ကိုဗစ်ကူးစက်မှုကြောင့် အာဆီယံ ဘောလုံး U23 ပြိုင်ပွဲက မြန်မာနုတ်ထွက်

တိုက်ရိုက် ထုတ်လွှင့်ချက်

1. ၁၉ ဇန်နဝါရီ ၂၀၂၂ယင်းမာပင်မြို့နယ် ဘန့်ဘွေးရွာအနီး နှစ်ရက်ဆက်တိုက်ပွဲဖြစ်

   စစ်ကိုင်းတိုင်း ယင်းမာပင်မြို့နယ်ဘန့်ဘွေးရွာအနီး စစ်ကောင်စီတပ်နဲ့ ဒေသကာကွယ်ရေးတပ်များကြား နှစ်ရက်ဆက် တိုက်ပွဲဖြစ်ပွားခဲ့တယ်လို့ ဒေသကာကွယ်ရေးတပ် ဒီမိုကရက်တစ်ပြောက်ကျားတပ်ဖွဲ့ (အောက်ချင်းတွင်း)က ဇန်နဝါရီ ၁၉ ရက် နေ့စွဲနဲ့ ထုတ်ပြန်ပါတယ်။

   ဇန်နဝါရီ ၁၆ နဲ့ ၁၇ ရက်တို့မှာ ဘန်ဘွေးရွာနယ်အနီးတဝိုက်သို့ရောက်ရှိနေတဲ့ စစ်ကောင်စီတပ်တွေကို အဝေးပစ်၊ အနီးပစ်လက်နက်တွေနဲ တိုက်ခိုက်ခဲ့တယ်လို့ ထုတ်ပြန်ချက်မှာပါပါတယ်။

   အဝေးပစ်လက်နက်တွေကို ‌ဒေသအတွင်းကထုတ်လုပ်တာလို့ သူတို့ကပြောသလို အဲ့ဒီလက်နက်တွေ သုံးပြီးပစ်ခတ်နေတဲ့ ရုပ်သံဖိုင်ကိုလည်း လူမှုကွန်ရက်မှာ တွေ့ရပါတယ်။

   ဒီတိုက်ပွဲထိခိုက် သေဆုံးမှုတွေနဲ့ ပတ်သက်ပြီး စစ်ကောင်စီဘက်ကရော ဒေသကာကွယ်ရေးတပ်တွေဘက်ကပါထုတ်ပြန်တာ မတွေ့ရပါဘူး။

   ပြီးခဲ့တဲ့ ဇန်နဝါရီလ ၁၀ ရက်က နေ ၁၂ ရက်အထိ စစ်ကိုင်းတိုင်း ပုလဲမြို့နယ်ထဲက ဦးနှောက်ရွာကို စစ်ကောင်စီတပ်တွေက ဝင်စီးပြီး PDFခေါင်းဆောင် ဗိုလ်နဂါးကို ဒေသခံအချို့ကို ဖမ်းဆီးခဲ့ပါသေးတယ်။

   အဲ့ဒီစစ်ကြောင်းနဲ့ အတူ ယင်းမာပင်နယ်ထဲက ဘန့်ဘွေးရွာကိုလည်း စစ်ကောင်စီ စစ်ကြောင်းတွေရောက်လာတာဖြစ်ပြီးတော့ ကနီနဲ့ ယင်းမာပင်နယ်က ဒေသအတွင်းPDF တပ်တွေ ပူးပေါင်းပြီးတိုက်ခိုက်ခဲ့တယ်လို့ လည်း သူတို့ကပြောပါတယ်။

   စစ်ကောင်စီဘက်က တန်ပြန်တိုက်ခိုက်တာတွေလုပ်လာနိုင်လို့ ဒေသခံတွေ အနေနဲ့ အရေးပေါ်တိမ်းရှောင်နိုင်ရေး ကြိုတင်ပြင်ဆင်ကြဖို့ကိုထုတ်ပြန်ထားပါတယ်။

   တိုက်ပွဲတွေဆက်နေတဲ့ စစ်ကိုင်းတိုင်း

   

   ဓာတ်ပုံ ရင်းမြစ်, ယင်းမာပင် PDF

2. ၁၉ ဇန်နဝါရီ ၂၀၂၂တမူးမြို့က လွှတ်တော်ကိုယ်စားလှယ်တွေ၊ ဆန္ဒပြခေါင်းဆောင်တွေရဲ့ နေအိမ်တွေကို ချိပ်ပိတ်ခံရ

   စစ်ကိုင်းတိုင်း၊ တမူးမြို့မှာ စစ်ကောင်စီတပ်က လွှတ်တော်ကိုယ်စားလှယ်တွေ၊ ဆန္ဒပြခေါင်းဆောင်တွေနဲ့ ပရဟိတခေါင်းဆောင်တွေရဲ့ နေအိမ်တွေကို ဇန်နဝါရီလ ၁၉ ရက်နေ့က ချိပ်ပိတ်ခဲ့ကြောင်း တမူးမြို့ဒေသခံတစ်ဦးက ပြောပါတယ်။

   စုစုပေါင်း နေအိမ် ၈ လုံး ချိပ်ပိတ်ခံရပြီးတော့ အိမ်ပိုင်ရှင်တွေကတော့ ပြည်သူ့လွှတ်တော်ကိုယ်စားလှယ် ဦးနိုင်နိုင်ဝင်း နေအိမ်၊ တိုင်းဒေသကြီး ၁ လွှတ်တော်ကိုယ်စားလှယ် ဦးမြင့်နိုင်ဦး နေအိမ်၊ အမျိုးသားလွှတ်တော်ကိုယ်စားလှယ် ဦးထန်ဆေး နေအိမ်၊ အမျိုးသားလွှတ်တော်ကိုယ်စားလှယ်ဟောင်း ဦးမောင်မောင်လတ် နေအိမ်၊ ဆန္ဒပြခေါင်းဆောင် ကိုယဉ်ကိုဦး နေအိမ်၊ ဆန္ဒပြခေါင်းဆောင် ကို ကဘော်ဆုသန်း နေအိမ်၊ ပရဟိတခေါင်းဆောင် ကိုမင်းဗိုလ်နေအိမ် နဲ့ PDF တပ်က ကိုအောင်ဖြိုးကြွယ် နေအိမ်တို့ဖြစ်တယ်လို့လည်း သိရပါတယ်။

   အိမ်ချိပ်ပိတ်ခံရထဲမှာ ပါဝင်သူ အချို့ကလည်း သူတို့နေအိမ်တွေကနေ ရှောင်တိမ်းနေကြတာ ကြာပြီဖြစ်ကြောင်းနဲ့ သူတို့နေအိမ်တွေကို ချိပ်ပိတ်တယ်ဆိုတာ မှန်ကန်ကြောင်း ဘီဘီစီကို ပြောပါတယ်။

   ချိပ်ပိတ်ခံရတဲ့အိမ်ရှေ့မှာ ဗီနိုင်းအနီရောင်နဲ့ “ ဤအဆောက်အဦးနှင့် မြေနေရာသည် အကြမ်းဖက်အဖွဲ့အစည်းများနှင့်ဆက်စပ်နေသဖြင့် နိုင်ငံတော်ပိုင်သိမ်းမည်ဖြစ်သောကြောင့် မကျူးကျော်ရ ရောင်းချခြင်း ရောင်းဝယ်ခြင်းမပြုလုပ်ရ လို့”ရေးထားတဲ့စာကို ကပ်ထားတာလည်း တွေ့ရတယ်လို့ ဆိုပါတယ်။

   

   ဓာတ်ပုံ ရင်းမြစ်, CJ

3. ၁၉ ဇန်နဝါရီ ၂၀၂၂ချင်းပြည်နယ်၊ တီးတိန်မြို့နယ်ထဲက ကနေဒီတောင်ပေါ်ကို စစ်ကောင်စီတပ်တွေ လေထီးနဲ့ ဆင်းရာက တစ်ဦး ချောက်ထဲပြုတ်ကျ

   ချင်းပြည်နယ်၊ တီးတိန်မြို့နယ်ထဲက ကနေဒီတောင်ထိပ်ပေါ်က စစ်ကောင်စီတပ်စခန်းကို စစ်ကောင်စီဘက်က ရဟတ်ယာဉ်နဲ့ တပ်သား ၁၂ ယောက် လေထီးနဲ့ ဒီကနေ့ ဇန်နဝါရီ ၁၉ ရက်နေ့မှာ ဆင်းခဲ့ပြီး အဲဒီထဲကမှ စစ်ကောင်စီတပ်ဖွဲ့ဝင်တစ်ဦးရဲ့ လေထီးမပွင့်တာကြောင့် ချောက်ထဲ ပြုတ်ကျသွားတယ်လို့ ဒေသခံကာကွယ်ရေးတပ် CDM Siyin က ဘီဘီစီကို အတည်ပြုပါတယ်။

   စစ်ကောင်စီရဲ့ ရဟတ်ယာဉ်ဟာ မွန်းလွဲ ၁ နာရီခွဲကျော်ကျော်လောက်မှာ လာရောက်ခဲ့တာဖြစ်ပြီး အခုလိုလေထီးနဲ့လာရောက်တာဟာ ရိက္ခာ လာချပေးတာ ဖြစ်နိုင်တယ်လို့ ဒေသခံ ကာကွယ်ရေးတပ်တွေဘက်က သုံးသပ်ကြပါတယ်။ စစ်ကောင်စီတပ်တွေဟာ ဇန်နဝါရီလ ၁၈ ရက်နေ့နဲ့ ဒီကနေ့ ဇန်နဝါရီ ၁၉ ရက်မှာလည်း စစ်လေယာဉ် နှစ်စီး ကလေးမြို့လေယာဉ်ကွင်းကို ဆင်းသက်ခဲ့တယ်လို့လည်း ကလေးမြို့ဒေသခံ တဦးက ဘီဘီစီကို ပြောပါတယ်။

   လက်ရှိ အခြေအနေမှာ စစ်ကောင်စီဟာ တီးတိန်မြို့ကို စစ်ကြောင်းထိုး ချီတက်ဖို့ ကြိုးစားရာကနေ မွှာလ်ပီး၊ ထေးဇန်နဲ့ ဟိန်းဇိန်းရွာ နားတဝိုက်မှာ ဒေသခံ ကာကွယ်ရေးပူးပေါင်းတပ်တွေနဲ့ ထိတွေ့တိုက်ပွဲတွေ ဖြစ်ပြီး ဒေသခံ အိမ်တချို့လည်း မီးရှို့တာခံခဲ့ရပါတယ်။

   စစ်ကောင်စီတပ်တွေဟာ ကလေးမြို့ တက္ကသိုလ်ဝင်းထဲကနေ လက်နက်ကြီးတွေနဲ့ တီးတိန်မြို့နယ်ထဲကို ဇန်နဝါရီ ၁၆ ရက်နေ့ကစလို့ အချက်ရေတော်တော်များများ ပစ်ခတ်ခဲ့တယ်လို့ ဒေသခံတွေကဆိုပါတယ်။ ဒီဖြစ်စဉ်နဲ့ပတ်သက်လို့တော့ စစ်ကောင်စီဘက်က သတင်းထုတ်ပြန်တာမရှိသေးပါဘူး။

   

   ဓာတ်ပုံ ရင်းမြစ်, wikipedia

4. ၁၉ ဇန်နဝါရီ ၂၀၂၂ရန်ကုန်တက္ကသိုလ် ၊ပါမောက္ခဒေါက်တာအာကာမိုးသူကို စစ်ကောင်စီက ထောင် ၃ နှစ်ချ

   ရန်ကုန်တက္ကသိုလ်၊ အရှေ့တိုင်းပညာဌာနမှ ပါမောက္ခ ဒေါက်တာအာကာမိုးသူကို စစ်ကောင်စီက ဒီကနေ့ဇန်နဝါရီ ၁၉ရက်နေ့မှာ ထောင်ဒဏ် ၃နှစ်ချမှတ်လိုက်တယ်လို့ ရန်ကုန်တက္ကသိုလ်ကျောင်းသားများသမဂ္ဂက ထုတ်ပြန်ကြေညာပါတယ်။

   ဒေါက်တာအာကာမိုးသူဟာ တက္ကသိုလ်ဆရာ သမဂ္ဂကို စတင်တည်ထောင်သူ တစ်ဦးဖြစ်ပြီး တက္ကသိုလ်ဆရာ၊ ဆရာမတွေရဲ့ အာဏာဖီဆန်ရေးလှုပ်ရှားမှု CDM လှုပ်ရှားမှုမှာ ဦးဆောင်ပါဝင်သူ တစ်ဦးဖြစ်တယ်လို့လည်း ရန်ကုန်တက္ကသိုလ်ကျောင်းသားများသမဂ္ဂ ရဲ့ ထုတ်ပြန်ချက်မှာ ဖော်ပြထားပါတယ်။

   ဒေါက်တာအာကာမိုးသူကိုတော့ ပြီးခဲ့တဲ့ နှစ် ၂၀၂၁ မတ်လထဲမှာ လှိုင်မြို့နယ်ထဲမှာ လုပ်ခဲ့တဲ့ စစ်အာဏာရှင်ဆန့်ကျင်ရေးဆန္ဒပြပွဲတစ်ခုမှာ အရပ်ဝတ်စစ်ကောင်စီတပ်တွေက သေနတ်ထောက်ဖမ်းဆီးသွားတာဖြစ်တယ်လို့လည်း မျက်မြင်တွေ့သူတွေ့ ကဖြေကြားထားခဲ့ပါတယ်။

   

   ဓာတ်ပုံ ရင်းမြစ်, University of Yangon Students’ Union - UYSU

5. ၁၉ ဇန်နဝါရီ ၂၀၂၂ဂန့်ဂေါမြို့နယ် စန်းမြို့ရွာကို စစ်ကောင်စီတပ်တွေက ဒုတိယအကြိမ် မီးရှို့ခဲ့တဲ့အတွက် အိမ်ခြေ ၁၈၀ ကျော် ပျက်စီး

   ဂန့်ဂေါမြို့နယ်၊ စန်းမြို့ရွာကို ဇန်နဝါရီလ ၁၈ ရက်နေ့က ဒုတိယအကြိမ်မြောက် ဝင်ရောက်ပြီး မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

   မနေ့ ဇန်နဝါရီ ၁၈ ရက်နေ့ နေ့လယ်က စစ်ကောင်စီတပ်တွေ ရွာထဲဝင်လာစဉ် ဒေသကာကွယ်ရေးတွေနဲ့ တိုက်ပွဲ ဖြစ်ခဲ့ပြီးတဲ့နောက် အင်အားချင်းမမျှတဲ့အတွက် စစ်ကောင်စီတပ်တွေဟာ ရွာထဲကို ဝင်လာပြီး နေအိမ်တွေကို မီးရှို့ခဲ့တာဖြစ်တယ်လို့ ဒေသခံတွေက ပြောပါတယ်။

   အိမ်ခြေ၂၀၀ လောက်ရှိတဲ့ ရွာမှာ အိမ်ခြေ ၁၈၀ လောက် မီးလောင်ကျွမ်းခဲ့တာဖြစ်ပြီး ဒေသခံတွေလူဦးရေ တစ်ထောင်ကျော်ကတော့ နီးစပ်ရာ တောင်ထဲတောင်ထဲမှာ ရှောင်နေကြတဲ့အတွက် ထိခိုက်ဒဏ်ရာရတာမျိုးမရှိဘူးလို့လည်း ဒေသခံတွေက ပြောကြပါတယ်။

   ပြီးခဲ့တဲ့ ဒီဇင်ဘာလတုန်းကလည်း ပထမအကြိမ် မီးလာရှို့ခဲ့တဲ့အတွက် အိမ်ခြေ ၃၀ လောက် ဆုံးရှုံးခဲ့ပြီးဖြစ်ပါတယ်။

   အခုလို စန်းမြို့ရွာကိုမီးရှို့တယ်ဆိုတဲ့ဒေသခံတွေရဲ့ ပြောကြားချက်နဲ့ပတ်သက်လို့ စစ်ကောင်စီဘက်ကတော့ တစ်စုံတစ်ရာ သတင်းမထုတ်ပြန်သေးပါဘူး။

   

   ဓာတ်ပုံ ရင်းမြစ်, CJ

6. ၁၉ ဇန်နဝါရီ ၂၀၂၂စစ်ရေးတင်းမာနေတဲ့ ကျောက်တော်မြို့ပေါ်မှာ ဒေသခံတချို့စစ်ဘေးတိမ်းရှောင်, ရထားဘူတာစစ်ဘေးရှောင်တွေ အကူအညီလိုအပ်နေ

   ရခိုင်ပြည်နယ်၊ ကျောက်တော်မြို့ပေါ်မှာရှိတဲ့ ရထားဘူတာစစ်ဘေးရှောင်စခန်းမှာရှိတဲ့ စစ်ဘေးရှောင်တွေအကူအညီလိုအပ်နေတယ်လို့ စစ်ဘေးရှောင်စခန်းမှာ နေထိုင်သူတွေကပြောပါတယ်။

   "အိမ်သာရယ်၊ ထင်းရယ်၊ ဆောင်းရာသီ ဆိုတော့ အနွေးထည်တွေလည်း လိုအပ်ပါတယ် ''လို့ တင်းမကျေးရွာကနေ စစ်ဘေးရှောင်လာသူ မသန်းနုခိုင်က MPA ကို ပြောပါတယ်။

   

   ဓာတ်ပုံ ရင်းမြစ်, MPA

   ရထားဘူတာစစ်ဘေးရှောင်စခန်းမှာ အိမ်ထောင်စုပေါင်း ၂၀၆ စုရှိပြီး လူဦးရေ ၇၃၅ ယောက်လောက် စစ်ဘေးတိမ်းရှောင်နေရတာပါ။

   ကျောက်တော်မြို့နယ်မှာဆိုရင် ရက္ခိုင့်တပ်တော်(AA) နဲ့ အာဏာသိမ်းစစ်ကောင်စီတပ်တို့ကြားမှာ မနေ့ ဇန်နဝါရီ ၁၇ ရက်နေ့ကစပြီး စစ်ရေးတင်းမာနေတာကြောင့် ဒေသခံတွေအခုလိုစစ်ဘေး တိမ်းရှောင်လာကြတာဖြစ်တယ်လို့စစ်ရှောင်စခန်းမှာနေထိုင်သူတွေကပြောပါတယ်။

   

   ဓာတ်ပုံ ရင်းမြစ်, MPA

7. ၁၉ ဇန်နဝါရီ ၂၀၂၂ပြည်ပကို တရားမဝင်ပို့ဆောင်ခံရမယ့်အလုပ်သမား ၂၀၀ ကျော်ကို ရန်ကုန်မှာ တားဆီးနိုင်ခဲ့

   ပြည်ပနိုင်ငံတွေကို အလုပ်သွားရောက်လုပ်ကိုင်ဖို့ပို့ဆောင်‌ ပေးမယ်ဆိုပြီး တရားမဝင်ပွဲစားတွေ စုဆောင်းထားတဲ့ လုပ်သား၂၀၀ လောက်ကို မြန်မာနိုင်ငံလူကုန်ကူးမှုအသင်းက တားဆီးနိုင်ခဲ့တယ်လို့ ဒီကနေ့ဇန်နဝါရီ ၁၉ ရက်နေ့မှာ မြန်မာပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ် (MOEAF) ကထုတ်ပြန်လာပါတယ်။ ပြီးခဲ့တဲ့ ဇန်နဝါရီ ၁၆ ရက်နေ့နဲ့ ၁၈ ရက်နေ့တွေမှာ ရန်ကုန်မြို့ရွှေတိဂုံစေတီတော်အရှေ့ဖက်မုခ် ဘုန်းတော်ကြီးကျောင်းတကျောင်းနဲ့ ဒဂုံမြို့သစ်မြောက်ပိုင်းမြို့နယ်၊ ၄၃ ရပ်ကွက်၊မင်းရဲကျော်စွာလမ်းမှာ တရားမဝင်ပွဲစားတွေ စုဆောင်းထားတဲ့ အလုပ်သမား ၂၀၀ ကျော်ကို တွေ့ခဲ့တာဖြစ်ပြီး ပွဲစားတွေကို ဖမ်းဆီးဖို့ဆက်လက်လုပ်ဆောင်နေတယ်လို့ MOEAF ရဲ့ထုတ်ပြန်ချက်မှာဖော်ပြထားပါတယ်။

   "ကျွန်တော်တို့က ဖြူးမြို့ကပါ။ ပွဲစားက တရားဝင်လမ်းကြောင်းက ပို့ပေးမယ် ပြောလို့လိုက်လာတာပါ။။ passport စာအုပ်ဖိုး ၁ သိန်း ၇ သောင်းအရင်ပေးခဲ့ရတယ်။ မနေ့ကမှ ၁၈ သိန်းသွင်းခဲ့တာပါ။ ထိုင်းနိုင်ငံက အီလက်ထရောနစ်စက်ရုံမှာ အလုပ်ရမယ်။ တနေ့ဘတ် ၃၃၀ ရမယ်။ ရန်ကုန်မှာ စာချုပ်ချုပ်မယ်။ ခုလောလောဆယ် OWIC ကတ်လုပ်ဖို့ ဒီအဆောင်မှာစောင့်ပါဆိုလို့ စောင့်နေတာပါ။ ရန်ကုန်ရောက်တာ ၁၀ ရက်ကျော်ကြာပါပြီ။ ၁၈ သိန်းလည်း သွင်းပြီးပါပြီ" လို့ မြောက်ဒဂုံဖြစ်စဉ်မှာ အလိမ်ခံခဲ့ရတဲ့ အလုပ်သမားတဦးက မြန်မာပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ် (MOEAF) က သွားရောက်တွေ့ဆုံချိန်မှာပြောကြားခဲ့တယ်လို့လည်း MOEAF က ထုတ်ပြန်ထားပါတယ်။

   အခုလိုတရားမဝင်လမ်းကြောင်းကနေသွားရောက်အလုပ်လုပ်အကိုင်ဖို့စုဆောင်းခံရတဲ့အလုပ်သမား အများစုဟာ သဲတော၊ဝမ်းတွင်း၊ဧရာဝတီတိုင်း ငပုတော၊ တောင်ငူ၊ ဖြူးမြို့နယ်၊နေပြည်တော်၊လယ်ဝေး စတဲ့ဒေသတွေကအများစုဖြစ်ပြီး ပွဲစားတွေထံ ငွေကြေးနဲ့နိုင်ငံကူးလတ်မှတ်တွေပေးထားရတယ်လို့ သက်ဆိုင်ရာအလုပ်သမားတွေကပြောဆိုထားပါတယ်။

   “ တချို့က ငွေတော်တော်များများပေးပြီးတဲ့သူလည်းရှိတယ်၊ တဝက်ပေးပြီးတဲ့လူလည်းရှိတယ်။ ပတ်စပို့စ်ဖိုးတင် ၁သိန်း၇သောင်းပေးရတယ်။ ငွေကလည်းတချို့က သိန်း ၂၀၊ ၁၈ သိန်း၊ ၁၆ သိန်း ကိုတဝက်ပေးပြီးတဲ့လူတွေရော အပြည့်ပေးလိုက်တဲ့လူတွေရော၊ သူတို့တွေကို လူကုန်းတား တပ်ဖွဲ့ကခဏထိန်းသိမ်းပြီး သက်ဆိုင်ရာအုပ်ထိန်းသူတွေ၊ မြို့နယ်တွေကို တရားဝင်ပြန် အပ်နှံပြီး သူတို့ရပ်ရွာကိုပြန်ပို့မှာပေါ့ “ လို့ မြန်မာပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ် (MOEAF) ရဲ့ တာဝန်ရှိသူတစ်ဦးက ဘီဘီစီကိုပြောပါတယ်။

   လက်ရှိမှာတော့ သက်ဆိုင်ရာပွဲစားတွေကိုဖမ်းဆီးရမိဖို့နဲ့ အလုပ်သမားတွေ ဆီက ယူဆောင်ထားတဲ့ ငွေကြေး၊ နိုင်ငံကူးလတ်မှတ်နဲ့မှတ်ပုံတင်တွေကို ပြန်ရဖို့ကြိုးစားနေပြီး ပွဲစားတွေကိုတော့ဖမ်းဆီးရမိတာမရှိသေးဘူးလို့သိရပါတယ်။ လက်ရှိမှာတော့ ပြည်ပနိုင်ငံတွေကိုလုပ်သားတွေတရားဝင်စေလွှတ်နိုင်ဖို့အတွက် နှစ်နိုင်ငံညှိနှိုင်းမှုတွေလုပ်ဆောင်နေပေမယ့် ညှိနှိုင်းနေဆဲကာလဖြစ်လို့ လုပ်သားတွေစေလွှတ်ဖို့ရပ်ဆိုင်းနေဆဲအခြေအနေတွေကို တရားမဝင်ပွဲစားတွေ ကအခွင့်ကောင်းယူပြီး လိမ်လည်မှုတွေရှိနေတယ်လို့ပြည်ပအလုပ်အကိုင်အေဂျင်စီတွေကပြောပါတယ်။

   

   ဓာတ်ပုံ ရင်းမြစ်, MOEAF

8. ၁၉ ဇန်နဝါရီ ၂၀၂၂ကော်သူးလေ အုပ်ချုပ်နယ်မြေအတွင်းနှစ်ပတ်အတွင်းပစ်ခတ်တိုက်ခိုက်မှုပေါင်း ၁၈၁ ကြိမ်ဖြစ်ပွားခဲ့, စစ်ကောင်စီဘက် က ၁၅၉ ယောက်သေဆုံးခဲ့ပြီး ၁၀၂ယောက် ထိခိုက်ဒဏ်ရာရရှိခဲ့တယ်လို့ KNU ထုတ်ပြန်

   ကရင်အမျိုးသားအစည်းအရုံး KNU - ကော်သူးလေ အုပ်ချုပ်နယ်မြေအတွင်းမှာ ၂၀၂၂ ခုနှစ် ဇန်နဝါရီ ၁ ရက် ကနေ ၁၅ ရက် အထိ နှစ်ပတ်အတွင်း ပစ်ခတ်တိုက်ခိုက်မှုပေါင်း ၁၈၁ ကြိမ်ဖြစ်ပွားခဲ့ပြီး စစ်ကောင်စီဘက် က ၁၅၉ ယောက်သေဆုံးခဲ့ပြီး ၁၀၂ယောက် ထိခိုက်ဒဏ်ရာရရှိခဲ့တယ်လို့ ကရင်အမျိုးသားအစည်းအရုံး KNU က ထုတ်ပြန်လာပါတယ်။

   ဒါ့အပြင် မူတြော်ခရိုင် ဒွယ်လိုးမြို့နယ် နဲ့ ဒူးပလာယာခရိုင်၊ကော့ကရိတ်မြို့နယ် မှာ စစ်ကောင်စီဘက်က လေယာဉ်နဲ့ဗုံးကြဲတိုက်ခိုက်ခဲ့တဲ့အပြင် လက်နက်ကြီးပစ်ခတ်မှုကြောင့် ပြည်သူ ၇ ဦးသေဆုံးပြီး ၁၉ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

   ဒူးသထူခရိုင် ၊ ညောင်လေးပင်ခရိုင် ၊ ဘိတ်ထားဝယ်ခရိုင်မူတြော်ခရိုင်နဲ့ ဒူးပလာယာခရိုင်တွေအတွင်းမှာ စစ်ကောင်စီရဲ့တပ်တွေနဲ့ လက်အောက်ခံတပ်တွေရဲ့ပစ်ခတ်မှုကြောင့် ပြည်သူလူထုနေထိုင်ရာ ကျေးရွာတွေနဲ့ လုပ်ငန်းခွင်တွေအတွင်းလက်နက်ကြီးပစ်ချမှုပေါင်း အလုံးရေ ၂၀၀ ကျော်ရှိခဲ့တယ်လို့ဆိုပါတယ်။

   လက်ရှိမှာ ဒူးသထူခရိုင်၊ညောင်လေးပင်ခရိုင်စတဲ့ တပ်မဟာ ၅ ခုအတွင်း စစ်ဘေးရှောင်ပြည်သူ ၅သောင်း ကျော်အထိ ရှိနေပြီ ဖြစ်တယ်လို့လည်း ထုတ်ပြန်ချက်မှာပါရှိပါတယ်။ ကရင်အမျိုးသားလွတ်မြောက်ရေးတပ်မတော် KNLA နဲ့ ကရင်အမျိုးသားကာကွယ်ရေးတပ် KNDO တို့ဘက်ကတော့ ၁၃ ဦးကျဆုံးပြီး ၁၈ ဦး ထိခိုက်ဒဏ်ရာရရှိခဲ့တယ်လို့ထုတ်ပြန်ချက်မှာပါရှိပါတယ်။

   

   ဓာတ်ပုံ ရင်းမြစ်, (Photo_SWS)

   

   ဓာတ်ပုံ ရင်းမြစ်, (Photo_SWS)

9. ၁၉ ဇန်နဝါရီ ၂၀၂၂မြန်မာ့အကျပ်အတည်းပိုပြီးဆိုးရွားမှုမရှိအောင်မြန်မာစစ်တပ်ကိုဟန့်တားပေးဖို့ကုလအထူးကိုယ်စားလှယ် က ထိုင်းကိုတောင်းဆို

   မြန်မာနိုင်ငံအတွင်းမှာ နိုင်ငံရေးအကျပ်အတည်းပိုမိုဆိုးရွားမလာအောင်ဟန့်တားပေးဖို့ နဲ့ မြန်မာစစ်တပ်ရဲ့စစ်ဆင်ရေးတွေအတွင်းမှာ ထိုင်းနိုင်ငံဘက်ခြမ်းကို ထွက်ပြေးတိမ်းရှောင်ရတဲ့ စစ်ရှောင်ဒုက္ခသည်တွေကို အကာအကွယ်ပေးဖို့ ကုလသမဂ္ဂရဲ့မြန်မာနိုင်ငံဆိုင်ရာ အထူးကိုယ်စားလှယ်နိုလင်းဟေဇာက ထိုင်းနိုင်ငံ၊ဝန်ကြီးချုပ်ပရာယွတ်ချန်အိုချာကို တောင်းဆိုလိုက်ပါတယ်။

   ထိုင်းနိုင်ငံအနေနဲ့ ထိုင်း- မြန်မာနယ်စပ်ကရင်ပြည်နယ်ဘက်မှာ တိုက်ပွဲတွေအတွင်း နေရပ်စွန့်ခွာထွက်ပြေးတိမ်းရှောင်နေရတဲ့မြန်မာပြည်သူတွေကို အကူအညီပေးဖို့၊ မြန်မာ့အရေးနိုင်ငံတကာရဲ့ဆောင်ရွက်ချက်တွေကို ထောက်ခံအားပေးဖို့ ၊ အာဆီယံ ဘုံသဘောတူညီချက် ၅ချက်ကို လိုက်နာအောင် မြန်မာစစ်တပ်ကိုဖိအားပေးဖို့ ကုလအတွင်းရေးမှူးချုပ်ရဲ့ အထူးကိုယ်စားလှယ်နိုလင်းဟေဇာက ထိုင်းဝန်ကြီးချုပ်ကိုပြောခဲ့တာပါ။

   ထိုင်းဝန်ကြီးချုပ်ကတော့ ပထမအဆင့်အနေနဲ့ မြန်မာစစ်ခေါင်းဆောင်ရဲ့ယုံကြည်မှုရဖို့လိုသလို၊ မြန်မာနိုင်ငံရဲ့ အခြေအနေကိုလည်းထိုင်းနိုင်ငံက အနီးကပ်စောင့်ကြည့်နေသလို၊ လူသားချင်းစာနာမှုဆိုင်ရာ အကူအညီပေးနေတဲ့ အချိန်မှာ အကြမ်းဖက်မှုတွေအားလုံးရပ်ဆိုင်းဖို့လိုတယ်လို့ ပြောခဲ့ပါတယ်။

   တချိန်တည်းမှာပဲ ကမ္ဘောဒီးယားဝန်ကြီးချုပ် ဟွန်ဆင်ကလည်း မြန်မာနိုင်ငံအတွက် လူသားချင်းစာနာမှုဆိုင်ရာအကူအညီပေးဖို့ အာဆီယံအတွင်းရေးမှူးချုပ်ကိုတောင်းဆိုလိုက်ပါတယ်။ ဒါပေမယ့် မြန်မာအာဏာသိမ်းစစ်ခေါင်းဆောင်နဲ့တွေ့ခဲ့တဲ့ ဝန်ကြီးချုပ်ဟွန်ဆင်ရဲ့မြန်မာပြည် ခရီးစဉ်နောက်ပိုင်းမှာတော့ အာဆီယံအဖွဲ့အတွင်း သဘောထားကွဲလွဲမှုတွေရှိနေတယ်လို့ အာဆီယံသံတမန်တွေနဲ့အစိုးရအရာရှိတွေရဲ့ပြောကြားချက်ကိုကိုးကားပြီး ရိုက်တာသတင်းကဖော်ပြထားပါတယ်။

   

   ဓာတ်ပုံ ရင်းမြစ်, Bangkok Post

10. ၁၉ ဇန်နဝါရီ ၂၀၂၂မိုင်းကြောင့်ခြေထောက်တစ်ဖက်ဆုံးရှုံးခဲ့တဲ့ ဆယ်ကျော်သက်လူငယ် ဆေးကုသဖို့ အကူအညီလိုအပ်

    ရခိုင်ပြည်နယ်၊ ပုဏ္ဏားကျွန်းမြို့နယ်၊ အထက်မြတ်လှဲကျေးရွာမှာ မိုင်းနင်းမိလို့ ခြေထောက် တစ်ဖက်ဆုံးရှုံးသွားတဲ့ ရှစ်တန်းကျောင်းသား၊ မြိုလူငယ်မှာ ဆေးဝါးကုသရန်အတွက် အကူအညီများလိုအပ်နေပါတယ်။ ဒီလူငယ်ဟာ ရွာကနေ တစ်နာရီကျော်လောက်သွားရတဲ့ တောင်ယာထဲ ဟင်းသီးဟင်းရွက်ရှာဖွေနေတုန်း ၂၀၂၁ ခုနှစ်၊ ဇူလိုင်လက မိုင်းနင်းမိကာ ညာဘက်ခြေထောက် ဒူးခေါင်းကနေ ပြတ်သွားပြီး ဘယ်ဘက်ခြေထောက်မှာ လည်း ဒဏ်ရာအကြီးအကျယ်ရရှိခဲ့ပါတယ်။''ခု အနာမကျက်သေးတော့ ဆေးရုံမှာဆေးကုသဖို့ ငွေကြေးလိုအပ်တာပေါ့။'' လို့ မိခင်ဖြစ်သူ ဒေါ်မိချောက MPA ကိုပြောပါတယ်။သူဟာ မွေးချင်းထဲမှာ အကြီးဆုံးဖြစ်ပြီး ရှစ်တန်းတက်ရမယ့်နှစ်မှာ ခုလို ခြေထောက်မိုင်းထိဒဏ်ရာရခဲ့လို့ ကျောင်းလည်းဆက်မတက်နိုင်တော့ဘူးလို့ သူကပြောပါတယ်။ ''အနာကောင်းသွားရင် ကျောင်းပြန်တက်ချင်ပါတယ်'' လို့ မိုင်းထိမြိုလူငယ် ဦးဘမောင်ကပြောပါတယ်။

    

    ဓာတ်ပုံ ရင်းမြစ်, MPA

    ''အဲဒီအနာကိုကောင်းအောင် ကုပေးဖို့တော့လိုတယ်။ ပိုက်ဆံမရှိလို့ ဆေးဆိုင်က ဆေးဝါရည်ပဲထည့်ပေးနေရပါတယ်'' လို့ အစ်မဝမ်းကွဲတော်စပ်သူ မမိုးက လက်ရှိအခြေအနေကို ရှင်းပြပါတယ်။ရခိုင်မှာ တိုက်ပွဲများရပ်တန့်နေပေမယ့် ဇန်နဝါရီလ ၁၇ ရက်က မြောက်ဦးမြို့နယ်၊ပေါင်းတုတ်ရွာသစ်မှာ စစ်ကျန်လက်ဗုံးသီးပေါက်ကွဲလို့ အသက် ၇ နှစ်နဲ့ ၈ နှစ်အရွယ်၊ရိုဟင်ဂျာကလေးငယ်နှစ်ဦး ခြေထောက်နဲ့ဗိုက်မှာ ဒဏ်ရာတွေရရှိခဲ့ပါတယ်။ ရခိုင်ပြည်နယ်မသန်စွမ်းသူများအစည်းအရုံးဥက္ကဋ္ဌကိုလှမြင့်က''အခုလော လောဆယ် ၇ မြိုနယ်မှာ သင်တန်းပေးနေပါတယ်။ ပြီးရင်ကျောက်တော်၊ ရသေ့တောင်၊ မင်းပြားမှာ အားပြုကိရိယာ ထောက်ပံ့ဖို့ စီမံချက်ရှိပါတယ်။'' လို့ ပြောပါတယ်။ ရခိုင်မှာ ရက္ခိုင့်တပ်တော်(AA) နဲ့ မြန်မာစစ်တပ်တို့ကြား ၂၀၁၈ ခုနှစ်ကစတင်ဖြစ်ပွားခဲ့တဲ့ စစ်ပွဲကာလမှယနေ့အချိန်အထိ ဒေသခံ ၂၀၀ နီးပါး မိုင်းအန္တရာယ်ကြောင့် ထိခိုက်ဒဏ်ရာရမှု သေဆုံးသူတွေရှိခဲ့ပါတယ်။

    

    ဓာတ်ပုံ ရင်းမြစ်, MPA

11. ၁၈ ဇန်နဝါရီ ၂၀၂၂တိုက်ပွဲတွေဆက်နေတဲ့ စစ်ကိုင်းတိုင်း

12. ၁၈ ဇန်နဝါရီ ၂၀၂၂ဂန့်ဂေါမြို့နယ် စန်းမြို့ရွာမှာ နေအိမ်တွေ မီးလောင်

    ဂန့်ဂေါမြို့နယ်မြောက်ပိုင်း မြို့နဲ့ မိုင် ၃၀ လောက်ဝေးတဲ့ စန်းမြို့ရွာက နေအိမ်တွေ ဇန်နဝါရီလ ၁၈ ရက်နေ့က မီးရှို့ခံရပြီး မီးလောင်နေတယ်လို့ ဂန့်ဂေါ်‌ဒေသခံတစ်ဦးက ဘီဘီစီကို ပြောပါတယ်။

    ဂန့်ဂေါမြို့နယ်၊ စန်းမြို့ရွာကို ဇန်နဝါရီလ ၁၈ ရက် ည‌နေပိုင်းမှာ စစ်ကောင်စီတပ်တွေနဲ့ ‌ဒေသလက်နက်ကိုင် စုစုပေါင်း အင်အားတစ်ရာခန့်က ဝင်ရောက်စီးနင်းပြီး နေအိမ်တွေကို မီးရှို့ဖျက်ဆီးမှုတွေလုပ်ခဲ့တာလို့ ပြောပါတယ်။

    ထိခိုက်ပျက်စီးဆုံးရှုံးမှုတွေ၊ ဒေသခံတွေ အဖမ်းခံရ မခံရဆိုတာတွေတော့ အတိအကျမသိရသေးဘူးလို့ သူကပြောပါတယ်။

    စစ်ကောင်စီဘက်က ဒီသတင်းနဲ့ပတ်သက်ပြီး ထုတ်ပြန်တာ မရှိသေးပါဘူး။

    ပြီးခဲ့တဲ့ ဒီဇင်ဘာလ ၂၁ ရက်နေ့ကလည်း စစ်ကောင်စီ တပ်ဖွဲ့တွေနဲ့ ဒေသလက်နက်ကိုင်အချို့ စန်းမြို့ကျေးရွာကို ရောက်ရှိလာပြီး မီးရှို့ခဲ့လို့စန်းမြို့ကျေးရွာက လူနေအိမ် ၃၂လုံး မီးလောင်ပျက်စီးခဲ့ရတယ်လို့ ဂန့်ဂေါ‌ဒေသခံတွေက ပြောပါတယ်။

    အဲ့ဒီတုန်းက အိမ်၂၈လုံးခန့်ကတော့ လုံးဝပြာကျသွားတယ်လို့ ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ခဲ့ပါတယ်။

    

    ဓာတ်ပုံ ရင်းမြစ်, Gangaw Youths Voice

13. ၁၈ ဇန်နဝါရီ ၂၀၂၂ကျောက်တော် စစ်ရှောင်စခန်းမှာ သောက်သုံးရေပြတ်၊ ရွှံ့ရေတွေကိုသောက်သုံးနေရ

    ရခိုင်ပြည်နယ် ကျောက်တော်မြို့နယ် တောင်မင်းကုလား စစ်ဘေးရှောင်ဒုက္ခသည်စခန်းမှာ သောက်သုံးရေပြတ်လပ်တော့မှာ ဖြစ်ပြီး လက်ရှိမှာလည်း ရွှံ့ရေတွေကို သောက်သုံးနေကြရတယ်လို့ စခန်းတာဝန်ခံ ဦးမောင်သိန်းဝင်းက ပြောပါတယ်၊။

    အဲ့ဒီစစ်ဘေးရှောင်ဒုက္ခသည်စခန်းမှာ အသုံးပြုနေတဲ့ရေကန်မှာ ပြီးခဲ့တဲ့ လပိုင်းလောက်ကစပြီးတော့ ရေခန်းခြောက်လာနေပြီ ဖြစ်သလို လက်ရှိမှာလည်း တစ်ပေခန့်သာကျန်တော့ပြီး နောက်ထပ်နှစ်ပတ်ခန့်အတွင်းမှာ ခန်းခြောက်သွားနိုင်တယ်လို့ ဆိုပါတယ်။

    လက်ရှိမှာတော့ ကန်မှာရှိတဲ့ရေကို ကျွဲနွားတွေပါ ဆင်းသောက်နေကြတဲ့အတွက် ရေပျက်ပြီးတော့ ရွှံ့ရေတွေအဖြစ်နောက်ကျိနေပြီး အဲ့ဒီရေတွေကို စခန်းမှာနေထိုင်တဲ့ စစ်ဘေးရှောင်ဒုက္ခသည်တွေမှာ အသုံးပြုနေကြရတာဖြစ်ပါတယ်။

    “ကျွန်တော်တို့စခန်းမှာ ရေခမ်းနေတာ ကြာပြီး၊လက်ရှိကတော့ ရေတစ်ပေလောက်ပဲကျန်တော့တယ်။ ရွှံ့ရေတွေကို ရေစစ်တွေနဲ့စစ်ပြီးတော့ သောက်ရတယ်။ သုံးရတယ်။ ဖြစ်သလိုသုံးနေကြရတာပေါ့။ တချို့လူတွေ၊ ကလေးတွေကလည်း ယားနာတွေပေါက်ကြတာရှိတယ်။ ဝမ်းရောဂါတွေဖြစ်မှာကိုလည်း စိုးရိမ်ရတယ်။”လို့ ဦးမောင်သိန်းဝင်းက ပြောပါတယ်။

    တောင်မင်းကုလား စစ်ဘေးရှောင်စခန်းမှာ အခုလိုမျိုး ရေပြတ်တဲ့ပြဿနာတွေနဲ့ နှစ်စဉ်ကြုံတွေ့နေကြရပြီး ရေခန်းခြောက်တဲ့အချိန်တွေမှာ ကျေးရွာအနီးမှာရှိတဲ့ ယိုးချောင်းက ရေတွေကိုစုပ်တင်ပြီးတော့ အသုံးပြုကြရတာဖြစ်ပါတယ်။

    အဲ့ဒီဒုက္ခသည်စခန်းမှာနေထိုင်သူတွေဟာ ယိုးချောင်းအထက်ပိုင်းမှာရှိတဲ့ ကျေးရွာပေါင်း သုံးရွာက မြိုလူမျိုးတွေဖြစ်ကြပြီး အိမ်ထာင်စုပေါင်း ၉၄ စု လူဦးရေ ၄၀၀ ကျော်နေထိုင်နေကြတဲ့ စခန်းတစ်ခုဖြစ်ပါတယ်။

    

    ဓာတ်ပုံ ရင်းမြစ်, CJ

14. ၁၈ ဇန်နဝါရီ ၂၀၂၂ရန်ကုန်မှာ စက်သုံးဆီစျေးတွေတက်

    ရန်ကုန်မှာ တစ်ပတ်အတွင်း စက်သုံးဆီစျေးတွေ သိသိသာသာတက်လာကြောင်းရန်ကုန်မြို့ခံတစ်ဦးက ဘီဘီစီကို ပြောပါတယ်။

    အခု ရက်သတ္တပတ်အတွင်းကစပြီး စက်သုံးဆီစျေးတွေ သိသိသာသာ တက်လာတာဖြစ်တယ်လို့ သူကပြောပါတယ်။

    ပြီးခဲ့တဲ့တစ်ပတ်က အိမ်စီးကားတွေ အသုံးများတဲ့ ၉၂ တစ်လီတာကို ၁၄၄၅ ကျပ်ကနေ ၁၅၄၀ ကျပ်ခန့်ဖြစ်လာပြီး အရင် တစ်လီတာကို ကျပ် ၁၅၀၀ ဝန်းကျင်စျေးရှိတဲ့ ၉၅ တစ်လီတာကို ၁၅၉၅ ခန့်အထိစျေးတက်လာကြောင်း ဒီဇယ်စျေးလည်း စျေးတက်လာကြောင်း သူကပြောပါတယ်။

    စက်သုံးဆီတွေ စျေးတက်လာကြောင့် သယ်ယူပို့ဆောင်ရေးစရိတ်တွေ အခုထက်မြင့်လာမှာကို စိုးရိမ်နေကြတယ်လို့လည်း ရန်ကုန်မြို့ခံတွေက ပြောပါတယ်။

    အမေရိကန်ဒေါ်လာ ၁၅ သန်းကို ပြီးခဲ့တဲ့ရက်ပိုင်းက စစ်ကောင်စီ ဗဟိုဘဏ်က ၁၇၇၈ ကျပ်နဲ့ လေလေံစျေးနဲ့ ထုတ်ရောင်းပေးခဲ့တာရှိပါတယ်။

    စက်သုံးဆီစျေးတက်တဲ့ အတွက် ရန်ကုန်က တက္ကစီ ကားခတွေ လေးပုံ တစ်ပုံခန့် အရင်ထက်စျေးတက်လာကြောင်းနဲ့ လက်လီကုန်စျေးနူန်းတွေထဲမှာလည်း အသီးအရွက်တွေစျေးတက်လာပြီး ခရမ်းချဥ်သီး အစိမ်း ၄ လုံး ၅၀၀၊မုန့်လာဥနီတစ်တောင့် ၈၀၀ ခန့်အထိစျေးပေါက်နေကြောင်း ရန်ကုန်မြို့ခံတစ်ဦးက ပြောပါတယ်။

    

    ဓာတ်ပုံ ရင်းမြစ်, CJ

15. ၁၈ ဇန်နဝါရီ ၂၀၂၂စစ်ကောင်စီက မြိတ်မှာ ဒေါ်လာ သန်း (၃၀၀) ခန့်ရင်းနှီးပြီးငါးလေလံစျေး တစ်ခုလုပ်ဖို့ စီစဥ်နေ

    စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ရဲ့ ဇန်နဝါရီ (၁၅)ရက်က တနင်္သာရီတိုင်း၊ မြိတ်မြို့ခရီးစဉ်မှာ ငါးလေလံစျေးနဲ့ စက်မှုဇုန်တည်ဆောက်ရေးအတွက် မြေနေရာသတ်မှတ်ပေးခဲ့ပြီး ငါးလေလံစျေး တစ်ခုလုပ်ဖို့စီစဥ်နေတယ်လို့ သိရပါတယ်။

    ဒီစီမံကိန်းကို အမေရိကန်ဒေါ်လာ သန်း ၃၀၀ ခန့်ရင်းနှီးမြုပ်နှံကာ လုပ်ဆောင်မှာဖြစ်ပြီး တနင်္သာရီတိုင်းငါးလုပ်ငန်းအဖွဲ့ချုပ်ဥက္ကဋ္ဌ ဦးလှသန်းရဲ့ မြိတ်အများပိုင်ကော်ပိုရေးရှင်းကုမ္ပဏီကနေ ဦးစီးလုပ်ဆောင်နေတာဖြစ်ပါတယ်။

    ဦးလှသန်းဟာ မြိတ်မြို့မှာ လူသိများတဲ့ လုပ်ငန်းရှင်တစ်ဦးဖြစ်ပြီးတော့ စစ်ကောင်စီ ဥက္ကဋ္ဌနဲ့ နီးစပ်တဲ့ ဆက်ဆံရေးရှိသူတစ်ဦးလို့ မြိတ်ဒေသခံတစ်ဦးက ပြောပါတယ်။

    မြိတ်မြို့နယ်၊ စန္ဒဝတ်ကျေးရွာက စိုက်ပျိုးရေးမလုပ်တော့တဲ့ လယ်ယာမြေ ဧက (၇၀၀)ကို စီမံကိန်းစဖို့ ပထမအဆင့်အနေနဲ့ မြေနေရာချထားပေးတာလို့ ဆိုပါတယ်။

    ဒါပေမဲ့ ပြင်သစ်နဲ့ပူးပေါင်းလုပ်ဆောင်ထားတဲ့ အပြည်ပြည်ဆိုင်ရာငါးလေလံစျေးကြီးတခုဟာလည်း မြိတ်မြို့၊အင်းလေးမြိုင်စက်မှုဇုန်မှာ လွန်ခဲ့တဲ့ နှစ် (၂၀)ကျော်ထဲက ရှိထားပြီးဖြစ်ပါတယ်။

    ထိုင်းကိုရောက်နေတဲ့ မြန်မာ့ငါးစျေးကွက်ကို မြန်မာပြည်ပြန်ရောက်အောင်ဆိုတဲ့ ရည်ရွယ်ချက်တွေနဲ့ အပြည်ပြည်ဆိုင်ရာ ငါးလေးလံ စျေးကြီးဖွင့်လှစ်ထားပေမယ့် ဒေသသုံးငါးလေလံစျေးအဖြစ်သာ ရှိနေပါတယ်။

    လက်ရှိမှာတော့ အာဏာသိမ်းပြီးနောက် မြိတ်ငါးလုပ်ငန်းတွေမှာ ထိုင်းနိုင်ငံရနောင်းဘက်ကို တင်ပို့ရောင်းချတဲ့နေရာမှာ ပုံမှန်အတိုင်းလည်ပတ်နေပေမယ့်လည်း တနိုင်တပိုင် ဒေသငါးစျေးကွက်မှာတော့ စက်သုံးဆီ စျေးတက်တာ၊ အချိန်ကန့်သတ်ချက်တွေနဲ့ အလုပ်လုပ်နေရတဲ့ အခက်အခဲတွေရှိနေပါတယ်။

    ဒီလို အပြည်ပြည်ဆိုင်ရာ ငါးလေလံစျေးနဲ့ စက်မှုဇုန်သစ်တည်ဆောက်ဖို့ကို အရင်NLD အစိုးရလက်ထက် ကတည်းက တင်ပြခဲ့ပေမယ့် ခွင့်ပြုခဲ့ခြင်းမရှိသေးဘဲ အခုစစ်ကောင်စီလက်ထက် ၂၀၂၁မှသာ ခွင့်ပြုပေးခဲ့ တာလည်းဖြစ်ပါတယ်။

    

    ဓာတ်ပုံ ရင်းမြစ်, MWD

16. ၁၈ ဇန်နဝါရီ ၂၀၂၂ဖိအားပေးပြီး နေရပ်ပြန်ခိုင်းမှာကို ထိုင်းဘက်ခြမ်းရောက် လေးကေ့ကော်စစ်ရှောင်တွေ စိုးရိမ်နေ

    လေးကေကော် ဒေသ တွင်း တိုက်ပွဲကြောင့် ထိုင်းနိုင်ငံဘက်ခြမ်းကို ထွက်ပြေးခိုလှုံနေရတဲ့ ဒေသခံ တွေကို မြန်မာပြည်ဘက်ကို ပြန်ကြဖို့ ထိုင်း-မြန်မာအာဏာပိုင်တွေက ဖိအားပေးလာမှာကို စိုးရိမ်နေတယ်လို့ ထိုင်းနိုင်ငံဘက်အခြမ်း နွားမွေးမြူရေး ခြံ အတွင်း ယာယီ ခိုလှုံနေထိုင်သူ စစ်ရှောင်တွေက ပြောပါတယ်။

    လေးကေကော် တိုက်ပွဲကြောင့် ဖလူးလေးကျေးရွာတစ်ဘက်ကမ်း ထိုင်းနိုင်ငံ မဲ့ကိုကင်း နွားမွေးမြူရေးခြံ အတွင်း ခိုလှုံနေတဲ့ မြန်မာစစ်ဘေးရှောင် ၁၅၀၀ ကျော် ကျန်ရှိနေပါတယ်။

    အဲဒီစစ်ဘေးရှောင်တွေကို မြဝတီက ရွှေ့ပြောင်းလုပ်သား ယာယီ နားနေဆောင် (ကျောက်လုံးကြီး စခန်း) ကို ပို့ဆောင်ပြီး ကိုဗစ်ပိုးရှိမရှိ စစ်ဆေးခြင်းနဲ့ ကိုယ်ရေးအချက်အလက်များ စစ်ဆေးပြီး နေရပ်ပြန်ဖို့ ကျေးရွာအုပ်ချုပ်ရေး တာဝန်ရှိသူများ လာရောက် ခေါ်ဆောင်တဲ့ အစီအစဉ်နဲ့ နေရပ်ပြန်လည်နေထိုင်ရမယ်ဆိုတဲ့ သတင်းတွေကြောင့် ခုလို စိုးရိမ်ပူပန်နေတာဖြစ်တယ်လို့စစ်ရှောင်တစ်ဦးက ပြောပါတယ်။

    

    ဓာတ်ပုံ ရင်းမြစ်, CJ

    “မနေ့က ကျွန်တော်တို့ ထိုင်းဘက် နွားခြံ စစ်ရှောင်စခန်း မှာ နေခွင့် ပေးထားတဲ့ ထိုင်းဘက် နွားခြံ သူဌေး က လက်ကိုင်စပီကာနဲ့ လာပြောတယ်။ မြန်မာဘက်ကို ပြန်လို့ ရပြီပေါ့နော်။ စစ်ရှောင်တွေ က မပြန်ရဲဘူးပြောတော့ သူတို့ အစီအစဉ်က မြဝတီဘက် စစ်ကောင်စီ အုပ်ချုပ်ရေးပိုင်း ရဲ့ စီစဉ်မှုနဲ့ မြဝတီ ကျောက်လုံးကြီး စခန်းကို တစ်နေ့ လူတစ်ရာ ပြန်ပို့မယ်၊ အဲဒီမှာ တစ်ပတ် လောက်ထားမယ်။ ကိုဗစ်စစ်မယ်။ ဆေးထိုးမယ်။ စစ်ရှောင် အချက်အလက်တွေမေးမြန်း စိစစ်မယ်။ ပြီးရင် ကိုယ်နေတဲ့ ရွာ ဘက်ကို အုပ်ချုပ်ရေးမှူးတို့ သူကြီး တို့ လာခေါ်ရင် အစုလိုက်ပြန်ပို့ မယ် ဆိုတာမျိုး ပြောတော့ ကျွန်တော်တို့တော့ အဲဒီ အစီအစဉ်အတိုင်း မပြန်ရဲဘူး ။ အများစု က ဖမ်းမှာ စစ်ဆေးမှာတွေ ကြောက်ရပါတယ်။ ရွာပြန်လို့ လည်း မိုင်းထောင်ထားမလား ၊ စစ်တပ်တွေ ရှိနေတော့ ပေါ်တာ ခေါ်ခိုင်းမလား၊ တွေးပြီး ကြောက်နေကြတယ်။ တချို့ကတော့ စစ်ဘေးရှောင် ကူညီ နေတဲ့ အဖွဲ့ တွေ ဆီ တခြား နေရာ ထပ်ရွေ့ နေဖို့ အကူအညီ တောင်းခံ တာတွေ လုပ်နေတယ် ဟု နွားခြံ အတွင်း ခိုလှုံ နေထိုင်သူ တစ်ဦးကပြောပါတယ်။

    

    ဓာတ်ပုံ ရင်းမြစ်, CJ

    မြန်မာထိုင်းနယ်စပ်၊ မြဝတီခရိုင်၊ လေးကေ့ကော်မြို့မှာ စစ်ကောင်စီတပ်တွေနဲ့ ကရင်အမျိုးသားလွတ်မြောက်ရေးတပ် KNU/KNLA ၊ ဒေသကာကွယ်ရေးတပ် PDF ပူးပေါင်းတပ်ဖွဲ့တွေ တိုက်ပွဲဖြစ်ပွားတာ တစ်လကျော်ကြာပြီဖြစ်ပါတယ်။

    ထိုင်းနိုင်ငံဘက်ခိုလှုံ နေသူ စစ်ရှောင် ၃ထောင်ခန့်အနက် အရင်ရက်တွေတုန်းက မြန်မာဘက်သို့ ကရင်နယ်ခြားစောင့်တပ် BGF တာဝန်ရှိသူ ဗိုလ်မှူးမုတ်သုန် အစီအစဉ်နဲ့ လူ၅၀၀ ကျော် မြဝတီဘက်မှ တစ်ဆင့် ပြန်လည်ဝင်ရောက် နေရပ်ပြန်ကြတာရှိပါတယ်။ ဒါပေမဲ့ ဇန်နဝါရီလ ၃ ရက်က ဖလူးလေးကျေးရွာမှာ ပြန်လည် နေထိုင်သူ အမျိုးသမီးတစ်ဦး လက်နက်ကြီး ထိမှန် သေဆုံး သည့် ဖြစ်စဉ် နောက်ပိုင်း တိုက်ပွဲ ဖြစ်ထားတဲ့ ကျေးရွာတွေ-ဘက်သို့ ပြန်လည်နေထိုင်သူ အနည်းအကျဉ်း သာရှိပြီး စစ်ဘေး လွတ်ရာ ဒေသ မြို့ရွာ များ ဘက်သို့ ရှောင်တိမ်းနေထိုင် ရန် ပြောင်းရွှေ့သွားကြကြောင်း စစ်ဘေးရှောင်တွေကပြောပါတယ်။

17. ၁၈ ဇန်နဝါရီ ၂၀၂၂မြန်မာ တရုတ်နယ်စပ်ဂိတ်တစ်ခု ထပ်ဖွင့်

    ကိုဗစ် ကပ်ရောဂါကြောင့် ခြောက်လကြာယာယီပိတ်ထားပြီးနောက်မြန်မာနဲ့ တရုတ်နယ်စပ်က လွယ်ဂျယ်-လိုင်းရင်းနယ်စပ်ဂိတ်ကို ဇန်နဝါရီလ ၁၇ ရက်နေ့မှာ ပြန်လည်ဖွင့်လှစ်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ပါတယ်။

    ဒီဂိတ်ကို စမ်းသပ်ဖွင့်လှစ်တဲ့ ကာလအတွင်းမှာ မြန်မာနိုင်ငံဘက်က တရုတ်နိုင်ငံကို ကြံနဲ့ တစ်သျှူးငှက်ပျောတို့ တင်ပို့မှာဖြစ်ပြီး တရုတ်နိုင်ငံဘက်က ဓာတ်မြေသြဇာ၊ အထည်အလိပ်နဲ့ အိမ်သုံးကုန်ပစ္စည်းအမျိုးမျိုးတို့ကို တင်ပို့မှာဖြစ်တယ်လို့ ဖော်ပြထားပါတယ်။

    မြန်မာနိုင်ငံမှာ ကိုဗစ်-၁၉ ရောဂါ ဖြစ်ပွားမှုများလာတဲ့ ဇူလိုင်လဆန်းက စလို့ တရုတ်နိုင်ငံက နှစ်နိုင်ငံနယ်စပ် ကုန်သွယ်ရေးဂိတ်တွေကို ပိတ်ထားလိုက်သလို နယ်စပ်ကုန်သွယ်ရေးမြို့တွေကိုလည်း လော့ဒေါင်းချထားခဲ့တာ ဖြစ်ပါတယ်။

    အဲ့ဒီအချိန်ကတည်းက လွယ်ဂျယ်-လိုင်းရင်းဂိတ်မှာ ပိတ်မိနေတဲ့ ကုန်တင်ယာဉ်တွေကို ဦးစားပေးသွားလာခွင့်ပြုမယ်လို့လည်း ဖော်ပြထားပါတယ်။

    ကိုဗစ်ကူးစက်မှုတွေကြောင့် မြန်မာနဲ့နယ်စပ်ကုန်သွယ် ရေးကို တရုတ်ဘက်က ကာလရှည်ပိတ်ပြီးတဲ့နောက် ရှမ်းပြည်နယ်မြောက်ပိုင်း မူဆယ်မြို့မှာရှိတဲ့ ကျင်စန်းကျော့ဂိတ်ကို နိုဝင်ဘာလ ၂၂ ရက်မှာ ပြန်ပြီးဖွင့်ပေးခဲ့တာပါ။

    ဒါပေမဲ့ ကိုဗစ်အကန့်အသတ်တွေကို တရုတ်ဘက်က ထပ်ပြီးတိုးလိုက်တဲ့အတွက် ပိုးသတ် ဆေးဖြန်းခတွေ၊ ကွန်တိန်သေတ္တာနဲ့ ကုန်ကားငှားရမ်းခတွေ၊ ကရိန်းဆွဲခတွေ ဒါတွေကို မြန်မာဘက်ကျခံရပြီး အရင်ကထက် ကုန်ကျစရိတ် နှစ် ဆလောက် ပိုလာတယ်လို့ မြန်မာကုန်သည်တွေက ပြောပါတယ်။

    

    ဓာတ်ပုံ ရင်းမြစ်, Chinese Embassy Myanmar

18. ၁၈ ဇန်နဝါရီ ၂၀၂၂နန်းတွင်းစစ်ကြောရေးရောက်နေတဲ့ ဆရာ၊ဆရာမ ၄ ဦး မိသားစုနဲ့အဆက်အသွယ် ပြတ်တောက်နေတယ်လို့ပြော

    မန္တလေးနန်းတွင်းစစ်ကြောရေးမှာရောက်နေတဲ့ ဆရာ၊ဆရာမ ၄ ဦးဟာ ဖမ်းဆီးပြီးနောက်ပိုင်း မိသားစုနဲ့အဆက်အသွယ်ပြတ်တောက်နေတယ်လို့ ပညာရေးဝန်ထမ်းများ အထွေထွေသပိတ်ကော်မတီ(BEGSC)က မနေ့ဇန်နဝါရီ၁၇ ရက်က သတင်းထုတ်ပြန်လာပါတယ်။

    အခြေခံပညာရေးဝန်ထမ်းများ၊အထွေထွေသပိတ်ကော်မတီရဲ့ ဗဟိုကော်မတီဝင်တွေဖြစ်တဲ့ ဆရာဦးနောင်ထက်အောင်၊ ဆရာမဒေါ်သက်ဆုလှိုင်နဲ့ဆရာဦးနိုင်သီဟကျော်အပါအဝင် မန္တလေး မန္တလေးတက္ကသိုလ်ကျောင်းသားများသမဂ္ဂမှ ကိုရန်ပိုင်စိုး တို့ဟာ ပြီးခဲ့တဲ့ နှစ်အောက်တိုဘာလထဲမှာဖမ်းဆီးခံလိုက်ရတာဖြစ်တယ်လို့သပိတ်ကော်မတီကပြောပါတယ်။

    ဖမ်းဆီးခံဆရာ၊ဆရာမတွေကို မန္တလေးနန်းတွင်းစစ်ကြောရေးမှာရောက်နေတယ်လို့သတင်းတွေထွက်ပေါ်ခဲ့ပြီး နောက်ပိုင်း ရက်ပေါင်း ၇၀ ကျော်တဲ့အထိ မိသားစုက အဆက်အသွယ်မရတာကြောင့် စိတ်ပူစိုးရိမ်မှုတွေရှိနေတယ်လို့လည်း သပိတ်ကော်မီရဲ့ထုတ်ပြန်ချက်မှာပါရှိပါတယ်။

    “ မန္တလေးနန်းတွင်းစစ်ကြောရေးမှာဖဖ်းထားတဲ့ ခေါင်းဆောင်တစ်ယောက်ကို ခန္တာကိုယ်အောက်ပိုင်းကို ထိခိုက်အောင်လုပ်ပြီးနှိပ်စက်တယ်လို့ သတင်းတွေထွက်ပေါ်လာတော့ ဖဖ်းဆီးခံထားရတဲ့ ကျွန်တော်တို့အဖွဲ့တွေကို စိတ်ပူပါတယ်။ စစ်ကောင်စီရဲ့စစ်ကြောရေးမှာ လူ့အခွင့်အရေးချိုးဖောက်ခံနေရတာတွေ အမြဲတမ်းလိုလိုကြားနေရတော့ အသက်အန္တာရာယ်ကိုအားလုံးက စိတ်ပူနေကြတယ်လို့” ပညာရေးဝန်ထမ်းများ အထွေထွေသပိတ်ကော်မတီ(BEGSC)က တာဝန်ရှိသူကပြောပါတယ်။

    ပြည်တွင်းမှာ အာဏာသိမ်းပြီးတဲ့နောက်ပိုင်း စစ်အာဏာရှင်ဆန့်ကျင်ရေး သပိတ်စစ်ကြောင်းတွေနဲ့ CDM လှုပ်ရှားမှုမှာပါဝင်တဲ့ ပညာရေးဝန်ထမ်း ၁၀၀ ဝန်းကျင်လောက်ဖမ်းဆီးထိန်းသိမ်း ခံထားရတယ်လို့လည်း သပိတ်ကော်မတီရဲ့ပြောပြချက်အရသိရပါတယ်။

    

    ဓာတ်ပုံ ရင်းမြစ်, BEGSC - CEC

19. ၁၈ ဇန်နဝါရီ ၂၀၂၂မုံရွာ၊ လယ်ဇင်ကျေးရွာကို စစ်ကောင်စီတပ်တွေဝင်ရောက်ပစ်ခတ်မှုကြောင့် သေဆုံးတဲ့ ဒေသခံ ၄ ဦးကို ဒီကနေ သင်္ဂြိုဟ်, ဒေသခံတွေရွာလုံးကျွတ်ထွက်ပြေးတိမ်းရှောင်နေရ

    စစ်ကိုင်းတိုင်းဒေသကြီး၊ မုံရွာမြို့နယ်၊ လယ်ဇင်စံပြကျေးရွာကို မနေ့ဇန်နဝါရီ ၁၇ ရက်နေ့က စစ်ကောင်စီတပ်တွေဝင်ရောက်ပစ်ခတ်ခဲ့ပြီး ရွာသား ၄ ဦးသေဆုံးခဲ့တယ်လို့ဒေသခံတွေက ပြောပါတယ်။

    မနေ့ညနေပိုင်းကစပြီးလယ်ဇင်ကျေးရွာအတွင်းကို စစ်ကောင်စီတပ်တွေ ရုတ်တရက်ဝင်ရောက်ခဲ့တာဖြစ် ပစ်ခတ်မှုတွေလုပ်ခဲ့သလို လယ်ဇင်ကျေးရွာအတွင်းက နေအိမ်တချို့နဲ့အနီးက သက္ကယ်ကျင်းကျေးရွာက နေအိမ်တချိုု့ကိုပါမီးရှို့ဖျက်စီးခဲ့တယ်လို့ ဒေသခံတွေကပြောပါတယ်။

    “ ရွာထဲကိုစစ်ကောင်စီ ၃ဖွဲ့လောက်ပိတ်ဆို့ပြီးဝင်လာတယ်၊ လက်နက်ကြီးနဲ့ပစ်တယ်။ လာပြီဆိုပြေးဖို့ပဲစဉ်းစားတော့ပြေးကြတာ၊ လေးယောက်ကတော့ဖမ်းသွားပြီး နားထင်ကိုသေနတ်နဲ့ပစ်သွားတာမျိုးတွေ ့ရတယ်။ အနီးကနေ မေးမြန်းပြီးကပ်ပစ်တဲ့ပုံတွေ့ရပါတယ်။ အလောင်းသွားကောက်တဲ့အခါ အဲ့ဒီလိုပုံစံတွေ့ရတယ်။ ၅ယောက်ကိုတော့အရှင်ဖမ်းသွားတယ်။ အလောင်းတွေကိုတော့ ဒီကနေ့(ဇန်နဝါရီ ၁၈)မှာ သင်္ဂြိုဟ်ပါမယ် “ လို့ဒေသခံတစ်ဦးက ဘီဘီစီကိုပြောပါတယ်။

    လယ်ဇင်စံပြကျေးရွာဟာ မုံရွာနဲ့၂ မိုင်ကျော်လောက်ဝေးပြီး အိမ်ခြေ ၁၀၀၀ လောက်ရှိတဲ့ ရွာကြီးတရွာဖြစ်ပြီး စစ်အာဏာသိမ်းပြီးနောက်ပိုင်းကျေးရွာအတွင်းကို စစ်ကောင်စီ တပ်တွေဝင်ရောက်တာတွေရှိခဲ့ပေမယ့် အခုလို ဒေသခံတွေသေဆုံးမှုကတော့ ပထမဆုံးဖြစ်တယ်လို့ ရွာသားတွေကပြောပါတယ်။

    လက်ရှိမှာတော့ လယ်ဇင်ကျေးရွာနဲ့သက္ကယ်ကျင်းကျေးရွာတွေကဒေသခံတွေအားလုံးနီးပါး ထွက်ပြေးတိမ်းရှောင်နေရတယ်လို့ဒေသခံတွေကပြောပါတယ်။

    ဒေသအခြေစိုက်စစ်ကောင်စီတပ်တွေရဲ့သတင်းထုတ်ပြန်မှုမှာတော့ လယ်ဇင်ကျေးရွာက ဒေသကာကွယ်ရေး တပ်စခန်းတစ်ခုကို ဝင်ရောက်ဖမ်းဆီးခဲ့ပြီး PDF ၃ ဦးသေဆုံးပြီး ၅ ယောက်ဖမ်းဆီးရမိတယ်ဆိုပြီး ထုတ်ပြန်ထားတာတွေ့ရပါတယ်။

    

    ဓာတ်ပုံ ရင်းမြစ်, CJ

20. ၁၈ ဇန်နဝါရီ ၂၀၂၂အာဆီယံရဲ့ပထမဆုံးအစည်းအဝေးကိုရွှေ့ဆိုင်းပြီးနောက်မြန်မာ့အရေးနဲ့ပတ်သက်ပြီး သဘောထားကွဲလွဲမှုတွေဖြစ်နေ

    မြန်မာစစ်ခေါင်းဆောင်နဲ့ ထိတွေ့ဆက်ဆံမှုနဲ့ပတ်သက်လို့ အာဆီယံအဖွဲ့ကြီးအတွင်း သဘောထားကွဲလွဲမှုတွေဖြစ်ပေါ်နေတယ်လို့ သံတမန်တွေနဲ့ အစိုးရအရာရှိတွေကိုကိုးကားပြီး ရိုက်တာက ရေးသားထားပါတယ်။ ဒီတပတ်ထဲ ပြုလုပ်မယ့်အာဆီယံနိုင်ငံခြားရေးဝန်ကြီးများအစည်းအဝေးကိုလည်း ရွှေ့ဆိုင်းရတဲ့အထိဖြစ်ခဲ့ပါတယ်။ မြန်မာနိုင်ငံမှာ စစ်တပ်က အာဏာသိမ်းပြီး ဆန္ဒပြလူထုကို အသက်သေဆုံးတဲ့အထိ အင်အားသုံးနှိမ်နင်းမှုတွေ ပြုလုပ်ခဲ့တဲ့နောက် မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို အာဆီယံခေါင်း ဆောင်တွေရဲ့အစည်းအဝေးကနေ ဖယ်ထုတ်ခဲ့ပြီး အဲဒီဆုံးဖြတ်ချက်နဲ့ပတ်သက်လို့ ၂၀၂၁ခုနှစ် နှစ်ကုန်ပိုင်းမှာ အာဆီယံခေါင်းဆောင်တွေကြား ထပ်ပြီးတော့ သဘောထားကွဲလွဲမှုတွေ ဖြစ်လာတာဖြစ်ပါတယ်။ မြန်မာက အာဆီယံအစည်းအဝေးတွေတက်ရောက်ခွင့်နဲ့ ပတ်သက်ပြီး သဘောထားကွဲလွဲမှုတွေဆက်ရှိနေသေးတယ်လို့ အင်ဒိုနီးရှား နိုင်ငံခြားရေး ဝန်ကြီးဌာန ပြောရေးဆိုခွင့်ရှိသူAbdul Kadir Jailani က ပြောပါတယ်။

    “ ကွဲပြားနေတဲ့အမြင်တွေကို စုစည်းဖြေရှင်းဖို့ အချိန်လိုသေးတယ်ဆိုတာ ဝန်ခံရပါမယ် ” လို့ အင်ဒိုနီးရှား နိုင်ငံခြားရေးဝန်ကြီးဌာနရဲ့ အာရှ၊ ပစိဖိတ်နှင့် အာဖရိကရေးရာ ညွှန်ကြားရေးမှူးချုပ် Jailani က သတင်းထောက်တွေကို ပြောခဲ့တယ်လို့ ရိုက်တာသတင်းကဖော်ပြပါတယ်။ကမ္ဘောဒီးယားမှာကျင်းပမယ့် နိုင်ငံခြားရေးဝန်ကြီးများ အစည်းအဝေးကို အာဆီယံနိုင်ငံခြားရေးဝန်ကြီးအချို့က အိုမီခရွန်ကူးစက်မှုတွေကြောင့် ခရီးသွားဖို့ အခက်အခဲရှိကြောင်းအကြောင်းပြတဲ့အတွက် ရွှေ့ဆိုင်းထားတာပါ။

    လက်ရှိအာဆီယံဥက္ကဋ္ဌ ကမ္ဘောဒီးယားဝန်ကြီးချုပ်ရဲ့ မြန်မာခရီးစဉ်နောက်မှာ စစ်ကောင်စီရဲ့နိုင်ငံခြားရေးဝန်ကြီး ဦးဝဏ္ဏမောင်လွင်ကို အာဆီယံအစည်းအဝေး တက်ရောက်ဖို့ဖိတ်ကြားခဲ့တဲ့နောက် အခုလိုဖြစ်လာတာလို့ သံတမန် အသိုင်းအဝိုင်းကသုံးသပ်ထားကြတာပါ။မကြာသေးမီရက်ပိုင်းအတွင်းက မလေးရှားနိုင်ငံခြားရေးဝန်ကြီး Saifuddin Abdullah နဲ့ စင်ကာပူဝန်ကြီးချုပ် Lee Hsien Loong တို့ကလည်း မြန်မာ့အကျပ်အတည်းကို ဖြေရှင်းဖို့ သဘောတူညီထားတဲ့ အာဆီယံဘုံ သဘောတူညီချက်ငါးရပ်ကိုအကောင်ထည်ဖော်မှုမှာတိုးတက်မှုမရှိတာကြောင့် စစ်ခေါင်းဆောင်ကို အာဆီယံအစည်းအဝေးကို မဖိတ်ကြားသင့်ကြောင့် ဆက်လက်ရပ်တည်ကန့်ကွက်ထားကြပါတယ်။

    အလားတူပါပဲ ဖိလစ်ပိုင်နိုင်ငံခြားရေးဝန်ကြီး လော့ဆင်ကလည်း အာဆီယံဘုံသဘောတူညီချက် ၅ချက်ကို အကောင်အထည်ဖော်ဖို့ကိုသာတွန်းအားပေးမှာဖြစ်ပြီး ဒေါ်အောင်ဆန်းစုကြည်ဟာ မြန်မာ့အရေးဆွေးနွေးမှုတွေမှာ မရှိမဖြစ်လိုအပ်တယ်လို့ ပြောကြားထားတာပါ။အာဆီယံအလှည့်ကျဥက္ကဋ္ဌ ကမောဒီးယားဝန်ကြီးချုပ်ဟွန်ဆန်ဟာ မြန်မာနိုင်ငံကို ဇန်နဝါရီ ၇ ရက်နဲ့ ၈ ရက်နေ့မှာ သွားရောက်ခဲ့ပြီး သူ့ရဲ့ခရီးစဉ်ဟာ မြန်မာမှာ အာဏာသိမ်းပြီးတစ်နှစ်အတွင်း ပြည်ပခေါင်းဆောင်တစ်ဦးရဲ့ ပထမဆုံး ခရီးစဉ်လည်းဖြစ်ခဲ့ပါတယ်။

    သူ့ခရီးစဉ်နဲ့ပတ်သက်ပြီး အာဆီယံနဲ့ တိုင်ပင်ဆွေးနွေးခဲ့ခြင်းမရှိတဲ့အပေါ် စိုးရိမ်ကြောင်းမလေးရှားနိုင်ငံခြားရေးဝန်ကြီးက ပြောကြားထားပါတယ်။ ဒါ့အပြင် စင်ကာပူဝန်ကြီးချုပ် လီရှန်လွန်းကလည်း အာဆီယံဥက္ကဋ္ဌအနေနဲ့ စစ်တပ်၊ NLD အပါအဝင် သက်ဆိုင်သူအားလုံးနဲ့ စေ့စပ်ဆွေးနွေးဖို့လိုကြောင်း ဝန်ကြီးချုပ်ဟွန်ဆန်ကို အလေးပေးပြောကြားထားပါတယ်။

    

    ဓာတ်ပုံ ရင်းမြစ်, Getty Images