တာမွေ၊ မေတ္တာညွန့်ရပ်ကွက်ထဲ စစ်ကောင်စီတပ်တွေ ပစ်ခတ်၊ရှာဖွေနေ

တိုက်ရိုက် ထုတ်လွှင့်ချက်

1. ၂၀ ဇွန် ၂၀၂၁စစ်တွေမြို့ပေါ်မှာ ပစ်ခတ်မှုကြောင့် အမျိုးသားတစ်ဦးသေဆုံး

   ရခိုင်ပြည်နယ်မြို့တော်စစ်တွေမှာ ဇွန်လ ၁၉ ရက် မနေ့ကညနေပိုင်း ၅ နာရီခန့်လောက်မှာ သေနတ်ပစ်ခတ်မှုတစ်ခုဖြစ်ပွားခဲ့ပြီး အပစ်ခံရသူ အမျိုးသားတစ်ဦး ပွဲချင်းပြီး သေဆုံးခဲ့တယ်လို့ သိရပါတယ်။

   သေဆုံးခဲ့သူဟာ မြို့ပေါ်ရပ်ကွက်တစ်ခုဖြစ်တဲ့ ရွာကြီးမြောက်ရပ်ကွက်မှာနေထိုင်ပြီး လက်သမားအလုပ်နဲ့ အသက်မွေးတဲ့ အသက် ၅၂ နှစ်အရွယ် ဦးညွန့်စိုးအောင်ဖြစ်ပါတယ်။

   ပစ်ခတ်မှုဖြစ်ခဲ့တဲ့နေရာဟာ အဲဒီရပ်ကွက်ထဲက ဦးစိုးညွန့်အောင်ရဲ့ နေအိမ်အနီး ဖြစ်ပါတယ်။ မနေ့ကညနေပိုင်းမှာ သေနတ်ကိုင်လူတစ်စုရောက်ရှိလာပြီး ပစ်ခတ်သွားတာလို့ မိသားစုဝင်တွေက ပြောပါတယ်။

   ပစ်ခတ်မှု မဖြစ်ခင် မိနစ်ပိုင်းလောက်က ဦးစိုးညွန့်အောင်ရဲ့တူတော်စပ်သူကို လူနှစ်ဦးကနေအိမ်ထဲဝင်ပြီး ဖမ်းဆီးစဉ် ဦးစိုးညွန့်အောင်အပါအဝင် မိသားစုတွေကတားဆီးခဲ့ကြတဲ့အတွက် မဖမ်းဆီးနိုင်ခဲ့တာကြောင့် မကြာခင်မှာဘဲ နောက်ထပ်တစ်ကြိမ် လူ ၈ ဦးရောက်ရှိလာခဲ့ကာ ဦးစိုးညွန့်အောင်ကို သေနတ်နဲ့ ပစ်သွားခဲ့တာဖြစ်တယ်လို့ မိသားစုတွေက ပြောပါတယ်။

   ဦးစိုးညွန့်အောင်ရဲ့ တူဖြစ်သူဟာ လက်နက်ကိုင်အဖွဲ့အစည်းတစ်ခုဆီမှာ ဖမ်းဆီးခံလိုက်ရပြီး အခုရက်ပိုင်းအတွင်း ထွက်ပြေးလွတ်မြောက်လာတာကြောင့် အဲ့ဒီလက်နက်ကိုင်အဖွဲ့က မနေ့ကညနေပိုင်းမှာ နေအိမ်အထိ လာပြန်ဖမ်းချိန်မှာ မိသားစုတွေက တားဆီးခဲ့ကြတာဖြစ်တယ်လို့ မိသားစုဝင်တွေက ပြောထားပါတယ်။

   ရပ်ကွက်ထဲနေထိုင်သူတွေကတော့ ဦးစိုးညွှန့်အောင်ဟာ မိသားစုနဲ့အတူ လက်သမားအလုပ်ကို ရိုးရိုးသားသားလုပ်ကိုင်စားနေ‌သူတစ်ယောက်ဖြစ်တယ်လို့ မှတ်ချက်ပေးကြပါတယ်။

   ဦးစိုးညွန့်အောင် သေဆုံးမှုနဲ့ပတ်သက်လို့ သေနတ်ဖြင့်ပစ်ခတ်ခဲ့သူတွေကို မြို့နယ်ရဲတပ်ဖွဲ့က စုံစမ်းနေပြီလို့လည်း သိရပါတယ်။

   အခုလို သေနတ်ပစ်ခတ်မှုတွေဟာ ပြည်နယ်အစိုးရ ရုံးစိုက်တဲ့စစ်တွေမြို့ပေါ်မှာ အရင်ကလည်း ဖြစ်ခဲ့ဖူးပေမဲ့ ဖြစ်စဉ်တိုင်းမှာ ကျူးလွန်သူတွေကို ဖမ်းဆီးနိုင်တာမျိုး မရှိသေးပါဘူး။

   ပြီးခဲ့တဲ့ ၂၀၁၉ ခုနှစ်၊ အောက်တိုဘာလ ၃ ရက်နေ့ညကလည်း အေးငြိမ်းအထူးကုဆေးခန်းပိုင်ရှင် ဦးညီညီဟာ ဆေးခန်းကနေ ကျောင်းတက်လမ်းမှာရှိတဲ့သူ့ရဲ့နေအိမ်ကို သုံးဘီးဆိုင်ကယ်နဲ့ပြန်လာတုန်း လက်နက်ကိုင်နှစ်ယောက်ရဲ့ ပစ်ခတ်တာခံခဲ့ရတဲ့အတွက် ဒဏ်ရာအပြင်းအထန် ရခဲ့ဖူးပါတယ်။

   ဒါ့အပြင် ပြီးခဲ့တဲ့ ၂၀၁၈ ခုနှစ်၊ စက်တင်ဘာလ ၂၅ ရက်နေ့ညကလည်း စစ်တွေမြို့ ဝင်္ကဘာကွင်း ပွဲဈေးတန်းကို မိသားစုနဲ့အတူလည်ပတ်နေတဲ့ စစ်ဘက်ရေးရာလုံခြုံရေးတပ်ဖွဲ့ဝင် ကိုဖိုးလုံး(ခ) တပ်ကြပ်ဝင်းထိုက်ဟာ ဦးခေါင်းသေနတ်ပစ်ခတ်ခံရပြီး သေဆုံးခဲ့တဲ့ဖြစ်ရပ်လည်းရှိခဲ့ဖူးပါတယ်။

   

   ဓာတ်ပုံ ရင်းမြစ်, Myint Lwin

2. ၂၀ ဇွန် ၂၀၂၁မြောင်မြို့နယ်ထဲမှာ ပရဟိတအဖွဲ့က လူငယ် ၃ ဦး အသတ်ခံရ

   စစ်ကိုင်းတိုင်းဒေသကြီး၊မြောင်မြို့နယ်၊သနပ်ကုန်းကျေးရွာအနီးမှာ ရေစကြိုမြို့နယ် သာဂေါင် စံပြ ပရဟိတအဖွဲ့ ကားပေါ်က လူငယ်(၃)ဦးဇွန် (၁၉)ရက်နေ့ ညနေ ငါးနာရီခွဲအချိန်လောက်က အသတ်ခံခဲ့ရတယ်လို့ မြောင်ဒေသခံတစ်ဦးက ဘီဘီစီကို ပြောပါတယ်။

   အသတ်ခံရတဲ့သူတွေဟာ အသက် ၂၀ ဝန်းကျင် လူငယ်တွေဖြစ်ပြီးတော့အဲ့ဒီနားမှာ ဇွန်လ ၁၉ ရက်နေ့ ညနေပိုင်းက သေနတ်သံတွေကြားအပြီးမှာ သူတို့ကို သေနတ်ဒဏ်ရာတွေနဲ့ သူတို့ ပရဟိတကားကို လမ်းဘေးမှာ တွေ့ခဲ့ရတာဖြစ်တယ်လို့လည်း သူပြောပါတယ်။

   ‌ဒေသခံတွေအချို့ကတော့ တိုက်ပွဲဖြစ်တယ်မှတ်ပြီး ထွက်မကြည့်ကြတာဖြစ်တယ်လို့လည်း ဆိုပါတယ်။

   စံပြ ပရဟိတ အဖွဲ့ဟာ မကွေးတိုင်း ရေစကြိုမြို့နယ် သာဂေါင် ကျေးရွာက ဖြစ်ပြီးတော့ အဆိုပါ ပရဟိတအဖွဲ့က လူငယ် (၃)ဦးဟာ ရေစကြိုမြို့ကနေ အပြန်မှာ မြောင်မြို့နယ် သနပ်ကုန်း ကျေးရွာ အနီးမှာ အသတ်ခံလိုက်ရတာ ဖြစ်ပါတယ်။

   မြောင်မြို့နယ် သနပ်ကုန်းကျေးရွာဟာ စစ်ကိုင်းတိုင်းနဲ့ မကွေးတိုင်း အစပ်က ကျေးရွာဖြစ်သလို မြောင်မြို့နယ်နဲ့ ရေစကြိုမြို့နယ်မြို့ချင်း စပ်နေရာတစ်ခုလည်း ဖြစ်ပါတယ်။

   အခုအခါမှာ တော့ အခင်းဖြစ်တဲ့နေရာကို မြောင်ရဲစခန်းကရောက်လာပြီး စိစစ်မှုတွေလုပ်နေကြောင်းလည်း သိရပါတယ်။

   ဘာကြောင့် ပစ်ခတ်မှုတွေဖြစ်ခဲ့တယ်၊ဘယ်အဖွဲ့တွေက ပစ်ခတ်မှုတွေဖြစ်ခဲ့တယ်ဆိုတာကိုတော့ ဒေသခံတွေဘက်က မသိရသလို စစ်ကောင်စီဘက်က သတင်းထုတ်ပြန်တာမျိုးလည်း မရှိသေးပါဘူး။

   

   ဓာတ်ပုံ ရင်းမြစ်, Social Media

3. ၂၀ ဇွန် ၂၀၂၁မင်းတပ်မှာ မြို့ခံတွေ အိမ်ပြန်နိုင်ဖို့ ၁၄ ရက်ကြာ အပစ်ရပ်သဘောတူညီချက်ရပြီ

   

   ဓာတ်ပုံ ရင်းမြစ်, cj

   စစ်အုပ်ချုပ်ရေးကြေညာခံထားရတဲ့ ချင်းပြည်နယ်၊ မင်းတပ်မြို့မှာ တိုက်ပွဲတွေကြောင့် အိုးအိမ်စွန့်ခွါ ထွက်ပြေးခဲ့ကြရတဲ့မြို့ခံတွေ ကိုယ့်အိမ်ကိုယ့်ရွာ ပြန်နိုင်ဖို့ ၁၄ ရက်ကြာ အပစ်အခတ်ရပ်ဆိုင်းဖို့ မြို့မိမြို့ဖ တွေရဲ့ကြားဝင်ညှိနှိုင်းမှုနဲ့ ဒေသန္တရစစ်ကောင်စီက သဘောတူလိုက်တယ်လို့ သိရပါတယ်။

   ဒီနေ့ ဇွန်လ ၂၀ ရက်ကနေ ဇူလိုင်လ ၄ ရက်အထိ အပစ်အခတ်မရှိဖို့ ညှိနှိုင်းနိုင်ခဲ့တာလို့ မြို့မိမြို့ဖတစ်ဦးက ဘီဘီစီကို အတည်ပြုပါတယ်။

   ဒေသခံတွေ ကိုယ့်အိမ်ကိုယ်ယာကို ပြန်လာပြီး ပြန်လည်ကြည့်ရှုထိန်းသိမ်းခွင့်ရဖို့ အခုလို ကြားဝင်ညှိနှိုင်း ပေးခဲ့တာဖြစ်တယ်လို့ သူကပြောပါတယ်။

   ‘ ဟိုဘက်ကလည်း စစ်ကြောင်းမထွက်ရ။ ဒီဘက်ကလည်း စစ်ကြောင်းမထွက်ရ။ အဲဒီလို။ ပြည်သူတွေ ကိုယ့်အိမ်ကိုယ့်ယာကို လွတ်လပ်စွာ သွားလာကြည့်ရှုနိုင်ဖို့အတွက်ပါ။ လမ်းကြောင်းကို လုပ်ငန်းသဘောအရ စစ်ဆေးတာမျိုးပဲ။ ပစ်ခတ်မှုမရှိရဘူး။ ပြည်သူတွေကြောက်ရွံ႕မှုမရှိဘဲ မြို့ပေါ် ပြန်ဝင်လာကြဖို့အတွက်ပေါ့။ ပျက်စီးတာကိုလည်း ပြန်လည်ပြုပြင်နိုင်ဖို့ သက်ဆိုင်ရာကို သတင်းပို့။ အဲလို ဆွေးနွေးထားတယ်’ လို့ ညှိနှိုင်းမှုအခြေအနေကို မြို့မိမြို့ဖတစ်ဦးက ပြောပါတယ်။

   ‘ပြန်လာတဲ့သူတွေကိုတော့ လက်နက် ခဲယမ်းပါ မပါ တာဝန်အရ စစ်ဆေးတာမျိုးဖြစ်မယ်။ စစ်ဆေးရင်လည်း ဒီကာလအတွင်း ဖမ်းဆီးတာမျိုးလုံး၀မရှိစေရဆိုပြီး ဆွေးနွေးထားတယ်’လို့လည်း သူက ထပ်လောင်း ပြောဆိုပါတယ်။

   လက်ရှိမှာ မင်းတပ်မြို့ထဲကို ပြန်လာတဲ့ ဒေသခံ ၂၀ ရာခိုင်နှုန်းလောက်ပဲရှိသေးတယ်လို့လည်း သိရပါတယ်။

   စစ်အာဏာသိမ်းမှုကို ဆန့်ကျင်သူတွေနဲ့ စစ်ကောင်စီတပ်တွေ ထိတွေ့တိုက်ပွဲတွေဖြစ်ခဲ့အပြီးမှာ စစ်ကောင်စီက မင်းတပ်မြို့ကို မေလ ၁၃ ရက်မှာ စစ်အုပ်ချုပ်ရေးအမိန့်ကြေညာခဲ့ပါတယ်။

   မင်းတပ်က ပြည်သူ့ကာကွယ်ရေးတပ်ဖွဲ့ (PDF)တွေနဲ့ စစ်ကောင်စီတပ်တွေကြားက မြို့တွင်းတိုက်ပွဲတွေကြောင့် မြို့ခံထောင်ချီဟာ လုံခြုံရေးစိုးရိမ်ပြီး ဘေးလွတ်ရာ ထွက်ပြေးကြရပါတယ်။

4. ၂၀ ဇွန် ၂၀၂၁မြို့နယ်အချို့မှာ လျှပ်စစ်မီတာခ ကျသင့်ငွေ ၅လစာအထိ ကောက်ခံတာတွေရှိနေ

   နေပြည်တော် ပျဉ်းမနားမြို့နယ်အတွင်းက ရပ်ကွက်အချို့မှာ လျှပ်စစ်မီတာကျသင့်ငွေတွေကို ၅ လစာ အထိ ကောက်ခံတာတွေရှိနေတယ်လို့ ဒေသခံအချို့က ဘီဘီစီကိုပြောပါတယ်။

   ဖေဖော်ဝါရီ ၁ ရက် စစ်တပ်က အာဏာရယူပြီးနောက်ပိုင်း မကောက်ခံနိုင်ခဲ့တဲ့ ဇန်နဝါရီ၊ ဖေဖော်ဝါရီ ၊မတ် ၊ဧပြီနဲ့ မေ လ ၅လစာ ကျသင့်ဘေလ်စာရွက်တွေကို တပေါင်းတည်း ဝေငှသွားတာလို့သိရပါတယ်။

   ‘ ‘ ကျွန်တော်တို့ ရပ်ကွက်မှာတော့ ၅လစာ ၅ ရွက် တခါတည်းဝေသွားတယ်။ ခွဲဆောင်ဖို့ပြောတယ်။ ရှေ့ ၃လက ကင်းလွတ်ကြေးပါပါမေပယ့် ဧပြီ မေ ၂လစာမှာတော့ ကင်းလွတ်ခွင့်မပါတော့ဘူး။ ကျသင့်ငွေ ကလည်း ပုံမှန်ထက် ပိုများတယ်။ ရပ်ကွက်ထဲမှာက မဆောင်တဲ့သူလည်းများတယ်။ တချို့ကတော့ ပုံမှန်ထက် ပိုကျလို့ မီတာရုံးသွားပြောမယ်လု့ိပြောသူတွေလည်းရှိတယ်။ မဆောင်ရင် မီးဖြတ်မယ်လို့ မပြောသွားပေမယ့် စာရွက်မှာတော့ ရေးထားတယ်။’’လို့ မီတာစာရွက် ၅လစာ ပေးဆောင်ဖို့ စာရွက်ရထားသူတစ်ဦးက ဘီဘီစီကိုပြောပါတယ်။

   စစ်ကောင်စီက အာဏာရယူပြီးနောက်ပိုင်း ၂၀၂၀ ရွေးကောက်ပွဲရလာဒ်အရ အနိုင်ရကိုယ်စားလှယ်တွေနဲ့ ဖွဲ့စည်းထားတဲ့ ပြည်ထောင်စုလွှတ်တော်ကိုယ်စားပြုကော်မတီ CRPH ကတော့ အိမ်သုံးမီတာခတွေကို ပေးဆောင်စရာမလိုဘဲ ကင်းလွတ်ခွင့်ပြုကြောင်း ကြေညာထားပါတယ်။

   ပြည်သူတွေထဲ လျှပ်စစ်မီတာခ အပါအဝင် အခွန်အရပ်ရပ်ကို လူထု CDM အနေနဲ့ မပေးဆောင်သူတွေ လည်းအများအပြားရှိနေပါတယ်။

   ဒါပေမယ့် ပြီးခဲ့တဲ့လက စစ်ကောင်စီလက်အောက် လျှပ်စစ်ဝန်ကြီးဌာနက လျှပ်စစ်မီတာခတွေမပေး ဆောင်ပါက လျှပ်စစ်မီးဖြတ်တောက်ခံရမယ်လို့ ကြေညာပြီးနောက်ပိုင်း လျှပ်စစ်မီတာပေးဆောင်သူ တွေလည်း ရှိခဲ့ပါတယ်။

   

   ဓာတ်ပုံ ရင်းမြစ်, CJ

5. ၂၀ ဇွန် ၂၀၂၁မော်လမြိုင်မှာ တနေ့တည်း ကိုဗစ်ပိုးတွေ့လူနာ ၅၀ ကျော်အထိရှိ

   

   ဓာတ်ပုံ ရင်းမြစ်, social media

   မွန်ပြည်နယ် မော်လမြိုင်မြို့မှာ မနေ့ ဇွန်လ ၁၉ ရက် တနေ့တည်းမှာတင် ကိုဗစ်နိုင်တင်းရောဂါပိုး တွေ့သူ ၅၀ ကျော်အထိရှိခဲ့တယ်လို့ ကူညီကယ်ဆယ်ရေးအသင်းတွေဆီကနေ သိရပါတယ်။

   ကူးစက်သူ အသစ် ၅၀ ကျော်မှာ မော်လမြိုင်ဘူတာကြီးက ရဲဝန်ထမ်းတွေရဲ့ထိတွေ့မိသားစုဝင်တွေပါဝင်တဲ့ လူနာ ၂၀ ကျော်အထိရှိခဲ့တယ်လို့သိရပါတယ်။

   မော်လမြိုင်မှာ မြို့ထဲက ကူးစက်မှုတွေအပြင် သံဖြူဇရပ်၊ပေါင်စတဲ့ပြည်နယ်တွင်းမြို့နယ်စုံက ကိုဗစ်လူနာတွေကို မြို့ပေါ်ပြည်သူ့ဆေးရုံကြီး သီးခြားကုသဆောင် အမှတ်(၁)နဲ့(၃)မှာ ကုသပေးနေတယ်လို့ သိရပါတယ်။

   လက်ရှိမှာ မနေ့ ဇွန်လ ၁၉ ရက်မှာ ကုသဆောင် အမှတ် (၁) မှာတင် လူနာ တစ်ရာစွန်းစွန်းအထိရှိနေပြီလို့ ပိုးထိတွေ့ဆက်စပ်သူတွေ၊ ပိုးတွေ့သူတွေကို လိုက်ပါကူညီပေးနေတဲ့အရပ်ဘက် ကယ်ဆယ်ရေးအဖွဲ့တွေက ပြောပါတယ်။

   မွန်ပြည်နယ်ထဲ မော်လမြိုင်အပါအဝင် ကိုဗစ်ပိုး ကူးစက်မှုအသစ်တွေဟာ ပြီးခဲ့တဲ့တစ်ပတ်ကတည်းက ပိုးတွေ့လူနာ နေ့စဉ် ဆယ်ချီနဲ့ ခပ်စိပ်စပ် ပြန်ဖြစ်လာတာလို့လည်း သိရပါတယ်။

   လတ်တလော မော်လမြိုင်ကပိုးတွေ့လူနာတွေထဲမှာ မော်လမြိုင်တက္ကသိုလ်ပြန်ဖွင့်ချိန် အဆောင်နေတဲ့ ကျောင်းသူ ၂၉ ဦးလည်း ပါဝင်နေတယ်လို့ ကျောင်းတွင်းသတင်းဌာနတစ်ခုနဲ့ ဒေသတွင်းအခြေစိုက်သတင်းတွေမှာ ဖော်ပြနေပေမဲ့ ဘီဘီစီက သီးခြားအတည်မပြုနိုင်သေးပါဘူး။

   စစ်ကောင်စီရဲ့ကျန်းမာရေးဝန်ကြီးဌာနကတော့ ဇွန်လ တစ်ရက်တည်းမှာတင် ပိုးတွေ့သူလူနာ ၅၀၀ ကျော်အထိ ရှိတယ်လို့ သတင်းထုတ်ပြန်ထားပါတယ်။

6. ၂၀ ဇွန် ၂၀၂၁ရခိုင်၊ ယိုးဖျားချောင်းဒေသမှာ မြိုအမျိုးသမီးတစ်ဦး မိုင်းထိပြီး ခြေတစ်ဖက်ဆုံးရှုံး

   

   ရခိုင်ပြည်နယ်၊ ကျောက်တော်မြို့ထဲက ယိုးဖျားချောင်းဒေသမှာရှိတဲ့ ငှက်ပျောချောင်းကျေးရွာက အသက် ၄၉ နှစ်အရွယ်အမျိုးသမီးတစ်ဦးဟာ တောင်ပေါ်မျှစ်ချိုးဖို့သွားရင်း မြေမြှုပ်မိုင်းနင်းမိပြီး ခြေတစ် ဖက်ဆုံးရှုံးခဲ့ရတယ်လို့ သိရပါတယ်။

   ဇွန်လ ၁၇ ရက်နေ့က ကျောက်ပန်းတောင် တောင်ပေါ်မှာ မိုင်းထိခဲ့တာဖြစ်ပြီး ဒဏ်ရာပြင်းထန်လို့ ကျောက် တော်ဆေးရုံကနေ စစ်တွေဆေးရုံတက် ကုသမှုခံယူခဲ့တာဖြစ်ပါတယ်။ အခုတော့ မစိုးရိမ်ရတဲ့ အခြေအနေရှိနေပြီလို့ သိရပါတယ်။

   ကျောက်တော်မြို့နယ်ထဲက ယိုးချောင်းဖျားဒေသဟာ ပြီးခဲ့တဲ့နှစ်နှစ်ကျော်ကာလအတွင်း ရက္ခိုင့်တပ်တော်(အေအေ)နဲ့ တပ်မတော်တို့ နှစ်ဖက်တိုက်ပွဲတွေ အစပြုခဲ့ရာဒေသတစ်ခုဖြစ်ပြီး အခုမိုင်းပေါက်ကွဲတဲ့ ကျောက်ပန်းတောင် တောင်အနီးဝန်းကျင်တွေမှာလည်း သူတို့တွေနေထိုင်ခဲ့ကြဖူးတယ်လို့ ဒေသခံတွေက ဆိုပါတယ်။

   အဲဒီတုန်းက တိုက်ပွဲတွေကြောင့်ပဲ ငှက်ပျောချောင်းကျေးရွာသားတွေအပြင် ကျေးရွာတော်တော်များများက ဒေသခံတွေ နေရပ်စွန့်ခွာထွက်ပြေးနေခဲ့ရတာလည်းဖြစ်ပါတယ်။

   သူတို့ဟာ မြိုလူမျိုးတွေဖြစ်ကြပြီး တောတောင်တွေ၊ ဥယျဉ်ခင်းတွေကိုမှီခိုပြီး လုပ်ကိုင်စားသောက်နေကြသူတွေလည်းဖြစ်ပါတယ်။

   လက်ရှိမှာ ဒေသတွင်းစစ်ပွဲတွေမရှိတော့တဲ့အတွက် တချို့စစ်ဘေးရှောင်ကျေးရွာသားတွေနေရပ်ပြန်ကြသလို အများစုကတော့ မြေမြှုပ်မိုင်းနဲ့စစ်ကျန်လက်နက်တွေရဲ့အန္တရာယ်တွေကိုစိုးရိမ်ကြောက်လန့်ပြီး စစ်ဘေးရှောင်စခန်းတွေမှာပဲ ဒုက္ခသည်တွေအဖြစ်နဲ့ နေထိုင်နေကြရဆဲဖြစ်ပါတယ်။

   ရခိုင်မှာ စစ်ပွဲတွေရပ်စဲသွားခဲ့ပြီး တပ်မတော်အာဏာသိမ်းစကာလအတွင်းမှာတော့ ရန်ကုန်-စစ်တွေကားလမ်းမ၊ အမ်း-စစ်တွေလမ်းပိုင်းနဲ့ ရသေ့တောင်မြို့နယ် အငူမော်ကနေ မောင်တောမြို့နယ်၊တောင်ပြိုလက်ဝဲအထိ အဝေးပြေးလမ်း တစ်လျှောက်နေရာတွေမှာ တပ်ဘက်က တာဝန်ယူပြီး မိုင်းရှင်းလင်းရေး လုပ်ငန်းတွေဆောင်ရွက်ခဲ့ကြပေမယ့် မိုင်းတစ်လုံးမှမတွေ့ရှိခဲ့ဘူးလို့ တပ်မတော်တာဝန်ရှိသူတွေက ထုတ်ပြန်ပြောဆိုမှုတွေလည်းရှိခဲ့ပါတယ်။

   ရခိုင်အရပ်ဖက်အဖွဲ့အစည်းတွေကတော့ မိုင်းအန္တရာယ်အသိပညာပေး လုပ်ငန်းစဉ်တွေကို ကျေးလက် ဒေသတွေ၊ ဒုက္ခသည်စခန်းတွေနဲ့ စာသင်ကျောင်းတွေမှာ သင်ကြားပို့ချပေးနေတာတွေ လည်းရှိကြပါတယ်။

   ရခိုင်မှာ တိုက်ပွဲတွေရပ်သွားတဲ့ ၇ လဝန်းကျင်အတွင်း မိုင်းနဲ့စစ်ကျန်လက်နက်တွေပေါက်ကွဲမှုအကြိမ်ပေါင်း ၁၀ ကြိမ်အထက်ရှိလာပြီး ထိခိုက်သေဆုံးသူပေါင်း ၂၀ ဦးကျော်ထိရှိလာနေပြီလို့ ရခိုင်တိုင်းရင်းသားမျိုးနွယ်များအစည်းအရုံး(REC)ရဲ့ မှတ်တမ်းတွေအရ သိရပါတယ်။

7. ၂၀ ဇွန် ၂၀၂၁နိုင်ငံတကာအသိုင်းအဝိုင်းက စစ်ကောင်စီကို အရေးယူပေးဖို့ NUG က ကမ္ဘာ့ဒုက္ခသည်များနေ့မှာ တောင်းဆို

   နိုင်ငံတကာရာဇဝတ်မှုတွေ ကျူးလွန်နေတဲ့ စစ်ကောင်စီကို အရေးယူပေးဖို့ နိုင်ငံတကာအသိုင်းအဝိုင်းက လက်တွဲလုပ်ဆောင်ပေးဖို့ အမျိုးသားညီညွတ်ရေးအစိုးရရဲ့လူအခွင့်အရေးဆိုင်ရာဝန်ကြီးဌာနက ဇွန်လ ၂ဝ ရက်နေ့မှာ ကျရောက်တဲ့ ကမ္ဘာဒုက္ခသည်များနေ့မှာ ထုတ်ပြန်တောင်းဆိုလိုက်ပါတယ် ။

   " စစ်အုပ်စုရဲ့လက်နက်ကိုအသုံးချပြီးအကြမ်းဖက်မူတွေ ထိုးစစ်ဆင်မူတွေကြောင့် ဒုက္ခသည်ပေါင်းများစွာ ထွက်ပြေးတိမ်းရှောင်လာရပါတယ်။ အခုနောက်ပိုင်းစစ်အာဏာသိမ်းပြီးနောက်ပိုင်းမှာ ထပ်ပေါ်ပေါက် လာတဲ့ရာဇဝတ်မှုတွေကြောင့် အရင်ကနေအိမ်ကထွက်ပြေးတိမ်းရှောင်စရာ မလိုတဲ့နေရာတွေကပါ နေရပ်တွေကစွန့်ခွာထွက်ပြေးလာရတဲ့ခြေနေမျိုးလည်းရောက်ခဲ့ပါတယ်။ စစ်ကိုင်းတိုင်း ၊ဧရာဝတီတိုင်း ၊ မကွေးတိုင်းတွေမှာ ရွာလုံးကျွတ်နီးပါး ချေမှုန်းပစ်ခတ်ခံရလို့လှည့်လှည်ပုန်းအောင်းနေထိုင်ရတဲ့ သူတွေရှိ လာသလို ချင်းပြည်နယ်၊ ကရင်နီပြည်နယ်နဲ့ကရင်ပြည်နယ်တွေမှာ တကျော့ပြန်စစ်ရေးတိုက်ခိုက်မှုတွေ ကြောင့် ဒုက္ခသည်တွေကိုယ်တိုင် ဒုတိယအကြိမ်ဒုက္ခသည်အဖြစ်တိမ်းရှောင်ရတာတွေ လေကြောင်း တိုက်ခိုက်မူတွေကြောင့် ထပ်မံတိမ်းရှောင်ရတာတွေဖြစ်နေပါတယ် ။ ဒါကြောင့် ကမ္ဘာဒုက္ခသည်များနေ့မှာ ပဋိပက္ခတွေကိုအမြန်ဆုံးရပ်တန့်ပေးဖို့တောင်းဆိုပါတယ် ။ တချိန်တည်းမှာပဲ ဒီလိုလက်နက်အားကိုးနဲ့မတရားလူ့အခွင့်အရေးချိုးဖောက်အကြမ်းဖက်တိုက်ခိုက်နေတဲ့ စစ်အုပ်စုကို အာဏာသိမ်းမှုကနေဖယ်ရှားပေးဖို့နိုင်ငံတကာက ဖိအားပေးလုပ်ဆောင်ပေးဖို့ တိုက်တွန်းလိုပါ တယ်လို့" လူ့အခွင့်အရေးဆိုင်ရာဝန်ကြီးက အမျိုးသားညီညွတ်ရေးအစိုးရရဲ့တရားဝင်အင်တာနက် စာမျက်နှာမှာ ဗီဒီယိုသဝဏ်လွှာနဲ့တောင်းဆိုခဲ့ပါတယ် ။

   အိမ်နီးချင်းနိုင်ငံတွေအနေနဲ့လည်း ပြည်ပကိုထွက်ပြေးတိမ်းရှောင်လာတဲ့ မြန်မာနိုင်ငံက ဒုက္ခသည်တွေကို လူသားချင်းစာနာထောက်ထားသောအားဖြင့် ယာယီလက်ခံထားပေးထားဖို့ ၊ အခုလိုအန္တရာယ်ရှိတဲ့ ကာလအတွင်း အတင်းအကြပ် ပြန်လည်ပို့ဆောင်တာမျိုးမလုပ်ဖို့ကိုလည်းတောင်းဆိုခဲ့ပါတယ် ။

   ဒါ့အပြင် နိုင်ငံတကာအသိုင်းအဝိုင်းအနေနဲ့လည်းလူသားချင်းစာနာမှုအကူညီတွေဖြစ်တဲ့ စားနပ်ရိက္ခာ ၊နေရာထိုင်ခင်းနဲ့ဆေးဝါးရိက္ခာတွေကို ဒေသခံအကူညီပေးရေးအဖွဲ့တွေနဲ့ချိတ်ဆက်ပြီး လက်တွဲကူညီပေး ဖို့ကိုလည်း ထည့်သွင်းတောင်းဆိုထားပါတယ်။ ၂ဝဝ၁ ခုနှစ်ကတည်းကစတင်ကျင်းပလာတဲ့ ကမ္ဘာ႔ဒုက္ခသည် များနေ့ဟာ အခု ၂ဝ၂၁ခုနှစ်မှာဆိုရင် အနှစ် ၂ဝပြည့်ရှိလာပြီဖြစ်ပြီး အခုနှစ်အတွက်ဆောင်ပုဒ်ကတော့ " အတူတကွကုစားကြ၊ လေ့လာကြ ၊ တောက်ပအောင်လုပ်ကြလို့ မြန်မာဘာသာနဲ့ပြန်ဆိုထားပါတယ်။

   ကမ္ဘာ့ကုလသမဂ္ဂစာရင်းတွေအရ လက်ရှိကမ္ဘာပေါ်မှာ အကြောင်းအမျိုးမျိုးကြောင့်နေအိမ်ကနေစွန့်ခွာ ထွက်ပြေးနေရသူ ၇၉ သန်းရှိပြီး မြန်မာနိုင်ငံဟာဆိုရင် ဒုက္ခသည်အရေအတွက်အများဆုံးစာရင်းမှာ ပါဝင်နေပါတယ် ။

   ပြည်တွင်းမှာ စစ်ဘေးရှောင်အရေအတွက် စုစုပေါင်း ၁ သန်းရှိခဲ့ရာမှ အာဏာသိမ်းမှုဖြစ်စဉ်နောက်ပိုင်း စစ်ကောင်စီရဲ့တိုက်ခိုက်မှုကြောင့် စစ်ရှောင် ဒုက္ခသည်အရေအတွက် ၂သိန်းဝန်းကျင်တိုးလာတယ်လို့ လည်းထုတ်ပြန်ချက်ထဲမှာ ဖော်ပြထားပါတယ် ။

   

   ဓာတ်ပုံ ရင်းမြစ်, Mindat IDP Camp Management committee

8. ၁၉ ဇွန် ၂၀၂၁ကိုဗစ်ကူးစက်မှု မြင့်လာချိန် နေပြည်တော်အဝင်အထွက်ကန့်သတ်

   နေ့စဉ်ပိုးတွေ့လူနာ ရာဂဏန်းအထိ ဆက်တိုက်တွေ့လာပြီးတဲ့နောက် အုပ်ချုပ်ရေးမြို့‌တော် နေပြည်တော်ကို အဝင်အထွက် တင်းကြပ်လိုက်ပါတယ်။

   ဇွန်လဆန်းကစပြီး ကိုဗစ်-၁၉ ပိုးတွေ့သူ ပြန်မြင့်တက်လာနေတဲ့အတွက် နေပြည်တော်ကို လာမယ့်သူတွေကို မြို့အဝင်အထွက်ဂိတ်တွေမှာ အဖျားရှိမရှိ စစ်ဆေးမှုတွေ လုပ်ဆောင်နေပါပြီ။

   Stay at home မြို့နယ် တွေက လာမယ့်သူတွေကတော့ ၁၀ ရက်ကွာရန်တင်းဝင်ရမှာ ဖြစ်ပါတယ်။

   စည်ပင်ဧည့်ရိပ်သာနဲ့ ဟိုတယ်နှစ်လုံးကို Facility Quarantine သတ်မှတ်ပေးထားပြီးကိုဗစ်ရှိမရှိ နှစ်ကြိမ် စစ်ဆေးမှာဖြစ်ပါတယ်။

   ကုန်ကျစရိတ်အားလုံးကို ခရီးသွားလာသူကပဲ ကျခံရမှာ ဖြစ်ပါတယ်။

   ကိုဗစ်၁၉ ပြင်းပြင်းထန်ထန်ဖြစ်နေတဲ့ အိန္ဒိယနိုင်ငံနဲ့ နီးတဲ့ ချင်းပြည်နယ်ထဲက ဟားခါး၊တီးတိန်၊ဖလမ်း၊ထန်တလန်နဲ့တွန်းဇံ၊စစ်ကိုင်းတိုင်းထဲက တမူးနဲ့ကလေး မြို့နယ်တွေကို ဇွန်လဆန်းကစလို့ Stay at home အမိန့်ထုတ်ပြန်ထားပါတယ်။

   ဒါ့အပြင် ဇွန်လ ဒုတိယပတ်ကစလို့ ပိုးတွေ့သူ ၁၅၀ ကျော် ရှိလာတဲ့ ပဲခူးတိုင်းထဲက လက်ပံတန်းမြို့နယ်ကိုပါ ဒီကနေ့ကစလို့ Stay at home အမိန့်ထုတ်ပြန်လိုက်ပါပြီ။

   ကျန်းမာရေးဝန်ကြီးဌာနရဲ့ ထုတ်ပြန်ချက်အရ မြန်မာနိုင်ငံမှာ ကိုဗစ်ကူးစက်သူ စုစုပေါင်းလူနာတစ်သိန်းလေးသောင်းကျော်ရှိလာနေပါပြီ ဖြစ်ပါတယ်။

   ဒါပေမဲ့ လက်ရှိဆေးရုံမှာ ကုသမှုခံယူနေတဲ့အရေအတွက်ကတော့ တစ်သောင်းကျော် ရှိနေတာပါ။

   

   ဓာတ်ပုံ ရင်းမြစ်, Getty Images

9. ၁၉ ဇွန် ၂၀၂၁မြန်မာစစ်တပ်ကိုလက်နက်ရောင်းချမှုဆိုင်းငံ့ရေး ကမ္ဘာ့နိုင်ငံတွေ ဘယ်လိုရပ်တည်သလဲ

10. ၁၉ ဇွန် ၂၀၂၁ကုလ ညီလာခံ ဆုံးဖြတ်ချက်ကို စစ်ကောင်စီ ကန့်ကွက်

    ကုလသမဂ္ဂ အထွေထွေညီလာခံရဲ့ မနေ့က မြန်မာနိုင်ငံနဲ့ ပတ်သက်တဲ့ အဆိုနဲ့ အဲဒီအဆိုနဲ့ ပတ်သက်တဲ့ ဆွေးနွေး အရေးယူမှုတွေကို ကန့်ကွက်တယ်လို့ စစ်ကောင်စီ နိုင်ငံခြားရေး ဝန်ကြီးဌာနက ဒီကနေ့ ကြေညာချက်ထုတ် တုံ့ပြန်ခဲ့ပါတယ်။

    လီချင်စတိန်းနိုင်ငံက တင်သွင်းတဲ့ အဲဒီအဆိုဟာ မျှတမှု မရှိဘူးလို့လည်း ဆိုပါတယ်။

    မြန်မာနိုင်ငံကို လက်နက်တွေ မရောက်အောင် လုပ်ဆောင်ဖို့အပြင်၊ နိုင်ငံရေးအကျဉ်းသားတွေကို ချက်ချင်းလွှတ်ပေးဖို့ အချက်တွေပါ ပါဝင်တဲ့ ဆုံးဖြတ်ချက်တစ်ရပ်ကို ကုလသမဂ္ဂအထွေထွေညီလာခံက မနေ့က အတည်ပြုခဲ့တာ ဖြစ်ပါတယ်။

    အထွေထွေညီလာခံရဲ့ ဒီဆုံးဖြတ်ချက်ဟာ မဖြစ်မနေလိုက်နာဖို့ မလိုပေမဲ့ နိုင်ငံရေးအရတော့ သိသာတဲ့ ဆုံးဖြတ်ချက် တစ်ရပ်ဖြစ်ပါတယ်။

    • မြန်မာစစ်တပ်ကိုလက်နက်ရောင်းချမှုဆိုင်းငံ့ရေးကမ္ဘာ့နိုင်ငံတွေ ဘယ်လိုရပ်တည်သလဲ

    ဒီဆုံးဖြတ်ချက်ကို အဖွဲ့ဝင်နိုင်ငံတွေထဲက ၁၁၉ နိုင်ငံက ထောက်ခံပြီး နိုင်ငံပေါင်း ၃၆ နိုင်ငံက ကြားနေ မဲပေးခဲ့ကာ ဘယ်လာရုဇ်နိုင်ငံတစ်နိုင်ငံတည်း ကန့်ကွက်မဲပေးခဲ့ပါတယ်။

    

    ဓာတ်ပုံ ရင်းမြစ်, MRTV

11. ၁၉ ဇွန် ၂၀၂၁ကိုဗစ် ကူးစက်သူ အသစ် ၅၄၆ ဦးတွေ့၊ ၇ ဦး သေဆုံး

    မြန်မာနိုင်ငံမှာ ကိုရိုနာဗိုင်းရပ်စ် ကူးစက်သူ အသစ် ဒီကနေ့ ၅၄၆ ဦး ထပ်မံတွေ့ရှိပြီး သေဆုံးသူ ၇ ဦး ရှိတယ်လို့ ကျန်းမာရေးနဲ့ အားကစား ဝန်ကြီးဌာနက ထုတ်ပြန်ပါတယ်။

    ကူးစက်မှု မြန်ဆန်တဲ့ ဒယ်လ်တာ ကိုဗစ်မျိုးကွဲအပါအဝင် မျိုးကွဲသစ် သုံးမျိုးတွေ့လာရပြီးတဲ့ နောက် ဒီကနေ့မှာ ပဲခူးတိုင်း လက်ပံတန်းမြို့နယ်ကို Stay at home စတင်သတ်မှတ်ခဲ့ပြီး နေပြည်တော်ကိုလည်း အဝင်အထွက်တွေ ကန့်သတ်တင်းကြပ်လိုက်ပါတယ်။

    အဲဒါမတိုင်ခင်က ချင်းပြည်နယ်နဲ့ စစ်ကိုင်းတိုင်းက မြို့နယ် ၇ ခုကို ဇွန်လဆန်းကစပြီး Stay at home အမိန့်ထုတ်ပြန်ထားပြီ းဖြစ်ပါတယ်။

    အခုချိန်ထိ မြန်မာနိုင်ငံမှာ စုစုပေါင်း ကူးစက်သူ ၁၄၇,၆၁၅ ဦး ရှိပြီး သေဆုံးသူ ၃၂၅၈ ဦး ရှိပြီ ဖြစ်ပါတယ်။

    

    ဓာတ်ပုံ ရင်းမြစ်, MPA

12. ၁၉ ဇွန် ၂၀၂၁တက္ကသိုလ်ဝင်ခွင့်လျှောက်လွှာ ရက်တိုးလက်ခံပြီး ပိတ်ရက်တွေမှာပါ လျှောက်နိုင်တယ်လို့ဆို

    ၂၀၂၀ ပြည့်နှစ် တက္ကသိုလ်ဝင်စာမေးပွဲအောင်မြင်ထားသူတွေရဲ့ ဝင်ခွင့်လျှောက်လွှာအိတ်တွေကို သက်ဆိုင်ရာအခြေခံပညာအထက်တန်းကျောင်းတွေမှာ ဇွန်လ ၃၀ ရက်အထိ ထုတ်ပေးမှာပါ။

    ဒါ့အပြင် အဆင့်မြင့်ပညာဦးစီးဌာနမှာ တက္ကသိုလ်ဝင်ခွင့်လျှောက်လွှာတင်တာကိုလည်း ဇွန် ၃၀ ရက်အထိကို ပိတ်ရက်တွေမှာပါ လက်ခံမယ်လို့ စစ်ကောင်စီ သတင်းစာတွေမှာ ကြေညာထားပါတယ်။

    တဖက်မှာလည်း အမျိုးသားညီညွတ်ရေးအစိုးရ NUG ပညာရေးဝန်ကြီးဌာနဘက်ကတော့ တက္ကသိုလ်ဝင်ခွင့်လျှောက်လွှာ လက်ခံမယ့်ရက်၊ ဝင်ခွင့်အစီအစဉ်နဲ့ နိုင်ငံတကာတက္ကသိုလ်တွေကို ချိတ်ဆက်တက်ရောက်နိုင်မယ့် အစီအစဉ်တွေ လုပ်နေတယ်လို့ဆိုထားပါတယ်။

    ဒီအစီအစဥ်တွေကြားမှာ တက္ကသိုလ်ဝင်ခွင့်အောင်ထားသူ ကျောင်းသားတစ်ဦးက သူ့အနေနဲ့ ကျောင်းနဲ့ အဆက်မပြတ်အောင် ကျောင်းအပ်ထားပြီး ကျောင်းသွားမတက်ဘဲ NUG လိုအရပ်သား အစိုးရ လက်ထက်ကျောင်းတွေ ပြန်ဖွင့်မှ တက်မယ်လို့ ဆိုပါတယ်။ အခုတော့ ကျောင်းအပ်လက်ခံချိန်မှာ မလျှောက်ခဲ့ရင် တစ်နှစ် သို့မဟုတ် နှစ်နှစ် နားရမှာ မဖြစ်ချင်လို့ ကျောင်းအပ်ထားတယ်လို့ ဆိုပါတယ်။

    အဆင့်မြင့်ပညာဦးစီးဌာနရဲ့ တက္ကသိုလ်ဝင်ခွင့်ရွေးချယ်ရေးစည်းမျဉ်းစည်းကမ်းတွေအရ စာမေးပွဲအောင်ထားသူတွေဟာ ဝင်ခွင့်ထုတ်ပေးတဲ့နှစ်မှာ လျှောက်လွှာမတင်ဘဲ နောက်နှစ်တွေမှ ပြန်တက်မယ်ဆိုရင် အဆင့်ဆင့်အသနားခံစာပြန်တင်ရတာတွေ ရှိပါတယ်။

    အခုချိန်မှာတော့ အထက်တန်းကျောင်းတွေမှာ တက္ကသိုလ်ဝင်ခွင့်လျှောက်လွှာထုတ်သူ နည်းသလို၊ တက္ကသိုလ်တွေဘက် ဝင်ခွင့်ပြန်လျှောက်သူလည်းသိသိသာသာနည်းတယ်လို့ ပညာရေးအသိုင်းအဝိုင်းက ဆိုပါတယ်။

    တက္ကသိုလ်တွေဘက်မှာလည်း ကြားကာလတက္ကသိုလ်ကောင်စီတွေဖွဲ့စည်းထားပြီး တက္ကသိုလ်ဝင်တန်းအောင်မြင်ပြီးသား သူတွေအတွက်စီစဉ်ထားတယ်လို့ သိရပါတယ်။

    အဲဒီအစီအစဥ်က ကြားကာလမှာ ပညာသင်ကြားမှု အဆက်မပြတ်ချင်သူတွေအတွက် ရည်ရွယ်ပြီး အကယ်ဒမစ်ပိုင်းထက် ပညာသင်ရေး အဆက်မပြတ်ဖို့ ဦးစားပေးထားတယ်လို့ ရတနာပုံတက္ကသိုလ်ကျောင်းသားသမဂ္ဂထံက သိရပါတယ်။

    NUG ရဲ့ ပညာရေးမူဝါဒတွေမှာ အွန်လိုင်းသင်ကြားနည်းတွေကို အများစု အခြေခံနေပြီး အိမ်တွင်းသင်ကြားရေးနည်းလမ်းတွေကို လက်တွေ့အကောင်အထည်ဖော်ရာမှာလည်း အခက်အခဲရှိနိုင်တယ်လို့ ပညာရေးအသိုင်းအဝိုင်းက ဆိုပါတယ်။

    ကိုဗစ်ကူးစက်မှုတွေမြင့်တက်နေတာနဲ့အတူ ပေါက်ကွဲမှုဖြစ်စဉ်တွေ နိုင်ငံအနှံ့ဖြစ်ပေါ်နေပေမယ့် စစ်ကောင်စီဘက်က တက္ကသိုလ်တွေက အတန်းစုံကို ဖွင့်လှစ်နိုင်ဖို့ လုပ်ဆောင်နေပါတယ်။

    

    ဓာတ်ပုံ ရင်းမြစ်, MPA

13. ၁၉ ဇွန် ၂၀၂၁ကန်တော်ကြီးပတ်လမ်း အိမ်စီးကားတစ်စီးပေါက်ကွဲမှု ဖြစ်

    ရန်ကုန်မြို့၊ ကန်တော်ကြီးပတ်လမ်းမှာ ဇွန် ၁၉ ရက်ညနေငါးနာရီခွဲလောက်က အိမ်စီးကားတစ်စီး ပေါက်ကွဲမှုဖြစ်ပွားခဲ့တယ်လို့ ကနဦးသတင်းရရှိပါတယ်။

    ကားတစ်စီးလုံးနီးပါး မီးလောင်ပေါက်ကွဲပျက်စီးထားတဲ့မြင်ကွင်းလည်း လူမှုကွန်ရက်မှာ ပျံ့နှံ့လာတာကိုတွေ့ရပြီး ထိခိုက်ဒဏ်ရာရရှိမှုအခြေအနေကိုတော့ မသိရသေးပါဘူး။

    ဒေသခံတချို့ရဲ့အပြောအရတော့ ပေါက်ကွဲမှုဟာ နတ်မောက်လမ်းအနီး ကန်တော်ကြီးပတ်လမ်းက ကုလရုံးနားမှာ ပေါက်ကွဲခဲ့တာဖြစ်တယ်လို့လည်း သိရပါတယ်။

    ကန်တော်ကြီးပတ်လမ်းတစ်လျှောက် ထိပ်တစ်ဖက်စီမှာ ဂျပန်သံရုံးနဲ့ နောက်တစ်ဘက်မှာ ယူအန်ရုံးတို့ ရှိကြပြီး အဲဒီလမ်းတစ်လျှောက်လုံးကို ဖေဖော်ဝါရီ လလယ်ပိုင်းကစလို့ လမ်းပိတ်ထားကာ စစ်ကောင်စီရဲ့ လုံခြုံရေးတပ်ဖွဲ့တွေက စောင့်ကြပ်နေခဲ့တာဖြစ်ပါတယ်။ နောက်ပိုင်းမှာတော့ တချို့ရက်တွေမှာ ညနေပိုင်းတွေမှာ လမ်းပြန်ဖွင့်ပေးတာမျိုးရှိခဲ့ပြီး နေ့စဉ် မနက်ကနေ ညနေထိ လမ်းပိတ်ထားတဲ့အခြေအနေမှာ ရှိနေတာဖြစ်ပါတယ်။

    မနေ့ ဇွန် ၁၈ ရက် ညနေပိုင်းကလည်း တာမွေမြို့နယ်အတွင်း ဗုံးနှစ်လုံးဆင့် မိနစ်ပိုင်းသာခြား ပေါက်ကွဲခဲ့ပြီး လုံခြုံရေးတပ်ဖွဲ့ဝင်တွေ ရှိနေတဲ့ စစ်ကားတစ်စီးပေါ်နဲ့ အငှားယာဉ်တစ်စီးပေါ်တို့မှာ ပေါက်ကွဲမှုတွေဖြစ်ပွားခဲ့တာဖြစ်ပါတယ်။

    စစ်ကားဟာ မီးလောင်သွားခဲ့ပြီး ကားပေါ်မှာ ပါတဲ့ ဒုရဲအုပ်တစ်ဦးနဲ့ ရဲတပ်ဖွဲ့ဝင်တချို့ ဒဏ်ရာရခဲ့ကာ အငှားယာဉ်ပေါ်ပေါက်ကွဲမှုမှာတော့ ယာဉ်မောင်းသေဆုံးခဲ့တယ်လို့ သိရပါတယ်။

    

    ဓာတ်ပုံ ရင်းမြစ်, CJ

14. ၁၉ ဇွန် ၂၀၂၁တောင်ကိုရီးယားက မြန်မာကျောင်းသားတွေ အရေးပေါ် ထောက်ပံ့ကြေးလျှောက်ထားနိုင်

    Federation of Korean Trade Unions နဲ့ Korea Inclusive Finance Agency တို့နဲ့မြန်မာကျောင်းသားများ အသင်း ( ကိုရီးယား ) MSO တို့ တွေ့ဆုံပြီး မြန်မာကျောင်းသားတွေကို ထောက်ပံ့ကြေး တလ ဝမ် ၃ သိန်းစီ နဲ့ ၈ လစာ ပေးသွားဖို့ ဇွန်လ ၁၇ ရက်က သဘောတူလက်မှတ် ရေးထိုးခဲ့ကြပါတယ်။

    ဒီထောက်ပံ့ကြေးဟာ မမျှော်လင့်ထားဘဲ အခက်အခဲ ကြုံလာရတဲ့ မြန်မာကျောင်းသားတွေအတွက် အတန်းပညာ ပြီးဆုံးအောင်သင်ကြားနိုင်ဖို့ ထိရောက်ပြီး အကျိုးရှိတဲ့ ကူညီမှု ဖြစ်လို့ ကျေးဇူးတင်တဲ့ အကြောင်း မြန်မာကျောင်းသားများ အသင်း ( ကိုရီးယား )ရဲ့ ဥက္ကဌက ပြောပါတယ်။

    Federation of Korean Trade Unions က တာဝန်ရှိသူကတော့ သူတို့ ဖောင်ဒေးရှင်းဟာ နိုင်ငံစုံ အလွှာစုံက အခက်အခဲ ကြုံနေရသူတွေကို ကူညီဖေးမပြီး လူ့အဖွဲ့အစည်းထဲမှာ အားငယ်နေရသူများကို ကူညီနေတဲ့ ဖောင်ဒေးရှင်းဖြစ်တာကြောင့် မြန်မာကျောင်းသားတွေကို အရေးပေါ် ထောက်ပံ့ဖို့ ဆုံးဖြတ်ခဲ့တာ ဖြစ်တယ်လို့ ပြောပါတယ်။

    အဲဒီဆွေးနွေးပွဲမှာ မြန်မာကျောင်းသားများ အသင်းက အမှုဆောင်တွေက အလုပ်အကိုင် ရှာဖွေခွင့် ဗီဇာ ကိုင်ဆောင်ထားသူတွေရဲ့ အခက်အခဲ တွေကိုလည်း ထပ်ဆောင်း တင်ပြဆွေးနွေးခဲ့တယ်လို့ ဆိုပါတယ်။

    အဲဒီဆွေးနွေးမှုရဲ့ ရလဒ်တွေကို မကြာခင် ထုတ်ပြန်ပေးသွားမယ်လို့ သိရပါတယ်။ အဲဒီ အရေးပေါ် ထောက်ပံ့ကြေး လျှောက်ထားလိုသူတွေအတွက် တောင်ကိုရီးယား အဖွဲ့အစည်းဘက်က မကြာခင် လင့်ခ် တခုချပေးပြီး အဲဒီမှာ နေက်ဆုံးအဆင့် ထောက်ပံ့ကြေးကို လျှောက်ထားရမှာ ဖြစ်ပြီး အောင်မြင်ရင် ၃ ရက်အတွင်း ငွေလွှဲပေးသွားမှာ ဖြစ်ပါတယ်။

    

    ဓာတ်ပုံ ရင်းမြစ်, မြန်မာကျောင်းသားများ အသင်း ( ကိုရီးယား ) MSO

15. ၁၉ ဇွန် ၂၀၂၁နိုင်ငံရေးခရီးကြမ်းကို ဆက်လျှောက်ရမယ့် မွေးနေ့ရှင်

16. ၁၉ ဇွန် ၂၀၂၁ပန်းသပိတ်ပြုလုပ်တယ်ဆိုပြီး ဒေသတချို့မှာ ဖမ်းဆီးခံရသူတွေရှိ, ပြင်ဦးလွင်မှာ နှင်းဆီပန်းသပိတ်ပြုလုပ်တယ်ဆိုပြီး စားသောက်ဆိုင်ပိုင်ရှင်နဲ့ အလုပ်သမားတွေ ဖမ်းဆီးခံရ

    မန္တလေးတိုင်း ပြင်ဦးလွင်မြို့နယ်မှာရှိတဲ့ စားသောက်ဆိုင်တစ်ခုဖြစ်တဲ့ Cafe 99 က ဆိုင်ရှင်နဲ့ဝန်ထမ်းတွေကို ဒီနေ့ဇွန်လ ၁၉ ရက်နေ့မှာ စစ်ကောင်စီတပ်ဖွဲ့ဝင်တွေက ဖမ်းဆီးလိုက်တယ်လို့ ဆိုင်ကတာဝန်ရှိသူတွေက ပြောပါတယ်။

    "သူတို့က မနက်ကိုးနာရီလောက်ကတည်းက စောင့်ကြည့်တယ် ။ ၁၁နာရီလောက်မှာ ဆိုင်ရှင် ၃ယောက်နဲ့ဝန်ထမ်း ၉ ယောက်ကိုဖမ်းသွားတာ ။ ပန်းတွေဝေနေတယ် လက်ကမ်းစာစောင်တွေ ဝေတယ်ဆိုပြီး စွပ်စွဲပြီးခေါ်သွားတာ ။ လက်ကမ်းစာစောင်လည်းမဝေပါဘူး။ ပန်းဝေတာက ဆိုင်ရှင်မွေးနေ့ယတြာချေတဲ့အနေနဲ့ပန်းပေးတယ်။ ကလေးတွေကို ပန်ချင်တဲ့သူတွေကိုလည်းဝေပေးတာပါ" လို့ Cafe 99 က တာဝန်ရှိသူတစ်ဦးက ဘီဘီစီကိုပြောပါတယ်။

    လက်ရှိမှာ ဆိုင်ရှင် ၃ယောက်နဲ့ဖမ်းဆီးသွားတဲ့ ဝန်ထမ်း ၉ယောက်အတွက် အမြန်ဆုံးပြန်လွတ်ပေးဖို့ပဲဆုတောင်းနေတယ်လို့ ဆိုင်ကဝန်ထမ်းတွေက ပြောပါတယ်။ ဒီနေ့ဇွန်လ ၁၉ ရက်နေ့နိူင်ငံတော်အတိုင်ပင်ခံဒေါ်အောင်ဆန်းစုကြည်ရဲ့ ၇၆နှစ်မြောက် မွေးနေ့ဖြစ်တာကြောင့် ရန်ကုန်အပါဝင်နယ်မြို့တွေမှာ ပန်းပန်တဲ့ သပိတ်ပြုလုပ်နေပြီး ပန်းရောင်းသူတွေနဲ့ ပန်းပန်သူတွေကို လိုက်လံစစ်ဆေးဖမ်းဆီးတာတွေလည်း ဆက်တိုက်ပြုလုပ်နေပါတယ်။

    ဒီနေ့ ဇွန်လ ၁၉ ရက်နေ့မနက်ပိုင်းမှာ ပြင်ဦးလွင် - လားရှိုးလမ်းမှာရှိတဲ့ Cafe 99 ဆိုင်က လာရောက်စားသုံးသူတွေကို နှင်းဆီပန်းတပွင့်စီ လက်ဆောင်ပေးတာကြောင့် ဆိုပြီး ဆိုင်ရှင်နဲ့ အလုပ်သမားတွေကို ပန်းသပိတ်ပြုလုပ်တယ်ဆိုတဲ့ စွပ်စွဲချက်နဲ့ ဖမ်းဆီးသွားတယ်လို့ ဒေသခံတချို့က လူမှုကွန်ရက်မှာ ရေးသားထားကြပါတယ်။

    ရန်ကုန်မှာလည်း စမ်းချောင်းမြို့နယ်အတွင်း ပန်းပန်ထားတဲ့အမျိုးသမီးတစ်ဦးကို ရဲက ဖမ်းဆီးသွားတဲ့ ပုံတွေလည်း လူမှုကွန်ရက်မှာပျံ့နှံ့နေပါတယ်။

    မန္တလေးက နေရာတချို့မှာလည်း ဆိုင်ကယ်စီးလာသူတွေကို စစ်ကောင်စီလုံခြုံရေးတပ်ဖွဲ့က လမ်းမှာ တားဆီးစစ်ဆေးပြီး ဆိုင်ကယ်စီးဦးထုပ်တွေကို ဖြုတ်ကာ ပန်းပန်လာတာရှိမရှိ စစ်ဆေးတာတွေပြုလုပ်ခဲ့တယ်လို့အဲဒီလိုစစ်ဆေးခံရသူတချို့က လူမှုကွန်ရက်မှာရေးသားထားပါတယ်။

    နိုင်ငံတော်တိုင်ပင်ခံပုဂ္ဂိုလ်ဒေါ်အောင်ဆန်းစုကြည်ရဲ့ ဇွန် ၁၉ ရက်နေ့မှာ ကျရောက်တဲ့ ၇၆ နှစ်ပြည့်မွေးနေ့အထိန်းအမှတ်အဖြစ် ပန်းသပိတ် ပြုလုပ်ကြဖို့ တိုက်တွန်းနှိုးဆော်မှုတွေရှိခဲ့ပါတယ်။ အဲဒီနောက် ဒီနေ့ မွေးနေ့ရက်မှာတော့ ဒေသအသီးသီးမှာ ကိုယ်တိုင် ပန်းပန်ဆင်ပြီး ဒေါ်အောင်ဆန်းစုကြည်မွေးနေ့ကို ကြိုဆိုဆုတောင်းဂုဏ်ပြုပေးခဲ့ကြသလို ပန်းတွေ ဝေမျှတဲ့ ပုံစံနဲ့အတူ စစ်အာဏာရှင်ဆန့်ကျင်ရေးပန်းသပိတ်တွေကိုလည်း နိုင်ငံတဝန်း ပုံစံမျိုးစုံနဲ့ ဆင်နွှဲခဲ့ကြပါတယ်။

    ဒီနေ့ ဇွန်လ ၁၉ရက်မှာကျရောက်တဲ့ ဒေါ်အောင်ဆန်းစုကြည်မွေးနေ့ကို ဂုဏ်ပြုတဲ့အပြင် ဖမ်းဆီးခံပြည်သူတွေကို ဂုဏ်ပြုတဲ့အနေနဲ့ ဒီလှုပ်ရှားမှုကို ပြုလုပ်တာဖြစ်ပါတယ်။

    ဒါ့ပြင် စစ်အာဏာရှင်က ဘယ်လောက်ပဲ ဖိနှိပ်နေပါစေ လူထုဟာ ဒီဒုက္ခတွေကို ပန်းပန်ပြီး ကြံ့ကြံ့ခံတွန်းလှန်နေဆဲဆိုတဲ့ စည်းလုံးမှုကို ပြသဖို့ ဒီပန်းသပိတ်ကို ပြုလုပ်တာဖြစ်ပါတယ်။

    

    ဓာတ်ပုံ ရင်းမြစ်, Cafe 99

17. ၁၉ ဇွန် ၂၀၂၁ဖားကန့်ကအလွတ်တန်းသတင်းထောက် ဖမ်းခံရပြီး နှစ်လကြာမှ ရုံးထုတ်

    ကချင်ပြည်နယ်၊ ဖားကန့်မြို့နယ်မှာ ပြီးခဲ့တဲ့ မတ်လကတည်းက ဖမ်းဆီးခံထားရတဲ့ အလွတ်တန်းသတင်းထောက် ကိုနောင်ရိုးကို မနေ့ ဇွန် ၁၈ ရက်နေ့က ပထမဆုံးအကြိမ် ရုံးထုတ်စစ်ဆေးခဲ့တယ်လို့ သူနဲ့ နီးစပ်သူတွေ ကဘီဘီစီကို ပြောပါတယ်။

    နိုင်ငံတော်အကြည်ညိုပျက်စေမှု ပုဒ်မ ၅၀၅-က နဲ့ တရားစွဲဆိုခံထားရတဲ့ ဖားကန့်က အလွတ်တန်းသတင်းထောက်ကိုနောင်ရိုးကို ၂လကျော်ကြာမှ ပထမဆုံးအကြိမ် ရုံးထုတ်ပြီး သူ့ဘက်က လိုက်ပါဆောင်ရွက်မယ့် ရှေ့နေအတွက် ပါဝါတင်ခွင့်ရတာလို့လည်း သိရပါတယ်။

    ဖားကန့်က အလွတ်တန်းသတင်းထောက် ကိုနောင်ရိုးကို ဖားကန့်အချုပ်မှာ ၂ လကျော်ကြာအောင်ဖမ်းထားပြီးတော့ ဇွန်လ ၁၈ ရက်နေ့က စတင်ရုံးထုတ်ခဲ့တယ်လို့ပြောပါတယ်။ သူ့ရဲ့ကျန်းမာရေးအခြေအနေကောင်းမွန်ပြီး လက်ရှိမှာ ဖားကန့်က ရဲစခန်းတစ်ခုမှာပဲ ချုပ်နှောင်ထားရှိတယ်လို့ သူ့မိတ်ဆွေကပြောပါတယ်။

    လက်ရှိမှာ အာဏာသိမ်းပြီးကတည်းက သတင်းထောက် ၄၀ ကျော် ဖမ်းဆီးခံထားရပြီး အများစုကို နိုင်ငံတော်အကြည်ညိုပျက်စေမှု ပုဒ်မ ၅၀၅ (က) နဲ့ တရားစွဲဆိုထားတာဖြစ်ပါတယ်။ ဖမ်းဆီးခံထားရသူတွေထဲက တချို့ သတင်းထောက်တွေကတော့ ပြန်လွတ်လာတာရှိပေမယ့် အများစုကတော့ ဒီပုဒ်မနဲ့ ဆက်လက်တရားရင်ဆိုင်ရဖို့ရှိနေပါတယ်။

    

    ဓာတ်ပုံ ရင်းမြစ်, Social Media

18. ၁၉ ဇွန် ၂၀၂၁မကွေးတိုင်းတစ်နေရာက ပန်းသပိတ်နဲ့ ဒေါ်အောင်ဆန်းစုကြည် မွေးနေ့ ဆွမ်းကပ်လှူပွဲ

    မကွေးတိုင်းဒေသကြီးထဲက မြို့တစ်မြို့မှာ ဒေါ်အောင်ဆန်းစုကြည် မွေးနေ့အထိမ်းအမှတ် ဆွမ်းဆက်ကပ်လှူဒါန်းမှုနဲ့ ပန်းသပိတ် လှုပ်ရှားမှုကို ဒေသခံအမျိုးသမီးတွေက ပြုလုပ်ခဲ့ကြတာပါ။ ဒေါ်အောင်ဆန်းစုကြည် ကျန်းမာရေးကောင်းမွန်ပြီး အချုပ်အနှောင်ကနေ အမြန်ဆုံး လွတ်မြောက်ပါစေလို့လည်း ဆုတောင်းပေးခဲ့ကြတယ်လို့ ဒေသခံတွေက ဘီဘီစီကို သတင်းပေးပို့လာတာဖြစ်ပါတယ်။

19. ၁၉ ဇွန် ၂၀၂၁စစ်တပ်ကို လက်နက်ရောင်းချမှုဆိုင်းငံ့ရေးတောင်းဆိုတဲ့ဆုံးဖြတ်ချက်ကို ကုလညီလာခံ အတည်ပြု

    

    ဓာတ်ပုံ ရင်းမြစ်, AFP

    မြန်မာနိုင်ငံမှာဖြစ်နေတဲ့စစ်အာဏာသိမ်းမှုနောက်ဆက်တွဲ အကြမ်းဖက်မှုကို တုံ့ပြန်ဖို့ လက်နက်ရောင်းချတာကို ဆိုင်းငံ့ဖို့ တောင်းဆိုတဲ့ ရှားရှားပါးပါးဆုံးဖြတ်ချက်တစ်ခုကို ကုလသမဂ္ဂအထွေထွေညီလာခံဘက်က ပြုလုပ်လာပါတယ်။

    အာဏာသိမ်းစစ်အုပ်စုကို ရှုတ်ချတဲ့ဆုံးဖြတ်ချက်တစ်ခုကို အထွေထွေညီလာခံက ချမှတ်လိုက်တာဖြစ်ပါတယ်။

    ကုလသမဂ္ဂအထွေထွေညီလာခံဟာ ဒေါ်အောင်ဆန်းစုကြည်လို နိုင်ငံရေးထိန်းသိမ်းခံတွေကို လွှတ်ပေးဖို့နဲ့ ငြိမ်းချမ်းစွာဆန္ဒပြတဲ့သူတွေကို အကြမ်းဖက်တာအဆုံးသတ်ဖို့ကိုလည်း တောင်းဆိုပါတယ်။

    အထွေထွေညီလာခံက ဒီဆုံးဖြတ်ချက်ဟာ မဖြစ်မနေလိုက်နာဖို့ မလိုပေမဲ့ နိုင်ငံရေးအရတော့ သိသာတဲ့ဆုံးဖြတ်ချက်တစ်ရပ်ဖြစ်ပါတယ်။

    "ပြည်တွင်းစစ် ကြီးလာနိုင်တဲ့အန္တရာယ်ရှိပါတယ်။ အချိန်က သိပ်ကို အရေးပါနေပါတယ်။ စစ်အာဏာသိမ်းမှုကို နောက်ကြောင်းပြန်လှည့်ဖို့ အခွင့်အလမ်းက သိပ်ကို ကျဉ်းမြောင်းနေပြီ" လို့ မြန်မာနိုင်ငံဆိုင်ရာ ကုလအထူးကိုယ်စားလှယ် Christine Schraner Burgener က ညီလာခံမှာ ပြောပါတယ်။

    ညီလာခံရဲ့အခုဆုံးဖြတ်ချက်ကို ၁၁၉ နိုင်ငံက ထောက်ခံပြီး ဘယ်လာရုဇ်နိုင်ငံကတော့ ကန့်ကွက်မဲပေးခဲ့ပါတယ်။

    မဲမပေးဖို့ ဆုံးဖြတ်ခဲ့ကြတဲ့နိုင်ငံပေါင်း ၃၆ နိုင်ငံထဲမှာ စစ်တပ်ကို လက်နက်ထောက်ပံ့မှုအများဆုံးလုပ်နေတဲ့ တရုတ်နဲ့ရုရှားနိုင်ငံတို့လည်း ပါဝင်ပါတယ်။

    မဲမပေးဖို့ ဆုံးဖြတ်ခဲ့ကြတဲ့နိုင်ငံတချို့ကတော့ မြန်မာ့အကျပ်အတည်းဟာ ပြည်တွင်းရေးဖြစ်ပြီး တချို့ကတော့ ကုလရဲ့အခုဆုံးဖြတ်ချက်ဟာ ရခိုင်ပြည်နယ်ထဲက ပဋိပက္ခတွေကြောင့် ဘင်္ဂလားဒေ့ရှ်နိုင်ငံထဲကို ထွက်ပြေးခဲ့ကြရတဲ့ ရိုဟင်ဂျာမွတ်စလင်အရေးဖြေရှင်းမှု မပါဘူးလို့ ထောက်ပြကြပါတယ်။

    ကုလသမဂ္ဂဆိုင်ရာ ဥရောပသမဂ္ဂသံတမန် Olof Skoog ကတော့ '' အခုဆုံးဖြတ်ချက်ဟာ အာဏာကို တရားဝင်ရယူတယ်လို့ဆိုနိုင်အောင်ကြိုးပမ်းနေတဲ့ စစ်ခေါင်းဆောင်တွေရဲ့အားထုတ်မှုကို ယုတ်လျော့စေပြီး ပြည်သူအပေါ် ပြုလုပ်နေတဲ့ အကြမ်းဖက်မှုနဲ့ချိုးဖောက်မှုတွေကို ရှုတ်ချထားသလို ကမ္ဘာ့အမြင်မှာ စစ်တပ်အောက်က မြန်မာရဲ့အထီးကျန်မှုကို ပြသတယ်'' လို့ ပြောပါတယ်။

    ဒါပေမဲ့ ပြည်ထောင်စုလွှတ်တော်ကိုယ်စားပြုကော်မတီ(CRPH)ကနေ ခန့်အပ်ထားတဲ့ ကုလသမဂ္ဂဆိုင်ရာမြန်မာသံတမန် ဦးကျော်မိုးထွန်းကတော့ သူ့အပြောအရဆိုရင် အနှစ်သာရလျော့သွားတဲ့ အခုဒီဆုံးဖြတ်ချက်ကို ညီလာခံမှာ အတည်ပြုဖို့ အချိန်တွေကြာခဲ့တာကို စိတ်ပျက်မိတယ်ဆိုပြီး ပြောထားပါတယ်။

20. ၁၉ ဇွန် ၂၀၂၁အာဏာရှင်ကိုဆန့်ကျင်မယ့် နှုတ်ခမ်းနီတော်လှန်ရေးလှုပ်ရှားမှု

    ဇွန်လ ၁၉ ရက်နေ့မှာကျရောက်တဲ့ ပဋိပက္ခအတွင်း လိင်ပိုင်းဆိုင်ရာအကြမ်းဖက်မှုများအဆုံးသတ်ရေး အပြည်ပြည်ဆိုင်ရာနေ့ လှုပ်ရှားမှုတစ်ခုအနေနဲ့ အာဏာရှင်ကိုဆန့်ကျင်မယ့်နှုတ်ခမ်းနီပိုင်ရှင်များ ဆိုတဲ့ လှုပ်ရှားမှု ကို နိုင်ငံတဝန်းကအမျိုးသမီးတွေက ပါဝင်လူပ်ရှားခဲ့ကြပါတယ်။

    နိုင်ငံတကာကနေစတင်ခဲ့တဲ့ ဒီလှုပ်ရှားမှုကိုလက်ရှိပြည်တွင်းမှာ Sister to Sister ကမ်ပိန်းအဖွဲ့သားတွေက ဦးဆောင်ကျင်းပတာဖြစ်ပြီး ဖမ်းဆီးထိန်းသိမ်းခံထားရတဲ့ အမျိုးသမီးများနဲ့အတူရပ်တည်ပြီး သတင်းစကားမျှဝေလိုသူတိုင်းပါဝင်နိုင်တယ်လို့ဆိုပါတယ်။

    တော်လှန်ရေးညီအစ်မများမှ တော်လှန်ရေးညီအစ်မများ ဆီသို့ ဆိုတဲ့ ဒီလှုပ်ရှားမှုဟာ ဖမ်းဆီး၊ ထောင်ချ၊ နှိပ်စက်ပြီး လိင်ပိုင်းဆိုင်ရာ စော်ကားမှု ခံနေရ‌တဲ့ ၊ ခံရနိုင်ခြေ ရှိတဲ့ လူငယ်အမျိုးသမီး ဆန္ဒပြသူတွေရဲ့ ပုံရိပ်ကို လေးစားမှုနဲ့ဖန်တီးထားတာဖြစ်တယ်လို့ဒီလူပ်ရှားမူကိုဦးဆောင်သူတွေက ပြောပါတယ်။

    ဒီလှုပ်ရှားမှုမှာ အမျိုးသမီးတွေသာမက အမျိုးသားတွေကပါ နှုတ်ခမ်းနီဆိုးကာလက်သုံးချောင်းထောင်ပြီး အာဏာရှင်ကိုဆန့်ကျင်ကြောင်းပါဝင်ခဲ့ကြပါတယ်။

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ