Россия Хитойнинг энг йирик нефть таъминотчисига айланди

Жонли ёритиш

1. 1 июн 2022Ўзбекистон: Бунақаси ҳали бўлмаган – қимматчилик одамларга қандай таъсир қилмоқда?, Видео

   Украина уруши иқтисодий оқибатларининг ўзбекистонликлар ҳаётига таъсири тобора кучайиб бормоқда.

   Сўнгги қисқа вақт ичида бир қатор асосий озиқ-овқат маҳсулотлари, масалан, ун, ёғ, шакар, нон нархлари кескин ошиб кетган.

   1 июндан оддий буханка нон нархи ўртача 1 600 сўмдан 2 800 сўмга қадар кўтарилган.

   Расмийлар ҳам ниҳоят жаҳонда юзага келган озиқ-овқат инқирози мамлакатга жиддий таъсир қилаётгани ҳақида очиқ гапира бошлаганлар.

   Бундай беқарор вазият ўзбекистонликлар ҳаётига қандай таъсир қилмоқда, улар нархлар ошаётганини ўз чўнтакларида ҳис қилишяптими?

2. 1 июн 2022Жанг жабҳасида нима гап: Россия Северодонецкни деярли забт этиб бўлдими?, Жо Инвуд, Киев

   Луганск минтақаси губернаторининг айтишича, Россия Северодонецкнинг 70 фоизчасини эгаллаб бўлган.

   Серҳий Ҳайдайга кўра, Украина қўшинлари ҳозир тактик чекиниш қилишмоқда, янада ғарброқда ўз мавқеъларини мустаҳкамлашмоқда.

   Россия Северодонецкни олишни мақсад қилган.

   Ушбу шаҳарни эгалласа, Луганск деярли тўлиғича Россия ихтиёрига ўтади.

   Луганск Донецк билан бирга Донбасснинг бор-йўғи иккита минтақасидан биттаси бўлади.

   Россия ҳозир ўз мақсадига яқин қолган кўринади.

   Ҳайдайнинг ижтимоий тармоқларда ёзишича, Украина қўшинлари “яхшироқ ва олдиндан ҳозирлаб қўйилган позицияларга чекинишган”.

   Бу АҚШ Украинага янги, юқори технологияли ракета тизимларини етказиб беришини эълон қилган бир пайтга тўғри келаётир.

   Улар GPS орқали бошқарилади ва Россияникига қараганда узоқроқ масофага мўлжалланган.

   АҚШнинг ракета тизимлари урушда ўзгариш ясаши мумкин, аммо Северодонецкни сақлаш қолиш учун жуда кеч қолади.

3. 1 июн 2022Германия ҳам Украинага яна қурол бермоқчи, Янги ваъдалар

   Германия Россияга қарши урушида Украинани янада қўллаб-қувватламоқчи, яна қурол-яроғ юбормоқчи.

   Расмий Берлиннинг нияти ҳақида Германия канцлери баён қилди.

   Олаф Шолц бугун, чоршанба куни мамлакат парламентида чиқиш қилди.

   Унинг айтишича, мамлакати Украинага ўрта масофага мўлжалланган ер-ҳаво русумидаги ракетадан мудофаа тизимларини етказиб беради.

   Германия канцлерига кўра, “бу тизим орқали Украина бутунбошлик шаҳарларини Россиянинг ҳаво ҳужумларидан ҳимоя қила олади”.

   Шолц, шунингдек, Украинага душман гаубицалари, миномётлари ва артиллериясини аниқлашга қодир кузатувчи радарлар ҳам етказиб берилишини айтди.

   Бундан ташқари, худди АҚШ каби ракета отувчи мосламалар ҳам бериш ниятида эканликларини қўшимча қилди.

   Германия канцлери ҳам уларнинг Россия ҳудудини нишонга олишга қодир эмаслигини таъкидлади.

   Сўнгги янгилик расмий Киев ва Германиядаги мухолиф партияларнинг Украинага янада кўпроқ оғир қурол-яроғ етказиб бериш сўрови ортидан бўй кўрсатмоқда.

   Россия ишғоли билан кечаётган сўнгги уч ойдан ортиқроқ вақт ичида Германия Украинага 15 миллион ўқ-дори, 100 минг қўл гранатаси ва 5 мингдан ортиқ танкка қарши мина етказиб берган.

4. 1 июн 2022АҚШ Путинни ағдармоқчими?, Расмий Вашингтон муносабати

   АҚШ президенти Путинни ҳокимиятдан четлатиш ниятлари бор-йўқлигига ҳам ойдинлик киритди.

   Жо Байден бу ҳақда New York Times газетасида чоп этилган мақоласида тўхталиб ўтди.

   АҚШнинг Украинага узоқ масофага мўлжалланган ракета тизимлари етказиб бериш қарори ҳам худди шу мақола ортидан маълум бўлганди.

   Аммо Жо Байден фақат шунинг ўзигина билан кифояланмаган.

   АҚШ президенти Украина можароси билан боғлиқ бошқа муҳим нуқталарга ҳам тўхталиб ўтган.

   Унинг айтишича, мамлакати Путинни қудратдан четлатишга уриниб кўрмайди.

   “Путин билан кўп келишолмасак-да, АҚШ уни ҳокимиятдан кеткизишга ҳаракат қилмайди. Агар АҚШ ва иттифоқчиларимизга ҳужум қилинмаса, биз можарода бевосита иштирок этмаймиз”, - деб ёзган АҚШ президенти.

   Унинг қўшимча қилишича, АҚШ фақат Россияга оғриқли бўлиши учунгина можарони чўзишга интилмайди.

   АҚШ президенти, шунингдек, НАТО ва Россия ўртасида уруш чиқишини истамасликларини таъкидлаган.

   Москвани Украинани ўз чегарасидан ташқарига зарба беришга ундамасликларига ишонтиришга ҳаракат қилган.

5. 1 июн 2022Украина Россияга зарба бермоқчими?, Расмий Киев муносабати

   Украина Президенти ҳам АҚШнинг ўзларига янада замонавий русумдаги ракета тизими етказиб бериш қарорига муносабатини билдирди.

   Володимир Зеленский Украинанинг “Россияга ҳужум қилиш нияти йўқ”лигини баён қилди.

   АҚШ Украинага бермоқчи бўлаётган ракета тизими 70 километргача бўлган мўлжални нишонга аниқ олади.

   Расмий Вашингтон Россияни нишонга олмаслик ваъдаси ортидангина уларни Украинага беришга рози бўлган.

   Украина президенти ўзларининг ниятлари ҳақида Американинг Newsmax телевизион каналига берган суҳбати чоғида тўхталиб ўтган.

   Президент Зеленский бу тизимдан фақат ўзларини ҳимоя қилиш мақсадида фойдаланишларини таъкидлаган.

   “Бизни Россия Федерацияси қизиқтирмайди. Чунки биз уларга ўхшаб ўзганинг ҳудудида жанг қилаётганимиз йўқ”, - деб айтган Украина раҳбари.

6. 1 июн 2022Россия НАТО билан тўқнашиши мумкинми?, Расмий Москва муносабати

   Россия НАТО билан тўқнашиши мумкинми?

   Расмий Москва АҚШнинг қарорини қоралади.

   Россия томонининг баён қилишича, Америка Қўшма Штатлари худди шу нарса билан таваккал қилмоқда.

   “Украинага янада замонавий русумдаги ракета тизимлари ва ўқ-дориларни етказиб бериш қарори Россия ва НАТО ўртасида тўғридан-тўғри тўқнашув эҳтимолини кучайтиради".

   Бу ҳақда Россия Ташқи ишлар вазирининг муовини Сергей Рябков баён қилди.

   У Россиянинг “Новости” ахборот агентлигига гапирди.

   Вазир муовинининг айтишича, расмий Москва АҚШнинг янги кўмак пакетига “ўта салбий” қарамоқда.

   Янги пакет эса, Украинага М142 русумидаги ўта ҳаракатчан артиллерия ракета тизимини етказиб беришни ҳам кўзда тутади.

   Бу қуролни Украина узоқ вақтдан бери сўраб келади.

   У Украина қўшинларига рақиб кучларини олис масофадан аниқ нишонга олишга имкон беради.

   Америка Қўшма Штатлари яқин-яқингача Украинанинг бу сўровига кўнмай келган.

   Етказиб берган тақдирларида, Украина Россияни нишонга олади, деган хавотирда бўлган.

   АҚШ президенти ҳозир бошқача мавқеъда.

   Унинг айтишича, ҳарбий кўмак музокаралар чоғида Киевнинг мавқеини янада мустаҳкамлайди ва сулҳ йўли билан урушга якун ясаш эҳтимолини кучайтиради.

7. 1 июн 2022Украина уруши: Зеленский Россия ҳужумини ‘телбалик’ деб атади

   Россия Северодонецкдаги кимё корхонасига зарба берди. Луганскни деярли забт этиб бўлди. Европа Иттифоқи Россия нефти масаласида бир тўхтамга келди. АҚШ Украинага янада замонавий қурол бермоқчи.

   Шу соатга қадар бўлган энг муҳим янгиликлар:

   • Украина президенти Россиянинг Северодонецкдаги кимё корхонасига қилган ҳужумини қоралади. Володимир Зеленский буни “телбалик”, деб атади.
   • Северодонецк аҳолисига яшириниб олган жойларидан ташқарига чиқмаслик ва заҳарли тутундан ҳимояланиш учун ниқобларини тайёрлаб қўйишлари айтилди.
   • Мулозимларга кўра, Россия Северодонецкнинг аксарият қисмини эгаллаб бўлган. Шаҳардаги муҳим иншоотлар ва турар-жой биноларининг деярли барчасини вайрон қилган.
   • АҚШ Президенти Жо Байден янги ваъда билан чиқди. Украинага янада замонавий ракета тизимлари етказиб беришларини айтди.
   • Украина узоқ вақтдан бери сўраб келаётган бу қуроллар рақиб кучларига олис масофадан аниқ зарба бера олади.
   • Европа Иттифоқи Россия нефти масаласида бир тўхтамга келди. 90 фоиз импортидан воз кечишга қарор қилди. Аммо Россия газининг хариди масаласида бу гал фикрлари бир жойдан чиқмади.
   • Россия Украинанинг шарқий Луганск минтақасини деярли забт этиб бўлди. Ҳозир бутун эътиборини Донбассни тўлиқ эгаллашга қаратилган.

8. 31 май 2022Россия аскарлари уруш жиноятлари учун маҳкамага тортилди

   Украина суди икки Россия аскарини уруш жиноятларида айбдор деб топди ва 11,5 йиллик қамоқ жазоларига ҳукм этди.

   Александр Бобикин ва Александр Иванов артиллерия бўлими аскарлари бўлганлар, бошида Украина ҳудудини Россияда туриб, сўнг эса Украина ҳудудидан туриб "Град" тизими билан Харков вилоятини бомбардимон қилганлар.

   Россия замбаракчилари ҳужумлари оқибатида ноҳарбий иншоотлар, хусусан, мактабни нишонга олганлар.

   Орадан бироз вақт ўтиб, икки аскар Украин ҳарбийларининг қўлига асирга тушганлар.

   Судда адвокатлари аскарларнинг раҳбарият буйруғини бажаришганини, жиноят содир этишга мажбур этилганларини айтишган.

   Айблов томони 12 йиллик қамоқ жазоси сўраган.

   Аскарлар ўзларига қўйилган айбни бўйнига олганлар.

   Бундан олдин Киевдаги суд Россия армияси сержанти Вадим Шишимаринни уруш жиноятини содир этишда айбдор деб топиб умрбод қамоқ жазосига ҳукм этганди.

   Вадим Шишимарин йўл четида мобиль телефонида гаплашиб кетаётган украиналик қуролсиз эркакни отиб ўлдирганини тан олган, у ҳам раҳбар буйруғини бажарганини айтган.

9. 31 май 2022Украина уруши: Россия украиналикларни бостира оладими? Киевдаги кайфият

   Украина уруши: Россия украиналикларни бостира оладими? Киевдаги кайфият. Бугун украиналик жангчилар руҳи қандай?

10. 31 май 2022Энг сўнгги муҳим ўзгаришлар, Можаронинг 97-куни

    Европа Иттифоқи Россия нефти импортининг учдан икки қисмини тақиқлаш ва Сбербанкни SWIFT тизимидан узишни кўзда тутган Россия қарши санкцияларнинг олтинчи пакетини маъқуллади.

    Россия “Газпром”и рублда ҳақ тўлашдан бош тортгани учун 31 майдан Нидерландияга газ узатишни тўхтатган.

    Луганск вилояти Россия бомбардимонлари остида қолмоқда, асосий ҳужум Северодонецк шаҳрига бўлаяпти.

    31 май куни Северодонецк шаҳри иккига бўлинган, шаҳарда қақшатқич жанглар кетмоқда, Украина қўшинлари шаҳарни ташлаб чиқишлари мумкинлиги айтилди.

    Луганскдаги бомбардимон оқибатида инсонпарварлик карвонида кетаётган француз журналисти Фредерик Леклерк Имхофф ҳалок бўлган.

    Шу куни Украина жанубидаги Мариуполь шаҳри портида бўлган метал ортилган Россия кемаси Ростов-Дон шаҳрига йўл олгани хабар қилинди.

11. 30 май 2022Таҳлилчи: Украинада узоққа отувчи тўпларга катта эҳтиёж бор

    Мудофаа масалалари бўйича таҳлилчи, профессор Майкл Кларкнинг айтишича, Украинага энг биринчи навбатда Россияникидан узоқроққа ота оладиган ғарб намунасидаги артиллерия керак.

    “Руслар танк ва пиёдаларда кўра кўпроқ артиллерияга суянмоқда. Агар Украинлар узоққа отиш борасида устунлик қилса, бу уларга Россия тўпларини узоқда ушлаш имконини беради”, дейди у.

    Унинг айтишича, бу биринчи навбатда Америка ва Германия тўпларига боғлиқ.

    “Шу вақтгача Ғарб уларни етказиб беришга иштиёқсиз қараб келди”, дейди Кларк.

    Ўтган ҳафта Пентагон АҚШ шу вақтга қадар Украинага 90 та узоққа отувчи М777 тўпларини етказиб берганини маълум қилди.

    Украина ҳукуматига кўра, бу Россия босқинига қарши туриш учун камлик қилади.

    Америка маъмуриятига яқин манбаларнинг айтишича, Вашингтон Украинага замонавий реактив тизимга эга тўпларни етказиб бериш масаласини кўриб чиқмоқда. Бу борадаги қарор тез кунларда қабул қилиниши мумкин.

12. 30 май 2022Британия разведкаси: Россия катта сонда ўрта ва қуйи бўғиндаги зобитларини йўқотмоқда

    Британия разведкаси ҳисоботига кўра:

    Россия уруш давомида катта сонда ўрта ва қуйи бўғиндаги зобитларини йўқотди. Кичик офицерлар энг паст даражадаги тактик ҳаракатларни бошқаришга тўғри келган, чунки Россия армиясида олий тоифали ва бу каби ваколатларга эга сержантлар етишмайди.

    Катта сондаги ёш малакали зобитларнинг йўқотилиши Россия армиясининг қўмондонлик ва бошқарув услубларини замонавийлаштириш муаммосини янада қийинлаштиради.

    Қўмондонларнинг етишмаслиги натижасида Россия ҳарбийлари Украинада ташкил қилаётган тактик гуруҳларнинг самарадорлиги кам бўлади.

13. 30 май 2022Украина уруши: Зеленский Харьков борди, Россия кучайиб, Украина аҳволи тангми?, Видео

    Украина уруши: Зеленский Харьков борди, Россия кучайиб, Украина аҳволи тангми? Жанг жабҳасидаги бугунги вазият қандай? Украинадан сўнгги тафсилотлар.

14. 30 май 2022Володимир Зеленский фронт чизиғидаги Харков вилоятига борди

    Украина Президенти Володимир Зеленский Харков вилоятидаги амалдорлар ва ҳарбийлар билан учрашди. Reuters хабар агентлигининг ёзишича, бу Украина Президентининг уруш бошланган бери Киев вилоятидан ташқарига қилган илк сафаридир.

    Минтақа раҳбарлари билан учрашувда Зеленскийга айни дамда вилоятнинг 31 фоизи вақтинча босиб олингани ва унинг 5 фоизи Россия босқинчиларидан озод қилинганини ҳисобот берган.

    “Айрим озод қилинган аҳоли масканларида ҳамон отишмалар давом этаётгани учун ҳозирча тўлиқ ўрганиб, минадан тозалаш ишлари ва муҳим инфратузилма ишини қайта тиклай олмаймиз. Бу нарсани масофадан амалга оширса бўладиган жойларда қиляпмиз”, деган вилоят маъмурияти раҳбари Олег Синегубов.

    Зеленский Харков вилояти ҳарбийлари эгаллаб турган позицияларга ҳам борган ва уларни мукофотлаган.

    14 май куни Харков мэри Игор Терехов Би-би-сига Россия ҳарбийлари чекинаётгани ва фронт чизиғи шаҳардан узоқлашганини, 16 майда эса Украина аскарлари Харков йўналиши бўйича Россия чегарасига етганини айтганди.

15. 30 май 2022Жанглар Севередонецк шаҳри кўчаларида давом этяпти

    Луганск вилояти раҳбари Сергей Гайдайнинг айтишича, Россия қўшинлари Северодонецк маркази томон ҳаракатланмоқда, шаҳар кўчаларида оғир жанглар давом этмоқда.

    Гайдайга кўра, шаҳар инфратузилмаси 100 фоиз вайрон бўлган, 90 фоиз аҳоли уйлари зарар кўрган.

    Унинг айтишича, шаҳарда Россия аскарларининг кўплаб жасадлари бор ва иссиқ ов-ҳаво шароитида бу юқумли касалликларни келтириб чиқариши мумкин.

    Украина Қуролли кучлари бош штаби сал олдинроқ Россия кучлари Севередонецк шаҳрининг шимолий-шарқ ва жанубий-шарқ чегараларида ўрнашаётганини хабар берганди.

    Гайдага кўра, Севередонецкнинг Лисичанск шаҳри билан туташ қисми Украина назорати остида қолмоқда. Лисичанск-Бахмут трассаси Украина армияси томонидан назорат қилинаётгани, бироқ Россия ҳарбийларининг мунтазам нишони остида қолаётгани айтилган.

    Россия армияси Луганск вилоятининг ёнма ён жойлашган Севередонецк ва Лисичанск шаҳарларини эгаллаш учун катта куч ташлагани айтилмоқда.

16. 27 май 2022Диққат Украина: Ғарб 'иккиюзламачилиги' энди Ўзбекистон ва минтақага хавф соладими?, Видео

    Ғарб "иккиюзламачилиги" энди Ўзбекистон ва минтақага хавф соладими?

    Бугун бўй кўрсатаётган айни мазмундаги хавотирлар қанчалик асосли?

    Украина билан овора бўлган дунё Афғонистон ё Сурияни унутдими?

    Би-би-си Ўзбек хизматининг "Диққат: Украина" дастурини томоша қилинг.

    Дастур бошловчиси Феруза Раҳмон.

17. 27 май 2022Украина авиацияси Россиянинг Су-35 самолётини уриб туширди

    Украина ҳаво кучлари штабининг маълум қилишича, 27 май куни Украина Қуролли кучларининг МиГ-29 қирувчиси Херсон вилояти осмонида Россиянинг Су-35 қирувчисини уриб туширган. Хабарда айтилишича, Россия қирувчиси Украина самолёти орқасидан тушган бўлган.

    Россия томони ҳозирча ушбу хабарга муносабат билдирмаган.

    Су-35 Россия Ҳарбий Ҳаво кучларининг асосий қирувчи учоқларидан ҳисобланади. У совет Су-27 қирувчиларининг замонавийлаштирилган сўнгги моделидир.

    Халқаро шартли таснифга кўра у 4++ авлодига тегишли, деб кўрсатилган.

    У илк моделидан тубдан фарқ қилади. Самолёт 2010 йилда ишлаб чиқарила бошланган.

18. 27 май 2022Украинанинг урушдан кўрган иқтисодий зарари 600 миллиард доллар

    Киев Иқтисодиёт Мактаби (KSE) Украинанинг Россия босқинидан кўрган умумий иқтисодий йўқотиши 600 миллиард долларгача етишини айтди.

    Ушбу рақамлар ичига аҳоли уйлари ва маъмурий бинолар, шаҳар инфратузилмасига етган зарарлар ва мудофаа ҳамда ижтимоий ҳимояга ажратилган қўшимча маблағлар ҳам киради.

    Бинолар ва шаҳар инфратузилмасига етказилган умумий зарар 105 миллиард доллар деб баҳоланмоқда.

    Украина ширкатлари 11 миллиард доллар иқтисодий зарар кўрган.

    KSE маълумотларига кўра, 200 дан зиёд Украин ширкатлари, фабрика ва заводлари Россия ҳарбийлари томонидан йўқ қилинган, зарар етказилган ёки эгаллаб олинган.

19. 27 май 2022Лиман шаҳри Украина қўлидан кетдими?

    Донецк вилоятидаги Лиман шаҳри тақдири номаълумлигича қолмоқда. Олдинроқ Россия қўлловидаги бўлгинчилар шаҳарда тўлиқ назоратни қўлга киритганини айтиб чиққанди.

    Украина расмийлари Лиман қисман қўлдан берилганини олмоқда, аммо тўлиқ назорат ўрнатилмаганини айтмоқда.

    Киевдаги мудофаа масъуллари журналистларга Украина аскарлари шаҳарнинг шимолий-ғарби ва жанубий-шарқида назоратни ушлаб қолиш учун курашаётганини айтган.

    Би-би-сида ушбу иддаоларни мустақил манбалардан текшириш имкони йўқ.

    Шунинг учун шаҳарда нима бўлаётгани, у Россия кучларига назоратига тўлиқ ўтдими деган саволларга аниқ жавоб йўқ.

20. 27 май 2022Украина Донбассдаги ерларини бой бермоқда

    Украина Бош штаби Донбасс шимолида бир нечта аҳоли масканларини қўлдан бой берганини тан олган. Украина ҳарбийларининг Донбассдаги аҳволи танглашиб бораётганини кўплаб расмий ва норасмий шахслар чиқишидан пайқаш мумкин.

    Украина уруш фронтидаги энг сўнгги хабарлар:

    • Россия қўшинлари Луганск вилоятининг маъмурий маркази Северодонецк шаҳрини қуршаб, босиб олишда давом этмоқда. Унинг атрофида шиддатли жанглар кетмоқда.

    • Вилоят раҳбариятининг маълум қилишича, Луганск вилоятининг атиги 5% Украина бошқарувида. Ўтган ҳафта билан солиштирганда бу рақам икки баробарга камайган. Украина ҳарбийлари айрим ҳудудлардан чекинишга мажбур бўлган.

    • Северодонецк мэрининг айтишича, шаҳар тўхтовсиз равишда бомбардимон қилинмоқда. 60 фоиз аҳоли яшаш бинолари тўлиқ вайрон бўлган, 90 фоиз бино зарар кўрган ва капитал таъмирга муҳтож.

    • Пентагонга кўра, қўшинлар сонининг кўплигига қарамасдан Россия жуда ҳам оз натижага эришган. Россия қўмондонлари ўзларининг ўтмишдаги хатоларидан сабоқ олмаган ва бир тактикадан фойдаланишда давом этмоқда.

    • Урушни ўрганиш Институти таҳлилчиларининг айтишича, Россия қўшинлари қаттиқ чарчаган ва кейинги йўқотишларнинг ўрнини тўлдириш жуда қийин бўлади. Улардаги маълумотларга кўра, Россия Украина жанубида қўлга киритган ҳудудларда назоратни узоқ муддат ушлаш учун ва Украина қарши ҳужумларини қайтариш учун “учинчи мудофаа чизиғи”ни тайёрламоқда.

    • Украина Ташқи ишлар вазири яна бир бор Ғарб давлатларига мурожаат қилиб, улар Украина тақдирига бефарқ бўлмаса, зудлик билан оғир қуроллар етказиб беришга чақирган. “Артиллерия ва бирваракай ўт очувчи реактив тизимларсиз Россия қўшинларини сиқиб чиқариб бўлмайди”, деган у.

    • CNN телекомпанияси исмини ошкор қилмаган бир нечта Америка расмийларига таяниб хабар беришича, Байден маъмурияти Украинага узоқ масофага етиб борувчи замонавий ракеталар тизимини етказиб бермоқчи. Бу қуролларни Киев сўраб келаётганди. Қуролларнинг юборилиши ҳақида кейинги ҳафта хабар берилиши мумкин.