Россия уруши: Ғарб Украинага бераётган ракеталар тизими урушда бурилиш ясайдими? - Yangiliklar, Urush

Россия билан муносабатларига путур етиши мумкин деган таҳдидларга қарамасдан АҚШ ортидан Британия ҳам Украинага узоққа отувчи артиллерия беради. Таҳлилчилар ушбу аниқ нишонга олувчи қуроллар урушда бурилиш ясаши мумкинлигини, аммо бу тез орада бўлмаслигини айтмоқда.

Британия Мудофаа вазири Бен Воллеснинг айтишича, М270 реактив ракета отиш тизими Украинага ўзини Россия босқинидан мувaффақиятли ҳимоя қилишда ёрдам беради.

Ҳукумат Украинага қанча қурилма юбораётганига аниқлик киритмаган. Би-би-си маълумотларига кўра, гап ҳозирча 3 та ракета тизими ҳақида кетмоқда.

Ғарблик ҳарбий таҳлилчилар Россия армиясининг Донбассдаги айрим ютуқларини, жумладан, Северодонецк шаҳрининг бир қисмини босиб олишни оғир техника ва артиллериядаги устунлиги билан боғлашади.

Украиналик ҳарбийлар Ғарб томонидан реактив тизимнинг етказиб берилиши Россия аскарларини тор-мор келтиришда самарали ёрдам беришига умид қилади.

Ўтган ҳафта АҚШ M142 (HIMARS) узоққа отувчи ракета тизимини етказиб беришни маълум қилганди. Бу Москванинг кескин реакция билдиришига сабаб бўлди.

Путин якшанба куни Ғарб Украинага узоқ масофага етиб борувчи артиллерия етказиб беришни бошласа Москва зарба берадиган нишонлари рўйхатини кенгайтиришни айтиб таҳдид қилди.

Британия ҳукумати келаётган ҳафталарда Украина ҳарбийлари Британияда янги қуролларни ишлатиш бўйича ўқув курсларида иштирок этишини билдирди.

"Ер-ер" бараварига ўт очувчи М270 реактив тизими бир дақиқанинг ичида 12 та ракета отиши ва 80 километр радиусдаги нишонни аниқ уриши мумкин. Бу айни дамда Украинада армиясида мавжуд артиллериядан анча узоқ масофани қамраб оладиган қуролдир.

"Россия тактикаси ўзгариб борган сари бизнинг Украинага дастагимиз ҳам ўзгариши керак. Узоққа бирваракай ракета отувчи ушбу ўта самарали тизим украиналик дўстларимизга Россия Украин шаҳарларини йўқ қилишда ишлатаётган узоққа отувчи артиллериядан ўзларини ҳимоя қилишда қўл келади", деган Британия Мудофаа вазири Бен Воллес.

Би-би-си ҳарбий мухбири Жонатан Билнинг айтишича, Британия ва АҚШ Украинага катта миқдорда қурол-яроғ бермоқда, аммо узоқ масофага учувчи замонавий ракета тизимининг берилиши бу катта ўзгариш.

Шунингдек, бу Украина Россиянинг йирик артиллерия қурол-яроғи билан рақобат қилолмаётганини тан олишни ҳам билдиради.

Таҳлил: Ғарб ракеталари вазиятни бир пасда ўзгартиролмайди

Қуруқликдаги ҳарбий ҳаракатлар бўйича Британиялик таҳлилчи Жек Вотлингнинг айтишича, АҚШ ва Британиянинг Украинага узоқ масофага отувчи замонавий ракета тизимини бериш ваъдаси фронтдаги вазиятни ўзгартиради, аммо дарров эмас.

Унинг айтишича, Украинага берилаётган М270 ракета тизимлари Британия армиясининг энг қийматли қуролларидан бири.

Унга кўра, ушбу тизим Украина шарқидаги Россия артиллериясини ортда қолдиради. Бироқ украинларни улардан фойдаланишга ўргатиш керак, боз устига ушбу тизим Британияда Украинага берадиган даражада унча кўп эмас.

"Путиннинг Ғарб узоққа отувчи қурол берган тақдирда Украинадаги кўпроқ нишонга зарба бериш таҳдидига келсак, буни амалга ошириш қийин. Чунки Москва аллаққачон Украина иқтисоди учун муҳим нуқталар ва ҳарбий позициясига зарба бермоқда", дейди у.

Би-би-сининг Киевдаги мухбири Жо Инвудга кўра, Донбасс учун жангларда артиллерия ҳал қилувчи ролни ўйнаши мумкин.

Украинага берилаётган оғир қуроллар ўзининг аниқ нишонга олиши билан Россия кучларини анча қийин аҳволга солиб қўйиши мумкин.

"Бир неча кун олдин Северодонецкнинг қўлдан кетиши деярли аниқ бўлиб қолганди. Аммо энди украинлар қарши ҳужумга ўтмоқда ва бу энг оддий нуқталар ҳам россияликларга қийин таслим бўлиши мумкинлигини англатади", дейди у.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek