ထားဝယ်တပ်ပေါင်းစုသပိတ်ဖြိုခွဲခံရပြီး လူငယ် ၁၃ဦးဖမ်းဆီးခံရ

တိုက်ရိုက် ထုတ်လွှင့်ချက်

1. ၂၈ ဧပြီ ၂၀၂၁KNU တပ်မဟာ ၅ ရဲ့တိုက်ခိုက်သိမ်းပိုက်တာခံခဲ့ရတဲ့ စစ်ကောင်စီရဲ့ သောင်ရင်းမြစ်လုံခြုံရေးစခန်း

   စစ်ကောင်စီရဲ့ သောင်ရင်းမြစ်ကြောင်း လုံခြုံရေးစခန်းတစ်ခု ဧပြီလ ၂၇ ရက်မနက်ပိုင်းမှာ တိုက်ခိုက်ခံခဲ့ရအပြီး ပုံတွေ ဖြစ်ပါတယ်။

   ကရင်အမျိုးသားအစည်းအရုံး KNU အောက်က တပ်မဟာ ၅ က သောင်ရင်းမြစ်ကမ်းမှာရှိတဲ့ စစ်ကောင်စီရဲ့ သော်လဲထနဲ့ ဥသုတ စခန်းတွေကို သာလွန်အင်အားနဲ့ တိုက်ခိုက်မီးရှို့လာခဲ့တယ်ဆိုပြီးတော့ စစ်ကောင်စီဘက်က ဒီနေ့ထုတ်သတင်းစာမှာဖော်ပြပါတယ်။

   စစ်ကောင်စီဘက်က နယ်စပ်လုံခြုံရေးစခန်းတွေလို့ ပြောပေမဲ့ ကရင်ပြည်နယ်အခြေစိုက်သတင်းတွေမှာတော့ သော်လဲထ စခန်းကို KNU တပ်မဟာ ၅ က တိုက်ခိုက်သိမ်းပိုက်တယ်လို့ ဖော်ပြပါတယ်။

   ဒီဖြစ်စဉ်မှာ အထိအခိုက်အကျအဆုံး ရှိမရှိကို စစ်ကောင်စီဘက်က ထုတ်ပြန်ထားမျိုးမရှိပေမဲ့ လိုအပ်တဲ့လုံခြုံရေး စစ်ဆင်ရေးတွေကို ဆက်လုပ်သွားမယ်ဆိုပြီး ပြောထားပါတယ်။

2. ၂၈ ဧပြီ ၂၀၂၁စီးပွားရေးပိတ်ဆို့မှုတွေ ဆက်လုပ်ဖို့ အမေရိကန်အထက်လွှတ်တော်အမတ်တွေ တောင်းဆို, MOGE ကို ငွေကြေးမစီးဆင်းအောင်လုပ်ဖို့လည်း အလေးထားတိုက်တွန်းတာ တွေ့ရပါတယ်။

   လက်ရှိမှာ စစ်ကောင်စီအောက်ရောက်နေတဲ့ လျှပ်စစ်နဲ့စွမ်းအင်ဝန်ကြီးဌာနက မြန်မာ့ရေနံနဲ့သဘာဝဓာတ်ငွေ့လုပ်ငန်း MOGE ဆီငွေကြေးစီးဆင်းတာရပ်သွားအောင်လုပ်ဖို့ အပါအဝင် မြန်မာအပေါ် အရေးယူပိတ်ဆို့မှုတွေ ထပ်လုပ်ဖို့ အမေရိကန်အထက်လွှတ်တော်အမတ်တွေက စုပေါင်းတောင်း ဆိုလာပါတယ်။

   ဒီမိုကရက်ရောနဲ့ရီပတ်ပလင်ကန် နှစ်ပါတီ အထက်လွှတ်တော်အမတ်တွေက စုပြီး အမေရိကန်နိုင်ငံခြားရေးဝန်ကြီးဌာနနဲ့ ဘဏ္ဍာရေးဝန်ကြီးဌာနတို့ဆီ စာပေးပို့ တောင်းဆိုလိုက်တာပါ။

   လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေကို မြင့်တက်နေတာကို ကြုံနေရချိန်မှာ ဗမာပြည်သူတွေရဲ့ ဒီမိုကရေစီအတွက် ရုန်းကန်ကြိုးစားမှုကို ထောက်ပံ့နိုင်မယ့်နည်းလမ်းအသစ်တွေရှာပေးဖို့ဆိုပြီး အထက်လွှတ်တော်အမတ် ၆ ဦးက တောင်းဆိုပါတယ်။

   ဒါ့ပြင် ရတနာသဘာဝဓာတ်ငွေ့စီမံကိန်းမှာ မြန်မာ့ရေနံနဲ့သဘာဝဓာတ်ငွေ့လုပ်ငန်း MOGE နဲ့ အတူ အကျိုးတူ ပူးပေါင်းနေတဲ့ Chevron စွမ်းအင်လုပ်ငန်းကြီးရဲ့ငွေကြေးတွေ စစ်ကောင်စီလက်ထဲ ဆက်မရောက်စေရေး သမ္မတဂျိုးဘိုင်ဒ်အစိုးရကို လုပ်စေချင်တဲ့အကြောင်းလည်း လွှတ်တော်အမတ်တွေက တောင်းဆိုပါတယ်။

   ရတနာစီမံကိန်းမှာ Chevron နည်းတူ ထိုင်းစွမ်းအင်ကုမ္ပဏီ Total လည်း အကျိုးတူပါဝင်ပြီး အရပ်သားအစိုးရလက်ထက်တုန်းကတော့ ဒီလို သဘာဝဓာတ်ငွေ့လုပ်ငန်းတွေဆီကနေ ပြည်ပဝင်ငွေသိသိသာသာရခဲ့ပါတယ်။

   ဒါပေမဲ့ မြန်မာနိုင်ငံထဲ စစ်တပ်က ဖေဖော်ဝါရီလ ၁ ရက်မှာ အာဏာသိမ်းခဲ့ပြီးတဲ့နောက် ဆန္ဒပြပွဲတွေ အကြမ်းဖက်ဖြိုခွင်းခံရတာ၊ အရပ်သားရာချီသေဆုံးနေရတာတွေကြောင့် စွမ်းအင်ကုမ္ပဏီကြီးတွေနဲ့ စစ်တပ်ကို အားပေးရာရောက်တဲ့ငွေကြေးလွှဲပြောင်းမှုတွေ ခေတ္တရပ်ထားဖို့ လူ့အခွင့်အရေးအဖွဲ့တွေကလည်း တောင်းဆိုနေပါတယ်။

3. ၂၈ ဧပြီ ၂၀၂၁ရန်ကုန်တိုင်းဝန်ကြီးဟောင်းဒေါ်နီလာကျော်ကို အဂတိလိုက်စားမှုနဲ့အမှုဖွင့်ထား

   NLD အစိုးရလက်ထက် ရန်ကုန်တိုင်းထဲက ဝန်ကြီးဌာန ၃ ခုကို တာဝန်ယူခဲ့တဲ့ တိုင်းဒေသကြီးဝန်ကြီး ဒေါ်နီလာကျော်ကို ငွေကျပ် သိန်းပေါင်း ၃,၆၄၀ ကျော် အဂတိလိုက်စားမှုနဲ့ ဧပြီလ ၂၇ ရက်ကစလို့ အမှုဖွင့် အရေးယူထားတယ်ဆိုပြီး စစ်ကောင်စီလက်ထက်မှာ အသစ်ခန့်ထားတဲ့ အဂတိလိုက်စားမှုတိုက်ဖျက်ရေး ကော်မရှင်ကို ကိုးကားကာ စစ်ကောင်စီထိန်းချုပ်ထားတဲ့သတင်းစာတွေမှာ ဖော်ပြပါတယ်။

   ဒေါ်နီလာကျော်ဟာ ရန်ကုန်တိုင်းအစိုးရအဖွဲ့ရဲ့ လျှပ်စစ်နဲ့စက်မှုလက်မှု၊ လမ်းပန်းဆက်သွယ်ရေးနဲ့ ဆောက်လုပ်ရေးဝန်ကြီးဌာန ၃ ခုကို တာဝန်ယူခဲ့သူဖြစ်ပါတယ်။

   သူဟာ အရည်အသွေးထိန်းချုပ်ရေးကုမ္ပဏီရွေးချယ်ရေးအဖွဲ့ ဥက္ကဋ္ဌ တာဝန်ထမ်းဆောင်ချိန် လုပ်ပိုင်ခွင့်ကိုသုံးပြီး ခင်မင်ရင်းနှီးတဲ့ကုမ္ပဏီကို လုပ်ငန်းချပေးတာ၊ အဲဒီကုမ္ပဏီကနေ ငွေကျပ် သိန်းပေါင်း ၃,၆၄၀ ကျော် ရယူခဲ့တာ စစ်ဆေးတွေ့ရှိခဲ့တာကြောင့်လို့ သတင်းမှာဖော်ပြပါတယ်။

   ဒီလိုစစ်ဆေးဖို့ တိုင်ကြားစာရခဲ့တာဖြစ်ပြီး အခုတော့ သူ့ကို အဂတိလိုက်စားမှု တိုက်ဖျက်ရေးဥပဒေပုဒ်မ ၅၅ အရ ရန်ကုန်က ကမာရွတ်ရဲစခန်းမှာ ပထမသတင်းပေး တိုင်ကြားချက်ဖွင့်၊ တရားစွဲဆိုဖို့ လုပ်နေတယ်ဆိုပြီး အဂတိလိုက်စားမှု တိုက်ဖျက်ရေး ကော်မရှင်က ပြောထားပါတယ်။

   လက်ရှိမှာ ဒေါ်နီလာကျော်ဟာ အင်းစိန်ထောင်ထဲ ထိန်းသိမ်းခံထားရပြီး ဒေါ်နီလာကျော် ထောင်ထဲမှာရှိတယ်ဆိုတာကို အခုလဆန်းပိုင်းက လွတ်ငြိမ်းခွင့်နဲ့ပြန်လွတ်လာတဲ့ ဒေါင်းတို့မျိုးဆက် သံချပ်အဖွဲ့က ကိုဇေယျာလွင်က ဘီဘီစီကို အတည်ပြုထားပါတယ်။

4. ၂၈ ဧပြီ ၂၀၂၁အကြမ်းဖက်မှုတွေရပ်ဖို့ အာဆီယံမှာ စစ်ကောင်စီသဘောတူခဲ့ပေမဲ့ သေဆုံးမှုတွေဆက်ရှိနေ

   စစ်အာဏာသိမ်းထားတာ ဒီနေ့ ရက်ပေါင်း ၈၆ ရက်ရှိလာနေပါပြီ။ ဒီကာလအတွင်း စစ်အာဏာသိမ်းဆန့်ကျင်ဆန္ဒပြမှုတွေကို ပစ်ခတ်နှိမ်နင်းရာကနေ သေဆုံးသူ ၇၀၀ ကျော်လာပြီလို့ နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP က နေ့စဉ်ထုတ်ပြန်တဲ့စာရင်းတွေက ဖော်ပြထားပါတယ်။

   ဒီစာရင်းမှာ နောက်ဆုံးသိရှိထားတဲ့သေဆုံးသူတွေထဲ မန္တလေးက ထမင်းကြော်ရောင်းသူ ကိုဇော်ရှိန်း(ခ)အီကြာကွေးနဲ့ မနေ့ ဧပြီ ၂၇ ရက်က ဒီမောဆိုမြို့နယ်မှာပစ်ခတ်ခံရလို့ သေဆုံးခဲ့တဲ့ ကိုပေါလုတို့လည်း ပါဝင်ပါတယ်။

   မန္တလေးက ကိုဇော်ရှိန်းဟာ အထက၂၄ အနီးဝန်းကျင်မှာ ညစဉ် ထမင်းကြော်‌ရောင်းတာပါ။ မဟာအောင်မြေမြို့နယ် အထက ၂၄ ကျောင်းကို စစ်ကောင်စီက တပ်စွဲထားတာ တလဝန်းကျင်ရှိပြီဖြစ်ပါတယ်။

   တပ်စွဲထားတဲ့ စစ်တပ်ဟာ ညစဉ် အနီးရပ်ကွက်တွေကို ခြိမ်းခြောက်ပစ်ခတ်တာ ဖမ်းဆီးစစ်ဆေးတာတွေပါ ရှိခဲ့တယ်လို့ ဒေသခံတွေကပြောပါတယ်။

   ဧပြီ ၂၆ရက်ညမှာ အဲဒီနားတဝိုက် ပစ်ခတ်မှုတွေဖြစ်ခဲ့ပြီး ကိုဇော်ရှိန်းဟာ စိန်ပန်းလမ်းနဲ့ ၄၁လမ်းထောင့်မှာ ကျောဘက်က‌နေ အသဲကို ပေါက်ထွက်ကာ ကျည်မှန်သေဆုံးတာ ဖြစ်ပါတယ်။

   ဆေးကုသဖို့ အချိန်တောင်မရဘဲ ကျည်မှန်ထားတဲ့သူ့ကို ကယ်ဆယ်ပြီးချိန်မှာ အသက်မရှိတာတွေ့ရတယ်လို့ မန္တလေးမြို့ခံလူမှုကူညီရေးအသင်းတွေကပြောပါတယ်။

   ဦးပေါလုကတော့ မနေ့ ဧပြီ ၂၇ရက်နေ့ နေ့လယ်ပိုင်းမှာ ဒီမောဆိုမြို့နယ်မှာ ပစ်ခတ်မှုအတွင်း သေဆုံးခဲ့ရတာဖြစ်ပါတယ်။

   ဒေသခံတွေ ကာထားတဲ့ အတားအဆီးတွေကို ရွာတချို့မှာ စစ်ကောင်စီ တပ်ဖွဲ့တွေက ဖယ်ရှားရင်း ပစ်ခတ်မှုကြောင့် ၆ မိုင် စံပြရွာက အသက် ၅၀ အရွယ် ဦးပေါလု သေဆုံးခဲ့တာ ဖြစ်တယ်လို့ ဒေသခံတွေက ပြောပါတယ်။

   စစ်ကောင်စီဘက်ကတော့ ဖေဖော်ဝါရီ ၁ ရက် စစ်အာဏာသိမ်းပြီးတဲ့နောက်ပိုင်း ပစ်ခတ်မှုတွေအတွင်း လူ ၂၀၀ ကျော်သာသေဆုံးထားပြီး ဒါကလည်း လုံခြုံရေးတပ်ဖွဲ့ဝင်တွေကို ပြန်လည်ရန်ပြုတိုက်ခိုက်တာကြောင့်လို့ ကြေညာထားပါတယ်။

   ဒါ့အပြင် AAPP က ထုတ်ပြန်ထားတဲ့ သေဆုံးထိခိုက်စာရင်းကိုလည်း ပယ်ချထားပြီး AAPP ဟာအခြေအမြစ်မရှိတဲ့လူမှုကွန်ရက်က အချက်အလက်တွေကို ယူပြီးဆူပူအောင်လှုံံ့ဆော်နေတာကြောင့် ဥပဒေနဲ့အညီထိရောက်စွာအရေးယူမယ်လို့လည်း ကြေညာထားတာဖြစ်ပါတယ်။

5. ၂၈ ဧပြီ ၂၀၂၁CDM ဆရာဝန်တွေ လက်မခံရေးစစ်ကောင်စီဖိအားပေးမှုကို တုံ့ပြန်ဖို့ ပုဂ္ဂလိကဆေးရုံတွေကို ဆရာဝန်တွေတောင်းဆို

   မြန်မာနိုင်ငံမှာ စစ်တပ်က အာဏာသိမ်းပြီး ၃ လနီးပါးရှိလာချိန်မှာ စစ်ကောင်စီအနေနဲ့ CDM လုပ်နေတဲ့ဆရာဝန်တွေကို ဖမ်းမိန့်ထုတ်နေတဲ့အပြင် ပုဂ္ဂလိက ဆေးရုံ၊ဆေးခန်းတွေမှာ CDM ဆရာဝန်တွေကို ကုသခွင့်ပေးရင် ဆေးရုံလိုင်စင်ပိတ်ပြီး ပိုင်ရှင်တွေကိုပါ အရေးယူမယ်လို့ ကြေညာထားပါတယ်။

   ဒီအခြေအနေကို မြန်မာနိုင်ငံပုဂ္ဂလိက ဆေးရုံများ အသင်းအနေနဲ့ ပုဂ္ဂလိကဆေးရုံတွေကိုယ်စား သဘောထားထုတ်ပြန်ပေးဖို့ ပုဂ္ဂလိက ဆေးရုံ ၁၅ ခုက ဆရာဝန်တွေက တောင်းဆိုလိုက်ပါတယ်။

   ဝိတိုရိယဆေးရုံ အုပ်ချုပ်ရေးအဖွဲ့က အကြမ်းမဖက်အာဏာဖီဆန်မှု CDM မှာပါဝင်တဲ့ ဆရာဝန်တွေကို ဆေးရုံမှာ မထိုင်နိုင်အောင် CDM အကြောင်းပြပြီး ထုတ်ပြန်လိုက်တဲ့စာတစ်စောင် လူမှုကွန်ယက်ပေါ် ပျံ့လာတာ၊ နောက်ပြီး မန္တလေးက တော်ဝင်နှင်းဆီဆေးရုံက သူ့ဝန်ထမ်းတွေကို ခေါ်ယူပြီး CDM မှာ ပါဝင်တဲ့ ကျန်းမာရေးဝန်ထမ်းတွေကို သူတို့ဆေးရုံမှာ လူနာတွေကို ဆေးကုသခွင့်မပြုနိုင်ဘူးဆိုပြီးပြောတဲ့ သတင်းတွေ ထွက်လာအပြီးမှာ ဆရာဝန်တွေရဲ့အခုလိုတောင်းဆိုမှု ထွက်လာတာပါ။

   တော်ဝင်နှင်းဆီက ပုဂ္ဂလိကကျန်းမာရေးဝန်ထမ်းတွေကတော့ CDM လုပ်တဲ့အစိုးရကျန်းမာရေးဝန်ထမ်းတွေနဲ့အတူ တသားတည်းရှိတယ်ဆိုတာပြဖို့ အလုပ်ထွက်ကြတာမျိုးအထိ ဖြစ်ခဲ့တာပါ။

   ‘လက်ရှိမှာ မြန်မာနိုင်ငံမှာဖြစ်နေတဲ့အခြေအနေတွေအပေါ်မူတည်ပြီး ပုဂ္ဂလိကဆေးရုံတွေ၊ ဆေးရုံအုပ်ချုပ်ရေးအဖွဲ့တွေက တယောက်နဲ့ တယောက်က မတူဘူး။ တုံ့ပြန်ပုံချင်းလည်း တူမှာမဟုတ်ဘူး။ အဲတော့ သူတို့ အနေနဲ့ကလည်း အားလုံးစည်းဝေးပြီးတော့ အချိန်လေးတစ်ခုတော့ ကျတော်တို့ ပေးရမှာပေါ့။ ဒါပေမဲ့ ကျွန်တော်တို့အနေနဲ့ကတော့ ပြည်သူလူထု မျှော်လင့်သလို၊ ကျတော်တို့ မျှော်လင့်သလို ထိရောက်တဲ့တုံ့ပြန်မှု တစ်ခု ပေါ်လာလိမ့်မယ်တော့ မျှော်လင့်တယ်’ လို့ တောင်းဆိုမှုလုပ်တဲ့ဆရာဝန်တစ်ဦးက ပြောပါတယ်။

   တကယ်လို့တောင်းဆိုတဲ့အတိုင်းမဖြစ်လာဘူးဆိုရင်လည်း ပြည်သူလူထုရဲ့အားကိုယူပြီး တောင်းဆိုစရာရှိ တာကို ဆက်တောင်းဆိုသွားမယ်လို့ သူက ဆက်ပြောပါတယ်။

   စစ်ကောင်စီဘက်ကတော့ CDM ပြုလုပ်နေတဲ့ဆရာဝန်တွေကို ပုဒ်မ ၅၀၅(က)နဲ့တရားစွဲဆိုထားတယ်ဆိုတဲ့ သတင်းတွေအပြင် အဲဒီဆရာဝန်တွေထဲက တချို့ ဘယ်မှာဆေးခန်းထိုင်နေတယ်ဆိုတဲ့ ဓာတ်ပုံတွေကိုပါ နိုင်ငံပိုင်သတင်းစာတွေမှာ သတိပေး ဖော်ပြနေပါတယ်။

6. ၂၈ ဧပြီ ၂၀၂၁ညစဉ်ဖြတ်တောက်ထားတဲ့ဝိုင်ဖိုင်အင်တာနက်လိုင်းတွေ ပြန်ပွင့်နေ

   အာဏာသိမ်းပြီးနောက်ပိုင်း ညစဉ်ညတိုင်း နာရီနဲ့ချီ အင်တာနက် အလုံးစုံပိတ်ပင်မှုလုပ်ထားရာကနေ ဒီနေ့ ဧပြီလ ၂၈ ရက်မှာတော့ စစ်ကောင်စီက ကေဘယ်ကြိုးတပ်ဝိုင်ဖိုင်အင်တာနက်လိုင်းတွေကို ပထမဆုံး အကြိမ် ပြန်ဖွင့်ပေးလာတာကိုတွေ့ရပါတယ်။

   စစ်ကောင်စီဟာ ညစဉ် ည ၁ နာရီကနေ မနက် ၉ နာရီအထိ အလုံးစုံအင်တာနက်ပိတ်ပင်မှုကို အာဏာသိမ်းပြီး ၂ ပတ်အကြာမှာ စတင်ပိတ်ပင်ခဲ့တာပါ။

   ပု့ိဆောင်ရေးနဲ့ဆက်သွယ်ရေးဝန်ကြီးဌာနက အော်ပရေတာတွေနဲ့ အင်တာနက် ဝန်ဆောင်မှုပေးသူတွေကို ဖေဖော်ဝါရီလ ၁၅ ရက်နေ ၂၈ ရက်အထိ ဒီအစဉ်အတိုင်း အင်တာနက်လိုင်းဖြတ်တောက်ဖို့ ညွှန်ကြားစာ ထွက်ခဲ့ပါတယ်။

   ဒါပေမဲ့ အဲဒီနောက်ပိုင်းအထိ ညစဉ် ၈ နာရီကြာ အင်တာနက်ဖြတ်တောက်မှုတွေ ဆက်ဖြစ်နေခဲ့သလို ဒါနဲ့ ပတ်သက်ပြီး အော်ပရေတာတွေ၊ ဝန်ဆောင်မှုပေးသူတွေက သုံးစွဲသူတွေကို တစုံတရာအသိပေးတာမျိုး မရှိခဲ့ပါဘူး။

   အခုတော့ ဒီလိုဖြတ်တောက်မှုဖြစ်အပြီး ၃ လနီးပါးအကြာမှာ ကေဘယ်ကြိုးနဲ့သုံးတဲ့ ဝိုင်ဖိုင်အင်တာ နက်လိုင်းတွေကို ပြန်ဖွင့်ပေးလိုက်တာပါ။

   ဒါပေမဲ့ မိုဘိုင်းဖုန်းနဲ့သုံးရတဲ့အင်တာနက်လိုင်းတွေ၊ အိမ်အပြင်သုံးနိုင်တဲ့ဝိုင်ဖိုင်အင်တာနက်စနစ်တွေကိုတော့ စစ်ကောင်စီ မတ်လ ၁၅ ရက်ကတည်းက ပိတ်ထားဆဲဖြစ်ပါတယ်။

   မိုဘိုင်းအင်တာနက်ကွန်ယက်ကိုသုံးပြီး အဖျက်အမှောက်လုပ်ငန်းတွေကို အွန်လိုင်းကနေချိတ်ဆက် လုပ်နေကြလို့ လတ်တလော ပြန်ဖွင့်ပေးဖို့မရှိသေးဘူးလို့ စစ်ကောင်စီပြောခွင့်ရသူက မတ်လ ၂၃ ရက်တုန်းက နေပြည်တော်မှာ လုပ်တဲ့သတင်းစာရှင်းလင်းပွဲမှာ ပြောထားဖူးပါတယ်။

   မြန်မာနိုင်ငံမှာ စစ်အာဏာသိမ်းမှုဖြစ်တဲ့ ဖေဖော်ဝါရီလ ၁ ရက်မှာ နာရီနဲ့ချီ အင်တာနက်ဖြတ်တောက်တာ၊ အဲဒီနောက် တစ်ပတ်အတွင်း ဖေဖော်ဝါရီလ ၇ ရက် နေ့လည်ပိုင်းကနေ နောက်တနေ့ ဖေဖော်ဝါရီလ ၈ ရက် နေ့လည် ၂ နာရီအထိ အင်တာနက်လိုင်းအားလုံးဖြတ်တောက်တဲ့ဖြစ်စဉ် ဖြစ်ခဲ့ပါသေးတယ်။

   မြန်မာနိုင်ငံမှာ စစ်တပ်က အာဏာသိမ်းမှုအပြီး အခုလို အင်တာနက်လိုင်းဖြတ်တောက်တာဟာ သတင်းစီးဆင်းမှုပြတ်တောက်အောင်၊ စစ်တပ်ရဲ့ဝါဒဖြန့်မှုတွေ ပျံ့အောင်လုပ်တဲ့လုပ်ရပ်လို့ ပြည်တွင်းရော၊ ပြည်ပမှာပါ ဝေဖန်မှုတွေ ရှိနေပါတယ်။

7. ၂၇ ဧပြီ ၂၀၂၁မြန်မာကို ပေးနေတဲ့ အထောက်အပံ့စီမံကိန်းတွေ ချက်ချင်းရပ်ဖို့ ဂျပန်အစိုးရကို Human Rights Watch အဖွဲ့တိုက်တွန်း

   ဂျပန်အစိုးရအနေနဲ့ မြန်မာနိုင်ငံအတွက် ပေးနေတဲ့ အထောက်အပံ့ အကူအညီတွေကို ချက်ချင်း ပြန်လည် သုံးသပ်ဖို့နဲ့ မြန်မာပြည်သူတွေအတွက် ထောက်ပံ့မှုတွေ မဖြစ်ဘဲ မြန်မာစစ်တပ်အတွက်သာ အကျိုးဖြစ်ထွန်းစေမယ့် စီမံကိန်းမျိုးတွေမှာ ကူညီဆောင်ရွက်နေတာကို ရပ်တန့်ဖို့ Human Rights Watch လူ့အခွင့်အရေး စောင့်ကြည့်ရေးအဖွဲ့က ကြေညာချက်ထုတ် တိုက်တွန်းလိုက်ပါတယ်။

   ဆန္ဒပြသူတွေကို လမ်းမတွေပေါ်မှာ လုံခြုံရေးတပ်ဖွဲ့ဝင်တွေက ပစ်ခတ်ဖြိုခွဲနေချိန်မှာ ဂျပန်အစိုးရအနေနဲ့ မြန်မာစစ်တပ် နောက်ဘာလုပ်မလဲဆိုတာကို စောင့်ကြည့်တဲ့ ချဉ်းကပ်နည်းမျိုး သုံးဖို့ မသင့်ကြောင်းနဲ့ မြန်မာနိုင်ငံကို ပေးနေတဲ့ ထောက်ပံ့မှုတွေကို ချက်ချင်း တာဝန်သိစွာ ပြန်လည်သုံးသပ်ဖို့ လိုကြောင်း Human Rights Watch အဖွဲ့ရဲ့ အာရှစီမံကိန်း အရာရှိ တက်ပေ ကာဆိုင်းက ကြေညာချက်ထဲမှာ ဖော်ပြထားပါတယ်။

   မြန်မာအစိုးရဝန်ကြီးဌာနတွေ ဆောင်ရွက်နေတဲ့ ODA အခြေခံအဆောက်အအုံ စီမံကိန်းတွေနဲ့ စစ်တပ် ထိန်းချုပ်တဲ့ အဖွဲ့အစည်းတွေ ပါဝင်ပတ်သက်နေတဲ့ တခြားအကူအညီ စီမံကိန်းတွေကို ဂျပန်အစိုးရအနေနဲ့ ချက်ချင်း ရပ်ဆိုင်းသင့်တယ်လို့လည်း ဖော်ပြထားပါတယ်။

   မြန်မာနိုင်ငံမှာ ODA စီမံကိန်းတွေ ချက်ချင်း ရပ်ဆိုင်းဖို့ ဖေဖော်ဝါရီလ ၂၅ ရက်နေ့တုန်းကလည်း Human Rights Watch အဖွဲ့နဲ့ တခြား အဖွဲ့အစည်း ၄ ဖွဲ့က ဂျပန်နိုင်ငံခြားရေးဝန်ကြီး တိုရှီမစ်ဆု မိုတက်ဂီ ထံ စာရေးတိုက်တွန်းခဲ့ပါတယ်။

   မြန်မာ ရဲတပ်ဖွဲ့အတွက် ထောက်ပံ့ငွေ ဒေါ်လာ ၉ သိန်း ၃ သောင်းပေးမယ် ဆိုပြီး၂၀၂၀ ခုနှစ် ဇူလိုင်လ ၂ ရက်နေ့က ထုတ်ဖော်ကြေညာခဲ့တဲ့ အစီအစဉ်က စစ်အာဏာသိမ်းမှုကြောင့် သိပ်မသေချာတော့ဘူးလို့ ဂျပန်နိုင်ငံခြားရေးဝန်ကြီးဌာန တာဝန်ရှိပုဂ္ဂိုလ်တွေက Human Rights Watch အဖွဲ့ကို ဧပြီလ ၁၅ ရက်နေ့က ပြောခဲ့ပါတယ်။ ဒါပေမဲ့ ဒီအစီအစဉ်က လုံးဝဖျက်လိုက်တာလားဆိုတာကိုတော့ ရှင်းရှင်းလင်းလင်း ပြောမသွားခဲ့သလို ဒီစီမံကိန်းနဲ့ ပတ်သက်လို့ရော၊ တခြား ဆောင်ရွက်နေဆဲ စီမံကိန်းတွေနဲ့ ပတ်သက်လို့ပါ ဂျပန်အစိုးရက တရားဝင် ထုတ်ဖော်ကြေညာတာမျိုး မရှိသေးပါဘူး။

8. ၂၇ ဧပြီ ၂၀၂၁တီးတိန်မှာ ညပိုင်း ပေါက်ကွဲမှုတွေဖြစ်

   ချင်းပြည်နယ် တီးတိန်မြို့မှာ ဒီကနေ့ ည ၈ နာရီ ကနေ ၁၀ နာရီ ဝန်းကျင် အတွင်း အသံဗုံးလို့ ယူဆရတဲ့ ပေါက်ကွဲမှုတချို့ ဖြစ်ခဲ့တယ်လို့ ဒေသခံတွေဆီက သိရပါတယ်။

   ပေါက်ကွဲသံတွေ ကြားရပေမဲ့ ဒေသခံတွေ အပြင်ထွက်ကြည့်နိုင်တာ မရှိလို့ ထိခိုက်ဒဏ်ရာ ရသူ ရှိမရှိ မသိရဘူးလို့ ဆိုပါတယ်။ အရေးပေါ်လူနာတင်ယာဥ်တွေ သွားလာတာ မတွေ့ရ၊ မကြားရသလို ပေါက်ကွဲမှု ဖြစ်ရာအနီးအနားက အိမ်တွေကို ထိမှန်ပေါက်ကွဲဖြစ်တာတွေ မရှိတဲ့အတွက် အသံဗုံးလို့ ယူဆတယ်လို့ ဒေသခံတွေက ဆိုပါတယ်။

   ပထမဆုံး ပေါက်ကွဲသံကို ညနေ ၇ နာရီ ၅၀ လောက်မှာ မြို့မရပ်ကွက် ဗိုလ်ချုပ်လမ်းပေါ် နာရီစင်အနီးက ယာဥ်ထိန်းရဲကင်းနားမှာ ဖြစ်ပွားတာကို စကြားရတယ်လို့ ဆိုပါတယ်။

   အဲဒီနောက် စစ်ကောင်စီ တပ်အင်အားတချို့ ရောက်လာပြီး ၈ နာရီ ၅၀ လောက်မှာ ပေါက်ကွဲသံ တစ်ခု ထပ်ကြားရပြီး မီးခိုးငွေ့တွေ တွေ့မြင်ရတယ်လို့ ဒေသခံတစ်ဦးက ပြောပါတယ်။

   နောက်ထပ် မြို့ပေါ်ရပ်ကွက် တစ်ခုမှာတော့ ည ၉ နာရီ ၄၀ မှာ ပေါက်ကွဲမှု ထပ်ဖြစ်ခဲ့တယ်လို့ ဆိုပါတယ်။

9. ၂၇ ဧပြီ ၂၀၂၁တိုင်းရင်းသားလက်နက်ကိုင်အဖွဲ့တွေ စုဖွဲ့မှုပုံစံသစ်လုပ်မယ်လို့ဆို

   တိုင်းရင်းသားလက်နက်ကိုင်အဖွဲ့ EAO တွေ စုစည်းနိုင်ရေးနဲ့ စုဖွဲ့မှုအသစ်ဖော်ဆောင်သွားနိုင်ရေး ညီနောင် EAO တွေ အားလုံးနဲ့ ညှိနှိုင်းမယ်လို့ အပစ်ရပ်တိုင်းရင်းသားလက်နက်ကိုင်အဖွဲ့တွေရဲ့ နှစ်ရက်ကြာအစည်းအဝေးအပြီး ဒီကနေ့မှာ ကြေညာလိုက်ပါတယ်။

   အပစ်ရပ်လက်မှတ်ထိုးထားတဲ့တိုင်းရင်းသားလက်နက်ကိုင်အဖွဲ့တွေရဲ့ငြိမ်းချမ်းရေးလုပ်ငန်းစဥ်ဦးဆောင်အဖွဲ့ PPST အစည်းအဝေးကို မနေ့ကနဲ့ ဒီကနေ့ ပြုလုပ်ခဲ့ပြီးနောက် အချက် ၇ ချက်ပါတဲ့ အဲဒီကြေညာချက်ကို ထုတ်ပြန်ခဲ့တာ ဖြစ်ပါတယ်။

   မြန်မာနိုင်ငံရဲ့ လက်ရှိ နိုင်ငံရေး အခြေအနေနဲ့ ပတ်သက်ပြီး ပြုလုပ်တဲ့ အဲဒီအစည်းအဝေးကနေ မြန်မာနိုင်ငံရဲ့ ပဋိပက္ခတွေ ချုပ်ငြိမ်းရေး ကြိုးပမ်းမယ့်အကြောင်း၊ အာဆီယံနဲ့ နိုင်ငံတကာ ကြားဝင်စေ့စပ်မှုကို ကြိုဆိုကြောင်းနဲ့ ပြည်ထောင်စုလွှတ်တော်ကိုယ်စားပြုကော်မတီ CRPH ကို PPST အနေနဲ့ အစုအဖွဲ့လိုက်သော်လည်းကောင်း တစ်ဖွဲ့ချင်းလိုက်သော်လည်းကောင်း ဆက်စပ်ညှိနှိုင်းပံ့ပိုးမှုတွေ ဆက်လုပ်မယ်ဆိုတဲ့အကြောင်း စတဲ့ အချက်တွေလည်း အဲဒီ ကြေညာချက်မှာ ပါရှိပါတယ်။

   CRPH ကို မတရားအသင်းအဖြစ် စစ်ကောင်စီက ကြေညာထားတာဖြစ်ပါတယ်။

   ဒါအ့ပြင် အစည်းအဝေးအပြီး ယာယီအဖွဲ့ခေါင်းဆောင် ဗိုလ်ချုပ်ကြီး ယွက်စစ်ရဲ့ မိန့်ခွန်းမှာလည်း ငြိမ်းချမ်းစွာ တော်လှန်ရေးဆင်နွှဲနေတဲ့ လူထုကို ထောက်ခံအားပေးကူညီမှုတွေကို PPST အနေနဲ့လည်းကောင်း တစ်ဖွဲ့ချင်းအနေနဲ့လည်းကောင်း ဆက်လက်ဆောင်ရွက်မယ်လို့ ဆိုပါတယ်။

   ဒါပေမဲ့ တစ်နိုင်ငံလုံး အပစ်ရပ် NCA စာချုပ်ကိုတော့ဆက်လက် လက်ခံထားပြီး အဲဒီစာချုပ်ကို အခြေခံပြီး သက်ဆိုင်ရာ အဖွဲ့အစည်းတွေ ပြည်သူနဲ့ တိုင်းပြည်အကျိုးအတွက် ဝိုင်းဝန်းဆောင်ရွက်ကြဖို့ တိုက်တွန်းတယ်လို့ အဲဒီ မိန့်ခွန်းကြေညာချက်မှာ ပါရှိပါတယ်။

   ကချင်ပြည်နယ်နဲ့ ကရင်ပြည်နယ်မှာတော့ KIA၊KNU တွေနဲ့စစ်တပ်တို့ တိုက်ပွဲတွေ ဖြစ်နေပါတယ်။ အဲဒီလို စစ်ရေးတင်းမာမှုတွေရှိနေချိန် တစ်ဖက်မှာလည်းကရင်ပြည်နယ်အတွင်းက တိုင်းရင်းသားလက်နက်ကိုင်အဖွဲ့နှစ်ဖွဲ့ဖြစ်တဲ့ ဒီမိုကရေစီအကျိုးပြုကရင့်တပ်မတော် DKBA ၊ကရင်အမျိုးသားအစည်းအရုံးငြိမ်းချမ်းရေးကောင်စီ KNU/KNLA-PC တို့စစ်ကောင်စီနဲ့ မနေ့က တွေ့ဆုံပြီး ဒေသဖွံ့ဖြိုးရေး ကိစ္စတွေအပါအဝင် NCA လမ်းကြောင်းအတိုင်း ဆက်သွားမယ့်ကိစ္စတွေကို ဆွေးနွေးခဲ့ကြတယ်လို့ ဆိုပါတယ်။

10. ၂၇ ဧပြီ ၂၀၂၁ရန်ကုန်နဲ့ မြို့ကြီးတွေမှာ တကျော့ပြန် လမ်းပေါ်ဆန္ဒပြပွဲတွေ ရှိလာ

    ရန်ကုန်နဲ့မြို့ကြီးတွေမှာ တကျော့ပြန် လမ်းပေါ်ဆန္ဒပြပွဲတွေ ဆက်ရှိနေပြီး ဘူးသပိတ် နှိုးဆော်မှုတွေလည်း အရှိန်ကောင်းနေပါတယ်။

    မနေ့ကစစ်ကောင်စီ ယာဉ်တန်း တိုက်ခိုက်ခံရတဲ့ ချင်းပြည်နယ်မင်းတပ်မှာလည်း ဒီကနေ့ အပြန်အလှန်ပစ်ခတ်မှုတွေပိုပြင်းထန်ခဲ့ပါတယ်။ ကိုနန္ဒက ပြောပြမှာပါ။

11. ၂၇ ဧပြီ ၂၀၂၁တာဝန်ပြန်ထမ်းဆောင်မယ့် CDM ဝန်ထမ်းတွေကိုတရားစွဲထားတာတွေပြန်ရုပ်သိမ်းပေးမယ်လို့ကြေညာ

    စစ်အာသိမ်းဆန့်ကျင်မှုအာဏာဖီဆန်ရေးCDM လှုပ်ရှားမှုလုပ်ခဲ့ကြတဲ့နိုင်ငံ့ဝန်ထမ်းတွေတာဝန်ပြန်ထမ်းဆောင်လိုရင်သက်ဆိုင်ရာဝန်ထမ်းအကြီးအကဲရဲ့ထောက်ခံမှု၊သက်ဆိုင်ရာ အဖွဲ့အစည်းတွေရဲ့ စိစစ်ထောက်ခံချက်တွေနဲ့အတူတရားစွဲထားတာတွေပြန်ရုပ်သိမ်းပေးပြီးတာဝန်ပြန်ထမ်းဆောင်ခွင့်ပြုမယ်လို့စစ်ကောင်စီမီဒီယာမြန်မာ့အသံနဲ့ရုပ်မြင်သံကြားကနေကြေညာပါတယ်။

    CDM လှုပ်ရှားမှုတွင်ပါဝင်ခဲ့မှုကြောင့်အရေးယူခံခဲ့ရတဲ့ နိုင်ငံ့ဝန်ထမ်းတချို့ဟာ ဆူပူအကြမ်းဖက်မှုတွေမှာပါဝင်မှုမရှိခဲ့တဲ့ အပြင် အရင် တာဝန်ထမ်းဆောင်ခဲ့တာတွေဟာ ကျေနပ်ဖွယ်ရှိကြောင်းနဲ့ ဆက်လက်တာဝန်ပေးဖို့သက်ဆိုင်ရာ ဝန်ထမ်းအဖွဲ့အစည်း အကြီးအမှူးက ထောက်ခံရင် အဲဒီလို ရုပ်သိမ်းပြီး တာဝန်ပြန်လည် ထမ်းဆောင်ခွင့်ပေးမယ်လို့ ဆိုပါတယ်။

    တာဝန်ပြန်ထမ်းဆောင်လိုတဲ့ နိုင်ငံ့ဝန်ထမ်းတွေရဲ့ ဆိုရှယ်မီဒီယာတွေပေါ်က လှုပ်ရှားခဲ့မှု၊ ဆူပူအကြမ်းဖက်မှုတွေမှာ ကိုယ်တိုင်ပါဝင်ခဲ့မှု ရှိမရှိ စတာတွေကို သက်ဆိုင်ရာ ဒေသအုပ်ချုပ်ရေး အဖွဲ့အစည်းတွေ၊ တရားစွဲ အဖွဲ့အစည်းတွေရဲ့ သဘောထားမှတ်ချက်၊ ထောက်ခံချက်တွေ ဝန်ထမ်းရဲ့ ကိုယ်တိုင် ကတိဝန်ခံချက်တွေကို အခြေခံပြီး ရာဇဝတ်ကြောင်းအရ အရေးယူထားတာတွေကို ပြန်လည် ရုပ်သိမ်းပေးမယ်လို့ ဆိုပါတယ်။

    စိစစ်ချက်တွေအရ ရာဇသတ်ကြီး ပုဒ်မ ၅၀၅(က) သို့မဟုတ် ပုဒ်မ ၅၀၅-က နဲ့ တရားစွဲဆိုခံထားရသူတွေကိုလည်းပြန်ရုပ်သိမ်းပြီး နိုင်ငံ့ဝန်ထမ်းနည်းဥပဒေအရသာလျှော့ပေါ့တဲ့ ပြစ်ဒဏ်ချမှတ်ပြီး တာဝန်ပြန်လည်ထမ်းဆောင်ခွင့်ပြုမယ်လို့ စစ်ကောင်စီ သတင်းထုတ်ပြန်ရေးအဖွဲ့က သတင်းထုတ်ပြန်ခဲ့ပါတယ်။

    တစ်ဖက်မှာလည်း CDM ဝန်ထမ်းတွေကို ဖမ်းဆီးတာ၊ အလုပ်က ထုတ်ပစ်တာ စတာတွေကို လုပ်ဆောင်နေတဲ့အပြင် CDM လှုပ်ရှားမှုလုပ်နေတဲ့ ဆရာဝန်တွေကို တရားစွဲဆိုတာ၊ နိုင်ငံကူးလက်မှတ် ပိတ်ပင်တာတွေ လုပ်ဆောင်နေပြီး သူတို့ကို လက်ခံဆေးကုသခွင့် ပေးတဲ့ ဆေးရုံဆေးခန်းတွေကို လိုင်စင်ပိတ်သိမ်းအရေးယူမယ်လို့ ပြောဆိုထားပါတယ်။

12. ၂၇ ဧပြီ ၂၀၂၁ဘဏ်စာရင်းအသစ်ဖွင့်ရင် ငွေအကန့်အသတ်မရှိ ထုတ်ခွင့်ပြုမယ်လို့ ဗဟိုဘဏ် ထုတ်ပြန်

    ဒေသတချို့မှာ ဆူပူအကြမ်းဖက်မှုတွေကြောင့် လက်ဝယ်ရှိ ငွေသားလုံခြုံမှုအတွက် စိတ်ပူပန်နေသူတွေအနေနဲ့ ဘဏ်တွေမှာ အပ်နှံလိုပါက အထူးကိစ္စရပ်အဖြစ် ဆောင်ရွက်ပေးသွားမယ်လို့ ဗဟိုဘဏ်က ဒီကနေ့ နေ့စွဲနဲ့ ကြေညာချက် ထုတ်ပြန်လိုက်ပါတယ်။

    ၂၀၂၁ ခုနှစ် မေလ ၃ ရက်နေ့ကစလို့ ဘဏ်တွေမှာ ဘဏ်စာရင်း အသစ်ဖွင့်ပြီး ငွေသား အပ်နှံခွင့် ပြုမှာ ဖြစ်ကြောင်းနဲ့ အဲဒီဘဏ်စာရင်းအသစ်ကနေ ငွေသား ပြန်လည် ထုတ်ယူလိုပါက အပ်နှံငွေသားပမာဏ ကန့်သတ်ချက် မရှိဘဲ ထုတ်ယူခွင့် ပြုသွားမယ်လို့ ကြေညာချက်မှာ ဖော်ပြထားပါတယ်။

    မေလ ၃ ရက် မတိုင်ခင် ဘဏ်စာရင်း ဖွင့်လှစ်ထားသူတွေအနေနဲ့ ဗဟိုဘဏ်က မူလငွေထုတ် ကန့်သတ်ချက်တွေအတိုင်း ထုတ်ယူခွင့် ပြုမှာ ဖြစ်ပြီး အဲဒီ ကန့်သတ်ချက်တွေကို ဖြေလျှော့ပေးသွားဖို့ကိုလည်း စီစဉ်ဆောင်ရွက်နေတယ်လို့ ဆိုပါတယ်။

13. ၂၇ ဧပြီ ၂၀၂၁အာဆီယံဘုံသဘောတူညီချက်အပေါ် အပစ်ရပ်အဖွဲ့တွေရဲ့ သဘောထား

    ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST အစည်းအဝေးကို မနေ့က ကျင်းပခဲ့ရာမှာ NUG ဖွဲ့စည်းမှုနဲ့ မြန်မာ့အရေး အာဆီယံရဲ့ ဘုံသဘောတူညီချက်တွေကို ဒီအစည်းအဝေးမှာ ဆွေးနွေးခဲ့ကြပါတယ်။ အပစ်ရပ် လက်နက်ကိုင် အဖွဲ့တွေရဲ့ သဘောထားက ဘယ်လိုရှိပါသလဲ။ ကိုနန္ဒက ပြောပြမှာပါ။

14. ၂၇ ဧပြီ ၂၀၂၁မြန်မာနိုင်ငံမှာ ကျန်းမာရေးဝန်ထမ်းတွေအပေါ် အကြမ်းဖက်နေမှုအကြောင်း ကုလ အိုချာအဖွဲ့ အစီရင်ခံစာထုတ်

    မြန်မာနိုင်ငံမှာ ၂၀၂၁ ခုနှစ် ဖေဖော်ဝါရီလ ၁၁ ရက်နေ့ကနေ ဧပြီလ ၁၂ ရက်နေ့အထိ ကျန်းမာရေးဝန်ထမ်းတွေ၊ အဆောက်အအုံတွေနဲ့ အရေးပေါ် လူနာတင်ယာဉ်တွေအပေါ် အကြမ်းဖက် တိုက်ခိုက်ခဲ့မှု ဖြစ်ရပ်တွေ အကြောင်း လေ့လာတွေ့ရှိချက်တစ်ခုကို ကုလသမဂ္ဂ လူသားချင်း စာနာ ထောက်ထားမှု ဆိုင်ရာ ညှိနှိုင်းရေးရုံး UN OCHA က ဒီကနေ့ ထုတ်ပြန်လိုက်ပါတယ်။

    အဲဒီအစီရင်ခံစာမှာ မတ်လ ၂၈ ရက်နေ့ နေ့လယ် ၁ နာရီက ရန်ကုန်မြို့ စမ်းချောင်းရပ်ကွက်မှာ ဖြစ်ခဲ့တဲ့ ဖြစ်ရပ်ကိုလည်း ထည့်သွင်း ဖော်ပြထားပါတယ်။ ဆန္ဒပြနေသူတွေကို လုံခြုံရေးတပ်ဖွဲ့ဝင်တွေက စတင် ပစ်ခတ်ခဲ့ရာမှာ ဆန္ဒပြသူတွေ အာရှတော်ဝင်ဆေးရုံထဲ ဝင်ပြေးပုန်းခဲ့ကြကြောင်း၊ ရဲနဲ့ စစ်သားတွေက ဆေးရုံထဲအထိ လိုက်ဖမ်းခဲ့ကြပြီး ရော်ဘာကျည်တွေနဲ့ ပစ်ခတ်ခဲ့တဲ့အတွက် ဆေးရုံထဲမှာ ရှိနေတဲ့ ဆေးရုံဝန်ထမ်း အမျိုးသားတစ်ဦး ဒဏ်ရာရခဲ့တယ်လို့ ဆိုပါတယ်။

    လုံခြုံရေးတပ်ဖွဲ့ဝင်တွေဟာ အခင်းဖြစ်ပွားအပြီး နာရီဝက်လောက် ဆေးရုံ မြေညီထပ်နဲ့ ဆေးရုံတဝိုက်ကို စီးနင်း တပ်စွဲထားခဲ့ကြောင်းနဲ့ လုံခြုံရေးတပ်ဖွဲ့ရဲ့ ပစ်ခတ်မှုတွေဟာ နှလုံးရောဂါ ဝေဒနာ ခံစားနေရသူတွေကို ကုသပေးနေတဲ့ ပြင်ပလူနာဆောင်နားမှာ ဖြစ်ပွားခဲ့တယ်လို့ ဖော်ပြထားပါတယ်။

    မတ်လ ၇ ရက်နေ့တုန်းကလည်း နိုင်ငံတဝန်းက ဆေးရုံ ၂၀ ကျော်ကို စစ်တပ်က ဝင်ရောက် တပ်စွဲခဲ့ရာမှာ ဝင်ရောက် စီးနင်းစဉ်အတွင်း စစ်တပ်က ကျည်ဆန်အစစ်၊ မျက်ရည်ယိုဗုံးတွေနဲ့ ရော်ဘာကျည်တွေကို သုံးခဲ့ကြောင်း၊ ကျန်းမာရေးဝန်ထမ်းတွေ ပိတ်မိနေတဲ့ ဆေးရုံတွေထဲကို မျက်ရည်ယိုဗုံးတွေနဲ့ ပစ်ခတ်၊ ဝန်ထမ်းတွေကို ရိုက်နှက်၊ လူနာခန်းတွေထဲ ဝင်ရောက် ရှာဖွေတာမျိုးတွေ လုပ်ခဲ့ကြောင်းနဲ့ တချို့နေရာတွေမှာ CCTV စောင့်ကြည့်ကင်မရာ မှတ်တမ်းတွေကို ဖျောက်ဖျက်ပစ်တာမျိုး၊ ဆေးဝါးအထောက်အပံ့တွေကို ဖျက်ဆီးပစ်တာမျိုးတွေ ရှိခဲ့ကြောင်း အဲဒီအစီရင်ခံစာမှာ ဖော်ပြထားပါတယ်။

    ဆန္ဒပြသူတွေကို ဆေးကုသပေးတဲ့ ကယ်ဆယ်ရေး အဖွဲ့အစည်း ဌာနတွေရဲ့ ဆေးပစ္စည်း သိုလှောင်ခန်းတွေကို စီးနင်းရှာဖွေတာမျိုးတွေ ရှိခဲ့ပြီး ဒဏ်ရာရထားတဲ့ အရပ်သားတွေကို နိုင်ငံတဝန်းက ပုဂ္ဂလိက ဆေးခန်းနဲ့ ဆေးရုံတွေမှာ စစ်တပ်ကို အကြောင်းမကြားဘဲ ဆေးကုပေးတာမျိုး မလုပ်ကြဖို့ တရားဝင် ညွှန်ကြားစာ ထုတ်ပြန်ထားတယ်လို့ အဲဒီအစီရင်ခံစာမှာ ဖော်ပြထားပါတယ်။

    CDM မှာပါတယ်လို့ ယူဆတဲ့ ကျန်းမာရေး ဝန်ထမ်းတွေကို ခြိမ်းခြောက်တာမျိုးတွေ၊ ဖမ်းဆီးထိန်းသိမ်းတာမျိုးတွေ၊ ဝန်ထမ်းအိမ်ရာတွေကနေ ဖယ်ခိုင်းတာမျိုးတွေ ရှိနေပြီး ဧပြီလ ၉ ရက်နေ့က ရုပ်မြင်သံကြားကနေ ထုတ်လွှင့်ပြသတဲ့ သတင်းစာ ရှင်းလင်းပွဲမှာ အာဏာသိမ်းစစ်ကောင်စီက CDM မှာ ပါဝင်တဲ့ ကျန်းမာရေးဝန်ထမ်းအားလုံးရဲ့ လုပ်ရပ်ကို genocide လူမျိုးတုံး သတ်ဖြတ်မှု အဖြစ် ယူဆနိုင်တယ်လို့ ထုတ်ဖော်ကြေညာသွားခဲ့တယ်လို့ ဆိုပါတယ်။

    ကျန်းမာရေး ဝန်ဆောင်မှုလုပ်ငန်းတွေ၊ ထိခိုက်ဒဏ်ရာရထားသူ၊ နာမကျန်းဖြစ်နေသူတွေကို အကာအကွယ်ပေးရေး၊ ဆေးကုသခံဖို့ လိုအပ်နေသူ ဘယ်သူ့ကိုမဆို ကျင့်ဝတ်တာဝန်နဲ့အညီ ကျန်းမာရေး ဝန်ထမ်းတွေက ဆေးကုသပေးနိုင်ခွင့်ရှိရေး စတဲ့ လူသားချင်းစာနာထောက်ထားမှုနဲ့ လူ့အခွင့်အရေးဆိုင်ရာ နိုင်ငံတကာ ဥပဒေပါ အချက်တွေကို ကုလသမဂ္ဂအဖွဲ့ဝင် နိုင်ငံအားလုံးအနေနဲ့ လိုက်နာဖို့ လိုတယ်လို့ ကုလသမဂ္ဂ လူသားချင်း စာနာ ထောက်ထားမှု ဆိုင်ရာ ညှိနှိုင်းရေးရုံး UN OCHA က တိုက်တွန်းလိုက်ပါတယ်။

15. ၂၇ ဧပြီ ၂၀၂၁ကယား ဒီမောဆိုမြို့နယ်မှာ ပစ်ခတ်ခံရပြီး အမျိုးသားတစ်ဦးသေဆုံး

    ကယားပြည်နယ် ဒီမောဆိုမြို့နယ်မှာ ဒီကနေ့ နေ့လယ်ပိုင်းမှာ စစ်ကောင်စီတပ်ဖွဲ့ဝင်တွေရဲ့ ပစ်ခတ်မှုကြောင့် အမျိုးသားတစ်ဦး သေဆုံးခဲ့တယ်လို့ ဒေသခံတွေဆီက သိရပါတယ်။

    ဒေသခံတွေ ကာထားတဲ့ အတားအဆီးတွေကို ရွာတချို့မှာ စစ်ကောင်စီ တပ်ဖွဲ့တွေက ဖယ်ရှားရင်း ပစ်ခတ်မှုကြောင့် ၆ မိုင် စံပြရွာက အသက် ၅၀ ဝန်းကျင် အမျိုးသားတစ်ဦး သေဆုံးခဲ့တာ ဖြစ်တယ်လို့ ဒေသခံတွေက ပြောပါတယ်။

16. ၂၇ ဧပြီ ၂၀၂၁လှိုင်သာယာမှာ ဗုံးပစ်တယ်ဆိုတဲ့သံသယနဲ့ လူငယ် ၅ ဦး စစ်ဆေးခံနေရ

    စစ်အုပ်ချုပ်ရေးအမိန့်ကြေညာထားတဲ့ ရန်ကုန်မြို့နယ် ၆ မြို့နယ်မှာပါဝင်တဲ့ လှိုင်သာယာထဲက အမှတ် ၁၉ ရပ်ကွက်မှာ အသက်မပြည့်သေးတဲ့ လူငယ် ၅ ဦးဟာ လက်လုပ်ဗုံးပစ်တယ်ဆိုတဲ့သံသယနဲ့ ဖမ်းဆီးစစ်ဆေးခံနေရတယ်လို့ ဒီဖြစ်ရပ်နဲ့နီးစပ်သူတွေက ပြောပါတယ်။

    အသက် ၁၅ နှစ်အောက် ဒီလူငယ် ၅ ဦးဟာ ရပ်ကွက်ထဲက ဦးချစ်မောင်လမ်းထဲမှာရှိတဲ့ လမ်းမှူးအိမ် ဗုံးပစ်ခံရတယ်ဆိုတာကြားလို့ သွားကြည့်ရာကနေ ဧပြီလ ၂၅ ရက် ညနေ ၅ နာရီခွဲကတည်းက ရပ်ကွက်ရုံးမှာ ဖမ်းဆီး စစ်ဆေးခံထားရတယ်လို့ ဒေသခံတွေက ပြောပါတယ်။

    ‘ဗုံးပစ်သွားတယ်ဆိုတဲ့အသံကြားတော့ သူတို့က စပ်စုချင်တဲ့စိတ်နဲ့သွားကြည့်တာ။ အဲဒီမှာ သူတို့နဲ့ အတူ မပေါက်သေးတဲ့လက်လုပ်ဗုံးကိုတွေ့တယ်ဆိုပြီး လူကြီးတွေက သံသယရှိတယ်ဆိုပြီး အဖမ်းခံလိုက်ရတာ’လို့ ရပ်ကွက်ဒေသခံတစ်ဦးကပြောပါတယ်။

    ဒီလူငယ်တွေအားလုံးဟာ ဦးချစ်မောင်လမ်းထဲကပဲဖြစ်ပါတယ်။ လောလောဆယ် ဒီလူငယ် ၅ ဦးကို ရပ်ကွက်ရုံးမှာပဲ ခေါ်ယူစစ်ဆေးနေတာဖြစ်ပြီး နှိပ်စက်တာမျိုးတော့ မရှိဘူးလို့ သိရပါတယ်။

    ဘီဘီစီက နောက်ဆုံးရတဲ့သတင်းအရဆိုရင် ဒီလူငယ်တွေထဲက ၂ ဦးကို ပြန်လွှတ်ပေးမယ့်ပုံရှိတယ်လို့ ရပ်ကွက်မှာနေထိုင်သူတွေကပြောပါတယ်။

    ရပ်ကွက်ထဲမှာတော့ စစ်ကောင်စီတပ်တွေ ရံဖန်ရံခါ ကင်းလှည့်တာမျိုးရှိပေမဲ့ လက်နက်ခဲယမ်းတွေကို အပ်ဖို့ကိုတော့ နေ့တိုင်းနီးပါး လိုက်လံဆော်သြနေတာမျိုးရှိတယ်လို့ ရပ်ကွက်မှာနေထိုင်သူတွေက ပြောပါတယ်။

17. ၂၇ ဧပြီ ၂၀၂၁မြန်မာ့အရေး အာဆီယံဦးဆောင်မှု သက်ရောက်မှုရှိနိုင်လို့ အမေရိကန်ပြော

    မြန်မာ့အရေး အာဆီယံအဖွဲ့ဝင်နိုင်ငံတွေက ခေါင်းဆောင်တွေရဲ့ အားထုတ်မှုဟာ ထိရောက်တဲ့သက်ရောက်မှုရှိနိုင်တယ်ဆိုပြီး အမေရိကန်နိုင်ငံခြားရေးဝန်ကြီးဌာနပြောခွင့်ရသူက ပြောလာပါတယ်။

    မြန်မာစစ်တပ်ကြောင့်ဖြစ်တဲ့ဒီအကျပ်အတည်းကို ငြိမ်းချမ်းစွာ အဖြေရှာဖို့ လုပ်တဲ့ အာဆီယံရဲ့အားထုတ်မှုကိုလည်း အသိအမှတ်ပြုတယ်လို့ သူက ပြောပါတယ်။

    စစ်တပ်အနေနဲ့ ဒီအကျပ်အတည်းကို ဖြေရှင်းဖို့ တကယ့်ခြေလှမ်းတွေဖြစ်တဲ့ ထိန်းသိမ်းထားသူတွေကို လွှတ်ဖို့၊ အကြမ်းဖက်မှု အဆုံးသတ်ဖို့၊ တွေ့ဆုံစကားပြောဆိုမှုကို စိတ်ပါလက်ပါလုပ်ဆောင်ဖို့ စတဲ့အချက်တွေကို သူက တိုက်တွန်းထားပါတယ်။

    ဒါဟာ မြန်မာ့အရေးအာဆီယံထိပ်သီးဆွေးနွေးပွဲနဲ့ပတ်သက်ပြီး အမေရိကန်ဘက်က တရားဝင်ပြောဆိုလာမှုလည်းဖြစ်ပါတယ်။

    ဧပြီလ ၂၄ ရက်တုန်းက ဂျာကာတာမှာလုပ်တဲ့ အာဆီယံခေါင်းဆောင်တွေ ထိပ်သီးဆွေးနွေးပွဲကနေရခဲ့တဲ့ဘုံသဘောတူညီချက်တွေထဲမှာ မြန်မာ့အကျပ်အတည်း ငြိမ်းချမ်းစွာအဖြေရှာနိုင်ရေးအတွက် သက်ဆိုင်ရာပါဝင်ပတ်သက်သူတွေအားလုံးတွေ့ဆုံနိုင်ဖို့ အာဆီယံအထူးသံတမန်ထားရှိဖို့ ၊ လူသားချင်းစာနာမှုအကူအညီပေးဖို့ စတဲ့အချက်တွေလည်း ပါဝင်ပါတယ်။

    ဒါပေမဲ့ အာဆီယံက အဆိုပြုတဲ့ မြန်မာနိုင်ငံကို လာရောက်လိုတဲ့ခရီးစဉ်တွေကို ပြည်တွင်းတည်ငြိမ်မှုကို ကြည့်ပြီး စဉ်းစားမယ်ဆိုပြီးတော့ စစ်ကောင်စီဥက္ကဋ္ဌက ဆွေးနွေးပွဲသွားတက်ခဲ့အပြီး ၂ ရက်အကြာ ဧပြီလ ၂၆ ရက်မှာလုပ်တဲ့ ကောင်စီအဖွဲ့ဝင်တွေနဲ့အစည်းအဝေးမှာ ပြောထားတာကို တွေ့ရပါတယ်။

18. ၂၇ ဧပြီ ၂၀၂၁ရခိုင်မှာ စစ်ကောင်စီကကျင်းပမယ့် ရွေးကောက်ပွဲအတွက်ဆိုပြီး မှတ်ပုံတင်တွေလုပ်ပေးနေ

    ရခိုင်ပြည်နယ်ထဲမှာတော့ စစ်ကောင်စီက တနှစ်အတွင်း ကျင်းပမယ်လို့ပြောထားတဲ့ရွေးကောက်ပွဲမှာ မဲပေးနိုင်ဖို့ဆိုပြီး အသက် ၁၈ နှစ်ပြည့်ပြီးသူတွေကို ပြည်နယ်စီမံအုပ်ချုပ်ရေးကောင်စီက မှတ်ပုံတင်တွေ လုပ်ပေးနေပါတယ်။

    ဒီနေ့ ဧပြီလ ၂၇ ရက်မှာတော့ ပြည်နယ်မြို့တော် စစ်တွေခရိုင်အတွင်းက မြို့ပေါ်ရပ်ကွက် ၁ ခုနဲ့ ကျေးရွာအုပ်စု ၃ ခုက မှတ်ပုံတင်မရှိသေးတဲ့ အသက် ၁၈ နှစ်ပြည့်ပြီးသူ ၄၄၉ ဦးကို စစ်တွေမြို့ ဦးဉတ္တမခန်းမမှာ မှတ်ပုံတင်တွေထုတ်ပေးခဲ့တာဖြစ်ပါတယ်။

    ဒီလိုမှတ်ပုံတင်တွေထုတ်ပေးတာဟာ လာမယ့်ရွေးကောက်ပွဲမှာ မဲမသမာမှုတွေနဲ့ မဲပေးပိုင်ခွင့်ဆုံးရှုံးမှုတွေမရှိစေဖေို့ ပန်းခင်းစီမံချက်ဆိုပြီး ကြိုတင်ပြင်ဆင်နေတာလို့ ပြည်နယ်စီမံအုပ်ချုပ်ရေးကောင်စီပြောခွင့်ရသူ ပြည်နယ်ဥပဒေချုပ်ဦးလှသိန်းက ပြောပါတယ်။

    ဒါပေမဲ့ အိမ်ထောင်စုစာရင်းရှိတဲ့ တိုင်းရင်းသားနိုင်ငံသားတွေကိုသာ အဓိကထားပြီး မှတ်ပုံတင်တွေ ထုတ်ပေးနေတာလို့ သိရပါတယ်။

    လောလောဆယ် စစ်တွေခရိုင်ထဲမှာ ဒီစီမံချက်ကို အဓိကထားလုပ်နေပြီး လမ်းပန်းဆက်သွယ်ရေးနဲ့လုံခြုံရေးကောင်တဲ့ ခရိုင်တွေ၊ မြို့နယ်တွေမှာ ကွင်းဆင်းလုပ်ပေးဖို့ရှိတယ်လို့ စစ်တွေခရိုင် လဝကဦးစီးမှူးက ပြောထားပါတယ်။

    နိုင်ငံပိုင်သတင်းစာမှာဖော်ပြတဲ့ စစ်ကောင်စီဥက္ကဋ္ဌရဲ့ အာဆီယံအထူးအစည်းဝေးပွဲမှာ ပြောကြားချက်အရဆိုရင် ရွေးကောက်ပွဲမှာ မဲပေးနိုင်ဖို့ လူဦးရေ ၄ သန်းခွဲကျော်ကို မှတ်ပုံတင်လုပ်ပေးမယ့် အစီအစဉ်ရှိနေပါတယ်။

19. ၂၇ ဧပြီ ၂၀၂၁အာဆီယံခေါင်းဆောင်တွေရဲ့အကြံပြုချက်တချို့ကို စဉ်းစားမယ်လို့သာ စစ်ကောင်စီဥက္ကဋ္ဌပြောခဲ့

    မြန်မာ့အရေးအတွက်အထူးပြုလုပ်တဲ့အစည်းအဝေးမှာ အာဆီယံခေါင်းဆောင်တွေရဲ့ အကြံပြုချက်တွေကိုအပြုသဘောစဉ်းစားပေးမယ်ဆိုတဲ့အကြောင်း စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တယ်ဆိုပြီး စစ်ကောင်စီသတင်းထုတ်ပြန်ရေးအဖွဲ့က ပြောလာပါတယ်။

    အာဆီယံအထူးအစည်းအဝေးပွဲကို ဧပြီလ ၂၄ ရက်နေ့က အင်ဒိုနီးရှားနိုင်ငံ၊ ဂျာကာတာမြို့မှာ ပြုလုပ်ခဲ့တာဖြစ်ပြီး စစ်ကောင်စီဥက္ကဋ္ဌကိုယ်တိုင် တက်ရောက်ခဲ့တာဖြစ်ပေမဲ့ အစည်းအဝေးမှာ ဘာတွေ ဆွေးနွေးခဲ့တယ်ဆိုတာကို ၃ ရက်အကြာ ဒီနေ့ ဧပြီလ ၂၇ ရက်ရောက်မှ နိုင်ငံပိုင်သတင်းစာကနေ သတင်းထုတ်ပြန်လာတာပါ။

    အစည်းအဝေးမှာ မြန်မာ့အရေးနဲ့ပတ်သက်လို့ အာဆီယံခေါင်းဆောင်တွေရဲ့အကြံပြုချက်တချို့ကို ပြန်ဆွေးနွေးချိန်မှာ အပြုသဘောဆောင်တဲ့အကြံပြုချက်တွေကို အလေးအနက်ထားတဲ့အကြောင်း၊ ပြည်တွင်းတည်ငြိမ်အပေါ်မူတည်ပြီး အာဆီယံခေါင်းဆောင်တွေရဲ့ အကြံပြုချက်တွေကို အလေးထားစဉ်းစားမယ့်အကြောင်း စစ်ကောင်စီဥက္ကဋ္ဌက ဆွေးနွေးခဲ့တယ်လို့ ဆိုပါတယ်။

    ဒီလိုစဉ်းစားရာမှာလည်း စစ်ကောင်စီရဲ့ပြည်တွင်းလုပ်ငန်းစဉ် ၅ ရပ်ဖော်ဆောင်ဖို့ အထောက်အကူဖြစ်စေတာ၊ နိုင်ငံအတွက် အကျိုးရှိတာ၊ အာဆီယံနည်းလမ်း၊ အာဆီယံစိတ်ဓာတ်တွေကို အခြေခံတာမျိုးဖြစ်မှ အပြုသဘောအနေနဲ့ စဉ်းစားမယ်လို့ ဗိုလ်ချုပ်မှူးကြီးက ပြောခဲ့တဲ့အကြောင်း ထုတ်ပြန်ချက်က ဆိုပါတယ်။

    အာဆီယံခေါင်းဆောင်တွေဘက်ကတော့ (၁)အကြမ်းဖက်မှုတွေလျှော့ချဖို့၊ (၂)သက်ဆိုင်သူတွေကြားတွေ့ဆုံဆွေးနွေးပြီး ငြိမ်းချမ်းတဲ့အဖြေရှာဖို့၊ (၃)အာဆီယံအတွင်းရေးမှူးချုပ်ရဲ့အကူအညီနဲ့ အလှည့်ကျဥက္ကဋ္ဌကခန့်တဲ့ မြန်မာနိုင်ငံဆိုင်ရာအထူးကိုယ်စားလှယ်က တွေ့ဆုံဆွေးနွေးရေးလုပ်ငန်းစဉ်တွေကို ညှိနှိုင်းပေးဖို့၊ (၄)လူသားချင်းစာနာမှုအကူအညီတွေပေးသွားဖို့၊ (၅)အာဆီယံအထူးကိုယ်စားလှယ်က မြန်မာပြည်တွင်းကို သွားပြီး သက်ဆိုင်သူဘက်ပေါင်းစုံနဲ့ တွေ့ဆုံဖို့ စတဲ့ ဘုံသဘောတူညီချက် ၅ ချက်ကို ရခဲ့တယ်လို့ အစည်းအဝေးအပြီးမှာ ထုတ်ပြန်ပါတယ်။

    ဒါပေမဲ့ ဒီဘုံသဘောတူညီချက်တွေဟာ စစ်ကောင်စီရဲ့ဒီနေ့ထုတ်ပြန်ချက်မှာပြောထားတဲ့ အာဆီယံခေါင်းဆောင်တွေရဲ့အကြံပြုထားတဲ့အချက်တွေလားဆိုတာတော့ ရှင်းရှင်းလင်းလင်းမသိရပါဘူး။

20. ၂၇ ဧပြီ ၂၀၂၁မနေ့ညမန္တလေး ပစ်ခတ်မှုတွေမှာ အမျိုးသား ၁ ဦးသေဆုံး၊ ၂ ဦးဒဏ်ရာရ

    မန္တလေးမြို့က စိန်ပန်းရပ်မှာ ထမင်းဆိုင်က အကြော်ဆရာတစ်ယောက် စစ်ကောင်စီတပ်ဖွဲ့တွေရဲ့ပစ်ခတ်မှုကြောင့် မနေ့ ဧပြီလ ၂၆ ရက်ညပိုင်းက သေဆုံးသွားပါတယ်။

    စိန်ပန်းလမ်းနဲ့ ၄၁လမ်းထောင့်မှာ ပစ်ခတ်ခံရလို့ အသက် ၃၇နှစ်အရွယ် ကိုဇော်ရှိန်း(ခ)အီကွေးဟာ ကျောဘက်က‌နေ ကျည်မှန်သေဆုံးတာ ဖြစ်ပါတယ်။

    ကျည်မှန်ကိုယ်ကို ကယ်ဆယ်ပြီးချိန်မှာ အသက်မရှိတာတွေ့ရလို့ ဆေးကုသဖို့ အချိန်တောင်မရခဲ့ပါဘူး။

    ကိုဇော်ရှိန်းဟာ အမှတ် ၂၄ အထက်တန်းကျောင်း အနီးမှာ ညစဉ် ထမင်းကြော်‌ရောင်းတဲ့သူဖြစ်ပါတယ်။ မဟာအောင်မြေမြို့နယ် အထက ၂၄ ကျောင်းကို စစ်ကောင်စီက တပ်စွဲထားတာ တလဝန်းကျင်ရှိပြီဖြစ်ပါတယ်။

    တပ်စွဲထားတဲ့ စစ်တပ်ဟာ ညစဉ် အနီးရပ်ကွက်တွေကို ခြိမ်းခြောက်ပစ်ခတ်တာ၊ ဖမ်းဆီးစစ်ဆေးတာတွေပါ ရှိခဲ့တယ်လို့ ဒေသခံတွေကပြောပါတယ်။

    ဧပြီ ၂၆ရက်ညမှာ စစ်တပ်ဘက်က ပစ်ခတ်သံကြောင့် ကိုဇော်ရှိန်းဟာ ကြည့်မိသလိုဖြစ်သွားတာပါ။

    "ပထမတခါ ပစ်တာ ခတ်တာတွေရပ်သွားပြီး လူတွေရှင်းပြီးဆိုလို့သွားတာ။ လမ်းထောင့်မှာ ဘယ်ကပစ်မှန်းမသိ သုံးချက်ဆင့်ပစ်ရင်း မှန်တာ။ လူလဲသွားတာပဲ မြင်လိုက်ရတာ "လို့ ကိုဇော်ရှိန်းရဲ့ ဇနီးကပြောပါတယ်။

    သေဆုံးသူကို အေးရိပ်ငြိမ်သုဿာန်မှာ ဒီနေ့ နေ့လည်မှာ သင်္ဂြိုဟ်မှာဖြစ်ပါတယ်။

    ဒါ့ပြင် မနေ့ညပိုင်းကလည်း ချမ်းမြသာစည်၊ ဦးပွါးဂုံးကျော်အနီးမှာ ဆိုင်ကယ်မောင်းခဲ့တဲ့ လူငယ်နှစ်ဦး စစ်ကောင်စီဘက်က ပစ်ခတ်တာကို ခံခဲ့ရပါတယ်။

    ဆိုင်ကယ်မောင်းလာသူ လူငယ်နှစ်ဦးဟာ တပ်စွဲထားတဲ့ ရပ်ကွက်ရုံးရှေ့ ဟွန်းရှည်တီးသလို ဖြစ်သွားလို့ စစ်ကောင်စီက ပစ်ရာကနေ ကျည်မှန်ဒဏ်ရာရရှိခဲ့ပါတယ်။

    ခြေ‌ထောက်မှန်သူက အဖမ်းခံလိုက်ရပြီး အခြားတဦးက လက်ကောက်ဝတ်နား အရိုးကို ထိမှန်ခဲ့တာဖြစ်တယ်လို့ တွေ့ရှိသူတဦးက ပြောပါတယ်။

    ဒီလို ပစ်ခတ်သေဆုံးဖမ်းဆီးတာတွေရှိပေမယ့် ဧပြီ ၂၇ရက်နေ့မှာ စစ်အာဏာသိမ်းဆန့်ကျင်ရေး ဆန္ဒပြတာတွေကိုလဲ ပြုလုပ်ကြပါတယ်။