زیادہ دیر نہیں ہے اس لیے سب میری کال کا انتظار کریں: عمران خان

لائیو کوریج

1. 29 ستمبر 2022سپریم کورٹ میں ‏نیب آرڈیننس میں ترامیم کے خلاف عمران خان کی درخواست سماعت کے لیے مقرر

   سپریم کورٹ میں ‏نیب آرڈیننس میں ترامیم کے خلاف سابق وزیر اعظم عمران خان کی درخواست سماعت کے لیے مقرر ہوگئی ہے۔

   نامہ نگار شہزاد ملک کے مطابق ‏چیف جسٹس عمر عطا بندیال کی سربراہی میں تین رکنی بینچ چار اکتوبر کو اس درخواست کی سماعت کرے گا۔

   ‏جسٹس اعجاز الاحسن اور جسٹس منصور علی شاہ اس تین رکنی بینچ کا حصہ ہوں گے۔

   عدالت نے اٹارنی جنرل اور ایڈیشنل پراسیکیوٹر جنرل نیب سمیت دیگر فریقین کو نوٹس جاری کیے ہیں۔

   عمران خان نے اپنی درخواست میں نیب ترامیم کو کالعدم قرار دینے کی استدعا کر رکھی ہے۔

   مزید پڑھیے: نیب آرڈیننس میں ترامیم کے بعد ادارے کا ’من و عن‘ عمل کرنے کا فیصلہ، ’واپس کیے گئے مقدمات متعلقہ عدالتوں کو بھیجے جائیں گے‘

2. 29 ستمبر 2022یہ ہیں وہ اصل مقاصد جن کے لیے عمران خان کو ہٹایا: اسد عمر

   رہنما تحریک انصاف اسد عمر کہتے ہیں کہ ’روز مہنگائی بڑھ رہی ہے اور روز امپورٹڈ حکومت کے لیڈروں کے مقدمے خارج ہو رہیں ہیں۔

   ’یہ ہیں وہ اصل مقاصد جن کے لیے سازش کر کے عمران خان کو ہٹایا۔‘

3. 29 ستمبر 2022عوامی رائے عامہ میں اس فیصلے کی کوئی حیثیت ہی نہیں: فواد چوہدری

   رہنما تحریک انصاف فواد چوہدری نے کہا ہے کہ ’پاکستان کے ادارے عوام کا اعتماد کھو چکے ہیں۔ وہ کسی کے حق میں فیصلہ دیں یا خلاف عوامی رائے عامہ میں اس فیصلے کی کوئی حیثیت ہی نہیں رہ گئی۔

   ’مریم نواز کا جرم اربوں روپے کے ایون فیلڈ کے محلات ہیں اس جرم میں ان کا کردار کسی شک و شبہ سے بالاتر ہے۔ بہرحال پاکستان کی تاریخ کا ایک اور تاریک دن۔!

   ان کا سوال ہے کہ ’اب قوم کا اگلا سوال یہ ہے کہ جج صاحبان ہمیں بتائیں کہ لندن کے اربوں روپے کے اپارٹمنٹس جن میں شریف فیملی برسوں سے رہائش پذیر ہے اور جہاں جائیداد بچے دے رہی ہے آخر کس کے ہیں؟

4. 29 ستمبر 2022امریکہ کے لیے پاکستان کی برآمدات میں اضافہ: سٹیٹ بینک

   سٹیٹ بینک کا کہنا ہے کہ مالی سال 2022-23 کے پہلے دو مہینوں کے دوران پاکستانی مصنوعات سب سے زیادہ امریکہ برآمد کی گئیں جبکہ برطانیہ اور چین دوسرے نمبر پر رہے۔

   سٹیٹ بینک کے مطابق جولائی تا اگست 2022-23 کے دوران امریکہ کو کل برآمدات 1122.883 ملین ڈالر ریکارڈ کی گئیں جو کہ جولائی اگست 22۔2021 کے دوران 1011.482 ملین ڈالر کی برآمدات کے مقابلے میں 11.01 فیصد کی نمو کو ظاہر کرتی ہیں۔

5. 29 ستمبر 2022احتساب عدالت کا جولائی 2018 کا فیصلہ کالعدم قرار: اسلام آباد ہائیکورٹ کا مختصر تحریری فیصلہ

   اسلام آباد ہائی کورٹ کے جسٹس عامر فاروق اور جسٹس محسن اختر کیانی نے مریم نواز اور کیپٹن صفدر کی بریت کا مختصر تحریری فیصلہ جاری کیا ہے۔

   اس مختصر فیصلہ کے مطابق ’احتساب عدالت کا جولائی 2018 کا فیصلہ کالعدم قرار دیا جاتا ہے۔ وجوہات پر مشتمل تفصیلی فیصلہ بعد میں جاری کیا جائے گا۔‘

   عدالت کا کہنا ہے کہ ’مریم نواز اور کیپٹن صفدر کی اپیلوں کی منظوری کی وجوہات بعد میں جاری ہوں گی۔‘

   اسلام آباد ہائیکورٹ نے دونوں کو تمام سزاؤں سے بری قرار دیا ہے۔

6. 29 ستمبر 2022شہباز شریف: ایون فیلڈ ریفرنس میں مریم نواز کی بریت احتساب کے نام نہاد نظام کے منھ پر تھپڑ ہے

   وزیراعظم شہباز شریف نے مریم نواز شریف اور کیپٹن (ر) صفدر کی سزائیں کالعدم ہونے پر اظہار تشکر کیا ہے۔

   ایک بیان کے مطابق ’مریم نواز کے بری ہونے پر قائد محمد نوازشریف کو مبارک پیش کرتا ہوں۔ امید ہے کہ میرے قائد محمد نواز شریف کے خلاف جج ارشد ملک مرحوم کی گواہی پر انصاف کے تقاضے پورے ہوں گے۔

   ’اللہ تعالی کا شکر ادا کرتے ہیں کہ بیٹی مریم اور بیٹے صفدر کو بالآخر انصاف ملا۔‘

   ٹوئٹر پر پیغام میں انھوں نے کہا کہ ’سیاسی انتقام کا ایک تاریک دور آج انجام کو پہنچا اور بے گناہ سرخرو ہوئے ہیں۔ مریم نواز شریف اور کیپٹن (ر) صفدر نے بہادری، صبر اور ثابت قدمی سے مشکل ترین حالات کا سامنا کیا، عدالتی فیصلے سے جھوٹ، بہتان اور کردار کشی کی تمام عمارت زمیں بوس ہو گئی ہے۔‘

   ’ایون فیلڈ ریفرنس میں مریم نواز کی بریت احتساب کے نام نہاد نظام کے منھ پر زناٹے دار تھپڑ ہے جس کے ذریعے شریف خاندان کو نشانہ بنایا گیا۔ عدالت سے بری ہونے پر بیٹی مریم اور صفدر کو مبارکباد پیش کرتا ہوں۔‘

7. 29 ستمبر 2022اسلام آباد آئے کسانوں کے کیا مطالبات ہیں؟

   وفاقی دارالحکومت اسلام آباد میں ملک بھر سے آئے ہوئے ہزاروں کسانوں کا کہنا ہے کہ وہ اس وقت تک اپنا احتجاج ختم نہیں کریں گے جب تک وزیرِ اعظم شہباز شریف کی جانب سے ان کے مطالبات تسلیم نہیں کیے جاتے۔

   ان کسانوں کے کیا مطالبات ہیں جاننے کے لیے دیکھیے حسن عباس اور محمد ابراہیم کا فیس بک لائیو۔۔۔

8. 29 ستمبر 2022عمران خان: اپنی قوم کو جلد اسلام آباد کی کال دوں گا

   سابق وزیر اعظم عمران خان نے کہا ہے کہ وہ تیاری مکمل کرنے کے بعد اپنی قوم کو جلد اسلام آباد کی کال دینے والے ہیں۔

   مظفرآباد میں جلسے سے خطاب کرتے ہوئے ان کا کہنا تھا کہ ’میں جلد اپنی قوم کو کال دوں گا۔ اور میں کال دینے والا ہوں، اپنی تیاری مکمل کر رہا ہوں۔ جب میری تیاری مکمل ہوئی تو آپ نے میرے ساتھ آنا ہے۔‘

   انھوں نے کہا کہ ’اسحاق ڈار جب بھی وزیر خارجہ بنا ملک کا دیوالیہ نکال کر چلا گیا۔ ہم جب حکومت میں آئے تو تاریخ کا سب سے بڑا خسارہ تھا۔

   ’یہ چور آ کر ہمارے اوپر بیٹھے ہیں، ان کے ہینڈلر سمجھتے ہیں کہ ہم انھیں قبول کر لیں گے۔۔۔ کسی غلط فہمی میں نہ رہیں۔‘

   وزیر اعظم سے متعلق عمران خان کا کہنا تھا کہ ’شہباز شریف کا شکریہ ادا کرنا چاہتا ہوں کہ آپ نے وزیر اعظم آفس سے میری پرنسپل سیکریٹری اعظم خان سے بات چیت آڈیو لیک کر دی۔۔۔ اب ساری دنیا کو پتا چلے گا کہ سائفر، مراسلہ حقیقت ہے۔‘

   ’شہباز شریف مجھے نقصان پہنچانا چاہتے تھے لیکن انھوں نے اپنا ہی بیڑا غرق کر لیا۔‘

   انھوں نے کہا کہ ’میں شہباز شریف کو چیری بلاسم اس لیے کہتا ہوں کہ شہباز شریف جب بھی کوئی بوٹ دیکھتا ہے تو پالش شروع کر دیتا ہے، خاص طور پر ایک بوٹ جو سب سے بڑا بوٹ ہوتا ہے۔ آپ جانتے ہیں وہ کون سا بوٹ ہوتا ہے۔ اس کی ایسی پالش کرتا ہے اس میں شکل نظر آنا شروع ہوجاتی ہے۔‘

   ’چیف الیکشن کمشنر ن لیگ کے ساتھ مل کر میچ فکس کرتا ہے۔ ہم ان کے خلاف ہر قانونی کارروائی کریں گے۔‘

9. 29 ستمبر 2022ایون فیلڈ ریفرنس: مریم نواز بری، عدالت میں کیا ہوا؟

10. 29 ستمبر 2022عمران خان جتنی جھوٹی تاویلیں لے آئے، وہ ناکام اور نواز شریف سرخرو ہوئے: مریم نواز

    پاکستان مسلم لیگ ن کی رہنما مریم نواز نے ایون فیلڈ ریفرنس میں بریت کے بعد میڈیا سے گفتگو کرتے ہوئے کہا ہے کہ اس فیصلے سے ثابت ہوا کہ عمران خان ناکام اور نواز شریف سرخرو ہوئے۔

    انھوں نے کہا کہ ’میرا نہیں خیال کہ اتنے کڑے احتساب سے کوئی سیاسی لیڈر نہیں گزرا جو نواز شریف گزرا اور کوئی اس طرح سرخرو نہیں ہوا جس طرح وہ ہوئے۔‘

    ان کا مزید کہنا تھا کہ ’جس شخص نے الزام لگایا، جھوٹ بولا اور بہتان لگایا، آج اس کا چہرہ دیکھنا چاہتی ہوں کہ اس کے پاس کہنے کو کیا ہے۔‘

    مریم نواز نے کہا کہ ’عمران خان جتنی جھوٹی تاویلیں لے آئے، وہ ناکام اور نواز شریف سرخرو ہوئے۔‘

    انھوں نے کہا کہ بہت جلد نواز شریف واپس آئیں گے۔ آج بس یہی کہنا چاہوں گی کہ آج عمران خان ایک بے بس شخص ہے۔

11. 29 ستمبر 2022ایون فیلڈ ریفرنس میں بریت کے بعد مریم نواز کی میڈیا سے گفتگو

12. 29 ستمبر 2022بریکنگ, اسلام آباد ہائیکورٹ نے ایون فیلڈ ریفرنس میں مریم نواز کو بری کر دیا

    اسلام آباد ہائیکورٹ کے دو رکنی بینچ نے پاکستان مسلم لیگ ن کی نائب صدر مریم نواز کی جانب سے ایون فیلڈ ریفرنس میں احتساب عدالت سے ملنے والی سزا کے خلاف اپیل منظور کرتے ہوئے انھیں بری کر دیا ہے۔

    مریم نواز کو سنہ 2018 میں آٹھ سال قید اور جرمانے کی سزا سنائی گئی تھی۔

13. 29 ستمبر 2022بریکنگ, ایون فیلڈ ریفرنس سزا کے خلاف اپیلوں پر دلائل مکمل، فیصلہ محفوظ

    بی بی سی کے نامہ نگار شہزار ملک کے مطابق ایون فیلڈ ریفرنس سزا کے خلاف اپیلوں پر دلائل مکمل ہو چکے ہیں اور ڈویژن بینچ کی جانب سے فیصلہ محفوظ کر لیا گیا ہے۔

14. 29 ستمبر 2022اگر نواز شریف کا کیس سے تعلق نہیں تو پھر مریم نواز کے خلاف نیب کا کیس نہیں بنتا: جسٹس عامر فاروق

    جسٹس عامر فاروق نے ریمارکس دیے کہ پہلے خود کو تو واضح کر لیں پھر عدالت کو بتائیں۔

    نیب کے وکیل کا کہنا تھا کہ نواز شریف نے پبلک آفس ہولڈر ہوتے ہوئے مریم نواز کے نام پر لندن پراپرٹیز خریدیں۔

    بینچ کے سربراہ نے ریمارکس دیے کہ جو متفرق درخواستیں دائر ہوئیں اس کے علاوہ نیب کے پاس کوئی کیس نہیں۔

    جسٹس عامر فاروق کا کہنا تھا کہ پراپرٹیز کی تفصیلات لینا بالکل بھی مشکل نہیں تھا۔

    جسٹس محسن اختر کیانی نے ریمارکس دیے کہ ’نیب لندن سے آئے دو دستاویزات کو شواہد کے طور پر پیش کر رہا ہے۔ ان دستاویزات پر تو دعویٰ ڈگری نہیں ہوتا۔

    نیب کے وکیل کا کہنا تھا کہ نیب کا کیس مختلف ہے، ہم شریف فیملی کے موقف کو درست تسلیم نہیں کرتے۔ جسٹس عامر فاروق نے ریمارکس دیے کہ نیب کا کیس پھر صرف دو لیٹرز پر ہے جو وہاں سے آئے۔

    انھوں نے کہا کہ ’ان لیٹرز کے ذریعے نواز شریف کا تعلق کہیں دکھا دیں، جسٹس محسن اختر کیانی نے ریمارکس دیے کہ اگر مرکزی کیس ثابت ہو گا تو پھر نیب کا تعلق آئے گا۔

    بینچ کے سربراہ کا کہنا تھا کہ اگر نواز شریف کا تعلق نہیں تو پھر مریم نواز کے خلاف نیب کا کیس نہیں بنتا۔

    نیب کے وکیل کا کہنا تھا کہ ’مریم نواز، نواز شریف کی پراپرٹیز کی بے نامی مالک تھیں۔‘

    اس پر بینچ کے سربراہ نے نیب کے وکیل کو مخاطب کرتے ہوئے کہا کہ ’بے نامی پر نہ جائیں اس میں پھر آپ خود پھنس جائیں گے۔‘

15. 29 ستمبر 2022نیب کا پورا کیس شریف خاندان کے اپنے جوابات پر بنایا گیا ہے: جسٹس عامر فاروق

    ایون فیلڈ ریفرنس اپیل کی اسلام آباد ہائی کورٹ میں سماعت

    سماعت کے دوران جسٹس عامر فاروق نے کہا کہ نیب کا پورا کیس شریف خاندان کے اپنے جوابات پر بنایا گیا ہے۔

    انھوں نے کہا کہ ’اگر شریف خاندان سپریم کورٹ میں جواب دائر نہ کرتا تو کیس نہیں بن سکتا تھا۔ جسٹس عامر فاروق کا کہنا تھا کہ ’نیب کے بیان میں بڑا تضاد ہے۔‘

    انھوں نے کہا کہ ’پہلے نیب نے کہا مریم نواز 2006 میں لندن فلیٹس کی مالک بنیں آج کہتے ہیں 1993 میں مالک بنیں۔‘

    جسٹس عامر فاروق نے ریمارکس دیے کہ گذشتہ سماعت پر دوسرے پراسیکیوٹر نے ایک الگ مؤقف اختیار کیا اور اس پراسیکیوٹر نے کہا کہ مریم نواز کا جائیداد کی خرید میں تعلق نہیں۔

    اس پر نیب کے وکیل مظفر عباسی کا کہنا تھا کہ ’ہمارا مؤقف ہے نواز شریف نے یہ جائیدادیں مریم کے ذریعے چھپائیں، اس پر بینچ کے سربراہ نے نیب کے وکیل کو مخاطب کرتے ہوئے کہا کہ ’آپ جو بات کہہ رہے ہیں اس کو شواہد سے ثابت کریں۔ اب اِدھر اُدھر نہ جائیں جو خود کہا اس کو ثابت کریں۔‘

16. 29 ستمبر 2022ایون فیلڈ ریفرنس اپیل: مریم نواز اور کیپٹن ریٹائرڈ صفدر کی اپیل کی اسلام آباد ہائی کورٹ میں سماعت جاری

    ایون فیلڈ ریفرنس میں احتساب عدالت کے فیصلے کے خلاف مریم نواز اور کیپٹن ریٹائرڈ صفدر کی اپیل کی اسلام آباد ہائی کورٹ میں سماعت جاری ہے۔

    جسٹس عامر فاروق اور جسٹس محسن اختر کیانی پر مشتمل ڈویژن بینچ کیس کی سماعت کر رہا ہے اور نیب کی جانب سے سردار مظفر جبکہ مریم نواز کی جانب سے امجد پرویز عدالت میں پیش ہوئے ہیں۔

    خیال رہے کہ اسلام آباد کی احتساب عدالت نے سنہ 2018 میں ایون فیلڈ ریفرنس میں مریم نواز کو آٹھ سال قید اور بیس لاکھ برطانوی پاؤنڈ جرمانے کی سزا سنائی تھی جبکہ ان کے شوہر کیپٹن ریٹائرڈ صفدر کو دو سال قید کی سزا سنائی تھی۔

    سابق وزیراعظم میاں نواز شریف کو بھی اسی مقدمے میں گیارہ سال قید اور 80 لاکھ برطانوی پاؤنڈ جرمانے کی سزا سنائی تھی جبکہ عدالت نے مریم نواز اور ان کے شوہر کا مقدمہ الگ کر دیا تھا۔

17. 29 ستمبر 2022اسلام آباد میں احتجاج کرنے والے کسان ’وزیرِاعظم کی یقین دہانی تک احتجاج ختم نہیں کریں گے‘

    وفاقی دارالحکومت میں ملک بھر سے آئے ہوئے ہزاروں کسانوں کا کہنا ہے کہ وہ اس وقت تک اپنا احتجاج ختم نہیں کریں گے جب تک وزیرِ اعظم شہباز شریف کی جانب سے ان کے مطالبات تسلیم نہیں کیے جاتے۔

    یہ کسان اس وقت جناح ایونیو پر دھرنا دیے ہوئے ہیں اور آنے والے دنوں میں ان کا پروگرام ہے کہ یہ پارلیمنٹ ہاؤس کے سامنے ڈی چوک پر دھرنا دیں تاہم اسلام آباد کی انتظامیہ اور پولیس کا کہنا ہے کہ خفیہ اداروں کی رپورٹ کے مطابق اس احتجاج میں موجود کچھ مظاہرین کے پاس آتشیں اسلحہ بھی ہےاس لیے انھیں حساس علاقے میں جانے کی اجازت نہیں دی جا سکتی۔

    کسان اتحاد کے چیئرمین خالد باٹھ نے بی بی سی کو بتایا کہ ’ان کے مطالبات میں کھاد کی بلیک مارکیٹنگ کا خاتمہ، کھاد اور بیج کی وافر مقدار میں فراہمی اور گندم کی خریداری کی قیمت چار ہزار روپے فی من مقرر کی جائے۔

    خیال رہے کہ اس وقت صوبہ پنجاب میں حکومت کی طرف سے کسان سے گندم کی خریداری کی قیمت 22 سو روپے فی من مقرر کی گئی ہے۔ انھوں نے کہا کہ گندم کی کاشت میں اس وقت کسان کا ساڑھے تین ہزار روپے فی من کا خرچہ آ رہا ہے۔

    خالد باٹھ کا کہنا تھا کہ ’انھوں نے حکومت سے مطالبہ کیا تھا کہ کھاد کی تقسیم کے سلسلے میں ڈیلر کو بیچ میں سے نکال دیا جائے اور حکومت خود یونین کونسل کی سطح پر کسانوں میں کھاد تقسیم کرے لیکن ان کے مطالبے پر نہ تو پاکستان تحریک انصاف اور نہ ہی موجودہ حکومت نے عمل درآمد کیا ہے۔

    انھوں نے کہا کہ ’ان کے مطالبات تسلیم نہ ہونے کی وجہ سے آئے روز کسان کی مشکلات میں اضافہ ہو رہا ہے۔‘ خالد باٹھ کا کہنا تھا کہ ’کھاد کی بوری کے لیے کسانوں کو گھنٹوں لائنوں میں لگنا پڑتا ہے اور پھر کہیں جا کر انھیں سرکاری ریٹ پر ایک کھاد کی بوری ملتی ہے جبکہ بلیک مارکیٹ میں چاہہ کھاد کا پورا ٹرک خرید لیں۔‘

    ایک سوال پر کیا کہ کسان کسی سیاسی جماعت کا آلہ کار تو نہیں بن رہے، تو کسان اتحاد کے چیئرمین کا کہنا تھا کہ انھیں کسانوں کا مفاد عزیز ہے۔

    انھوں نے کہا کہ ’صوبہ پنجاب میں اس وقت پی ٹی ائی کی حکومت ہے اور انھوں نے کہا تھا کہ سیلاب زدہ علاقوں کے کسانوں کے جانوروں کے چارے کے لیے پندرہ ارب روپے مختص کیے گئے ہیں لیکن ابھی تک اس کا ٹینڈر بھی نہیں ہوا۔

    واضح رہے کہ کسان اتحاد سنہ 2017 سے الیکشن کمیشن میں ایک سیاسی جماعت کے طور پر بھی رجسٹرڈ ہے۔

    خالد باٹھ کا کہنا تھا کہ ضلعی انتظامیہ کے افسران نے ان سے رابطہ کیا ہے اور کہا ہے کہ وہ وزیر داخلہ سے ان کے ایک نمائندہ وفد کی ملاقات کروانے کو تیار ہیں تاہم کسانوں کا مطالبہ ہے کہ وہ وزیر اعظم سے ہی ملاقات کریں گے۔

    یہاں یہ امر قابل ذکر ہے کہ چند روز قبل بھی کسانوں کے ایک اور گروپ (خالد کھوکھر) نے اپنے مطالبات منظور کیے جانے سے متعلق اسلام آباد میں احتجاج کیا تھا اور مظاہرین کے ایک وفد کی وزیر داخلہ رانا ثنااللہ سے ملاقات کروائی گئی تھی اور مظاہرین نے اس یقین دہانی کے بعد اپنا احتجاج ختم کر دیا تھا کہ وزیراعظم میاں شہباز شریف کی امریکہ سے وطن واپسی کسانوں کے ایک نمائندہ وفد کی وزیراعظم سے ملاقات کروائی جائے گی تاہم وفاقی وزیر داخلہ کی اس یقین دہانی پر بھی ابھی تک عمل درآمد نہیں ہوا۔

18. 29 ستمبر 2022ایون فیلڈ ریفرنس: مریم نواز کی سزا کے خلاف اپیل پر سماعت آج اسلام آباد ہائی کورٹ میں ہو گی

    ایون فیلڈ ریفرنس میں مریم نواز شریف اور ان کے شوہر کیپٹن صفدر کی سزا کے خلاف اپیلیوں پر سماعت آج اسلام آباد ہائی کورٹ میں ہو گی۔

    اسلام آباد ہائی کورٹ کا جسٹس عامر فاروق اور جسٹس محسن اختر کیانی پر مشتمل دو رکنی بینچ اس مقدمے کی سماعت کرے گا۔

    نیب پراسیکیوٹر عثمان جی راشد اپنے دلائل جاری رکھیں گے جبکہ مریم نواز اور کیپٹن صفدر عدالت میں پیش ہوں گے۔ مریم نواز کی پیشی کے موقع پر سیکیورٹی کے سخت انتظامات بھی کیے جائیں گے۔

19. 29 ستمبر 2022کسان اتحاد کے احتجاج کی وجہ سے اسلام آباد ٹریفک پولیس نے متبادل رستوں کی نشاندہی کر دی, شہزاد ملک، بی بی سی اردو

    اسلام ٹریفک پولیس کے مطابق اس وقت مظاہرین سینٹورس مال کے بالکل سامنے فیصل ایونیو کے فلائی اوور کے نیچے دھرنا دیے ہوئے ہیں۔ تاہم زیڈ ٹی بی ایل انٹرچینج کے بعد متبادل روٹس کے طور پر ایکسپریس سروس روڈ اور رابطہ سڑکیں ٹریفک کے لیے رواں دواں ہیں۔

    پولیس کے مطابق جناح ایونیو، زیرو پوائنٹ زیڈ ٹی بی ایل انڈرپاس تک ایکسپریس وے، مارگلہ روڈ، جناج ایونیو پر نائینتھ ایونیو، سیونتھ ایونیو اور سرینگر ہائی وے ٹریفک کے لیے کھلے ہیں۔

    کسان ریلی کی وجہ سے جن رستوں سے ٹریفک کا رخ موڑا گیا ہے وہ فیصل ایونیو پر زیرو پوائنٹ سے فیصل چوک تک ہے۔ متبادل کے طور پر نائینتھ ایونیو اور سیونتھ ایونیو کو استعمال کیا جا سکتا ہے۔

    ریڈ زون میں ایوب چوک، ایکسپریس چوک اور نادرا چوک پر ٹریفک کا رخ موڑا گیا ہے۔ ان رستوں کے متبادل کے طور پر مارگلہ روڈ اور سرینا چوک کو استعمال کیا جا سکتا ہے۔

    ٹریفک پولیس کے مطابق اس وقت اسلام آباد کی تمام سڑکیں کھلی ہیں۔

20. 28 ستمبر 2022بریکنگ, آڈیو لیکس پر اجلاس: سائبر سکیورٹی سے متعلق’ لیگل فریم ورک‘ کی تیاری کا فیصلہ

    قومی سلامتی کمیٹی کے اجلاس میں آڈیو لیکس کے معاملے پر غور کے بعد سائبرسکیورٹی سے متعلق’ لیگل فریم ورک‘ کی تیاری کا فیصلہ کیا ہے۔

    قومی سلامتی کمیٹی کا اہم اجلاس وزیراعظم شہبازشریف کی صدارت میں بدھ کو وزیراعظم ہاﺅس میں منعقد ہوا۔

    اجلاس نے آڈیو لیکس کے معاملے پر تحقیقات کے لیے اعلیٰ اختیاراتی کمیٹی کی تشکیل کی منظوری دی۔

    وزیرداخلہ رانا ثنا اللہ اس کمیٹی کے سربراہ ہوں گے۔

    اجلاس میں وفاقی وزرا کے علاوہ سروسز چیفس، حساس اداروں کے سربراہان اور دیگر اعلیٰ حکام نے شرکت کی۔

    اجلاس نے آڈیو لیکس کے معاملے پر غور کیا۔ حساس اداروں کے سربراہان نے اجلاس کو وزیراعظم ہاﺅس سمیت دیگر اہم مقامات کی سکیورٹی، سائبرسپیس اور اس سے متعلقہ دیگر پہلوﺅں پر تفصیلی بریفنگ دی۔

    اجلاس کو بتایا گیا کہ سوشل میڈیا پر زیرگردش آڈیو ز کے معاملے پر تحقیقات کی جا رہی ہیں۔

    وزیراعظم ہاﺅس کی سکیورٹی سے متعلق بعض پہلوؤں کی نشاندہی کی گئی اور ان کے تدارک کے لیے فول پروف انتظامات کے بارے میں بتایا گیا۔

    اجلاس کو آگاہ کیا گیا کہ وزیراعظم ہاﺅس سمیت دیگر اہم مقامات، عمارتوں اور وزارتوں کی سکیورٹی کو یقینی بنانے کے لیے ہنگامی اقدامات کیے جا رہے ہیں تاکہ مستقبل میں اس نوعیت کی کسی صورتحال سے بچا جا سکے۔

    اجلاس نے مشاورت کے بعد سائیبرسکیورٹی سے متعلق’ لیگل فریم ورک‘ کی تیاری کا فیصلہ کیا اور اس ضمن میں وزارت قانون وانصاف کو’ لیگل فریم ورک‘ کی تیاری کی ہدایت کی۔

    اجلاس نے اتفاق کیا کہ جدید ٹیکنالوجی اور سائیبرسپیس کے موجودہ تبدیل شدہ ماحول کے تناظر اور تقاضوں کو مدنظر رکھتے ہوئے سکیورٹی، سیفٹی اور سرکاری کمیونیکیشنز کے محفوظ ہونے کو یقینی بنانے کا جائزہ لیا جائے تاکہ سکیورٹی نظام میں کوئی رخنہ اندازی نہ ڈال سکے۔

    وزارت خارجہ کے سیکریٹری سہیل محمود نے وزیراعظم کے ازبکستان میں حالیہ شنگھائی تعاون تنظیم (ایس۔سی۔او) کی سربراہان مملکت کی کونسل اور نیویارک میں اقوام متحدہ کی جنرل اسمبلی کے 77 ویں اجلاس میں شرکت کے حوالے سے اجلاس کو بریفنگ دی۔

    اجلاس نے ملک میں تاریخی تباہ کن سیلاب، متاثرین کے لیے ریسکیو، ریلیف کے اقدامات اور سلامتی کی موجودہ صورتحال کا جائزہ لیا۔

    اجلاس نے 3 کروڑ30 لاکھ سے زائد سیلاب متاثرین کی فوری امداد، محفوظ مقامات پر منتقلی، خوراک، علاج معالجے اورضروری اشیا کی فراہمی کے اقدامات کا تفصیلی جائزہ لیا۔