پاکستان میں عید الفطر کی نماز روایتی انداز میں ادا کی گئی, زیادہ تر مقامات پر سماجی دوریوں کے ضوابط کی خلاف ورزی
پاکستان بھر میں ماہِ رمضان کے ختم ہونے پر آج عید الفطر کا تہوار منایا جا رہا ہے۔ اس موقع پر ملک بھر کی مساجد، عید گاہوں اور میدانوں میں نمازِ عید روایتی انداز میں ادا کی گئی۔
جہاں کچھ مقامات ایسے بھی تھے جدھر نمازیوں نے ایک دوسرے سے فاصلے برقرار رکھا، وہیں زیادہ تر مقامات پر حکومت کی جانب سے اعلان کردہ سماجی دوری کے ضوابط کی پاسداری دیکھنے میں نہیں آئی اور عوام بڑی تعداد میں ایک دوسرے کے قریب کھڑے ہو کر عید کی نماز ادا کرتے ہوئے نظر آئے۔
عید گاہوں سے موصول ہونے والی تصاویر میں دیکھا جا سکتا ہے کہ کئی افراد نے ماسک بھی نہیں پہن رکھے۔
واضح رہے کہ گذشتہ رات پاکستان کے وزیرِ اعظم عمران خان نے اپنے ایک بیان میں کہا تھا کہ (کورونا وائرس کا) مرض ہمارے درمیان موجود ہے چنانچہ نماز عید سیمت پوری چھٹیوں کے دوران سماجی فاصلوں کا بطور خاص اہتمام کیا جائے۔