آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان تحریک انصاف کے چیئرمین عمران خان نے ٹیکسلا میں ایک جلسے سے خطاب میں کہا ہے کہ میں پوری تیاری کر رہا ہوں۔ ان کا کہنا تھا کہ میں ان (حکومت) کی پلاننگ کے حساب سے تیاری کر رہا ہوں اور پھر ایک دم کال دوں گا۔ زیادہ دیر نہیں ہے اس لیے سب میری کال کا انتظار کریں۔ ‘
وزیراعظم شہباز شریف آج شام 5 بجے آڈیو لیکس کے حوالے سے ایک پریس کانفرنس سے خطاب کریں گے اور اس حوالے سے سوالات کے جواب دیں گے۔
یاد رہے گذشتہ چند روز سے پاکستان کے وزیراعظم شہباز شریف اور ان کی جماعت مسلم لیگ ن سے تعلق رکھنے والے وفاقی وزرا کی مبینہ گفتگو کی آڈیوز ڈارک ویب کے بعد سوشل میڈیا پر زیرِ گردش ہیں۔
مسلم لیگ نواز کے رہنما اسحاق ڈار نے سینیٹ کی رکنیت کا حلف اٹھا لیا ہے۔
حلف برداری کے دوران پی ٹی آئی ارکان نے اپنا احتجاج ریکارڈ کروایا اور چیئرمین سینیٹ کے ڈائس کا گھیراؤ کیا۔
سابق سپیکر قومی اسمبلی اسد قیصر کے خلاف ممنوعہ فنڈنگ کیس میں پشاور ہائی کورٹ نے سابق سپیکر اسد قیصر کی درخواست مسترد کر دی ہے۔
وکلا کی جانب سے دلائل مکمل ہونے پر عدالت نے فیصلہ محفوظ کیا تھا۔
یاد رہے سابق سپیکر اسد قیصر نے ممنوعہ فنڈنگ کیس میں ایف آئی اے کے دائر اختیار کو چلنج کیا ہوا ہے۔
یہاں یہ بھی یاد رہے کہ الیکشن کمیشن کے ممنوعہ فنڈنگ کیس میں دو بینک اکاوئنٹ سامنے آنے پر ایف آئی اے نے اسد قیصر کے خلاف انکوئری شروع کی ہوئی ہے۔
پاکستان میں ملکی کرنسی کے مقابلے میں ڈالر میں کمی کا رجحان منگل کے روز بھی برقرار رہا جب اوپن مارکیٹ میں ڈالر چار روپے اور انٹر بنک میں 3.12 روپے کم ہوا۔
اوپن مارکیٹ میں چار روپے کمی کے بعد ڈالر کی قیمت 238 روپے سے 234 روپے کی سطح پر آگئی ہے۔
انٹر بنک میں 3.12 روپے کی کمی کے بعد ڈالر کی کی قیمت 233.90 روپے کی سطح تک گر گئی ہے۔
موجودہ ہفتے کے پہلے دو دنوں میں اوپن مارکیٹ میں ڈالر کی قیمت میں گیارہ روپے کی کمی ریکارڈ کی گئی جب کہ انٹر بنک میں 5.75 روپے کی کمی دیکھی گئی۔
الیکشن کمیشن آف پاکستان کا کہنا ہے کہ وہ ایک سیاسی شخصیت کی طرف سے لگائے گئے الزامات کی شدید ترین الفاظ میں مذمت اور تردید کرتا ہے۔
کمیشن کی جانب سے جاری پریس میں کہا گیا ہے کہ ایسے غیر ذمہ دارانہ الزامات مکمل طور پر بے بنیاد اور جھوٹ پر مبنی ہیں۔
پریس ریلیز میں کہا گیا ہے کہ الیکشن کمیشن کسی قسم کے دباو کو خاطر میں نہ لاتے ہوئے آئین اور قانون کے مطابق فیصلے کر رہا ہے اور کرتا رہے گا۔ جہاں تک الیکشن کروانے کا معاملہ ہے تو یہ فیصلہ الیکشن کمیشن کے دائرہ اختیار میں نہیں ہے۔
کمیشن کا کہنا ہے کہ الیکشن دو ہی صورتوں میں ہوسکتے ہیں۔ اسمبلیاں اپنی مدت پوری کرچکی ہوں یا وزیراعظم اسمبلی کو تحلیل کر دیں ۔ فی الحال ایسی کوئی صورتحال موجود نہیں ہے۔
کمشین کا مزید کہنا ہے کہ الیکشن کمیشن آف پاکستان کی یہ ذمہ داری ہے کہ وہ شفاف الیکشن کو یقینی بنائے اور جب بھی الیکشن ہوں گے اس امر کو یقینی بنایا جائے گا۔
یاد رہے پاکستان تحریک انصاف کے چئیرمین عمران خان چیف الیکشن کمشنر اور الیکشن کمیشن کو تنقید کا نشانہ بناتے آئے ہیں۔
ایڈیشنل سیشن جج ظفر اقبال نے سابق وزیر اعظم عمران خان کے خلاف دفعہ 144 کی خلاف ورزی پر درج مقدمے میں دی گئی عبوری ضمانت میں 30 ستمبر تک توسیع کردی ہے۔
دفعہ 144 کیس میں عمران خان کی حاضری سے استثنیٰ کی درخواست بھی منظور کرلی گئی ہے۔
رہنما تحریک انصاف فواد چوہدری نے کہا ہے کہ اسحق ڈار کی پاکستان واپسی ’نظامِ انصاف کے منھ پر تھپڑ ہے۔‘
انھوں نے ٹویٹ میں کہا ہے کہ ’جب ایک مفرور سیدھا وطن واپس آکر اعلیٰ عہدوں پر براجمان ہو جائے تو جج صاحبان جتنی مرضی تقریریں کرلیں انصاف کا نظام عوامی اعتماد کبھی حاصل نہیں کر پائے گا۔ اسحق ڈار کا آنا پاکستان کے نظام انصاف کے منہ پر زناٹے دارتھپڑ ہے جس کی گونج میں جج صاحبان کے بلند بانگ دعویٰ دب کر رہ گئے ہیں۔‘
الیکشن کمیشن نے سابق وزیر اعظم عمران خان، اسد عمر اور فواد چوہدری کو توہین الیکشن کمیشن کے معاملے پر 11 اکتوبر کو ذاتی حیثیت میں پیش ہونے کا حکم دیا ہے۔
توہین الیکشن کمیشن کیس کی سماعت ممبر سندھ نثار درانی کی سربراہی میں قائم چار رکنی بینچ نے کی۔ اس دوران تحریک انصاف کے وکیل فیصل چوہدری نے کہا کہ ’الیکشن کمیشن کے شوکاز نوٹسز کو لاہور ہائی کورٹ نے معطل کردیا ہے۔ بہتر ہے کہ ہائی کورٹ کے فیصلے کا انتظار کر لیا جائے۔‘
اس پر ممبر کے پی نے کہا کہ ’کیا آپ کے موکل کو قانون اور آئین کا احترام نہیں کرنا چاہیے۔ کیا آپ کا موکل آئین و قانون سے مبرا ہے؟‘
فیصل چوہدری کا کہنا تھا کہ ’الیکشن کمیشن بھی قانون سے مبرا نہیں ہے۔ آپ پر بھی آرٹیکل 5 لاگو ہو سکتا ہے۔ الیکشن کمیشن کے قواعد کو بھی چیلنج کیا گیا ہے۔
’میرے موکل الیکشن کمیشن سمیت تمام آئینی اداروں کو تسلیم کرتے ہیں۔ الیکشن کمیشن کے نوٹسز آئین و قانون کے مطابق نہیں ہیں۔‘
ممبر کے پی کا کہنا تھا کہ ’آپ کا موکل سابق وزیر اعظم ہے۔ آئینی اداروں کا احترام ان پر فرض ہے۔‘
فیصل چوہدری نے کہا کہ ’اگر ہائی کورٹ کمیشن کے حق میں فیصلہ دے تو میرے موکل ضرور پیش ہوں گے۔ کچھ ایشوز ہیں، الیکشن کمیشن کے ساتھ اعتماد کا فقدان ہے۔ ہائی کورٹ میں 29 ستمبر کو سماعت ہے۔ آپ دل بڑا کر کے لمبی تاریخ ڈے دیں۔‘
ممبر کے پی نے کہا کہ ’دل بڑا ہو جائے تو انسان مر بھی سکتا ہے۔‘
اسلام آباد ہائی کورٹ نے اڈیالہ جیل راولپنڈی میں قیدیوں پر مبینہ تشدد اور غیر انسانی سلوک کے معاملے پر اسے ’حراستی کیمپ‘ سے تشبیہ دیتے ہوئے تحقیقات کا حکم دیا ہے۔
اسلام آباد ہائی کورٹ کے چیف جسٹس نے اپنے حکم میں کہا کہ ’قیدی کی جانب سے دائر درخواست میں لگائے گئے الزامات بادی النظر میں بے بنیاد نہیں ہیں۔‘
عدالت نے اپنے حکم میں کہا کہ ’خفیہ رپورٹ کے مطابق اڈیالہ جیل کو قانون کے مطابق چلانے کے بجائے حراستی کیمپ بنا دیا گیا ہے۔‘
اس عدالتی حکم میں اس بات کا بھی ذکر کیا گیا ہے کہ ’اڈیالہ جیل میں قیدیوں سے غیر انسانی سلوک کیا جاتا ہے اور انسانی حقوق کی سنگین خلاف ورزیاں ہوتی ہیں۔‘
اسلام آباد ہائیکورٹ نے اپنے حکم میں قومی انسانی حقوق کمیشن کو اڈیالہ جیل میں ہونے والی انسانی حقوق کی پامالیوں کی تحقیقات کا حکم دیا ہے۔ اسلام اباد ہائی کورٹ نے قومی انسانی حقوق کمیشن کے رکنِ پنجاب کو تحقیقاتی رپورٹ جلد سے جلد اسلام آباد ہائیکورٹ میں جمع کروانے کا کہا ہے۔
واضح رہے کہ اسلام اباد ہائی کورٹ کے چیف جسٹس نے سنیچر کو اڈیالہ جیل کا دورہ کیا تھا۔ عمران خان کے سابق چیف آف سٹاف شہباز گل نے بھی حراست کے دوران جنسی تشدد کا الزام عائد کیا تھا۔
مسلم لیگ ن کی نائب صدر مریم نواز کی لاہور ہائیکورٹ میں پاسپورٹ کے حصول کے لیے متفرق درخواست پر سماعت کے دوران احتساب کے ادارے نیب نے اپنے جواب میں کہا کہ انھیں ’مریم نواز کے پاسپورٹ کی ضرورت نہیں۔‘
چیف جسٹس لاہور ہائیکورٹ کی سربراہی میں تین رکنی بینچ نے مریم نواز کی درخواست پر سماعت کی۔ اس دوران نیب نے اپنے جواب میں بتایا کہ ’مریم نواز کی درخواست میں موقف بنیادی حقوق کے نفاذ کا ہے۔ سپریم کورٹ قرار دے چکی ہے کہ فوجداری مقدمہ درج ہونے سے کسی کو آئینی حقوق سے محروم نہیں رکھا جاسکتا۔‘
لاہور ہائیکورٹ نے درخواست پر سماعت 3 اکتوبر تک ملتوی کر دی ہے۔
اس موقع پر ڈپٹی پراسکیوٹر جنرل سید وقار حسین اور سپیشل پراسکیوٹر سید فیصل رضا بخاری عدالت میں پیش ہوئے۔
وکیل نے بتایا کہ امجد پرویز ایڈووکیٹ دوسری عدالت میں ہیں، تھوڑا سا انتظار کر لیا جائے۔ اس پر چیف جسٹس لاہور ہائیکورٹ نے ریمارکس دیے ’سماعت کے لیے وقت مقرر تھا، امجد پرویز ایڈووکیٹ کو علم تھا۔‘
چیف جسٹس محمد امیر بھٹی نے ریمارکس دیے کہ ’یہ وکالت آتی ہے ان کو، فل بینچ کے پاس یہ ایک ہی کیس تھا؟ ان کو یہ بھی نہیں پتہ کہ کسی عدالت کے پاس پیش ہونا ہے؟‘
عدالت نے دو منٹ انتظار کرنے کے بعد کیس کو 3 اکتوبر تک ملتوی کر دیا۔ بنچ کے چیمبر میں چلے جانے کے ایک منٹ بعد امجد پرویز ایڈووکیٹ عدالت پہنچ گئے۔
شیخ رشید کی اسلام آباد ہائیکورٹ میں دائر کردہ درخواست پر سماعت سے متعلق مزید اپ ڈیٹس۔۔۔
چیف جسٹس اسلام آباد ہائیکورٹ نے استفسار کیا کہ ’درخواست گزار جب حکومت میں تھے تو کیا آپ نے وہ معاونین خصوصی اور مشیروں کی لسٹ لگائی؟‘
جسٹس اطہر من اللہ نے شیخ رشید کو مخاطب کرتے ہوئے کہا کہ ’جب آپ وزیر داخلہ تھے کیا انھوں نے اڈیالہ جیل کا دورہ کیا، ان کو اندازہ نہیں وہاں ہو کیا رہا ہےۓ‘
ان کا کہنا تھا کہ ’شیخ صاحب آپ کا احترام ہے آپ پارلیمنٹ کی بے توقیری نہ کریں۔‘
انھوں نے کہا کہ ’یہ کورٹ پارلیمنٹ کا بھی احترام کرتی ہے۔ غیر ضروری ایگزیکٹو کے اختیارات میں بھی مداخلت نہیں کرتی۔‘
چیف جسٹس اسلام آباد ہائیکورٹ نے درخواست گزار کو مخاطب کرتے ہوئے کہا کہ ’اگر آپ کا کوئی انفرادی بنیادی حقوق متاثر ہو رہا ہے تو ضرور عدالت آئیں لیکن اس طرح نہیں۔‘
انھوں نے ریمارکس دیے کہ ’یہ آپ کی بے بنیاد پٹیشن ہے۔ آپ کو جرمانہ بھی کر سکتے تھے لیکن تحمل کا مظاہرہ کر رہے ہیں۔‘
جسٹس اطہر من اللہ کا کہنا تھا کہ ’جو بھی مقابلہ کرنا ہے جائیں پارلیمنٹ میں۔ پارلیمنٹ سے بڑا فورم اور کوئی نہیں ہے۔‘
بینچ کے سربراہ کا کہنا تھا کہ ’حکومت کا احتساب پارلیمنٹ خود کرتی ہے۔ آپ عدالت کو پارلیمنٹ کے احتساب میں کیوں لا رہے ہیں۔‘
چیف جسٹس اسلام آباد ہائیکورٹ نے درخواست گزار کو مخاطب کرتے ہوئے کہا کہ ’شیخ صاحب آپ کا احترام ہے عدالتوں کو ان سیاسی معاملات سے دور رکھیں۔‘ ان کا کہنا تھا کہ ماضی میں عدالتوں کا غلط استعمال کیا گیا اب اس کو ختم ہونا چاہیے۔
اسلام آباد ہائی کورٹ میں 72 رکنی وفاقی کابینہ کی تشکیل کے خلاف شیخ رشید کی درخواست پر سماعت کے دوران اسلام آباد ہائی کورٹ کے چیف جسٹس اطہر من اللہ سیاسی نوعیت کی پٹیشن عدالت لانے پر شدید برہم ہوئے۔
سماعت پر درخواست گزار شیخ رشید اپنے وکیل کے ہمراہ عدالت کے سامنے پیش ہوئے تھے۔ اس موقع پر چیف جسٹس اسلام آباد ہائیکورٹ نے ریمارکس دیے کہ ’آئندہ ایسی پٹیشن آئی تو مثالی جرمانہ عائد کریں گے۔‘
’پارلیمنٹ کی مزید بے توقیری نہ کریں۔ یہی مائنڈ سیٹ ہے جس نے پارلیمنٹ کو نقصان پہنچایا۔‘
درخواست گزار کے وکیل کا موقف تھا کہ ’اس حوالے سے عدالت کے علاوہ ہمارے پاس اور کوئی فورم نہیں‘ جس پر بینچ کے سربراہ کا کہنا تھا کہ ’پارلیمنٹ کی بے توقیری بہت ہو چکی۔ ایسی پٹیشن عدالت نہیں آنی چاہیے۔‘
چیف جسٹس اطہر من اللہ کا کہنا تھا کہ ’پارلیمنٹ میں منتخب نمائندے ہیں، وہ فورم ہے۔ عدالت مداخلت نہیں کرے گی۔‘
تحریک انصاف کا کہنا ہے کہ عمران خان آج پشاور روانہ ہوں گے جہاں وزیراعلیٰ خیبرپختونخوا محمود خان ان کا خیر مقدم کریں گے۔
عمران خان ایوانِ وزیراعلیٰ میں علما مشائخ کے بڑے اجتماع سے خصوصی خطاب کریں گے۔
دورۂ پشاور کے دوران چیئرمین عمران خان انصاف یوتھ ونگ اور انصاف سٹوڈنٹس فیڈریشن کے زیرِ اہتمام کنونشن سے بھی مخاطب ہوں گے۔
اسلام آباد کی ایک مقامی عدالت نے 25 مئی کو پی ٹی آئی کے لانگ مارچ کے دوران توڑ پھوڑ سے متعلق مقدمے میں سابق وزیر اعظم عمران خان کی عبوری ضمانت میں 13 اکتوبر تک توسیع کر دی ہے۔
عمران خان آج بھی عدالت میں پیش نہیں ہوئے اور ان کی طرف سے بابر اعوان نے حاضری سے استثنا کی درخواست دائر کی تھی جو منظور کر لی گئی۔
آمدن سے زائد اثاثوں کے نیب ریفرنس میں اشتہاری قرار دیے گئے ملزم اسحاق ڈار کے متوقع سرینڈر پر احتساب عدالت کے اطراف کی سیکورٹی سخت کی گئی ہے۔
جوڈیشل کمپلیکس جانے والے راستے کو خاردار تاریں لگا کر عام ٹریفک کے لیے بند کر دیا گیا۔
احتساب عدالت نے اسحاق ڈار کے دائمی وارنٹ گرفتاری 7 اکتوبر تک معطل کر رکھے ہیں۔ عدالت نے تحریری حکم میں کہا تھا کہ ملزم خود عدالت میں پیش ہونا چاہتا ہے تو ایک موقع دیا جانا ضروری ہے۔
عدالت نے تحریری آرڈر میں لکھا کہ اسحاق ڈار کے وارنٹ ان کی عدالت حاضری یقینی بنانے کے لیے ہی تھے۔
نیب نے اسحاق ڈار کے خلاف 8 ستمبر 2017 کو آمدن سے زائد اثاثوں کا ریفرنس دائر کیا تھا۔ احتساب عدالت نے 27 ستمبر 2017 کو اسحاق ڈار پر فرد جرم عائد کی جبکہ 11 دسمبر 2017 کو اسحاق ڈار کو اشتہاری قرار دیتے ہوئے دائمی وارنٹ گرفتاری جاری کیے گئے تھے۔
نامہ نگار شہزاد ملک کے مطابق نامزد وزیر خزانہ اسحاق ڈار اب سے کچھ دیر کے بعد اسلام آباد کی احتساب عدالت میں پیش ہو رہے ہیں جہاں وہ اپنے اپ کو سرنڈر کریں گے جس کے بعد عدالت ان کے دائمی وارنٹ گرفتاری ختم کرے گی۔
احتساب عدالت کے جج محمد بشیر نے قانون نافذ کرنے والے اداروں کو سات اکتوبر تک اسحاق ڈار کو گرفتار کرنے سے روک رکھا ہے۔
اطلاعات کے مطابق اسحاق ڈار آج سینیٹ کے رکن کی حیثیت سے حلف اٹھائیں گے۔
وزیر داخلہ رانا ثنا اللہ نے کہا ہے کہ ان کی معلومات کے مطابق انٹیلیجنس ادارے آئی بی اور آئی ایس آئی نے آڈیو لیکس کے معاملے پر اپنی ابتدائی انکوائری مکمل کر لی ہے اور وہ یہ رپورٹ آئندہ قومی سلامتی کمیٹی کے اجلاس میں پیش کریں گے۔
جیو نیوز کے اینکر شاہزیب خانزادہ سے گفتگو کے دوران ان کا کہنا تھا کہ یہ ’فون ہیکنگ‘ کا معاملہ ہے اور اگر کسی نے پی ایم ہاؤس کو بگ کیا تو سکیورٹی کی سنگین خلاف ورزی ہوگی۔
انھوں نے بتایا کہ وزیر اعظم شہباز شریف نے قومی سلامتی کمیٹی کا اجلاس بلایا ہے جہاں اعلیٰ سول اور عسکری قیادت موجود ہوگی۔
صدر مملکت ڈاکٹر عارف علوی نے آڈیو لیکس معاملے کو ’تشویشناک رجحان‘ قرار دیا ہے اور کہا ہے کہ نجی گفتگو کا لیک ہونا ’غیبت‘ کے زمرے میں آتا ہے جس کی حوصلہ شکنی کی ضرورت ہے۔
سرکاری خبر رساں ادارے اے پی پی کے مطابق پیر کو گورنر ہاؤس کراچی میں صحافیوں سے گفتگو کرتے ہوئے ان کا کہنا تھا کہ ’ہر شخص کی پرائیویسی (رازداری) ایک امانت ہے جسے برقرار رکھا جانا چاہیے۔ نجی گفتگو یا تبصرے کو لیک کرنا اور جعلی خبریں پھیلانا غیر اخلاقی ہے اور اس سے معاشرے میں خوف و ہراس پھیلتا ہے۔‘
صدر عارف علوی نے یہ بھی کہا کہ ’ہمار ے معاشرے کو غیبت اور جعلی خبروں کے مسئلے کا سامنا ہے جو کہ عام طور پر کسی واقعہ کو حوالہ اور سیاق و سباق سے ہٹ کر بیان کرنے سے متعلق ہے۔
’ہمیں خود ڈسپلن کا مظاہرہ کرنا چاہیے کہ کسی کی نجی گفتگو میں دلچسپی نہ لیں جو بعض اوقات لوگوں اور ملکوں کے درمیان تعلقات کی خرابی کی وجہ بن جاتی ہے۔‘
پاکستان کے وزیر خارجہ بلاول بھٹو زرداری کا کہنا ہے کہ پاکستان میں ’گرین‘ انقلاب کا وقت ہے اور امریکی مدد سے ہزاروں ماحول دوست نوکریاں پیدا کی جا سکتی ہیں۔
پاکستان کے وزیر خارجہ بلاول بھٹو زرداری نے امریکہ کے دورے کے دوران اپنے امریکی ہم منصب انٹونی بلنکن سے ملاقات کے بعد پریس کانفرنس کرتے ہوئے کہا ہے کہ آج امریکہ آنے کا ایک مقصد تھا، اس وقت پاکستان ایک قدرتی آفت اور تباہی کا شکار ہے۔ پاکستان موسمیاتی تبدیلی کا شکار ہونے والے دس بدترین ممالک میں شامل ہے جبکہ پاکستان کاربن گیسوں کا اخراج صفر اعشاریہ آٹھ فیصد سے بھی کم کرتا ہے۔
آج پاکستان میں کروڑوں افراد بلاواسطہ اور بلواسطہ اس سیلاب سے متاثر ہوئے ہیں جس نے پاکستان میں سینکڑوں کلومیٹر پر محیط علاقے کو ایک بڑے دریا میں بدل دیا ہے۔
انھوں نے امریکی سیکرٹری خارجہ کو مخاطب کرتے ہوئے کہا کہ پاکستان ماحولیاتی انصاف پر امریکی مدد اور تعاون چاہتا ہے۔
ان کا کہنا تھا کہ اب پاکستان میں گرین (ماحول دوست) انقلاب کا وقت ہے ، پاکستان میں امریکی تعاون سے لاکھوں گرین (ماحول دوست) نوکریاں پیدا کی جا سکتی ہے، ہزاروں ماحول دوست منصوبوں کا آغاز کیا جا سکتا ہے۔
انھوں نے امریکہ کی جانب سے فوڈ سکیورٹی کی مد میں اضافی دس ملین ڈالرز کی امداد کا شکریہ ادا کرتے ہوئے امریکی سیکرٹری خارجہ کو پاکستان کے دورے کی دعوت بھی دی۔
ان کا کہنا تھا کہ ’اس ضمن میں ہم امید کرتے ہیں کہ جلد ہی آپ ہمیں پاکستان کا دورہ کر کے مہمان نوازی کا موقع دیں گے۔‘
دوطرفہ تعلقات پر بات کرتے ہوئے وزیر خارجہ بلاول بھٹو کا کہنا تھا کہ پاکستان اور امریکہ کے تعلقات بہت مضبوط ہیں، اور دونوں ملکوں نے جب بھی مل کر کام کیا تو مشکل اہداف حاصل کیے، ان تعلقات کو معیشت، زراعت سمیت متعدد شعبہ جات میں بڑھانے اور مضبوط کرنے کی ضرورت ہے۔
ان کا کہنا تھا کہ خوشی ہوئی کہ امریکہ محکمہ خارجہ اور پاکستانی وزارت خارجہ میں امریکہ اور پاکستان کے مابین ایک بار پھر سفارتی کاری لوٹ آئی ہے۔
امریکی سیکرٹری خارجہ انٹونی بلنکن نے پاکستان کو فوڈ سکیورٹی کی مد میں اضافی دس ملین ڈالرز امداد دینے کا اعلان کیا ہے۔
واشنگٹن میں پاکستانی وزیر خارجہ بلاول بھٹو سے ملاقات کے بعد پریس کانفرنس کرتے ہوئے انٹونی بلنکن نے پاکستان میں سیلاب سے ہونے والی تباہ کاریوں کا حوالہ دیتے ہوئے کہا کہ یہ پاکستان کے لیے انتہائی مشکل وقت ہے اور اس مشکل وقت میں امریکہ ماضی کی طرح پاکستان اور پاکستانی عوام کے ساتھ کھڑا ہے۔
ان کا کہنا تھا کہ امریکہ اس مشکل وقت میں سیلاب متاثرہ افراد کی مدد جاری رکھے گا۔ ان کا کہنا تھا کہ سیلاب کے چیلنج سے فوری نہ نمٹا گیا تو اس کے دور رس تنائج مرتب ہوں گے۔ انھوں نے کہا کہ امریکہ نے اب تک سیلاب متاثرین کے لیے 55 ملین ڈالرز کی امداد کی ہے اور اب فوڈ سکیورٹی کے مد میں اضافی دس ملین ڈالرز کی امداد دے رہے ہیں۔
پاکستان اور امریکہ دو طرفہ تعلقات پر بات کرتے ہوئے ان کا کہنا تھا کہ پاکستان اور امریکہ کے مخلتف سطحوں پر مضوط تعلقات ہیں، خواہ وہ سفارتی ہوں یا عوامی سطح پر۔
ان کا کہنا تھا کہ گذشتہ دو دہائیوں کے دوران بہت سے امریکی اداروں نے پاکستانی نوجوانوں کو مخلتف ہنر کی تربیت دی ہیں۔ پاکستان اور امریکہ کے درمیان نوجوانوں کی تعلیم اور دیگر شعبہ جات کے لیے متعدد ایکسچینج پروگرام دہائیوں سے جاری ہیں اور مستقبل میں بھی جاری رہیں گے، کیونکہ ان پروگرامز کے ذریعے دونوں ممالک کے عوام ایک دوسرے سے سیکھ رہے ہیں۔
ان کا کہنا تھا کہ دونوں ممالک کے درمیان معاشی تعلقات مزید مضبوط کیے جا سکتے ہیں۔
افغانستان پر بات کرتے ہوئے امریکی سیکرٹری خارجہ کا کہنا تھا کہ پاکستان اور امریکہ کا دو دہائیوں تک ایک مشترکہ مقصد افغانستان میں امن کا رہا اور آج بھی دونوں ملک مشترکہ طور پر ایک پرامن افغانستان کے خواہاں ہیں۔