Россия Хитойнинг энг йирик нефть таъминотчисига айланди

Жонли ёритиш

1. 6 июн 2022Украина уруши: жабҳа чизиғидан 3 км узоқда

   Бахмут шаҳри яқинида Россия қўшинлари ҳужумларини қайтариб турган Украин ҳарбийларидан Антон, "руслар Киев атрофидаги мағлубиятларидан сабоқ чиқардилар", дейди.

   "Аввал артиллерия билан кунпаякун қилиб, кейин ҳужумга ўтиш тактикасини танлаганлар", дейди Антон Би-би-си мухбири Орла Гуэринга.

   Би-би-сининг тасвирга олиш жамоаси борган жой Россия қўшинлари билан бўлаётган жанг фронт чизиғидан уч километрча узоқда, "биз бўлган пайтимиз ярим соат бомбардимон тинмади", дейди мухбиримиз.

2. 6 июн 2022Украина уруши: Шу вақтгача бўлган муҳим хабарлар

   • Украина Президенти Володимир Зеленский Запорожье вилояти ва Лисичанск шаҳридаги шиддатли жанглар кетаётган фронт чизиғида бўлганини билдирди.
   • Луганск вилояти маъмурияти раҳбари Серҳий Ҳайдай Украина армияси Северодонецк учун жанг қилишда давом этаётгани, бироқ шаҳардаги вазият Украина қуролли кучлари учун бироз ёмонлашгани ва улар саноат ҳудудини ўз қўлида ушлаб турганини билдирди. Олдинроқ Украина ҳарбийлари Северодонецкнинг 50 фоизини назоратида ушлаб тургани ҳақида хабар берилганди.
   • Британия Украинага М270 узоққа ракета отувчи тизимни етказиб беришини маълум қилди. Олдинроқ АҚШ шу турдаги M142 (HIMARS) ракета отиш тизимини беришини билдирганди.
   • Зеленский Британия Бош вазири Борис Жонсон билан қуролларни етказиб бериш борасида мулоқот қилган. Бугун “Консерваторлар” партияси карантин вақтида қоидаларни бузган деб айтилаётган Борис Жонсонни Бош вазирлик мақомида қолиш -қолмаслиги борасида овоз бериши кутилмоқда.
   • Россия армияси ҳақида “сохта” хабар бериш ҳақидаги мақола сабаб дастурларини тўхтатиб қўйган Россиянинг “Дождь” телеканали Европа лицензиясини олди ва тез орада Ригадан фаолиятини қайта тиклаши мумкин.

3. 6 июн 2022Россия уруши: Ғарб Украинага бераётган ракеталар тизими урушда бурилиш ясайдими?

   Россия билан муносабатларига путур етиши мумкин деган таҳдидларга қарамасдан АҚШ ортидан Британия ҳам Украинага узоққа отувчи артиллерия беради. Таҳлилчилар ушбу аниқ нишонга олувчи қуроллар урушда бурилиш ясаши мумкинлигини, аммо бу тез орада бўлмаслигини айтмоқда.

   Бу ҳақда тўлиқ мақоламизда ўқинг

4. 6 июн 2022Ўзбекистон: Ҳозир ҳаммага қийин - нархлар кескин ошди

   Украина уруши иқтисодий оқибатларининг ўзбекистонликлар ҳаётига таъсири тобора кучайиб бормоқда - қисқа вақт ичида бир қатор асосий озиқ-овқат маҳсулотлари, асосан, ун, ёғ, шакар, нон нархлари кескин ошиб кетган.

   Бу ҳақда Тошкентдан мухбиримиз Аваз Тоҳиров тайёрлаган мақола билан танишинг:

5. 6 июн 2022Украина: Иван бир ўзи Россия ва Путинни халқаро маҳкамага тортмоқчи?

   Халқаро Жиноят Суди Украинадаги уруш жиноятлари деб даъво қилинаётган жиноятларни тергов қилиш учун ўзининг терговчиларини юборди.

   Бу ХЖС тарихидаги терговга юборилган энг катта гуруҳ бўлди. Биргина Киев вилоятининг ўзида Россия қўшинлари чекинганидан кейин полиция 1200 дан ортиқ тинч фуқаронинг жасадини топган.

   BBC мухбири Жеймс Уотерхаус полиция офицери Иван Симороз билан учрашди. Иван Симорознинг уйига Россия ҳарбий ҳаво кучлари уюштирган зарба оқибатида у оиласининг олти аъзосидан айрилди. ХЖС терговчилари ушбу ҳужумни ҳам ўрганадилар.

6. 6 июн 2022Путин Ғарб бераётган қуроллар сабаб Украинадаги янги нишонларга зарба бериш билан таҳдид қилди

   Президент Владимир Путиннинг айтишича, агар Ғарб давлатлари Украинага узоққа учувчи қуроллар берса, Россия Украинадаги зарба берадиган нишонлари рўйхатини кенгайтиради.

   Кремлнинг огоҳлантириши якшанба куни узоқ муддатдан сўнг Киевга ҳаводан берилган зарбаларга тўғри келди.

   Россия ҳукуматининг таъкидлашича, зарбалар Украинага ғарб томонидан етказиб берилган танкларни нишонга олган. Украина томонининг айтишича, темир йўл таъмирлаш заводи бомбаланган.

   Сал олдинроқ АҚШ Украинага M142 (HIMARS) мобил артиллерия ракета тизимини етказиб беришини маълум қилди. HIMARS 70 чақирим масофагача бўлган нишонларни аниқ урувчи ракеталарни отади. Бу айни дамда Украинада мавжуд бўлган узоққа отувчи қуроллардан анча узоқни нишонга олади.

   АҚШ томонидан Украинага берилаётган навбатдаги ёрдамда, шунингдек, вертолёт, танкларга қарши қурол, тактик машиналар ва турли қуроллар учун эҳтиёт қисмлар ўрин олган.

   Европа Иттифоқи давлатлари ҳам Украинага ҳарбий кўмак беришда давом этишини билдирган.

7. 3 июн 2022Зеленский: Ғалаба бизники бўлади, Можаронинг 100-куни

   Украина президенти урушнинг 100 кунлиги муносабати билан таъсирчан видео чиқарди.

   Володимир Зеленский видеода Украина Бош вазири илова ўзининг энг яқин иттифоқчилари билан кўриниш берди. Уларнинг унвонларини бирма-бир санаб ўтди.

   “Украина Қуролли кучлари ҳам шу ерда...Давлатимиз халқи ҳам шу ерда. 100 кундирки, Украинани ҳимоя қилаяпмиз. Ғалаба бизники бўлади. Украинага шон-шарафлар бўлсин!”, - деди.

   Россия Украинада ўзининг “махсус ҳарбий амалиёти”ни бошлаганидан кун ўтиб, яъни 25 февраль куни ҳам Володимир Зеленский худди шу жойда олинган видеосини эълон қилганди.

   Бунинг ортидан Украина президенти Ғарбнинг кетиш таклифини рад этган, “ўзининг кетиш эмас, ўқ-дорига эҳтиёжи бор”лигини айтганди.

   Россиянинг Украинадаги уруши ўзининг 100-кунига кираркан, Володимир Зеленский ҳамон президентлик мавқеида, мамлакатини бошқариб турибди.

8. 3 июн 2022Украина деб, Ўзбекистон яна жангари гуруҳлар таҳдиди остида қоладими?, Видео

   Украина деб, Ўзбекистон яна жангари гуруҳлар таҳдиди остида қоладими?

   Ўзбекистонга чегарадош Афғонистон дунёнинг энг йирик ўзбек жангари гуруҳлари бошпана топиб келган давлати бўлади.

   Агар Украина деб, Ғарб унутса ва Афғонистон Ер юзининг “жаҳаннами”га айланса, жангари гуруҳлар яна жонланадими?

9. 3 июн 2022Қизил Хоч: Вайронагарчилик кўлами ақл бовар қилмас, Иможен Фоулкс, BBC, Женева

   Халқаро Қизил Хоч ташкилоти Украина урушининг 100 кунлиги муносабати билан расмий баёнот чиқарди.

   Халқаро ташкилот уруш етказган вайронагарчилик, талафот кўлами ақл бовар қилмас эканини айтди.

   Ташкилот раҳбари Роберт Мардинига кўра, “Украинадаги халқаро можаронинг сўнгги 100 кун ичида одамларга етказган зиёнини таърифлаш қийин”.

   “Уйлар, мактаблар ва касалхоналар вайрон қилинган. Тинч аҳоли можаролар даҳшатини бошидан кечирган, жонлар берилган, оилалар пароканда бўлган”.

   Роберт Мардини қаерда тутиб турилганликларидан қатъиназар, ўзларига барча уруш асирларига имконият берилишига ҳам чақирган.

   Унинг айтишича, бу нарса Халқаро Женева Конвенциясида кўзда тутилган.

   Халқаро Қизил Хоч ташкилоти раҳбарининг сўзларидан маълум бўлишича, шу пайтгача рақиб томонлар фақат айрим уруш асирлари билан кўришишларига изн беришган, холос.

   Қизил Хоч, одатда, бетараф мавқеъда бўлиб келади.

   Шу боис ҳам кескин мазмундаги баёноти уларнинг ҳозир жиддий хавотирда эканликларини кўрсатади.

   Халқаро Қизил Хоч ташкилоти бунгача ҳам Украина уруши борасида бир неча бор гапирган.

10. 3 июн 2022Украина Россия ҳужумларини қайтардими?, Можаронинг 100-куни

    Расмий Киев янги даъво билан чиқди.

    Украина томонига кўра, ўтган бир кеча-кундузда шарқий Донецк ва Луганск вилоятларида Россиянинг бешта ҳужумини қайтаришган.

    Бу ҳақда Украина Қуролли Кучлари Бош штаби ўзининг Facebook даги саҳифасида билдирган.

    Шу билан бирга, Северодонецк маркази ва Лиман шаҳрида кетишда, Студенка яқинида шиддатли жанглар кетаётганига оид хабарлар бор.

    Украинанинг даъво қилишича, Россиянинг 150-мотоўқчи дивизиясининг айрим бўлинмалари Луганкс яқинидаги жангларда жиддий талафотга учрашган.

    “Ҳарбий хизматлари ва қурол-яроғининг ярмига яқинини бой берган”.

    Би-би-си Украина томонининг айни мазмундаги иддаоларини мустақил манбалар орқали тасдиқлай олмаган.

11. 3 июн 2022Молдова Россия янгиликларини расман тақиқлади, Можаронинг 100-куни

    Молдова Россия пропагандасининг олдини олмоқчи.

    Мамлакат парламенти Россия янгиликларини тақиқловчи тақиқни маъқуллади.

    Энди Молдова телевидениесида Россиянинг янгиликлари берилмайди.

    Молдова Россия билан чегарадош эмас.

    Аммо Украина жануби-ғарбида жойлашган.

    Жўғрофий жойлашуви Украинанинг Россия кучлари забт этган жанубий минтақаларига яқин.

    Россиянинг Украинага босқини Молдовада тангликни кучайтирган.

    Молдова ҳам Украинага ўхшаб Европа Иттифоқига кирмоқчи.

    Москва томонидан дастакланувчи бўлгинчи Днепрбўйи минтақаси ҳам бор.

    Россия бу ердаги айирмачиларни ҳам дастаклайди ва бўлгада 1500 га яқин аскарига эга.

    Молдова уруш бошидаёқ Россиянинг янгиликларини беришни тўхтатиб қўйган.

    Аммо кеча, пайшанба куни бу тақиқ расмий тус олган.

    Молдова телевидениеси энди фақат Россиянинг кўнгилочар кўрсатувларини намойиш этади.

    Янги ҳужжат ёлғон ахборот тарқатиш учун жарима ва бошқа жазо чораларини ҳам кўзда тутади.

12. 3 июн 2022Украина-Россия можаросининг беш ечими. Киев ва Москва қай бирини танлайди?, Таҳлил

    Россия ишғолига 100 кун тўлди. Ҳозир ҳам урушдан дипломатик, тинч ва барқарор чиқиш йўли борми?

    Ғарб Путинни қўрқитиб, Украина урушига чек қўя оладими?

    Урушнинг Россия ва ўзига қанчалик қимматга тушиши Путинни ўйлантирадими?

    Батафсил иловамиз орқали танишинг.

13. 3 июн 2022Урушга 100 кун тўлди. Россия Украинанинг ‘20 фоизини забт этди’, Можаронинг 100-куни

    Россия ишғолига роппа-роса уч ой тўлди. Украина президенти Россиянинг ютуғига ўзининг баҳосини берди. НАТО Бош котиби янги огоҳлик билан чиқди.

    Шу соатга қадар бўлган энг муҳим янгиликлар:

    • Бугун Россия бошлаган урушнинг 100-куни. Президент Володимир Зеленскийнинг айтишича, Россия шу вақт оралиғида Украинанинг 20 фоизини забт этиб бўлган.
    • Ишғолга қадар Россия ва Россия томонидан дастакланган бўлгинчилар Украинанинг 10 фоизча ҳудудини назорат қилишган.
    • Украина президентининг тахминича, Россияга қарши урушда мамлакат шарқида ҳар куни 100 тагача ҳарбийларини бой беришаётир.
    • Президент Зеленскийнинг Словакиядаги форумда айтишича, Ғарб қурол-яроғ таъминотини янада кучайтирса, бу урушни Украина фойдасига ҳал қилиши мумкин.
    • НАТО Бош котиби Ғарб давлатларини огоҳлантирди. Уларга узоқ урушга тайёр туришлари кераклигини айтди. Йенс Столтенбергга кўра, уруш ҳозир “ҳолдан тойдириш” тусини олган.
    • Луганск вилояти губернаторининг айтишича, Россия Армияси шарқда Украина ҳимоясини ҳар томондан ёриб ўтишга ҳаракат қилаётир.
    • Россия Северодонецкни деярли забт этиб бўлган эса-да, шаҳар учун жанглар ҳануз қизғин кечаётир.
    • Северодонецк Луганск вилоятининг маъмурий маркази бўлади. Уни қўлга киритиш билан Россия вилоятни деярли тўлиғича ўз назорати остига олади. Бу Россиянинг Донбассни эгаллашига янада кенгроқ йўл очади.
    • Россия Мудофаа вазирлиги ва ниҳоят узоқ кутилган янгилик билан чиқди. Вазирлик ғалла юкланган кемалар “инсонпарварлик йўлаклари” орқали Украина портларини тарк этишлари мумкинлигини айтди. Аммо экспортнинг бошланган-бошланмаганига аниқлик киритмади.

14. 2 июн 2022Литвага Украина армиясига бериш учун “Байрактар” совға қилинди

    Туркиянинг Baykar дрон ишлаб чиқарувчиси Литвага “Bayraktar TB2” ҳарбий дронини совға қилди. Литва уни Россияга босқинига қарши ишлатиш учун Украина армиясига ҳадя қилишни режалаганди.

    Истанбулдаги ширкат қанотлари 12 метрни ташкил қилувчи ва 7,5 километр баландликка кўтарила оладиган “Байрактар” дронини Литвага совға қилишини маълум қилди.

    Олдинроқ Литва Украинага жанговар дрон совға қилиш учун аҳолиси ўртасида кўнгилли равишда пул тўплаб, Baykar га чиққан эди.

    Ишлаб чиқарувчи йиғилган пул Украинада “инсонпарварлик ёрдами” сифатида ишлатилиши шарти билан дронни текинга беришини билдирди.

    “Bayraktar TB2” ҳарбий дрони Украинада уч ойдан бери давом этаётган урушда Россия артиллерия тизими ва зирҳли машиналарини аниқ нишонга олишда ўзининг самарадорлигини исботлаган.

    “Бу ноқонуний босқин бўлгани учун ҳам TB2 Украинанинг муҳтарам халқига ватанини ҳимоя қилишда ёрдам бермоқда”, деганди ўтган ой Baykar ширкатининг раҳбари Селжук Байрактар Reuters хабар агентлигига.

    Литваликлар Украинага ёрдам сифатида Байрактар олиш учун 3 куннинг ичида қарийб 6 миллион евро тўплаганди.

15. 2 июн 2022Россия биқинидаги НАТО давлати нега ҳарбий тайёргарлик кўрмоқда?

    Нарва ғалати жой, деярли ғайриодатий. НАТО шарқий қанотининг энг чеккасида жойлашган бу шаҳар Эстониянинг учинчи йирик шаҳри, аммо деярли 60 000 аҳолисининг 97 фоизи, Европа Иттифоқидаги энг йирик русийзабон шаҳар.

    Биринчи ташриф буюрувчи учун бу классик Совуқ уруш чегарасига ўхшайди. Икки улкан қалъа дарёнинг қарама-қарши қирғоғида бир-бирига қарама-қарши туради, ўртадан халқаро чегара ўтади.

    Шу ҳақда тайёрлаган мақоламизни ўқинг.

16. 2 июн 2022Ирландия сенати Россиянинг Украинадаги ҳаракатларини геноцидга тенглаштирди

    Ирландия парламентининг юқори палатаси Россиянинг Украинадаги ҳаракатларини геноцид деб тан олувчи резолюцияни қабул қилди.

    Сенат спикери Марк Дейл бу ҳақда Twitter да ёзди.

    “Россия федерациянинг Украинага босқини геноцид ҳисобланади. Ирландия сенати Россиянинг Украинадаги қатлиоми тўғрисида резоляция қабул қилди”, деб ёзди у.

17. 2 июн 2022Путин Россияси Украина ортидан Ўзбекистон ва минтақага ҳам таҳдид қиладими?

    Ёки бу асоссиз хавотирми? Айни масалада ҳозир бирон аломатлар кўзга ташланадими? Россия ўзи айтмоқчи тарихий ерларини қайтариб олса, Марказий Осиё, хусусан, Ўзбекистон қаерда бўлади?

18. 2 июн 2022Зеленский: Украина Россия босқинидан мингдан ортиқ аҳоли масканларини озод қилди

    “Россия ҳарбийлари Украинанинг 3620 аҳоли масканларини босиб олганди. Улардан 1017 таси озод қилдик. Яна 2 603 тасини озод қилишимиз керак”, деган Люксембург парламенти депутатлари қаршисида чиқиш қилган Украина Президенти Володимир Зеленский

    “Бугунга кунчагача бизнинг 20 фоиз, қарийб 125 минг квадрат километр еримиз ишғол остида қолмоқда. Тахминан 300 минг квадрат километр ҳудудимиз портламаган мина ва снарядлар билан яроқсиз ҳолда”, деган у.

    Зеленскийга кўра, Украинадаги фронт чизиғи минг чақиримни ташкил қилади.

    “Мамлакатимиз шарқидаги Харковдан тортиб жанубидаги Николаевга қадар улкан ҳудудда жанглар давом этмоқда. Тўғри чизиқ бўйича улар орасидаги масофа 454 километр. Аммо фронтдаги барча чизиқларни ҳисобга олсак, у албатта текис жойлашмаган. Унинг узунлиги минг километрдан ошади”, деган Зеленский.

    Президентнинг айтишича, урушнинг қарийб 100 куни давомида Россия Украинага 2478 та ракета отган.

19. 2 июн 2022Британия разведкаси: Россия Севередонецкни деярли тўлиқ эгаллади

    Британия разведкасининг маълум қилишича, Россия Луганск вилоятининг маъмурий маркази Севередонецк шаҳрини деярли тўлиқ эгаллаган. Аммо у Северский Донец дарёсини кечиб ўтишни тўхтатиб туришига тўғри келади.

    Россия Севередонецкнинг катта қисмида эгаллаган бўлса-да, қўшни Лисичанск шаҳрига олиб борувчи йўл ҳамон Украина қўлида қолаётган бўлиши мумкин. Бироқ артиллериядан тинмай ўт очаётган Россия қўшинлари катта йўқотишларга учраётган бўлса-да олдинга қараб юришда давом этмоқда, дейилади хабарда.

    Луганск вилояти ва Донецкда тўлиқ назоратни ўрнатиш учун Россия армияси Северский Донец дарёсидан кечиб ўтиши ўта муҳим. Кечув жойлари Северодонецк ва Лисичанск ва яқинда қўлга киритилган Лиман орқали бўлиши мумкин. Бироқ Украина армияси ҳамон дарё қирғоқларини назорат қилиб турибди ва кўприкларни портлатган.

    Британия разведкаси хабарида айтилишича, душманнинг қаршилик кўрсатиши шароитида дарёни кечиб ўтиш учун Россия кучлари энг камида тактик танаффус олишига тўғри келади. Бу ўз навбатида Россия армияси сўнгги ҳафтада тезлаштирган суръатнинг пасайишига олиб келиши мумкин.

20. 2 июн 2022Reuters: АҚШ Украинага йирик ҳарбий дронлар сотишни муҳокама қиляпти

    Жо Байден маъмурияти Украинага MQ-1 Predator дронининг замонавийлаштирилган тури MQ-1C Gray Eagle учувчисиз ҳарбий самолётларидан 4 дона сотишни муҳокама қиляпти. Америка ушбу дронлардан Афғонистонда кенг фойдаланганди.

    Бу ҳақда Reuters агентлиги вазият билан яқиндан таниш уч манбасига таяниб хабар берган.

    Мутахассисларга кўра, Grey Eagle нинг максимал оғирлиги Украина қуролли кучлари фаол ишлатаётган Туркиянинг “Байрактар”идан тахминан 3 баравар кўп.

    Шу сабаб Grey Eagle янада кучлироқ Hellfire каби ракеталар билан қуролланиши мумкин. Бу ракета турлари “Байрактар”га қўйиладиган MAM-L дан икки баравар каттадир.

    Бундан ташқари Grey Eagle осмонда кўпроқ қолиши ва учаётган вақти кўпроқ жосуслик маълумотларини йиғиши мумкин.

    Ҳарбий дронларни сотиш учун маблағни яқинда Конгресс томонидан қабул қилинган Украинага 40 миллиард долларлик ёрдам дастуридан ажратиш назарда тутилган.

    Украина қуролли кучлари учун дрон сотиш қарорини Конгресс рухсат бермаслиги мумкин.

    Агар дрон сотиш тасдиқланса, уни қуроллантириш учун Hellfire ракеталари ҳам Украинага етказиб берилади.