NUG ရဲ့ လူသားချင်းစာနာမှုဆိုင်ရာမူ ၃ ချက်ကို အမေရိကန်နဲ့ အာဆီယံက လက်ခံကြတယ်လို့ဆို
ဓာတ်ပုံ ရင်းမြစ်, ဇင်မာအောင်
မြန်မာပြည်တွင်းက စစ်ဘေးရှောင်နဲ့ အကူအညီလိုအပ်နေသူတွေဆီကို လူသားချင်းစာနာမှုအကူအညီပေးရေးနဲ့ပတ်သက်ပြီး အမျိုးသားညီညွတ်ရေးအစိုးရ(NUG)ရဲ့ မူ ၃ ချက်ကို အမေရိကန်၊ အာဆီယံနဲ့ ကုလအကူအညီပေးရေးအဖွဲ့တွေဆီ ရှင်းပြခဲ့ရာမှာ လက်ခံကြတယ်လို့ NUG ရဲ့ နိုင်ငံခြားရေးဝန်ကြီး ဒေါ်ဇင်မာအောင်က ပြောပါတယ်။
အမေရိကန်ပြည်ထောင်စု၊ ဝါရှင်တန်မြို့ကိုသွားတဲ့သူ့ခရီးစဥ်မှာ အမေရိကန်ရောက်မြန်မာတွေနဲ့တွေ့ဆုံချိန်မှာ ဝန်ကြီးက ပြောလာတာဖြစ်ပါတယ်။
‘‘ပြည်သူလူထုဆီကို အကူအညီရောက်ဖို့အရေးကြီးလို့ သူတို့ဆီ တကယ်ရောက်ရေး ကျွန်မတို့ လုပ်မယ်။ အဲဒီလို သွားတဲ့နေရာမှာ တစ်ဖက်သတ် စစ်တပ်နဲ့ပဲ သွားလို့ ရောက်မှာမဟုတ်ဘူး။ ကျွန်မတို့နဲ့ ပူးပေါင်း ဆောင်ရွက်မှသာ ဒါက ဆက်လုပ်နိုင်မှာပါ။ နောက်တစ်ခုက အကူအညီပေးရာမှာပါဝင်သူတွေဟာ ပွင့်လင်းမြင်သာမှု ရှိရမယ်။ ဒီမူသုံးချက်အပေါ် မူတည်ရမယ်ဆိုတာကို ကျွန်မတို့ဆွေးနွေးတယ်။ သူတို့ဘက်ကလည်း လက်ခံတယ်။ တော်တော်များများလက်ခံတယ်။ ယူအက်စ်ကလည်းလက်ခံတယ်။ အာဆီယံဘက် ကလည်းလက်ခံတယ်’’လို့ ဝန်ကြီးကပြောပါတယ်။
တစ်ဖက်မှာလည်း အာဆီယံရဲ့စာနာမှုအကူအညီပေးရေးစင်တာဟာ လုပ်ဆောင်နိုင်စွမ်းမှာ အကန့်အသတ်ရှိနေတာကြောင့် အကူအညီပေးရေးအချက်မှာပါဝင်တဲ့ အာဆီယံဘုံသဘောတူညီချက်ကို အကောင်အထည်ဖော်တဲ့နေရာမှာ အာဆီယံချည်း သပ်သပ် မရတဲ့အကြောင်း၊ အကူအညီပေးရေးတွေ လုပ်လေ့လုပ်ထရှိတဲ့ ကုလသမဂ္ဂအပါအဝင် တခြား INGOတွေနဲ့ပေါင်းစပ်လုပ်ဆောင်ရမှာဖြစ်တဲ့အကြောင်း ဆွေးနွေးခဲ့တယ်လို့လည်း ဝန်ကြီးက ပြောပါတယ်။
အမေရိကန်ပြည်ထောင်စု၊ ဝါရှင်တန်ဒီစီမြို့မှ ကျင်းပတဲ့ အာဆီယံ-အမေရိကန်ခေါင်းဆောင်တွေရဲ့ ထိပ်သီး အစည်းအဝေးပွဲကာလအတွင်းမှာ ဒေါ်ဇင်မာအောင်လည်း အဲဒီကိုရောက်နေတာဖြစ်ပြီး အမေရိကန် ဒုတိယနိုင်ငံခြားရေးဝန်ကြီး၊ မလေးရှားနိုင်ငံခြားရေးဝန်ကြီးတွေနဲ့လည်း တွေ့ဆုံထားပါတယ်။
