UN'tti ambaasaaddarri Israa'el Gutareez aangoo akka gadhiisan gaafatan

Haguuggii Tamsaasa Kallattii

1. 23 Onkololeessa 2023Dhaabbatni Fayyaa Addunyaa Israa'eliif waamicha godhe

   Israa'el warra hospitaala jiru dabalatee uummatni Kaaba Gaazaa jiru marti naannichaa akka godaanu erga akeekkachiisuu jalqabdee bubbuleera.

   Dubbii himaan Dhaabbata Fayyaa Adunyaa garuu, ''kun tasumaa kan hin danda'amnee'' jechuun Israa'el murteeshee kana akka dhiiftu gaafatan.

   ''Dhukkubsattootni salphaatti socho'uu hin dandeenye jiru, hedduunsaanii achi keessa mekaanikaal ventileetariin jiru, daa'imman reefu dhalatan inkubeetara keessa jiru, namootni waan irraa dhaabbachuu hin dandeenye keessa jiru, kanaaf isaaniin baasuun hedduu ulfaata'' jechuun dubbii himaan WHO BBCtti himan.

   ''Israa'el murtee kana akka dhiiftu waamicha goona.''

   Akka qondaalli kun jedhanitti meeshaaleen waldhaansa baqaqsanii yaluufi qorichoonni dhibee hamoo konkolaataan afur karaa Raafaah Gaazaa galuu himanii, ''kuni cirumaa gahaa miti'' jedhan.

   Konkolaattotni hedduun qorichaa fi meeshaalee waldhaansaa baatan gara daangaa Masrii jiraachuu himanii Gaazaatti ce'uuf hayyama eegaa akka jiran dubbatan.

   

2. 23 Onkololeessa 2023Iraan Israa’eliin waraana dhaabi ykn naannichi ‘to’annoon ala ta'a’ jette

3. 23 Onkololeessa 2023Haleellaa halkan edaa Israa'el Gaazaarratti raawwatteen hedduun miidhaman

   Dilbata kaleessa hanga halkaniitti halellaa humnootni Israa'el Gaazaarratti raawwataniin miidhaa guddaan gahuu Ministeerri dhimma biyya keessaa beeksise.

   Ministeerri dhimma biyya keessaa Paalistaayin ibsa baaseen haleellaa hanga halkanii gaggeefameen lakkoofsi guddaan miidhamni qaqqabeera jedha.

   Ibsa Telegiraam gubbaatti baheen haleellaan Israa'el Wiixata ganamallee itti fufeera. Haleellaawwan kanaan lakkoofsa namoota miidhaan irra gahee hin ibsine.

   Halellaawwan kanaan gamoowwan manca'aniifi hojii lubbuu oolchuu hojjetaman suuraaleen agarsiisanis qoodamaniiru.

   

   Madda suuraa, Getty Images

   

   Madda suuraa, Getty Images

   

   Madda suuraa, Getty Images

4. 23 Onkololeessa 2023Duulli Gaazaa ji'ootaaf itti fufuu mala jette Israa'el

   

   Madda suuraa, Getty Images

   Ministirri Ittisaa Israa'el Yu'aav Gaalant duulli waraanaa Gaazaatti gaggeessan ''ji'a tokko, ji'a lama ykn sadii ni fudhata, garuu ammoo dhumarratti wanti Hamaas jedhamu hin jiraatu'' jedhan.

   Ministirichi kana kan jedhan adeemsa duula isaanii ilaalchisee gidduugala ajajaa fi to'annoo humna qilleensaa biyyattiitti ibsa yeroo kennani.

   Gaalant adeemsa duula isaanii yoo dubbatan dhumarratti qaamni ''Humna Ittisaa Israa'el dhaabu hin jiru'' jedhan.

   ''Kun duula isa dhumaa Gaazaatti raawwannu ta'a, sababni salphaan ammoo ammaan duuba wanti Hamaas jedhamu hin jiraatu" jechuun duullisaanii kun Hamaasiin hanga dhabamsiisuutti akka itti fufu dubbatan.

   Humna qilleensaa biyyattii galateeffatanii, ''yeroo dhiyootti'' humni lafoos duula akka eegalu dubbatan. Yeroon dhiyootti jedhan kun garuu yoom akka ta'e hin ibsamne.

   Israa'el guyyoota darban aanga'oota olaanoo biyya michoota ishee ta'an akka US, UK, Jarman kan simatte yoo ta'u guuyyota dhufan keessattis pireezidantii Faransaay Maakrooniifi kaanis simachuuf jetti.

   Michootnishee warri lixaa Israa'el mirga balaa ofirraa qolachuu qabdi jechuun ishee deeggaru.

5. 23 Onkololeessa 2023Tamsaasa kallattii keenya har'aa eegalle.

   Hoordoftootaa odeessa kallattii isin biraa geenyu kan har'a kunoo amma jalqabneerra.

   Waraana Israa'eliifi Hamas ilaalchisee odeessaalee haaraa argachuuf gara marsariitii keenya millachu hin dagatiinaa.

   Oolmaa nagaa qabaadhaa.

6. 23 Onkololeessa 2023Dursaan UN konkolaataawwan deeggarsaa marsaa lammaffaa Gaazaa seenan jedhe

   Hoogganaa Olaanaan deeggarsa namoomaa UN, Maartiin Giriifitsi, konkolaataawwan deeggarsa namoomaa fe'an kan marsaa lammaffaa Gaazaa bulchiinsa Filisxeem seenuu ibsan.

   Hoogganaan kunis erga konkolaattoonni 20 marsaa jalqabaatiin Gaazaa seenaniin guyyaa tokkoon booda ammas konkolaattoonni deeggarsa fe'an 14 kara ulaa Raafaah daangaa Masriifi Gaazaa jidduun seenaniiru jedhan.

   UN'tti Janaraalli Olaanaan Dhimmoota namoomaa, Giriifits, deeggarsi marsaa lammataa Gaazaa seenuu toora X gubbaatti barreessan.

   Ergaa isaanitiinis, ''uummata miliyoonota deeggarsa namoomaa eeggataa jiruuf ifa abdii xiqqoo gara biraa'' jechuun ibsan.

7. 22 Onkololeessa 2023Tamsaasi kallattii Dilbataa xumurame.

   Tamsaasi kallattii BBC Afaan Oromoo guyyaa Dilbataa xumurame.

   Wiixata ganama walitti deebina.

   Gadi buusaa waan gabaasaa oolle odeeffachuu dandeessu.

   Galatoomaa!

   

   Madda suuraa, Reuters

8. 22 Onkololeessa 2023Gaazaatti namoonni hospitaala reeffi kafanamee toora galetti gadda ibsaa jiru

   Akeekkachiisa: Maxxansi kun wanta miira namaa jeequu danda'an of keessaa qaba.

   Kanaan dura waa'ee suuraawwan reeffa daa'imman hospitaala Al Aqsaa kan giddugala Gaazaa argamu keessatti mul'atee gabaasnee turre.

   Suuraaleen reeffa ijoollee 11 fi daa'imman lama agarsiisu.

   Amma suuraa biraa, ogeessa suuraa dhaabbata oduu AFP keessatti hojjetu irraa, reeffa daa'ima 12ffaa agarsiisu argine.

   Ammas suuraa kana akka hin agarsiifne murteessine. Hamma waldhabdee kanaa, fi miidhaa inni namoota nagaarraan geessise argarsiisu barbaanna.

   Haata'u malee, suuraawwan biroo hospitaalicha keessatti kaafaman kan nuti agarsiisuu dandeenyu jiru.

   Isaan keessaa tokko waan daa'ima fakkaatu kan kafanaan marfame, namtichi tokko baatu agarsiisa. Reeffi kafana kana keessaa hin mul'atu.

   Akkuma suuraa ijoollee kanaa, namoonni suuraawwan kanarratti mul'atan yoom fi eessatti akka du'an hin beeknu.

   Hospitaalichi magaalaa xiqqoo Deyir Al - Bala, bakka torbee darbe keessa haleellaa Israa’el rukutamte keessa jira.

   Magaalattiin naannoo kaaba Gaazaa Israa'el namoonni nagaa keessaa ba'anii gara kibbaatti akka baqatan itti himterraa gara ala jirti.

   Israa'el giddu galeessaa fi kibba Gaazaatti haleellaa boombii itti fufteetti.

   

   Madda suuraa, Getty Images

   

   Madda suuraa, Getty Images

   

   Madda suuraa, Getty Images

9. 22 Onkololeessa 2023Netaaniyaahu: Hezbollaan yoo waraana seene 'dogoggora guddaa itti ta'a'

   

   Madda suuraa, Reuters

   Ministirri Muummee Israa’el Benjaamin Netaaniyaahu garee hidhattoota Libaanos cimoodha jedhaman, Hezboollaah, akeekkachiisan.

   Yoo waraana bane ’dogongora seenaa isaa keessa guddaa ta’e’ raawwate jechuudha jedhan.

   Michuu Hamaas kan ta’e Hezbollaah erga Israa’el Hamaas rukutuu eegalte booda gara Israa’elitti haleellaa raawwataa ture. Israa’eliis haleelaa turte.

   Booda kanammoo haalli hammaachuu mala jechuun shakkitee lammiilee ishee gama daangaa Libaanos, kaaba Israa’el jiran, bakka biraa geessaa jirti.

   Yoo Hezbollaah waraana bane haleellaa bal’aa dorgomaa hinqabneefi Libaanos miidhu akka banamu bulchaan Israa’el dhaadataniiru.

   Israa’eliifi US hidhattoota Hezbollaah Iraaniin deeggaramu waraana biraa akka hin banne akeekkachiisan.

10. 22 Onkololeessa 2023Suuraa haaraa Gaazaarraa ergaman

    Suuraan haaraa Gaazaatti kaafaman hamma miidhaa dhaqqabe agarsiisu.

    Hanqinni boba’aafi gaazii waan jiruuf namoonni mana daabboo fuulduratti hiriiraniis mul’ataniiru.

    

    Madda suuraa, Reuters

    Gamoowwan jijjiganii, namootni kannene lubbuun hafan barbaacha gamoo jala yoo barbaadan mul’atu.

    

    Madda suuraa, EPA

    

    Madda suuraa, Getty Images

11. 22 Onkololeessa 2023Waan reeffa ittiin owaallu gahaa hinqabnu: Hospitaala

    

    Akeekkachiisa: Gabaasi kuni qabiyyee miira keessa jeequ malu qaba.

    Gaazexeessaan BBC Afaan Arabaa Adinaan El-Bursh hospitaala Al Aqsa gidduu magaalaa Gaazaatti argamuu bira dhaquun haala jiru taajjabeera.

    Akka ripportarri keenya jedhetti, reeffi namaa uffata adiin maramee dallaa hospitaala keessa mul’ata.

    Hojjettoonni hospitaalichaa haala rakkisaa keessa akka jiran itti himan.

    ‘’Erga bari’ee asuma jirra. Reeffi dallaa hospitaalaa guuteera. Firiijiin reeffi keessa taa’us guuteera,’’ jedhan.

    ‘’Lakkoofsi isaa hedduu waan ta’ef waan itti reeffa maranii owwaalan hinqabnu. Reeffa namaa cicciteetu dhufaa jira. Sababa kanaaf adda baasuuf hin dandeenyu.’’

    Hojjetaan hospitaalichaa biroo BBC’n dubbise: ‘’Kana dura waan danuu taajjabnuus, waan akkanaa garuu agarreetu hin beeknu,’’ jedhan.

    Namni maatii isaa miidhame qabateefi gommaan konkolaataa jalaa dadhabde ''dafaa, dafaa'' jechuun birmannaa yoo gaafatu gaazexeessaan BBC taajjabeera.

    Keessaan immoo maatiin ijoollee isaanii miidhamaniif boo'u.

12. 22 Onkololeessa 2023Hawaasni Israa'el dabalataan daangaa Libaanosirraa fageeffaman

    Waraanni Israa’el Hamaas waliin lola yeroo itti fufe jirutti, daangaa kaaba biyyattii Libaanos daangessutti muddamni dabaleera.

    Torban muraasa darban misaa’elli Libaanosirraa dhukaafame qe’eewwan Israa’elirra bu’eera.

    Israa’el, gareen hidhattoota Hizbollaah hundee jabaa Libaanoos ta’e ‘’tapha balaa qabu’’ taphataa jira jechuun akeekkachisteetti.

    Akkuma Hamaas, gareen Hezbollaahis US, UK fi biyyoota biroon tarree shororokeessummaa jala seeneera.

    Ibsi waraanni Israa’el baase akka agarsiisutti balaa xiqqeessuuf hawaasi Israa’el 14 ta’an bakkeewwan daangaa Libaanos dhihoo jirutti jiraatan baafamaa jiru.

    Eegasii manneen keessumaa mootummaan kanfalu keessa akka qubatan taasifame.

    • Gareen hidhattoota Hezbollaah eenyu?

13. 22 Onkololeessa 2023'Rakkoon Gaazaa keessa dhimma keenya miti' - MM duraanii Israa'el

    

    Ministirri Muummee duraanii Israa'el Naftali Beneet rakkoon namoomaa Gaazaatti mudate ''dhimma keenya miti'' jedhan.

    Israa’el daangaa qilleensaa Gaazaa fi qarqara qaama galaanaa Gaazaa to’atti, sochii namootaafi meeshaalee Gaazaa seenanillee cimsitee to’atti.

    “Addunyaan dhufee lammiilee Gaazaa gargaaruu danda’a. Sun dhimma keenya miti,” jechuun Israa’el gargaarsa dabalataa gara Gaazaatti akka seenu akka eeyyamtu yeroo gaafataman deebisan.

    Tarkaanfiin namoomaa wal-faana ta'uu qaba jedhan, lammilee Israa’el Hamaasiin butaman eeruun.

14. 22 Onkololeessa 2023Namoonni 4,651 Gaazaa keessatti ajjeefaman: Aangawoota

    Aangawoonni Gaazaa keessaa lakkoofsi waliigalaa namoota du’anii 4,651 ta’u himan

    Ministeerri Fayyaa Gaazaa Hamaasiin to’atamu erga torban lama dura lolli ifatti eegalee yoo xiqqaate ummatni 4,651 ajjeefamuu ibseera.

    Dabalataan, namoonni 14, 245 madaa’uu beeksise.

    Sa’aatii 24 darban keessammoo daa’imman 117 dabalatee lammiileen Filisxeem 266 du’uu dubbate.

15. 22 Onkololeessa 2023Yaa'iin dhimma Filisxeemirratti waamame waliigaltee malee xumurame

    

    Madda suuraa, Rooyitars

    Yaa’ichi magaalaa guddoo Masrii Kaayirootti kan taa'ame yoo ta’u, bu’aa otoo hin buusne addaan bittinnaa'e.

    Yaa’ichi kan addaan cite erga jilli Awurooppaa biyyoonni Arabaa Hamaas akka balaaleffatan waamicha dhiheessan hordofeeti.

    Qondaalli Israa’el bakka bu'e tokkollee yaa’iirratti hin argamne.

    Gamtaan Awurooppaa fi biyyoonni Arabootaa konfiransii sanarratti argamuun haasaa dhiyeessan.

    Marii dhimma nageenyaa kanarratti ibsa ejjennoo waloo baasuuf waliigaluun dadhabamuullee, Masriin addatti ibsa tumsa biyyoota Arabaa biroo argate baafte.

    Dubbiin ijoo ibsichaa hawaasni addunyaa dhimma Filisxeemiif xiyyeeffannaa gahaa hin kennine kan jedhu.

    Biyyoonni Arabaa yaa’icharratti hirmaatan hundi yaalii Filisxeemota humnaan buqqisuuf taasifamu jedhan cimsanii balaaleffatan.

    Pirezidantiin Masrii Abdul Fattaa al-Sisiin biyyattiin Filisxeemonni ulaa Raafaa qaxxaamuranii gara Masrii akka baqatan gonkumaa hin eeyyamtu jedhan.

    Yaada Al-Siisii ​​kan deeggaran Ministirri Dhimma Alaa Sa’udii Faayisal Bin Farhaan Al Sa’udi yaadni Filisxeemota buqqisuu bu’aa hin qabu jedhan.

    Gama Filisxeemiin Muhammad Abbaas, nuti Filisxeemonni lafa keenyarraa dhiibamne hin baanu.

    Wanta dhufu lafuma keenyarratti simanna jedhan.

    Bulchiinsi Muhaammad Abbaas West Baankii malee Gaazaa hin to'atu. Naannoo Gaazaa Hamaasitu bulcha.

16. 22 Onkololeessa 2023Seenaan dudduubee walitti bu'iinsa Israa'eliifi Filisxeem maali?

    

    Madda suuraa, AFP

    Erga Israa’eliifi hidhattooti Hamaas bulchiinsa Filisxeem kan taate Gaazaa bulchaa jiran waliin lola eegalanii torban lama ta’eera.

    Lolli tibbanaa haleellaa Hamaas Israa’elitti ce’ee baneen baay'een isaanii lammiilee nagaa kan ta'an dabalatee 1,400 du'aniiru.

    Kanneen 200 ta'animmoo butee fudhatee booda lolli eegale.

    Israa’eliis haaloof haleellaa qilleensaa raawwatteen kumaatamni daa’immaniifi dubartoota dabalatee lubbuu dhabaniiru.

    • Israa’eliifi Filisxeem garuu durumaa eegalee maaliif waldhabu?

17. 22 Onkololeessa 2023'Shororkeessitoonni hedduu' Gaazaatti ajjeefaman - Israa'el

    Waraanni Israa’el haleellaan qilleensaa halkan tokkotti Gaazaatti raawwatame gaggeessaa olaanaa Hamaas ajjeesuu ibse.

    Dubbi himaan Raayyaa Ittisa Israa’el Daani’el Hagaarii akka jedhanitti, ittaanaan ajajaa humna rookkeettii Hamaas “shororkeessitoota kurnootaan lakkaa’aman” warreen ajjeefaman waliin ture jechuu isaanii Rooyitars fi miidiyaaleen Israa’el gabaasaniiru.

    UK, US, fi biyyoonni biroo Hamaas dhaabbata shororkeessaatti ramadaniiru.

    Bara 2007 irraa eegalee Gaazaa bulchaa kan jiru Hamaas, haleellaa halkan edaa raawwatameen namoonni 55 ajjeefaman jedhe.

    Suuraaleen haleellaa giddugala Gaazaa fi kibbaa Gaazaa, Raafaa daangaa Masriitti dhihoo jirtu, keessatti raawwatamuu agarsiisa.

    Israa'el lammiileen nagaa ykn sivilii gara kibbaa Gaazaatti akka baqatan irra deebi'in akeekkachisteetti.

    Kutaaleen kaaba Gaazaa guutummaatti jechuun haala danda'amuun diigamaniiru.

    Gaazaan naannoo xiqqaadha – dheerinni lafa Gaazaa Landan waliin wal fakkaata - qubsumni ummataa rukkataadha.

    Hagaariin akka jedhanitti Israa'el haleellaa Gaazaarratti raawwattuun ''waraana marsaa itti aanuuf qophaa'uuf'' jabaabeessaa jirti.

    Kunis haleellaa lafoo ta'a jedhamee eegama.

18. 22 Onkololeessa 2023'Maaliif boombii nutti gadhiistu?': Ollaa Gaazaa halkan tokkoon daaraa ta'e

19. 22 Onkololeessa 2023Haleellaa Israa'eliin buufata Sooriyaatti lama ajjeefaman: Gabaasota

    Miidiyaan mootummaa Sooriyaa akka gabaasetti, haleellaan Israa’el buufata xiyyaaraa biyyattii ijoo lamarratti xiyyeeffatan.

    Kunneenis, buufata xiyyaaraa Damaasqoofi Aleeppoo ta’uu Ejensiin Oduu Arabaa Sooriyaa gabaase.

    Rooyitars aangawaa metirooloojii mootummaa Sooriyaa waabeffatee akka gabaasetti, buufata xiyyaaraa Damaasqootti lammiileen nagaa lama ajjeefaman.

    Akka xinxaltoonni jedhanitti, buufati xiyyaaraa lamaan imaltoota siviliif ala meeshaalee waraanaa Iraan Hezbollaatti dabarsuuf itti dhimma baatudha.

    Gareen Hezbollaa buufata isaa Sooriyaafi Libaanoos keessaa qabu Israa’el waliin waldhabbii qaba.

    

    Akka gabaasa miidiyaa mootummaa kanaatti, dirreen xiyyaarri irratti gulufu miidhamee hojiin ala ta'eera.

    Israa'el torban darbeen buufata xiyyaaraa kanneen haleelteetti.

20. 22 Onkololeessa 2023Filsixeem: Israa'el namoota biroo afur West Baankitti ajjeefte

    Aangawoonni Filisxeem namoonni dabalataa afur West Baankitti humnoota Israa’eliin ajjeefamuu himan.

    Waan kana kan dubbate Ministeera Fayyaa Filsixeemidha.

    Gama kaaniin, waraanni Israa’el Sambata galgala ‘’mooraa shororkeessaa’’ Jeniin, West Baank argamu haleeluu beeksisee ture.

    Hanga yoonaa erga torban lama dura Hamaas Israa’elirratti haleellaa banee lakkoofsi namoota West Baankitti lubbuun isaanii darbe 89 gahuu ragaan Ministeera Fayyaa Filisxeem ni mul’isa.