Россия Хитойнинг энг йирик нефть таъминотчисига айланди

Жонли ёритиш

1. 13 июн 2022Урушнинг 100 кунида Россия нефть ва газдан 100 млрд даромад топди

   Финландияда жойлашган мустақил Энергетика ва тоза ҳавони ўрганиш маркази(CREA) ҳисоб-китобига кўра, Россия урушнинг дастлабки 100 куни мобайнида нефть ва газ савдосидан қарийб 100 миллиард доллар даромад кўрган.

   Бу ҳақда марказ эълон қилинган янги ҳисоботда айтилди.

   Марказ ҳисоботида Европа Иттифоқи ва АҚШнинг Россиядан импортни чегаралаш ҳаракатларида ҳали "тешиклар" кўп қолгани таъкидланган.

   ЕИ Россияга нисбатан нефть эмбаргоси муҳим таъсирга эга бўлади, деб режалаганди, бироқ Россия хом нефтининг кема орқали Ҳиндистонга ташилиши кўпайган, Ҳиндистонда қайта ишланган нефть маҳсулоти эса АҚШ ва ЕИга сотилмоқда.

   Тадқиқотга кўра, Россия экспортининг 61 фоизи Европа Иттифоқига тўғри келган, иттифоқ 60 млрд долларлик нефть ва газ сотиб олган.

   Шундан, 12,1 млрдлик Германия, 7,8 млрд долларлик хомашёни Италия харид қилган.

   Европадан ташқарида энг йирик Россия нефти ва гази импортчиси Хитой бўлган, 24 февралдан кейин Россия Хитойга 12 миллиард доллардан зиёд маҳсулот сотган.

   Июнь ойи бошида Европа Иттифоқи Россия импортидан деярли буткул воз кечиш ва Россия газидан фойдаланишни учдан икки қисмга камайтиришга келишилган санкцияларни маъқуллади.

2. 13 июн 2022Украинада тинч фуқаролар ўлими бўйича 12000 жиноят иши тергов қилиняпти

   Украина Миллий полицияси раҳбари Иҳор Клименко хабар қилишича, ҳозир мамлакатда тинч фуқаролар ўлими бўйича 12000 дан ортиқ жиноят иши тергов қилинмоқда.

   Биргина Киев вилоятининг ўзида 1500 дан ортиқ тинч фуқаролар ҳалок бўлган. "Бучада, Ирпинда, Ҳостомель, Бородянкада ўлдирилган ва кўчада жасади қолиб кетган кўп одам бўлган", деб айтган Иҳор Клименко.

   Миллий полиция раҳбари айтишича, оммавий қабрларда топилган 1200 жасаднинг шахсини аниқлаш имкони бўлмаган.

   Ҳалок бўлганларнинг тахминан 75 фоизи эркаклар, икки фоизи болалар, қолганлари аёллар. Улар ҳарбий ёки ҳуқуқни муҳофаза қилиш идораларига ҳеч қандай алоқаси бўлмаган тинч аҳоли вакиллари бўлганлар", деб айтган жаноб Клименко.

   Шу куни Буча туманидаги Мироцкое қишлоғидаги янги оммавий қабр топилгани ҳақида Киев вилояти полицияси раҳбари Андрий Небитов хабар қилди.

   Унинг айтишича, қабрда етти инсон жасади бўлган.

   Жасадларнинг кўпчилигининг қўллари боғланган, тиззаларидан отиб яраланган бўлганлар.

   Бу инсонларнинг бошига ўқ узиб ўлдиришган.

3. 13 июн 2022Украина уруши: Ё овозингни ўчир, ёки қамаласан. Бугун Россияда ҳақиқатни гапирса нима бўлади?

   15 йиллик қамоқ жазоси хавфига қарамасдан, айрим россияликлар Украина уруши ҳақидаги ҳақиқатни айтишдан чўчимаяптилар.

   Россия босқинининг бошиданоқ украиналиклар учун бу, Владимир Путин таъкидлаганидек, Донбассни озод қилиш бўйича "махсус операция" эмаслиги аниқ эди. Бу тўлақонли уруш эди.

   Лекин Россияда уни уруш деб аташ жиноят ҳисобланади.

   "Фейк хабарлар" қонуни бўйича аллақачон ўнлаб одамлар жиноий жавобгарликка тортилган.

   Улар Россия босқинига оид расмий фикрга қарши чиққанликлари ёки ҳарбийларни танқид қилганликлари учун 15 йилгача қамоқ жазосига ҳукм қилинишлари мумкин.

   Бу ҳақда мақоламизда батафсил

4. 13 июн 2022Энг сўнгги муҳим ўзгаришлар, Можаронинг 110-куни

   Украин ва Россия қўшинлари Северодонецк шаҳрининг «ҳар бир метри учун» жанг қилишаяпти, деди Президент Зеленский.

   Украин ҳарбийларига кўра, Украин кучлари Северодонецк марказидан «сиқиб чиқарилганлар», бунга Россиянинг артиллерия устунлиги сабаб бўлмоқда.

   Украина ўзининг Совет замонидаги замбарак ўқлари тугаб бораётгани, Ғарб берган тўплар эса Россияникидан бир неча баравар кам эканини айтмоқда.

   Луҳанск вилояти ҳокими Серҳий Ҳайдай айтишича, агар шаҳарнинг учинчи кўприги ҳам вайрон этилса, Северодонецк Украинанинг бошқа қисмларидан узиб ташланади.

   Северодонецк шаҳридаги "Азот" кимёвий заводи ертўлаларида 500 га яқин тинч фуқаро жон сақлаяпти, улар орасида 40 бола бор, деб айтди Серҳий Ҳайдай.

   Шаҳарнинг 70 фоизини Россия ҳарбийлари назоратига олган.

   Таҳлилларга кўра, Россия учун Северский Донец дарёсини кечиб ўтиш муҳим, аммо ҳозирча бунинг уддасидан чиқолмаяпти. Май ойида уч кун давомида уч марта кечиб ўтишга ҳаракат қилган вақти Россия кўп техника ва ҳарбийсини йўқотган эди.

   Айни пайтда Президент Зеленский мамлакати учун замонавий ракета ҳужумидан ҳимоя тизимини сўраган, босқин бошланганидан буён Украина кемалардан отилган 2600 дан зиёд ракета ҳужумига тутилди, деб айтди.

   Украина президенти офиси маслаҳатчиси Алексей Арестович айтишича, уруш бошланганидан буён Украина армияси 10000 аскаридан айрилган.

   Сўнгги тадқиқотларга кўра, Украина босқинини бошлагани учун Россия жаҳон бўйлаб қаттиқ санкцияларга дуч келганига қарамасдан, нефть ва газ савдосидан катта фойда кўраяпти.

   Халқаро Амнистия инсон ҳақлари ташкилоти ҳисоботига кўра, Россия пала-партиш артиллерия ҳужумларига тутгани ва дунёда тақиқланган қурол-аслаҳалардан фойдалангани оқибатида Харков шаҳрида юзлаб тинч фуқаролар ҳалок бўлган.

5. 10 июн 2022Путин ўзини Пётр I га қиёслади ва вазифаси Россия ерларини қайтариш эканини айтди

   24 февраль куни Украинага босқин бошланганини эълон қилар экан, (Путин буни "махсус ҳарбий операция" деб атайди, расмийлар Россия оммавий ахборот воситаларидан ҳам уни шундай аташни талаб қилди) Россия президенти кўзланган мақсад «денацификация» ва «демилитаризация» деди. У: "Бизнинг режаларимиз Украина ҳудудларини босиб олиш эмас", деди.

   9 июнь куни эса Президент Путин Россиянинг ўз ерларини қайтариш мақсади ҳақида гапирди ва бу йилги ҳодисаларни 350 йиллиги нишонланаётган Пётр I замони воқеаларига таққослади.

   Бу ҳақдаги мақоламиз билан тўлиқ танишинг

6. 10 июн 2022Украина Путин баёнотини танқид қилди

   9 июнь куни Президент Путин Россия ўзининг ерларини қайтараётгани ҳақида гапирди.

   Президент Путин 24 февралда Украинага қарши "махсус ҳарбий операция" у ерда нацистлар русларни қатағон қилаётгани учун бошланганини айтган, мақсад - Украинани "демилитаризация ва денацификация" деб атаган эди.

   Сўнг Россия расмийларининг Украинага урушдан нима мақсад кўзлангани ҳақидаги баёнотлари қайта-қайта ўзгарди.

   Санкт-Петербургда Пётр I таваллудининг 350 йиллиги муносабати билан гапирган Путин ўзини Пётр I га қиёслади ва Россия ўз ҳудудларини қайтариб олишига тўғри келаяпти, деди.

   Путин баёнотига Украина президенти маслаҳатчиси Михайло Подоляк Твиттердаги саҳифасида шундай муносабат билдирди:

   "Путиннинг ерни босиб олиш иқрори ва ўзини Буюк Пётрга таққослагани шу нарсани исботлайди: бу ерда "конфликт" бўлгани йўқ, балки бу халқ геноциди деган тўқиб чиқарилган баҳона билан мамлакатни қонли босиб олишдир. Биз "Россиянинг юзини сақлаб қолиш" ҳақида эмас, уни зудлик билан деимпериализация қилиш ҳақида гапиришимиз керак", деб ёзди Президент Зеленский маслаҳатчиси Михайло Подоляк.

7. 10 июн 2022Энг сўнгги муҳим ўзгаришлар, Можаронинг 107-куни

   Украина ҳарбийлари хабар қилишича, Россия қўшинлари Бахмут шаҳри томон илгарилашга муваффақ бўлган, бу Россиянинг Северодонецк-Лисичанскни мудофаа қилаётган Украина қўшинларини қуршовга олиш ҳаракатларининг давоми деб кўрилмоқда.

   Луҳанск вилояти ҳокими Серҳий Ҳайдайнинг хабар қилишича, Северодонецкда қақшатқич кўча жанглари давом этаяпти.

   Украина президенти идораси раҳбари ўринбосари Михаил Подолякнинг Би-би-сига айтишича, урушнинг ҳозирги босқичида Украина ҳар куни 100-200 жангчисини йўқотаяпти.

   Британия Мудофаа вазирлиги Россия назоратидаги Мариуполь шаҳрида тоза ичимлик суви ва дори-дармон тақчиллигидан вабо тарқаши хавфидан огоҳлантирди.

   Би-би-сининг хорижий давлатлар разведкаларидаги манбалари ҳисоб-китобича, Украинага бостириб кирганидан кейин Россиянинг инсоний талофатлари сони 20000 га етган.

   Президент Путин ўзини Россия императори Пётр I га ўхшатди. Путин талқинича, Пётр I Россиянинг йўқотилган ерларини қайтарган, у ўзининг вазифаси ҳам Россия ерларини қайтариш эканини айтган.

   Ўзини мустақил Донецк Халқ республикаси деб атайдиган россияпараст ҳудуд суди Украина қўшинлари таркибида жанг қилиб Мариуполда таслим бўлган икки Британия ва бир Марокаш ҳарбий асирини ўлим жазосига ҳукм этди.

8. 9 июн 2022ДХРдаги хорижликларнинг ўлим ҳукми қораланмоқда

   Ўзини Донецк Халқ республикаси деб атайдиган ҳудуд суди уч ҳарбий асирни ўлим жазосига ҳукм этиш ҳақида қарор чиқарди.

   Халқаро миқёсда икки британиялик ва бир марокашлик ҳарбий асирга нисбатан суд ҳукми чиқарилгани қораланаяпти.

   "Донецкдаги Россия қўғирчоқлари ушлаб турган Эйден Аслин и Шон Пиннерга чиқарилган ҳукмни буткул қоралайман. Улар ҳарбий асирлардир. Бу ҳеч ҳам легитимлиги йўқ ясама суд қароридир", деб ёзди Твиттердаги саҳифасида Британия Ташқи ишлар вазири Лиз Трасс.

   "Биз ҳар доим ҳарбий асирлардан сиёсий мақсадларда фойдаланмаслик лозимлиги ҳақида гапириб келганмиз. Женева Конвенцияси бўйича ҳарбий асирлар жанговар ҳаракатларнинг иштирокчиси деган мақомга эга ва бунинг учун жавобгарликка тортилишлари мумкин эмас", деб айтди Британия Бош вазири матбуот котиби.

   Британиялик 28 ёшли Эйден Аслин, 48 ёшли Шон Пиннер ва 21 яшар марокашлик Саадун Браҳим Украина Қуролли кучлари билан контракт имзолаганлар.

   Улар Мариуполь мудофаасида қатнашганлар, апрель ойида таслим бўлган эдилар.

   ДХР суди уларни ёлланма аскарлик, террорчилик ҳаракатларини содир этишда айбдор деб топиб, ўлим жазосига ҳукм этди.

   Суд ҳақида фақат Россия матбуоти хабар тарқатди, улар судланганларнинг бўйниларига қўйилган айбларни тан олганлари ҳақида хабар бердилар.

   Хорижликларнинг яқинлари тўлақонли юридик ҳимоя имконияти бўлмагани ҳақида айтдилар.

   Адвокат Павел Косованнинг айтишича, хорижликлар ўзларига нисбатан ўлим жазоси чиқарилишини кутмаган бўлганлар.

9. 9 июн 2022Россия: очарчилик яқинми? Ўзбекистон Россиянинг "омбори" бўладими? Ukraina Rossiya O'zbekiston

   Россия Украинага бостириб киргани ортидан мисли кўрилмаган санкцияларга дуч келди.

   Бу нарса мамлакатни иқтисодий таназзулга етаклаши мумкинлиги айтилмоқда.

   Иқтисодий таназзул эса Россияда охирги 15 йилда кузатилган ютуқларни йўққа чиқаради.

   Халқаро молия институти санкциялар босими остида қолган Россия келажагини шундай тахминламоқда.

   Ҳозирги танг вазиятида яшаб қолиш умидидаги Россия ҳукумати Марказий Осиё билан ҳамкорликнинг янги шаклларини изламоқда.

   Иқтисодчилар Ўзбекистон Россиянинг "омбори"га айланиши мумкинлигини тахминлашмоқда.

   Бу ҳақда мақоламизда тўлиқ танишинг

10. 9 июн 2022Украина уруши: Ўз ҳаётини хатарга қўяётган Британ кўнгиллилари - Видео

    Бири Англиянинг Кентида ит ўргатувчи, иккинчиси Сассекс графлигида технология ширкати раҳбари ва яна бири эса Корнуоллда молбоқарлик қилган уч британиялик Украинага кўнгилли бўлиб борганлар, инсонларни эвакуация қилиш билан шуғулланишаяпти.

    Бунинг учун уларга ҳеч ким ҳеч нарса тўлаётгани йўқ.

    Би-би-си мухбири Орла Гуэрин Британ кўнгиллиларига ҳамроҳлик қилди.

    Улар ўзларининг исм-шарифлари эълон этилишини истамайдилар.

    Бу ҳақдаги мақоламиз ва видеомиз билан танишинг

11. 9 июн 2022Энг сўнгги муҳим ўзгаришлар, Можаронинг 106-куни

    Россия қўшинлари Северодонецк шаҳрини эгаллаш учун жон-жаҳди билан ҳаракат қилаяпти.

    Президент Зеленский айтишича, шарқий Донбасс минтақасининг тақдири Северодонецк учун кетаётган жангларда ҳал бўлади.

    Зеленский сўзларига кўра, шаҳар учун қақшатқич жанглар бормоқда, Украинлар талофатлар бераяпти, аммо Россия қўшинларининг йўқотишлари улкан бўлаяпти.

    Украина Мудофаа вазири Олексий Резников айтишича, Украина армияси ҳар куни 100 аскаридан айрилмоқда, 500 ҳарбий яраланаяпти.

    Луҳанск вилояти ҳокими Серҳий Ҳайдайга кўра, Украина қўшинлари фақат шаҳар четини назорат қилаяптилар, шаҳар учун жанглар давом этаяпти.

    Президент Володимир Зеленский маълум қилишича, кейинги ҳафта Россия ҳарбийларининг Украинадаги жиноятлари ҳақидаги маълумотлар базасини "Жаллодлар китоби" деган ном билан эълон қилишади.

    БМТ Бош котиби Антониу Гутерриш Украина урушининг жаҳон бўйлаб озиқ-овқат, энергетика ва молия соҳаларига оқибатларига таъсири қаттиқ бўлишидан огоҳлантирди.

12. 8 июн 2022Италия: Россия буғдой ортиладиган портларни миналардан тозаламаса миллионлаб одам очдан ўлади

    Италия Россия Украинадан буғдой олиб чиқиладиган портларни миналардан тозалама миллионлаб одам очдан ўлиши мумкинлиги ҳақида огоҳлантирди.

    “Буғдой экспортини тўсиш миллионлаб бола, аёл ва эркакларни гаровда ушлаш ва ўлимга юзлаштиришни англатади”, деган Италия Ташқи ишлар вазири Луиджи Ди Майо.

    Унинг айтишича, озиқ-овқат инқирозида кейинги бир неча ҳафта ҳал қилувчи роль ўйнайди.

    Украина дунёдаги асосий буғдой етказиб берувчилардан бири ҳисобланади. Россия бир нечта Украин портларини босиб олганидан сўнг, буғдой етказиб бериш тўхтаб қолди.

    Россия Украинага бостириб кириш озиқ-овқат инқирозига сабаб бўлаётганини рад қилади ва Украинанинг ўзи портларини миналаштириб, етказиб беришнинг йўлини тўсганини таъкидлайди.

    Бугун Россия ва Туркия Ташқи ишлар вазирлари портларни миналардан тозалаш бўйича ҳамкорликда ишлаш имкониятларини муҳокама қилди.

    Ушбу муҳокамаларга изоҳ берган Украина Ташқи ишлар вазири Дмитрий Кулеба мамлакати муаммони БМТ орқали ечишга ҳаракат қилаётганини билдирди.

    Кулеба портларнинг ишини қайта йўлга қўйишга қаратилган ҳар қандай келишув Украина хавфсизлигига таҳдид солмаслиги кераклигини таъкидлаган.

    Шунингдек, у савдо кемаларининг келажакдаги йўлларини ҳимоя қилишда Туркияга ишонишини маълум қилган.

13. 8 июн 2022Ким ғалаба қилади? Украина урушида нима бурилиш нуқтаси бўлиши мумкин?

    Россиянинг Украинадаги уруши тобора шафқатсиз ва қонли бўлиб бормоқда, ҳар бир томон бир-бирини ҳолдан тойдирмоқда. Иккаласи ҳам охирги ютуқлари билан мақтанмоқда. Аммо уларда муваффақиятсизликлар ҳам бор.

    Умуман олганда, Россия ҳали ҳам ҳукмрон куч ва муҳим ҳарбий қудратга эга, аммо тез ғалабага режалаштирилганидек эришилмади. Қуйида биз ҳар икки томоннинг натижасига таъсир қилиши мумкин бўлган баъзи омилларни кўриб чиқамиз.

14. 8 июн 2022Москва бош яҳудий раввини ҳукумат урушни қўллашни талаб қилгач Россияни тарк этган

    Россия ҳукумати Украинадаги урушни ошкора дастаклашни талаб қилганидан сўнг, Москва бош раввини Пинхас Гольдшмидт мамлакатни тарк этгани маълум бўлди. Бу ҳақда раввининг келини Авиталь Чижик-Гольдшмидт Twitter да ёзди.

    Раввин уруш бошланганидан икки ҳафта ўтиб оиласи билан Венгрияга кетганди.

    “Ҳозир улар ўзлари севган, қурган ва 33 йилдан ортиқ вақт давомида болаларини тарбиялаган жамоатидан олисда, қувғунда қолмоқда”, деб ёзган Чижик-Гольдшмидт.

15. 8 июн 2022Украина: Россия Северодонецкни эгаллаш учун бор кучини ташлаяпти

    Луганск вилояти раҳбари Серҳий Ҳайдайнинг айтишича, Россия Северодонецкни эгаллаш учун бор кучини ташлаяпти.

    Унга кўра, Украина армияси янада кучлироқ позицияни эгаллаш учун чекиниши мумкин. Аммо шаҳарни топшириш ҳақида гап бўлиши мумкин эмас. Шаҳарнинг ҳар бир қаричи учун қақшатқич жанглар давом этаяпти, деган у.

    Олдинроқ Украина Қуролли кучлари Украина томони ҳужумларни қайтараётгани учун Россия Северодонецкни олишда муваффақиятга эришмаганини хабар қилганди.

    Россия қўшинлари ҳозир жанглар маркази бўлиб турган Севередонецкга ҳужумни бир ҳафта олдин бошлаганди.

    Россия бу шаҳарга қўшни бўлган Лисичанскни ҳам олиб Донбассдаги кўпроқ жойни назорат қилишни мақсад қилган.

16. 7 июн 2022Марина Овсянникова энди Марина Ткачук

    Россия Биринчи телеканалида Украинадаги урушга қарши чиққан ва бунинг учун жаримага тортилган журналист Марина Овсянникова фамилиясини ўзгартиргани ҳақида эълон қилди.

    Бу ҳақда журналист ўзининг Фейсбукдаги саҳифасида билдирган.

    Марина отасининг украин эканини маълум қилган.

    "Мен "яхши рус" эмасман. Мен украинман. Украинани қўллаб-қувватлаш армзи сифатида мен Овсянникова фамилиямни ўзимнинг олдинги Ткачукка алмаштиришга қарор қилдим", деб ёзди журналист.

    “Время”да плакат кўтариб чиққан Марина Овсянникова ким?

17. 7 июн 2022Украинада ўлган россияликлар маълумоти тақиқланди

    Россиядан олинаётган хабарларга кўра, Украинада ҳалок бўлган инсонлар ҳақидаги маълумотлар Россияда тарқатилиши тақиқланган ахборот деб кўриладиган бўлди.

    Россия Украинага 24 февралда босқин бошлади, урушнинг дастлабки кунларида кўп сондаги Россия ҳарбийлари ҳалок бўлди.

    Россия Мудофаа вазирлиги охирги марта 25 март куни маълумот тарқатган, Украина ҳудудида 1351 ҳалок бўлган, деган.

    Украина Қуролли кучлари бош штабига кўра, 31360 Россия ҳарбийси ҳалок бўлган.

    Мустақил кузатувчилар Россия инсоний талофатлари 15000 дан ортганини айтадилар.

    Би-би-си Рус хизмати очиқ маълумотлар асосида Украина ҳудудида ўлгани расман тасдиқланган инсонлар шахсини аниқлашни бошлади ва 30 май кунигача 3052 Россия ҳарбийси ўлганини аниқлагани ҳақида хабар берди.

    Бунда, асосан, оммавий ахборот воситалари, Россиянинг республика ёки минтақавий маъмуриятлари расмийлари эълон қилган хабарларга таянилди.

    Май ойида Болтиқ флоти гарнизони прокурори Псков вилоятидан бўлган ҳарбийлар ўлими ҳақидаги хабарни Россия ҳудудида тарқатиш тақиқланган хабар деб тан олиш талабини илгари сурган.

    7 июнь куни Калининград вилояти Светлогорск шаҳар суди ўлганлар ҳақидаги маълумот давлат сири ҳисобланиши ҳақида қарор чиқарган.

    Шундан сўнг оммавий ахборот воситалари ҳамда Челябинск, Новосибирск, Чита, Омск ва Красноярскда ташкил этилган Интернетдаги хотира саҳифалари ўчирилган.

18. 7 июн 2022Шойгу: Луганскнинг 97 фоизи "озод қилинди"

    Россия Мудофаа вазири Сергей Шойгу вазирликнинг селектор мажлисида Украинанинг Луганск вилоятининг 97 фоиз ҳудуди, Северодонецк шаҳридаги турар-жой мавзеълари "тўлиқ озод этилгани" ҳақида эълон қилди.

    Россия мудофаа вазири нутқидаги муҳим нуқталар:

    • Северский Донец дарёсининг чап қирғоғидаги Донцк ва Луганск вилоятларининг салмоқли қисми Россия ҳарбийларининг назоратига ўтган. Жумладан, Луганск вилоятининг 97%, Северодонецк шаҳридаги турар-жой мавзеълари "тўлиқ озод этилган". Бундан олдин Луганск вилояти ҳокими Серҳий Ҳайдай Северодонецк шаҳри "тенг иккига бўлингани", шаҳар кўчаларида жанглар кечаётгани ҳақида айтган эди.
    • Бундан ташқари, Россия ҳарбийлари Донецк ва Луганск вилоятларидаги 18 аҳоли пунктини назорат қилаяптилар, улар орасида Красний Лиман, Святогорск, Студенок, Яровая, Кировск, Ямполь, Дробышево бор.
    • Асирга тушган Украина ҳарбийларининг сони қарийб 6,5 мингни ташкил этади.
    • Мариуполь бандаргоҳи илк юк кемаларини қабул қилишни бошлаган. Мариуполь ва Бердянск портлари ғалла ортишга тайёр.
    • Мудофаа вазирлиги ва "Россия Темир йўллари" Россия билан Украина ўртасида, Донбасс билан Қрим ўртасида қатновни қайта йўлга қўйиш учун "шароитни яратганлар. Мариуполь, Бердянск ва Херсонга юклар етказилаяпти.
    • Запорожье АЭСи одатий режимда ишлаяпти. Бундан олдин Халқаро Атом қуввати ташкилоти бу атом электр станциясидан ядровий материаллар ҳақидаги маълумотни олмаётганларини билдирганди. Запорожье АЭСини март ойи бошида Россия ҳарбийлари ўз назоратига олган эдилар.

19. 7 июн 2022Энг сўнгги муҳим ўзгаришлар, Можаронинг 104-куни

    Украина шарқидаги Северодонецк шаҳри ва Бахмут-Лисичанск-Северодонецк йўли атрофида жанглар давом этаяпти.

    Президент Зеленский сўзларига кўра, Россиянинг Северодонецк ва Лисичанскка ҳужумлари бу эгиз шаҳарларни "ўлик шаҳарларга айлантирди".

    Охирги ҳафталарда Россия стратегик ўта муҳим бўлган Северодонцкни қўлга киритиш, Украинанинг Северодонецк ва Лисичанск шаҳарларини ҳимоя қилаётган мудофаачиларини қуршовга олишга жон-жаҳди билан ҳаракат қилмоқда.

    Бироқ Британия разведкаси таҳлилларига кўра, Россиянинг ушбу ҳужумлари "бир жойда депсиниб қолган".

    Мариуполь шаҳридаги "Азовсталь" заводини ҳимоя қилиш вақтида ҳалок бўлган украиналик жангчиларнинг жасадлари Украина томонига қайтарилган.

    Бундан олдин Россия ва Украина илк бор жангчилари жасадларини қарши томонга берганлари, 160 жасад қайтарилгани хабар қилинган эди.

    Россиянинг БМТдаги элчиси Василий Небензя Хавфсизлик Кенгаши мажлисидан чиқиб кетган, бунга Россия глобал очарчиликни келтириб чиқараётганликда айблангани сабаб бўлган.

    Европа Кенгаши Президенти Шарль Мишель, Россия озиқ-овқат таъминотидан ривожланаётган дунёга қарши «кўринмас қурол» сифатида фойдаланаяпти, деб айблади.

    Шунингдек, БМТ Хавфсизлик Кенгаши мажлисида Россия ҳарбийларининг Украинада жинсий зўравонликларга қўл урганлари исбот-далиллари кўплиги айтилди, аммо Россия бу даъволарни ҳам рад этмоқда.

20. 6 июн 2022Украина уруши: Россия тактикаси - кунпаякун қилиш

    Луганск вилояти ҳокими Серҳий Ҳайдай айтишича, вилоятдаги кўп шаҳарлар бугун Мариуполь шаҳрини эслатади.

    Россия қўшинлари Северодонецк шаҳрини қўлига олишга жон-жаҳди билан уринаяпти: у ерга катта куч ташланган, ҳар хил қуроллардан бомбардимонлар тўхтамаяпти.

    Шунга қарамасдан, Украина кучлари Северодонецкнинг ярмини босиб олган Россия қўшинларини ортга суриб чиқаришга эришдилар.