کورونا وائرس: بلوچستان میں کورونا کے 304 نئے مریض، خیبرپختونخوا میں متاثرین 15 ہزار سے زیادہ

دنیا بھر میں اب تک 72 لاکھ سے زائد افراد کورونا سے متاثر ہو چکے ہیں جبکہ ہلاکتوں کی تعداد چار لاکھ سے تجاوز کر چکی ہے۔ پاکستان میں متاثرین کی تعداد ایک لاکھ سے تجاوز کر چکی ہے جبکہ دو ہزار سے زائد افراد اس مرض سے ہلاک ہو چکے ہیں۔ سب سے زیادہ متاثرین اور ہلاکتیں صوبہ پنجاب میں ہیں۔

لائیو کوریج

9 جون 2020دو ماہ بعد ماسکو میں لاک ڈاؤن میں نرمی کا آغاز
،تصویر کا ذریعہGetty Images
دو ماہ کے لاک ڈاؤن کے بعد اب ماسکو میں عائد پابندیوں میں نرمی کی جا رہی ہے جس کی وجہ کورونا وائرس کے کیسز میں کمی ہے۔
- اب وہاں کے مکینوں کو سفرکے لیے الیکٹرانک پاسز کی ضرورت نہیں ہو گی وہ پیدل چل سکیں گے۔ پبلک ٹرانسپورٹ کا استعمال کیا جا سکے گا اور وہ بغیر کسی پابندی کے کے ڈرائیونگ کر سکیں گے۔
- اب حجام کی دکانیں اور بیوٹی پارلر کھولے جا سکتے ہیں۔
- 16 جون سے کیفے اور ریسٹورنٹس بھی چار دیواری کے باہر موجود جگہ کو صارفین کے لیے کھول سکیں گے۔
- عوامی مقامات میوزم اور لائبریریاں بھی کھولے جانے کی اجازت ہو گی۔
- تیسرا مرحلہ جو کہ 23 جون کو شروع ہو گا میں چار دیواری کے اندر کھانا کھانے کی اجازت ہو گی اور جِم اور سوئمنگ پول بھی کھول دیے جائیں گے۔
مارچ میں لگائے جانے والے لاک ڈاؤن میں تمام غیر ضروی کاروبار بند تھے اور وبا کے مرکز ماسکو میں کیسز کی تعداد 197,000 ہے۔
9 جون 2020بریکنگ, دنیا بھر سے تازہ ترین
دنیا بھر میں کورونا وائرس کے مصدقہ متاثرین کی تعداد 7,085,894 ہو گئی ہے۔
جانز ہاپکنز یونیورسٹی کے تازہ ترین اعدادو شمار کے مطابق دنیا میں کووڈ 19 سے ہلاکتوں کی تعداد 405,168 تک پہنچ چکی ہے۔
دنیا بھر میں سب سے زیادہ اموات امریکہ میں ہوئی وہاں 110,932 افراد نے جان گنوائی۔
دیگر ممالک میں صورتحال کچھ یوں ہے۔
برطانیہ: 40,680
برازیل: 36,455
اٹلی: 33,964
فرانس: 29,212
سپین: 27,136
میکسیکو: 13,699
بیلجئیم: 9,606
جرمنی: 8,695
ایران: 8,351
انڈیا: 7,473
9 جون 2020گلگت بلتستان: ایک اور ہلاکت، متاثرین کی کل تعداد 952 ہو گئی
گلگت بلستان محکمہ صحت کے مطابق مزید بیس افراد میں وائرس کی تصدیق کے بعد متاثرین کی مجموعی تعداد 952 ہوگئی ہے۔
نئے مریضوں میں چار کا تعلق استور، بارہ کا گلگت، تین کا ہنزہ اور ایک کا نگر سے ہے۔
ایک مزید مریض ہلاک ہوا ہے جس کے بعد کل ہلاکتوں کی تعداد چودہ ہوگئی ہے۔
حکام کے مطابق20 مزید صحت یاب ہوئے ہیں اور اب صحت یاب مریضوں کی تعداد 597 ہوگئی ہے جبکہ اس وقت زیر علاج مریضوں کی تعداد 341 ہے۔
،تصویر کا ذریعہGB government
9 جون 2020بریکنگ, چین میں وبا پھوٹنے کا آغاز ’شاید پہلے ہو چکا تھا‘
ہاورڈ میڈیکل سکول کی تحقیق کے مطابق ووہان کے ہسپتالوں کے باہر گذشتہ برس اگست کے آخر میں دکھائی دینے والی رش سے یہ اندازہ ہوتا ہے کہ چین میں حکام کی جانب سے رپورٹ کیے جانے سے پہلے ہی وہاں کورونا وائرس حملہ کر چکا تھا۔
چین کے اس شہر کی کمرشل سیٹلائیٹ سے لی جانے والی تصاویر میں محققین نے ووہان کے پانچ شہروں کے باہر ٹریفک میں ’ڈرامائی اضافہ‘ دیکھا۔
ٹریفک میں اضافے کے علاوہ آن لائن کھانسی اور اسہال سے متعلق معلومات کو زیادہ سرچ کیا گیا۔
ڈاکٹر جان براؤنسٹن جو اس تحقیق کی سربراہی کر رہے ہیں نے اے بی سی نیوز سے گفتگو میں بتایا کہ یہ شواہد اتفاقی ہیں مگر یہ وائرس کے آغاز کے حوالے سے اہم معلومات فراہم کریں گے۔
ان کا کہنا ہے کہ اکتوبر میں کچھ ہو رہا تھا۔ وہ کہتے ہیں واضح طور پر سماجی سطح پر کچھ خلل تھا۔
چین نے 31 دسمبر کو ڈبلیو ایچ اور کو بتایا تھا کہ وہاں نمونیا کے کیسز سامنے آ رہے ہیں جس کی وجہ معلوم نہیں ہے۔
اس کے نو روز بعد چینی حکام نے کہا تھا کہ انھوں نے نمونیا کے بہت سے کیسز میں کورونا وائرس کی تشخیص کی ہے۔ اسے بعد میں سارس کووڈ 2 کا نام دیا گیا۔ یہ وائرس کووڈ 19 کا سبب ہے۔
9 جون 2020جرمنی:ایئر پورٹ کی کارپارکنگ میں فن پاروں کی نمائش
،تصویر کا ذریعہGetty Images
یہ منظرجرمنی کے بون ائیر پورٹ کی کار پارکنگ کا ہے جہاں مختلف فن کاروں کی بنائی گئی تصاویردکھائی دے رہی ہیں۔ مختلف جگہوں پر نمائشوں کا اہتمام ممکن نہیں رہا تھا اور انھیں لاک ڈاؤن کی وجہ سے کینسل کرنا پڑا۔
نمائش میں 50 فن کاروں کو اپنے فن پاروں کو دکھانے کا موقع ملا۔
اس نمائنش کے منتظم ڈائٹر نوسباؤم کا کہنا ہے کہ فن کاروں کی مدد کرنے کا ایک طریقہ ہے جو موجودہ صورتحال میں بہت متاثر ہوئے ہیں اور ان کے ایونٹس منعقد نہیں ہو پا رہے۔
،تصویر کا ذریعہGetty Images
9 جون 2020پولینڈ میں ایک دن میں کورونا کے سب سے زیادہ کیسز
پولینڈ میں پیر کو کورونا وائرس کے 599 کیسز سامنے آئے۔
ملک میں وائرس کی وبا کے آغاز کے بعد سے ایک ہی دن میں سامنے آنے والے یہ سب سے زیادہ کیسز ہیں۔
پیر کو جنوبی پولینڈ کے علاقے سائلسیہ میں 54 کیسز سامنے آئے۔
بالائی سائلسیہ میں زیادہ تر کان کن رہتے ہیں۔
حکومتی سرپرستی میں چلنے والی ایک کان میں سنیچر کو ملک میں سامنے آنے والے کل کیسز کے 60 فیصد کیسز شامل تھے اسی طرح اتوار کو بھی 34 فیصد کیسز وہاں سے سامنے آئے۔
اس صورتحال کے بعد حکومت نے اعلان کیا ہے کہ وہ عارضی طور پر 12 کانیں تین ہفتوں کے لیے بند کر رہی ہے۔ وہاں کورونا وائرس کی تشخیص کے لیے ٹیسٹ بھی کیے جائیں گے۔
یورپی یونین میں کوئلہ پیدا کرنے والا سب سے بڑا ملک پولینڈ ہے۔ یہ 50 فیصد بجلی کوئلے سے حاصل کرتا ہے۔
اس صورتحال کی وجہ سے وہاں بجلی کی پیداوار کو کوئی خطرہ نہیں کیونکہ وہاں اس کا ذخیرہ کافی مقدار میں موجود ہے۔
پولینڈ میں حکام کے اعدادوشمار کے مطابق وہاں دیگر یورپی ملکوں کی نسبت کم اموات او کورونا وائرس کے کیسز ہیں تاہم حالیہ کیسز کی وجہ سے یہاں صورتحال تبدیل ہو سکتی ہے۔
9 جون 2020بریکنگ, پنجاب: کورونا وائرس کے 1916 نئے مریض، مزید 58 اموات
صوبہ پنجاب میں گذشتہ 24 گھنٹوں کے دوران مزید 1916 افراد میں کورونا وائرس کی تشخیص ہوئی ہے جس کے بعد صوبے میں وائرس کے مصدقہ متاثرین کی تعداد 40819 ہو گئی ہے۔
اسی دورانیے میں مزید 58 مریض ہلاک ہوئے ہیں اور اب صوبے میں ہلاکتوں کی مجموعی تعداد 773 ہو چکی ہے۔
قدرتی آفات سے نمٹنے کے صوبائی ادارے پی ڈی ایم اے کے مطابق پنجاب میں کورونا سے صحت یاب ہونے والے افراد کی کُل تعداد 8294 ہو گئی ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
9 جون 2020بریکنگ, مسلم لیگ (ن) کی ترجمان مریم اورنگزیب اور ان کی والدہ میں بھی کورونا کی تصدیق
مسلم لیگ (ن) کی رہنما مریم اورنگزیب اور ان کی والدہ طاہرہ اورنگزیب میں کورونا وائرس کی تشخیص ہوئی ہے۔
مریم اورنگزیب نے تصدیق کرتے کہا ہے کہ انھوں نے اور ان کی والدہ نے خود کو گھر میں قرنطینہ کر لیا ہے۔
یاد رہے اس سے قبل پاکستان مسلم لیگ(ن) کے رہنما شاہد خاقان عباسی اور ڈاکٹر طارق فضل چوہدری کا کورونا ٹیسٹ بھی مثبت آیا تھا۔
9 جون 2020ٹیکساس اور فلوریڈا میں انفیکشن میں اضافے کی اطلاعات
،تصویر کا ذریعہGetty Images
امریکہ میں لاک ڈاؤن کے بعد اب معیشت کو دوبارہ کھولا جا رہا ہے اور اسی دوران ٹیکساس اور فلوریڈا سمیت کچھ ریاستوں میں نئے انفیکشن میں اضافہ دیکھا جارہا ہے۔
امریکہ میں قومی سطح پر تصدیق شدہ انفیکشن 20 لاکھ کے قریب ہیں۔
اتوار کے روز فلوریڈا میں مسلسل پانچویں دن ایک ہزار سے زیادہ مریض سامنے آئے، جس سے ریاست میں متاثرین کی مجموعی تعداد 64000 ہو گئی ہے۔
فلوریڈا میں وائرس کے عروج کے دنوں میں بھی اتنے زیادہ متاثرین سامنے نہیں آئے تھے۔
لیکن اسی مدت کے دوران مثبت کووڈ 19 ٹیسٹوں کی شرح میں کمی واقع ہوئی ہے۔ اس جنوبی ریاست میں اب تک دس لاکھ سے زیادہ ٹیسٹ کروائے گئے ہیں۔
ٹیکساس میں بھی حالیہ دنوں میں تصدیق شدہ متاثرین میں اضافہ دیکھا گیا ہے۔ مئی میں مستقل کم متاثرین کے بعد ، 26 مئی کے آس پاس سے مریضوں کی تعداد میں اضافہ ہوا ہے۔
ٹیکساس میں اب تک کم از کم 75،408 متاثرین کی تصدیق ہوئی ہے۔
9 جون 2020نیویارک شہر دوبارہ کھلنا شروع ہو گیا
نیو یارک شہر کو چار مرحلوں میں دوبارہ کھولا جا رہا ہے جس کے پہلے مرحلے کا باضابطہ آغاز ہو گیا ہے۔
آئیے آپ کو لاک ڈاؤن میں تقریباً تین مہینے گزارنے کے بعد نیویارک کے ایک نئے معمول کی جھلکیاں دکھاتے ہیں۔
،تصویر کا ذریعہGetty Images
،تصویر کا کیپشنلاک ڈاؤن کے دوران بہت ساری دکانیں لکڑی کے تختے رکھ کر بند کر دی گئیں تھیں
،تصویر کا ذریعہGetty Images
،تصویر کا کیپشننیویارک کے گورنر اینڈریو کومو نے پیر کے روز نیو یارک شہر کے رہائشیوں کا سب وے پر استقبال کیا
،تصویر کا ذریعہGetty Images
،تصویر کا کیپشنیہ مسافر صبح کے رش کے اوقات میں نیو یارک سٹی کے گرینڈ سینٹرل سٹیشن پہنچے
،تصویر کا ذریعہGetty Images
،تصویر کا کیپشنشہر کے دوبارہ کھلنے کے پہلے دن گرینڈ سنٹرل سٹیشن پرغیر معمولی طور پر سکون رہا
8 جون 2020’عالمی معیشت اس سال 5.2 فیصد تک سکڑ سکتی ہے‘, اینڈریو والکر، بی بی سی کے نامہ نگار
،تصویر کا ذریعہEPA
عالمی بینک کی طرف سے کی جانے والی نئی پیشن گوئی کے مطابق عالمی معیشت اس سال 5.2 فیصد تک سکڑ سکتی ہے اور یہ گرواٹ گذشتہ 150 سال کے دوران کسی بھی دور سے زیادہ وسیع ہو گی۔
عالمی بینک کے صدر ڈیوڈ مالپاس نے کہا ہے کہ کورونا وائرس کی وبا ترقی پذیر ممالک میں کئی دہائیوں کی ترقی کو خطرے میں ڈال رہی ہے۔
انھوں نے کہا کہ کئی ترقی پذیر ممالک دو محاذوں پر جنگ لڑ رہے ہیں: اندرونی طور پر بیماری کی وبا ک پھیلاؤ کے خلاف اور امیر ممالک میں گہری کساد بازاری کے اقتصادی اثر کے خلاف۔
بینک کا کہنا ہے کہ اس سال ایک گروہ کی شکل میں ابھرتی ہوئی معیشتوں میں گراوٹ آئے گی اور گذشتہ چھ دہائیوں میں ایسا پہلی مرتبہ ہوا ہے۔
رپورٹ میں یہ بھی کہا گیا ہے کہ فی صد کے حوالے سے آمدنی میں بھی بڑے پیمانے پر کمی آئے گی۔ 1870 کے بعد سے یہ بڑے پیمانے پر کمی ہے۔ بینک نے خبردار کیا ہے کہ یہ بحران لاکھوں افراد کو انتہائی غربت میں دھکیل دے گا۔
8 جون 2020کورونا وائرس کی وبا آخر کب ختم ہوگی؟
کورونا وائرس کی وجہ سے اب دنیا بھر میں اربوں لوگ لاک ڈاؤن کی وجہ سے اپنے اپنے گھروں میں بند ہیں۔ معیشتوں کو شدید نقصان پہنچا ہے اور کروڑوں افراد بے روزگار ہوئے ہیں۔مگر کیا یہ وبا کبھی ختم ہوگی اور اگر ہاں تو اس میں کتنا عرصہ لگ سکتا ہے، دیکھیے اس ڈیجیٹل ویڈیو میں۔
8 جون 2020بریکنگ, پاکستان کے زیرِ انتظام کشمیر: کورونا وائرس کے 16 نئے مریض، متاثرین کی تعداد 412 ہو گئی
،تصویر کا ذریعہM. A Jarral
پاکستان کے زیر انتظام کشمیر میں مزید 16 افراد میں کورونا وائرس کی تشخیص ہوئی ہے جس کے بعد اس خطے میں کورونا وائرس سے متاثر ہونے والے افراد کی تعداد 412 ہو گئی ہے۔
ضلع سدھنوتی کے ڈپٹی کمشنر ندیم احمد جنجوعہ کے مطابق سدھنوتی میں مزید 9 افراد کورونا وائرس سے متاثر ہوئے ہیں جس کے بعد سدھنوتی میں کورونا سے متاثر ہونے والے افراد کی تعداد 35 ہوگئی ہے۔
دوسری جانب کمشنر میرپور ڈویژن محمد رقیب خان کے مطابق میرپور میں سات افراد کورونا سے متاثر ہوئے ہیں جس کے بعد میرپور میں کورونا وائرس سے متاثر ہونے والے افراد کی تعداد 53 ہوگئی ہے۔
حکام کے مطابق مزید 14 مریض صحتیاب ہوئے ہیں جس کے بعد اس خطے میں صحتیاب مریضوں کی تعداد 209 ہے۔
پاکستان کے زیر انتظام کشمیر میں حکام کے مطابق اب تک 8837 مشتبہ افراد کے ٹیسٹ لیے گئے ہیں جن میں 53 کے رزلٹ کا انتظار ہے۔
8 جون 2020بلوچستان: سرکاری دفاتر میں ماسک کے بغیر داخلے پر پابندی
،تصویر کا ذریعہGetty Images
بلوچستان کے تمام سرکاری دفاتر میں ماسک کے بغیر داخلے پر پابندی عائد کر دی گئی ہے۔
محکمہ سروسز اینڈ جنرل ایڈمنسٹریشن کی جانب سے جاری ہونے والے ایک نوٹیفیکیشن کے مطابق بلوچستان کے تمام سرکاری محکموں کو ہدایت کی گئی ہے کہ وہ کورونا کی روک تھام کے لیے احتیاطی تدابیر کے طور پر کسی بھی شخص کو ماسک کے بغیر دفاتر میں داخل ہونے کی اجازت نہ دیں۔
اس کے ساتھ ساتھ سرکاری محکموں کو یہ بھی ہدایت کی گئی ہے کہ ہر دفتر کے داخلی راستے پر اس تحریر کے ساتھ بینر بھی آویزاں کریں کہ ’ماسک کے بغیر داخلے کی اجازت نہیں ہے۔‘
8 جون 2020کیا آپ صحت یابی کے بعد دوبارہ کووڈ 19 کا شکار ہو سکتے ہیں؟
،تصویر کا ذریعہGetty Images
کیا آپ کو صحت یاب ہونے کے بعد دوبارہ بھی کورونا وائرس نشانہ بنا سکتا ہے؟ کچھ مریض دوسروں کے مقابلے میں زیادہ بیمار کیوں ہیں؟ کیا یہ مرض ہر سردی میں واپس آئے گا؟ کیا ویکسین کارگر ثابت ہو گی؟ کیا امیونٹی پاسپورٹ کی مدد سے ہم میں سے کچھ لوگ کام پر واپس جا سکتے ہیں؟ اس وائرس سے نمٹنے کے لیے کن طویل المدتی اقدامات کی ضرورت ہے؟
دنیا میں کووڈ-19 کا شکار ہونے والے افراد کی تعداد جہاں روز بروز بڑھ رہی ہے وہیں یہ سوالات بھی تواتر سے پوچھے جانے لگے ہیں۔
ان تمام سوالات میں جو ایک چیز مشترک ہے وہ ہے امیون سسٹم یا مدافعتی نظام اور ہم اس بارے میں بہت کم جانتے ہیں۔
آپ کورونا وائرس کے خلاف جسم میں مدافعت کیسے پیدا کر سکتے ہیں؟ جانیے بی بی سی کے جیمز گیلیگہر، نامہ نگار برائے صحت و سائنس کی اس تحریر میں۔
8 جون 2020بریکنگ, بلوچستان میں کورونا وائرس سے متاثرہ 272 نئے مریض، مزید چار اموات
،تصویر کا ذریعہGetty Images
بلوچستان میں کورونا وائرس کے 272 نئے مریضوں کی تصدیق ہوئی ہے جس کے بعد متاثرین کی مجموعی تعداد 6788 ہو گئی ہے۔
بلوچستان میں کورونا سے مزید چار افراد کی ہلاکت کے کورونا وائرس سے ہلاکتوں کی تعداد 58 ہے۔
محکمہ صحت حکومت بلوچستان کی رپورٹ کے مطابق آٹھ جون 2020 کو کورونا کے 1205 ٹیسٹ کیے گئے جن میں سے 272 پازیٹو آئے۔
بلوچستان میں اب تک کورونا کے مجموعی طور پر 32322 ٹیسٹ کیے گئے جن میں سے 25534 کے نتائج منفی آئے۔
بلوچستان میں مجموعی طوپر پر 74966 افراد کی سکریننگ کی گئی ہے۔ مشتبہ مریضوں کی تعداد 31019 ہے جبکہ کورونا وائرس سے اب تک 2360 افراد صحتیاب ہوئے ہیں۔
8 جون 2020ڈبلیو ایچ او: عالمی سطح پر وائرس کی صورتحال بدتر ہو رہی ہے
،تصویر کا ذریعہGetty Images
عالمی ادارہ صحت (ڈبلو ایچ او) کے سربراہ ٹیڈروس ادہانوم گیبریسیئس نے کہا ہے کہ اگرچہ یورپ میں کورونا وائرس کی وبا کم ہو رہی ہے لیکن ’عالمی سطح پر وائرس کی صورتحال بدتر ہو رہی ہے۔‘
کورونا وائرس کی ایک بریفنگ کے دوران انھوں نے رپورٹروں کو بتایا کہ گذشتہ 10 میں سے نو دنوں میں ایک لاکھ سے زیادہ مریض رپورٹ کیے گئے ہیں، اور کل کے 75 فیصد مریض صرف 10 ممالک سے تھے جن میں زیادہ تر کا تعلق امریکہ (لاطینی اور شمالی) اور جنوبی ایشیا سے تھا۔
اگرچہ ان کا لہجہ اداس تھا لیکن انھوں نے ساتھ یہ بھی کہا کہ انھیں کئی ممالک میں مثبت اشارے دیکھ کر حوصلہ ملا ہے۔
انھوں نے کہا کہ ان ممالک میں سب سے بڑا خطرہ مطمئن ہونے کا ہے۔ ’تحقیقات کے نتائج سے پتہ چلتا ہے کہ بہت زیادہ آبادی ابھی بھی وائرس کی زد میں ہے، جس سے یہ ظاہر ہوتا ہے کہ عالمی طور پر لوگ اب بھی انفیکشن کا شکار ہو سکتے ہیں۔‘
8 جون 2020بریکنگ, کورونا وائرس: سندھ میں مزید 29 ہلاکتیں، 1447 نئے مریض
،تصویر کا ذریعہGetty Images
سندھ میں گذشتہ 24 گھنٹوں کے دوران کورونا وائرس کے 1447 نئے متاثرین سامنے آئے ہیں جبکہ مزید 29 مریض ہلاک ہو گئے ہیں جن میں سے 24 اموات کراچی میں ہوئی ہیں۔
سندھ میں کورونا وائرس سے ہلاک ہونے والوں کی تعداد 679 ہو گئی ہے۔
گذشتہ 24 گھنٹوں میں 468 مزید مریض صحت یاب ہوئے جبکہ سندھ میں اب تک کل 19137 مریض صحت یاب ہو چکے ہیں۔
صوبے بھر کے 1447 مریضوں میں سے کراچی میں 1075 نئے مریض رپورٹ ہوئے ہیں۔
8 جون 2020کورونا اور محبت: سماجی دوری کے زمانے میں محبتیں کیسے بڑھ رہی ہیں؟
کورونا وائرس کی وجہ سے جہاں زندگی کے دوسرے معاملات اب الیکٹرانک روپ اختیار کر رہے ہیں، وہیں آن لائن ڈیٹنگ کے رجحان میں بھی اضافہ ہوا ہے۔‍اس ڈیجیٹل ویڈیو میں دیکھیے کہ سماجی دوری کے زمانے میں ڈیٹنگ کے لیے نوجوان کیا طریقے اختیار کر رہے ہیں۔
8 جون 2020سعودی عرب: حفاظتی اقدامات پر عمل درآمد نہ کرنے کے باعث 71 مساجد بند کر دی گئیں
،تصویر کا ذریعہReuters
سعودی عرب میں کورونا وائرس کی روک تھام کے لیے بنائے گئے حفاظتی اقدامات پر عمل درآمد نہ ہونے کے باعث 71 مساجد بند کر دی گئیں ہیں۔
سعودی عرب کے وزیر برائے اسلامی امور ڈاکٹر عبدالطیف کا کہنا ہے کہ ’پروٹوکول اور صحت سے متعلق احتیاطی تدابیر پر عمل درآمد نہ کرنے کے نتیجے میں کچھ مساجد میں کورونا وائرس کا انفیکشن پھیلا اس لیے احتیاطی تدبیر کے طور پر مملکت کے مختلف علاقوں میں 71 مساجد کو بند کر دیا گیا ہے اور انھیں جراثیم سے پاک کرنے کا عمل جاری ہے۔‘
وزارت نے ہفتے کے آخر میں جدہ میں مساجد کے اماموں کو ایک سرکلر بھی جاری کیا جس میں اگلے 15 دن تک نمازِ جمعہ سمیت روزانہ کی پانچوں نمازیں نہ پڑھوانے اور صرف اذان دینے کی ہدایت کی گئی ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام