကျစရိတ် အဆမတန် ကြီးမြင့်လာစေတယ်လို့ ဆိုပါတယ်။

    စျေးတွေ တိုးတာရဲ့ နောက်ကွယ်မှာ ဖုန်းဆင်းကတ်တွေနောက် ပိုပြီး ခြေရာခံ လိုက်နိုင်ရေးကိုပါ အာဏာသိမ်းစစ်တပ်က ရည်မှန်းတာ ဖြစ်တယ်လိုလည်း ပြည်တွင်း ကုမ္ပဏီတွေထဲက သတင်းရင်းမြစ်တွေကို ကိုးကားပြီး သူက ပြောပါတယ်။

    စစ်ကောင်စီကတော့ တစ်နိုင်ငံလုံး အင်တာနက် သုံးစွဲမှု မြင့်မားနေတာနဲ့ လိုက်လျောညီထွေ တိုင်းပြည်ဝင်ငွေ တိုးအောင် အခွန်တိုးတာဆိုပြီး ပြောထားပါတယ်။

    

    ဓာတ်ပုံ ရင်းမြစ်, Getty Images

20. ၁၂ ဇန်နဝါရီ ၂၀၂၂ကန့်လန့်ကာနောက်ကွယ်က အထူးတရားရုံးများ