Namoonni Itoophiyaatti koronaavaayirasiin irratti argame 11,500 caale

Haguuggii Tamsaasa Kallattii

1. 16 Adooleessa 2020'Zindizii Maandellaa Covid-19 qabamtee duute'

   

   Madda suuraa, DEBBIE YAZBEK/AFP

   Intalli pirezedantii gurraacha Afrikaa Kibbaa jalqabaa Zindizii Mandeellaa Covid-19’n qabamtee duute.

   Zindiziin hospitaala Johaanisbargitti Wixata ganama umrii ganna 59n lubbuun dabre.

   Ilmi ishee dhibichi du’a isheef ka’umsa ta’uuf dhiisuun ifa mitii jedhe. Maatiin Zindizii firii qorannoo reeffarratti gaggeeffamuu eegaa jiru.

   Sirni awwaalcha haadha isaa akka raawwatamuuf jiru ilmi ishee Zondwan SABC tti himeera.

   Neelsan Mandeellaa qabsoo farra appaartaayidiirratti taasifameen gumaacha guddaa qabaniin yaadatamu.

2. 16 Adooleessa 2020Pireezidantiin Maalaawwii Covid-19 'akka hin tamsaaneef soomaa, sagadaa' jedhan

   

   Madda suuraa, Rooyitars

   Pireezidantiin Maalaawii dhiyeenya filamanii aangootti bahan Laazaruus Chaakweraa lammileen biyyatti tamsa’ina Covid-19 dhaabu fi dhiibbaa dhibichi biyyattiirratti uumeef soomaa fi sagadaan akka Waaqa kadhatan gaafatan.

   Miidiyaalee hawaasaarratti dubbiin isaani kun miira walmakee uumeera.

   Pireezidantichi amantoonni hundi Kamisa har’aatii jalqabuun guyyoota sadan dhufan akka soomaaniifi sagadan gaafatan.

   Kana malees, namoonni sababa vaayirasichaatiin dhukkubsatan akka dafanii bayyanataniif tumsa kadhannaa gaafataniiru.

   Dilbatni dhuftummoo guyyaa galateeffannaati jedhanii labsaniiru.

   Pireezidantichi duraan paastarii turan. Waggoota 24 Waldaa ‘Malawi Assemblies of God’ jedhamu tajaajilaa turan.

   Sanaa booda paartii mormituutti makamuun Paartii Maalaawii Kongirasi jedhamu bara 2013 hoogganuu jalqaban.

   Filannoorratti pireezidantii biyyattii duraanii Piitar Mutaarikaa injifachuun aangoo pirezedantummaa kan qabatan Waxabajjii 28 ture.

3. 16 Adooleessa 2020'Hidha haaromsaa ijaaruufi bishaan guutuun waan wal maddii deemu'

4. 16 Adooleessa 2020Meelbarnitti lakkoofsi namoota vaayirasiin qabamanii dabalaa jira

   

   Madda suuraa, Getty Images

   Magaalaa Awustiraaliyaa hawaasni Oromoo hedduu keessa jiraatu Meelbarni keessatti weerarri koronaavaayirasii irra deebiin mudate, lakkoofsi dabalaatuma jira.

   Guyyaa darbe namni 317 kan qabame yoo ta'u akka biyyaatti isa olaanaa ta'ee galmaa'ee jira.

   Torbee darbe jiddugaleessaan guyyaatti nama 200 ol irratti vaayirasichi argamaa ture.

   Magaalattiin torbee darbe uggura torbee jaha labsitee jirti. Jiraattoni dhimma murteessaaf malee manaa bahuu dhorkamu.

   Aanga'oonni fi ogeeyyiin fayyaa namni akka manaa hin baane dhaamaa jiru.

   Guyyaa kaleessaa namoonni uggura cabsanii bahan dhibbaan lakkaa'aman adabamaniiru.

   Magaalaa Meelbarni fi namoota vaayirasichaan qabaman muraasa kan qabdu Siidnii malee Awustiraaliyaan harki caalu vaayirasicharraa bilisa.

   Amma dura biyyattiin nama 113 sababa vaayirasii kanaatiin du'aan dhabde.

5. 16 Adooleessa 2020Abbaan qabeenyaa hospitaalaa bu’aa qorannoo Covid-19 sobaa kennuun to’atame

   

   Madda suuraa, Get

   Baangilaadeshitti abbaan hospitaalaa tokko bu’aawwan qorannoo Covid-19 irraa bilisa jedhan kumaatamaan lakka’aman dogoggorsee kennuun to’annoo jala oole.

   Namni Mohaammad Shaahed jedhamu kun, waraqaa raga sobaa koroonaavaayirasirraa bilisa jedhu qorannoo otoo hin taasisinillee kennaa ture jedha gabaasi AFP.

   Poolisiin biyyattii barbaacha guyyaa sagaliin booda, namni kun gara Hindiitti fuula haguuggatee miliquuf wayita jedhutti qabaniiru.

   "Hospitaallisaa qorannoo koroonaavaayirasii 10,500 taasiseera. Isaan keessaa 4,200 sirrumaan kan qorataman oggaa tahu, kan hafan 6,300 ammoo tasumaa osoo hin qoratamin bu’aan qorannoo kenname," jedhu dubbi himaan garee poolisii’ Rapid Action Battalion’ Koloneel Ashiiq Billaah.

   Kana malees namni kun waraqaa ragaafi yaalii vaayirasichaaf kaffalchiisaa ture jedhamee himatame – waliigalteen mootummaa waliin qaban garuu hospitaallisaa tajaajila bilisaa akka kennu ture.

6. 16 Adooleessa 2020MM Tuniiziyaa salphina maallaqaa isaan mudateen aangoo gadi dhiisan

   

   Madda suuraa, Reuters

   MM Tuniiziyaa Eliys el-Faakfaak aangoo gadi dhiisuu waajjirri isaanii beeksise.

   Aangoo kan gadi dhiisan salphina maallaqaa isaan mudate hordofee miseensonni paarlaamaa dhiibbaa irraan gahaniini.

   Ji'a jahaa qofaaf aangoorra kan turan MM kun, dhaabbilee dhuunfaa kontiraataan hojii mootummaa hojjatan keessaa qooda maallaqa miliyoona 15 ta'u qabaachuu isaan qeeqni irratti ka'e.

   MM kun gocha malaammaltummaa kamiyyuu haalee, yoo dogoggora hojjechuun isaa mirkanaa'e aangoo akka gadi dhiisu himee ture.

   Waajjirri isaa aangoo gadi dhiisuun isaa faayidaa biyyaaf dursa kennuu agarsiisa jedhe.

   Pireezidantiin biyyattii guyyoota itti aanan nama haaraa muuda.

7. 16 Adooleessa 2020Yooyyaa!

   Gabaasi kallattii keenya kan Adoolessa 16 bara 2020 asirraa eegala.

   Kabaa gaditti gabaasaalee guyyoota darbanii argachuu dandeessu.

   Yaada keessan gama Facebook keenyaan nuuf barreessaa.

   Oolmaa Gaarii!

8. 15 Adooleessa 2020Itoophiyaatti namoonni haaraan 294 Covid-19'n qabaman

   Qorannoo Covid-19sa'aatii 24 darbe keessa namoota 5,186'irratti gaggeefameen namoota 294 irratti vaayirasichi argamuu Ministeerri Fayyaa ibse.

   Namootaa haaraa qabaman keessaa 209 Finfinnee, 31 Gaambellaa, 20 Oromiyaa, 13 Amaaraa, sagal Affaar, Jaha Dirree Dhawaa, Afur Somaalee, lama ammoo Sidaamaa irraa tahuun ibsaameera.

   Kanaaniis lakkoofsi waliigalaa namoota qabamanii 8,475 gaheera.

   Gama kaaniin namootni 51 haaraan dhibee kanarraa kan fayyan yoo ta'u waliigalli 4,768 gaheera.

   Namootni lama tokko Finfinnee tokko ammoo Affaar irraa sababa dhibee kanaan lubbuu dhabaniiru. namni inni tokko qorannoo reeffaan kan biroon ammoo waldhaansarra osoo jiruuti.

   Lakkoofsi namoota hanga ammaatti du'anii 148 gaheera.

   Namootni 36 dhibeen kun itti cimee waldhaansarra jiraachuu ibsi ministeeraa addeeseera.

   Hanga amaattii qorannoon laabraatoorii namoota 302,728'irratti gaggeefameera.

   

9. 15 Adooleessa 2020Maaskiin ministirri fayyaa Beeljiyeem godhatte ijoo dubbii ta'e

   Maaskiin afaaniifi funyaan akka haguuguuf gargaaru ministirri fayyaa Beeljiyeem godhatte namoota hedduuf ijoo dubbii ta'eera; kanneen itti kolfaniifi qoosanis jiru.

   Maagii Dii Bilook maaskiin godhatte funyaan ishiifi areeda ishiitti kan maxxane ture.

   Ministirrittiin maaskii kan ammoo godhattee kan argamte paarlamaatti ture.

   Maaskiin isheen godhatte kun kan fuula isheetti maxxane qofa osoo hin taane kan kan funyaan, hidhiifi areeda ishee ifatti mul'isudha.

   Maaskiin isheen godhatte kun namoota hedduu ajaa'ibeera.

   Mootummaan Beeljiyeem Sanbata darbe irraa kaasee namoonni yeroo manaa isaaniitii bahan maaskii godhachuun dirqama akka ta'e labseera.

   

   Madda suuraa, Maggie De Block

10. 15 Adooleessa 2020'Qaamoleen nageenyaa tarkaanfii keessa deebii hin qabne fudhachaa jiru'

11. 15 Adooleessa 2020Jeequmsa Darfuuritti mudateen waliigalteen nageenyaa Sudaan gufate

    

    Madda suuraa, EPA

    Walgalteen nageenyaa mootummaa Sudaaniifi mormitoota gidduutti mallatteeffamuuf karoorfame harkifate.

    Kibxata mallatteeffamuuf kan yaadame ta'us, yeroo hin murtoofneef tursiifameera.

    Kaaba Daarfur iddoo namoonni qe’eesaanirra buqqa’anitti namootni 9 duanii,16 immoo mada’aanii booda waliigalticha mallatteessuun yeroo biraattii dabarfame.

    Walitti bu’iinsi humnoota nageenyaa mootummaan bobbaase fi gartuun jeequmsa balaaleffatan giddutti mudatee tureen, labsiin yeroo muddamaa naannichatti labsamees ture.

    Gartuun mormitootaa waliigaltee nageenyaa kana keessatti qooda qaban mootummaan ce’uumsaa akka biyyoolessaatti hundaa’eefi qondaltonni biyyatti hidhattoota naannicha socho’an to’achuu dadhabanii jedhanii balaleeffatan.

    Mariin nageenyaa kun silaa gartuu hidhattoota Daarfur, Biluu Naayiliifi Kibba Korodofaan keessatti mootummaa pirezedantii duraanii Omar al-Bashiir aangoorraa buusuuf lolarra turan kan of keessatti hammate ture.

12. 15 Adooleessa 2020Hawwii ibsaa argachuufi yaaddoo bishaan dhabuu lammilee Itoophiyaafi Masrii

13. 15 Adooleessa 2020Somaaliyaatti xiyyaarri midhaan gargaarsa baatu kufee caccabe

    Xiyyaarri midhaan gargaarsaa Jibuutiirraa buufata xiyyaara giddu-galeessa Somaaliyaa Baledwiyniitti argamu geesse Kibxata kaleessaa erga qubatee booda ibiddi itti qabate.

    Namni balaa kanaan miidhame akka hin jirre Imbaasiin Ameerikaa Somaaliyaa jiru ibseera.

    Balaliistonni xiyyaaraa fe’iinsaa kanaas balaa qaqqabe kanarraa hafaniiru.

    Xiyyaara Keeniyaa gargaarsa fe’e kanatti ibiddi qabachuusaa qaamni nageenyaa aviyeeshinii balalii to’atu ‘Aviation Safety Network’ suuraa kana maxxanseera.

    Maxxansa X irra dabri

    Qabiyyee X hayyamtaa?

    Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Ximaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

    Accept and continue

    Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu.

    Xumura maxxansa X

14. 15 Adooleessa 2020Namoonni dabalataa ajjeechaa Haacaaluu booda hidhaman mana murtiitti dhiyaatan

    Namoonni torbee lama dura Jawaar Mahaammad fi Obbo Baqqalaa garbaa waliin to'atamuun galmee Obbo Huseen Jonbaa jalatti himataman Kibxata Mana murtiitti dhiyaatan.

    Namoota lakkoofsaan 10 ta'an dhaddacha Araadaatti dhiyaataniif warra abukaatoo dhaabatan keessaa tokko Obbo Kadir Bulloo BBC'tti akka himanitti, namooti kun reeffa butuu, sabaafi sablammoota walitti buusuufi anga'oota mootummaa ukkaamsuuf yaalaniiru jedhee poolisiin himate.

    Abukaatoonis, himanni galmee kanarratti dhiyaate kan galmeewwan birootiin waan wal-fakkaatuuf, yakka jedhame kana keessatti gaheen isaanii maal akka ture kan jedhu adda addatti gaafateera.

    Shakkamtoonni kunneen yeroo to'annoo jala jiran kanatti baay'atanii kutaa tokkotti galuun, koroonaavaayirasiif saaxilamaa akka jiran, uffata ga'aa akka hin qabneefi maatiidhaan daawwatamaa akka hin jirre mana murtiitti himneerra jedhan Obbo Kadir.

    Manni murtiis dhimmichi ilaalamee qabiinsi shakkamtootaa akka fooyya'u ajajuus dabalanii himaniiru.

    Galmee kana jalatti kan himataman namoonni lama, lammummaa biyya biraa kan qaban waan ta'eef, mootummoonni biyya isaanii akka beeksifamaniif kan gaafanneefis, guyyoota lama keessatti akka raawwatamu manni murtichaa ajaja dabarseera jedhani.

    Poolisiin ragaawwan dabalataa walitti qabachuu, namoota dhimmichaan hidhata qaban dabalataa to'achuufi meeshaa yakkichi ittiin dalagame irratti qorannoo fooransiikii gochuuf yeroon ga'aa akka kennamuuf gaafate.

    Abukaatoowwan shakkamtootaas mormii dhiyeessanii, manni murtichaa gaafa Adoolessa 17'tti beellameera jedhan.

    Obbo Jawaar Mahaammad Adoolessa 16 Roobii mana murtiitti akka dhiyaataniif beellamamee turuunsaa ni yaadatama.

15. 15 Adooleessa 2020Lammiileen Itoophiyaa kuma hedduu Yamanitti danqaman lubbuusaaniif sodaachaa jiru-IOM

16. 15 Adooleessa 2020Taphataa beekaman Maanchister Yuuniyatiid Markas Raashfoord doktoreetii kabajaa argate

    

    Raashfoord nama jalqaba umrii dargaggummaan badhaasa doktoreetii kabajaa yuunvarsiitii Maanchistar irraa gonfate ta’eera.

    Dargaggeessi ganna 22 kun barattoonni guyyaa ayyaanaatti soorata bilisaan akka argatan duula gaggeesseef beekamtii argate.

    Yeroo uggurri sochii biyyatti keessatti labsametti mootummaan kuppooni bilisaan maatii ijoolleef qoodee ture, garuu yeroo murtaa’eef qofa kennama jedhe.

    Haata’u malee, Raashfoord kuppoonii bilisaa kana kennuun amma ganna dhufuutti akka itti fufuu mootummaa amansiisuu danda’e.

    Pireezidantiin yuunivarsiitii Maanchister Pirofesar Deem Naansii Rotweel,‘Raashfoord dargaggeessa kennaa addaa qabu fi kennaan isaas dirree kubbaa miilaarra kan darbe’ jedhanii leellisan.

    Raashfoordillee ‘guyyaa anaaf maatiin koo itti boonne’ jedhe gammachuusaa ibsate.

    Badhaasni kabajaa akkasi duraanis leenjisaa kilabii Maanchister Yunaayitid duraani Aleeks Fargusaanii fi Boobii Charlitaniif kennamee ture.

17. 15 Adooleessa 2020UKtti weerara Covid-19 booda namoonni miliyoona 1 ol tamboo aarsuu lagatan

    

    Madda suuraa, Getty Images

    UK keessatti erga weerarri Covid-19 mudatee asitti namoonni miliyoona tokkoo caalan tamboo aarsuu addaan kutan.

    Namoota tamboo aarsuu dhiisan keessa harki 41 sababa weerara vaayirasichaan walqabatuun sodaatani addaan kutuu himaniiru.

    Lakkoofsi namoota tamboo aarsanii kan hir’ateef, yaaddoo vaayirasichaaf nu saaxila jedhuun akkasumas, tamboo argachuu dhabuun ta'uun himameera.

    Yuunivarsiitii Kollejjiin Landan barana yeroo kamiyyuu caala bara namoonni tamboo aarsuu addaan kutanii jedhe.

    Bara 2007 eegalee lakkoofsa namoota tamboo aarsuu adda kutanii hordofaas ture.

    Mootummaan biyyatti tamboo aarsuun mallattoo Covid-19 caalatti namatti hammeessaa jedhee gorsaa ture.

18. 15 Adooleessa 2020Pirezedatiin duraanii Naayijeeriyaa muddama siyaasaa Maalii akka furaniif muudaman

    

    Madda suuraa, Getty Images

    Pireezidantiin duraanii Naayijeriyaa Gudlaak Joonatan waldhibdee siyaasaa Maalii keessatti mudate akka furaniif ergamaa addaa ta’anii muudaman.

    Joonatan pireezidantii Maalii Ibiraahim Boyibakar Keeyitaa, hooggantoota mormitoota fi waldaalee siivilii akkasumas, dhaabbilee amantaa biyyatti wajjin muddama siyaasa biyyattirratti mari'atu.

    Maalii keessatti waldhibdee dhimma filannoorratti mootummaa fi mormitoota giddutti dhalate booda hiriirri mormii pireezidantichi aangoo akka gadhiisan gaafachuuf bahamerratti lubbuun namoota 11 darbeera.

    Joonatan ammatti muddama siyaasaa biyyatti akka furaniif hoogganaa Komishinii Walta'iinsa diinagdee biyyoota Lixaa fi Kibba Afrikaa 'ECOWAS'tu muude.

19. 15 Adooleessa 2020Kaampaniin Ameerikaa Modernaa jedhamu talaallii Covid-19 namarratti shaakaluufi

    

    Madda suuraa, Getty Images

    Kaampaniin Ameerikaa Modernaa jedhamu talaallii Covid-19 namarratti shaakaluuf gulantaa xumuraa qaqqabu ibse.

    Adoleessaa 27, bara 2020 namarratti bu’aa qabeessummaan talaallichaa yaalamuuf jira.

    Namoota 30,000 yaalii talaallii kanarratti hirmaachisuuf yaadameera.

    Kaampaaniin talaallii Covid-19 hojjachuuf addunyaatti dorgomaa jiru kun yaalii marsaa jalqabaarratti namoota 45 hirmaachiseen hundisaani farra qaama alagaa(antibodies) vaayirasii qolatu uummachuu danda'uusaanii ibsee ture.

20. 15 Adooleessa 2020Venzuyeelaan uggura sochii deebistee labsite

    

    Madda suuraa, Getty Images

    Magaalaan guddoon Veenzuweelaa Karakaas har’aa jalqabdee magaalota sababii weerara dhibeetiin sochii namoota ugguranitti dabalamteetti.

    Magaalota biyyatti biroo keessattis weerara vaayirasii to’achuuf sochiin namoota ugguramu pireezidantiin biyyatti Nikolaas Maaduroon tiwitara gubbatti barreessan..

    Pireezidantichi lakkoofsi namoota seeraan-ala daangaa biyyatti seenan waan dabaleef, lakkoofsi namoota vaayirasichaan qabamaniis dabalee jedhan.

    Biyyattii keessatti lakkoofsi namoota qabamanii 10,000 wayita gahu, namoonni 96 immoo du’aniiru. Biyyattin lakkoofsa namoota qabamanii kan Biraazili fi Peeruu gadi ta'e qabdi.

    Lakkoofsa namoota qabamanii tarii sirnaan gabaasa hin jirtuu jedhamtees qeeqamti.