Qarabağ müharibəsi: 8 noyabr Azərbaycanda zəfər günüdür

Canlı reportaj

1. 4 Noyabr 2020Azərbaycan Ermənistana məxsus zenit qurğusunu vurduğunu deyir

   Azərbaycan Müdafiə Nazirliyi bəyan edib ki, çərşənbə axşamı günü döyüşlərin getdiyi Xocavənd rayonu istiqamətində Ermənistana məxsus bir ədəd “M-55” zenit qurğusu vurulub.

   Müdafiə Nazirliyi bəyan edib ki, sıradan çıxarılan qurğu "1955-ci ildə istehsal edilib və yüngül zirehli çoxməqsədli transportyor üzərində quraşdırılmış 20 mm-lik 3 topdan ibarətdir".

   Qurumun məlumatına görə, zenit qurğusu aşağı hündürlükdə uçan hədəflərini və canlı qüvvəsini vurmaq üçün nəzərdə tutulub.

   Ermənistan tərəfindən hərbi texnikanın vurulması ilə bağlı şərh yoxdur.

2. 4 Noyabr 2020Azərbaycan MN: "Azərbaycana məxsus üç tankın vurulması yalandır"

   Azərbaycan Müdafiə Nazirliyi Ermənistanın Azərbaycana məxsus üç tankın vurulması barədə yaydığı məlumatı təkzib edib.

   Ermənistan Müdafiə Nazirliyinin sözçüsü Şuşan Stepanyan noyabrın 4-də Facebook səhifəsində yazıb ki, "bu gün saat 10:30 radələrində cəbhənin cənub istiqamətində Azərbaycanın hücuma keçən üç tankı vurulub".

   Azərbaycan Müdafiə Nazirliyi bu məlumatın "həqiqətə uyğun olmadığını" və "tamamilə yalan olduğunu" bildirib.

   "Cəbhənin Xocavənd istiqamətində Azərbaycan Ordusu düşmən üzərində taktiki, atəş və ərazi üstünlüyünə malikdir. Düşmən ordusu mənəvi və psixoloji baxımdan əzilmiş vəziyyətdə olduğu üçün qarşı tərəf mediada bu cür əsassız xəbərlər yaymaq məcburiyyətindədir", - qurumun məlumatında deyilir.

3. 4 Noyabr 2020Paşinyanla Putin arasında telefon danışıqları “gündəlik rejimdə keçirilir”

   Ermənistan Baş naziri ilə Rusiya Prezidenti arasında telefon danışıqları az qala hər gün keçirilir, “Azatutyun” Radiosuna Ermənistan Baş nazirinin mətbuat katibi Mane Gevorqyan Vladimir Putinin noyabrın 1-də Paşinyanla, noyabrın 2-də Əliyevlə telefon danışıqları haqqında məlumatı şərh edərkən deyib.

   “Telefon danışıqlarının təfərrüatlarını deyə bilmərəm, lakin onu deyə bilərəm ki, belə telefon danışıqları Baş nazirlə Rusiya Federasiyası prezidenti arasında az qala hər gün olur,” - Mane Gevorqyan deyib.

   Onun sözlərinə görə, telefon danışıqlarının gündəlik rejimdə baş verdiyinə görə və bu barədə Baş nazir Nikol Paşinyan da öz müsahibəsində, RF prezidentinin də “Valday” klubunun yığıncağında çıxışı zamanı “danışdıqları nəzərə alınaraq və bu danışıqda, sadəcə, qəribə bir şey olmadığı üçün bu barədə məlumat yayılmayıb”.

4. 4 Noyabr 2020Təcili xəbər, Azərbaycan MN: "Tərtər atəşə tutulur"

   Azərbaycan Müdafiə Nazirliyi noyabrın 4-də bildirib ki, Tərtər şəhəri və rayonun Şıxarx qəsəbəsi Ermənistan silahlı qüvvələrinin bölmələri tərəfindən artilleriya atəşinə tutulur.

5. 4 Noyabr 2020Təcili xəbər, DTX: "Döyüş zonasından video yayanlarla bağlı cinayət işi başlanılıb"

   Azərbaycan Dövlət Təhlükəsizliyi Xidməti (DTX) noyabrın 4-də açıqlayıb ki, döyüş zonasından video yayan şəxslər barədə cinayət işi açılıb.

   Qurum bildirib ki, döyüş əməliyyatları aparılan ərazilərdə bir sıra şəxslər mobil telefon vasitəsilə icazəsiz videoçəkilişlər edib və yayıb.

   DTX bu məlumatların Azərbaycan qoşunlarının strateji və əməliyyat planları, dislokasiyası və yerdəyişmələri, şəxsi heyəti, silah və hərbi texnikaları, digər döyüş təminatı, əməliyyat şəraiti barədə məlumatları əldə etməyə imkan verdiyini açıqlayıb.

   Məlumatda deyilir ki, qarşı tərəf bu görüntülərdən Azərbaycanın qoşun hissələrinin qüvvə və mövqeləri barədə informasiya əldə etmək, kəşfiyyat-təxribat fəaliyyəti həyata keçirmək üçün istifadə edib.

   Qurum aşkar edilmiş faktlar üzrə Cinayət Məcəlləsinin "dövlət sirrini yayma" maddəsi ilə cinayət işi başlandığını, hazırda həmin şəxslərin cinayət əməlləri ilə bağlı istintaq aparıldığını bildirib.

6. 4 Noyabr 2020Mevlüt Çavuşoğlu: "Azərbaycanın ərazi bütövlüyü dəstəklənməlidir"

   Türkiyənin xarici işlər naziri Mevlüt Çavuşoğlu deyib ki, Azərbaycanın ərazi bütövlüyü hər kəs tərəfindən qeyd-şərtsiz dəstəklənməlidir.

   O, bu barədə Twitter hesabında yazıb.

   "Avropa Şurası Nazirlər Komitəsinin 130-cu iclasında iştirak etdik. Başqalarının müqəddəslərini təhqir etmək ifadə azadlığı ola bilməz. Terrorizmin hər növünü qınayırıq və hamıdan eyni yanaşmanı gözləyirik. Azərbaycanın ərazi bütövlüyü hər kəs tərəfindən qeyd-şərtsiz dəstəklənməlidir," -o yazıb.

   Mevlüt Çavuşoğlu ötən həftəsonu Azərbaycana səfər edib və Azərbaycan Prezidenti İlham Əliyevlə də görüşüb.

7. 4 Noyabr 2020İran Prezidenti: "Ərazi bütövlüyü Azərbaycanın haqqıdır"

   Çərşənbə günü nazirlər kabinetinin iclasında danışan İran Prezidenti Həsən Ruhani deyib ki, ərazi bütövlüyünü Azərbaycanın haqqı hesab edir.

   “Coğrafi sərhədlərin dəyişməməsi vacibdir, ərazi bütövlüyünü Azərbaycanın haqqı hesab edirik, ancaq bu hüquqa qeyri-hərbi yollarla nail olmalarını istəyirik,”- cənab Ruhani deyib.

   O bildirib ki, bu baxımdan İranın Xarici İşlər Nazirliyi aktivdir və İranın hüquqları əlaqəli bütün ölkələrə çatdırılıb.

8. 4 Noyabr 2020Azərbaycan Baş Prokurorluğu: "İndiyədək 91 mülki şəxs öldürülüb, 405 nəfər yaralanıb"

   Azərbaycan Baş Prokurorluğu bildirib ki, Ermənistan silahlı qüvvələrinin atəşi nəticəsində indiyədək 91 mülki şəxs öldürülüb, 405 nəfər yaralanıb.

   Qurum qeyd edib ki, 2734 yaşayış evi, 98 çoxmənzilli yaşayış binası, 500 mülki obyekt yararsız vəziyyətə düşüb.

9. 4 Noyabr 2020Azərbaycan MN: "Ağdamın kəndləri intensiv atəşə tutulur"

   Azərbaycan Müdafiə Nazirliyi açıqlayıb ki, noyabrın 4-ü saat 10:00-dan başlayaraq Ermənistan silahlı qüvvələrinin bölmələri Ağdam rayonunun kəndlərini intensiv artilleriya atəşinə tutur.

10. 4 Noyabr 2020Azərbaycan MN: "Ermənistan dövlət sərhədində atəşkəs rejimini pozub"

    Azərbaycan Müdafiə Nazirliyi açıqlayıb ki, Ermənistan silahlı qüvvələrinin bölmələri Ermənistan-Azərbaycan dövlət sərhədində yerləşən Azərbaycan Ordusunun bölmələrinin mövqelərini minaatan və atıcı silahlardan yenə atəşə tutub.

    Nazirliyin məlumatında deyilir ki, noyabrın 4-ü saat 01:08-dən 08:10-dək Ermənistanın Berd rayonu istiqamətindən Azərbaycanın Tovuz və Ağstafa rayonlarında yerləşən hərbi bölmələrin mövqeləri Ermənistan silahlı qüvvələri tərəfindən ara-sıra atəşə tutulub.

    Ermənistan tərəfinin bu barədə şərhi hələlik məlum deyil.

11. 4 Noyabr 2020Azərbaycan MN: "Tərtər və Ağcabədi rayonları atəşə tutulur"

    Azərbaycan Müdafiə Nazirliyi bildirib ki, noyabrın 4-ü saat 08.05-dən başlayaraq Ermənistan silahlı qüvvələrinin bölmələri Tərtər rayonunun Hüsənli və Qazyan kəndlərini, eləcə də Ağcabədi rayonunun Hacılar, Qaraxanlı və Boyat kəndlərini ara-sıra artilleriya atəşinə tutur.

12. 4 Noyabr 2020ANAMA: "Azərbaycan ərazilərinə atılan fosforlu top mərmiləri və raket zərərsizləşdirilib"

    Azərbaycan Respublikası Ərazilərinin Minalardan Təmizlənməsi üzrə Milli Ağentlik açıqlayıb ki, (ANAMA) noyabrın 3-də quruma Ağcabədi, Ağdam, Bərdə, Beyləqan, Füzuli və Tərtər ərazisində mərmilərin aşkar olunması barədə 25 müraciət daxil olub.

    ANAMA bildirib ki, aparılmış əməliyyat-axtarış tədbirləri zamanı 2 ədəd 122 mm-lik D-4 ağ fosfor (P-4) tərkibli top mərmisi, 1 ədəd 300 mm-lik raket (9M528), 1 ədəd hərbi məqsədlər üçün istifadə olunan meteoroloji radiopelenqator və 25 ədəd partlamış mərmi qalıqları aşkar olunub.

    Agentliyin partlayış qrupu tərəfindən 2 ədəd 122 mm-lik D-4 ağ fosfor (P-4) tərkibli top mərmisi, 1 ədəd 300 mm-lik raket (9M528) zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 42777 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

13. 4 Noyabr 2020Tərəflər dünən və gecə gedən döyüşlər barədə

    Azərbaycan Müdafiə Nazirliyi açıqlayıb ki, noyabrın 3-ü gün ərzində və 4-ə keçən gecə Ermənistan silahlı qüvvələrinin bölmələri cəbhənin müxtəlif istiqamətlərində Azərbaycan Ordusu bölmələrinin yerləşdiyi mövqeləri və yaşayış məntəqələrini müxtəlif atıcı silahlar, top və minaatanlardan atəşə tutub.

    Nazirlik bildirib ki, döyüş əməliyyatları müxtəlif intensivliklə əsasən cəbhənin Tərtər, Ağdam, Xocavənd, Zəngilan və Qubadlı istiqamətlərində davam edib.

    Məlumatda deyilir ki, "qarşı tərəf cəbhənin bəzi sahələrində şəxsi heyət və hərbi texnikada itkilər verərək geri çəkilməyə məcbur edilib".

    Azərbaycan MN qeyd edib ki, sutka ərzində Ermənistan silahlı qüvvələrinin xeyli sayda canlı qüvvəsi, 2 ədəd T-72 tankı, 3 ədəd D-30 haubitsa topu, 1 ədəd “Zastava M-55” zenit qurğusu, 1 ədəd taktiki PUA-sı, 3 ədəd hərbi yük maşını "vurulub və sıradan çıxarılıb".

    “Cəbhənin bütün istiqamətlərində gecə ərzində vəziyyət stabil gərgin olub. Düşmən müdafiə ordusunun mövqeləri deyil, həm də dinc yaşayış məntəqələrini atəşə tutmaqda davam edib. Mülki əhali arasında zərər çəkənlər var”, Erməni tərəfinin məlumatında deyilir.

    Erməni tərəfi bu səhər məlumat yayıb ki, Azərbaycan əsgərləri Şuşa istiqamətində irəliləməyə cəhd edib, lakin “geri atılıb”.

    Dünən gecədən Ermənistan KİV-ləri tanınmamış “DQR paytaxtı Stepanakertin” yenidən raket atəşinə tutulduğunu bildirir.

    Azərbaycan Müdafiə Nazirliyi bu ittihamları təkzib edib.

14. 3 Noyabr 2020Tofiq Zülfüqarov: "Qısa müddətdə Ermənistanın mövqeyinin ciddi şəkildə dəyişməsinə şahid olacağıq"

    Keçmiş xarici işlər naziri Tofiq Zülfüqarov hesab edir ki, “vaxtilə reallığı ermənilər dəyişirdisə, indi onu azərbaycanlılar dəyişir”.

    BBC News Azərbaycancaya açıqlamasında politoloq vurğulayır ki, hazırda status-kvo dəyişdiyi üçün köhnə baza prinsipləri də nəzərdən keçirilməlidir.

    “O vaxt baza prinsipləri formalaşanda məsələ həll olunsaydı, bəlkə də Azərbaycan tərəfi baza prinsiplərini qəbul edərdi.

    O deyir ki, Azərbaycan artıq "öz ordusunun gücünə və açıq deyək, əsgər və şəhidlərinin qanı bahasına" baza prinsiplərində sözügedən rayonların çoxunu azad edib.

    "Həmsədrlər həmişə bizə deyirlər ki, biz reallığı nəzərə almalıyıq və bunun əsasında vəziyyəti qiymətləndirməliyik. İndi reallıq dəyişib. Vaxtilə ermənilər onu dəyişiblər, indi biz dəyişirik. İndi köhnə baza prinsipləri reviziya olunmalıdır. Cenevrə görüşü göstərir ki, həmsədrlər tərəflərin bu məsələyə baxışını dəqiqləşdirirlər”.

    Azərbaycan və Ermənistan xarici işlər nazirləri ATƏT-in Minsk qrupunun həmsədrləri ilə birgə ötən həftəsonu Cenevrədə görüşüblər.

    Politoloqun təhlilinə görə, Azərbaycan və Ermənistan xarici işlər nazirlərinin sonuncu Cenevrə görüşündə danışıqlar, əsasən humanitar atəşkəsə əməl edilməsi, bu atəşkəslə bağlı tərəflərin şərtlərini yazılı şəkildə ortaya qoymasını və substantiv məsələlərə aid münasibətlərini açıqlamasını əhatə edib.

    Tofiq Zülfüqarov əlavə edir ki, atəşkəslə bağlı Azərbaycanın mövqeyi bəllidir: Ermənistan tərəfi işğal olunmuş ərazilərdən işğalçı qüvvələrin çıxarılmasını öhdəlik kimi qrafik şəklində öz üzərinə götürsə, Azərbaycan atəşkəsə razılıq verə bilər.

    Rusiyanın münaqişə davam edərkən neytrallığını qoruya bilməsi məsələsinə gəlincə, cənab Zülfüqarova görə Rusiya neytral mövqeyini “əsasən” qoruya bilir.

    “Demək çətindir. Ancaq Ermənistan da bunu etiraf edir ki, onlar istənilən səviyyədə dəstək almır. Azərbaycan isə əksinə, bu baxımdan Türkiyədən lazım olan dəstəyi alır. Və belə olan halda biz görürük ki, Azərbaycanın xeyrinə olan vəziyyət yaranır. Bu da aparılan siyasətin nəticəsidir və reallıqdır”.

    Bu məqamda və ya daha sonra üçüncü tərəflərin münaqişəyə qoşulması ehtimalına gəlincə, Tofiq Zülfüqarov “öncə münaqişənin harada baş verməsinə baxmağın vacibliyini" qeyd edir.

    "Münaqişə harada baş verir? Azərbaycan ərazisində. Bu sual və bu cavab üçüncü qüvvələrin burada iştirakı imkanlarına aydınlıq gətirir. Azərbaycan öz suveren ərazisində beynəlxalq qanunlar çərçivəsində istənilən addımı ata bilər. Üstəlik, hazırda Rusiyanın neytrallığını qoruması və Türkiyənin Azərbaycanın yanında yer alması ilə bir növ balanslaşdırılmış siyasət yaranıb,”- Tofiq Zülfüqarov bildirib.

    Sabiq nazirin sözlərinə görə, Azərbaycan demək olar ki, Ermənistanla təkbətək mübarizə aparır: “Ermənistan ictimaiyyətinin, xalqının hələ 30 il əvvəldən qarşıya qoyduğu adekvat olmayan siyasi hədəfləri var. Onlar indi real baxmalıdırlar ki, bu hədəflərə nail olmağa potensialları çatırmı? Hesab edirəm ki, Ermənistanın bu hədəflərə nail olmağa potensialı çatmır və biz yaxın günlərdə Ermənistanın mövqeyinin dəyişməsinə şahid olacağıq”.

15. 3 Noyabr 2020

    Ermənistan Prezidenti Armen Sarkisyan deyib ki, Azərbaycan müharibəyə "çoxdan" hazırlaşsa da, koronavirus pandemiyası və ABŞ-dakı seçkilərə görə, onu bu il başlamaq qərarına gəldi.

    "Niyə sentyabrda başladı? Çünki Amerika bu vaxt seçkiqabağı döyüşlərlə məşğul idi. Çünki dünyada koronavirus var idi və hamı onunla məşğul olurdu, sağlamlıq cəbhəsində vuruşurdular".

    Azərbaycan rəsmiləri dəfələrlə bildirib ki, döyüşləri Ermənistan tərəfinin başladıb.

16. 3 Noyabr 2020

    Ermənistan Birləşmiş Hərbi Məlumat Mərkəzi Xankəndinin atəşə tutulması barədə məlumat yayıb.

    Son dəfə belə məlumat oktyabrın 31-də yayılmışdı.

    Azərbaycan Müdafiə Nazirliyi bundan əvvəl Xankəndi və Şuşanı atəşə tutmadığını bildirmişdi.

17. 3 Noyabr 2020

    Azərbaycan Müdafiə Nazirliy bu gün Xocavənd ətrafında gedən döyüşlərdə erməni tərəfinin tanklarının vurulduğunu bildirib və buna dair video yayıb.

18. 3 Noyabr 2020Arayik Harutyunyan “DQR məmurları və dövlət qulluqçularını” vəzifələrindən azad edib

    Dağlıq Qarabağda separatçıların lideri Arayik Harutyunyan bu gün bir sıra tanınmamış “DQR məmurları və dövlət qulluqçularını” vəzifələrindən azad edib.

    Bundan əvvəl o, səfərbər edilən, lakin döyüş əməliyyatlarında iştirak etməkdən yayınan bütün məmurların vəzifədən kənarlaşdırılacağını və məsuliyyətə cəlb ediləcəyini deyib.

    Harutyunyanın 3 noyabr tarixli fərmanları ilə öz vəzifələrindən tanınmamış “DQR prezidentinin köməkçisi” Rudik Martirosyan, "baş prokuror müavinləri" Erik Verdiyan və Sasun Qabrielyan, "dövlət statistika şurasının" üzvü Armen Soğomonyan.

    Bundan başqa, “Mərkəzi Seçki Komissiyasının üzvü” Yeğişe Arzumanyanın səlahiyyətləri vaxtından qabaq ləğv edilib.

    Arayik Harutyunyan həmçinin Arkadi Soğomonyanın - “əmək, sosial və mənzil məsələləri nazirinin müavini”, Davit Avanesyanın - “şəhərsalma nazirinin müavini”, Erik Qriqoryanın - “təhsil, elm və mədəniyyət nazirliyi aparatının rəhbər”, Qaqik Hayrapetyanın - “dövlət gəlirlər komitəsi aparatı rəhbəri əvəzi” və Artak Arstamyanın – “prezident administrasiyası şöbə rəisi köməkçisi” vəzifələrindən azad edilmələri haqqında “hökumət qərarlarını” təsdiq edib.

19. 3 Noyabr 2020Lavrov: "Putin Qarabağla hər gün məşğul olur"

    Rusiya Xarici İşlər naziri deyib ki, Prezident Vladimir Putin "gündəlik rejimdə mövcud vəziyyətin həllinə yönəlmiş vasitəçilik səyləri göstərir".

    Sergey Lavrov bu barədə "Kommersant" qəzetinə müsahibəsində danışıb.

    Lavrov, Rusiya liderinin təşəbbüsü ilə Ermənistanla Azərbaycan arasında humanitar barışıq barədə razılığın əldə olunduğunu xatırladıb.

    Barışıq elan olunsa da, müharibə bu günə qədər davam edir.

    Sergey Lavrov bir daha deyib ki, Qarabağa "Yaxın Şərqdən silahlıların cəlb olunması” Rusiyada narahatlıqla qarşılanır.

    Rusiyanın dəyərləndirmələrinə görə onların sayı 2 minə yaxındır, Rusiya XİN başçısı deyib.

20. 3 Noyabr 2020Azərbaycan Müdafiə Nazirliyi: Döyüşlər İranla sərhəddən uzaqda aparılır

    Azərbaycan Müdafiə Nazirliyi bəyan edib ki, Ermənistan tərəfinin mərmilərin İran ərazisinə düşməsi barədə yaydığı xəbəri "yalan uydurulmasıdır".

    Çərşənbə axşamı günü nazirlik bildirib ki, Ermənistan Müdafiə Nazirliyi ictimaiyyəti "yanlış məlumatlandırıb".

    Müdafiə nazirliyi bildirib ki, Azərbaycan ordusu əməliyyatları şimal istiqamətində aparır və Azərbaycan ordusunun atdığı mərmilər hətta "nəzəri cəhətdən belə olsa" cənubda qalan İranla sərhəd ərazilərinə düşə bilməz.

    Bu gün Ermənistan Müdafiə Nazirliyinin sözçüsü Şuşan Stepanyan öz Twitter hesabında yazıb ki, Azərbaycanın atdığı bir neçə mərmi İran ərazisinə düşüb.

    "Azərbaycan tərəfi erməni bölmələri istiqamətində artilleriya atəşi açıb. Bir neçə top mərmisi İran ərazisinə düşüb", - Şuşan Stepanyan bildirib.